ئێمە لە تۆرە کۆمەڵایەتیەکان

ڕاپۆرت و شیکاری

هازارد چی بۆ زێدان و ڕیاڵ ده‌كات؟

هه‌وراز كاوه‌

دواجار له‌نێوان خۆشه‌ویستی ڕۆناڵدۆ و میسی ئه‌وه‌ ئیدین هازارد چوونی بۆ لای زێدان هه‌ڵبژارد و ناچاره‌ چی دیكه‌ ڕكابه‌ری ئه‌و دووانه‌ بكات، یاخود له‌ هه‌وڵی ئه‌وه‌دایه‌ گلاكتیكۆس له‌ یانه‌ی مێره‌نگی دروست بكات، له‌ ڕاستیدا هه‌موو یاریی ئه‌و ستاره‌مان دیوه‌، به‌ڵام ده‌مه‌وێت وه‌كو پێشبینی و به‌رچاو ڕوونی باسی ئه‌وه‌ بكه‌م ئه‌و یاریزانه‌ چۆن له‌ پێكهاته‌كه‌ی زیزۆدا یاریی ده‌كات؟.

بێگومان دوای چوونی هازارد بۆ یانه‌ی ڕیاڵ مه‌درید تاڕاده‌یه‌كی زۆر گۆڕینه‌وه‌ی تۆپه‌كان و گه‌یشتن به‌ قوڵایی گۆڵی ڕكابه‌ر و هه‌ڵكشانی زیاتر له‌ باڵه‌كان ده‌بینرێت، به‌ تایبه‌تی ئه‌و له‌م وه‌رزه‌دا به‌ ته‌نیا له‌ خوله‌ جیاوازه‌كان (21) گۆڵی هه‌بوو جگه‌ له‌مه‌ (17) گۆڵیشی بۆ یانه‌ی بلوز دروست كرد. یه‌كه‌م وێنه‌ی یاریكردنی زێدان به‌ بۆچوونی من: (4ـ3ـ1ـ2) ده‌بێت به‌ پشت به‌ستن به‌ به‌لجیكییه‌كه‌ وه‌كو دروستكاری یاریی له‌ پشته‌وه‌ی و دووانه‌ی پێشه‌وه‌ كه‌ریم بنزیما و لۆكا یوڤیچ، چونكه‌ هازارد لێهاتووه‌ له‌ گرتن و پێدانی گۆڕینه‌وه‌ به‌ دیقه‌ته‌كان و لێوه‌شاوانه‌ ده‌توانێت دووانه‌ی باڵه‌كان پێكه‌وه‌ ببه‌ستێت و جیاوازیش دروست بكات له‌ هێڵه‌كانی پێشه‌وه‌، هه‌روه‌ها ئه‌و ئه‌مانه‌ی به‌ باشی له‌ یانه‌ كۆنه‌كه‌ی ئه‌نجامداوه‌، له‌كاتێكدا یاریزانی تازه‌ هاتووه‌ یوڤیچ توانای هه‌یه‌ به‌ به‌رده‌وامی هێڵی به‌رگری به‌رامبه‌ر دوو له‌ت بكات و سوود له‌ هاوڕێكانی ببینێت، كه‌ ده‌مێكه‌ زێدان به‌دوای ناوێكدا ده‌گه‌ڕێت به‌خێرایی هێڵی ناوه‌ند به‌ هێڵی هێرشبردنه‌وه‌ ببه‌ستێته‌وه‌، یان لانیكه‌م بتوانێت چاره‌سه‌ری گرفته‌كانی سێ‌ یه‌كی پێشه‌وه‌ی یاریی یانه‌كه‌ی بكات و كه‌متریش پشت به‌ باڵه‌كان ببه‌ستن، كه‌ پێشتر كه‌س نه‌بوو به‌ خێرایی و تۆپه‌وه‌ هه‌نگاو بنێت و تیپه‌كه‌ له‌ ئینهاری جه‌سته‌یی و ده‌روونی ڕزگار بكات، یان تۆپ بخاته‌ تۆڕه‌كه‌وه‌.

له‌كاتی (4ـ3ـ3)دا ئه‌وه‌ ئیدین به‌شێوه‌یه‌كی ئاسایی دێته‌ باڵی چه‌پ، به‌ڵام له‌وێدا نامێنێته‌وه‌، چونكه‌ شێوه‌ یاریكردنی ئه‌و ڕانه‌وه‌ستانه‌ له‌ یاریگادا و هه‌میشه‌ په‌لاماری تۆپ ده‌دات و كه‌متر ئه‌ركه‌كانی له‌و ناوچه‌یه‌ جێبه‌جێ‌ ده‌كات، به‌ڵكو ده‌كشێته‌ نیوه‌ یاریگا و دواتر به‌ره‌و قوڵایی بۆكسی گۆڵ هه‌نگاو هه‌ڵده‌گرێت و ده‌یه‌وێت تۆپه‌كان به‌شێوه‌یه‌كی هونه‌ری به‌ره‌و گۆڵ تێپه‌رێنێت، هه‌روه‌ها ده‌رفه‌تی ده‌بێت له‌گه‌ڵ بنزیما شوێنه‌كانیان بگۆڕنه‌وه‌، تا زیاتر لایه‌نی فره‌یی له‌ نووكی پێشه‌وه‌دا هه‌بێت. له‌ لایه‌كی دیكه‌وه‌ كاسیمیرۆ كه‌ به‌ باشی ده‌توانێت كۆنتڕۆڵی به‌رده‌می به‌رگری و گوشاره‌كانی ناوه‌ندی تیپی ڕكابه‌ر بكات، ئه‌وه‌ ده‌رگای زیاتر به‌ڕووی به‌لجیكییه‌كه‌ ده‌كاته‌وه‌ به‌ هیچ جۆرێك له‌ فیكری ئه‌وه‌دا نه‌بێت بۆ به‌رگری بگه‌ڕێته‌وه‌. ئه‌گه‌ر زێدان ڕێگای بدات ئه‌و هۆشیارانه‌ مامه‌ڵه‌ له‌گه‌ڵ ناوه‌ڕاستی مه‌یدان و هێرشبه‌راندا بكات و واجباتی دیكه‌ی بۆ زیاد نه‌كات، بێگومان ئه‌و تازه‌ هاتووه‌ نایه‌ڵێت تیپه‌كه‌ی گرفتی گه‌مارۆدان و نه‌بوونی ڕووبه‌ری یاریگایان هه‌بێت، یان لانیكه‌م به‌ خێراییه‌كی زۆر ده‌توانێت ته‌واوی هێرشه‌كان بینا بكات و كۆتایی پێبهێنێت، چونكه‌ ئیدین هێزی هونه‌ری فریوودان و زاڵبوونی به‌سه‌ر ڕكابه‌ره‌كانیدا هه‌یه‌ و هیچ یاریزانێكیش له‌كاتی (1V1 ) مه‌حاڵه‌ له‌ جوڵه‌ی بخات، به‌وه‌ش نایه‌ڵێت زێدان ده‌ستبه‌رداری لایه‌نی هێرشبردن بێت، به‌ڵام هێشتا تیپه‌كه‌ی ده‌بێت له‌ بیری هێنانی ئه‌ستێره‌ی دیكه‌دا بن، چونكه‌ ئه‌م جۆره‌ پلانانه‌ به‌ ته‌نیا یاریزانێك ته‌واو نابن.

ڕاپۆرت و شیکاری

لیڤه‌رپوڵ نازناوی چامپیۆنز لیگی به‌ چه‌ند ملیۆن مسۆگه‌ر کرد؟ چه‌ندی به‌ده‌ستهێنایه‌وه‌؟

خه‌ڵک سپۆرت

یانه‌ی لیڤه‌رپوڵی ئینگلیزی له‌یاریی کۆتایی خولی یانه‌ پاڵه‌وانه‌کان به‌رامبه‌ر یانه‌ی تۆتنهام سه‌رکه‌وتنێکی گه‌وره‌ی به‌ده‌ستهێنا و نازناوی شه‌شه‌می له‌مێژوویدا چنییه‌وه‌.

له‌ ٢٠٠٥وه‌ پێکهاته‌ی “ڕێدز” تامی نازناوه‌ ئه‌وروپیه‌کانی نه‌کردبوو، واتا ١٤ ساڵه‌ ئه‌م یانه‌ زه‌به‌لاحه‌ به‌بێ نازناوه‌ ئه‌وروپیه‌کان وه‌رزه‌کانی به‌ڕێده‌کات و له‌هه‌مان کاتیشدا بێبه‌شه‌ له‌نازناوی خولی ناوخۆی ئینگلته‌را.

یۆرگن کلۆپی ئه‌ڵمانی له‌ساڵی ٢٠١٥وه‌ پۆستی ڕاهێنه‌رایه‌تی یانه‌ زه‌به‌لاحه‌که‌ی ئینگلته‌رای  وه‌رگرتووه‌، له‌سه‌رده‌می پێش ئه‌م ڕاهێنه‌ره‌وه‌و به‌چه‌ندین قۆناغ تا کۆتا ساته‌کانی به‌رزکردنه‌وه‌ی نازناوی خولی یانه‌ پاڵه‌وانه‌کان ئیداره‌ی لیڤه‌رپوڵ بڕی (٦٣٨،٣ ملیۆن یورۆ)ی له‌گواستنه‌وه‌ی یاریزاناندا به‌م شێوه‌یه‌ به‌کارخستووه‌:

(ئالیسۆن بیکه‌ر ٧٥ ملیۆن، سیمۆن مینیۆلێت ١٠،٦٠ ملیۆن، ڤێرجیل ڤان دایک ٨٥، جۆی گۆمێز ٥، دیان لۆڤرین ٢٥،٣٠، جوێل ماتیپ (فری)، ئه‌ندریۆ ڕۆبێرتسۆن ٩، ئالبێرتۆ مۆرینۆ ٢٠، ئه‌لیکسانده‌ر ئاڕنۆڵد (لاوانی یانه‌)، ناتانێل کلاین ١٧،٧٠، فابینهۆ ٥٠ ملیۆن، نابی کیتا ٦٠، جۆرجینیۆ ڤایناڵدۆم ٢٧،٥، ئۆکسله‌ید چامپه‌رلین ٣٨، جۆردان هێندێرسۆن ١٨، جه‌یمس میڵنه‌ر (بێبه‌رامبه‌ر)، ئاده‌م لالانا ٣١، سادیۆ مانێ ٤١، محه‌مه‌د سه‌ڵاح ٤٢، خێردان شاکیری ١٤،٧، ڕۆبێرتۆ فێرمینۆ ٤١، دانێل ستۆریدج ١٥ ملیۆن، دیڤۆک ئۆریگی ١٢،٥ ملیۆن).

چه‌ندیان به‌ده‌ست هێناوه‌ته‌وه‌؟

بێگومان به‌شداریکردن له‌ خولی یانه‌ پاڵه‌وانه‌کان ته‌نها بۆ ئامانجه‌ وه‌رزشیه‌کان نییه‌، به‌ڵکو ئامانجی ئابوریشی له‌پشته‌ و یانه‌کان هه‌میشه‌ له‌م بواره‌دا پاره‌ی خه‌یاڵی به‌ده‌ست ده‌هێنن.

ڕۆژنامه‌ی “ده‌یلی میره‌ر”ی به‌ریتانی هه‌ژمارێکی ته‌واوی ڕووه‌ داراییه‌کانی ئه‌م وه‌رزه‌ی خولی یانه‌ پاڵه‌وانه‌کانی ئه‌وروپای کردووه‌ و ده‌ریخستووه‌، که‌ یانه‌ی سورپۆشه‌کان بڕی ٦٦ ملیۆن پاوه‌ندی به‌هۆی خوله‌ ئه‌وروپیه‌ ناوداره‌که‌وه‌ به‌ده‌ستهێناوه‌.

نرخه‌کان لێره‌دا ناوه‌ستن، به‌ڵکو به‌هۆی بردنه‌وه‌ی له‌یاریی کۆتایی له‌ یانه‌ی تۆتنهام بڕی ١٧ ملیۆن پاوه‌ندی تر به‌ده‌ست ده‌هێنێت، هه‌روه‌ها بڕی ٣١ ملیۆن پاوه‌ندی تر به‌هۆی مافی په‌خشه‌ ته‌له‌ڤیزیۆنیه‌کانه‌وه‌ مسۆگه‌ر ده‌کات (ئه‌م نرخه‌ تۆتنهامیش به‌ده‌ستی ده‌هێنێت).

که‌واته‌ ئه‌گه‌ر هه‌ژمارێکی کۆی ئه‌و پاره‌یه‌ بکه‌ین که‌ لیڤه‌رپوڵ به‌هۆی خولی یانه‌ پاڵه‌وانه‌کانی ئه‌م وه‌رزه‌وه‌ به‌ده‌ستی هێناوه‌ ته‌نها ٩٧ ملیۆن پاونده‌، که‌ له‌ چوار به‌ش به‌شێک له‌و پاره‌یه‌ ناکات که‌ بۆ ئه‌م مه‌به‌سته‌ گه‌وره‌یه‌ له‌گواستنه‌وه‌ی یاریزاناندا به‌کارخراوه‌.

بەردەوام بە لە خوێندنەوە

ڕاپۆرت و شیکاری

به‌رشه‌لۆنه‌ بوایه‌ كۆتاییه‌كه‌ به‌مجۆره‌ نه‌ده‌بوو

هه‌وراز كاوه‌ – پێگه‌ی كوڕه‌ی عه‌ره‌بی

ئه‌گه‌ر لایه‌نێكی یاریی كۆتایی ڕیاڵ و به‌رشه‌ ده‌بوو بێگومان یارییه‌كه‌ زیاتر چه‌ندین كاتژمێر قسه‌و باسی هه‌ڵده‌گرت، چونكه‌ خودی ئه‌و دوو یانه‌یه‌ ته‌نانه‌ت یوفایش له‌به‌ر لایه‌نی بازرگانی پلیته‌كانی یاریگا پێیان خۆشه‌ ئه‌وان بگه‌نه‌ شانۆی كۆتایی، له‌ كاتێكدا زۆربه‌ی ئینگلیزه‌كان به‌ بیانووی دووری ئازه‌رباینجان گه‌شتیان بۆ باكۆ نه‌كرد به‌ بیانووی دووری نێوان هه‌ردوو وڵات، له‌ كاتێكدا نزیكه‌ی چواردە هه‌زار پلیتی یارییه‌كه‌ی چێڵسی و ئه‌رسیناڵ گه‌ڕێنرایه‌وه‌ و نه‌فرۆشرا، به‌ڵام ئه‌گه‌ر به‌رشه‌ له‌ كۆتایدا به‌ركام له‌و دووانه‌ بكه‌وتایه‌ بێگومان وه‌ك یاریی كۆتاییه‌كانی پێشوو پلیته‌كان نرخی ده‌بووه‌ (4000) یۆرۆ، له‌ كاتێكدا ئینگلیزه‌كان هه‌موو ساڵێك له‌ خولی ناخۆی خۆیان چه‌ندین جار یاریی ڕكابه‌ره‌كانیان له‌گه‌ڵ تیپه‌كانیان ده‌بینن و كه‌متر خۆیان له‌ قه‌ره‌ی گه‌شتێكی بێ‌ تامده‌ده‌ن، بۆیه‌ ئه‌مه‌ش هه‌روایه‌ بۆ بینه‌رانی ده‌ره‌وه‌ی ئه‌و كیشوه‌ره‌، به‌ تایبه‌تی جه‌ماوه‌ر زیاتر دابه‌شبوون به‌سه‌ر دوو لایه‌نه‌كه‌ی ئیسپانیا، یان كه‌متر داده‌نیشن شرۆڤه‌ی یاریی تۆتنهام و لێڤه‌رپوول ببینن، یاخود زۆرێك گرنگ نییه‌ بۆیان كێ‌ ده‌یباته‌وه‌، ئه‌وه‌نده‌ی به‌ كورته‌ نامه‌یه‌ك ئه‌نجامه‌كه‌ بزانن کافییە.

له‌سه‌ر ته‌كتیكی یاریی كۆتایی شه‌وی پێشوو بێگومان پێشتر هه‌ندێك قسه‌ و باسی گرنگم ته‌ته‌ڵه‌ و بێژنگ كردبوو، بۆیه‌ كاتێك دوای پارشێو له‌ ئۆفیسه‌كه‌م دانیشتم ویستم كۆپی وه‌رگێڕانه‌كه‌ی پێگه‌ی كوره‌ی عه‌ره‌بیتان بۆ به‌ كوردی بكه‌م، تا بزانن هه‌موو لا كۆتایی ئینگلیزەکانیان به‌لاوە گرنگ نه‌بووه‌ و ته‌نیا وه‌كو یارییه‌كی پرێمه‌رلیگی ئاسایی ته‌ماشاكراوه‌.

كوڕه‌ نووسیویەتی:
وه‌كو هه‌میشه‌ یۆرگن كڵۆپ به‌ پێكهاته‌ی بنه‌ڕه‌تی (4ـ3ـ3) یاریی ده‌كرد. گۆڵچی ئه‌لیسۆ له‌ پێشیه‌وه‌ ئارنۆڵد و ڤاندایك و ماتیب و رۆبرتسۆن هه‌بوون. سیانه‌ی ناوه‌ڕاست فیناڵدۆم و هندرسۆن و فابینۆ پێكیان ده‌هێنا، هه‌رچی هێڵی پێشه‌وه‌یه‌ سه‌ڵاح و مانی و فێرمینهۆ یاوه‌ربوون. كڵۆپ به‌ هیچ جۆرێك له‌ ماوه‌ی (58) خوله‌كدا سوودی له‌ تواناكانی فێرمینهۆ نه‌بینی، تا دواتر ئۆرێگی خسته‌ جێگای و به‌ گۆڵی دووه‌م یارییه‌كه‌ی یه‌كلا كرده‌وه‌، هه‌روه‌ها پێگه‌كه‌ ده‌نووسێت یانه‌ی ڕیدز له‌ڕووی هونه‌ری و جه‌سته‌یی له‌ گێمی یه‌كه‌م سه‌ركه‌تووبوون، ئه‌ویش كاتێك به‌هۆی گۆڵه‌كه‌ی سه‌ڵاح به‌ په‌نارتی له‌ خووله‌كی دووی سه‌ره‌تای یارییه‌كه‌ خستییه‌ تۆِره‌كه‌وه‌، دوای ئه‌مه‌ ڕێگای زیاتر بۆ ده‌رچوونی ناوه‌ڕاستكاران هندرسۆن و فیناڵدۆم كرایەوە، تا وزه‌ به‌ دووانه‌ی لاكان ئارنۆڵدو و ڕۆبیرتسۆن بده‌ن و گوشاری زۆرتر بكه‌ن.

پۆچۆتینۆ سه‌ره‌تا به‌ پلانی (4ـ2ـ3ـ1) ده‌ستپێكرد. گۆڵچی لۆرێس و به‌رگری دێرفێریلد و فیرتۆنگین و ڕۆز و ترایپه‌ر، هه‌روه‌ها دووانه‌ی به‌رده‌م موسا سیسیكۆ و هاری وینكس بوون. ناوه‌ڕاستكاران سۆنگ و دایلی ئالی و ئه‌ریكسۆن، نووكی پێشه‌وه‌ هاری كین دانرابوو. دیاره‌ گۆڵی یه‌كه‌م له‌وكاته‌ زووه‌دا ڕاهێنه‌ره‌كه‌ی تووشی شۆككرد، بۆیه‌ به‌ ناچاری پلانه‌كه‌ی گۆڕییه‌ سه‌ر (4ـ4ـ2) به‌ڵام به‌ نه‌خۆشكه‌وتنی ناوه‌ندی تیپه‌كه‌ به‌ تایبه‌تی لاوازی ئاستی وینكس و سیسیكۆ كه‌ توانایان نه‌بوو به‌سه‌ر خێرایی ڕكابه‌ره‌كانیاندا سه‌ربكه‌ن، ئه‌وه‌ هێڵی به‌رگریشیان تووشی داڕمان هات و كه‌متر ده‌یانتوانی بێنه‌ پێشه‌وه‌ بۆ دروستكردنی هێرشی هه‌ڵگه‌ڕاوه‌. كه‌ دواتر ئه‌و دووانه‌ی خسته‌ده‌ره‌وه‌ و لۆكاس مۆرا و ئیریك دایری هێنا، به‌وه‌ش سێ‌ یاریزانی له‌ ناوه‌ند بۆ پاراستنی هاوسه‌نگی یارییه‌كه‌ دانا، تاڕاده‌یه‌ك ڕێگری باشیان له‌ بیناكردنی هێرشی ڕكابه‌ر ده‌كرد، خوله‌كه‌كانی كۆتایی ده‌بوو تۆتنهام زیاتر هه‌وڵی یه‌كسانی بده‌ن، به‌ڵام به‌هۆی جێگیری ئاستی هونه‌ری و جه‌سته‌یی به‌رگری و ناوه‌ندی ریدز بۆشایه‌كی زۆریان خستبوو نێو بۆكسی گۆڵی به‌رامبه‌ره‌وه‌، هه‌رچه‌نده‌ سه‌ڵاح و مانی و میلنه‌ر به‌ خراپی له‌گه‌ڵ كۆتا له‌مسه‌ی تۆپه‌كان مامه‌ڵه‌یان ده‌كرد و لاوازبوون له‌ گه‌یاندنی به‌ تۆڕی گۆڵه‌كه‌، له‌ به‌رامبه‌ردا ئه‌لیسۆ به‌ ئاسته‌ جێگیره‌كه‌ی توانی هه‌شت تۆپی تووندی هێرشبه‌ره‌كانی تۆتنهام له‌ گۆڵه‌كه‌ی دوور بخاته‌وه‌ و جامه‌كه‌یان برده‌وه‌. له‌ كۆتایدا ئه‌مه‌ ته‌واوی شرۆڤه‌ی پێگه‌ی كوڕه‌بوو بۆ یارییه‌كه‌، به‌ دڵنیاییه‌وه‌ به‌رشه‌ و ڕیاڵ بوایه‌ لایه‌نی هونه‌ری ئه‌م كۆتاییه‌ ئه‌وه‌نده‌ لاواز نه‌ده‌بوو.

بەردەوام بە لە خوێندنەوە

ڕاپۆرت و شیکاری

ڕاهێنەری تۆپی پێی و بەرپرسیارێتییە هونەرییەکانی

نوسینی/ بڵند فاتیح

بەشی یەکەم

لە جیهانی ڕاهێنەرایەتی تۆپی پێدا هاوشێوەی زۆربەی ڕێکخراو و کۆمپانیایاکان سیستەمی دابەشکردنی دەسەڵاتەکان بەشێوەی هەڕەمییە.

واتا دەسەڵاتەکان بەپێی پلەی کەسەکە لە نێو ئەو سیستەمەدا دەگۆڕێت و تاکو لە هەڕەمی سیستەمەکە بەرزتربینەوە دەسەڵاتی کەسەکان زیاتر دەبێت، لەم چوارچێوەدا ئەرکی ڕاهێنەر دەگۆڕێت بە بەپێی کلتوری وڵاتەکان.

بۆنمونە دەسەڵاتی ڕاهێنەرێک لە ئینگلتەرا وەکو دەسەڵاتی ڕاهێنەرێک نیە کە لە ئیتاڵیا کاردەکات، یاخود کە لە ئسپانیا کار دەکات، لە ئینگلتەرا ڕاهێنەر سەرپەرشتیاری هەموو لایەنێکی هونەری و تەکنیکی یانەکە دەکات، هەر لە فەلسەفەی یاریی کردن و دانانی راهێنەر بۆ تیپە تەمەنییەکانی دیکەی یانەکە و کڕینی یاریزان و فرۆشتنی یاریزان و دەستنیشانکردنی دەستەی کارکردن لەڕووی هونەرییەوە.

واتا لە ئینگلتەرا ڕاهێنەر بەرپرسی یەکەمە لە هەموو شتێک کە دەچێتە خانەی کارگێڕی وەرزشی یانەکەوە، بێگومان هەندێک یانە بەڕێوبەری وەرزشییان هەیە و هەندێک یانە لە ماوەیەکدا ویستویانە ئەم کلتورە بگۆڕن و بە تەواوی پشت بە بەڕێوبەری وەرزشی ببەستن، بەڵام بە شێوەیەکی گشتی لە وڵاتی سێ شێرەکە ڕاهێنەر هەموو بەرپرسیارێتیەکی هونەری لەژێر دەستدایە، لەبەرامبەردا ڕاهێنەرانی ئیسپانیا بەپێی جیاوازی کلتوری یانەکان ئەرکی جیاوازیان هەیە.

“لەئیسپانیا دۆخەکە جیاوازە”

بۆنمونە لە بەرشلۆنە ڕاهێنەر ناتوانێت بڕیاری هەموو ئەو بەرپرسیارێتیانەی سەرەوە بدات، بەڵكو دەبێت کەسێک یارمەتی بدات و پێکەوە ڕاوێژ بکەن، ئەو کەسەیش ناودەبرێت بەڕێوبەری وەرزشی، ڕیاڵ مەدرید بە پێچەوانەی بەرشلۆنەوەیەو هەرچەندە کورسی بەڕێوبەری وەرزشی هەبووە، بەڵام هەموو کات ڕۆڵی سەرەکیی نەبینووە لە وتوێژکردن و ڕواێژکردن بە راهێنەرەکان، بەڵکو زۆرجار لەسەر سەنگی ناوی ئەو کەسە کەوتووە کە ئەو بەرپرسیارێتییە وەرگرتووە.

لەبری ئەمە لە ڕیاڵ مەدریدا سەرۆک ڕۆڵی گرنگی هەبووە لە بەڕێکردنی ئەرکی بەڕێوبەری وەرزشی یانەکە و لەگەڵ ڕاهێنەردا زۆرجار وتوێژی کردووە و هەندێک جاریش هەڵبژاردنەکانی خۆی سەپاندووە، لەگەڵ ئەوەشدا نمونەی ڕاهێنەرمان هەیە کە لە یانەکانیاندا ڕۆڵی یەکلاکەرەوەیان هەبووە هاوشیوەی راهێنەرەکانی ئینگلتەرا.

بۆنمونە ڤالێنسیا یەکێکە لەو یانەنە کە گرنگی زۆر دەدات بە بڕیاری ڕاهێنەر و زۆرجار هەموو شت تەنها لە دەستی راهێنەردایە، هاوکات یانەی وەکو سیڤیلیە و ڤیاریاڵ نمونەی ئەو یانان کە تێیدا بەڕێوەبەری وەرزشی ئەرکی گرنگ دەبینین و زۆرجار کڕین و فرۆشتن و هێنانی یاریزانی نەناسراوی خاوەن بەهرە لەلایەن بەڕێوەبەرە وەرزشییەکانەوە یەکلادەکرێتەوە و ڕاهێنەر زیاتر پەیوەندی بە کاری ناو یاریگاوە هەیە، هەروەها یانەی دیکەی وەکوو ئەتلەتیکۆ مەدرید کە دەتوانین بڵێن لەلایەن سەرمایەدار و دەوڵەمەندەکانی دەرەوەی یانەکەوە بڕیاری گرنگ سەبارەت بە لایەنی هونەری تیپەکەوە دەدرێت، بەو پێیە یانەیەکی وەکو ئەتلەتیکۆ بۆ بەستنی گرێبەستەکانی پشت بە ئەو پارە و سامانە دەبەستێت کە لەلایەن دەوڵەمەندەکانەوە پێیان دەدەرێت، بۆیە وەکوو دەبینین لەڕووی بەڕێوەبردنی کاری هونەری تیپەکەوە ئسپانیا کلتورێکی هەمەڕەنگ و تیکەڵاویی هەیە.

” لەئیتاڵیا دیکتاتۆریەت هەیە و هەندێجار نمونەی مۆدێرن بەرچاو دەکەوێت”

لە ئیتاڵیا ناتوانین شتێکی زۆر بڵێین، بەو پێیە سیستەمی کارکردن بەتەواوەتی دیکتاتۆرێیە و هەموو شتەکان بە دەستی سەرۆکی یانەکەیە و ڕاهێنەر تەنانەت هەندێکجار بە ئازادیی خۆی پێکهاتەی یاریکەیش هەڵنابژێرێت. ڕاستییەکەی لە ئیتاڵیا هەندێک جار تەنانەت سەرۆکی یانەکەش بە زۆر هەڵبژێردراوە، یاخود بە میراتی لە باوکییەوە سەرۆکایەتێکەی بۆ ماوەتەوە.

لەگەڵ ئەوەشدا لەم چەند ساڵەی دواییدا نمونەی جیاوازی مۆدرێنانەمان بیننوە لە ئینتەرمیلان و ڕۆما و یوڤانتۆس و ئاتالانتا و ساسۆلۆ کە بەڕێوەبەرە وەزرشییەکانیان کاریگەریان هەبوو لە کڕین و فرۆشتنی یاریزانان(واتا وتوێژیان کردووە لەگەڵ ڕاهێنەرەکاندا).

هاوکات بەڕێوەبەری وەرزشی مێژوویی لە چەشنی ئەدریانۆ گالیانی کە ساڵانێکە زۆربەی کاری وەرزشی یانەکە بە دەستی خۆیەتی، تەنها لە بریاری کۆتایدا دەگەڕێتەوە بۆ سیلڤیۆ بێرلسکۆنی، ئیدی بەشێوەیەکی گشتگیر بەپێی ئەم دابەشکارییانە ئەرکی راهێنەرایەتی لە وڵاتێکەوە بۆ وڵاتێكی دیکە دەگۆڕێت. بەڵام ئەرکی ڕاهێنەر لە پەیوەندی لەگەڵ خودی تیپەکەدا باس و خواسێکی دیکەیە.

پەیوەندی راهێنەر بە پلەی یەکەم لەگەڵ ئەو تیپەدایە کە لەژێر دەستیدایە، بۆیە کۆمەڵیک مەرج و ئەرک و وەزیفەی دیکە هەیە کە دەبێت لە چوارچێوەی ئەو ئەرک و بەرپرسیارێتیانەدا پێناسەیەکی تەواو جیاواز بکەین بۆ چەمکی ڕاهێنەر و ڕاهێنەرایەتی.

 

به‌شی دووه‌م

دوای ئەوەی بەشێوەیەکی گشتگیر باسی ڕاهێنەری وەرزشیمان کرد لەدەرەوەی یاریگا، له‌به‌شی دووه‌مدا دێینە سەر ئەرکی ڕاهێنەر لە نێو یاریگادا و  لەگەڵ خودی ئەو تیپەی کە لەژێر دەستیدایە، واتا پەیوەندی ڕاستەوخۆی نێوان راهێنەرەکان و تیپەکە.
لێرەدا بە کۆی ئاماژە بۆ بەرپرسی کاری ڕاهێنەرایەتی دەکەم، چونکە کاتێک بە وردی باسی ئەم بابەتە دەکەین ناتوانین بەشێوەیەکی هەڕەمەکی باس لە یەک راهێنەر بکەین و بڵێن ئەم کەسە هەموو ئەرکی ڕاهێنەرایەتیکردنی تیپەکە دەگرێتە ئەستۆ، به‌وپێیه‌ی لە بنەڕەتدا کاری ڕاهێنەرایەتی ئاماژە دەکات بە ڕاهێنان کردن بە کۆمەلێک یاریزان لە هەمو ڕوویەکەوە(جەستەیی،زهنی،دەروونی،تاکتیکی،تاکنیکی، ڕفتاریی، یاسایی)، هەموو ئەم لایەنانە پیویستی بە ڕاهێنەرە.

پێویسته‌ بوترێت کە چەمکی ڕاهێنەر گۆڕانی گەورە بەسەر مانا و پانتایەکەیدا هاتووە، لە سەرەتای سەرەتاکانەوە کە تۆپی پێ وەکو یارییەکی مۆدرێن لە دنیادا ناسرا، راهێنەری تیپ زۆرجار ئەو کەسە بوو کە خودی یانەکەی دامەزراند بوو، واتا بۆ ئەوەی ببیت بە ڕاهێنەر پێویستی بەوە نەدەکرد لە هیچ زانستێکی ڕاهێنەرایەتی سەردەمیانە  شارەزا بیت، هاوکات خودی ئەرکی راهێنەرەکەیش دەکرێت لە ئەرکی کاپتنێکی ئێستا تۆپی پێدا کورت بکرێتەوە.

“ئه‌و گۆڕانکارییانه‌یله‌ بواره‌که‌دا ڕویاندا

دواتر لەگەڵ بەرەوپێشچوونی کات چەمکی ڕاهێنەر گۆڕانی بەسەردا هات بەو پێیەی تێگەیشتن بۆ یارییه‌کە فراوانتر بوو، بۆیە ڕاهێنەر ئەندازەیەکی نوێی بۆ پیشەی خۆی زیاد کرد کە ئەویش ئەو بوو ڕاهێنەر بیری لەوە دەکردەوە چۆن یاریی تۆپی پێ بکات، یاخود بیری لەوە دەکردەوە باشترین شێواز بۆ ئه‌نجامدانی یاریی تۆپی پێ چییە و چۆنە؟
ئەم قۆناغە هاوزەمان بوو لەگەڵ پەیدابوونی یاساکانی تۆپی پێ، ئیدی لەو دەمەوە تۆپی پی سترکتورێکی وەرگرت، هەر بۆیە داڕشتنی جیاوازی تۆپی پێ پەیدا بوو، قۆناغی دوای ئەمە ڕەنگە هەندێک دواکەوتبێت، بەو پێیە ماوەیه‌کی درێژ راهێنەران لە  قۆناغی دروست کردنی سترکتور و شیوازی یاریی کردندا مانه‌وه‌ که‌ هاوکاته‌ بۆ دۆزینەوەو دارشتنی جیاواز بۆ یاریی کردن.

بەڵام ئەمە تا سەر نەبوو، چونکە  لە کۆتاییدا هیلینۆ هێرێرا پەیدا بوو…. هیلێنۆ هێرێرای ڕاهێنەری گراندی ئینتەر و بەرشلۆنه‌ کۆمەڵێک بیرۆکەی یاخییانەی هەبوو بۆ چۆنێتی خۆ ئامادە کردن بۆ ڕووبه‌ڕوبونه‌وه‌کان.

بەشێوەیەک لە شێوەکان لەگەڵ هێرێرادا بە تەواوەتی چەمکی دەروناسی و مینتاڵی متوربەی چەمکی ڕاهێنەرایەتی کرا، ئیدی لەگەڵ ئەودا گرنگییەکی زیاتر درا بە لایەنی دەروونی و مێنتاڵی یاریزان، هەر لەم قۆناغەدا چەمکی راهێنەر گۆڕا بۆ ڕاهێنەرەکان، بەو پێیە ئیدی ستافێک لە ڕاهێنەر ئەرکی ڕاهێنەرایەتییان گرتبووە دەست.

لەگەڵ دەست پێکردنی ئەم قۆناغەدا ئیدی وردە وردە تاکو دەگاتە ئێستای تۆپی پێ چەمکی ڕاهێنەرایەتی فراوانتر بوو بە ڕادەیەک کە به‌ تاکە ڕاهێنەرێک نەدەکرا هەموو ڕەهەندەکانی ئەم چەمکە پڕ بکرێتەوە، چونکە چەمکی راهێنەر لەخۆیدا مانای زۆر هەڵدەگرێت.
ڕاهێنەر دەبێت مامۆستا بێت، بەخێوکەر بێت ، ڕێنیشاندەر بێت، باوک بێت، لە کۆتایشدا خودی راهێنەر بێت، واتا یاریزان ڕابهێنێت لەسەر کۆمەڵێک بیرۆکە و شێوازی یاریی کردن، جگە لەلایەنی تاکتیکی و تاکنیکی هەروەها لایەنی دەرونی و مێنتاڵی زیادیان کرد بۆ یارییه‌کە، کە ئەمانەش بۆخۆیان پێویستیان بە کەسی پسپۆڕ بوو لە بوارەکەدا تاکو بە تەندروسترین شێوە یاریزانەکان ڕابهێنن و ئاشکرا بوو کە تاکە کەسێک ناتوانێت ئەرکەکە بەڕێوەببات و پێویستە ستافێكی گەورە بەرپرسیارێتی کارەکە بگرێتە ئەستۆ..
لەم قۆناغەوە کۆمەڵێک ڕاهێنەر یارمەتی ڕاهێنەری یەکەمیان دەدا و پێیان دەوترا یاریدەدەری ڕاهێنەر، هاوکات وردە وردە ڕاهێنەری یەکەم دووردەکەوتەوە لە مانا سروشتی و بنەڕەتییه‌کەی خۆی.

.لە ئێستادا ڕاهێنەری یەکەمی تۆپی پێ تاڕادەیەک خۆی بەستۆته‌وە بە چەمکی ڕەهێنەره‌وه‌، بەڵام وەکو ١٥ ساڵ یاخود ٢٠ سال پێش ئێستا نا، به‌ڵکو لە دنیای حازری تۆپی پێدا راهێنەری یەکەم دەیەوێت یاریزانەکانی هەمیشە لە ئامادەباشییدا بن، هه‌روه‌ها دەیەوێت یاریزان پێکانی نەبێت، یاخود هیچ بارودۆخێکی دیکەی نەبێت کە ڕێگر بێت له‌به‌رده‌م کاره‌که‌یدا، جگە لەوەی لە ئێستادا ڕاهێنەری یەکەمی تۆپی پێ وەکو ئەستێرەیەک مامەڵەی لەگەڵدا دەکرێت بەشێوەیەک زۆرجار سەرنج و چاوەکان لە یاریزانەکان دەدزێت و دەیخاتە سەر خۆی، خودی ئەم خاڵەش یەک ناگرێتەوە لەگەڵ ئەو مانا پیرۆزەی کە ڕاهێنەر هەیەتی کە ئەویش ئەوەیە قوربانیدەر بێت، لە پشتەوەی پەردە بمێنێتەوە و تەنها چێژ لە سەرکەوتنی یاریزانەکانی وەربگرێت.

“ماکالێلی باسی حاڵی مۆرینیۆ ده‌کات”

کلۆد ماکالێلی یاریزانی پێشووی فەرەنسا و چێڵسی لە بایۆگرافێکەی خۆیدا باسی جوزێ مۆرینیۆ دەکات و دەلێت :”راهێنەرێکی ژیرە، ڕاهێنەرێکە دەزانێت چۆن باشترین ئاست لە یاریزاندا دەربخات، بەڵام دەشزانێت چۆن یاریزان بڕوخێنێت، مۆرینهۆ ڕاهێنەرێک نییە کە یاریزان دروست بکاتەوە یان یارمەتی یاریزان بداتەوە بۆ ئەوەی هەستێتە سەر پێی، ئەو یاریزانی ئامادەکراوی دەوێت و گەر ئامادە نیت مۆرینهۆ زۆر بەسادەیی دەتخاتە سەر کورسی یەدەگ”.
ئه‌ستێره‌ ڕه‌ش ئه‌سمه‌ره‌که‌ی فه‌ره‌نسا درێژەی پێدەدات و دەلێت :” مۆرینیۆ هیچ ئەستێرەیەکی ناوێت لە تیپەکەیدا، هەر کە هەستی کرد یاریزانێک لە خۆی زیاتر تیشکی دەخرێتە سەر یەکڕاست دژایەتی دەکات و دەیەوێت دووری بخاتەوە لە چاوی میدیا”.

ئەم پێناسەیه‌ی ماکالێلی تەنها بۆ مۆرینهۆ دروست نیە، بەڵکو بۆ زۆربەری هەرە زۆری راهێنەرەکانی دیکەی ئەم سەردەمە دروستە، بۆنمونە گەر گواردیۆلا و مانچینی یاخود هەر ڕاهێنەرێکی دیکەی لەو ڕاهێنەرە ناودارانە ببنە ڕاهێنەری یانەیەکی ئاست مامناوەند و ئەنجامی باش بەدەست بهێنن، ئاخۆ ئەوە یاریزانە ئاست مامناوەندەکانە کە ستایش دەکرێن، یاخود ڕاهێنەرەکانە ؟ بێگومان ڕاهێنەرەکان ئەو ستایشە وەردەگرن، وە نمونەیشمان زۆرە وەکو: کلۆپ و سیمیۆنی و ئیمێری و مانچینی و مۆرینیۆ کە لەگەڵ یاریزانی نەناسراو و ئاست مامناوەندا کاریان کردووە و ئەنجامیان بەدەست هێناوە و لە کۆتایدا بوونەتە پاڵەوانی یەکەمی داستانەکان.
بەهەرحاڵ، بەبێ ئەوەی بچینە نێو پاساو و بیانوی ئەو بارودۆخانەی کە وا دەکات هەر ڕاهێنەرێکی ئەم سەردەمە ببێتە ڕاهێنەرێکی لەو جۆرە، لە بنەڕەتدا کار و ئەرکی راهێنەر بە تەواوەتی لە دژیەکیدایە لەگەڵ ئەوەی کە ڕاهێنەری ئێستا نوێنەرایەتی دەکات، ڕاستییه‌که‌ ئه‌وه‌یه‌ که‌ لە ئەمڕۆی تۆپی پێدا زۆربەی زۆری ڕاهێنەرەکان زیاترله‌ناوی ڕاهێنەر به‌کارده‌هێنن، چونکە زۆر بە سادەیی باشترین یاریزانەکان بەکاردەهێنن بۆ کردنی ئەو کارەی خۆیان دەیانه‌وێت، وەهەر یاریزانێک بۆ ئەم ئەرکە ئامادە نەبوو ئەوا زۆر بە سانایی فڕێدەدرێتە دەرەوی بوارەکە.

لە ئەنجامی  ئەم گۆڕانە کارەساتبارەی کە هاتووەتە به‌سەر چەمکی راهێنەری یەکەمدا، لە ئێستادا پێویستە کەسێکی دیکە یاخود کۆمەڵە کەسێكی دیکە پیشەی ڕاهێنەرایەتی بگرنە ئەستۆ، بۆ ئەم مەبەستە پێویستە هەندێک بگەڕێینەوە بۆ دواوە و ئەوە بەبیری خۆمان بهێننیەوە کە لە قۆناغێکدا ستافێک لە یاریدەدەری راهێنەر یارمەتی ڕاهێنەری یەکەمیان دەدا.
ئەرک و کاری ئەم ستافەش بەپێی بیربۆچونی ڕاهێنەری یەکەمی تیپەکە دەگۆڕێت، هەندێک ڕاهێنەر ئازادییەکی زۆر دەدات بە ستافەکەیی و هەندێک راهێنەر ستافەکەی دەخاتە ژێر چاودێرییەکی توندەوە، هەندێکیشیان لەبنەڕەتدا هەر لەگەڵ ستافەکەی خۆیدا پلە بە پلە هەنگاوی ناوە لەنێو دنیای تۆپی پێدا بۆیە زیاتر لە پەیوەندیەکی هاوڕێیه‌تیدان، بەڵام خاڵی هاوبەش لە نێوان هەموو ڕاهێنەر و یاریدەدەرەکانی بریتییه‌ له‌ وتوێژ و گفتوگۆکردن و ڕێکخستنی یاریگا بۆ مەشقی جۆراوجۆ، هەروەها زۆرجار یاریدەدەر یاخود یاریدەدەرەکان کار لەگەڵ ئەو یاریزانانە دەکەن کە لە ماوەی مەشقەکاندا ڕاهێنەری سەرەکی سەرنجێکی کەمتریان دەخاتە سەر.

“له‌گه‌ڵ ڤان گال ته‌نها ته‌ماشاکه‌ربوم”

مۆرینیۆ که‌ یاریده‌ده‌ری بۆبی رۆبسۆن و لویس ڤان گال بوو لە بەرشلۆنه‌، دەربارەی ماوەی کارکردنی لەگەڵ ئەو دوو ڕاهێنەره‌، دەلێت:” لەگەڵ ڕۆبسۆندا هەموو شتێک خۆم ڕێکمدەخست، ئەو دەهات بۆ ڕاهێنانه‌کان و دەیوت خۆسێ ئەمڕۆ چی بکەین؟ منیش دەمگوت سەرۆک ئەمە دەکەین و ئەوە دەکەین، بابچین چێژ وەربگرین، لەبەرامبەردا ڤان گال بە تەواوەتی پێچەوانە بوو، ئه‌میان دوو کاتژمێر پێش ڕاهێنانەکان دەهات و هەموو شتێكی بە وردیەکی زۆرەوە ڕێکدەخست، لەگەڵ ڤانگال دا من ڕاهێنانەکانم نەدەوتەوە، بەڵکو تەنها تەماشاکەرێک بووم”.

لەڕێی وته‌کانی مۆرینیۆوە بە جوانی تێدەگەین لە رۆڵ و کاری یاریدەدەری ڕاهێنەر لە دنیای تۆپی پێدا، چونکە بە شێوەیەکی گشتی راهێنەرەکان بەم دوو شێوەیە مامەڵە دەکەن لەگەڵ یاریدەدەرەکانیان…

ئەگەر بگەڕێینەوە سه‌ر ئه‌م سه‌رده‌مه‌ی تۆپی پێ، ده‌بینین ستافی یاریدەدەری ڕاهێنەر لە ئێستادا  لەسەر ئاستی ئەرک و بەرپرسیارێتی و کوالێتی گۆڕانکاری گەورەی بەسەردا هاتووە، ئەمڕۆ وەکو یاریدەدەری ڕاهێنەر دەبێت پسپۆڕبیت لەو شێوازی یارکردن و ئه‌و فەلسەفەیه‌ی کە ڕاهێنەری یەکەم پەیڕەوی دەکات، زۆرجار ستافی یاریدەدەری ڕاهێنەر دەستیان هەیە لە دیزاین کردنی راهێنانەکان و دواتریش داڕشتن و رێکخستنی یاریگا و چۆنێتی بەئەنجام گەیاندنی ڕاهێنانەکان.
حاڵی حازر ستافی یاریدەدەران ژمارەیان زۆر زیادی کردووه‌، بەجۆرێک زۆرجار لە سەروی (١٠) یاریدەدەرن.
بۆنمونە: یەکێکیان یان دووانیان بەرپرسن لە شیکردنەوەی یارییه‌کانی تیپی بەرامبەر بە ڤیدیۆ، هەروەها لە کاتی بەڕێوە چوونی یارییه‌کاندا لەدانیشتگای یاریگاوە تەماشایی ڕووبه‌ڕوبونه‌وه‌کان دەکەن و لێکدانەوەی خۆیان بۆ حاڵەتە تاکتیکییه‌کان دەکەن، دواتر لە نێوان هەردوو گێمەکەدا بۆ راهێنەری دەنێرن تاکو سودیان لێوەربگرێت.
هەر لە نێو ئەو کارانەی کە دەکەوێتە سەرشانی ستافی یاریدەرانی ڕاهێنەر، ڕۆیشتنە بۆ تەماشا کردنی یاریی تیپەکانی دیکە و هێنانەوەی راپۆرتی پوختە دەربارەی ئەو یانانە بۆ ڕاهێنەری یەکەم، وەکو دەبینین بەشێکی دیکە لەو هۆکارانەی وا دەکات ڕاهێنەری مۆدێرن ناوی بگۆڕێت بۆ بەڕێوەبەری تۆپی پێ بۆ ئەم داواکارییانە دەگەڕیتەوە کە زۆر زیادی کردووە لە جیهانی تۆپی پێدا، چونکە زۆری ئەو کار و بەرپرسیارێتیانەی کە کەوتۆتە سەر شانی ڕاهێنەر وایکردووە خودی چەمکەکە هێندە فراون بێتەوە کە بە تاکە کەسێک پڕنەکرێتەوە، لەگەڵ ئەوەشدا بەرای من دەبوو راهێنەری یەکەمی تیپەکە خۆی پەیوەست بکردایە به‌و بەشەی کە بریتیە لە بەخێوکردن و یارمەتیدان و دروست کردنی یاریزان، نەک بەڕێوەبردن و بەکارهێنان.

لە کۆتایدا دەبێت بوترێت کە  جیهانی راهێنەرایەتی زۆر قوڵ و چڕە، بەجۆرێک مۆرینیۆ دەڵێت :”یاریی تۆپی پێی لە ژوری کۆنگرەی ڕۆژنامەوانییەوە دەست پێدەکات و لەوێش تەواو دەبێت”.
مەبەست لێرەدا ئەوەیە کە ئەرک و کاری راهێنەر هێندە زۆرە کە دەبێت ئامادەکاریی بۆ کۆنگرەی ڕۆژنامەوانیش بەوردی بکات و وەکو یارییەکه‌ مامه‌ڵه‌ی له‌گه‌ڵدا بکات، لەگەڵ ئەوەشدا وەکوو دەبینین ئەرک و کارەکانی راهێنەر لە وڵات بۆ وڵات و لە کلتور بۆ کلتور دەگۆڕێت هاوکات بەهۆی گۆڕانی دنیای تۆپی پێ و فراوان بوونی چەمکەکە، هەرچەندە هەموو ستایش یاخود تانە و ڕخنەیەک بۆ راهێنەری یەکەم دەڕوات، بەڵام لە کۆتایدا کۆمەلێک خەڵکی زۆر بەرپرسن لەو بەرهەمەی له‌ کۆتایی وه‌رزدا ده‌چنرێته‌وه‌.
له‌کۆتاییدا ده‌توانین بڵێین، گرنگترین خاڵ ئەوەیە که‌ گۆڕانێکی ناشرین لە گرنگترین مانای ڕاهێنەرایەتیدا ڕوویداوە به‌ گۆڕینی سیفەتی یارمەتیدان و پێەگەیاندن بۆ بەکارهێنانی یاریزان و سود وەرگرتن لە تواناکانی بەبێ ئەوەی لەکاتی ناهەمواردا یارمەتی یاریزانەکە بدرێت، هه‌روه‌ها ئەم گۆڕانە بەهیچ شێوەیەک سود بەخش نیە بۆ یاری تۆپی پێ.

بەردەوام بە لە خوێندنەوە

کوردستان