ئێمە لە تۆرە کۆمەڵایەتیەکان

ئابوری

نرخی هێلكە هەرزان دەبێت
كشتوكاڵ: لە مریشك و هێلكە گەیشتوینە ئاستی خۆژێنی

خەڵك- بەشی هەواڵ
وەزارەتی كشتوكاڵی عیراق ڕایدەگەیەنێت، كە گەیشتوونەتە ئاستی خۆژێنی لە مریشك و هێلكە و دەشڵێت: “لە كۆتایی ئەمساڵدا بەشێكی هەناردەی دەرەوە دەكەن”.

حەمید نایف، وتەبێژی وەزارەتی كشتوكاڵی عیراق بە (سۆمەریە نیوز)ی ڕاگەیاندووە، كە دوای ئەوەی هێلكەی مەفقەس بە ڕێژەیەكی زۆر هێنرایە وڵاتەوە، لە ئێستادا كێڵگە پەلەوەرییەكان دەستیان كردووە بە بەرهەمهێنان و بەهۆیەوە هێلكەی خواردن و گۆشتی مریشك دابین دەكرێت.

ڕاشیگەیاندووە، لە ئێستادا عیراق گەیشتۆتە ئاستی خۆژێنی لە هێلكەی خواردن بەتایبەتیش لە مانگی تشرینی یەكەمی داهاتوودا ڕێژەكەی بەتەواوی زیاد دەكات.

وتیشی، “ئەگەری ئەوە هەیە ئەگەر توانامان هەبێت بەرهەمی زیادەی هێلكە ڕەوانەی وڵاتانی دیكە بكەین”.

نایف ڕاشیگەیاندووە، كە گۆشتی مریشك دوای 40 ڕۆژ لە كێڵگە پەلەوەرییەكان دەردەچێت و ئەوەی وەزارەت كردویەتی تەنها هێنانی چەند بەشێكی گۆشتی مریشك بووە لە دەرەوە، چونكە مریشكی تەواو لە بەرهەمی ناوخۆ دابین دەكرێت.

لەگەڵ زۆربوونی بەرهەمی ناوخۆیی گۆشت و هێلكە، نرخی ئەو مادە خۆراكیانە لە بازاڕەكانی عیراق و هەرێمی كوردستان هەرزان دەبێت، بەجۆرێك لە ئێستادا تەبەقێك بە نزیكەی 4 هەزار دینار و كیلۆیەك گۆشتی مریشك-یش بە 1800 دینارە.

لە ئایاری ئەمساڵدا وەزارەتی كشتوكاڵی عیراق بڕیاریدا بە قەدەغەكردنی هاوردەكردنی مریشك و هێلكە و ماسی ئەوەش بەپێی بڕیاری پەڕلەمانی عیراق بە ژمارە (41)، كە لە 6ی ئایار دەرچووبوو بۆ پاراستنی بەرهەمی ناوخۆ.

ئابوری

ئەمڕۆ كۆتایی بە دابەشكردنی مووچەی مانگی 1ی ساڵی ڕابردوو دێت

خەڵك- بەشی هەواڵ

ئەمڕۆ بڕیارە مووچەی مانگی كانوونی دووەم”مانگی 1″ی ساڵی 2019 دابەش بكرێت.

بەپێی خشتەیەك كە لە وەزارەتی دارایی و ئابورییەوە بڵاوكراوەتەوە، ئەمڕۆ تەنها مووچەی خانەنشینكراوانی مەدەنی دابەش دەكرێت.

خانەنشینكراوەكان مووچەی یەك ساڵی تەواویان لای حكومەتی هەرێمی كوردستانە، بەپێچەوانەی عیراقەوە كە خانەنشینكراوەكان هەموو مانگێك لەكاتی خۆیدا مووچە وەردەگرن.

بەردەوام بە لە خوێندنەوە

ئابوری

“مووچەی خانەنشینان زیاد دەكرێت”
حكومەتی هەرێم یاسایەكی خانەنشینی یەكگرتوو ئامادە دەكات

خەڵك- بەشی هەواڵ
بەرپرسانی حكومەتی هەرێم ئاشكرای دەكەن، كە پڕۆژە یاسایەكی یەكگرتوو بۆ خانەنشینی ئامادە دەكرێت و پەڕلەمانتارێكیش دەڵێت: “بڕیارە پڕۆژە یاساكە بنێردرێتە پەڕلەمان”.

لەكاتی گفتوگۆكانی پڕۆژە یاسای چاكسازی لە پەڕلەمانی كوردستان، بەرپرستانی حكومەتی هەرێم ئاشكرایان كرد، كە 12 یاسای خانەنشینی لە هەرێم بوونیان هەیە و بڕیارە لە ماوەیەكی نزیكدا یاسای خانەنشینی یەكگرتووی هەرێم هاوشێوەی عیراق ئامادە بكرێت و بنێردرێتە پەڕلەمان بۆ پەسەند كردنی.

بەپێی بەدواداچوونی (خەڵك) كە لە سەرچاوەیەكی حكومییەوە دەستی كەوتووە، لە ئێستادا لە ئەنجوومەنی وەزیران كار لەسەر پڕۆژە یاسای خانەنشینی یەكگرتووی هەرێم دەكرێت و دوای تەواو بوونی بڕیارە بدرێتە پەڕلەمان بۆ پەسەند كردنی و هەر لەو پڕۆژە یاسایەدا ئەو خانەنشینانەی مووچەیان كەمە، مووچەیان زیاد دەكرێت و كەمترین ئاستی مووچە دیاری دەكرێت.

هەر بە وتەی سەرچاوەكە، “سندوقی خانەنشینی دروست دەكرێت و یەكەیەكی تایبەت بە خانەنشینی لە وەزارەتی دارایی دروست دەكرێت و كۆی سیستمی خانەنشینی ڕێكدەخرێتەوە”.

لای خۆشیەوە، د. شێركۆ جەودەت، سەرۆكی فراكسیۆنی یەكگرتوو لە پەڕلەمانی كوردستان بۆ (خەڵك) ئاماژەی بەوەكرد، ئێمە وەكو فراكسیۆنی یەكگرتوو لە 18-2-2019ەوە پاكێجی چاكسازیمان وەك پێشنیارە یاسا داوەتە سەرۆكایەتی پەڕلەمان و ئەوانیش ناردیان بۆ حكومەتی هەرێم و دواتر وەڵامی داوەتەوە و مانگێك لەمەوبەر ناردویەتییەوە بۆ پەڕلەمان.

ڕاشیگەیاند، ئێمە لەو پێشنیارە یاسایەدا بە زەقی داوای جێبەجێ‌ كردنی یاسای خانەنشینی یەكگرتووی عیراقی-مان كردووە، كە باس لە پێوەری 15 ساڵ خزمەت و تەمەنی 45 ساڵی دەكات، كە سیستمێكی دادپەروەرانەیە و داوامان كردووە لە هەرێمیش پەیڕەو بكرێت.

وتیشی، “بڕیارە لەماوەیەكی نزیكدا حكومەتی هەرێم یاسای خانەنشینی یەكگرتوو بنێرێت بۆ پەڕلەمان تاكو پەسەند بكرێت”.

لەكاتی پەسەند كردنی یاسای چاكسازی لە پەڕلەمانی كوردستان خانەنشینان ناڕەزاییان دەربڕی بەهۆی زیادنەكردنی مووچەكانیان، بەڵام بڕگەیەك لە یاساكە زیادكرا، كە دەبێت حكومەت لەو داهاتەی بۆی دەگەڕێتەوە مووچەی خانەنشینان زیاد بكات.

بەردەوام بە لە خوێندنەوە

ئابوری

ماوەی 3 ساڵە پلەبەرزكردنەوەی هێزەكانی پێشمەرگە ڕاگیراوە

خەڵك – بەشی هەواڵ
جێگری سەرۆكی ئەركان بۆ مەشق و ئۆپراسیۆنەكان لە وەزارەتی پێشمەرگە ڕایدەگەیەنێت، لەماوەی ڕابردوودا خشتەی پلەبەرزكردنەوەی ساڵی 2017 ڕەوانەی ئەنجوومەنی وەزیران كراوە، چاوەڕێی گەڕانەوەی خشتەكەین، دەشڵێت: “تا مانگی ئازاری ئەمساڵ 7 خشتەی پلەبەرزكردنەوەی ئەفسەرانی وەزارەتی پێشمەرگە دواكەوتووە”.

بەپێی خشتەی پلەبەرزركردنەوەی ئەفسەرانی وەزارەتی پێشمەرگە ساڵانە دوو جار لە مانگی (ئازار و ئەیلول) پلەی ئەفسەران بەرزدەكرێتەوە واتە بۆ هەر ساڵێك دوو خشتە، بەڵام تا ئێستا پلەبەرزكردنەوە بۆ ساڵەكانی (2017 -2018-2019) نەگەڕاوەتەوە بۆ هێزەكانی پێشمەرگە و لەمساڵیشدا خشتەی مانگی ئازار زیاد دەكات.

لیوا قارەمان كەمال، جێگری سەرۆكی ئەركان بۆ مەشق و ئۆپراسیۆنەكان لەوەزارەتی پێشمەرگە بە (خەڵك)ی ڕاگەیاند، لەماوەی ڕابردوودا لیژنەیەكی باڵا لە ئەنجوومەنی وەزیران سەردانی وەزارەتی پێشمەرگەی كرد، قسەوباس لەسەر خشتەی پلەبەرزركدنەوەی ئەفسەرانی وەزارەتی پێشمەرگە كرا.

وتیشی، “لەگەڵ ئەوەی لیژنەی باڵا ئەنجوومەنی وەزیران هەندێك تێبینیان هەبووە لەسەر خشتەكان، بەڵام وەزارەتی پێشمەرگە پێداگربووە لەسەر ئەوەی پێویستە لەكاتی خۆیدا ئەفسەرانی وەزارەتی پێشمەرگە پلەكانیان بۆ بەرز بكرێتەوە”.

ڕاشیگەیاند، لە ئێستادا خشتەی پلەبەرزكردنەوەی ساڵی 2017 بە خشتەی ئازار و ئەیلول لە ئەنجوومەنی وەزیرانە بۆ واژۆكردن، ئێمە چاوەڕێی ئەوەین، بەرزبكرێتەوە بۆ سەرۆكایەتی هەرێم.

ئاشكراشیكرد، كە ئەو هیچ ئاگاداری ئەوەنیە، خشتەكان واژۆ كرابێت و ڕەوانەی سەرۆكایەتی هەرێم كرابێت، بەڵام پێداگری كرد لەوەی خشتەكەیان ڕەوانەی ئەنجوومەنی وەزیران كردووە بۆ ئەوەی واژۆ بكرێت.

ئەمە لەكاتێكدایە، كە لە سەرەتای ساڵی 2016شەوە، كە ماوەی 4 ساڵە پلەبەرزكردنەوەی فەرمانبەرانی مەدەنی ڕاگیراوە، بەڵام پلەبەرزكردنەوەی ئەفسەران و كارمەندانی ناوخۆ لەكاتی خۆیدا ئەنجام دەدرێت.

لە چەند ڕۆژی ڕابردووشدا شۆڕش ئیسماعیل، وەزیری پێشمەرگەی هەرێم ڕایگەیاند، كە سەرۆك وەزیرانی هەرێمی لە كێشەی پلەبەرزكردنەوەی هێزەكانی پێشمەرگە ئاگادار كردۆتەوە و ئەویش بەڵێنی داوە چارەسەری بكات و لە چەند ڕۆژی داهاتوودا پلەبەرزكردنەوەی ساڵی 2017 بۆ هێزەكانی پێشمەرگە دەگەڕێتەوە.

بەردەوام بە لە خوێندنەوە

کوردستان