ئێمە لە تۆرە کۆمەڵایەتیەکان

ئابوری

(خەڵك) وردەكاری كڕینی ئۆتۆمبیلی مۆدیل 2019 بۆ پەڕلەمانتاران ئاشكرا دەكات

خەڵك- بەشی هەواڵ

سەرۆكایەتی پەڕلەمانی كوردستان گڕێبەستی لەگەڵ كۆمپانیایەك كردووە بۆ زامنكردنی ئۆتۆمبێلی لاندگرۆزەری 2019″وەنەوشە” بۆ پەڕلەمانتاران و نزیكەی 60 پەڕلەمانتاریش ناوی خۆیان نوسیووە بۆ وەرگرتنی.

ڕزگار محەمەد، پەڕلەمانتاری گۆڕان لە پەڕلەمانی كوردستان بە (خەڵك)ی ڕاگەیاند، ئۆتۆمبێلەكان بەپێی پێكهاتە و تایبەتمەندیان”مواسەفات” نرخەكانیان دەگۆڕێت، بەڵام بەگشتی لە نێوان شەشت هەزار دۆلار و نیو تا 90 هەزار دۆلار و نیو”شەش دەفتەر و نیو و تا 9 دەفتەر و نیو” دایە.

وتیشی”چەند بۆچونێك لەسەر زامنكردنی ئەو ئۆتۆمبێلانە بۆ پەڕلەمانتاران هەبوو، من كاتی خۆی وتم با وەری نەگرین و نەكرێت بە ماڵ بەسەرمانەوە، بەڵام دواتر پێشنیازێكی دیكە كرا، كە بە پارەی پەڕلەمانتاران خۆیان دەكڕدرێت و پەڕلەمان تەنها زامنی پارەكەی كردووە”.

لە خولی پێشووی پەڕلەمانی كوردستاندا هیچ ئۆتۆمبێلێك بۆ پەڕلەمانتاران نەكڕدرا، هەرچەندە سەرۆكایەتی خولی پێشوو ویستیان ئۆتۆمبێل زامن بكەن، بەڵام ناڕەزایەتی زۆری لێكەوتەوە، بەهۆی قەیرانی دارایی و شەڕی داعش لەو كاتەدا.

ڕزگار محەمەد، ڕونیكردەوە هەندێك لە پەڕلەمانتاران نایانەوێت یان”ناوێرن” باسی ئەو بابەتە بكەن، لەكاتێكدا بە كرداری ئۆتۆمبێل بۆ پەڕلەمانتاران زامن كراوە و پێویستی بە شاردنەوە نییە، چونكە هیچ بڕە پارەیەكی پەڕلەمانی پێنەدراوە.

موچە و ئیمتیازاتی پەڕلەمانتاران لە عیراق و هەرێمی كوردستان ناڕەزایەتی زۆری لێكەوتووەتەوە و تائێستاش چەندینجار خۆپیشاندانی لە دژ كراوە، چونكە زۆربەی خەڵك پێیانوایە موچەی پەڕلەمانتاران زۆرە.

هێڤیدار ئەحمەد، ئەندامی پەڕلەمانی كوردستان سەبارەت بە كڕینی ئۆتۆمبێل بۆ پەڕلەمانتاران ڕەتیكردەوە زانیاری هەبێت و بۆ (خەڵك) بێئاگایی خۆی دەربڕی و وتی”ئاگادار نیم لە ئیدارەی پەڕلەمان بپرسن باشترە”.

كڕین یان زامنكردنی ئەو ئۆتۆمبێلانە بۆ پەڕلەمانتاران لەكاتێكدایە، كە موچەی هەر پەڕلەمانتارێكی پەڕلەمانی كوردستان 8 ملیۆن و 200 هەزار دینارە و دوای چوار ساڵ بە 80%ی موچەوە خانەنشین دەكرێت و بەوەش هەر پەڕلەمانتارێك موچەكەی دەبێتە 6 ملیۆن و 560 هەزار دینار.

یەكێكی دیكە لە ئەندامانی ئەم خولەی پەڕلەمانی كوردستان بە (خەڵك)ی ڕاگەیاند، ئەو بابەتە زۆر ئاساییە، چونكە بە موچەی خۆیان ئۆتۆمبێلیان بۆ كڕاوە و پێویستناكات ناڕەزایەتییان لە دژ بكرێت.

ئەو پەڕلەمانتارە كە ناوەكەی لای (خەڵك) پارێزراوە ڕەخنەی ئەوەی لە زۆربەی خەڵك هەبوو، كە تەنها ناوی پەڕلەمانتاران دەهێنن و باسی وەزیرەكان ناكەن، لەكاتێكدایە وەزیرەكان زۆرترین موچە و دەرماڵە و ئیمتیازاتیان هەیە، وەك ئەو دەڵێت.

(خەڵك) بۆ وەرگرتنی زانیاری زیاتر چەندجارێك پەیوەندی بە هیوا نەسرەدین، بەرپرسی ئیدارەی پەڕلەمانی كوردستانەوە كرد، بەڵام موبایلەكەی داخرابوو.

ئابوری

لە سلێمانی سێ‌ شوێن داخران

خەڵك- بەشی هەواڵ
بەڕێوەبەرایەتی چاودێری تەندروستی سلێمانی ڕایدەگەیەنێت، لەبەر نەبونی مەرجەكانی تەندروستی و نەبونی مۆڵەت تەنها لە ماوەی یەك ڕۆژدا (۳) شوێن داخران.

بەڕێوەبەرایەتی چاودێری تەندروستی سلێمانی لە ڕاگەیەندراوێكدا، كە وێنەی دراوە بە (خەڵك) ئاماژەی بەوەكردووە، لەبەر نەبونی مەرجەكانی تەندروستی و نەبونی مۆڵەتنامەی تەندروستی و هەبوونی مەوادی ماوە بەسەرچوو لەكاتی سەردانی تیمەكانی چاودێری تەندروستی سلێمانی بڕیار درا بە داخستنی سێ‌ شوێن لە سنوری گەڕەكەكانی سلێمانی شوێنەكان.

ئاشكراشی كردووە، نانەواخانەیەك لەگەڕەكی شۆڕش سەروو نەخۆشخانەی شۆڕش و نزیك مزگەوتی نزا داخراوە لەگەڵ ماركێتێك و نانەواخانەیەك لە گەڕەكی ئیبراهیم ئەحمەد لە نزیك مزگەوتی بەهەشت.

جەختیشی كردۆتەوە، كە ئەو شوێنانە ئاگاداركراونەتەوە تاكو مەرجە تەندروستیەكان جێبەجێ نەكەن شوێنەكەیان بۆناكرێتەوە .

بەردەوام بە لە خوێندنەوە

ئابوری

سێ‌ مادەی بەشەخۆراك دابەشدەكرێت
لەسەر قەرەبووكردنەوەی بەشەخۆراكی فەوتاو ڕوونكردنەوە دەدرێت

خەڵك – بەشی هەواڵ
بەڕێوەبەری كۆمپانیای دابەشكردنی خۆراك لە سلێمانی ڕایدەگەیەنێت، بەردەوامن لە دابەشكردنی بەشەخۆراكی هاووڵاتیان بۆ مانگی ئایار و دەشڵێت: “بۆ مانگی حەوت-یش پسوڵەی وەرگرتنمان بۆ كراوە و چاوەڕێی هاتنی بەشەخۆراكی ئەو مانگەش دەكەین”.

شەوكەت محەمەد، بەڕێوەبەری كۆمپانیای دابەشكردنی خۆراك لە سلێمانی بە (خەڵك)ی ڕاگەیاند، لە ئێستادا دابەشكردنی بەشەخۆراك لە ناو سلێمانی تەواو بووە، بەڵام دابەشكردن لە دەرەوەی شار دەستی پێكردووە و لە كۆتاییەكان نزیك بۆتەوە.

وتیشی، “لە ئێستادا هەرسێ بەشەخۆراكی زەیت و شەكر و برنجی مانگی پێنجی ئەمساڵ دابەشدەكرێت و ناوچەی شارەزوور تەواوبووە و دەستمان كردووە بە ئیدارەی ڕاپەڕین، ڕۆژانە دابەشكردنمان بۆ ئەو ناوچانە هەیە”.

ڕاشیگەیاند، بۆ مانگی شەش هیچ بەشەخۆراكێكی تێدا نیە و بۆ مانگی حەوت-یش پسوڵەمان لە بەغداوە بۆ كراوە و چاوەڕێی هاتنی بەشی سلێمانی دەكەین و هەر بە گەیشتنی ئەویش دابەشدەكرێت.

لە بارەی قەرەبووی خۆراكی فەوتاوی هاووڵاتیان بەڕێوەبەری كۆمپانیای دابەشكردنی خۆراك ئاشكراشیكرد، لە ئێستادا هیچ باسێك نیە و هیچ نووسراوێكمان بەدەست نەگەیشتووە، چاوەڕێ دەرچوونی ڕێنمایی دەكەین لە بەغداوە بێت بۆمان تا كاری لەسەر بكەین.

بەردەوام بە لە خوێندنەوە

ئابوری

ژووری بازرگانی سلێمانی هۆشداری لە گرانبوونی نرخی شتومەك دەدات

خەڵك – بەشی هەواڵ
سەرۆكی ژووری بازرگانی و پیشەسازی سلێمانی ڕایدەگەیەنێت، بەشێك لە بارە ترانزێتەكانی بازرگانان لە مەرزی باشماخ ڕادەگیرێن و ڕێگە نادرێت بێتە هەرێمی كوردستانەوە، دەشڵێت: “ئەگەر بەزووترین كێشەكە چارەسەر نەكرێت زیانی گەورە بەكەرتی ئابووری هەرێمی كوردستان دەكەوێت”.

ئەمڕۆ ١٧ی تەمموزی ٢٠١٩، ژمارەیەك لە بازرگانانی شاری سلێمانی بە مەبەستی چارەسەر كردنی كێشە و گرفتەكانیان سەردانی ژووری بازرگانی و پیشەسازی سلێمانیان كرد و لەگەڵ سیروان محەمەد، سەرۆكی ژوورەكە كۆبوونەوە.

ئەو بازرگانانە ئاماژەیان بۆ ئەوەكردووە، زیاتر لە ١٥٠ بارهەڵگر لەبەرئەوەی لەدیوی ئێرانی مەرزی باشماخەوە وەسڵی ٥٠ دۆلاریان بۆ نەكراوە ڕاگیراون و ڕێگە نادرێت بێتە هەرێمی كوردستانەوە.

سیروان محەمەد، سەرۆكی ژووری بازرگانی و پیشەسازی سلێمانی لە لێدوانێكی ڕۆژنامەوانیدا ڕایگەیاندووە، بازرگانان نیگەران لەوەی، كە بارەكانیان بە بیانوی نەبڕینی وەسڵی ٥٠ دۆلاری لە دیوی ئێرانەوە ڕێگری لێ دەكرێت، كە ئەمە مەترسیەكی گەورەیە بۆ سەر دەروازە سنووریەكانی هەرێمی كوردستان.

وتیشی، “ئەگەر ئەم كێشەیە بەردەوام بێت، بازرگانان ناچارن ڕێگای بازرگانی بگۆڕن و لە مەرزەكانی ناوەڕاست و باشوری عیراقەوە كاڵاكانیان هاوردە بكەن”.

ڕاشیگەیاندووە، داوام لە وەزیری دارای و ئابوری حكومەتی هەرێم و پارێزگاری سلێمانی ئەوەیە بێنە سەرخەت و كێشەكە چارەسەر بكەن تا بازرگانان تووشی زەرەر و زیانی زیاتر نەبن، چونكە ئەگەر بە زووترین كێشەكە چارەسەر نەكرێت زیانی گەورە بە كەرتی ئابووری هەرێمی كوردستان دەكەوێت كاڵا و شتومەك لەسەر هاووڵاتیان گران دەبێت و بازرگانان ناچار دەبن ڕێرەوی كاری بازرگانی بگۆڕن.

بەردەوام بە لە خوێندنەوە

کوردستان