ئێمە لە تۆرە کۆمەڵایەتیەکان

ئابوری

بەهۆی ڕاوی ماسییەوە 5 ڕاوچی دەستگیركرا

خەڵك- بەشی هەواڵ
بەڕێوەبەرایەتی پۆلیسی دارستان و ژینگەی پارێزگای سلێمانی جەختدەكاتەوە، كە لە ئێستادا وەرزی قەدەغەكردنی ڕاوی ماسیە و پۆلیسی دارستان مەفرەزەكانی لەسەرجەم بنكە و بەشەكان لەناو دەریاچە و ڕووبارەكان چڕكردۆتەوە بۆ ڕێگریكردن لە ڕاوكردنی ماسی و دەشڵێت: “لە لەسنوری شارەزور 5 ڕاوچی دەستگیركران”.

عەمید هێمن كمرخان، بەڕێوەبەری ڕاگەیاندن لەبەڕێوەبەرایەتی پۆلیسی دارستان و ژینگەی سلێمانی بۆ (خەڵك) ڕایگەیاند، لە ئەنجامی دەرچوونی مەفرەزەیەكی بەشی پۆلیسی دارستان و ژینگەی شارەزور لە پێناو پاراستنی سامانی ماسی توانرا (5) ڕاوچی دەستگیر بكرێن، كە سەرقاڵی ڕاوكردنی ماسی بوون.

وتیشی، “هاوكات دەستگیرا بەسەر (1) تۆڕی ڕاوكردنی ماسیدا لەگەڵ (2) ئۆتۆمبێل و (28) قولاپ و (2) ماسی قەبارە جیاوازدا، كە خاوەنەكانیان نادیاربوو” .

ڕاشیگەیاند، لە دەرچوونێكی بنكەی پۆلیسی دارستان و ژینگەی پیرەمەگرون بۆ گوندی (كرژە) توانیان دەست بگرن بەسەر (1) مۆلیدەی كارەبایی و (15) مەتر وایەر و چەند ماسی ڕاوكراودا .

بەڕێوەبەری ڕاگەیاندی پۆلیسی دارستان و ژینگەی سلێمانی جەختیشی كردەوە، پێویستە هاووڵاتیان پابەندی ڕێنماییەكانی پۆلیسی دارستان بن لە پێناو پارێزگاریكردن لە سامانی ماسی.

ئابوری

چۆمان وێڕای بوونی دەیان سەرچاوەی ئاوی سازگار، كێشەی گەیاندنی ئاوی بۆ نێو شارۆچكەكە هەیە

شارۆچكەی چۆمان. سنوورى باڵەكایەتی.. فۆتۆ: ئامەد حەسەن

خەڵك-ئارام سەردار

شارۆچكەی چۆمان لە دەڤەری باڵەكایەتی وێڕای بوونی دەیان سەرچاوی ئاوی سازگار بەهۆی كوێستانی ناوچەكە و مانەوەی بەفر لە وەرزی هاوینیشدا لە چیا بەرزەكانی دەوروپشتی، بەڵام بەهۆی نەبوونی پڕۆژەیەكی باش ئاوی خواردنەوە ناگاتە دانیشتووانی شارۆچكەكە.

قائیمقامی شارۆچكەی چۆمان لەپارێزگەی هەولێر ڕایدەگەیەنێت، هۆكاری هەبوونی گرفتی دابینكردنی ئاوی خواردنەوە، بەهۆی كەموكوڕی پڕۆژەی ئاوە كە پڕۆژەكە لە ٢٠٠٨ جێبەجێكراوە و بەر لەدەستبەكاربوونی ئەوان تەواوكراوە، بەڵام دەرخستەیان كردووە بۆ چارەسەركردنی كێشەو كەموكوڕیەكانی پڕۆژەكە.

ئەحمەد قادر قائیمقامی چۆمان سەبارەت بەهەبوونی گرفتی دابینكردنی ئاوی خواردنەوە بۆ شارۆچكەكە بۆ (خەڵك) ئاشكرای كرد، بەڵێ گرفتیان هەیە لەم پڕۆژەیەی كە بەر لەدەستبەكاربوونی ئەوان تەواوكراوە، بەڵام هەوڵەكانیان بەردەوامە بۆ ئەوەی چارەسەری تەواوی گرفتەكانی ئاو بكەن، بۆ ئەوەش دەرخستەیەكیان كردووە، ئێستا لەئەنجومەنی وەزیرانە و چاوەڕوانن دوای ڕەزامەندی لەسەر دەرخستەكە تەواوی كەموكوڕییەكان چاك بكەن ئەو دەرخستەی كردویانە بڕی دوو ملیار دینارە.

دەشڵێت “لە پڕۆژەكەدا دوو گرفت هەیە كە هەندێ كات دەبێتە هۆی وەستان یاخود پچڕانی ئاو ئەویش یەكێكیان كەموكوڕییەكانی پڕۆژەكەیە، لەهەمان كاتیشدا بەهۆی ئەوەی ئاوەكە لەشوێنە سەختەكانی چیای سەكرانەوە دێت، بۆیە بەهۆی بەفر و داڕمانەوە گرفتی بۆ دروستدەبێت، بەردەوامیش لەلایەن لایەنی پەیوەندیدار چارەسەری كێشەكان دەكرێت، بەڵام دەمانەوێ لەڕێگەی ئەو دەرخستەیەوە لەبنەڕەتەوە كێشەكانی ئەو پڕۆژەیە چارەسەر بكەین”.

قائیمقامی چۆمان ئەوەش دەخاتەڕوو، جگە لەچاككردنی پڕۆژەكە لەسەرچاوەی هێنانی ئاوەوە، هێڵەكانی گواستنەوەی ئاو لەناو شارۆچكەی چۆمانیش چاك بكەنەوە، هاووڵاتیانیش دڵنیا دەكاتەوە بەردەوام دەبن لەهەوڵەكانیان بۆ ئەوەی كێشەكانیان بۆ چارەسەر بكەن.

بەردەوام بە لە خوێندنەوە

ئابوری

داوا دەكرێت عیراق لە زێدەڕۆییەكانی كوێت بێدەنگ نەبێت

خەڵك –بەشی هەواڵ

پەڕلەمانتارێكی فڕاكسیۆنی دەوڵەتی یاسا ئەمڕۆ یەك شەممە داوای لە حكومەتی عیراق كرد دۆسێی لێكۆڵینەوە بكاتەوە لەو زانیارییانەی باس لە زێدەڕۆییەكانی كوێت بۆ سەر بیرە نەوتەكانی سەر سنووری عیراق دەكەن.

عالیە نوسێف لە بەیاننامەیەكدا ڕاشیگەیاند، داوا لە حكومەتی عیراق و وەزیری نەوت و وەزیری دەرەوە دەكات لێكۆڵینەوە بكەن لەو زانیارییانەی لیژنەی نەوت و وزەی پەڕلەمان بڵاویانكردنەوە لەسەر هەستانی كوێت بە زێدەڕۆییكردنەسەر بیرە نەوتەكان لە نیو سنووری عیراقدا.

دەشڵێت “ئەم زانیارییانە پشتڕاستبكرێنەوە پێویستە كوێت لێپرسینەوەی لەگەڵدا بكرێت بەپێی یاسا نێودەوڵەتییەكان و دەشبێت قەرەبووی عیراق بكاتەوە لە حاڵی پێشكەشكردنی سكاڵا لە نەتەوە یەكگرتووەكان و ئەنجومەنی ئاسایش”.

ئاماژە بەوەش دەكات، كوێت پێشینەی هەیە لەم بابەتەدا بەتایبەت زێدەڕۆییەكانی لە ساڵی 1990ەوە كە بەهۆیەوە ڕژێمی پێشوو دەستوەردانی لەشكری كرد و بەهۆیەوە كارەساتێك بۆ هەردوو وڵات درووستبوو لەبری بەكارهێنانی ڕێگەی یاسایی.

بەردەوام بە لە خوێندنەوە

ئابوری

“دوای پێكھێنانی كابینەی نوێ پڕۆژەی شەقامی 100 مەتری سلێمانی جێبەجێ دەكرێت”

خەڵك – بەشی هەواڵ

لیژنەی تایبەت بە پڕۆژەی شەقامی 100 مەتری سلێمانی ڕاپۆرتی خۆی لەسەر پڕۆژەكە ئاڕاستەی ئەنجومەنی وەزیران دەكات.

ئـازاد ڕەسوڵ بەڕێوەبەری فەرمانگەی شەقامی 100 مەتری سلێمانی ڕایگەیاند، ئەو لیژنەیەی بۆ ئامادەكردنی ڕاپۆرتێك لەسەر شەقامی 100 مەتری سلێمانی پێكھێنرابوو، ڕاپۆرتەكەی تەواو كردووە و پێشكەش بە جێگری سەرۆكی حكومەتی كردووە و دوای لێكۆڵێنەوە لە ڕاپۆرتەكە وەڵامی لیژنەكە دەدرێتەوە.

ئـازاد ڕەسوڵ وتیشی، جێبەجێكردنی پڕۆژەكە دەكەوێتە دوای پێكھێنانی كابینەی نوێی حكومەتی ھەرێم، لە ڕاپۆرتەكەدا چەند ئەلتەرناتیڤێك لەسەر دەرخستەی پڕۆژەكە ئامادەكراوە، كام لەو ئەلتەرناتیڤانە لە توانای دارایی حكومەتدا بێت ئەوەیان جێبەجێ دەكرێت.

بەردەوام بە لە خوێندنەوە

کوردستان