ئێمە لە تۆرە کۆمەڵایەتیەکان

کوردستان

تەندروستی و ئاوی سلێمانی ڕێوشوێن دەگرنەبەر
لەگەڵ هاتنی گەرما سكچوون و ڕشانەوە بڵاودەبێتەوە

خەڵك- بەشی هەواڵ
بەڕێوەبەرایەتی گشتی تەندروستی سلێمانی و بەڕێوەبەرایەتییەكانی ئاو ڕێوشوێنی پێویست بۆ پاراستنی گیانی هاووڵاتیان لە سكچوون و ڕشانەوە دەگرنە بەر و بەرێوبەری خۆپاراستنی تەندروستی سلێمانی دەڵێت: “لەگەڵ هاتنی وەرزی گەرما ڕێژەی سكچوون و ڕشانەوە زیاد دەكات”.

بەپێی ڕاگەیەندراوێكی تەندروستی سلێمانی، د.سەباح نەسرەدین، بەڕێوەبەری گشتی تەندروستی سلێمانی لەگەڵ بەڕێوبەرانی ئاوی ناوشاری سلێمانی و دەورووبەر و خۆپاراستنی سلێمانی كۆبۆوە.

هەر بەپێی ڕاگەیەندراوەكە، لەكۆبونەوەكەدا تیشك خرایە سەر هۆكارەكانی بوونی سكچوون و ڕشانەوە و گفتووگۆ لەبارەی چەند ڕێوشوێنیك كرا بۆ پاراستنی سەلامەتی گیانی هاووڵاتیان وەك دابینكردنی ئاوێكی تەندروست، كە بگاتە ماڵان و بەدواداچوون بۆ پاك و خاوێنی سەرچاوەكانی ئاو بكرێت.

د.ڕزگار عەلی، بەرێوبەری خۆپاراستنی تەندروستی سلێمانی وتی، “ساڵانە لەگەڵ هاتنی وەرزی گەرما و زیادبوونی سكچوون و ڕشانەوە بەڕێوەبەرایەتی گشتی تەندروستی سلێمانی و ئاوی سلێمانی بەهەماهەنگی هەردوولا و بەدانانی بەرنامەیەكی تۆكمە هەوڵ دەدرێت ڕێگری لەبڵاوبوونەوەی سك چوون و ڕشانەوە بكرێت”.

وتیشی، “لەو كۆبوونەوەیەدا باس لەگرنگیدان بە كلۆر كرا لەگەڵ ئەو ڕێژە پێویستەی دەكرێتە ئاوەوە و لەژێر چاودێری بەڕێوبەرایەتی خۆپاراستن بێت و هەروەها هاوكاری و هەماهەنگی زیاتر لەنێوان بەڕێوبەرایەتی تەندروستی سلێمانی و بەڕێوبەرایەتیەكانی ئاودا هەبێت”.

کوردستان

نێچیرڤان بارزانی: هەرێم پێویستی بە پشتگیری فەڕەنسایە

خەڵك – بەشی هەواڵ

سەرۆكی هەرێمی كوردستان لەگەڵ باڵیۆزی فەڕەنسا لە عیراق و سەرۆكی سەنتەری پشتگیریی قەیرانەكان لە وەزارەتی دەرەوەی فەڕەنسا و وەفدێكی یاوەریان كۆبووەوە و ڕایگەیاند، عیراق و هەرێمی كوردستان پێویستییان بە ڕۆڵ و پشتگیریی فەڕەنسا و كۆمەڵگەی نێودەوڵەتی و بەردەوامیی ئەركی هاوپەیمانیی نێودەوڵەتییە بۆ بەرەنگاربوونەوەی تیرۆر.

بەپێی ڕاگەیەنراوێكی سەرۆكایەتی هەرێمی كوردستان، ڕۆژی سێشەممە 24/11/2020 نێچیرڤان بارزانی، سەرۆكی هەرێمی كوردستان لەگەڵ برونۆ ئۆبێر، باڵیۆزی فەڕەنسا لە عیراق و ئێریك شۆفالیێ، سەرۆكی سەنتەری پشتگیریی قەیرانەكان لە وەزارەتی دەروەی فەڕەنسا و وەفدێكی یاوەریان كۆبووەوە.

بەپێی ڕاگەیەنراوەكە، نێچیرڤان بارزانی سوپاسی فەڕەنسای كرد كە لە ڕووی سەربازیی و مرۆییەوە پشتگیریی بۆ هەرێمی كوردستان دووپات كردووەتەوە و دەستخۆشیی لە دەستپێشخەری و پڕۆژەی بونیاتنانی نەخۆشخانەیەك لە شەنگال كرد كە لە ڕێگەی ڕێكخراوێكی ناحكومیی فەڕەنسییەوە جێبەجێ دەكرێت.

لە كۆبوونەوەكەدا، سەرۆكی هەرێمی كوردستان ڕایگەیاند، “سەرۆكایەتیی هەرێمی كوردستانیش لەگەڵ فەڕەنسا و هاوبەشانی تردا بەشداری لە بونیاتنانی نەخۆشخانەكەدا دەكات”.

لە تەوەرێكی تری كۆبوونەوەكەدا باس لە دۆخی ئاوارەكانی عیراق لە كەمپەكانی هەرێمی كوردستان و گەڕانەوەیان كرا.

نێچیرڤان بارزانی جەختی لە خواستی گەڕانەوەی خۆویستانەی ئاوارەكان بۆ شوێنەكانیان و پێویستیی دابینكردنی ئاسایش و ئارامی و خزمەتگوزارییە سەرەتاییەكان كردەوە.

بەردەوام بە لە خوێندنەوە

کوردستان

وادەی دەستپێكردنەوەی دەوامی خوێندنگەكان ئاشكرا دەكرێت

خەڵك – بەشی هەواڵ

ئەندامێكی لیژنەی پەروەردە لە پەرلەمانی كوردستان ڕایدەگەیەنێت، پێشبینی دەكرێت لە مانگی یەكەمی ساڵی نوێ دەست بە دەوامی خوێندنگەكان بكرێتەوە.

گولستان باقی، ئەندامی لیژنەی پەروەردەی پەرلەمانی كوردستان لە فڕاكسیۆنی پارتی، بە ماڵپەڕی فەرمیی حزبەكەی ڕاگەیاند:”پێشبینی دەكرێت دەستپێكردنەوەی دەوامی خوێندنگەكان بكەوێتە مانگی یەكەمی ساڵی نوێ، چونكە كردنەوەی دەرگای خوێندنگەكان پەیوەستە بە دۆخی تەندروستییەوە، ھەردوو وەزارەتی تەندروستی و پەروەردە ھەڵسەنگاندن بۆ دۆخەكە دەكەن”.

ئەو ئەندامەی لیژنەی پەروەردە ئاماژەی بەوەشداوە:”بەر لەوەی كۆتایی بەو وادەیە بێت كە لەلایەن حكومەتەوە بڕیار لەسەر ڕاگرتنی دەوام دراوە، ھەڵسەنگاندن بۆ دۆخەكە دەكرێت و بڕیاری نوێ دەدرێت”.

لەبارەی قۆناغی ١٢ی ئامادەییەوە گولستان باقی ڕوونی كردەوە: “ڕاستە خوێندكارانی پۆلی ١٢ی ئامادەیی زەرەرمەندی یەكەمن لە ڕاگرتنی دەوام، بەڵام چەند پێشنیارێك ھەن بۆ ئەوەی قەرەبووی قۆناغی ١٢ی ئامادەیی بكرێتەوە، لەوانەش دواخستنی تاقیكردنەوەكانە، بێگومان ھەر بڕیارێك بدرێت بۆ بەرژەوەندیی خوێندكارانە”.

بەردەوام بە لە خوێندنەوە

کوردستان

پەرلەمانتارێكی كورد بۆ (خەڵك) ئامانجی سەرەكی پێكهێنانی لیژنەكەی حەلبوسی ئاشكرادەكات

خەڵك- ئیدریس حەبار
تێبینی لەسەر لیژنەكەی محەمەد حەلبوسی سەرۆكی پەرلەمانی عیراق هەیە كە بۆمەبەستی دیالۆگ لەنێوان هەردوو حكومەتی فیدراڵ و هەرێمی كوردستان پێكهێنانی ڕاگەیەندرا، لەو بارەیەشەوە پەرلەمانتارێكی كورد لە پەرلەمانی عیراق دەڵێت، لە دانیشتنەكانی داهاتووی پەرلەماندا ناڕەزایی خۆمان بەرانبەر بە پێكهاتەی لیژنەكە دەگەیەنینە سەرۆكایەتی پەرلەمان.

سەلیم شوشكەیی پەرلەمانتاری كورد لە پەرلەمانی عیراق، لە لێدوانێكیدا بۆ (خەڵك) ڕایگەیاند:”پەرلەمان لایەنێكی یاسادانەرە و لایەنی ڕاپەڕاندن نییە تا دانوستان بكات، دانوستان دەبێت حكومەت ئەنجامی بدات، بەڵام ئەو ئەركەی لیژنەكەی محەمەد حەلبوسی سەرۆكی پەرلەمان لەئەستۆی دەگرێت، نێوەندگیرییە بەو پێیەی پەرلەمان بەردەوام لایەنێكی بێ‌ لایەنە و ئەركی یاسادانان و چاودێری حكومەتی لەئەستۆدایە”.

بە وتەی سەلیم شوشكەیی:”لیژنەكە لەپێناو دۆزینەوەی چارەسەرێكی گونجاو كاریی نێوەندگیریی دەكات، تا هەردوو حكومەتی هەرێمی كوردستان و بەغدا بگەیەنێتەیەك، ئەمەش بۆ هەموو پرسە هەڵپەسێردراوەكان نییە، بەڵكو تەنیا بۆ بودجەی 2021یە، تا لێوەی بتواتنرێت پشكی هەرێمی كوردستان دیاریی بكرێت، ئامانجی سەرەكی پێكهێنانی لیژنەكە حەلبوسیش خۆی لەم خاڵەدا دەبینێتەوە”.

ئەو پەرلەمانتارە كوردە دەڵێت:”ئێمە وەكو كورد تێبینیمان لەسەر لیژنەكە هەیە، چونكە دەبوو هەموو پێكهاتەكان لەخۆبگرێت و كوردیشی تێدابوایە، بەڵام بەداخەوە كوردی تێدا نییە، بۆیە ڕەنگە لە ڕۆژی پێنج شەممەی داهاتوودا لەو بارەیەوە ناڕەزایی خۆمان بگەیەنینە سەرۆكی پەرلەمان”.

محەمەد حەلبوسی سەرۆكی پەرلەمانی عیراق، لەڕێی پێكهێنانی لیژنەیەك كە لە هەشت پەرلەمانتار پێكدێت، هەوڵ دەدات كێشەكانی نێوان حكومەتی فیدراڵ و حكومەتی هەرێم چارەسەر بكات و لەڕیی ئەو لیژنەیەوە دەیەوێت دانوستان لەنێوان هەردوو حكومەتی فیدراڵ و حكومەتی هەرێمی كوردستان بۆ مەبەستی چارەسەركردنی ناكۆكییەكان و كێشە هەڵپەسێردراوەكانی نێوان هەردوولا، ئەنجام بدرێت.

لیژنەكەی محەمەد حەلبوسی سەرۆكی پەرلەمانی عیراق، لە هەریەك لە پەرلەمانتاران: محەمەد شیاع سودانی، عەدنان زورفی، محەمەد ساحیب دەڕاجی، موزاحم تەمیمی، عەبود عیساوی، هیشام سوهەیل، حەسەن شوەیرد، فەیسەڵ عەیساوی، پێكدێت.

بەپێی ئەو ڕێنماییەی لەو بارەیەوە لەلایەن حەلبوسییەوە دەرچووە، لیژنەكە بۆ ئەنجامدانی دیالۆگ لەنێوان بەغدا و هەولێر ڕاسێردراوە”تا چارەسەری گونجاو بدۆزرێتەوە، بەشێوەیەك لەگەڵ دەستور و یاساكان و هێنانەدی دادپەروەریی لە دابەشكردنی داهاتەكان لەنێوان ڕۆڵەكانی گەلی عیراقدا بگونجێت و لە دووتوێی دەقە یاساییەكان و لە ڕەشنوسی یاسای بودجەی فیدراڵی گشتی ساڵی 2021دا زامن بكرێت”.

بەردەوام بە لە خوێندنەوە

کوردستان