ئێمە لە تۆرە کۆمەڵایەتیەکان

کوردستان

پەڕلەمانتارێكی گۆڕان وەڵامی هەڤاڵ ئەبوبەكر دەداتەوە
“سلێمانی بەهۆی بێ‌ جورئەتی بەرپرسەكانی غەدری لێ‌ دەكرێت”

خەڵك – بەشی هەواڵ
ئەندامێكی پەڕلەمانی عیراق ڕایدەگەیەنێت، سلێمانی ئەو شارەیە، كە زۆر دەمێكە بە هۆی ناكارایی و بێ جورئەتی بەرپرسەكانیەوە غەدرێكی گەورەی سیاسی و ئیداری پلان بۆدارێژراوی دەرحەق ئەنجامدەدرێت، دەشڵێت: “ئەو زمانەی پارێزگاری سلێمانی بەكاری دەهێنێت چی جیاوازە لە زمانی ئەو حزبیانەی تەنها لەبەرئەوەی دەستمان بۆ مەلەفی نەوت برد تەخوینیان كردین”.

هۆشیار عەبدوڵا، ئەندامی پەڕلەمانی عیراق لە ڕوونكردنەوەیەكدا، لەسەر وتەكانی پارێزگاری سلێمانی ڕایگەیاند، لە كۆنگرەیەكی ڕۆژنامەیدا هەڤاڵ ئەبوبەكر دژی هەموو ئەو پەڕلەمانتارانە قسەی كرد، كە داوای ئەوە دەكەن حكومەتی هەرێم نەوت ڕادەستی بەغدا بكات، بێ ئاگا لەوەی ئەوە بڕگەیەكی یاسای بودجەی ۲٠۱۹ یە و ئەوانەی ئەو داوایە دەكەن داوا دەكەن یاسا جێبەجێ بكرێت، جا ئەو زمانە چی جیاوازە لە زمانی ئەو حزبیانەی تەنها لەبەرئەوەی دەستمان بۆ مەلەفی نەوت برد تەخوینیان كردین.

دەشڵێت: “ئیدارەدانی سوتەمەنی و چۆنێتی دابەشكردنی سوتەمەنی لە تێكڕای پارێزگاكان ئێستاش و ڕابردووش پڕە لە كەموكوڕی و گەندەڵی ئەوەش بەسەر جادەكانەوە، بە ڕیزی بەرمیل و كڕین و فرۆشی كۆبۆن و زۆر وردەكاری دیكەوە دیارە و پێویست ناكا كەس لەو ڕوەوە پاكانە بكات”.‬

ڕاشیگەیاندووە، ‫سلێمانی شارێكی گەورەیە نەك بەمانا جوگرافیەكەی، بەڵكو بەمانا مەعنەوی و سیاسیی و میژوییەكەی، پارێزگاربوون بۆ شارێكی وەك سلێمانی، كە بۆ هەمووان شانازی و شكۆی نیشتیمانپەروەیە پێویستی بە زمانێكی دەقیقتر و وردتتر و ڕاقیتر هەیە لەو زمانەی بەداخەوە هەڤاڵ ئەبوبەكر لە كۆنگرە ڕۆژنامەوانیەكەیدا قسەی پێكرد.‬

دەقی ڕوونكردنەوەكە:

‫سەبارەت بە مەلەفی سوتەمەنی و شتیتریش‬
‫ڕوونكردنەوەیەك دەربارەی تێگەیشتنەكانی هەڤاڵ ئەبوبەكر پارێزگاری سلێمانی‬
‫چەند رۆژی رابردوو ، لە كۆنگرەیەكی رۆژنامەییدا ، كاك هەڤاڵ ئەبوبەكر دژی هەموو ئەو پەرلەمانتارانە قسەیكرد كە داوای ئەوە دەكەن حكومەتی هەرێم نەوت ڕادەستی بەغدا بكا، بێ ئاگا لەوەی ئەوە بڕگەیەكی یاسای موازەنەی ۲٠۱۹ یە و ئەوانەی ئەو داوایە دەكەن داوا دەكەن یاسا جێبەجێبكرێ، ئایا كاك هەڤاڵ دژی جێبەجێكردنی یاسایە؟! جا ئەو زمانە چی جیاوازە لە زمانی ئەو حزبیانەی تەنها لەبەر ئەوەی دەستمان بۆ مەلەفی نەوت برد ، تەخوینیان كردین ؟! ‬

‫ئێستاش نازانم بە چ لۆژێكیك وە بۆچی كاك هەڤاڵ لە قسەكانیدا مەسەلەی رادەستكردنی نەوتی هەرێمی بەستەوە بەكێشەی نەوتی سپی و سوتەمەنی و پشكی پارێزگاكان ، لە كاتێكا ئەو باشدەزانێ و بە شایەتی زۆر لا ئێمە هەوڵی ئەوەمانداوە نوسرا و هەوڵەكانی پارێزگاری سلێمانی لە وەزارەتی نەوت لە بەغداد كێشەیان بۆ دروست نەبێت و بە زویی رایی ببن وە بەردەوامی داكۆكیمان لە پشكی پارێزگاكانی هەرێم كردوە، هیوادارام ئەوە شەڕی بە وەكالەت نەبێت!

‫راستیەكەی ئیدارەدانی سوتەمەنیی و چۆنێتی دابەشكردنی سوتەمەنی لە تێكڕای پارێزگاكان ئێستاش و رابردوش پڕە لە كەموكوڕی و گەندەڵی ئەوەش بەسەر جادەكانەوە ، بە ریزی بەرمیل و كڕین و فرۆشی كۆبۆن و زۆر وردەكاری ترەوە دیارە و پێویست ناكا كەس لەو روەوە پاكانە بكا.‬

‫دەبو كاك هەڤاڵیش وەك ئێمە خەم و پرسیاری ئەوەی هەبوایە كە یاسایی موازەنەی ۲٠۱۹ بۆ جێبەجێناكرێ ؟ لەبەر هیچ نا لەبەر ئەوەی كیشە بۆ پارێزگاكەی و كارەكانی دروست نەبێت ، ئاخر ئەوە هەرگیز كێشەیەكی ئاسایی نیوان هەولێر و بەغداد نیە بەڵكو ئەوە كارەساتێكی گەورەیە لە رابردودا فەرمانبەرانی هەرێم موچەیان بەو هۆیەوە بڕاوە ، ئەوانەی داوا دەكەن هەرێم پابەند بێت بە یاسای موازەنەوە خەمی ئەوەیان هەیە جارێكی تر موچە نەبردرێ و دەیانەوێ هیچ پاساوێك نەدرێتە بەغداد ، بەڵام با كاك هەڤاڵ وەڵامبداتەوە ئەوانەی داكۆكی لەوە دەكەن كە هەرێم پابەند نەبێت و ئەو بڕە نەوتە نەداتە بەغداد داكۆكی لە كێ دەكەن؟ بۆ ئەو دیفاعە دەكەن ؟ كێ لەو داكۆكیە سودمەندە خەڵك یا مافیاكانی نەوت ؟! ‬

‫خۆ ئەگەر كاك هەڤاڵ ئەبوبەكر تاكە یەك دۆكۆمێنت یا نوسراو یا تەنانەت لێدوانی میدیایی لایە وەك بەڵگە كە پەرلەمانتارێكی كورد لە ئەنجومەنی نوێنەران داوای ئەوەی لە حكومەتی عێراق كردبێت پشكی نەوتی سپی یا سوتەمەنی پارێزگاكانی هەرێم ببردرێت ئەوە منیش دەنگم دەخەمە پاڵ دەنگی و دەڵێم حەق لای تۆیە، بەڵام دەبێت بەڵگەكەی بخاتە ڕو ، خۆ ئەگەر بەڵگەی نیە حەق وایە داوای لێبوردن بكا.‬

‫سلێمانی شارێكی گەورەیە نەك بەمانا جوگرافیەكەی بەڵكو بەمانا مەعنەوی و سیاسیی و میژوییەكەی ، پارێزگاربون بۆ شارێكی وەك سلێمانی كە بۆ هەموان شانازی و شكۆی نیشتیمانپەروەیە پێویستی بە زمانێكی دەقیقتر و وردتتر و راقیتر هەیە لەو زمانەی بەداخەوە ماوەی رابردو كاك هەڤاڵ ئەبوبەكری بەرێز لە كۆنگرە رۆژنامەوانیەكەیدا قسەیپێكرد.‬

‫دڵنیام كاك هەڤاڵ جارێكی تر خۆشی گوێ لە قسەكانی بگرێتەوە دەزانێ هەم دو مەلەفی جیای زۆر خراپ تێكەڵ كردوە هەم بە زمانێكی گشتگیر تەڕ و وشكی پێكەوە سوتاندوە.‬

‫دوا سەرنجم ئەوەیە لە نێوانی ئێمەدا ، چ وەك نوێنەر چ وەك ئەوانەی لە بواری دەسەڵاتی جێبەجێكردن كار دەكەن ناكۆكی ، لێكتێنەگەیشتن، بیرورا جیایی ، ململانێ و گرفت دروست دەبێت و ئەوە ئاساییە ، ئەوەی ئاسایی نیە ئەوەیە بە زمانێكی نا شایستە و برینداركەر و روشێنەر روەو یەكبدوێین ، زمان و دەربرینەكان دەبێ بگەنە باڵای ئەو بەرپرسیارێتیەی كە خراوەتە سەرشانی هەردولا.‬

‫بە هیوای ئاوەدانیی و لالێكردنەوە و خزمەتكردن و پێشكەشكردنی هەمو خزمەتێكی شایستە بە شاری سلێمانی، سلێمانی ئەو شارەی كە زۆر دەمێكە بە هۆی ناكارایی و بێ جورئەتی بەرپرسەكانیەوە غەدرێكی گەورەی سیاسیی و ئیداری پلانبۆدارێژراوی دەرحەق ئەنجامدەدرێت و كەمیشن زۆر كەم ئەوانەی لانیكەم جورئەتی گوتن و دیاریكردنی ئەو غەدرەیان هەیە و بەدەنگی بەرز هاواری بۆ دەكەن.

‫هۆشیار عەبدوڵا‬
‫ئەندامی ئەنجومەنی نوێنەران‬

کوردستان

بەشی سێیەمی “ستایش” بە دۆبلاژی كوردی دەستپێدەكات

خەڵك – بەشی هەواڵ
یەكێك لە پڕ بینەرترین دراماكانی ئێران لە هەرێمی كوردستان “زنجیرە درامای ستایشە” كە تا ئێستا دوو بەشی پەخش كراوە و سەرەتای هەفتەی داهاتوو یەكەم ئەڵقە لە بەشی سێیەمی بە دۆبلاژی كوردی پەخش دەكرێت.

بەشی سێیەمی دراماكە لە 40 ئەڵقە پێكهاتووە و هەر یەك لە حیشمەتی فیردەوس، ستایش، محەمەد، ئەنیس، پەری سیما ڕۆڵی تێدا دەبیننەوە.

دوای ئەوەی بەشی سێیەمی زنجیرە درامای ستایش، لە (كەناڵ 3)ی فەرمی ئێران لە چەند مانگی ڕابردوودا پەخش كرا، لە ئێستادا لە هەرێمی كوردستان داواكارییەكی زۆری لەسەرە و بڕیارە هەفتەی داهاتوو لە ڕۆژی شەممەوە لە كاتژمێر 10:00ی شەو لە كەناڵی ئاسمانی سپێدە بە دۆبلاژی كوردی پەخش بكرێت و لە كاتژمێر 12:00ی نیوەڕۆ دووبارە دەكرێتەوە.

بەشەكانی یەكەم و دووەمی زنجیرە درامای ستایش پڕ لە چیرۆك و ڕووداوی تاڵ و خەمهێنەر بوو، بەڵام بەشی سێیەمی ستایش ڕووداوی دڵخۆشكەر و شادی زیاتر تێدایە، لە هەمان كاتدا لە ڕووداوی ناخۆش خاڵی نییە.

زنجیرە درامای ستایش لە دەرهێنانی سەعید سوڵتانی-یە، بۆ بەشی سێیەمی دراماكە زۆرێك لە ئەكتەرە دیارەكانی درێژە بە ڕۆڵ بینین دەدەن، لەوانە: داریوش ئەرجومەند (حیشمەتی فیردەوس)، نێرگس محەمەدی (ستایش)، مەهدی سلوكی (محەمەد)، سیما تیرئەنداز (ئەنیس)، فەریبا نادری (پەری سیما) و چەندینی دیكەش. لەگەڵ ئەوەشدا ژمارەیەك ئەكتەری نوێ‌ بەشدارییان لە دراماكەدا كردووە.

بەردەوام بە لە خوێندنەوە

کوردستان

بەڤیدیۆ؛ پەكەكە كوژرانی 7 سەربازی توركیای ڕاگەیاند

خەڵك – بەشی هەواڵ
ناوەندی ڕاگەیاندن و چاپەمەنی هێزەكانی پاراستنی گەل ڕایدەگەیەنێت، لە چالاكیەكەدا سەنگەرەكانی دوژمن كرانە ئامانج و هەڵوەشێنران، ٧ سەربازی سوپای توركیا كوژران، دەشڵێت: “سوپای توركیا بە هەلیكۆپتەر كوژراو و بریندارەكانی گواستەوە، هێزەكانمان لە هەلیكۆپتەرەكانیشیان دا”.

ناوەندی ڕاگەیاندن و چاپەمەنی هێزەكانی پاراستنی گەل لە ڕاگەیەنراوێكدا، ئاماژەی بەوەكردووە، لە هەرێمی پاراستنی مەدیا لە چوارچێوەی هەنگاوی شۆڕشگیری جەنگی حەفتانیندا هێزەكانی یەژاستار لە ٢ی كانوونی دووەمدا لەدژی سوپای داگیركەری توركیا لە گردی كۆنفڕانس چالاكیان ئەنجامدا.

دەشڵێت: “ئەمڕۆ گەریلا تیڤی دیمەنی چالاكیەكەی بڵاوكردەوە، لە دیمەنەكەدا دەردەكەوێت، گورزێكی گەورە لە سەنگەرەكانی سەربازانی دەوڵەتی توركیا دەدرێت و تەقینەوەیەكی گەورە ڕوودەدات”.

هەپەگە ڕاشیگەیاندووە، لە چالاكیەكەدا، كە سەنگەرەكانی دوژمن كرانە ئامانج، سەنگەرەكان هەڵوەشێنران، لە چالاكیەكەدا ئەوەندەی ئاشكرابوو ٧ سەرباز كوژراون، دوای چالاكیەكە سوپای داگیركەری تورك بە هەلیكۆپتەر كوژراو و بریندارەكانی گواستەوە، هێزەكانمان لە هەلیكۆپتەرەكانیشیان دا و هەلیكۆپتەرەكان بە ناچاری لە ناوچەكە دووركەوتنەوە.

بەردەوام بە لە خوێندنەوە

کوردستان

وتاری هەینی بۆ دیاردەی تەڵاق تەرخان دەكرێت

خەڵك – بەشی هەواڵ
وەزارەتی ئەوقاف و كاروباری ئایینی هەرێم ناونیشانی وتاری هەینی ئەم هەفتەیە بۆ تەڵاق تەرخان دەكات و دەشڵێت،”خاڵی سەرەكی لەوە دەستپێدەكات، كە پێویستە هەموو بە خۆماندا بچینەوە”.

لیژنەی باڵای ئامادەكردنی وتاری هەینی لە وەزارەتی ئەوقاف و كاروباری ئایینی حكومەتی هەرێم لە ڕاگەیەنراوێكدا، كە وێنەیەكی دەست (خەڵك) كەوتووە ناونیشانی وتاری هەینی ڕێكەوتی 24-1-2020ی بڵاوكردەوە و ڕایگەیاندووە، مەترسی كێشە سەردەمییەكانی كۆمەڵگە و چارەسەركردنی لە نمونەی تەڵاق، مامۆستایانی ئاینی ئەتوانن قسەی لەسەر بكەن.

ڕایگەیاندووە، هەموو كۆمەڵگەیەك تووشی كێشە و گیروگرفت دەبێتەوە، بەڵام كاتێك تەشەنە دەكەن و زۆر دەبن، دەبێتە مەترسییەكی گەورە و هەڕەشە بۆ سەر ئاسایشی كۆمەڵایەتی، واتە پچڕانی شیرازەی خێزان.

ئاماژەی بۆ ئەوەشكردووە، بەپێی ئامارێكی فەرمی لە ساڵی ڕابردوودا 8 هەزار و 381 حاڵەتی تەڵاق لە هەموو شاركانی هەرێم تۆمار كراوە لە بەرامبەر 32 هەزار و 432 حاڵەتی مارەكردن.

بەردەوام بە لە خوێندنەوە

کوردستان