ئێمە لە تۆرە کۆمەڵایەتیەکان

ئابوری

بانكی ناوەندی بڕێكی زۆر دۆلار دەخاتە بازاڕەوە

خەڵك- بەشی هەواڵ
بانكی ناوەندی عیراق لەڕێگەی زیادكردنی ئاشكراوە بڕێكی زیاتر دراوی ئەمریكی (دۆلار)ی خستە بازاڕەكان، ئەمەش كاریگەری لەسەر نزمبوونەوە نرخی ئەو دراوە هەیە لە بازاڕەكانی ناوخۆدا.

بەپێی بەیاننامەیەكی بانكی ناوەندی عیراق، كە ئەمڕۆ سێ‌ شەممە بڵاوكرایەوە، بە زیادكردنی ئاشكرا بڕی 179.64 ملیۆن دۆلار بە بانك و كۆمپانیاكانی حەواڵە فرۆشراوە، ئەمەش بەراورد بەو بڕەی لە ڕۆژی پێشوودا فرۆشرا، كە 159.38 ملیۆن دۆلار بوو، بەرزبوونەوەی بەرچاوی بەخۆوە بینیوە.

بانكی ناوەندی دەڵێت: “بڕی ئەو پارەیەی بۆ پتەوكردنی ڕەسیدی بانكەكانی دەرەوە فرۆشراوە، گەیشتۆتە 179.28 ملیۆن دۆلار، بڕی 360 هەزار دۆلاریش بەشێوەی كاش فرۆشراوە”.

هەر لە بەیاننامەكەی بانكی ناوەندیدا هاتووە، “یەك دۆلار بە 1190 دینار فرۆشراوە و لەو زیادكردنەشدا 31 بانك و یەك كۆمپانیای حەواڵەی دارایی بەشدارییان كردووە”.

ڕۆژانە لەگەڵ زیادبوونی خستنەڕووی دۆلار لە بازاڕەكاندا، بەهای دۆلاری ئەمریكی دادەبەزێت و بەپێچەوانەشەوە بەهاكەی بەرزدەبێتەوە، ئەمڕۆش لە بازاڕەكانی ئاڵوگۆڕی دراو لە سلێمانی نرخی 100 دۆلار بە 120 هەزار و 550 دینار مامەڵەی پێوەكراوە.

خاوەن نووسینگەیەكی ئاڵوگۆڕی دراو لە بازاڕی دۆلارەكەی سلێمانی بۆ (خەڵك) وتی، “لە ئێستادا بەهای 100 دۆلار بەرامبەرە بە 120 هەزار و 500 دیناری عیراقی”.

ئابوری

خۆپیشاندەرانی بەسرە جارێكی دیكە كاركردنی كێڵگە نەوتییەكانیان ڕاگرت

خەڵك- بەشی هەواڵ

ئەمڕۆ سێ‌ شەممە میدیاكانی عیراق بڵاویانكردەوە، خۆپیشاندەران ڕێگای سەرەكی نێوان شاری بەسرە و ناوچەی ڕومێلەیان لە ڕۆژئاوای شارەكە ڕاگرتووە و ڕێگەنادەن كار لە كێڵگە نەوتییەكاندا بكرێت.

بەپێی زانیارییەكان خۆپیشاندەران چەند ڕێگایەكی دیكەیان گرتووە و هاتووچۆ لە چەند ناوچەیەك پەكی كەوتووە.

ئەمڕۆ 26 ڕۆژە خۆپیشاندانی فراوان لە بەغدا و شارەكانی باشوری عیراق بۆ دەستلەكاركێشانەوەی سەرۆكایەتییەكان و هەلی كار و هەمواركردنەوەی دەستوور بەڕێوەدەچێت.

بەردەوام بە لە خوێندنەوە

ئابوری

“پاشەكەوتكردنی نایاسایی مووچەی ئەم سێ‌ مانگە تاوانە”

خەڵك- بەشی هەواڵ

مەم بورهان قانع، پەرلەمانتاری پەرلەمانی كوردستان ڕایگەیاند، دەبێت پەرلەمان فشاری جدی بكات بۆ ڕێگری لە پاشەكەوتكردنی سێ‌ مووچەی ئەمساڵی فەرمانبەران و مووچەخۆرانی هەرێمی كوردستان و ڕێگەنەدرێت ئەو مووچانە پاشەكەوت بكرێن.

ناوبراو لە ڕاگەیەنراوێكدا كە وێنەیەكی بۆ (خەڵك) نێردراوە، نوسیویەتی”هێنانەدیی چاكسازیی لە هەرێمی كوردستان دا، شەڕێكە و دەبێت بكرێت. حكومەت بە پێی كیسەڵ بەرەو چاكسازیی دەچێت و هێشتا رونیش نییە چۆن چاكسازیی دەكات، لەكاتێكدا دەبێت چاكسازیی، لە پرسی شەفافییەتی نەوتەوە دەستپێبكات و سەرجەمی داهاتەكانی دیكەیش بگرێتەوە، سەرەڕای پێداچونەوە بەكۆی ئەو دۆسێیانەی گەندەڵیی دا، كە پێشتر وەزیر و بەرپرسانی باڵای كابینەكانی رابردو تێوەگلاون.”

ئەو پەرلەمانتارەی كوردستان ئاماژەی بەوەكردووە، هەر هەوڵێك بۆ پاشەكەوتكردنی نایاسایی موچەی سێ مانگ، تاوانە و دەبێت بكرێتە هێڵی سور و پەرلەمان فشار دروستبكات بۆ ئەوەی ئەم كابینەیەی حكومەت، هاوشێوەی كابینەكەی پێشو، یاریی بە ژیان و گوزەرانی توێژی موچەخۆران نەكات.”پاشەكەوتكردنی موچە، پێشێلكردنی یاسایە و ئەزمونێكی شكستخواردوی كابینەی پێشوە و نابێت ئەم كابینەیە، هەمان شكست و پێشێلكاریی دوبارەبكاتەوە.”

بەردەوام بە لە خوێندنەوە

ئابوری

وەبەرهێنان: لەمەودوا كارمەندانی كەرتی تایبەت ئیمتیازاتی مووچەخۆری حكومییان دەبێت

خەڵك –بەشی هەواڵ

سەرۆكی دەستەی وەبەرهێنانی حكوومەتی هەرێمی كوردستان ڕایگەیاند “هەمواری یاسای وەبەرهێنان دەكەین، دەمانهەوێت وەبەرهێنان فراوانتر بكەین و ئەركی زیاتر بخەینە سەر شانی كەرتی تایبەت تاوەكو كەرتێكی تایبەتی بەهێزی نیشتمانپەروەر دروست بێت و كەمێك لەبارگرانی سەرشانی حكومەت كەم بكاتەوە”.

محەمەد شوكری بە ڕۆژنامەی باسی ڕاگەیاند “دەبێت چین و توێژەكانی كۆمەڵگە هەلێكی زیاتریان بدەینێ بۆ كاركردن لە كەرتی تایبەت و گەنجەكانمان ئاسۆیەكی فراوانی كاركردن و بەدەستهێنانی هەلی كاریان بۆ واڵا بێت”.

دەشڵێت “هەلی كارێك كە بەهای كار و كەرامەتی كارمەندانی تێدا زامن بێت و هەموو ئیمتیازات و ئەو دەستكەوتانەشی تێدا بێت كە لە كەرتی گشتی بۆ مووچەخۆرانی حكوومەت هەیە”.

بەردەوام بە لە خوێندنەوە

کوردستان