ئێمە لە تۆرە کۆمەڵایەتیەکان

کوردستان

كۆسرەت ڕەسوڵ عەلی پەیامێك بڵاودەكاتەوە


خەڵك – بەشی هەواڵ

كۆسرەت ڕەسوڵ عەلی جێگری سكرتێری گشتی یەكێتیی نیشتمانیی كوردستان، بە بۆنەی پێكهێنانی كابینەی نوێی حكومەتی هەرێمی كوردستان پەیامێكی ئاڕاستەی كۆمەڵانی خەڵكی كوردستان دەكات.

دەقی پەیامەكە:

‎بە سڵاوێكی گەرمەوە، بە بۆنەی پێكهێنانی كابینەی نوێی حكومەتی هەرێمی كوردستان، پیرۆزبایی گەرمی خۆم ئاڕاستەی تەواوی كۆمەڵانی خەڵكی كوردستان بە گشتی و كەس و كاری سەربەرزی شەهیدان و پێشمەرگە قارەمانەكان و جەماوەرو هەوادارانی یەكێتی نیشتمانی كوردستان بە تایبەت دەكەم و سوپاسی ماندووبوون و خۆڕاگریتان دەكەم، دەزانم كە چاوەڕوانیتان بۆ پێكهێنانی ئەم كابینە وەزاریەی ئێستا كاتی زیاتر لە پێویستی خۆی خایاندو كاریگەری نەرێنی خۆی لەسەر ئاستی گوزەرانی هاووڵاتیان و سست بوونی بازار و خزمەتگوزاریەكان بەجێ هشتبوو.

بەڵام دواجار بە خواست وئیرادەی هەموو لایەك تێكڕای ئاستەنگەكانمان بڕی كابینەی نۆهەمی حكومەتی هەرێمیش بە ستافێكی نوێوە پێك هێنرا، كە ئومێدمان وایە ببێتە حكومەتێكی بەهێزو خزمەتگوزار و لە سایەیدا كار بۆ چەسپاندنی عەدالەتی كۆمەڵایەتی و شەفافیەت لە خەرجی و داهاتدا و ئاسوودەیی و خۆشگوزەرانی بۆ كۆمەڵانی خەڵكی كوردستان دەستەبەر بكات.

سەرباری پیرۆزبایشمان لەسەرۆك و جێگرو تەواوی ئەنجوومەنی نوێی وەزیران، ڕوویی قسەمان لە بەڕێزیانەو داوایان لێدەكەین كە هەرچی لە توانایاندایە لە ووزە و توانای ماددی مرۆیی، ژیرانە بیخەنە خزمەت دابینكردنی ئاشتی و ئارامی و ئاسایشی نیشتمانی مسۆگەر بكەن و ڕێگا خۆشكەر بن بۆ بونیادنانی ژێرخانی ئابووری پتەو لە هەرێمی كوردستان ،كە ڕەنگدانەوەی لەسەر دامەزراندنی پایەكانی ئابووریەكی بەهێز هەبێت بۆ دابینكردنی كۆمەڵگایەكی ئاسوودەو خۆشگوزەران و هەم لەناوەوەی هەرێمی كوردستان و هەم لەو ناوچانەی كە كوردستانین و لە دەرەوەی دەسەڵاتی حكومەت هەرێمدان.

‎بژی كورد بژی كوردستان
‎نەمری و سەربەرزی بۆ شەهیدانی ڕێگای ئازادی و سەرفرازی گەلەكەمان

‎كۆسرەت ڕەسول عەلی
‎جێگری سكرتێری گشتی
‎یەكێتی نیشتمانی كوردستان

کوردستان

بەدەستڕێژی گولـلەی هێزەكانی ئێران كۆڵبەرێك گیانی لەدەستدا


خەڵك – بەشی هەواڵ

ڕێكخراوی مافی مرۆڤی هەنگاو ڕایدەگەیەنێت، سێ كۆڵبەر لە سنوورەكانی نەوسوود ، سەقز و بانە لە لایەن هێزەكانی حكوومەتی ئێڕانەوە برینداركراون هاوكات لە سنووری پشدەر بە دەستڕێژی گولـلەی هێزەكانی ئێران كۆڵبەرێك گیانی لەدەستداو یەكێكی دیكەش بریندار بوو.

ڕێكخراوی مافی مرۆڤی هەنگاو لە ڕاگەیەنراوێكدا، كە وێنەیەكی دەست (خەڵك) كەوتووە ڕایگەیاندووە ، لە ماوەی چەند رۆژی رابردوودا، كۆڵبەرێكی بەساڵاچووی خەڵكی سەقز بە ناوی محەممەد ڕۆستەمی لە لایەن هێزەكانی سەرسنووری ئێرانەوە لێی دراوە قاچ و سەری بە سەختی بریندار بووە.

ڕاشیگەیاندووە ، هێزە چەكدارەكانی جێگیر لە پاسگای هانی گەرمەڵەی سەر بە نەوسوود، دەستەیەك لە كۆڵبەرانی ئەو ناوچەیەیان دایە بەر دەستڕێژ و بەو هۆیەوە كۆڵبەرێك بە ناوی هێمن موزەفەری بە سەختی برینداربووەو هاوكات كۆڵبەرێكی خەڵكی بانە بە ناوی عەلی مەعارفی بە هۆی تەقەی هێزە چەكدارەكانی ئێران قاچی برینداركراوە.

هاوكات لە ئێستادا باس لەوە دەكرێت، پاش نیوەڕۆی ئەمڕۆ شەممە 6-6-2020 هێزە ئەمنییەكانی سەر سنووری كۆماری ئیسلامی ئێران تەقەیان لە كۆڵبەرانی ڕۆژهەلاتی كوردستان كردووە، لەئەنجامدا كۆڵبەرێك گیانی لەدەستداوە و یەكێكی دیكەش بەسەختی برینداربووە.

بەردەوام بە لە خوێندنەوە

کوردستان

دەربارەی دەوام فەرمانبەران ئاگادار دەكرێنەوە


خەڵك- بەشی هەواڵ
بەڕێوەبەرایەتی شارەوانی بەكرەجۆ فەرمانبەران ئاگادار دەكاتەوە، كە لەكاتی دەستپێكردنەوەی دەوام پابەندی ڕێكارەكانی خۆپارێزی بن و بە دەستكێش و دەمامكەوە دەوام بكەن.

ئەندازیار، عومیر حەسەن، بەڕێوەبەری شارەوانی بەكرەجۆ لە ڕاگەیەنراوێكدا ئاماژەی بەوەكردووە، “ھیوام ساغی و سەلامەتی بۆ فەرمانبەران دەخوازم و بە دوور بن لە نەخۆشی و ناخۆشی”.

ڕاشیگەیاندووە، لە پێناو سەلامەتی خۆتان و ھاوڕێكانتان و خەڵكی شار و وڵاتماندا پێویستە پابەند بن بە ڕێنماییەكانەوە و ڕەچاوی ئەم خاڵانە بكەن لەكاتی دەوام كردنتاندا :

1- پێویستە لە كاتی ھاتنتان و دەوامدا دەستكێش و دەمامك بەكاربھێنن .

2- ئەو بەڕێزانەی تووشی ھەر نەخۆشیەك بوون وەك كۆكە و ھەڵامەت، كە دەبێتە ھۆی دڵەڕاوكی بۆ خۆی و فەرمانبەرەكانی ھاوڕێی، تكایە با پەیوەندی بكات بە ئیدارەوە و دەتوانێت دەوام نەكات و دواتر بڕیار لەسەر مۆڵەتەكەی دەدەین و ئیشەڵا كەس نەخۆش نابێت .

3- هاووڵاتیان بە دەستكێش و دەمامك ڕێگەیان پێ دەدرێت بێنە نێو فەرمانگەكەمان، بە پێچەوانەوە مامەڵەكەی لە پرسگە لێی وەردەگیرت تاكو تەواو بوونی كارەكەی سەردانمان دەكاتەوە.

بە بڕیارێكی وەزارەتی ناوخۆی هەرێم لە 1ی حوزەریانەوە تاوەكو ئێوارەی ئەمڕۆ 6ی حوزەیران قەدەغەی هاتووچۆ بۆ ڕێگری لە بڵاوبوونەوەی كۆرۆنا ڕاگەیەنرا و دەوامی فەرمانبەران كرا بە پشوو، بۆیە ئێوارەی ئەمڕۆ كۆتایی بە دۆخەكە دێت و دەوامی فەرمانبەران بەشێوەی تەناوب دەست پێ‌ دەكاتەوە ئەگەر بڕیارێكی دیكە بۆ درێژكردنەوەی پشووی فەرمانگەكان دەرنەچێت.

بەردەوام بە لە خوێندنەوە

کوردستان

هاوسەرەكەی جەبار فەرمان ماڵێكی پێشكەشی ماڵی‌ ساوایان‌ كرد


خەڵك – بەشی هەواڵ
بەڕێوەبەرایەتی گشتی‌ چاودێری‌‌ و گەشەپێدانی‌ كۆمەڵایەتی‌ سلێمانی ڕایدەگەیەنێت، هاووڵاتیەكی‌ خێرخواز و ژمارەیەك لە ئەندامانی‌ خانەوادەكەی ‌ماڵێكێكیان (بینایەكیان) پێشكەشی ماڵی‌ ساوایانی‌ منداڵان كرد.

بەڕێوەبەرایەتی گشتی‌ چاودێری‌‌ و گەشەپێدانی‌ كۆمەڵایەتی‌ سلێمانی لە ڕاگەیەنراوێكدا، كە وێنەیەكی بۆ (خەڵك) هاتووە ڕایگەیاندووە، ئەمڕۆ شەممە 6ی حوزەیران بە ئامادەبوونی‌ خاتو كوێستان محەمەد، وەزیری‌ كار و كاروباری‌ كۆمەڵایەتی ‌‌و عومەر گوڵپی‌، ‌ بەڕێوەبەری گشتی چاودێری و گەشەپێدانی كۆمەڵایەتی سلێمانی و ژیار جەلال، بەڕێوەبەری‌ چاودێری‌ كۆمەڵایەتی‌ سلێمانی‌‌ و هاووڵاتی‌ خێرخواز (سەبیحە شێر محەمەد) و ژمارەیەك لە ئەندامانی‌ خانەوادەكەی‌، مەڕاسیمێكی‌ تایبەت بە پێشكەشكردنی‌ ماڵێك (بینایەك) بە ماڵی‌ ساوایانی‌ منداڵانی‌ سەر بە بەڕێوەبەرایەتی‌ چاودێری‌ كۆمەڵایەتی‌ سلێمانی‌ بەڕێوەچوو.

ئاماژە بۆ ئەوەشكراوە، لە مەڕاسیمەكەدا خاتوو سەبیحە سوپاسی‌ خوای كرد، كە هاوكاریكردووە، كە ئەو ماڵەیە وەك خێر و چاكەیەك بۆ كوڕی‌ كۆچكردوویان كاكە (ڕەوەند جەبار فرمان) پێشكەش بە ماڵی‌ ساوایانی‌ منداڵان بكات.

هاوكات كوێستان محەمەد، وەزیری‌ كار و كاروباری‌ كۆمەڵایەتی‌ سوپاسی‌ سەبیجە و سەرجەم ئەندامانی‌ خانەوادەكەی‌ كرد، بۆ پێشكەشكردنی‌ ئەو بینایە بە ماڵی‌ ساوایان‌ و هیوای‌ خواست نمونەی‌ چاكەی‌ لە شار و هەرێمەكەماندا زۆر بێت.

ماڵی‌ ساوایانی‌ منداڵان، دامەزراوەیەكی‌ حكومییە و سەر بە (بەڕێوەبەرایەتی‌ چاودێری‌ كۆمەڵایەتی‌ سلێمانی)ە و منداڵانی‌ یەك ڕۆژە بۆ چوار ساڵ لە خۆ دەگرێت‌ و لە كوردستاندا تەنها ماڵە، كە دەتوانێت ئەو تەمەنەی‌ منداڵان لە خۆبگرێت و خزمەتگوزاری‌ خۆی‌ پێشكەش بەو منداڵانە بكات، كە لەو تەمەنەدا خێزانەكانیان لەدەست دەدەن.

بەردەوام بە لە خوێندنەوە

کوردستان