ئێمە لە تۆرە کۆمەڵایەتیەکان

کوردستان

بارزانی: دوای داخستنی ئەم تەلەفۆنە شڕوشیتاڵت كۆدەكەیتەوە

خەڵك- بەشی هەواڵ
ئەندامێكی مەكتەبی سیاسی یەكێتیی نیشتمانیی كوردستان ڕووداوێكی سەردەمی نووسینەوەی دەستور لە بەغدا دەگێڕێتەوە و دەڵێت: “لەسەر نووسینی وتارێكی توند دژی مام جەلال، مەسعود بارزانی توڕە دەبێت و بە سەرنووسەری ڕۆژنامە دەڵێت: دوای داخستنی ئەم تەلەفۆنە یەكسەر شڕوشیتاڵت كۆدەكەیتەوە و دەست بەجێ‌ نووسینگەی ڕۆژنامەكە جێ‌ دەهێڵی”.

ئەرسەلان باییز، ئەندامی مەكتەبی سیاسی یەكێتی و سەرۆكی پێشووتری پەڕلەمانی كوردستان لە نووسینێكدا، كە لە ڕۆژنامەی كوردستانی نوێ‌ بڵاوكراوەتەوە، ئاماژەی بەوەكردووە، “لەو سەرو بەندەدا لە گەرمەی بگرەو بەردە و گفتوگۆ سەخت و توندەكانی نێوان تیمە یەكگرتووەكەی گەلی كورد لەگەڵ عەرەبەكان، ڕۆژنامەی (التأخی) وتارێكی توندی ڕەخنە ئامێزی بێ‌ سەروبەری لەسەر جەنابی (مام جەلال) بڵاوكردبۆوە، كاتێ‌ جەنابی كاك (مەسعود بارزانی) چاوی بە وتارەكە دەكەوێت زۆر ناڕەحەت و توڕە دەبێت و ئاگر دەكاتەوە، یەكسەر فەرمان بە دەوروبەرەكەی دەدات سەرنووسەری ڕۆژنامەكەی بۆ وەربگرن”.

ئاشكراشی كردووە، “كاك (مەسعود) بێ‌ یەك و دوو بە توڕەبوونێكی بێ‌ ئەندازە بە سەرنووسەرەكە دەڵێ‌: دوای داخستنی ئەم تەلەفۆنە یەكسەر شڕوشیتاڵت كۆدەكەیتەوە و دەست بەجێ‌ نووسینگەی ڕۆژنامەكە جێ‌ دەهێڵی. كاك (مەسعود) لەسەر قسەكانی بەردەوام دەبێت: تۆ بە چ هەقێك بە چ عەقڵ و لۆژیكێك لەم بارودۆخە دژوارەدا ئەو جۆرە وتارانە لەسەر (مام جەلال) دەنووسیت…؟ (پیاوی گەورە هەر ئەوەی لێ‌ چاوەڕوان دەكرێت). ئێمە لێرە ڕۆژانە وەكو یەك تیم هیلاك و ماندو و شەونخونی دەكەین، مەڵۆ مەڵۆ كۆی دەكەینەوە. لە هەوڵی چەسپاندنی خاڵێكی باشین لە دەستوری عیراقدا تۆش نەزانانە دەتەوێ‌ ئاگر بەربدەیتە خەرمانی ماندووبوونەكەمان”.

ئەرسەلان باییز نووسیویەتی، “دیارە سەرنووسەرەكە بە هۆی هەقی و دروستی قسەكانی كاك (مەسعود) و توڕە بوونەكەی متەق لە دەمی نایەتە دەرەوە، دوای تەواوبوونی تەلەفۆنەكە بە شكستی و ناڕەحەتیەكی زۆرەوە كەل و پەل و جانتاكەی كۆ دەكاتەوە و دەست بەجێ‌ ڕۆژنامەكە جێ‌ دەهێڵێ”‌.

دەشڵێت: “دوای دوو ڕۆژ لە سەرگەردانی و بیركردنەوەی چۆنیەتی ڕاست كردنەوەی هەڵەكانی، دوای پێداچوونەوە بە هزری خۆی بیرۆكەی سەردانی (مام جەلال)ی دەكەوێتە بەر سێرەی خەیاڵی. هەر چۆنێ‌ بێ‌ خۆی دەگەیەنێتە بارەگای نیشتەجێ‌ بوونی (مام)، دوای داوای لێبوردن. ئیتر وەكو خۆی بەسەرهاتەكان بۆ (مام جەلال) دەگێڕێتەوە. (مام)یش یەكسەر پێی دەڵێ‌: كوڕم ئەوە من عەفوم كردی (لێبوردەیی پیاوی گەورە) بەڵام بۆچی وا دەكەن. ئێمە هەموومان بەیەكەوەش ناتوانین تەواوی مافەكانی گەلی كورد لە دەستوری عیراقدا جێگیر بكەین جا چ جای دووبەرەكی و لەیەكتر ترازانمان. كابرای سەرنووسەر هەر بەوە ڕازی نابێت دەڵێ‌: بەڵكو لای (كاك مەسعود)یش شەفاعەتێكم بۆ بكەیت. (مام)یش دەڵێ‌: خەمت نەبێت ئەوەشت بۆ دەكەم”.

ئەرسەلان باییز مەبەستی لەوەیە، “ڕەمز و پیاوە گەورەكان گیانی لێبوردەیی و هەست كردن بە لێپرسراوێتی گەورەیان لە ئەستۆیە. هەڵوێستی لێبوردەیی و خەمخۆریی یەكڕیزی گەلی كوردی ئەو دوو جوامێرە بۆ ئەو پانزە ساڵەی ڕابردوو خەرمانێكە و ئەبێ‌ هەموومان لێیانەوە فێربین”.

ئەو بەرپرسەی یەكێتی داواش دەكات، “هەقە ڕۆژنامە و گۆڤار و شاشەی تەلەفزیۆنەكانیش هۆكاری تەبایی و برایەتی ڕیزەكانی گەل بن نەك چاندنی تۆوی دوو بەرەكی و بەنزین بە ژیلەمۆداكردن و سوتاندنی خەرمانی دەیان ساڵەی بەری خوێنی شەهیدان”.

کوردستان

حەسەن عەلەوی باسی ئەردۆغان و مەلا مستەفا و مام جەلال دەكات

خەڵك-ئیدریس جەبار
حەسەن عەلەوی، بیرمەندی و سیاسەتمەداری دەركەوتووی عیراقی، باسی سەرۆكی ئێستای توركیا و مەلا مستەفای بارزانی و مام جەلال دەكات و پێیوایە مەلا مستەفا “ئایین و نەتەوەی تێكەڵ بە یەك كردووە لە شۆڕشەكەی”.

حەسەن عەلەوی، بیرمەند و سیاسەتمەداری دەركەوتووی عیراقی، لە لێدوانێكی تایبەت بە (خەڵك) ڕایگەیاند، “ئەوەی لە باكووری خۆرهەڵاتی سوریا ڕوویدا، ڕێككەوتنی سیاسی بوو، ئەمریكا ڕێككەوتنی لەگەڵ توركەكان كردبوو تا جێگەی خۆی بۆ ئەوان چۆڵ بكات”، ئاماژەی بە هەڵوێستی ئێستای سەرۆكی توركیا دەكات و بە خراپ باسی دەكات.

بە وتەی عەلەوی، “وێڕای هەڵوێستی ئێستای ڕەجەب تەیب ئەردۆغان، بەڵام ئەو  نەتەوەیی و ئایینی پێكەوە گرێدا، ئەو نەتەوەییە و دینداریشە”.

ئەو بیرمەندە عیراقیە دەڵێت: “مەلا مستەفای بارزانیش پیاوێكی ئاینی و نەتەوەیی بوو لە هەمان كاتدا بەپێچەوانەی مام جەلال بوو”.

حەسەن عەلەوی لە درێژەی قسەكانیدا لەو بارەیەوە ڕایگەیاند، “مام جەلال، پیاوێكی عەلمانی و بە تەواوەتی خۆی بۆ عەلمانی یەكلایی كردبووەوە، بەڵام مەلا مستەفا نەتەوە و ئاینی بەیەكەوە بەستبووەوە و ناسناوەكەشی كە مەلایە، بەڵگەیە لەسەر ئەوەی پیاوێكی ئاینی بووە”.

بەردەوام بە لە خوێندنەوە

کوردستان

هەسەدە: 103 سەربازی تورك و چەكدار كوژراون
شەڕی هاوبەشی هەسەدە و سوریا لەگەڵ توركیا دەستی پێكرد

خەڵك- بەشی هەواڵ
شەڕی هاوبەشی هەسەدە و سوپای سوریا لەگەڵ سوپای توركیا و چەكدارە ئۆپۆزسیۆنەكان لە تەل تەمر دەستی پێكرد.

هێزەكانی سوریای دیموكرات (هەسەدە) ئاماری شەڕەكانی ۲٤ كاتژمێری ڕابردوو لە بەرەكانی شەڕ لە (سەرێكانی، گرێ سپی، درباسییە و دێرك) بڵاودەكاتەوە و ئاشكرای دەكات، ژمارەیەك تانك و زرێپۆشی هێزی دوژمن تێكشكێنراون.

ڕاشیگەیاندووە، لەو شەڕانەدا ۱٠۳ سەربازی توركی و چەكداری ئۆپۆزسیۆنی سوریا كوژراون و لە بەرامبەریشدا ۲۳ شەرەڤانی هێزەكانی سوریای دیموكرات شەهید بوون.

هەسەدە ئاماژەی بەوەشكردووە، كە شەڕی هێزەكانیان و سوپای سوریا لە تەل تەمر لەگەڵ سوپای توركیا و چەكدارە ئۆپۆزسیۆنەكان دەستی پێ‌ كردووە و توانراوە هێزەكانی توركیا تێكبشكێنرێن.

بەردەوام بە لە خوێندنەوە

کوردستان

لە چیای ئەزمەڕ تەقینەوەیەك ڕوویدا و قوربانی لێ‌ كەوتەوە

خەڵك- بەشی هەواڵ
ئێوارەی ئەمڕۆ لەسەر چیای ئەزمەڕ لە سلێمانی تەقینەوەیەك ڕوویدا و بەهۆیەوە دوو كەس گیانیان لەدەستداوە.

سەرچاوەیەك لە (جی سی سی) سلێمانی بۆ (خەڵك) ڕایگەیاند، كە ئێوارەی ئەمڕۆ دەنگی تەقینەوەیەك لەسەر چیای ئەزمەڕ بیستراوە و ڕاستەوخۆ هێزەكانمان چوونەتە شوێنی ڕووداوەكە.

ڕاشیگەیاند، بەهۆی ئەو ڕووداوەوە دوو كەس گیانیان لەدەستداوە و لێكۆڵینەوەش لەسەر ڕووداوەكە دەستی پێ‌ كردووە.

جەختیشی كردەوە، كە تا ئێستا بەتەواوی یەكلایی نەبۆتەوە تەقینەوە بووە یان شتی دیكە، بەڵام دەنگی تەقینەوە بیستراوە و لێكۆڵینەوەش دەستی پێ‌ كردووە.

بۆ بەدواداچوونی زیاتر (خەڵك) پەیوەندی كرد بە سەركەوت ئەحمەد، وتەبێژی پۆلیسی سلێمانییەوە، بەڵام وەڵامی پەیوەندییەكەی نەدایەوە.

بەردەوام بە لە خوێندنەوە

کوردستان