ئێمە لە تۆرە کۆمەڵایەتیەکان

کوردستان

پڕۆژەی بەنداوی باوەنور دەدرێت بە كۆمپانیایەكی خۆماڵی

خەڵك- بەشی هەواڵ

پڕۆژەی بەنداوی باوەنور لە سنوری ئیدارەی گەرمیان یەكێكە لە پڕۆژە ستراتیژییەكانی حكومەتی هەرێم و ماوەی شەش ساڵە ڕاگیراوە و بەپێی دواین زانیارییەكانیش بڕیارە بدرێت بە كۆمپانیایەكی خۆماڵی.

عەدنان عەلی، بەڕێوەبەری شارەدێی پێباز لە سنوری ئیدارەی گەرمیان بە (خەڵك)ی ڕاگەیاند، پڕۆژەكە دراوە بە كۆمپانیایەكی ڕۆمانی، بەڵام بەهۆی دابیننەكردنی پارەی پێویستەوە، ئامادەنییە دەستبەكاركردن بكاتەوە و بەوەش پڕۆژەكە دواكەوتووە.

وتیشی”كۆمپانیایەكی خۆماڵی كە ئێستا پڕۆژەی بەنداوی دێوانە لە سنوری دەربەندیخان جێبەجێ‌ دەكات، دەیەوێت پڕۆژەكە وەربگرێت و ئامادەی دەبڕیووە دەستبەكاركردن بكات”.

پڕۆژەی بەنداوی باوەنور لە ناوەڕاستی 2013 دا، بەردی بناغەی دانرا، بەڵام بەهۆی قەیرانی داراییەوە دواكەوت و تائێستا تەنها 5%ی كارەكانی تەواو بووە.
بەنداوەكە ئەگەر بەپێی دیزاینەكەی دروستبكرێت دەتوانێت 50 ملیۆن مەتری سێجا ئاو كۆبكاتەوە و دەبێتە چوارەم بەنداو لەسەر ئاستی هەرێمی كوردستان.

بەڕێوەبەری شارەدێی پێباز ڕونیكردەوە، كە ئێستا تەنها خاڵی ناكۆكی نێوان هەردوو كۆمپانیاكە ئەوەیە، ئەگەر كێشەیەك كەوتە نێوانیانەوە”لە دادگەیەكی نێودەوڵەتی یەكلای بكرێتەوە”.

یونس جاف، جێگری سەرپەرشتیاری ئیدارەی گەرمیان بە (خەڵك)ی ڕاگەیاند، ئاگاداری گواستنەوەی ئەو پڕۆژەیە نییە بۆ كۆمپانیایەكی دیكە، بەڵام پێشتر حكومەتی هەرێم ڕەتیكردووەتەوە لەمكاتەدا بتوانێت پارەی تەواوكردنی پڕۆژەكە خەرج بكات.

کوردستان

پەروەردەی شارەزوور هەواڵێك لەبارەی دامەزراندنەوە ڕەتدەكاتەوە

خەڵك – بەشی هەواڵ

بەڕێوەبەرێتی پەروەردەی شارەزوور لە ڕاگەیەندراوێكدا سەرجەم دەرچووانی سنوری بەڕێوەبەرێتییەكەیان ئاگاداردەكاتەوە، كە دابەشكردنی فۆڕمی وانەبێژی بنەمای نییە و تائێستا هیچ ڕێنمایی و فۆڕمێكمان لە پەروردەی گشتی سلێمانییەوە پێ نەگەیشتووە.

دەقی ڕاگەیەندراوەكە:

سڵاوی پەروەردە و زانست…

سەرجەم دەرچووانی سنوری بەڕێوەبەرێتیمان ئاگادار دەكەین كە ئەو هەواڵەی بڵاوبووەتەوە لەسەر دابەشكردنی فۆڕمی وانەبێژی بنەمای نییە و تائێستا هیچ ڕێنمایی و فۆڕمێكمان لە پەروردەی گشتی سلێمانییەوە پێ نەگەیشتووە هەركاتێك ڕێنمایی یا فۆڕم هات لێرەوە سەرجەمتان ئاگادار دەكەین..

لەگەڵ ڕێزماندا..

 

نبیل حمەصاڵح عزیز

ل.خۆیەتی و میلاكات

بەڕێوەبەرێتی پەروەردەی شارەزوور

21/7/2019

بەردەوام بە لە خوێندنەوە

ئابوری

“كێشەی كەمئەندامان چارەسەر دەكرێت و مووچەكەیان دابەش دەكرێت”

خەڵك – بەشی هەواڵ

وەزارەتی كار و كاروباری‌ كۆمەڵایەتی‌‌ حكومەتی هەرێم بڕیاریدا كێشەی‌ ئەو كەمئەندامانە چارەسەر بكات كە مووچەكانیان ڕاگیرابوو.

كوێستان محەمەد وەزیری‌ كار و كاروباری‌ كۆمەڵایەتی‌ حكومەتی هەرێم ئەمڕۆ 21/7/2019 لە كۆبوونەوەی ئەنجومەنی وەزارەتەكەی، تیشكی‌ خستە سەر بەرنامەی‌ ئەنجومەنی‌ وەزیران لە بواری‌ چاكسازی‌ و باشتركردنی‌ خزمەتگوزارییەكان و گەڕاندنەوەی‌ ئومێد بۆ هاووڵاتیان بە خزمەتكردنیان‌ و جێبەجێكردنی‌ یاسا.

سەبارەت بە هاوكاری‌ كەمئەندامان و ڕاگیرانی‌ مووچەی‌ ئەو هاووڵاتییە خاوەن پێداویستییە تایبەتانەی‌ كە پاش تانە لێدان نزیكەی‌ چوار مانگە چاوەڕێی‌ مووچە دەكەن، كۆبوونەوەكە بڕیاریدا لە كۆتایی‌ ئەم هەفتەیەدا سەرجەم ئەو لیستانە ئاڕاستەی‌ وەزارەتی‌ دارایی‌ بكرێن بۆ ئەوەی‌ مووچەكانیان بۆ خەرج بكرێت، ئەوەش پاش گەیشتنی‌ لیستی‌ ناوەكان لە هەردوو پارێزگای‌ هەولێر و دهۆكەوە تا ڕۆژی‌ سێشەممە.

سەبارەت بەو كەمئەندامانەشی‌ كە لە ساڵی‌ 2013ەوە مووچەیان بۆ نەكراوە بەهۆی‌ ڕاگیرانی‌ تەرخانكردنی‌ مووچەوە، كۆبوونەوەكە بڕیاریدا نووسراوێك ئاڕاستەی‌ ئەنجومەنی‌ وەزیران بكرێت بۆ وەرگرتنی‌ ڕەزامەندی‌، پاشان بەڕێوەبەرایەتییە گشتیەكانی‌ چاودێری ‌‌و گەشەپێدانی‌ كۆمەڵایەتی‌ لە پارێزگا و ئیدارە سەربەخۆكان كاری‌ پێویست ئەنجام بدەن بۆ مامەڵەی‌ هاووڵاتیان.

سەبارەت بە مووچەی‌ چاودێری‌ خێزان ‌و هەژارەكان، كۆبوونەكە بڕیاریدا كاتێكی‌ تایبەت تەرخان بكات بە كۆبوونەوە بۆ گفتوگۆی‌ مووچەی‌ ئەو توێژانە و تیایدا میكانیزمی‌ گونجاو بۆ گەڕاندنەوە و خەرجكردنەوەی‌ ئەو مووچەیە بۆ كەسانی‌ شایستە.

بەردەوام بە لە خوێندنەوە

کوردستان

پشدەر.. بەهۆی تەزووی كارەبا ژنێك گیانی لەدەستدا

خەڵك – بەشی هەواڵ

بەڕێوەبەرایەتی پۆلیسی ڕاپەڕین ڕایدەگەیەنێت، ژنێك لەكاتی خواردن خستنە ناو بەفرگرەكەی ماڵەكەی كارەبا گرتویەتی و گیانی لەدەستداوە، دەشڵێت،” پاش توێكاری بۆ تەرمەكە ڕادەستی كەسوكاری كرایەوە، مەلەفی لێكۆڵینەوەش بۆ ڕووداوەكە كراوەتەوە”.

بەڕێوەبەرایەتی پۆلیسی ڕاپەڕین لە ڕاگەیەنراوێكدا، كەوێنەیەكی بۆ (خەڵك) نێراوە ڕایگەیاندووە، ئێوارەی ئەمڕۆ یەكشەممە كاتژمێر 5:45 خولەك تەرمی ژنێك بەناوی ( ف . ع . م ) لەدایكبووی ساڵی 1993، پیشەی ژنی ماڵ، دانیشتووی شارەدێی ژاراوە سەر بە شارۆچكەی پشدەر ( قەڵادزێ ) لە لایەن هاوسەرەكەیەوە گەیەندرایە نەخۆشخانە.

ئاماژە بۆ ئەوەشكراوە، كە بە وتەی هاوسەرەكەی ویستویانە ژوورەكانی ماڵەوە بۆیاخ بكەن ، پاش ئەوەی ئامێری بەفرگرەكەی پاككردۆتەوە ویستویەتی هەندێك شت بخاتەوە ناویەوە كارەبا گرتوویەتی و بەو هۆیەشەوە گیانی لەدەستداوە.

ڕاشیگەیاندووە، پاش توێكاری بۆ لاشەكەی ڕادەستی كەسوكاری كرایەوە، مەلەفی لێكۆڵینەوە بۆ ڕووداوەكە كراوەتەوە و لێكۆڵینەوەش بەردەوامە.

بەردەوام بە لە خوێندنەوە

کوردستان