ئێمە لە تۆرە کۆمەڵایەتیەکان

کوردستان

نوسراوێك بۆ عەبدولمەهدی بەرزكراوەتەوە
داوای ئاشكراكردنی ڕێكەوتنی نەوتی هەرێم لەگەڵ توركیادا دەكرێت

خەڵك- بەشی هەواڵ
پەرلەمانتارێكی كورد، داوا دەكات ڕێكەوتنی نەوتی هەرێم لەگەڵ توركیادا ئاشكرا بكرێت، بۆ ئەو مەبەستەش نوسراوێك بۆ عادل عەبدولمەهدی سەرۆكی ئەنجومەنی وەزیرانی عیراق بەرزدەكاتەوە.

كاوە مەولود، پەرلەمانتاری بزوتنەوەی گۆڕان لە پەرلەمانی عیراق، لە لێدوانێكی تایبەت بە (خەڵك) ڕایگەیاند:”ئەوەی لە كوردستان دەگوزەرێت، كارێكی ناشەفافە و گەندەڵییەكی زۆر لە بواری سامانە سروشتییەكاندا هەیە”، ئاماژەی بە شكستهێنانی حكومەتی هەرێمی كوردستانیش كرد لە بواری “سەربەخۆ فرۆشتنی نەوت كە تێیدا خەڵك و ئابوری هەرێم زیانێكی زۆرییان پێگەیشتووە “.

بە وتەی كاوە مەولود:”لە حكومەتی عیراقدا، ئەنجومەنێك پێكهێنراوە بۆ بەرەنگاربوونەوەی گەندەڵی و نەهێشتنی گەندەڵی، ئەنجومەنەكەش لەلایەن خودی عادل عەبدولمەهدی سەرۆك وزیرانەوە سەرۆكایەتی دەكرێت، یەكێك لە ئەركە سەرەكییەكانی ئەنجومەنەكە، دابینكردنی شەفایەت و ڕێگرتنە لە گەندەڵی، بە تایبەت ئەوەی پەیوەندی بە سامانی نیشتمانی وڵاتەوە هەیە”.

ئەو پەرلەمانتارەی بزوتنەوەی گۆڕان دەڵێت:”بەو پێیەی نوێنەری خەڵك و گەلی كوردستانە، نوسراوێكی بۆ سەرۆك وەزیران و سەۆكی ئەنجومەنی باڵای نەهێشتنی گەندەڵی بەرزكردۆتەوە و تێیدا داوای كردووە داوا لە حكومەتی هەرێمی كوردستان و بە تایبەت نێچیرڤان بارزانی سەرۆكی پێشووی حكومەت و ئاشتی هەورامی وەزیری سامانە سروشتییەكان و نەجمەدین كەریم پارێزگاری پێشووی كەركوك بكرێت، دوو ڕێكەوتنی نهێنی ئاشكرا بكەن”.

كاوە مەولود پێیوایە:”ئەو ڕێكەوتننانە تائێستا كەس نازانێت ناوەڕۆكەكەیان چییە و لەسەر چ بنەمایەك كراون، یەكەمیان ڕێكەوتنی نێوان هەرێم و حكومەتی توركیایە كە بە ڕێكەوتنی پەنجا ساڵە بەناوبانگە، ئەوی تریشیان ڕێكەوتنی حكومەتی هەرێمە لە ساڵی 2015 لەگەڵ نەجمەدین كەریم پارێزگاری پێشووی كەركوك كە تایبەتە بە شایستەی پترۆدۆلاری كەركوك، و لەسەرەتای ساڵی 2016وە خراوە بواری جێبەجێكردنەوە، ئەم ڕێكەوتنەش ناوەڕۆكەكەی نادیارە و نهێنییە، تەنانەت ئەندامانی ئەنجومەنی پارێزگەی كەركوكیش نازانن ناوەڕۆكەكەی چییە، تەنیا لەنێوان نەجمەدین كەریم پارێزگاری پێشووی كەركوك و نێچیرڤان بارزانی و ئاشتی هەورامیدا كراوە”.

كاوە مەولود، بەپێویستی زانی “ئەو ڕێكەوتننانە ناوەڕۆكەیان ئاشكرا بكرێت، تا ڕێگە لە گەندەڵی و بەتاڵانبردن و بەهەدەردانی سامانی نیشتمانی بگرن و شەفافیەت دابین بكەن”.

کوردستان

هەسەدە: 103 سەربازی تورك و چەكدار كوژراون
شەڕی هاوبەشی هەسەدە و سوریا لەگەڵ توركیا دەستی پێكرد

خەڵك- بەشی هەواڵ
شەڕی هاوبەشی هەسەدە و سوپای سوریا لەگەڵ سوپای توركیا و چەكدارە ئۆپۆزسیۆنەكان لە تەل تەمر دەستی پێكرد.

هێزەكانی سوریای دیموكرات (هەسەدە) ئاماری شەڕەكانی ۲٤ كاتژمێری ڕابردوو لە بەرەكانی شەڕ لە (سەرێكانی، گرێ سپی، درباسییە و دێرك) بڵاودەكاتەوە و ئاشكرای دەكات، ژمارەیەك تانك و زرێپۆشی هێزی دوژمن تێكشكێنراون.

ڕاشیگەیاندووە، لەو شەڕانەدا ۱٠۳ سەربازی توركی و چەكداری ئۆپۆزسیۆنی سوریا كوژراون و لە بەرامبەریشدا ۲۳ شەرەڤانی هێزەكانی سوریای دیموكرات شەهید بوون.

هەسەدە ئاماژەی بەوەشكردووە، كە شەڕی هێزەكانیان و سوپای سوریا لە تەل تەمر لەگەڵ سوپای توركیا و چەكدارە ئۆپۆزسیۆنەكان دەستی پێ‌ كردووە و توانراوە هێزەكانی توركیا تێكبشكێنرێن.

بەردەوام بە لە خوێندنەوە

کوردستان

لە چیای ئەزمەڕ تەقینەوەیەك ڕوویدا و قوربانی لێ‌ كەوتەوە

خەڵك- بەشی هەواڵ
ئێوارەی ئەمڕۆ لەسەر چیای ئەزمەڕ لە سلێمانی تەقینەوەیەك ڕوویدا و بەهۆیەوە دوو كەس گیانیان لەدەستداوە.

سەرچاوەیەك لە (جی سی سی) سلێمانی بۆ (خەڵك) ڕایگەیاند، كە ئێوارەی ئەمڕۆ دەنگی تەقینەوەیەك لەسەر چیای ئەزمەڕ بیستراوە و ڕاستەوخۆ هێزەكانمان چوونەتە شوێنی ڕووداوەكە.

ڕاشیگەیاند، بەهۆی ئەو ڕووداوەوە دوو كەس گیانیان لەدەستداوە و لێكۆڵینەوەش لەسەر ڕووداوەكە دەستی پێ‌ كردووە.

جەختیشی كردەوە، كە تا ئێستا بەتەواوی یەكلایی نەبۆتەوە تەقینەوە بووە یان شتی دیكە، بەڵام دەنگی تەقینەوە بیستراوە و لێكۆڵینەوەش دەستی پێ‌ كردووە.

بۆ بەدواداچوونی زیاتر (خەڵك) پەیوەندی كرد بە سەركەوت ئەحمەد، وتەبێژی پۆلیسی سلێمانییەوە، بەڵام وەڵامی پەیوەندییەكەی نەدایەوە.

بەردەوام بە لە خوێندنەوە

کوردستان

حكومەتی هەرێم پەیامێك ئاڕاستەی وڵاتان و ڕێكخراوەكان دەكات

خەڵك-ئارام سەردار
ئەمڕۆ سێ شەممە ۱٥ی ئۆكتۆبەری ۲۰۱۹ حكومەتی هەرێم لەگەڵ كونسوڵخانە و نوێنەری وڵاتان تایبەت بەڕەوشی ڕۆژئاوای كوردستان كۆبووەوە، وتەبێژی حكومەتی هەرێمیش ڕایدەگەیەنێت، پێشبینی دەكرێت لە ٥٠ هەزار بۆ ٢٥٠ هەزار كەس لە سوریاوە ئاوارەی هەرێمی كوردستان ببن.

جوتیار عادل، وتەبێژی حكومەتی هەرێمی كوردستان لە كۆنفڕانسێكی ڕۆژنامەوانیدا ڕایگەیاند، لەكۆبوونەوەكەدا لەگەڵ نوێنەر و كونسوڵی وڵاتان لەباری ئەگەری هاتنی ئاوارە و پەنابەران بۆ هەرێمی كوردستان بەهۆی ئەو شەڕەی لە سوریا هەیە، پەیامی حكومەتمان گەیاندە كۆنسوڵخانەكان و ئەو هاوكاری و پێویستیە مرۆییانەی پێویستن و ئامادەكاریان، كە پێویستە لە ڕووی مرۆیی پێشكەشی حكومەتی هەرێمی كوردستانی بكەن.

دەشڵێت: “وەك حكومەت پێمان باش بوو، كە كونسوڵخانەكان و نوێنەری دیبلۆماسی وڵاتان هاوكاربن و پەیامی حكومەت بە ڕوونی پێیان بگات، تاوەكو ئەوانیش ئەم داواكاریانەی ئێمە ئاڕاستەی وڵاتەكانیان بكەن و وەڵامی ئێمە بدەنەوە”.

بەوتەی جوتیار عادل، “بۆ هاوكاری ئاوارەكان و پەنابەران وەكو حكومەت تا توانامان هەبێت هاوكار دەبین و پێویستییەكانیان بۆ دابین دەكەین، بەڵام بەهۆی سنورداربوونی توانای حكومەت داوا لە هەموو لایەك دەكەین لە كونسوڵخانەی وڵاتانی بیانی و ڕێكخراوەكان هاوكارمان بن، لەگەڵ حكومەتی عیراقیش گفتووگۆمان كردوە و پلانێكی باشمان داناوە و چاوەڕوانی وەڵامی ئەوانین، چاوەڕوانیشین وەڵامی وڵاتان ئەرێنی بێت”.

وتیشی، “پێشبینی دەكەین لە ٥٠ هەزار بۆ ٢٥٠ هەزار كەس لە سوریاوە ئاوارەی هەرێمی كوردستان ببن، تاوەكو ئێستاش نزیكەی ٢٠٠ خێزان هاتونەتە هەرێمی كوردستان و بە پێی پێویست هاوكارمان كردون، وەك هەرێمی كوردستانیش لە هەر چوار پارێزگا ئامادەكاریان كردوە بۆ پێشوازی لە ئاوارە و پەنابەران، بەڵام بەهۆی ئەوەی فشارێكی گەورەمان لەسەرە وەك حكومەت و داوای هاوكاریمان لە وڵاتان كردوە، ئێمەش ئامادەین ئەوەی لەتوانادابێت هاوكاری ئاوارەكان بكەین”.

بەردەوام بە لە خوێندنەوە

کوردستان