ئێمە لە تۆرە کۆمەڵایەتیەکان

کوردستان

“حكومەت لە ئاست نۆژەنكردنەوەی ڕێگای سەرەكی خاڵی سنووری باشماخ كەمتەرخەمە”

خەڵك-بەشی هەواڵ

نۆژەنكردنەوەی ڕێگای سەرەكی نێوان شارۆچكەی پێنجوێن و خاڵی سنووری باشماخ تا ئێستا تەواو نەكراوە و هاووڵاتیان و شۆفێرانیش نیگەرانن و داوا دەكەن كاری زیاتر بكرێت تاكو زووتر تەواو ببێت.

بەهۆی بوونی خاڵی سنووری باشماخ لەنێوان باشوور و ڕۆژهەڵاتی كوردستان لە سنووری شارۆچكەی پێنجوێن، فشارێكی زۆری هاووڵاتیان و شۆفێران بەسەر ڕێگای سەرەكی نێوان پێنجوێن و باشماخەوە هەیە و زیاتر لە ساڵێكە كار كردن لەو ڕێگایە بوونی هەیە، بەڵام تا ئێستا تەواو نەبووە.
لە بەدواداچوونێكی (خەڵك) دا هاووڵاتیان و شۆفێران لە شەقامەكە نیگەرانن و داوا دەكەن هەرچی زووترە ڕێگاكە تەواو بكرێت.
ئاماژەیان بۆ ئەوەش كرد، هەرچەندە ئەم ڕێگایە و خاڵە سنوورییەكە خێر و بێرێكی زۆری بۆ حكومەتی هەرێم هەیە، بەڵام حكومەت لە ئاست چارەسەركردن و نۆژەنكردنەوەی ڕێگا و شەقامەكانی ناوچەكە كەمتەرخەمە و نەیتوانیوە بە خێرایی كارەكانی ڕایی بكات.

لای خۆشییەوە زانا ڕەحمان قائیمقامی پێنجوێن بە (خەڵك)ی ڕاگەیاند، كاركردن لە ڕێگا و شەقام و پڕۆژەكە بەردەوامە و تەواو نەبووە.

وتیشی”ئومێد دەكەین ئەمساڵ بەشی زۆری پڕۆژەكە تەواو ببێت”.

کوردستان

“ناكرێت كەسانێك گرنگیان پێبدرێت و هاووڵاتیانی ئاساییش لەنەخۆشخانە حكومییەكان بەبێ ئۆكسجین گیان لەدەستبدەن”

خەڵك – بەشی هەواڵ

بەپێی نووسراوێكی فەڕمی وەزارەتی تەندروستی كە بۆ دیاریكردنی نرخی چارەسەری تووشبووانی كۆرۆنا لەكەرتی تایبەت دەریكردووە، هەر تووشبوویەكی كۆرۆنا كە لەژێر هەناسەی دەستكردا بێت و ئەگەری مانەوەی ژیانی زۆر كەمە بڕی ملیۆنێك و 500 هەزار دیناری دیاریكرد و نووسراوەكەی ناڕەزایی گەورەی لێكەوتووەتەوە.

شنۆ ئەشقی سورچی پەرلەمانتاری فڕاكسیۆنی یەكێتی لەلیژنەی كاروباری تەندروستی و ژینگە و مافی بەكاربەر لەپەرلەمانی كوردستان بە ماڵپەڕی فەڕمی حزبەكەی ڕاگەیاندووە: لەسەر ئەو نرخانەی وەزارەتی تەندروستی بۆ چارەسەری تووشبووانی كۆرۆنا لەنەخۆشخانە تایبەتەكان دیاریكردووە قسەی جددیمان دەبێت، دەبێت وەزارەتی تەندروستی بەڕێنماییەكەدا بچێتەوە، ناكرێت ڕەچاوی باری دارایی هاووڵاتیان بەتایبەت تووشبووانی كۆرۆنا هێندەی تر باری سەر شانیان قورستر بكرێت.

شنۆ ئەشقی سورچی وتیشی: ڕێنماییەكە جێگای سەیرە كە جیاوازی بكرێت لەنێوان تووشبووانی كۆرۆنا، ناكرێت تووشبووانی كۆرۆنا جیابكرێنەوە و كەسانێكی تووشبوو گرنگیان پێبدرێت و هاووڵاتیانی ئاساییش لەنەخۆشخانە حكومییەكان بەبێ ئۆكسجین و خزمەتگوزاری بە بەرچاوی كەسوكاریانەوە گیان لەدەستبدەن.

بەپێی نووسراوەكەی وەزارەتی تەندروستی، مانەوەی شەوێكی تووشبووی كۆرۆنا لەقاوشی نەخۆشخانەی تایبەت بێ ئۆكسجین 500 هەزار دینارە، لەقاوش بەئۆكسجین 700 هەزار دینار و لەبەشی چاودێری چڕ بەئامێری CPAP ملیۆنێك و 200 هەزارو لەچاودێری چڕ بەئامێری BIPAP ملیۆنێك و 300 هەزار دینار، هەروەها لەچاودێری چڕی هەناسە بەئامێری Ventilator بڕی ملیۆنێك و 500 هەزار دینار وەردەگرێت.

بەردەوام بە لە خوێندنەوە

کوردستان

د. هێرش سەید سەلیم: ئەو نرخانەی وەزارەتی تەندروستی ڕایگەیاندووە ئەوپەڕی فەشەلی ئیدارەدانی كەرتی گشتییە

خەڵك – بەشی هەواڵ

جێگری بەڕێوەبەری گشتی تەندروستی سلێمانی ڕایدەگەیەنێت:”ئەو نرخانەی وەزارەتی تەندروستی ڕایگەیاندووە هەڵكردنی ئاڵای سپییە بۆ كەرتی تایبەت و فەشەلی ئیدارەدانی كەرتی گشتییە “.

د. هێرش سەید سەلیم جێگری بەڕێوەبەری گشتی تەندروستی سلێمانی لە هەژماری تایبەتی خۆی لە تۆڕی كۆمەڵایەتی فەیسبوك بڵاویكردەوە:”ئەو جۆرە لە بازرگانی كردنە بە نەخۆشی كۆرۆنا لە نەخۆشخانەی تایبەت هەڵكردنی ئاڵای سپی وەزارەتی تەندروستییە بۆ كەرتی تایبەت و ئەوپەڕی فەشەلی ئیدارەدانی كەرتی گشتییە لە دابین كردن یان كۆنتڕۆڵ كردنی باری تەندروستی و تەشەنەسندنی كۆرۆنا لە هەرێمی كوردستان بە گشتی و تایبەتیش زۆنی زەرد كە هیچ خزمەتێك بە فراوان كردنی خزمەتگوزاری تایبەت بە كۆرۆنا ناكا جگە لە جیاكاری چینایەتی هاووڵاتیان كەوتنە ژێر پێی خەڵكی نەدار جگە لەوەش ئاڕاستەیەكی خراپە بۆ سارد كردنەوەی كارمەندانی كەرتی گشتی بەو پێیەی ئەوان بێ مووچە خزمەت دەكەن و لەولاوە كارمەندانی كەرتی تایبەت بە پاككراوی لێی دەخۆن”.

جێگری بەڕێوەبەری گشتی تەندروستی سلێمانی دەشڵێت:”ئەمجۆرە لە داهێنانە بەس لە قەد و باڵای ئەم جۆرە لە ئیدارە دەوەشێتەوە كە نەتوانێت سادەترین خزمەتگوزاری بۆ كۆی هاووڵاتیانی دابین بكات”.

د. هێرش سەید سەلیم ئاماژەبەوەش دەكات:”من تا ئێرە ڕوو سوورم كە ئەوەی لە توانام دابووبێ لەگەڵ هاوكارەكانمان كردوومانە بەبێ بەرامبەر وە شانازی بە سەرجەم ستافی بەرەنگاربوونەوەی كۆرۆنا لە بەڕێوەبەرایەتی گشتی تەندروستی سلێمانی و دەورووبەری دەكەم كە لە كارگوزارێكەوە تا بەڕێوەبەری گشتی لەماوەی ڕابردوو و ئێستاشدا بەردەوامن لە دابین كردنی خزمەتگوزاری خۆڕایی بۆ تووشبووانی كۆرۆنا لە سەنتەرەكانمان بەڵام لێرە بەدواوە ئۆباڵی بەلاڕێدا بردنی ئەو خزمەتە لە ئەستۆی ئێمە نییە ئەمە گوزارشت لە ڕای خۆم دەكات هەر كەسێكیش هاوڕایە لەگەڵم دەتوانێ شێری ئەم ڕایەم بكا و دەنگ هەڵبڕێ”.

 

دەقی نووسینەكەی جێگری بەڕێوەبەری گشتی تەندروستی سلێمانی:

ئەو جۆرە لە بازرگانی كردنە بە نەخۆشی كۆرۆنا لە نەخۆشخانەی تایبەت هەڵكردنی ئاڵای سپی وەزارەتی تەندروستییە بۆ كەرتی تایبەت و ئەوپەڕی فەشەلی ئیدارەدانی كەرتی گشتییە لە دابین كردن یان كۆنتڕۆڵ كردنی باری تەندروستی و تەشەنەسندنی كۆرۆنا لە هەرێمی كوردستان بە گشتی و تایبەتیش زۆنی زەرد كە هیچ خزمەتێك بە فراوان كردنی خزمەتگوزاری تایبەت بە كۆرۆنا ناكا جگە لە جیاكاری چینایەتی هاووڵاتیان كەوتنە ژێر پێی خەڵكی نەدار جگە لەوەش ئاڕاستەیەكی خراپە بۆ سارد كردنەوەی كارمەندانی كەرتی گشتی بەو پێیەی ئەوان بێ مووچە خزمەت دەكەن و لەولاوە كارمەندانی كەرتی تایبەت بە پاككراوی لێی دەخۆن.

ئەمجۆرە لە داهێنانە بەس لە قەد و باڵای ئەم جۆرە لە ئیدارە دەوەشێتەوە كە نەتوانێت سادەترین خزمەتگوزاری بۆ كۆی هاووڵاتیانی دابین بكات.

من تا ئێرە ڕوو سوورم كە ئەوەی لە توانام دابووبێ لەگەڵ هاوكارەكانمان كردوومانە بەبێ بەرامبەر وە شانازی بە سەرجەم ستافی بەرەنگاربوونەوەی كۆرۆنا لە بەڕێوەبەرایەتی گشتی تەندروستی سلێمانی و دەورووبەری دەكەم كە لە كارگوزارێكەوە تا بەڕێوەبەری گشتی لەماوەی ڕابردوو و ئێستاشدا بەردەوامن لە دابین كردنی خزمەتگوزاری خۆڕایی بۆ تووشبووانی كۆرۆنا لە سەنتەرەكانمان بەڵام لێرە بەدواوە ئۆباڵی بەلاڕێدا بردنی ئەو خزمەتە لە ئەستۆی ئێمە نییە ئەمە گوزارشت لە ڕای خۆم دەكات هەر كەسێكیش هاوڕایە لەگەڵم دەتوانێ شێری ئەم ڕایەم بكا و دەنگ هەڵبڕێ …..

د. هێرش سەید سەلیم
١٠/٠٨/٢٠٢٠

بەردەوام بە لە خوێندنەوە

کوردستان

داوای مووچەكانیان دەكەن
تەندروستکارانی دوو شارۆچکە بایکۆتی دەوام دەكەن

 

خەڵك – یەحیا حبیب

بەهۆی دواکەوتنی موچە و پێنەدانی لە کاتی خۆیدا،  تەندروستکارانی شارۆچکەی شارەزوور و سەیدسادق بایکۆتی دەوامی فەرمیان کرد.

کەمال ئەحمەد، لێپرسراوی ڕاگەیاندنی نەخۆشخانەی گشتی شەهید ڕەئوف بەگ بە (خەڵك)ی ڕاگەیاند، “پاش نیوەڕۆی ئەمڕۆ پزیشکانی بەشی فریاکەوتن و کارمەندانی نەخۆشخانەکە بە هۆی دواکەوتنی مووچە، بایکۆتی دەوامیان کردووە و داوای دابەشکردنی موچە لە کاتی خۆیدا دەکەن “.

هەر بە پێی زانیارییەکان تەندروستکارانی نەخۆشخانەی گشتی شەهید شەوکەتی حاجی موشیر لە شارۆچکەی سەیدسادق ، هاوشێوەی شارەزوور بایکۆتی دەوامیان کردووە.

تۆڕی میدیایی (خەڵك) پەیوەندی بە ئیدارەی نەخۆشخانەی گشتی شەهید شەوکەتی حاجی موشیر لە شارۆچکەی سەیدسادقەوە كرد بەڵام پەیوەندییەکە بەردەست نەبوو.

بەردەوام بە لە خوێندنەوە

کوردستان