ئێمە لە تۆرە کۆمەڵایەتیەکان

وتار

دەستدرێژیكردنە سەر سەرچاوە مرۆییەكان و پشتگوێ خستنی لەلایەن رۆژنامەنوسان

ئاكام موحەمەد

رۆژنامەوانی ژینگەیی، بەشێكی گرنگی رۆژنامەوانییە كە تەرخانكراوە بۆ دروستكردنی گۆرانكاریی و كاریگەری لەسەر هاوڵاتیان، لە پێناو بەرەوپێشبردنی چۆنیەتی و كوالیتی ژیان لەسەر زەوی بە گشتی و ئەو جیوگرافیایەی تیادا دەژین بەتایبەتی.

ئەمەی سەرەوە پێناسەیەكی سادە بو كە بەپێی ئەزمونی خۆم وەك چالاكوانێكی بواری ژینگەیی و رۆژنامەنوسێك هەڵمسەنگاند؛ لەراستیدا رۆژنامەنوسی ژینگەیی بەم جۆرە پێناسە دەكرێت: كۆكردنەوە، پەسەندكردن، بەرهەمهێنان و بلاوكردنەوەی كۆمەڵێك زانیاریە كە پەیوەندی بە روداوە هەنوكەیی و بابەتە گەرم و كێشە قوڵە تەندروستەكانەوە هەیە كە مرۆڤ بێ ئاگایی خۆی دروستیان دەكات و بەركەوتنی راستەوخۆی لەگەڵی هەیە.

خراپ مامەڵەكردن لەگەڵ ژینگە و سەرچاوە مرۆییەكان بە گشتی دەكرێت بە دو جۆرەوە؛
یەكەم- زۆربەكارهێنان(overuse)، واتە بەكارهێنانی سەرچاوەكانی ژیان زیاد لە پێوستی خۆی.

دووەم-بەد بەكارهێنان(abuse)، ئەمەیان بە لێكدانەوەیەكی دیكە پێی دەوترێت دەستدرێژیكردنە سەر سەرچاوە مرۆییەكان، واتە خراپ مامەڵەكردن لەگەڵیدا و رێزنەگرتن و بە سوك تەماشاكردنی.

هەڵوێستەیەك لەسەر هەردوكی و لە دوەمەوە دەستپێبكەین، كاتێك كەسێك دەستدرێژی دەكاتە سەر كەسێكی دیكە، كەسی یەكەم ناونیشانێك هەلدەگرێت لەناو كۆمەڵگادا: بەدرەوشت، بەو پێیە هەر كەسێك بەگوێرەی جۆری دوەم مامەڵە لەگەڵ ژینگە و سەرچاوە مرۆییەكاندا بكات ئەو ناونیشانە بۆخۆی هەڵدەگرێت(كەسێكی بەدرەوشتە!).

هەواڵێكی خۆش و هەواڵێكی ناخۆش سەبارەت بەم جۆرە كەسانە:
لە هەواڵە ناخۆشەكەوە دەستپێ دەكەم: هەر كەسێك، قوتوی بیبسی، بتلی ئاو، زەرفی جبسەكەی لە دەرگای ئۆتۆمبێلەكەیەوە فرێ بداتە سەر جادە، ئەو ناونیشانە دەیگرێتەوە، هەر كەسێك پاشماوەی خۆراك و زبڵەكانی خۆی لە شوێنە گشتیەكان بەجێ بهێڵێت ، ئەو ناونیشانە دەیگرێتەوە…هتد

هەواڵە خۆشەكەش ئەوەیە: سەیركەن! كەسێك دەستدرێژی بكاتە سەر كەسێكی دیكە تا ماوە ئەو ناونیشانەی لێ نابێتەوە، بە رۆژی روناك هاوار بكات بڵێت ئیتر من وازم لێ هێناوە لای خەڵكی هەر بەو چاوە سەیر دەكرێت، بەڵام دەستدرێژی كردنە سەر سەرچاوە مرۆییەكان و ژینگە، ماست نیە بە لێوتەوە دیار بێت(رەنگە لەبەر ئەوەش بێت خەڵكێكی زۆر بێ گوێدانە كۆمەڵگە ئەنجامی دەدەن)، لە ئێستاوە وازی لێ بهێنە، كەس ناتوانێت بڵێت بەری چاوت كلی پێوەیە.

مامەڵەی یەكەم، زۆر بەكارهێنانی سەرچاوە مرۆییەكان، ئەم جۆرەیان زۆر بە زەقی لە كۆمەڵگەی كوردەواریدا دیارە، ئامادەكردنی ژەمێكی زۆری خواردن زیاد لەوەی پێویستە، سەیری ئەمە لەوە دایە، دو هاوسەر ١٥ ساڵە پێكەوە دەژین تا ئێستا نازانن چەند كوپ برنج بە تەواوی بەشی خێزانە چوار كەسیەكەیان دەكات، بایی ئەوەندە ئامادە دەكرێت كە ٧ كەس بۆ دو ژەم و نیو لێ بخۆن، بێگومان سێ كەسەكەی دیكە سەتڵی خۆڵەكەیانە.

هەردو مامەڵەكە راستەوخۆ پەیوەندی بە رۆشنبیری تاكەكەسی هەیە، كەواتە رۆژنامەنوس بڵێت چی؟

رۆلی رۆژنامەنوس چیە؟

هەوڵدان بۆ تێگەیاندنی خەڵكی لەسەر كێشە ژینگەییەكان، زۆرجار توشی بێهیوایت دەكات و وەكو كوتانی ئاسنی ساردە، لە هەرێمی كوردستان زۆربەی خەڵكی هیچ ژینگەیان بەلاوە گرنگ نیە، زۆرێك لە چین و توێژەكان لایان وایە سەرچاوەكانی ژیان وەكو ئاو، هەوا، ئەو سەرچاوە زیندوانەی دیكە كە بۆ ژیان پشتیان پێ دەبەسترێت تا قیامەت بونیان دەبێت و هەرگیز لەناو ناچن(هەربەجدی!!)، زۆر بەكارهێنان و خراپ بەكارهێنانی سەرچاوەكانی ژیان و ژینگە تا ئێستاش نەبوە بە بابەتی گەرمی رۆژ، لێرەدا كەمترخەمیی رۆژنامەنوسان و دەزگاكانی میدیایی بە زەقی دیارە، مانشێتی رۆژنامە ئەلكترۆنیەكان، سەردێری تەلەفیزیۆنە كوردیەكان لە چواردەوری بابەتە سیاسیەكان دەخولێتەوە، تا ئێستاش ژینگەیەكی ناتەندروست نەیتوانیوە بە ئەندازەی سیاسیەكی گەندەڵ سەرنجی رۆژنامەنوسان را بكێشێت!

كێشەكە تەنها قەڵەم كولیی رۆژنامەنوسان و بێتوانایی میدیا نیە بۆ راكێشانی سەرنجی جەماوەر بۆ بابەتە ژینگەییەكان، بەڵكو بە گرنگیی نەبینییەتی، هاوكات نوبونی بنچینەیەكی زانستی قوڵی رۆژنامەنوسان سەبارەت بە بابەتە ژینگەییەكان، تا ئێستاش میدیا تەنها بایی ئەوەندە توانیویەتی سەرنجی جەماوەر لە بابەتە ژینگەیەكاندا رابكشێت كە گەرمترین پلەكانی گەرمای ناوچە نزیكەكان و بەهێزی گوڕی ئەو بومەلەرزەیە بە خوێنەر بڵێت كە دوێنی یەكێك لە شارەكانی وڵاتی كیشوەرێكی دیكەی هەژاندوە.

رۆژنامەوانی كوردیی، نەك تەنها دەستی لە پێراگەیشتنی بابەتی ژینگەیاكاندا كورتە، بەڵكو چاویش لە ئاستیا كورت بینە؛ لە ئەندازەیەكی زۆر بچوكدا روماڵی شوێنێكی گشتی دەكات كە سەردانكەرانی بێ هەستكردن بە بەرپرسیاریەتی كۆمەڵێك بتڵی پلاستیكیان لێ فرێداوە، چونكە تەنها دیمەنەكەی بێزاری دەكات، بنكۆڵكاریی لە بابەتە ژینگەیاكنادا لە ئاستێكی زۆر لاواز دایە، ؛ توێژەران لەسەرانسەری جیهاندا بەردەوام هۆشداری دەدەن لەسەر بەكارنەهێنانی بەرهەمە پلاستیكیەكان، بەهۆی ئەوەی كە سەدان ساڵیان پێدەچێت تا لەناو خاكدا شی دەبنەوە و ئەوەش بەپیتی و بەرهەمداری خاك لەناو دەبات، بەڵام بەگوێرەی توێژینەوەیەكی نوێ پلاستیك هەرەشەی راستەوخۆیە بۆ سستەمی ژینگەیی زەوی.

لەوتوێژینەوەیەدا كە لە ژۆرناڵی زانستی (Nature Communications Biology) دا بڵاوكراوەتەوە باس لەوە دەكات” ئەو ماددە كیمیاییانەی كە لە رێگەی پاشماوە پلاستیكیەكانەوە بەناو ئاوی دەریا و زەریاكاندا بڵاودەبێتەوە دەبێتە هۆی لەكارخستنی گەشەی جێنەتیكی بەكتریای پرۆكلۆرۆكوس و دواتر بەتەواوی لەناوی دەبات؛ بەكتریای پرۆكلۆرۆكوس، كە لەناو دەریا و زەریادا دەژی و دروستكەری راستەوخۆی كرداری رۆشنەپێكهاتنە لەناو دەریادا، دەبێت هۆی دروستكردنی سەدا 10ی ئەو ئۆكسجینەی كە هەڵیدەمژین، توێژینەوەیەكی نوێ دەریدەخات”پلاستیك دەبێتە هۆی لەناوبردنی پرۆكلۆرۆكوس”.

دەتوانین بڵێین، گواستنەوەی بابەت و كێشە ژینگەییەكان لەلایەن میدیاوە بۆ جەماوەر تاكە كێشەیە كە رۆژنامەنوسان دەتوانن رۆڵی كاریگەر و راستەوخۆیان هەبێت، بێ گەڕانەوەیەی راستەوخۆ بۆ حكومەت ، بەڵام ئەو ئەركەش بێ گومان بێ ئاڵنگاری نیە، كە دەكرێت لێرەدا كورتی بكەینەوە بۆ سێ خاڵ

١-نەبونی راهێنانی زانستی بە رۆژنامەنوسان و دەزگا میدیایەكان لەلایەن پەیمانگا حكومیەكان، بەمەش گرنگی بابەتە ژینگەییەكان فەرامۆش دەكرێت لەلایەن رۆژنامەنوسان.

٢-دەستپێرانەگەیشتن بە داتا و زانیاریە ژینگەییەكان و نەبونی كار ئاسانی لەلایەن حكومەت.

٣-نەبونی پرۆگرامی هۆشیاری گشتگیری لە بواری ژینگەدا لەناوەندە پەردوەردەییە حكومیەكان و شۆڕنەبونەوەی ئەو هۆشیاریانە بۆ ناو خێزان و ماڵەكان

وتار

چاکسازی و دوژمنەکانی

مەجید ساڵح

ئەمە یەکەم جار نییە دەسەڵاتدارانی کوردستان جەنگی دژ بە گەندەڵی و ئەنجامدانی چاکسازی رادەگەیەنن، پێشتریش و لەسەرەتا و ناوەراستی هەموو کابینەکاندا پرسی ئەنجامدانی ریفۆرم و چاکسازی و نەهێشتنی گەندەڵی گەرم دەبێت و لە گەڵ خۆیدا هەڵایەکی میدیایی دروست دەکات و ئومێدێکی کاتیش لە ناو خەڵکدا دروست دەبێ.

ئەوەی نوێ و گرنگە لەم خولەی بانگەشەی چاکسازیەدا، ئەوەیە حکومەتی هەرێم بە پرۆژە یاساییەکەوە بە بە گوڕوتینێکی جیاوازەوە هاتووەتە پێشەوە و سورە لەسەر ئەوەی چاکسازییەکی گشتگیری و بنەڕەتی ئەنجام بدات.

راستە دەرکردنی ئەو یاسایە گرنگە، بەڵام ئەزموونی رابردوو پێمان دەڵی هەم یاساکە و هەمیش راگەیاندنی ئەنجامدانی چاکسازی و ریفۆرم، چەندین ئاڵنگاریی ناوخۆیی و دەرەکیان لەبەردەمەدایە و تێپەڕاندنیان قورسە و ئیرادەیەکی راستەقینە و یەکلایکەرەوەی دەوێ، چونکە هەرکاتێک باس لە چاکسازی دەکرێ، دوژمنەکانی چاکسازی دەکەونە خۆیان و دەیان کۆسپ و لەمپەر دروست دەکەن بۆ ئەوەی ئەو چاکسازییە سەرنەگرێ و هەر وەک دروشمێک بمێنێتەوە.

سەرەکی ترین دوژمنانی چاکسازی ئەو کەس و لایەنانەن کە بازرگانی بە چاکسازییەوەوە دەکەن. ئەمانە دروشمی چاکسازی هەڵدەگرن لە پێناوی پاراستنی بەرژەوەندییەکانی ئێستایان یان مەرامێک کە لە داهاتوودا بەدەستی بهینن، یان بۆ تێپەڕاندنی ئەجەندا و دەسکەوتێکی سیاسی و ئابوری شەخسی یان حزبی دروشمی چاکسازی بەرز دەکەنەوە.

ئەم جۆرە شەخس و حزبانە، میدیاکان دەکەن بە سەکۆیەکی هەمیشەیی بۆ دروشم و بانگەشەکانیان و بەناوی چاکسازییەوە دروشمی گەورە و داخوازی نائەقڵانی و بەڵینی نابەجێ دەدەن بە خەڵک و لە جیاتی کارکردن، لەناو دروشم و بانەگەشەدا نوقم دەبن.

دوژمنێکی دیکەی چاکسازی کەسانی نییەت پاک، بەڵام خاوەن تێڕوانینی روکەش و ساویلکانەن. لە رابردوودا هۆکارێکی سەرەکی پەککەوتنی پرۆسەکانی چاکسازی لە هەرێمی کوردستان بەهۆی پرۆژە رووکەش و کورت مەودا و نا واقیعیەکانی ئەم جۆرە کەسانەوە بووە  ئەم جۆرە کەسانە هەندێ جار ویستویانە لە رێگەی گوشار و ئەنجامدانی هێزەوە ریفۆرم بکەم، بەڵام لەبەر نەخوێندنەوەی واقعەکە بە کارەسات کۆتایی هاتووە.

دوژمنێکی دیکەی چاکسازی بۆ حاڵەتی کوردستان، وڵاتانی دەوروبەرە. ئەمانە هەرگیز نایانەوێ لە هەرێمی کوردستاندا دەسەڵاتێکی شەفاف و خزمەتگوزار هەبێ بۆ ئەوەی نەبێتە ئولگویەکی باش بۆ کوردەکانی بەشەکانی دیکەی کوردستان و ئەو گریمانەیە درێژە پێ بدەن کە کورد هەرگیز ناتوانێ خۆی بەڕێوە ببات.

بۆیە لە هەموو حاڵەتەکاندا ئەوەی دەیەوێ چاکسازی بکات کەس دەستی نەگرتووە، دروشمی بێ کردار هەم بە زیان بۆ خاوەنەکەی و هەمیش بۆ کۆمەڵگا دەشکێتەوە..

بەردەوام بە لە خوێندنەوە

وتار

بژاردەکانی بەردەم حکومەتی هەرێم لەیاسای بوجەدا- نەخشە ڕێگای دانوستان

ئەحمەدی حاجی ڕەشید

 

بەشی یەکەم

کێ لاوازە

لە دونیای سیاسەتدا هەمیشە ئەوە باوە وەک پێناسە کە سیاسەت کردن هونەری ئەوەیە کە دەکرێت،(فن الممکنات).

خۆ ئەگەر لەوە زیاتر و وردتر پێناسەیەکی تازە بکەین بۆ سیاسەت کردن کە پێناسەیەکی وردترو مەنتیقی تر بێت ئەوا دەگەینە ئەو پیناسەیەی کە دەڵێت: سیاسەت کردن بریتیە لە دۆزینەوەی ئەو دەرچەیەی نیوان واقع و مومکندا هەیە.
بەواتای ئەوەی، ئەوەی دەمانەوێت و هەوڵی بۆ دەدەین مەرج نیە واقع ڕێگەمان بدات بەدەستی بهێنین، یان هەندی دەسکەوت بەدەست دەهێنین کە مومکن نەبوە لەو زەمەنە بەدەستی بهێنن لەناکاو واقعێک روی داوەو بوەتە مومکن وەک روخانی رژێمی پێشوو یان شەڕی داعش و ناوچەکانی دەرەوەی ناوچە کوردستانیەکان یان ئەوەی دوای ریفراندۆم و 16 ئۆکتۆبەر ڕوویدا.

لێرەوە دەبێت ئەوە ڕوون بێت بۆ بەرپرسانی هەرێم: چی مومکنە کەهەوڵی بۆ بدرێت لە چوارچێوەی ئەو واقعەی کەهەیە.

سەرەتا با وێنەی واقعی عیراق بخەینە بەردیدی هەمووان لانیکەم ئەوەی کە ئێمە دەیبینین تابزانرێت چ شتێک مومکنە هەوڵی بۆ بدەین لەم کات و سات ، و ئەم واقعەی ئیستا.

عیراق لە ئیستادا 
لەسەر ئاستی دەرەوە : بە ئاڵۆزترین بارودۆخی سیاسیدا گوزەر دەکات و بەرپرسەکانی خۆیان بۆ یەکلایی ناکرێتەوە  چ بەرەیەک یان میحوەرێک هەڵبژێرن، میحوەری ئەمریکی خلیجی یان میحوەر و بەرەی ڕوسی ئێرانی .

لەسەر ئاستی ناوخۆیی :عیراق وەک دەوڵەت لەهەندێ جومگەو بڕگەدا لەقۆناغی (الدولة العمیقة) وە هەنگاوی ناوە بۆ قۆناغی (اللا دولة) و حکومەتیش رفێندراوە (اختطاف ) لە لایەن هێزە چەک بەدەستەوەکانەوە.

رۆژانە سیادەی عیراق پێشێل دەکرێت لە هەموو سنورەکانیەوە، ئیسرائیل بە ئاشکراو بێ پەردە بۆردومانی گەنجێنەکانی حەشدی شەعبی دەکات لە قوڵایی عیراقدا و ناشتوانێت هیچ وڵامێکی بدەنەوە چونکە نە هێزی فڕۆکەوانی عیراق دەتوانێت سنووری وڵاتانی دیکە ببەزێنێت و نە دۆستەکانیشی لە سوریاو لوبنان ئەوەی بۆ دەکەن و کار گەشتوەتە ئەوەی بەهانە دەهێننەوە بۆ ئیسرائیل و عیراق تاوانبار دەکەن کە گوایە ئەو گەنجینانەی کەلێیان دراوە جبەخانەی وڵاتانی دراوسێن ئەم لێدوانانەش لەلایەن هێزە شیعیەکانی ترەوە باس کراون ، بۆیە شتێک نەماوە بەناوی ئاسایشی نیشتمانی ، ڕاستە دەزگای ئاسایشی نیشتیمانیمان هەیە بەڵام هێندەی لە خزمەت تایەفەو گروپ و حزب و کەسایەتیەکاندایە هێندە لەخزمەت بەهای نیشتمانپەروەریدا نیە.

بەهەمان ڕێتم ڕێژەی گەندەڵی و فەساد گەیشتوەتە ئاستە مەترسیدارەکانی ستانداردی جهانی، ناشەفافی حکومەت و پشک پشکێنە شۆر بوەتەوە بۆ جومگە سەرەتاییەکانی بەڕێوەبەراتیەکان، خزمەت گوزاریەکان لە خراپترین ئاستدان .

ئابوری عیراق لە دۆخێکی پڕ مەترسیدایە و بڕی قەرزەکانی لە (۱۲٤) ملیار دۆلارەوە ڕێژەکەی بەرەو هەڵکشان دەڕوات بەهەردوو تەوەرەکەیەوە چ قەرزی دەرەکی بێت کەلەبوجەی ۲٠۱۹ ڕێگریمان لێکردوە چیتر نابێت عیراق قەرزی دەرەکی نوێ بکات ئەگینا زیاتر دەبوو، چ قەرزە ناوخۆیەکان بێت کەدەزگاو دامەزراوەی دارایی و بانکی نەماوە پارەی لێ وەرنەگیرابێت بەقەرز تاکار گەشتوەتە ئەوەی ساڵی ۲٠۱۹ بڕی (۷) ترلیۆن دینار قەرز کراوە لەسندوقی خانەنشین.

کەدێنە سەر گومرگ ئەوا بۆ زانینی دۆخی خراپی گومرگ وتەکەی کاظم العقابی کە لەلێژنەی دارایدا باسی کرد بەسە بۆ ئەوەی بزانین دۆخی گومرگ چۆنە، لەو کۆبونەوەدا بەرپرسی دەروازە سنووریەکانی عیراق وتی لە باکوری بەسرە لەکۆی (۹) دەروازەی سنووری لە(٥) دەروازەدا لەدوای نیوەڕۆ حکومەتیان تیدا نامێنێت و میلیشیا چەکدارەکان بەکەیفی خۆیان کاڵاو کەل و پەل هاوردە دەکەن.

سەبارەت بەداهاتە نەوتیەکان

عیراق لە سەقفی هەناردەکردنی (٤٠٠٠٠٠٠) چوار ملیۆن بەرمیل نەوت نزیک بوەتەوەو هێشتا تەهریب هەر هەیە کەرۆژانە خۆی دەدات لەنزیک (۲٠٠٠٠٠)دوو سەدهەزار بەرمیل نەوت  ئەمەش بە وتەی عدنان الجنابی سەرۆکی لێژنەی نەوت و ووزەی پەرلەمان لە خولی دووەمدا.

ئەگەر باسی دەسەڵاتی نەختینە بکەین (البنک المرکزی) تەنها ئەوەندە بەسە لێژنەی دارایی پەرلەمان هەرچەند دەکات لەو بابەتە تێناگات کەبۆچی ئەم بانکە لەماوەی تەنها (٤) رۆژدا نزیکەی (۱) یەک ملیار دۆلار دراوی قورسی دۆلار دەخاتە بازار لەم کاتەدا کەچالاکی بازرگانی لەعیراقدا لە ئاستێکی لاوازدایە ، بەپێی ئەو شیکاریەی سەرۆکی لێژنەی دارایی دەیکات بۆ مەزادی دراوی دۆلار کە ساڵانە نزیکەی (٤٠_٥٠) ملیار دۆلار لەڕێگەی بانکی مەرکەزیەوە دەخرێتە بازار بەمەبەستی وەبەرهینان و هاوردەکردن خۆ ئەگەر لانی کەمی گومرگ بخەمڵێنین کە٥٪ بێت دەبێت وەزارەتی دارایی نزیکەی (۱٠) ملیار دۆلار گومرگی دەست بکەوێت کەلە راستیدا بری گومرگ لە (۳) تیپەر ناکات ئەی باقی ئەو داهاتە لە کوێیە یان ئەو دراوە دەخرێتە بازارەوە بۆ کوێ حەواڵە دەکرێت!

هەموو ئەمانەی پێشوو کە خستمانەڕوو کە مشتێکە لە خەروارێک پیمان دەڵێن بەزمانی ڕوون ڕاشکاو:

عیراق وەک وڵات و حکومەتەکەی وەک دەسەڵاتی جێبەجێکردن وڵاتێکی لاوازی بێ ئیرادەی سیادە نوقسانی تاسەر ئێسک گەندەڵی ناشەفافی شپرزە.

بەڵام دەبێت بەرپرسانی هەرێم بزانن ئەم لاوازیە بەرانبەر کێیە

بەردەوام بە لە خوێندنەوە

وتار

بڕیاره‌کانی وه‌زاره‌تی کشتوکاڵ له‌ مه‌ڕ پاراستنی به‌رهه‌مى نیشتیمانی چه‌ند کارا ده‌بن؟

د.  محەمه‌د ئەمين

 

هەردوو وه‌زیری کشتووکاڵی کابینه‌ی پێشوو، وه‌ ئه‌م کابینه‌ی ئێستای حکوومه‌تی هەرێم، به‌مه‌به‌ستی پاراستنی بازاڕی به‌رووبوومی کشتووکاڵی ناوخۆ له‌کاتی هاوین و سه‌ره‌تای پایزا هەندێ بڕیار ده‌رئەکه‌ن تا ڕێگری بکرێ ‌له‌ته‌ماته‌و هەناری هاورده‌کراو.

هەڵبه‌ته‌ لێره‌دا مەبه‌ست شرۆڤه‌ی بڕیاره‌کانه‌ زیاتر له‌وه‌ی که‌ ظه‌خنه‌بێ له‌م دوو وه‌زیره‌، چوونکه‌ هیچ نه‌بێ ئه‌م دوو وه‌زیره‌ لانیکه‌م هەستیان به‌پێوویستی پاراستنی به‌رهەمی ناوخۆ کردووه‌ له ‌چاو هاوپیشەکانی خۆیان و هەموو سه‌رۆک کابینه‌کانی پێشوو.

سه‌ره‌تا سیاسه‌تی ئابووری نیشتیمانی، له‌ مه‌شا سیاسه‌تی باج و گوومرگ په‌یوندی به‌ سیاسه‌ت، فه‌لسه‌فه‌ی سیاسی وه‌ جیهان بینی سیاسی ده‌وڵه‌ته‌وه‌ هەیه‌ له‌ گه‌ڵ ئامراز، سیستم، ده‌زگای جۆراوجۆری نیشتیمانی وه‌ میکانیزمی گوونجاو و ئاماده‌کراو بۆ پیاده‌کردنی ئه‌م سیاسه‌تی ئابووریه‌ له‌ زه‌مینه‌ى ڕاستیا .

له‌ ژێر رۆشنایی ئه‌م ڕاستیه‌دا ئه‌بینین که‌ نه‌سیستم، نه‌ ئامراز وه‌ نه‌ده‌زگای جۆراوجۆری نشتیمانی وه‌ میکانیزمی گوونجاو و ئاماده‌کراو هەیه‌، به‌ڵگه‌ی ڕاستی ئه‌مه‌ش وه‌ک یه‌ک نموونه‌ ئه‌مه‌یه‌، له‌گه‌ڵ ڕێگریگرتن له‌ تەماته‌ی هاوه‌رده‌ نرخی ته‌ماته‌ له‌ وه‌رزی خۆیا هێنده‌ نزم ئه‌بێته‌وه‌ که‌ به‌های تێ چوونی به‌رهەمهێنانیشی ناداته‌وه‌ به‌ جووتیار نه‌ک قازانج، که‌ ببێته‌ سه‌رچاوه‌ی بژێوی .

واته‌ له‌م کاته‌دا که‌ ته‌ماته‌ زۆره‌ یا وه‌رزیه‌تی وه‌ یا هەر به‌رهه‌مێکی تر وه‌ک ترێ، کاڵه‌ک شووتی و… هتد، که‌ له‌ وه‌رزی خۆیانا زۆرن و، بازار هێنده‌ زۆر تێر ئه‌که‌ن، که‌ به‌هاکانیان وه‌ک له‌ سه‌ره‌وه‌ ئاماژه‌م پێدا نرخی تێ چوونیشیان پڕ ناکه‌نەوه‌ نه‌ک سه‌ رمایه‌ په‌یاکردن بۆبژێوی.

ئه‌مه ‌جگه‌ له‌ ماندووبوون و به‌ فیڕۆدانی کات، که‌ ئه‌مه‌ به‌ هەموو پێوه‌رێک زیان و کاره‌ساتێکی ئابووری، ده‌روونی وه‌ هەتا کۆمه‌ڵایه‌تیه‌ بۆ به‌رهەمهێنەرو کۆی کۆمه‌ڵ و وڵات.

ئه‌مه‌ نیشانی ئه‌دات که‌ خۆی بڕیاره‌که‌ له‌ بنه‌مادا ڕاسته‌ به‌ڵام ناتوانێ ئه‌م زیانانه‌ که‌م بکاته‌وه‌ که‌ له‌ سه‌ره‌وه‌ باسکرا، واته‌ نه‌ به‌رهەم ئه‌پارێزێ له‌ به‌فیرۆچوون نه‌ به‌رهەمهێنه‌ر له‌ زیان له‌به‌ر ئه‌م هۆکاره‌ سه‌ره‌کیانه‌ی خواره‌وه‌:

1- نه‌ بوونی سیاسه‌تێکی ئابووری نیشتیمانی ڕوو‌ن، که‌ ببێته‌ پێوه‌رو ستاندار بۆ هەموو کایه‌کانی ئابووری وه‌ چالاکی و ڕه‌وشی بازاڕ، تا به‌ گوێره‌ی ئه‌م سیاسه‌ته‌ ڕه‌وشی ئابووری و بازاڕ له‌ ڕێگه‌ی یاسا دانانه‌وه‌ ڕێک بخرێ.

2- نه‌بونی پیشه‌سازی خۆراک بۆ ئه‌وه‌ی هەم نرخی به‌روبوومه‌کان دانه‌به‌زێ له‌ رێگەی‌ پیشه‌سازی کردنه‌وه‌ ئه‌م به‌روو بوومانه‌ هەڵبگیڕێن وه‌ بکرێنه‌ جۆرێکی تری به‌رهەم، بۆ نموونه ‌له‌م کاته‌دا که‌ ته‌ماته‌ زۆره‌ چه‌نده‌ها کارگه‌ی دۆشاوی ته‌ماته‌ دروست بکرێ بۆ ئه‌وه‌ی بازاری دۆشاوی ته‌ماته‌ به‌ به‌رهەمی ناوخۆ پڕبکرێته‌وه‌.

هەروه‌ک ئه‌بینین بۆ کڕینی دۆشاوی ته‌ماته‌ ئه‌بێ به‌رهەمی هاورده‌کراو بکڕین به‌ نرخێکی گران، به‌ڵام یەک سندوق ته‌ماته‌ ئیستا به‌ هەزار دیناره‌، واته نیوه‌ی نرخی یەک کیلۆ دۆشاویی ته‌ماتەی هاورده‌ کراو، له‌ بەرئه‌وه‌، بریار بێ ئاماده‌کاری ژێرخانی ئاماده‌کراوی شیاو له‌ بواری خۆیدا ناتوانێ ئه‌نجامی ئامانج داری هەبێ.

3- نه‌بوونی ژێرخانی به‌ بازاڕکردن، دابه‌شکردن وه‌ پارێزگاریکردنی به‌رووبوومه‌کان له‌ شوێنی شیاو.

4- نه‌ بوونی ستراتیجی نیشتیمانی بۆ هەر که‌ رتێکی ئابووری له‌ سه‌ر ئاستی سیاسه‌تی حکومه‌ت وه هه‌روه‌ها وه‌زاره‌ته‌کان، بۆ نموونه‌ له‌م حاڵه‌ی ئێستا که‌ به‌رهەمه‌ وه‌رزیه‌کان وه‌ک ته‌ماته،‌ که‌ نرخ ناکات ڕۆڵی وه‌زاره‌تی بازرگانی ئه‌بێ چی بێ که‌ نه‌توانێ بازاڕێک بۆ ته‌نها یه‌ک به‌رهەم له‌ ده‌ره‌ وه‌ په‌یدا بکات؟ هەڵبه‌ته‌ وه‌زاره‌ته‌کانی تریش ئه‌بێ ڕۆڵی خۆیان بناسن وه‌ کاری پێ بکه‌ن، واته‌ بزانن کاریان، ئامانجیان وه‌ ستراتیجیان چیه؟ نه‌کت ه‌نها بکرێنه‌ ئۆفیسی  هاتووچۆ.

جگه‌ له‌ به‌روبوومی میوه‌، که‌ له‌ زۆری کاته‌کانی ساڵا له‌ ده‌ره‌وه‌ دێت، به‌ هەمان جۆر به‌رووبوومی شیره‌مه‌نی، گه‌نمی، باقله‌ ییه‌کان/ ووشکه‌، پیاز، په‌تاته‌وه‌ گۆشتیه‌کانیش که‌ خۆراکی ڕۆژانه‌ی خەڵکن‌ به‌شی هەرە‌ زۆریان ئه‌وه‌ی له‌ بازاڕەکاندان به‌رهەمی هاورده‌ کراون‌.

ئه‌مه‌ش، ئه‌وه‌ ئه‌گه‌یه‌نێ که‌ به‌شی هەره‌ زۆری داهاتی وڵاتی ئێمه، ‌که‌ 90 % له‌ نه‌وت و هەندێ سه‌رچاوه‌ی بچووکی تر په‌یدا ئه‌بێ، ئه‌چێته‌ ده‌ره‌ وه‌ی وڵات که‌ ئه‌نجامه‌که‌ی نه‌ ته‌نها ئه‌م هەمووزیانه‌ داراییه،‌ که‌ ساڵانه‌ به‌ ده‌یان ملیارد مەزنده‌ ئه‌کرێ، به‌ڵکوو نه‌هێشتنی بازاڕی کاره‌ بۆ هێزی کاری ناوخۆ به‌تایبه‌ت گه‌نجان و ده‌رچووانی خوێندنگه‌ و زانکۆکان.

ئه‌گه‌ر ویستی سیاسی، به‌رنامه ‌وه ستراتیجی سیاسی هەبێ، ئه‌توانرێ هەموو ئه‌م بەرهه‌مانه‌ له‌ ناوخۆی وڵات به‌رهەم بێن به‌که‌مترین سه‌رمایه‌ و تێچوون به‌ به‌راورد له‌گه‌ڵ ئه‌م وڵاتانه‌ی لێیان به‌رهه‌م دێن وه‌ هاورده‌ ئه‌کرێن، وه ئه‌و پاره‌یه‌ی بۆ کڕینی که‌لوپەلی هاورده‌ به‌کاردێ بۆ ئه‌وه‌ی بازاریی کارو ئابووری وڵاتا‌نی هەنارده‌، که‌ ڕێ پێ ببوژێته‌وه‌، ئه‌توانرێ له‌ناوخۆی وڵاتا سه‌رمایه‌گووزاری پێ بکرێ وه‌ شوێنی کار بۆ سه‌دان هەزار گه‌نجی بێکار فه‌راهەم بکات. ئه‌مه‌ش بۆخۆی خزمه‌ته‌ به‌ ڕه‌هەندی سیاسی، ئابووری، کۆمه‌ڵایه‌تی گه‌ل و نیشتیمان و ئاینده‌ی نه‌وه‌کانی ئێستاو داهاتوو.

به‌ شێوه‌یه‌کی گشتی، هەر بریارێ له‌ مه‌ڕ هاندانی به‌رهەمی ناوخۆ کارێکی باش و پێویسته‌، چوونکه‌ له‌گه‌ڵ خۆ وشیار کردنەوه‌  ئاگادار کردنه‌وه‌یه‌کە بۆ ده‌سه‌ڵاتداران و ڕایی گشتی ئه‌هێنێ تا هەموو ئه‌م خاڵه لاوازانه‌ ئاشکرا بکرێن که‌ ئه‌بێ چاک بکرێن، وه‌ هەست ئه‌کرێ و ئەزانرێ که‌ کام جۆری سیستم ، ڕێگا وه‌ ئامراز ئه‌بێ به‌ کاربێت یان ‌کاریان له‌سه‌ر بکرێ تا بتوانرێ به‌رهەمی نیشتیمانی له چوارچێوه‌ی سستمێکی به‌رنامه‌ دانراو وه‌ له‌سه‌ر بنه‌مای ئابووریه‌کی ته‌ندروست، ژینگه‌ دۆست وه‌ به‌ڕه‌چاوکردنی پێویستی به‌رپرسیاریه‌تی کۆمەڵایه‌تی و مرۆڤایەتی به‌رهەم بهێنرێ، هەم بۆ پڕکردنه‌وه‌ی پێویستی ناوخۆ، هەم بۆ هەناردەکردن، که‌ به‌دڵنیایی کوردستان ئەتوانێ، چوونکه‌ له‌ هەموو ڕوویه‌که‌وه‌ زه‌مینه‌ی گونجاویی هەیه‌ که‌ له‌زۆر شوێنی تر نیه‌، به‌ تایبه‌ت له‌ ڕۆژهەڵاتی ناوه‌ڕاست.

بەردەوام بە لە خوێندنەوە

کوردستان