ئێمە لە تۆرە کۆمەڵایەتیەکان

کوردستان

یەكەم زەنگی مەترسی داگیركردنی باشووری كوردستان لێدرا


خەڵك –بەشی هەواڵ

كۆنگرەی نەتەوەیی كوردستان (كەنەكە) لە بانگەوازێكدا بۆ گەلی كوردستان ڕایگەیاند “هێرشی سەر خواكوڕك هەر دژ بە هێزی گەریلا نییە، بەڵكو دژ بە هەموو خەڵكی كوردستانە و بۆ داگیركردنی سەرانسەری كوردستانە”.

دەستەی بەڕێوەبەری كەنەكە لە ڕاگەیەندراوێكدا دەڵێت “ئامانجی سەرەكیی لەم هەوڵە داگیركەرییە نوێییە هەر ئەوە نییە باشوور كۆنتڕۆڵ بكات، بەڵكو دەیەوێت دەستی بە ڕۆژهەڵات و باكووریش بگات و لەیەكەیان داببڕێت”.

ڕاشیگەیاند “سوپای توركی داگیركەر بە دروستكردنی مۆڵگەی هەواڵگری و سەربازی دەستی بە داگیركردنی باشووری كوردستان كردووە و ئێستاش دەیەوێت ئەو مۆڵگانەی پێكەوە ببەستێتەوە و جگە لە كۆنتڕۆڵكردنی هەموو باشووری كوردستان بەشەكانی تری كوردستانیش لە یەكتر داببڕێت”.

كەنەكە ئاماژەی بەوەشكردووە “ئەو شیمانەیەش هەیە كە دەوڵەتی توركیا لە دەڤەری جزیر لە باكوور بەرەو دێرك لە ڕۆژئاوای كوردستان دەست بە داگیركەریی بكات و بەو شێوەیە ڕۆژئاوای كوردستان بكات بە سێ كوتەوە و ڕۆژئاوا لە یەك داببڕێت. نیەتیی دەوڵەتی توركیا تەواو داگیركەرانە و دوژمنانەیە و بۆ ئەوەیە كە بە تەواوی كوردستان بخاتە ژێر كۆنتڕۆڵی خۆیەوە. دیارە ئەمە هەڕەشەیە لە سەر تەواوی كوردستان، نەك هەر بە تەنیا پارچەیەك و بۆ تێكدان و وێرانكردنی تەواوی كوردستانە”.

ئەوەشی خستەڕوو “بێدەنگیی و بێهەڵوێستیی چواردەور و دونیاش جێی مەترسیە. بە داخەوە، تا ئێستا و لە پێش هەر لایەكەوە حكومەتی هەرێمی كوردستان و زۆرینەی هێزەكانی باشووری كوردستان بێ دەنگ و بێ كردارن. ئەم بێدەنگییە جەسارەت و غیرەت بە داگیركەران دەدات، دڵی دۆستان دەشكێنێت و دڵی نەتەوەكەمان خەمگین دەكات”.

دەشڵێت “كەنەكە تاكە رێگاش بۆ بەرەنگاربوونەوەی داگیركەرانی كوردستان بە یەكێتیی نەتەوەی گەلی كوردستان و هێزە كوردستانییەكان لە دژی داگیركەران دەزانێت و داوایكردووە، هەموو لایەنەكان بەرامبەر بە داگیركەریی دەوڵەتی تورك خاوەن هەڵوێست بن”.

ریکلام

کوردستان

ژووری ئۆپراسیۆنی پارێزگای هەولێر: 284 شوێن كە پابەندی ڕێنماییەكان نەبوون داخران


خەڵك – بەشی هەواڵ

ژووری ئۆپراسیۆنی پارێزگای هەولێر لە ڕاگەیەنراوێكدا ئاشكرایكرد: لەلایەن لیژنەكانی چاودێری و تەندروستی لەسنووری هەر 10 قائیمقامیەتەكەی پارێزگای هەولێر، دوای بەدواداچوون و پشكنین بۆ شوێنەكانیان، بەهۆی پابەندنەبوون بەڕێنماییەكانی تەندروستی و خۆپارێزی لە ڤایرۆسی كۆرۆنا، (284) شوێن لە (خواردنگە، بەنزینخانە، ئاریشگەی ئافرەتان، ماركێت، مینی ماركێت، سەرتاشخانە، نانەوەخانە، دوكانی فرۆشتنی سەوزە و میوە، رونگۆڕ، فرۆشیاری مۆبایل، شیرنەمەنی، جوانكاری ئۆتۆمبێل، گۆشت فرۆش، زێڕینگر، ئوتوی هەڵمی، نووسینگەی خانووبەر، شوێنی گەشتیاری، كۆگا) داخران.

ژووری ئۆپراسیۆنی پارێزگای هەولێر ئاماژەی بەوەشداوە: داواكارین لە هاوڵاتییانی سنووری پارێزگای هەولێر و كاسبكارانی پابەندی بڕیار و ڕێنماییە تەندروستییەكان بن و هەستیارانە مامەڵە بكەن و بەپێی ریَِكارەكانی خۆپارێزی لە ڤایرۆسی كۆرۆنا، دەستكێش و دەمامك ببەستن، تاوەكو لەپێناو پارێزگاری لە تەندروستی گشتی دووچاری سزادان و ڕێكاری یاسایی نەبنەوە.

 

دەقی ڕاگەیەنراوەكە:

 

ڕاگەیندراوێك لە ژووری ئۆپەراسیۆنی پارێزگای هەولێرەوە

ئەمرۆ شەممە 2020.6.6 لەلایەن لێژنەكانی چاودێری و تەندروستی لەسنووری هەر 10 قایمقامیەتەكەی پارێزگای هەولێر، دوای بەدواداچوون و پشكنین بۆ شوێنەكانیان، بەهۆی پابەند نەبوون بەرێنماییەكانی تەندروستی و خۆپارێزی لە ڤایرۆسی كۆرۆنا، (284) شوێن لە (خواردنگە، بەنزینخانە، ئاریشگەی ئافرەتان، ماركێت، مینی ماركێت، سەرتاشخانە، نانەوەخانە، دوكانی فرۆشتنی سەوزە و میوە، رونگۆڕ، فرۆشیاری مۆبایل، شیرنەمەنی، جوانكاری ئۆتۆمبێل، گۆشت فرۆش، زێڕینگر، ئوتوی هەڵمی، نووسینگەی خانووبەر، شوێنی گەشتیاری، كۆگا) داخران.

داواكارین لە هاوڵاتییانی سنووری پارێزگای هەولێر و كاسبكارانی پابەندی بڕیار و ڕێنماییە تەندروستییەكان بن و هەستیارانە مامەڵە بكەن و بەپێی رێكارەكانی خۆپارێزی لە ڤایرۆسی كۆرۆنا، دەستكێش و دەمامك ببەستن، تاوەكو لەپێناو پارێزگاری لە تەندروستی گشتی دووچاری سزادان و ڕێكاری یاسایی نەبنەوە.

ژووری ئۆپەراسیۆنی پارێزگای هەولێر
2020.6.6

بەردەوام بە لە خوێندنەوە

کوردستان

تەندروستی هەرێم: 66 تووشبووی تری ڤایرۆسی كۆرۆنا لە سلێمانی دەستنیشان كران


خەڵك – بەشی هەواڵ

وەزارەتی تەندروستی هەرێم لە ڕاگەیەنراوێكدا ڕایگەیاند: لە بەردەوامی پشكنینەكان و گەڕان بەدوای گومانلێكراوان و تووشبووان، 66 تووشبووی تری ڤایرۆسی كۆرۆنای نوێ COVID-19 لە پارێزگای سلێمانی دەستنیشانكران.

تەندروستی هەرێم ئەوەشیخستووەتەڕوو: تووشبووەكان 38 پیاو و 24 ئافرەت و 2 كوڕی گەنج و 2 منداڵن، 13 تووشبوو بەركەتووی تووشبووانی پێشوون و تووشبووانی تر نیشانەی نەخۆشییەكەیان هەیە.

تەندروستی هەرێم ڕوونیشیكردووەتەوە: سێ تووشبوو دانیشتووی شارۆچكەی چەمچەماڵ، دوو تووشبوو دانیشتووی شارۆچكەی پێنجوێن، یەك تووشبوو دانیشتووی شارۆچكەی دەربەندیخان و شەست تووشبووش دانیشتووی ناو شاری سلێمانین.

 

دەقی ڕاگەیەنراوەكە:

دەرەنجامی نوێ …

لە بەردەوامی پشكنینەكان و گەڕان بەدوای گومانلێكراوان و تووشبووان، شەست و شەش تووشبووی دیكەی ڤایرۆسی كۆڕۆنای نوێ COVID-19 لە پارێزگای سلێمانی دەستنیشانكران، سی و ھەشت پیاو و بیست و چوار ئافرەت و دوو كوڕی گەنج و دوو منداڵ، سێزدە تووشبوو بەركەتووی تووشبووانی پێشوون وە تووشبووانی تر نیشانەی نەخۆشیەكەیان هەیە.

سێ تووشبوو دانیشتووی قەزای چەمچەماڵ.
دوو تووشبوو دانیشتووی قەزای پێنچوێن.
یەك تووشبوو دانیشتووی قەزای دەربەندیخان.
شەست تووشبوو دانیشتووی ناو شاری سلێمانی.

وەزارەتی تەندروستی
٦ حوزەیران ٢٠٢٠

بەردەوام بە لە خوێندنەوە

کوردستان

پسپۆڕێكی دەروونی: باشتر وایە وەزارەتی تەندروستی ڕۆژانە یەكجار دەرئەنجامێكی گشتی كۆرۆنا بڵاوبكاتەوە


خەڵك – بەشی هەواڵ

د. ڕەوشت ڕەشید پزیشكی پسپۆڕی دەروونی دەربارەی بڵاوكردنەوەی دەرئەنجامەكانی ڤایرۆسی كۆرۆنا، پەیامێك ئاڕاستەی ڕاگەیاندنی وەزارەتی تەندروستی دەكات و ڕایدەگەیەنێت:”باشتر وایە ڕۆژانە یەك جار دەرئەنجامێكی گشتی بڵاوبكرێتەوە نەوەك لە ڕۆژێكدا چەند جارێك دەرئەنجامی نوێ بڵاوبكرێتەوە، بۆ ئەوەی سەر لە خەڵك نەشێوێت و خەڵك تووشی سترێس و دڵەڕاوكێی زیاد لە پێویست نەبن”.

 

دەقی پەیامەكەی د. ڕەوشت ڕەشید:

 

پەیامێك بۆ راگەیاندنی وەزارەتی تەندروستی دەربارەی بڵاوكردنەوەی دەرەنجامەكانی كۆرۆنا:

ماندوو نەبن.

ئاگادارین كە لەماوەی رابردوودا ئەركێكی زۆرتان كێشاو كەمتەرخەمیتان نەكردوە لە بلاوكردنەوەی هوشیاری و زانیاری دەربارەی نەخۆشی كۆرۆنا و راگەیاندنی داتا دەربارەی ژمارەی پشكنین و كەرەنتینكراوان و توشبووان. ئەم كارەتان جێگەی دەستخۆشیە. هاوكات چەندتێبینی و پێشنیارێكی بچوكم هەیە هیوادارم بە سنگێكی فراوان و بە مەبەستی سود بۆ هاوڵاتیان و توشبووان لێمانی قەبوڵ بكەن:

۱ـ باشتر وایە رۆژانە یەك جار دەرەنجامێكی گشتی بڵاوبكرێتەوە نەوەك لە رۆژێكدا چەند جارێك دەرەنجامی نوێ بڵاوبكرێتەوە، بۆ ئەوەی سەر لە خەڵك نەشێوێت و خەڵك توشی سترێس و دڵەراوكێی زیاد لە پێویست نەبن.

۲ـ باشتر وایە دەرەنجامەكان لە سایتی فەرمی وەزارەتی تەندروستی بڵاوبكرێنەوە نەوەك بە تەلەفۆن و نامەی نا فەرمی بدرێت بە كەناڵەكانی راگەیاندن یان سایتەكانی ئینتەرنێت، ئەمەش بۆئەوەی داتاكان بە هەڵە بڵاونەبنەوەو خەڵك توشی بێمتمانەیی نەبن.

۳ـ بلاوكردنەوەی داتا وەكو خۆی و راستگۆیانە كارێكی ئەخلاقیەو ئێمەش بەرز دەینرخێنین، بەڵام بڵاوكردنەوەی وردەكاریی دەربارەی كەسە توشبووەكان و پیشەیان و هەندێك جار ناویان ( بۆ نمونە بڵاوبوونەوەی ناوی پزیشكانی توشبوو) كارێكە دوورە لە بنەماكانی پاراستنی ماف و نهێنیەكانی نەخۆش و رەنگە ئەمە وا بكات خەڵكانێكی زۆر لەبەر ئاشكرابوونی ناوەكانیان نەرۆن بۆ پشكنین یان نەخۆشخانە. ( ئەگەر كەسەكە خۆی باسی كردو رایگەیاند ئەوە ئازادە بەڵام ناكرێت لە دەزگا فەرمیەكان ناویان بڵاوبكرێتەوە) . دیارە ئەم حاڵەتە زیاتر لە سۆشیەل میدیا و پەیجی پزیشكان و كارمەندانی تەندروستی دەبینرێت و رەنگە كاری راگەیاندنی وەزارەت بێت هەوڵبدات ئەو پەیج و لایەنانە ئاگادار بكاتەوە كە هیچ زەرور نیە ناو یان وردەكاری توشبووان بڵاو بكرێتەوە.

٤ـ لە سەرەتای هەموو دەرەنجامێك وشەی گومانلێكراوان بەكار دێت كە من پێم وایە ئەم وشەیە جۆرێك لە ستیگماو كاریگەریی دەروونیی خراپ لای خەڵك دروست دەكات بۆیە لابردنی ئەم وشەیە بە كارێكی باش دەبینم بەتایبەت كە لابردنی هیچ لە مانا ناگۆڕێت و ( دەستەواژەی گەڕان بەدوای توشبووان ) ماناكە دەبەخشێت و هیچ كەموكوڕیەكی نیە.

دووبارە هیوای سەلامەتی و سەركەوتنتان بۆ دەخوازم و ئومێدەوارم هەموو لایەك دوور بن لە دەردو بەڵا.

د. رەوشت رەشید
پزیشكی پسپۆری دەروونی

بەردەوام بە لە خوێندنەوە

کوردستان