ئێمە لە تۆرە کۆمەڵایەتیەکان

ئابوری

ژووری بازرگانی سلێمانی هۆشداری لە گرانبوونی نرخی شتومەك دەدات

خەڵك – بەشی هەواڵ
سەرۆكی ژووری بازرگانی و پیشەسازی سلێمانی ڕایدەگەیەنێت، بەشێك لە بارە ترانزێتەكانی بازرگانان لە مەرزی باشماخ ڕادەگیرێن و ڕێگە نادرێت بێتە هەرێمی كوردستانەوە، دەشڵێت: “ئەگەر بەزووترین كێشەكە چارەسەر نەكرێت زیانی گەورە بەكەرتی ئابووری هەرێمی كوردستان دەكەوێت”.

ئەمڕۆ ١٧ی تەمموزی ٢٠١٩، ژمارەیەك لە بازرگانانی شاری سلێمانی بە مەبەستی چارەسەر كردنی كێشە و گرفتەكانیان سەردانی ژووری بازرگانی و پیشەسازی سلێمانیان كرد و لەگەڵ سیروان محەمەد، سەرۆكی ژوورەكە كۆبوونەوە.

ئەو بازرگانانە ئاماژەیان بۆ ئەوەكردووە، زیاتر لە ١٥٠ بارهەڵگر لەبەرئەوەی لەدیوی ئێرانی مەرزی باشماخەوە وەسڵی ٥٠ دۆلاریان بۆ نەكراوە ڕاگیراون و ڕێگە نادرێت بێتە هەرێمی كوردستانەوە.

سیروان محەمەد، سەرۆكی ژووری بازرگانی و پیشەسازی سلێمانی لە لێدوانێكی ڕۆژنامەوانیدا ڕایگەیاندووە، بازرگانان نیگەران لەوەی، كە بارەكانیان بە بیانوی نەبڕینی وەسڵی ٥٠ دۆلاری لە دیوی ئێرانەوە ڕێگری لێ دەكرێت، كە ئەمە مەترسیەكی گەورەیە بۆ سەر دەروازە سنووریەكانی هەرێمی كوردستان.

وتیشی، “ئەگەر ئەم كێشەیە بەردەوام بێت، بازرگانان ناچارن ڕێگای بازرگانی بگۆڕن و لە مەرزەكانی ناوەڕاست و باشوری عیراقەوە كاڵاكانیان هاوردە بكەن”.

ڕاشیگەیاندووە، داوام لە وەزیری دارای و ئابوری حكومەتی هەرێم و پارێزگاری سلێمانی ئەوەیە بێنە سەرخەت و كێشەكە چارەسەر بكەن تا بازرگانان تووشی زەرەر و زیانی زیاتر نەبن، چونكە ئەگەر بە زووترین كێشەكە چارەسەر نەكرێت زیانی گەورە بە كەرتی ئابووری هەرێمی كوردستان دەكەوێت كاڵا و شتومەك لەسەر هاووڵاتیان گران دەبێت و بازرگانان ناچار دەبن ڕێرەوی كاری بازرگانی بگۆڕن.

ئابوری

پسپۆڕێكی ئابووری: پێویستە حكومەت متمانە بۆ هاووڵاتیان و فەرمانبەران بگەڕێنێتەوە

خەڵك-ئارام سەردار
مامۆستایەكی زانكۆ ڕایدەگەیەنێت، بۆ كەمكردنەوە ڕێژەی هەژاری پێوستە حكومەت هاوكاری پڕۆژەی بچووك و پەرەپێدانی وەبەرهێنان بێت لەسەرجەم كەرتە جیاوازەكان.

ئیدریس ڕەمەزان، مامۆستای زانكۆ و پسپۆڕی ئابووری سەبارەت بە ڕێژەی هەژاری و چۆنیەتی كاركردنی حكومەت بە(خەڵك)ی ڕاگەیاند، پێویستە حكومەت متمانە بۆ هاووڵاتیان بگەڕێنێتەوە، بەتایبەت فەرمانبەرانی كەرتی گشتی، كەوا مووچەكانیان لەكاتی خۆی پێبدرێت و ئێستاش، كە مووچەكانیان لەكاتی خۆی پێدەدرێت و هیچ جۆرە كێشەیەك لەپڕۆسەی دابەشكردنی مووچە نیە.

دەشڵێت،: “دەبێت حكومەت هەوڵی دۆزینەوەی دەرفەت و هەلی كار بدات بۆ گەنجان و تاكەكانی كۆمەڵگە لەكەرتی گشتی یان كەرتی تایبەت بێت، لەهەمان كاتدا حكومەت هاوكاری تاكەكانی كۆمەڵگە بێت بۆ پەرەپێدانی پڕۆژەی بچووك و كاری بچووك بە پێشكەشكردنی هاوكاری دارایی و مەعنەوی”.

ئەو مامۆستایەی زانكۆ ئاماژە بۆ ئەوەش دەكات، بۆ كەمكردنەوەی ڕێژەی بێكاری و هەژاری پێویستە كەرتی وەبەرهێنان ببووژێندرێتەوە و كار بۆ بەردەوامی و فراوانكردنی وەبەرهێنان بدرێت لەسەرجەم كەرتە جیاوازەكان.

بەپێی ئامارێكی دەستەی ئاماری هەرێمی كوردستان ڕێژەی هەژاری لە سەر ئاستی هەرێمی كوردستان و پارێزگاكان و عیراق خستەڕوو و لە خشتەیەكدا ڕێژەی هەژاری بۆ ساڵانی ٢٠١٤ و ٢٠١٨ دیاری كرا، كە بەپێی خشتەی دەستەی ئامار لە ساڵی ۲۰۱۸ ڕێژەی هەژاری لەهەرێم لە ٥.٥٪ بووە، لەعیراق لە ۲۰٪، لەسەر ئاستی پارێزگاكانیش لە دهۆك زۆرترین ڕێژە هەبووە، كە لە ۸.٦٪ بووە، لە هەولێر لە ٦.۷٪ بووە و سلێمانیش كەمترین ڕێژەی بێكاری تێدا تۆماركراوە لە ٤.٥٪ بووە، بەپێچەوانەوە ڕێژەی بێكاری لە ساڵی ۲۰۱٤دا لە دهۆك لە ۱۲.٤٪ بووە لەهەولێر لە ۱.٥٪ بووە، سلێمانیش ۱.۲٪ بووە، لەسەر ئاستی هەرێم ڕێژەی بێكاری لە ۱۲.٥٪ بووە، لەعیراقیش لەهەمان ساڵ ۲۲.٥٪ بووە.

بەردەوام بە لە خوێندنەوە

ئابوری

هاتووچۆ چەند مەرجێكی نوێ‌ بۆ ئێرباگی ئۆتۆمبێل دیاری دەكات

خەڵك- بەشی هەواڵ
بەڕێوەبەرایەتی هاتووچۆی سلێمانی ڕایبدەگەیەنێت، كە ئەو ئۆتۆمبێلانەی مامەڵەیان بۆ دەكرێت لە بەڕێوەبەرایەتییەكەیان دەبێت ئێرباگی كارابێت و لە هەردوولای سەكن و سوكان هەبێت.

ڕائید باقی سابیر، لێپرسراوی هۆبەی وردبینی لە هاتووچۆی سلێمانی بە (ترافیك ئێف ئێم)ی ڕاگەیاندووە، هەر ئۆتۆمبێلێ،ك كە لەبەڕێوەبەرایەتی هاتووچۆی پارێزگای سلێمانی مامەڵەی بۆ دەكرێت، دەبێت سیستمی ئێرباگی كارابێت ‌و ئێرباگی داشبۆرد “سەكن” ‌و ئێرباگی سەر سوكان “شۆفێر”ی تێدابێت ‌و كاربكات.

ئاماژەی بەوەشكرد، هەر شۆفێرێك یەكێك لەو ئێرباگانەی یاخود هەردووكی تەقی بێت یان كارنەكات، پێویستە ئێرباگەكانی بۆ دابنرێتەوە، دواتر خاوەنەكەی دەتوانێت مامەڵەكە لەهاتووچۆی سلێمانی بۆ تەواو بكات.

ڕاشیگەیاند، ئێرباگی لاشان ‌و لا تەنیشتەكان ئەگەر كاریش نەكەن نابنە ڕێگر‌ و كێشە بۆ ڕاییكردنی مامەڵەی ئۆتۆمبێلەكە لە بەڕێوەبەرایەتی هاتووچۆ.

بەردەوام بە لە خوێندنەوە

ئابوری

لە سلێمانی دەست بەسەر دەرمانی سێكسی و قەڵەوبوون و دابەزاندنی كێشدا دەگیرێت

خەڵك- بەشی هەواڵ
لیژنە هاوبەشەكان هەڵمەتێكی فراوانی بۆ دەستبەسەرداگرتنی دەرمانی زیادكردن و كەمكردنی كێش و دەرمانە جنسییەكان دەستپێكرد و هەوڵمەتەكەش بەردەوام دەبێت و ڕێكاری توندی یاسایی بەرامبەر سەرپێچیكاران دەگرنە بەر.

لەشكر حەمید، سەرۆكی لیژنە هاوبەشەكانی قائیمقامیەتی سلێمانی ڕایگەیاند، تێبینیمان كردبوو لە هەندێك شوێن دەرمانی نایاسایی بەتایبەت ئەو دەرمانانەی، كە بۆ زیادكردن و كەمكردنەوەی كێش بەكاردەهێنرێن لەگەڵ دەرمانە سێكسییەكان دەفرۆشرێن، بۆئەو مەبەستەش وەكو لیژنە هاوبەشەكانی قائیمقامیەت و بە چاودێری قائیمقامی سلێمانی هەڵمەتێكی فراوانمان دەستپێكرد بۆ دەستگرتن بەسەر تەواوی ئەو دەرمانە نایاساییانەدا، هەر ئەمڕۆش لەناو شاری سلێمانی لە 9 شوێندا دەستمان بەسەر بڕێكی زۆر لەو دەرمانانەدا گرت و ڕێكاری پێویستمان لەگەڵ خاوەنەكانی گرتۆتە‌بەر.

وتیشی، ” بەشێكی ئەو دەرمانانە لەناو دوكانی فرۆشتنی جل و پێڵاودا دانراون و بەڕێگەی جیاواز دەفرۆشرێن بە هاووڵاتیان”.

سەرۆكی لیژنە هاوبەشەكان ئاماژەی بەشكرد، كە هیچكام لەو دەرمانانە بە كوالێتی كۆنتڕۆڵدا تێنەپەڕیون و پشكنینیان بۆنەكراوە، هەربۆیە ستیكەریان پێوە نییە.

لەشكر حەمید داوای لە هاووڵاتیان كرد، پێش هەموو شتێك لە ڕێگەی پەیجە ئۆنلاینەكانەوە دەرمان نەكڕن و لە هەر شوێنێكیش دەرمان دەكڕن دڵنیابنەوە لەوەی، كە ئەو شوێنە مۆڵتی هەیە و دەرمانەكەش ستیكەری لێدراوە، چونكە هەر دەرمانێك ستیكەری پێوە نەبوو نایاساییە.

وتیشی، “هەڵمەتی گەڕان بە دوای ئەو دەرمانانە و ئەو كەسانەی مامەڵەی پێوەدەكەن بەردەوام دەبێت و ڕێكاری پێویست لەگەڵ فرۆشیارەكەدا دەگیرێتەبەر، هەربۆیە لەكاتی بینینی فرۆشتنی دەرمانی كەمكردن و زیادكردنی كێش و دەرمانە سێكسیەكاندا دەستبەجێ لیژنە هاوبەشەكانی لێ ئاگاداربكەنەوە بۆئەوەی كاری پێویستی لەگەڵدا بكرێت”.

بەردەوام بە لە خوێندنەوە

کوردستان