ئێمە لە تۆرە کۆمەڵایەتیەکان

وتار

باشوور، خەبات، ئەزموون

ئازاد جۆڵا

 

شۆڕش و قوربانی دان لە مێژووی زۆربەی گەلانی دونیا یان بۆ ڕزگاری بووە یان بۆ گۆڕینی سستەمی حوكمڕانی، واش ڕێكەوتووە لە یەك كاتدا بۆ هەردوكیان هەوڵ درابێ، بەتایبەتی بۆ گەلانی داگیركراو و سوتاوی ژێر ڕكێفی دیكتاتۆریەت و تامەزرۆی ئازادی و دیموكراسی، لەم چوارچێوەیشدا گەلی كورد بەتایبەت لە باشوور، دەتوانین بڵێین لە یەك كاتدا لە هەوڵ و تێكۆشان بووە هەم بۆ ڕزگاری نەتەوەیی هەمیش بۆ گەیشتن بە ڕژێمێكی دیموكراسی و دادپەروەریی، ئەمە لە كاتێكدا كە گەلەكەمان بەدرێژایی مێژوو قوربانی دەستی ڕژێمە دكتاتۆر و خۆسەپێن و داگیركەرە یەك لەدوای یەكەكانی دەوڵەتی داتاشراوی عیراق بووە، ئەگەر سەرجەم هەوڵ و خەبات و تێكۆشانی گەلەكەمان لە باشوور بچێتە خانەی( شۆڕش) كەمن خۆم گومانم لێی هەیە.
دەكرێ بڵێین لە ئەنجامی تووڕەیی و ناڕەزایی گەل و زەبرو زەنگ و مولهوڕی “صدام حسین” و زیاتریش بەهۆی داتەپینی سەرخان و ژێرخانی ئابووری عیراق و بارودۆخی ناوخۆیی و ناوچەكەو پشتیوانی كاریگەری هاوپەیمانان، ڕاپەڕینی بەهاری 1991 دەرئەنجامێكی باش و سەركەوتن و دەستكەوتێكی مەزن بوو لە مێژووی پڕ لە قوربانی گەلەكەمان لەم بەشەیدا، بێ گومان بەسەرەنجی زۆرم لەسەر چۆنیەتی و كات و شێوازو پلانەكان و تاڵانی و وێرانكاری و بێ و سەرو بەری و حوكمی عورفی لە بابەتی ڕاپەڕینەكەدا.
لێرەدا پرسار ئەوەیە ئایا ئەوەی پێی دەڵێین كۆی خەبات و قوربانی دان و شۆڕش، ئەوەی پێی دەڵێین ڕاپەڕین و دەستكەوت و ئەزموونی نەتەوەیی گەلەكەمان ، خۆی لەم ئەزموونەی ئەمڕۆ و 27 ساڵی ڕابردوو دەبینێتەوە؟
ئەگەر وایە بابزانیین كام لەم دوو ئامانجەمان بەدەست هاتوون كە مێژویەكی دوورو درێژ هەوڵی بۆ داوە و پڕە لە قوربانی و كارەساتی مرۆیی و تراژیدیای كۆمەڵایەتی و ئابووری، نسكۆی سیاسی و كورد كوژی و …. هتد بۆ گەلەكەمان.
ئایا كامیان بەدی هاتن؟ ڕزگاری یان دیموكراسی، یان دەتوانین بڵێین هەردوكیان؟

ئەگەر باسی ڕزگاری بكەین :
هەموومان دەزانین ئێمە لە باشوور نەك هەر لە بابەتی مافی (نەتەوەیی و خاك)، ڕزگارمان نەبووە، بەڵكو وەك و تاكیش دەربازمان نەبووە لە وابەستەیی و لاوازی و گەڕانەوەی شكۆمەندی بۆ تاكی كورد و پیرۆزی خاك و سەروەری یاسا و پاراستنی مافی مرۆڤ و یەكترقبوڵ كردن.
تا ئێستا نیوەی باشووری كوردستان سووتماكەو ڕۆژانە خوێنی لێ دەتكێ، شكۆی نەتەوەیی كورد دەشكێ ، لەبەرامبەریشدا ئەوەی پێی دەڵێن دەستكەوت و ئەزمونەكەمان نەك هەر دەستەوەستان و بێ وەڵامە تەنانەت مێشیش میوانی نیەو وەك ئەوەی نەبای بێ و نەباران ، ئەوە جگە لەوەی 28 ساڵ تێپەڕیوە نەتوانراوە و هەوڵیش نەدراوە بۆ ڕزگاربون وگەڕانەوەی ئەو نیوە لە خاكی باشووری كوردستان، نەك هەر ئەوەندەش بەڵكو لەلای بەڕێوەبەرانی ئەم ئەزموونە (پۆستێكی كارگێڕی) زۆر گەورەترو كاریگەرترە لە كۆی پرسی و نەتەوە و نیشتمانێك كەوا ڕۆژانەو بەبەردەوامی بەبەرچاوی هەموو كورد و هەموو دونیا لە ئاسەواری نەتەوەیی خۆی دەسڕدرێتەوە و بە پلان و بەرنامەی داڕێژراو دەسوتێندرێ و وێران دەكرێ و تەعریب دەكرێ، هەر ئەوەش نا تا ئێستا نەتوانراوە یەك وتاری نیشتمانی دروست بكرێ بۆ ڕێگری یاخود وەستانی ئەم هەموو خوێن و سوتماك كردنە، هیچ نا با لەسەر مەسەلە نیشتمانیەكان، چارەنوسسازەكان ، تەنانەت ئەو مافانەی كە دەستوریش بۆ كوردی سەلماندووە نەتوانراوە یەك دەنگی و یەك هەڵوێستی بێتە بوون، تەنانەت هیچ هەوڵێكیش لە ئارادا نیە، ئەوەش خۆی لەخۆیدا وەڵامە بۆ پرسی یەكەم كە ئایا لەئەنجامی كۆی بەرهەمی خەبات و قوربانیەكان ( ڕزگاری) نیشتمانی بەرهەم هاتووە؟
ئایا دەتوانیین بڵێین هەڵگیرسێنەری شۆڕشێكی ڕزگاری نیشتمانی بووین ؟

سەبارەت بە دیموكراسی :

لەڕابردودا زۆر قسەی لەسەر كراوەو ڕەخنەی لێ گیراوە، هەر لە سەرەتای هەوڵدان بۆ بەدامەزراوەكردن و بەڕێوەبردنی ئەم ناوچەیە بەشێوەیەكی دیموكراسی،
یەكەم هەنگاو لە هەڵبژاردنی 19/5/1992 بۆ پەرلەمانی كوردستان دەستی پێكرد و دواتریش پێكهێنانی یەكەم كابینەی حكومەتی لێ بەرهەم هات، ئیتر لەوێوە تا ئێستا كابینە لە دوای كابینە بەڵام پڕاوپڕ لە كەموكوڕی و نادادی و كورد كوژی و دزی و تاڵانی و ئەتككردن و شكاندنی شكۆی تاكی كورد و خیانەتی (عوزما) و دوو ئیدارەیی و …..هتد.
لەو كاتەوەش تا ئەمڕۆ مەسەلەی دیموكراسی و بە دیموكراسی كردنی كۆمەڵگا، بۆ خوێنەر خۆی جێ دێڵم، بەڵام من لێرەدا دەمەوێ هەر سەبارەت بە دامەزراوە دیموكراسیەكان لە كوردستان دواین ڕوداو و نمونەی ئەم ئەزمونە بخەمە ڕوو، پەیوەست بە مەڕاسیمی سوێند خواردنی سەرۆكی هەرێم و ناوەڕۆكەكەی .
ئەوەی من لە شێوازی ئەم مەڕاسیمەو پێشكەشكردنی وتارەكان و ناوەڕۆكیان سەرنجمدا ، جگە لە ڕاگەیاندن و سەپاندن و ناساندنی دامەزراوەیەكی تر لەكوردستان هیچی تر نەبوو، كە ئەویش هاتنەكایەی یاخود بڵێین دروست بوونی دامەزراوەیەكی تر بوو بەناوی ( مەرجەعیەت ) .
ئەگەر تا ئێستا لە هەرێم چەند دامەزراوەیەك بە ناو یان بە شەرعی هەبووبن و ناسێندرابن ئەوانیش وەك سەرۆكایەتی هەرێم و پەرلەمان و ئەنجومەنی وەزیران و ئەنجومەنی دادوەری، ئیتر لێرەوە دەبێ ئەم ڕاستیە بزانن و دەست و پەنجەیان لەگەڵ نەرم كەن كەوا لەمڕۆ بەدواوە ماهیەت و گرینگی و یاسایی هێزو و دەسەڵات و تواناو كاری ئەم دامەزراوانەی ڕابردوو بۆ لەمەو دوا نەك هەر سنووردار دەبێ بەڵكو دەبێ (مقید)یش بن، چونكە ئیتر دەسەڵاتێكی تر و دامەزراوەیەكی تری بەهێز و كاریگەرتر هاتە بوون و ناڕاستەوخۆ ڕاگەیەندرا ، كە ئەویش ناساندن و ڕاگەیاندنی مەرجەعیەتی (كورد و كوردستان) بوو، كە بەڕێز كاك مسعود بازانی وەك مەرجەع ناسێندراو ڕابەرایەتی بابەتەكانی نەتەوەیی و نیشتمانی دەكات.
ئەمە لە كاتێكدایە كەوا كورد ئەوەندەی پێویستی بە كرانەوە و دیموكراسی و دابەشكردنی دەسەڵاتەكان و شۆڕكردنەوەیان بۆ خواری خوارەوە هەیە ئەوەندە پێویستی بە ناوەندگیری بەڕێوەبردن نیە، ئەمە جگە لە كەمكردنەوەی بایەخ و پێگەو دەسەڵاتی دامەزراوەكان هەم لەلای تاكی كوردستانی هەم لە لای كۆمەڵگای نێودەوڵەتی بەگشتی .

 

وتار

ژیانمان چۆنە؟

 

مۆدێرنە نهێنی نەهێشتووە و هەرچی هەیە و نییە لەسەر شاشەكانە، متمانەی لە عەقڵ و دڵی هەموواندا سڕیوەتەوە، گومانی لە هەموو شتەكاندا چاندووە، تەلەفزیۆنەكانی كردۆتە گەورەترین درۆزن، نەك مێشكیان پڕ كردووین، تا سەر ئێسقان چۆتە گیانمانەوە، ڕواڵەتبازی و ڕوخسارسازی و فاشن و دووفاقی و دووڕوویی و ناوبۆشی هەمووانی گرتۆتەوە.

خواردنەكان پێش ئەوەی بخورێن بە وێنەكانیان بوونەتە ژەهری دەروونی هەژاران، هەزاران چاو لەسەر ژیانی یەكتر دانراون، بۆ سێڵفییەك هەرچی نەشێ و بشێ دەكێشرێت و دەخورێت، هەموو شێوازەكانی پەروەردە لە ئایینییەوە تا دەروونناسی و زمانەوانی بوونەتە كەسابەت، ئامانجەكان تێكەڵ و پێكەڵ و ناروونن، هەر رۆژەی ئامانجێك و تا دواییش بێ ئامانج ماوینەتەوە.

ژیانی هاوڕێیەتی و خۆشەویستی و دراوسێیەتی بووەتە بازرگانی، مۆبایل نەك هەر مێشك، هەموو گیان و ژیانی تەنیوە، پارە بووەتە خراپترین هۆكاری بەدڕەوشتی و بەڕەڵایی، كاتژمێرەكانی دەوام و فەرمانبەریی زۆرترین كۆیلەی بەرهەمهێناوە.

ماسك ڕووە ڕاستەقینەكانی داپۆشیوە، ڕاستییەكان كەمترین پێشوازییان لێدەكرێت، ڕق زۆرترین بازاری هەیە، یەكتر كوشتن و خوێن ڕشتن ئاسانترین تۆڵەسەندنەوەیە، نەخۆشییە دەروونییەكان ژیانیان تەنیوە، رەشبینی هەزارقاتی گەشبینییە، خزمەتكردنی خۆمان و پاككردنەوەی دەوربەری خۆمان بووەتە چالێنج، كەس ژێر خۆی خاوێن ناكاتەوە، بە كۆنترۆڵێك ژیانی دەیان كەس تێكدەدرێت و خوێنی چەندین كەس دەرێژرێت.

لە كۆتاییدا مانایەك بۆ ژیان و سەنگێك بۆ خۆشەویستی و پێوانەیەك بۆ دۆسایەتی و هاریكاری و پێكەوەژیان و هاوكاری و دەستبارگرتن نامێنێتەوە!

بەردەوام بە لە خوێندنەوە

وتار

گەڕان بە دوای وەهمی سەرکەوتن

مەجید ساڵح

هەر جارێک تووشی تەنگوچەڵەمەیەکی سیاسی یان سەربازی دەبێتەوە، ئەردۆگان بۆ پاراستنی ئابڕووی سیاسی خۆی دەستێک لە کورد دەوەشێنێت. بەو نیازەی دڵی هەوادارانی خۆی و هاوپەیمانە فاشیستەکانی لە ئەرگەنەکۆن و MHP خۆش کات.

دوای شکستە گەورەکەی لە هەلبژاردنی شارەوانی باکوری کوردستان و دۆڕانی لە ئەستەمبوڵ و کەوتنی یەڵدرمی پیاوی یەکەمی دەستە راستی، کێچ کەوتە کەوڵی، بە مەرامی داگیر کردنی قەندیل بە هەموو هێزێکیەوە کەوتە پەلاماردانی قەندیل و باشوری کوردستان، بەڵام بۆی نەچوە سەر کە هاوڕێکانی دوێنێی مەسەلەی دامەزراندنی حزبێکی نوێیان لە تورکیا کرد بە عەمەلی و هەنگاوەکانیان دەست پێکرد، بۆ مەشغول کردنی رای گشتی تورکیا هێزێکی زۆری لە رۆژئاوای کوردستان کۆکردەوە و ویستی پەلاماری بدات و ئەزمونی عەفرین لە کۆبانی و قامشلی و سەری کانی دووبارە بکاتەوە، بەڵام پیلانەکەی لە گەڵ پلانەکەی ئەمریکا یەکی نەدەگرتەوە و بە چاوسور کردنەوەیەک رازی بوو بە رێکەوتنێک کە لە بەرژەوەندیدا نەبوو، بۆیە هەڕەشەو گورەشەکانی خاو کردەوە.


ئەردۆگان بە هۆی لاواز بوونی پێگەی جەماوەری خۆی و نەمانی پێگەی جارانی حزبەکەی ، بە تەواوەتی بە گروپە فاشیستەکانی تورک دەورە دراوە و تەسلیمی ئیرادەی ئەوان بووە. بۆیە رێگەی بۆ باڵی فاشیستی ناو حکومەتەکەی خۆش کردوە، پەلاماری HDP و سەرۆکی شارەوانیەکانی دەستی ئەو حزبە بدەن ، بۆ چوار مەرام:


١. لاواز کردنەوەی رۆڵی کورد لە هاوکێشە ناو خۆیی و ئیقلیمیەکان، بە تایبەت لە هەڵبژاردنەکانی ئەم دوایەدا دەرکەوت کورد پارسەنگ و یەکلاکەرەوەی هیزە لە نێوان فاشیزم لایەنگرانی دیموکراسی.


٢. لێدان لە پەیکەریHDP و دابەشکردنیان بۆ دوو بەرەی شاخ و زیندان. لە ئۆپراسیۆنی ٢٠١٦ بەشی زۆری کادیرانی رادیکالی HDP یان گرت و خستنیە زیندانەوە و هێشتا زۆریان هەر لە زیندانن، بەڵام لە هەڵبژاردنی رابردودا HDP، بە تایبەت کادیرەکانی لایەنگری شاخ خۆیان رێکخستەوەو توانیان سەرکەوتنێکی چاوەڕوان نەکراو بەدەست بهێنن، ئەم ئۆپراسیۆنە بە زۆری ئەو کادیرانە دەگرێتەوە.


٣. لە ریگەی ئەم ئۆپراسیۆنەوە دەیەوێت بە یار و نەیارەکانی بڵێ هێشتا من پیاوە بەهێزەکەی وڵاتم و هەوساری (جڵەو) دەسەڵات لەدەستی مندایە.


٤. لەبەرامبەر شکستی لەشکرکێشیەکەی بۆ رۆژئاوای کوردستان و قەندیل، هەر هیچ نەبێ لە ریگەی گرتن و لێسەندنەوە شارەوانیەکانی دەستی کورد سەرکەوتنێکی کاتی بەدەست بهینیت.

ئاماژەکان بۆ ئەوە دەچن تازە دێوەکە لە شوشەکە دەرچوە و گەڕانەوەی بۆ ناوەوە موستەحیلە، بە مانایەکی دیکە کێشەی کورد لە باکور تازە بووەتە ئەمری واقع و بەم کوتە فاشیتانە و بە زەبری چەک چارەسەر نابێ. ئەردۆگانیش لەو لەحزەیەی کە خەونی سوڵتانیزم دای لە کەلەی و دەستی لە گەڵ فاشیستەکانی ناو تورکیا تێکەڵ کرد، گڵۆڵەی خۆی و حزبەکەی کەوتە لێژی و بەرەو داڕمان چوو.


نە ئۆپراسیۆنی سەربازی و نە ئینقلاب کردن بەسەر دیموکراسیدا، نابنە هۆی راوەستانی ئەو گڵۆڵەیەی کە رۆژ لە دوای رۆژ لە کەمی دەدا، سەرکەوتنێکی وای لێ ناکەویتەوە پێکەنینەکانی جاران بگەڕێنیتەوە بۆ سەر روخسارە زەرد هەلگەڕاوەکەی ئەردۆگان، چونکە ئیرادەیەکی گەورەی سەرکەوتن لە ناو کوردی باکوردا دروست بووە، هەلومەرجی ناو خۆیی تورکیا و گۆڕانکارییە ئیقلیمی و نێو دەوڵەتیەکانیش وەک جاران لەگەڵ بەرژەوەندی هەڵگرانی بیری فاشیزم و ئایدۆلۆژیای ئیخوانیدا یەک ناگرنەوە

بەردەوام بە لە خوێندنەوە

وتار

ھەوڵەكانی لەباربردنی ئەزموونی ھەرێم، لە شكستەوە بۆ شكست

محەمەد عەلی

 

لە دوای كۆڕەوەكەی ساڵی ١٩٩١ و پاشان دروستكردنی ناوچەی دژەفڕین و قەوارەیەكی نیمچە سەربەخۆ بۆ باشووری كوردستان، بە درێژایی ساڵانی ڕابردوو ڕووبەڕووی دەیان پیلان بۆتەوە لەلایەن نەیاران و دوژمنە دەرەكی و ناوخۆییەكانەوە بە شێوەیەكی چڕ و یەك لە دوای یەك، كە تا ئێستاش بەردەوامی ھەیە.

 

سەرەتای ھەوڵەكان لە رێی پارتی كرێكارانی كوردستانەوە بوو، لەگەڵ لەدایكبوونی كیانێك بە ناوی ھەرێمی كوردستان، شەڕێكی نەخوازراو بەسەر ئەم ھەرێمە ساوایەدا سەپێندرا، سەرباری كێشە ناوخۆیی و گەمارۆكانی سەر ھەرێم و كشانەوەی گشت دام و دەزگا میرییەكان و نەبوونی سەرچاوەی داھاتی پێویست بۆ حكومەتی ھەرێم، ناچار كرا بۆ پاراستنی ئەم ئەزموونە، قوربانییەكی زۆری گیانی و ماددی بدات و لەبری ئەوەی سەرقاڵی بنیاتنانی ھەرێم و بەرەنگاربوونەوەی نەیارانی بێت، ناچار كرا شەڕی براكانی بكات، كە لە ھەموو ئاستەكاندا زیانی زۆری بە كوردستان گەیاند.

 

دواتر لەلایەن سەرۆكوەزیرانی پێشووتری عێراق نووری مالیكی، فەرماندەی ئۆپراسیۆنی دیجلە پێك ھات و ھەڕەشەی ھێرشكردنە سەر ھەرێم و گەڕانەوەی كوردی دەكرد بۆ ھێڵی ٣٦ و مووچەی فەرمانبەرانی ھەرێمی بڕی بۆ ھاندانی فەرمانبەران دژی حكومەت و گشت مافە دەستوورییەكانی كوردی رەت كردەوە، ھەوڵی بەردەوامیشی دەدا بۆ  تێكدانی یەكڕیزیی ھێزە سیاسییە كوردییەكان، بە دروستكردنی حەشدی عەشائیرییش، ھەوڵی زیندووكردنەووەی جاشایەتیی دەدا لە ھەرێم، بەڵام لەكۆتاییدا ئیرادەی گەل سەركەوت و نووری مالیكیش بوو بە ڕابردوو.

 

ھاتنی داعش بۆ عێراق و خۆبەدەستەوەدانی سێ فیرقەی سەربازیی سوپای عێراق لە مووسڵ بە گشت پێداویستییە سەربازییەكانەوە، لە كاتێكدا بوو كە پاشماوەی ئەم ھێزانە گشت سەنگەرەكانیان چۆڵ كرد، ئەوەی ڕوونە، دەكرێ ئەم ھەنگاوە بە ئامادەكارییەك ھەژمار بكرێت بۆ ھێرشكردنە سەر ھەرێم بەو ھۆكارەی كوردستانیان كردە دراوسێی دەوڵەتی ئیسلامی لە عێراق و شام (داعش) بە ھێزێكی مەزن  لە رووی ژمارە و بوونی چەكی پێشكەوتوو، بەڵام لە كۆتاییدا بە سەركردایەتیی سەرۆك بارزانی و قارەمانیەتیی برا پێشمەرگەكان و خۆڕاگریی ئەم میلـلەتە، نەك ئەم دەوڵەتە تێك شكێنرا، بەڵكوو لەوەش زیاتر توانیمان گشت ناوچە كوردستانییەكانی دەرەوەی ھەرێم كۆنترۆڵ بكەین و ڕیفراندۆم بۆ سەلماندنی كوردستانیبوونی ئەم ناوچانە ئەنجام بدەین.

 

لە دوای ڕێككەوتننامەی جەزائیر و نسكۆی شۆڕشی ئەیلوول، ١٦ی ئۆكتۆبەر بە گەورەترین گەلەكۆمەی ھەرێمی و ناوخۆیی دادەنرێت بۆ كۆتاییھێنان بە ھەژموونی حكومەتی ھەرێم، ھێزە عێراقییەكان بە ڕێككەوتن لەگەڵ چەند سەركردەیەكی سەربازی و سیاسیی ھەرێم، ھێرشێكی بەربڵاویان كردە سەر ھێزەكانی پێشمەرگە لە كەركووك و مەخموور و شنگال، كە پاشان گەمارۆیەكی توندی ئابووری و سیاسی خرایە سەر ھەرێم، ئەمەش ھاوكات بوو لەگەڵ ھەوڵەكانی ھەندێ ھێزی سیاسیی كوردستانی بۆ دروستكردنی حكومەتی رزگاریی نیشتیمانی و دابەشكردنەوەی ھەرێم لەسەر بنەمای فیدڕاڵیی پارێزگاكان، ئەمەش ڕێك بە مانای لەباربردنی ھەرێمی كوردستان بوو، بەڵام ئەم هەوڵەش نەزۆك بوو و شكستی خوارد.

 

لە ماوەی ڕابردوودا بە درێژایی پرۆسەی پێكھێنانی حكومەت، ھەموو ھەوڵێك درا بۆ پەكخستنی ئەم پرۆسەیە، لە ئێستاشدا ھەوڵەكان بەردەوامییان ھەیە و ئەم جارە دووبارە پەكەكە ھەمان ڕۆڵ دەبینێت و ھەوڵی تێوەگلانی ھەرێم دەدات لە شەڕێكی نەخوازراو لەگەڵ توركیای دراوسێدا، رووداوی تیرۆركردنی دیپلۆماتە توركییەكە و گواستنەوەی شەڕ بۆ ناو خاكی ھەرێم، ئەم بۆ چوونە پشتڕاست دەكاتەوە، ئەمە لە كاتێكدایە لە شنگال خزمەت بە سیاسەتەكانی بەغدا دەكەن دژی كوردانی ئێزدی و حكومەتی ھەرێم.

 

دواجار پێویستە بگوترێت، سەرباری هەموو ئەو هەوڵانە بۆ لەباربردنی ئەزموونی ھەرێم، هەرێمی كوردستان لە سەرجەم قۆناغەكاندا بەسەر لەمپەر و ئاریشەكاندا زاڵ بووە و وێڕای تێپەڕاندنی قەیرانەكان، بەوپەڕی ئیرادەوە كەوتووەتەوە سەر پێی خۆی و هەوڵی نەیاران و دوژمنانی كوردستانی، لە شكستەوە بۆ شكستی حەتمیتر پەلكێش كردووە و سەنگ و پێگەی خۆیشی لەسەر ئاستی ئیقلیمی و نێودەوڵەتیدا، لە جاران كاریگەرتر و بەهێزتر كردووە.

بەردەوام بە لە خوێندنەوە

کوردستان