ئێمە لە تۆرە کۆمەڵایەتیەکان

عێراق

هاوپەیمانییەكەی عەبادی بۆ (خەڵك) هۆكاری دروستكردنی ئۆپۆزسیۆن ئاشكرا دەكات

خەڵك- بەشی هەواڵ
پەڕلەمانتارێكی هاوپەیمانی نەسر، كە لەلایەن حەیدەر عەبادییەوە سەرۆكایەتی دەكرێت، هۆكاریی پێكهێنانی ئۆپۆزسیۆن و دروستكردنی كوتلەیەكی ئۆپۆزسیۆن لە پەڕلەمانی عیراق ئاشكرا دەكات و ڕەتیدەكاتەوە مەبەستی سەرەكی ئەو هەنگاوە ڕوخاندنی حكومەتەكەی عادل عەبدولمەهدی بێت.

نەدا شاكر جەودەت، پەڕلەمانتاری هاوپەیمانی نەسر، لە لێدوانێكی تایبەت بە (خەڵك) ڕایگەیاند، “ڕووكردنە دروستكردنی ئۆپۆزسیۆن لەم ماوەیەدا، پەرچەكرداری هەڵپەكردنی هەندێك لە كوتلە سیاسییەكانە بۆ دابەشكردنی پۆستەكان لەنێوان خۆیان، بەجۆرێك دەبینین ئەو كوتلانە بەجۆرێكی زۆر نەشیاو هەوڵ دەدەن دەست بەسەر پلە تایبەتەكاندا بگرن و كەسێتییەكانیشیان بۆ ئەو پلانە كەسانێكی ناكارامە، ئاشكراشە بڕبڕەپشتی وەزارەتەكان ئەو پلانەن”.

بە وتەی ئەو پەڕلەمانتارە، “ئەو هەڵپەیە و دەستگرتن بەسەر ئەو پلانەدا بە شێوازێكی پشكداری قێزەون، دەبێتە مایەی وێرانكردنی دامەزراوە حكومییەكان، ئێمە تا ئەندازەیەك قبوڵمان بوو وەزارەتەكان لەنێوان كوتلەكان و حزبەكاندا دابەش بكرێت و لەلایەنە كەسانێكەوە بەڕێوەببرێن، كە پسپۆڕییان ئەو وەزارەتەش نییە، چونكە دەكرێت كاروبارەكان ئاسایی بەڕێوەبچن، بەڵام گەر بە هەمان شێوە لەگەڵ پلە تایبەتەكاندا مامەڵە بكرێت، مانای تەواو وێرانكردنی دامەزراوە حكومییەكانە”.

نەدا شاكر جەودەت، ڕەتیدەكاتەوە هەوڵی پێكهێنانی ئۆپۆزسیۆن بۆ ڕوخاندنی حكومەتەكەی عەبدولمەهدی بێت، بەڵام ئەوان لە سەرەتای پێكهێنانی حكومەتدا، كە سەردانیان كرد، تكای لێكردوون شەرمەزاری نەكەن لەڕووی دابەشكردنی پۆستە وەزارییەكان، بەو پێیەی فەتح و سائیرون بەرپرسیارێتیان لەئەستۆدایە و دەكرێت بچنە لای ئەوان گلەیی و گازندەی خۆتان بكەن، چونكە ئەو دوو هاوپەیمانییە پڕۆسەكەیان بەڕێوەبردووە.

پەڕلەمانتارەكەی نەسر دەڵێت: “لەو دەمەوە پەڕلەمانتاری هاوپەیمانییەكەی نەك حەیدەر عەبادی سەرۆكی هاوپەیمانییەكەیان، خواستیان لە پێكهێنانی ئۆپۆزسیۆن بووە، بەڵام عەبادی دژی ئەو ئاڕاستەیە وەستا و پێی ڕاگەیاندن، كە دەبێت ئەوان پاڵپشتی بكەن و پشتیوانی بكەن تا سەركەوتن بەدەست بهێنێن، چونكە سەركەوتنەكەی سەركەوتنە بۆ گەلی عیراق، شكستخواردنیشی مانای دروستبوونی تەنگژە و كێشە دەگەیەنێت لە وڵاتدا”.

نەدا شاكر جەودەت پێیوایە، “عەبادی ئەگەر خواستی لە ڕوخاندنی حكومەت بوایە، لە سەرەتاوە هەلی ئەوەی بۆ ڕەخسابوو، بەڵام ئەو خواستی لەو جۆرەی نییە و ئۆپۆزسیۆنەكەشی بۆ ڕاستكردنەوە و هەڵەكان و پڕكردنەوەی كەلێنەكانە، ئەوان كە لە سەرەتاوە عەبدولمەهدیان بۆ پێكهێنانی حكومەت ڕاسپارد، دەكرا لەسەر یەكەم هەنگاوی یەكەمی خۆی بەردەوام بێت، بەڵام كە ڕادەستی كوتلە سیاسییەكانی كرد، كێشە و تەنگژەكان دەستییان پێكرد، لەمەشدا حزبە سیاسییەكان بەرپرسن”.

لەئێستادا بزاوتنێكی سیاسی لەنێوان ژمارەیەك لە كوتلە سیاسییەكان بۆ دروستكردنی بەرەیەكی ئۆپۆزسیۆن دەستیپێكردووە، هاوپەیمانی نەسریش، كە لەلایەن حەیدەر عەبادی سەرۆك وەزیرانی پێشووەوە سەركردایەتی دەكرێت، لە ڕیزی پێشەوەی ئەو كوتلە سیاسیانەدایە و هەریەك لە هاوپەیمانی دەوڵەتی یاسا و ڕەوتی حكیمە و هەندێك لە كوتلە سوننەكانیش هاوبەشن لەو بزاوتنەدا، هەڵوێستی فەرمی ئەو كوتلانەش لەئێستادا ڕاستكردنەوەی هەڵەكان و پڕكردنەوەی كەلێنەكان، بەڵام بەپێی ڕاپۆرتە ڕۆژنامەوانییەكان، ئامانجی سەرەكی ئۆپۆزسیۆنەكە، ڕوخاندنی حكومەتەكەی عادل عەبدولمەهدی و گێڕانەوەی حەیدەر عەبادییە بۆ پۆستی سەرۆكایەتیكردنی حكومەتی عیراق.

عێراق

هێرشی هاوپەیمانان بۆ سەر داعش دەستی پێكردەوە

خەڵك- بەشی هەواڵ
شانەی ڕاگەیاندنی جەنگی ئاشكرای دەكات، كە بەهێرشی فڕۆكە جەنگییەكانی هاوپەیمانان لەسەر سنوری عیراق- سوریا 10 چەكداری داعش كوژران.

شانەی ڕاگەیاندنی جەنگی عیراق لە ڕاگەیەندراوێكدا ئاماژەی بەوەكردووە، كە فڕۆكە جەنگییەكانی هاوپەیمانان هێرشێكیان كردۆتە سەر ژمارەیەك چەكداری داعش لە باكوری دەریاچەی (سنێسلە) لە شارۆچكەی بەعاج لەسەر سنوری عیراق- سوریا.

ڕاشیگەیاندووە، لەو هێرشەدا بەپێی زانیاری وردی هەواڵگری 10 چەكداری داعش لەناو حەشارگەیەك كوژراون.

سەرەڕای كۆتایی هاتنی شەڕی دژی داعش لە عیراق و سوریا و تێكشكاندنی ئەو ڕێكخراوە، بەڵام بەهۆی بوونی شانە نووستووەكانیان و مانەوەی چەند گروپێكیان لە ناوچە سنوورییەكان و ئەنجامدانی كردەوەی تیرۆرستی لە چەند ناوچەیەك جاروبار هێزە ئەمنییەكان كێوماڵ و ئۆپەراسیۆن ئەنجام دەدەن.

بەردەوام بە لە خوێندنەوە

عێراق

زۆربەیان عیراقی و سوری و ئەفغانین
ژمارەی پەنابەران لە ئەڵمانیا ئاشكرا دەكرێت

خەڵك- بەشی هەواڵ
نوسینگەی ئاماری فیدراڵی لە ئەڵمانیا، ژمارەی پەنابەران و داواكارانی پەنابەریی ئاشكرا دەكات و دەڵێت، تا كۆتایی ساڵی 2018، ژمارەیان گەیشتووتە نزیكەی 1.8 ملیۆن كەس كە 1.3 ملیۆنیان مافی مانەوەیان وەرگرتووە، و زۆربەیان عیراقی و سوری و ئەفغانین.

بەپێی نوسینگەی ئاماری فیدراڵی لە ئەڵمانیا، تا كۆتایی ساڵی 2018، ژمارەی ئەوانەی داوای پەنابەری دەكەن لە ئەڵمانیا، گەیشتووەتە نزیكەی 1.8 ملیۆن كەس،  ڕێژەی تۆماركردنی داواكارییەكانی پەنابەریش لەسەدا شەش زیادی كردووە بەراورد بە ساڵی پێشوو، بەو واتایەی كە 101 هەزار كەسی تر بۆ ئەو مەبەستە ڕوویان لە وڵاتەكە كردووە.

نوسینگەی ئاماری فیدراڵی دەڵێت، هۆكارە مرۆییەكان، گەورەترین پاڵنەرن كە وا لە كۆچبەران دەكەن ڕوو لە ئەڵمانیا بكەن، بەو پێیەی زیاتر لە 71%ی ئەوانەی داوای دەستبەركردنی مافی پەنابەری دەكەن و ئێستا لە ئەڵمانیان، لەماوەی ئەم پێنج ساڵەی دواییدا گەیشتووتە وڵاتەكە،  1.3 ملیۆن كەسیش یەكێك لە جۆرەكانی مافی پەنابەرییان دەستبەركردووە.

بەپێی ئەو دەزگا فیدراڵییەی ئەڵمانیا، نزیكەی 62%ی ئەوانەی مافی پارێزگاریی و مانەوەیان وەرگرتووە لە ئەڵمانیا، لە سێ‌ وڵاتەوە هاتوون كە بریتین لە سوریا (526 هەزار) و عیراق (138 هەزار) و ئەفغانستان (131) هەزار.

بەردەوام بە لە خوێندنەوە

عێراق

(خەڵك) نهێنی زیاتری هێرشەكەی ئەمڕۆی سەر حەشدی شەعبی ئاشكرا دەكات

خەڵك- بەشی هەواڵ

دوانیوەڕۆی ئەمڕۆ هەینی، فڕۆكەیەكی بێفڕۆكەوان هێرشی كردەسەر بنكەیەكی سەربازی حەشدی شەعبی لە نزیك دوزخورماتوو و زیانی ماددی لێكەوتەوە.

عەلی حسێنی، وتەبێژی میحوەری باكوری حەشدی شەعبی بە (خەڵك)ی ڕاگەیاند، لێكۆڵینەوە دەستی پێكردووە و تائێستا نازانرێت چی وڵاتێك یان لایەنێك ئەو هێرشەكەی كردووە و بۆ چی مەبەستێك بووە.

وتیشی”تیمێكی شارەزا لە بەغداوە گەیشتوون و لێكۆڵینەوە دەكەن، بەڵام هیچ زیانێكی گیانی نەبووە”.

پێشتر میدیاكانی عیراق بڵاویانكردەوە، كە دوو چەكدارێكی حەشدی شەعبی كوژراوە و دووانی تریش برینداربوون.

عەلی حسێنی ڕونیكردەوە، ئەو بارەگایە تەنها بۆ بەرێكردنی كاروباری ئیداری چەكدارانی حەشدی شەعبی بەكارهاتووە.

بەردەوام بە لە خوێندنەوە

کوردستان