ئێمە لە تۆرە کۆمەڵایەتیەکان

کوردستان

د.ئارام: بەرەوپێشبردنی ئاستی زانستی پێویستی بە شەونخونی هەیە

خەڵك- بەشی هەواڵ
وەزیری خوێندنی باڵا و توێژینەوەی زانستی ڕایگەیاند، بەرەوپێشبردنی ئاستی زانستی دامەزراوەكانی خوێندنی باڵا، پێویستی بە شەونخونی و كاری بەردەوام هەیە، دەشڵێت: “پێویستە هەمووان لە بەرامبەر بەرپرسیاریەتیدابین”.

د. ئارام محەمەد قادر، وەزیری خوێندنی باڵا و توێژینەوەی زانستی لەمیانی بەسەركردنەوەی هۆبە و بەش و بەڕێوەبەرایەتی و فەرمانگەكانی وەزارەتەكەی لەگەڵ ڕاوێژكار و بەڕێوەبەرانی گشتی، یەكە بە یەكەی فەرمانگەكانی دیوانی وەزارەتی بەسەركردەوە و لە نزیكەوە لەگەڵ مامۆستا و فەرمانبەر و ئەو هاووڵاتیانەی بۆ ڕایكردنی كاروبارەكانیان سەردانی وەزارەتیان كردبوو گفتوگۆی كرد.

بەپێی ڕاگەیەندراوی وەزارەتەكە، كە وێنەی دراوە بە (خەڵك) د. ئارام بە مامۆستا و فەرمانبەرانی وەزارەتەكەی ڕایگەیاندووە، پێویستە هەمووان لە ئاست خواست و داواكاری ئەو كەسانە بین، كە ڕۆژانە بۆ ڕایكردنی كاروبارەكانیان سەردانی وەزارەت دەكەن و پێویستە بە باشترین شێوە خزمەتیان پێشكەش بكرێت.

وتیشی، “بەرەوپێشبردنی ئاستی زانستی و ئەكادیمی دامەزراوەكانی خوێندنی باڵا لە هەرێمەكەمان، پێویستی بە شەونخونی و كاری بەردەوام هەیە، پێوستە هەمووان لە ئاست ئەو بەرپرسیارەتیەدابین بۆ ئەوەی ئامانجەكانمان بێنینە دی”.

وەزیری خوێندنی باڵا و توێژینەوەی زانستی لە كەموكوڕی و داواكاری مامۆستا و فەرمانبەرانی وەزارەتی كۆڵییەوە و بەڵێنیدا كاربكەن بۆ ئەوەی بتوانن بە پشتیوانی هەموولایەك كەموكوڕییەكان چارەسەربكرێن و كار بۆ جێبەجیكردنی داواكاریەكانیش بكرێت.

کوردستان

“كوردانی ڕۆژئاوا، تەكلیف و ڕجایان لە هیچ هێزێك نەكردووە تاكو بێن بەهانایانەوە”

خەڵك-بەشی هەواڵ

چاودێرێكی سیاسی ڕایدەگەیەنێت، كوردانی ڕۆژئاوا هیچ كات ڕێگای ئاشتی و دانوستانیان ڕەتنەكردۆتەوە.

ئەمریكا و توركیا ڕێككەوتوون لەسەر دروستكردنی ناوچەیەكی ئارام، لەم نێوەندەشدا كوردانی ڕۆژئاوا زیانمەندی سەرەكی دەبن و ڕووبەڕووی شەڕێكی دەرەكی و نێوخۆیی دەبنەوە، ئەمەش لەكاتێكدایە چەند ساڵێكە خۆیان ناوچەكە بەڕێوە دەبەن.

فەتحوڵڵا حوسەینی، ئەندامی نوێنەرایەتی ڕێڤەبەری خۆسەری ڕۆژئاوا لەباشووری كوردستان بە (خەڵك)ی ڕاگەیاند، ئێمە تەنها پشتمان بە خۆمان بەستووە، نەك ئەمریكا و هاوپەیمانان.

وتیشی، “لە ئێستادا چەكی بەهێزی جۆراوجۆری وڵاتانمان لەلایە و دەتوانین بەرگری لە خۆمان بكەین ئەگەر چی ئەمریكاش لەگەڵ توركیا ڕێكبكەوێت”.

لای خۆشییەوە لوقمان حەسەن، چاودێری سیاسی بە (خەڵك)ی ڕاگەیاند، كورد دەبێت بێلایەنی خۆی بپارێزێت لەو شەڕەی لە ناوچەكەدا ڕوودەدات، خۆشبەختانە كوردانی ڕۆژئاواش چەندین جار لەسەر زاری بەرپرسە باڵاكانیان ئاماژەیان بۆ ئەوە كردووە، كە فەرموویان لە سوپای ئەمریكا نەكردووە و ئەوان خۆیان هاتوون و هاوكاریان كردووین و ئەوەش ڕەتناكەینەوە.

وتیشی، “لۆژێك وامان پێدەڵێت پەیەدە و كوردانی ڕۆژئاوا مۆدێلێكی خۆسەری دیموكراتیان هەڵبژاردووە و تەكلیف و ڕجایان لە هیچ هێزێك نەكردووە تاكو بێن بەهانایانەوە، بەڵكو ئەمریكا و هاوپەیمانەكان بۆخۆیان هاتوون، بەشێوەیەك چەندین ڕۆژئاوایی و ئەمریكی لەنێو ڕیزەكانی یەپەژە و یەپەگە شەڕ دەكەن”.

ئاماژە بۆ ئەوەش دەكات، كوردانی ڕۆژئاوا باشترین ڕێگایان هەڵبژاردووە ئەویش ئەوەیە، كە خۆیان خەباتی خۆیان دەكەن، هێندەی ئێمەش ئاگادارین ئەوان دانوستانیان ڕەتنەكردۆتەوە و بەردەوام دەستی ئاشتیان درێژ كردووە بۆ دانوستان و ئامادەبوون و شاندیان ناردووە بۆ سوریا، بەڵام هەلومەرجەكە وایخواستووە دۆخەكە بەم شێوەیە بێت و لەوانەیە لە داهاتوودا دۆخەكە بگۆڕدرێت.

بەردەوام بە لە خوێندنەوە

کوردستان

پەڕلەمانتارێكی كورد: لەبری شەڕی كورسی مەینەتی كەركوكیەكان چارەسەر بكەن

خەڵك – بەشی هەواڵ
ئەندامێكی كوردی پەڕلەمانی عیراق ڕایدەگەیەنێت، دادگای باڵای فیدڕاڵی لەتازەترین تەفسیریدا بڵاویكردەوە مادەی ۱٤۰ی دەستوور هیچ كێشەیەكی یاسایی نیە و بەجێبەجێنەكردنی لەكاتی خۆیدا بەها دەستووریەكەی لەدەست نادات، دەشڵێت: “سیاسیەكانی عیراق بەگشتی و كەركوك بەتایبەتی دەبێت ئەم بڕیارەی دادگا بەهەند وەرگرن و كاری لەسەربكەن”.

بەختیار جەبار شاوەیس، ئەندامی پەڕلەمانی عیراق لە فراكسیۆنی یەكێتی لە ڕاگەیەندراوێكدا ئاماژەی بەوەكردووە، دادگای باڵای فیدڕاڵی لەتازەترین تەفسیریدا، بڵاویكردەوە، كە مادەی ۱٤۰ی دەستوور هیچ كێشەیەكی یاسایی نیە و بەجێبەجێنەكردنی لەكاتی خۆیدا بەها دەستووریەكەی لەدەست نادات و كاریگەریە یاسایی و دەستووریەكانی بە بەهێزی ماوەتەوە.

دەشڵێت: “بڕیاری دادگای فیدڕاڵی لەئاستە باڵاكەدا بڕیاری كۆتایی، بڕاوەیە بەشێوەیەك كە قابیلی تانەدان و پێداچونەوەی یاسایی نیە و هەروەها شوێنی مشتومڕ و گفتوگۆی سیاسیانە نیە لەسەر جێەجێكردنی، بەپێچەوانەی ساڵانی ڕابردوو پەڕاوێزخستنی مادەكە بۆ كورد ببوە هۆكاری ئەوەی، كە هەمیشە وادەڕوانێتە ئەوانی دیكەی دەسەڵاتدار، كە مادام ئامادەنین دەستوور جێبەجێبكەن و بڕیاری دادگای باڵا فەرامۆش دەكەن، ئیتر چۆن ڕێككەوتنە سیاسیەكان جێبەجێدەكەن، كەئەمەش بێمتمانەی لێدەكەوێتەوە و دواتر پەلدەكێشێ بۆ سەرهەڵدانی كێشەی گەورە و لە ساڵانی ڕابردووشدا هەروا دەرچوو”.

ڕاشیگەیاندووە، كاتێك لە ۳۱-۱۲-۲۰۰۷كە دوا وادەی جێبەجێكردنی مادەی ۱٤۰ بوو بەڵام نەكرا، حكومەتی هەرێم ئیتر بەهانەی دەركردن و فرۆشتنی نەوتی كەوتە سەر و دواتر بەتەقینەوەی كێشەكان، مەسەلەكە پەلیكێشا بۆ ئابووری سەربەخۆ و جیابوونەوە و ڕیفراندۆم.

ئاماژەی بۆ ئەوەشكردووە، سیاسیەكانی عیراق بەگشتی و كەركوك بەتایبەتی دەبێت ئەم بڕیارەی دادگا بەهەند وەرگرن و كاری لەسەربكەن، لەبری ئەوەی هەر لەئێستاوە دڵی خۆیان بۆ بردنەوەی كورسیەكی هەڵبژاردنی ئەنجوومەنی پاریزگاكە خۆش بكەن، چونكە ژمارەی كورسی هیچ لەمەینەتیەكانی كەركوك و كەركوكیەكان كەمناكاتەوە، بەڵكو چۆنیەتی دروستكردنی كورسیەكە گرنگە كەڕێگە دەستوریەكەیە و مادەی ۱٤۰ە، خۆ ئەگەرنا كشمیر و سیناریۆ تاڵەكانی لەبەردەرگاكەدایە.

بەردەوام بە لە خوێندنەوە

کوردستان

سەرۆكایەتی هەرێم سەركۆنەی تەقینەوەكەی كابوڵ دەكات

خەڵك – بەشی هەواڵ
سەرۆكایەتی هەرێمی كوردستان سەركۆنەی تەقینەوەكەی كابوڵ-ی پایتەختی ئەفغانستان دەكات و ڕایدەگەیەنێت، كارە تیرۆرستییەكانی لەمجۆرە ئەركێكی گەورەتر دەخەنە ئەستۆی كۆمەڵگەی نێودەوڵەتی بۆ هەماهەنگی و كاری هاوبەشی زیاتر دژ بە تیرۆر و ڕووبەڕووبوونەوەی تیرۆرستان.

سەرۆكایەتی هەرێمی كوردستان لەڕاگەیاندراوێكدا، كە وێنەیەكی دەست (خەڵك) كەوتووە ڕایگەیاندووە، بە توندی سەركۆنەی ئەو كارە تیرۆرستییە دەكەین، كە دوێنێ ئێوارە ئاهەنگێكی هاوسەرگیری لە هۆڵێكی كابوڵی پایتەختی ئەفغانستان كردە ئامانج و تیایدا بە دەیان كەس كوژران و برینداربوون.

دەشڵێت: “سەرەخۆشی لە كەسوكاری قوربانییان و گەل و حكومەتی ئەفغانی دەكەین و هاوخەمیانین”.

ڕاشیگەیاندووە، كارە تیرۆرستییەكانی لەمجۆرە ئەركێكی گەورەتر دەخەنە ئەستۆی كۆمەڵگەی نێودەوڵەتی بۆ هەماهەنگی و كاری هاوبەشی زیاتر دژ بە تیرۆر و ڕووبەڕووبوونەوەی تیرۆرستان.

بەردەوام بە لە خوێندنەوە

کوردستان