ئێمە لە تۆرە کۆمەڵایەتیەکان

عێراق

حەشدی شەعبی بۆ (خەڵك): دوو سەركردەی داعش لە كەركوك دەستگیركران


خەڵك- بەشی هەواڵ
حەشدی شەعبی و هێزە ئەمنییەكانی عیراق، دوو سەركردەی ڕێكخراوی داعش لە كەركوك دەستگیردەكەن، بەرپرسێكی حەشدی شەعبی میحوەری باكووریش دەڵێت: “ئەو دوو سەركردەیە گروپیان هەبووە و بەنیازی ئەنجامدانی كاری تیرۆریستی بوون”.

عەلی حسێنی، وتەبێژی حەشدی شەعبی میحوەری باكوور، لە لێدوانێكی تایبەت بە (خەڵك) ڕایگەیاند، “دوای ئەوەی هەواڵگری هێزەكانی حەشدی شەعبی لەڕێگەی سەرچاوەكانییەوە توانی شوێنی ئەو دوو كەسە دیاری بكات، لەپاش دەركردنی یاداشتی دەستگیركردن لەلایەن دادوەرییەوە، توانرا دوو سەركردەی ڕێكخراوی داعش لەنێو شاری كەركوكدا دەستگیر بكرێن”.

بە وتەی عەلی حسێنی، “ئۆپەراسیۆنەكە بە هاوبەشی بوو لەنێوان هەواڵگری حەشدی شەعبی و هەواڵگری ناوخۆیی و لیوای 61ی هێزە عیراقییەكان”.

وتەبێژی حەشدی شەعبی دەڵێت: “ئەو دوو سەركردەیەی داعش گروپیان هەبووە، بۆیە دڵنییان لەوەی، كە پیلانیان هەبووە تەقینەوە و كاری تیرۆریستی ئەنجام بدەن، بەڵام لەئێستادا لێكۆڵینەوەیان لەگەڵدا دەكرێت و لە دوای لێكۆڵینەوەكانیش وردەكارییەكان بۆ میدیاكان دەخەینەڕوو”.

سەركردەكەی حەشدی شەعبی ڕەتیكردەوە دەستگیركراوەكان بیانی بن و وتی، “ئەو دوو سەركردەیەی داعش، كە لەلایەن هێزە ئەمنییەكانەوە دەستگیركران، عیراقین”.

ناوبەناو هێزە ئەمنییەكان و هێزەكانی حەشدی شەعبی، لە كەركوك و دەوروبەری، ئۆپەراسیۆنی سەربازی بۆ ڕاوەدونانی پاشماوەی چەكدارانی داعش ئەنجام دەدەن، ئەم ئۆپەراسیۆنانەش تا ئەندازەیەكی زۆر بوونەتە مایەی كەمكردنەوەی مەترسی هەڕەشەكانی ڕێكخراوەكە لەسەر دانیشتوانی ناوچەكە و هێزە ئەمنییەكان.

عێراق

هەڵوێستی ڕەوتی سەدر بەرانبەر بە ڕاسپاردنی مستەفا كازمی


خەڵك- بەشی هەواڵ
ڕەوتی سەدر بە سەركردایەتی موقتەدا سەدر، هەڵوێستی خۆی بەرانبەر بە ڕاسپاردنی مستەفا كازمی سەرۆكی دەزگای هەواڵگری بۆ پێكهێنانی حكومەت لەلایەن بەرهەم ساڵح سەرۆك كۆماری عیراقەوە، دەردەبڕێت.

حاكم زاملی سەركردە لە ڕەوتی سەدر، لە لێدوانێكی ڕۆژنامەوانیدا ڕایگەیاند”ڕەوتی سەدر لەگەل كۆدەنگی نیشتمانیدایە و لەگەڵ ئەو ڕاسپاردنەدایە، بەوپێیەی كازمی لەلایەن هەموو هێزە سیاسییەكان و هەموو پێكهاتەكانەوە پشتیوانی لێدەكرێت”.

بە وتەی زاملی”ڕەوتی سەدر پشتیوانی دەكات و دەنگ بە حكومەتەكەی كازمی دەدات، گەر كەسێتی كارامە و بێخەوش پێشكەش بكات، لەگەڵ ئەمەشدا هەموو ئەو كەسێتیانە ڕەتدەكاتەوە كە دەستەواژەیان لەسەرە”.

ئەمڕۆ  پێنج شەممە، بەرهەم ساڵح سەرۆك كۆماری عیراق، مستەفا كازمی سەرۆكی دەزگای هەواڵگری نیشتمانی بۆ پێكهێنانی حكومەتی نوێ‌ ڕاسپارد، پاش ئەوەی عەدنان زورفی پاشەكشەكردنی خۆی لەو ئەركە ڕاگەیاند.

كازمی لە 9ی نیسانەوە 30 ڕۆژی لەبەردمدایە بۆ پێكهێنانی حكومەتی نوێ‌ كە پێشتر محەمەد تۆفیق عەللاوی و عەدنان زورفی تێیدا شكستخواردوو بوون.

عەدنان زورفی، پاشەكشەكردنی خۆی لە بەجێگەیاندنی ئەركەكەی بۆ “پارێزگاریی لە یەكێتيی و یەكڕیزيی عیراق و بەرژەوەندییە باڵاكان گەڕاندەوە”.

شكستخواردنی زورفی لە پێكهێنانی حكومەت، دوای ڕێككەوتنی هێزە شیعی و سونی و كوردییەكان بوو لەسەر كاندیدكردنی مستەفا كازمی سەرۆكی دەزگای هەواڵگری نیشتمانی بۆ پێكهێنانی حكومەتی داهاتوو.

 

بەردەوام بە لە خوێندنەوە

عێراق

مەسعود بارزانی بەفەرمی پشتگیری لە مستەفا كازمی دەكات


خەڵك – بەشی هەواڵ
سەرۆكی پارتی دیموكراتی كوردستان لە پەیوەندییەكی تەلەفۆنیدا پشتگیریی خۆی بۆ مستەفا كازمی ، سەرۆكوەزیرانی ڕاسپێردراوی حكوومەتی عیراق ڕاگەیاند، كە ئەمڕۆ لە لایەن سەرۆككۆمارەوە بۆ ئەو پۆستە ڕاسپێردرا .

ماڵپەڕی مەسعود بارزانی، سەرۆكی پارتی دیموكراتی كوردستان لە ڕاگەیەنراوێكدا بڵاویكردووە ، ئەمڕۆ پێنجشەممە 9ی نیسانی 2020 بارزانی لەڕێی تەلەفۆنەوە پەیوەندی بە مستەفا كازمی، سەرۆكوەزیرانی ڕاسپێردراوی حكوومەتی عیراق كرد.

ڕاشیگەیاندووە، لەو پەیوەندییە تەلەفۆنییەدا مەسعود بارزانی، پشتگیریی خۆی بۆ ڕاسپاردنی مستەفا كازمی، بۆ سەرۆكایەتیی حكوومەتی عیراق ڕاگەیاند و هیوای سەركەوتنی بۆ خواست.

لە ڕاگەیەنراوەكەداهاتووە، مەسعود بارزانی هیوای خواست، كە ئەو هەنگاوە ببێتە هۆی لەیەكنزیكبوونەوەی هەموو پێكهاتەكانی عیراق و دەروازەیەكیش بێت بۆ چارەسەربوونی كێشە و قەیرانەكانی عیراق.

بەردەوام بە لە خوێندنەوە

عێراق

كەركوك، دوو داعش دەستگیركران


خەڵك- بەشی هەواڵ
بەڕێوەبەرایەتی هەواڵگری سەربازی عیراق، دەستگیركردنی دوو چەكداری ڕێكخراوی داعش لە پارێزگەی كەركوك ڕادەگەیەنێت.

ئەمڕۆ پێنج شەممە، بەڕێوەبەرایەتی هەواڵگری سەربازی عیراق لە بەیاننامەیەكدا ڕایگەیاند”پاڵەوانانی لیوای تایبەتی 61ی فەوجی تایبەت، توانیان لە بۆسەیەكدا دوو تۆمەتبار بە ماددەی 4ی تیرۆر لە كەركوك دەستگیربكەن”.

هەر لە بەیاننامەكەدا هاتووە”دەستگیركراوەكان چەكداری ڕێكخراوی داعش بوون و لەوانەن كە لەلایەن دادوەرییەوە بەپێی ماددەی 4ی تیرۆر داواكراون”.

لەم ماوەیەی دواییدا شانە نوستووەكان ڕێكخراوی داعش سەرقاڵی خۆڕێكخستنەوەن، دەستپێكردنەوەی چالاكی و جموجۆڵەكانیانیشیان لە چەند ناوچەیەكی وەك باشووری كەركوك و سنورەكانی نێوان سەڵاحەدین و دیالە و ناوچەكانی خۆرئاوای پارێزگەی ئەنبار و چەند ناوچەیەكی تر، بەڕوونی دەردەكەوێت.

 

بەردەوام بە لە خوێندنەوە

کوردستان