ئێمە لە تۆرە کۆمەڵایەتیەکان

ئابوری

عەلاگەی نایلۆن بۆ سەمونخانە و نانەواخانەكان قەدەغە كرا

خەڵك – بەشی هەواڵ
لیژنەی باڵای لیژنە هاوبەشەكانی قائیمقامیەتی كەلار ڕایدەگەیەنێت، بەكارهێنانی كیسەی نایلۆن بۆ سەمونخانە و نانەواخانەكان قەدەغە دەكرێت و تەنها ماوەی 20 ڕۆژ دەدرێت بۆ ئەوەی زەرفی كاغەز بەكاربهێنن.

لیژنەی باڵای لیژنە هاوبەشەكانی قائیمقامیەتی كەلار لە ڕاگەیەنراوێكدا، كە وێنەیەكی بۆ (خەڵك) نێردراوە ڕایگەیاندووە، لە پێناو بەرژەوەندی گشتی و پاراستنی تەندروستی هاووڵاتیان بڕیار درا بە قەدەغە كردنی كیسەی نایلۆن بۆ سەمونخانە و نانەواخانەكان.

ڕاشیگەیاندوە، لە ئەمڕۆوە بۆ ماوەی 20 ڕۆژ مۆڵەتیان پێدەدرێت بۆ ئەوەی زەرفی كاغەز بەكاربهێنن، هاوكات پێویستە قوماشی خام یان دارحەسیری سروشتی بەكاربهێنن بۆ سەر مێزەكانیان نەك حەسیری لە نایلۆن دروستكراو، بە پێچەوانەوە ڕووبەڕووی سزا دەكرێنەوە.

پێشتر لەشكر حەمید، ئەندازیاری خۆراك بۆ (خەڵك) وتی، “توێژینەوە تەندروستییەكان باس لەوەدەكەن نان و سەممون ئەگەر بە گەرمی بكرێتە نێو عەلاگە و كیسەی نایلۆنەوە كارلێك دروست دەكات و ئەمەش زیانی بۆ سەر تەندروستی مرۆڤ هەیە، چونكە كیسەی نایلۆن لە مادەی كیمیایی دروست دەكرێت و ڕەنگە بەكارهێنەر تووشی نەخۆشی درێژخایەن و شێرپەنجە بكات”.

 

ئابوری

دابەشكردنی مووچەی یەك وەزارەت ڕاگەیەنرا

خەڵك- بەشی هەواڵ
وەزارەتی دارایی و ئابووری حكومەتی هەرێم دابەشكردنی مووچەی مانگی 11ی ساڵی ڕابردووی وەزارەتێك ڕادەگەیەنێت.

سەرچاوەیەك لە وەزارەتی دارایی و ئابووری هەرێم بۆ (خەڵك) ئاماژەی بەوەكرد، كە سبەینێ‌ دوو شەممە 24ی شوبات مووچەی وەزارەتی ئەوقاف و كاروباری ئایینی دابەش دەكرێت.

ڕاشیگەیاند، كە چاوەڕێی گەیشتنی پارەی مووچەن لە بەغداوە، لەگەڵ گەیشتنی پارەكە خشتەی مووچەی سەرجەم وەزارەتەكان ڕادەگەیەنن.

مانگی 2ی 2020 بەرەو كۆتایی دەڕوات و تا ئێستا مووچەی مانگی 11ی ساڵی ڕابردووی فەرمانبەران بە تەواوی دابەش نەكراوە، ئەمە لەكاتێكدایە، كە بەرپرسانی وەزارەتی دارایی هەرێم دەڵێن: “30 ڕۆژ جارێك مووچە دابەش دەكەین” بەڵام مانگی ڕابردوو لە 23ی مانگدا سەرجەم فەرمانبەران و خانەنشینان مووچەیان وەرگرت، بەڵام لەم مانگەدا هێشتا زۆربەی وەزارەت و دەستە و دامەزراوەكان مووچەیان وەرنەگرتووە.

بەردەوام بە لە خوێندنەوە

ئابوری

حكومەت لەسەر داخستنی ناوەندەكانی خوێندن بڕیار دەدات

خەڵك-بەشی هەواڵ

دوای تووشبوونی دەیان هاوڵاتی ئێران بە ڤایرۆسی كۆرۆنا، حكومەتی هەرێمی كوردستان سەرجەم ئامادەكارییەكانی بۆ ڕوبەڕووبوونەوەی ڤایرۆسەكە گرتۆتەبەر و بەپێی زانیارییەكانیش، وەزارەتی ناوخۆ و پەروەردە و تەندروستی و چەند وەزارەتێكی دیكە ژوورێكی عەمەلیاتیان بۆ ئەو مەبەستە دروست كردووە.

هەرچەندە بەرپرسانی هەرێم ئاشكرای دەكەن، تاكو ئێستا هیچ حاڵەتێكی ڤایرۆسەكە لە هەرێم تۆمار نەكراوە، بەڵام مەترسی لەسەر هاووڵاتیان و بەتایبەتیش ناوەندەكانی خوێندن هەیە و تاكو ئێستاش حكومەت هیچ بڕیارێك لەو بارەوە نەداوە.

هەڤاڵ ئەبوبەكر، پارێزگاری سلێمانی لە كۆنفڕانسێكی ڕۆژنامەوانیدا لەسەر داخستنی ناوەندەكانی خوێندن ڕایگەیاند، وەزارەتی پەروەردە یەكێكە لە وەزارەتە پەیوەندیدارەكان و بەدڵنیاییەوە ئەو بابەتە باسی لێوە كراوە.

وتیشی، “لە كۆبوونەوەی دوێنێی وەزارەتی ناوخۆ، هەریەك لە وەزارەتەكانی تەندروستی و پەروەردە ڕاسپێردراون لێكۆڵینەوەیەكی وردی حاڵەتەكان بكەن و ڕاپۆرت بدەنەوە بە ئەنجوومەنی وەزیران”.

ئاشكراشیكرد، هەركاتێك گەیشتە ئەو قۆناغەی پێویست بەوە بكات ناوەندەكانی خوێندن دابخرێن، ئەوكاتە بەدڵنیاییەوە تەندروستی و ژیانی هاووڵاتیان لە پێش هەموو شتێكەوەیە و بڕیاری پێویستی لەبارەوە دەدرێت.

لای خۆشیەوە، ئالان حەمە سەعید، وەزیری پەروەردەی هەرێم ڕایگەیاندووە، دوێنێ لە كۆبوونەوەی بەپەلەی حكومەتی هەرێم بەشدار بوون بۆ ڕووبەڕووبوونەوەی ڤایرۆسی كۆرۆنا و باس لە سەرجەم ڕێككارەكان كراوە، هەموو ئەگەرێكیش كراوەیە تاوەكو ڕاگرتنی دەوامیش.

وتیشی، “ئەوەی ئێستا هەیە دۆخێكی دەرونییە و پێویست بەو ترسە ناكات، بەڵام ئێمە چاوەڕێ دەبین تا چەند ڕۆژێكی تر و ئەگەر دۆخەكە پێویستی كرد بڕیاری ڕاگرتنی دەوامیش دەدەین”.

بەردەوام بە لە خوێندنەوە

ئابوری

بەهۆی گرانفرۆشتنی دەمامك چەند دەرمانخانەیەك لە هەولێر و سلێمانی داخران

خەڵك- بەشی هەواڵ
بەهۆی گرانفرۆشتنی دەمامك و پێشێلكردنی بڕیارەكانی حكومەتی هەرێم چەند دەرمانخانەیەك لە هەولێر و سلێمانی داخران.

قائیمقامیەتی سلێمانی لە ڕاگەیەنراوێكدا ئاماژەی بەوەكردووە، بەهۆی گرانفرۆشتنی دەمامك دەرمانخانەی شاری گۆیژە داخرا.

ڕاشیگەیاندووە، دەرمانخانەكە نرخی دەمامكی لەسەر هاووڵاتیان زیادكردوە و بەنرخی (10) هەزار دینار فرۆشتویەتی، بۆیە بەفەرمانی قائیمقامی سلێمانی دادەخرێت و خاوەنەكەشی ڕووبەڕوی ڕێكاری یاسایی دەكرێتەوە.

بەڕێوەبەرایەتی گشتی تەندروستی هەولێر لەڕاگەیەنراوێكدا ئاماژەی بەوەكردووە، كە بەشی پشكنین و دڵنیایی جۆری بەهەماهەنگی لەگەڵ وەزارەتی تەندروستی و قائیمقامیەتی ناوەندی هەولێر هەستاین بە پشكنینی ئەو شوێنانەی، كە دەمامكیان لێ دەفرۆشرێت و گرانیان كردوە وەك دەرمانخانە و ماڕكێتەكان.

ڕاشیگەیاندووە، ئەو شوێنانەمان داخستن، كە سەرپێچیان كردبو و پشكنین و بەدواداچوونیش بەردەوامە و هەرشوێنێك ئیستغلالی بازاڕی كردبێت دادەخرێت و غەڕامە دەكرێت بەپێی یاسا و ڕێنماییەكان .

بەردەوام بە لە خوێندنەوە

کوردستان