ئێمە لە تۆرە کۆمەڵایەتیەکان

کوردستان

مامۆستایەكی ئایینی، داوایەك ئاڕاستەی لایەنە سیاسیەكان و هاووڵاتیان دەكات

خەڵك-ئارام سەردار

ئەمڕۆ سێ شەممە ٤ی حوزەیرانی ۲۰۱۹ لەشاری هەولێر، لەوتاری نوێژی جەژنی ڕەمەزان، مامۆستایەكی ئایینی داوا لەلایەنە سیاسیەكان دەكات، تەبا و برابن و بەیەكەوە هەمووان هاوكاربن بۆ حوكمڕانی وڵات.

دكتۆر مەولود خزر، وتارخوێنی مزگەوتی ئاڵتوون لەشاری هەولێر لەوتاری نوێژی جەژندا ڕایگەیاند، جەژن پەیامێكی پێیە، كە دەتوانین ژیانێكی بەختەوەر پێكبێنین، هەروەك چۆن دەتوانین دەوڵەتێكی تۆكمە دروست بكەین، ئەویش برایەتی و پێكەوە ژیانە، وەك چۆن پێغەمبەری خودا (د. خ) كاتێك چووە مەدینە برایەتی دروست كرد لەنێوان خەڵكی مەدینە و ئەوانی كۆچیان كردبوو و هاوكات لەنێوان ئەوس و خەزرەج ئەو برایەتیەی دروست كرد، ئەمەش لە پێناو خۆشبەختی هەمووان.

ئەو مامۆستا ئایینە دەشڵێت: “پێویستە جارێكی تر ئێمەش برایەتی خۆمان نوێ بكەینەوە و خۆشەویستیمان لەگەڵ یەكتر زیاتر بكەین، جەژنە پیرۆزە لەهەموو كەسێك بكەین و خۆمان لەكەس نەگرینەوە، چونكە جەژنیش واتە سەردانیكردنی یەكتر و گەردن ئازادیی لەیەكتر بكەین هەر كەسێك شتێكی بەرامبەر كردبین، چونكە خوداش لێمان خۆش دەبێت”.

لە پەیامێكیشدا بۆ لایەنە سیاسیەكان ڕایگەیاند، ئەمڕۆ سیاسەت و بەڕێوەبردنی حكومەت پێویستی بەبرایەتی هەیە، دەبێ ببن بەبرا تاوەكو بتوانن دەوڵەتێك دروست بكەن و لەیەكتر ببورن، ئەمەش پەیامی ئەو گەلەیە بۆ سیاسیەكان، بۆ ئەوەی حكومەت پێكبێنن و تەنازولكردنیش بۆ یەكتر گەورەیی و شەڕەفە لای خودا و مییللەت، حكومەتێك لەسەر برایەتی پێكبێنن، هەروەك چۆن كاتێك خودا داوای لە پێغەمبەر مووسا كرد بچێتە میسڕ ئەویش داوای لەخودا كرد هاڕوونی برای بكاتە پاڵپشتی و لەكاتی پێویست پشتیوانی بێت و لەكارەكانیشی بەشداربێت، بۆیە دەبێ لایەنە سیاسیەكان لەم ئایەتانە فێری بەشداری كردنی هەمووان بین و تاك لایەنە كارەكان نەكرێت، هەروەك خودا و مییللەتیش ئاوایان پێ خۆشە.

کوردستان

بەركەوتوویەكی چەكی كیمیایی داوای بەهاناوەچوونی بە پەلە دەكات

خەڵك – بەشی هەواڵ

كامیل عەبدولقادر كە یەكێكە لە بەركەوتووانی چەكی كیمیایی و بەهۆیەوە سییەكانی لەدەستداوە و لە ئێستادا بەمەبەستی وەرگرتنی چارەسەر لە وڵاتی ئەڵمانیایە، لە ئێستادا پزیشكەكان بڕیاری ئەوەیانداوە سییەكانی بۆ بگۆڕن، بەڵام بەهۆی ئەوەی كەسی لەگەڵدا نییە لەدوای نەشتەرگەرییەكەدا خزمەتی بكات، ژیانی لەمەترسیدایە و بەوهۆیەوە لە ڕێی تۆڕی كۆمەڵایەتی فەیسبوكەوە داوای هاوكاری بەپەلە لەدەسەڵاتدارانی عیراق و هەرێم دەكات بۆ وەرگرتنی ڤیزا بۆ منداڵەكانی تا لە مردن ڕزگاری بكەن.

دەقی نووسینەكەی كامیل عەبدولقادر:

لەبەر ئەوەی مەترسی زۆر هەیە لەسەر ژیانم لەڕووی تەندروستیەوە بەهۆی نەخۆشی لەكاركەوتنی سیەكانمەوە بەهۆی گازی خەردەلەوەو ئەگەر بگەڕێنرێمەوە بۆ عێراق ئەگەری مردنم هەیە ناچار ئەڵمانیا ڕازی بووە (مافی مانەوەی نەناردنەوە) م پێ بدات.

پزیشكە ئەڵمانیەكان لەبەر ئەوەی كۆتا ڕۆژەكانی تەمەنم بەڕێ دەكەم و خۆری تەمەنم ڕوو لەئاوابوونە ڕازی بوون بەوەی نەشتەرگەری چاندنی سیەكانم بۆ ئەنجام بدەن؛ بەڵام چەند مەرجێكیان بۆ داناوم، دوو مەرجیان ناتوانم بەتەنها خۆم جێ بەجێی بكەم:

یەكەم : فێربوونی زمانی ئەڵمانی و دووهەم : نەمانەوەمە لەكەمپداو نیشتەجێ بوونمە لەشوێنێكی تایبەتدا یاخود شوقەیەكی سەربەخۆدا بۆ ئەوەی لە كەسانی دیكەوە توشی نەخۆشی تری ڤایرۆسی و میكرۆبی نەبم لەحاڵەتێكدا كۆئەندامی بەرگری لەشم لاوازەو جەستەم توانای ڕووبەڕووبونەوەی نەخۆشی دیكەی نەماوە.

بۆ فێربوونی زمانی ئەڵمانی بەردەوام كۆشش دەكەم و پشتیوان بەخوا بەهاوكاری چەند دڵسۆزێك فێر دەبم؛ بەڵام بۆ دەرچوون لەم كەمپەدا زۆر پێویستم بە مناڵەكانمە كە لە بەرواری ۲۰۱۷/۱۱/۲۹ وە لێیان دابڕاوم و ناتوانم خۆم خزمەتی خۆم بكەم و بۆ هەموو شتێك پێویستم بەیەكێكە هاوكاریم بكات! .

لەئێستادا وێڕای باری تەندروستی زۆر خراپم بە هاوكاری هەندێك برای بەڕێز خۆم ژیانی ڕۆژانەی خۆم زۆر بەسەختی لەو كەمپەدا بەڕێ دەكەم ! .

ئەگەر بەهانامەوە نەیەن ئەو دوو مەرجەی پزیشكەكان لەسەریان داناوم هەرگیز جێ بەجێ نابێت، لەبەر ئەوە داوا لەدەسەڵاتدارانی عێراق و هەرێم دەكەم كە ڤیزا بۆ مناڵەكانم وەربگرن تاوەكو لەنزیكەوە چاودێریم بكەن و خزمەتم بكەن بەتایبەتی پاش ئەنجامدانی نەشتەرگەری چاندنی سیەكان بۆم .

لەحاڵەتێكدا نەشتەرگەریەكەم بۆ ئەنجام بدرێ و منداڵەكانم لام نەبن و خزمەتم نەكەن ڕەنجمان بەخەسار دەچێ و نەشتەرگەریەكە شكست دێنێ و مەترسی زۆر گەورەتر لەسەر ژیانم دروست دەبێت .

هێشتا چاوەڕێم گوفتارەكانتان بكەن بە كردارو بەهانامەوە بێن پێش ئەوەی گیان لەدەست بدەم؛ چونكە پاش مردنم دروشم و شیوەنی كەستانم ناوێ ! .

بەردەوام بە لە خوێندنەوە

ئابوری

كەلار.. دوو كەس دەستگیركران

خەڵك – بەشی هەواڵ

پۆلیسی كەلار دوو كەسی بە تۆمەتی فرۆشتنی خۆراكی بەسەرچوو دەستگیركرد، زۆربەشیان ئەو خۆراكانەن كە ڕۆژانە منداڵان دەیكڕن.

لەڕاگەیەندراوێكی لیژنە هاوبەشەكانی قائیمقامییەتی كەلار ڕاگەیەنراوە، لەلایەن لیژنە هاوبەشەكانی قائیمقامییەتی كەلارەوە، لە دوكانێكدا زیاتر لە 300 كیلۆ خۆراك و شیرینی خراپ و بەسەرچوو دەستیان بەسەردا گیرا و دوو كەسیش بە تۆمەتی فرۆشتنی ئەو خۆراكە دەستگیركران.

لە ڕاگەیەندراوەكەدا ئەوەشخراوەتەڕوو، دەستبەسەراگرتنی ئەو خۆراكانە بە هاوكاری پۆلیسی بەرەنگاربوونەوەی تاوان بووە كە زانیاریان هەبووە لەسەر ئەو شوێنكارە و دواتر لیژنەكانی قائیمقامییەتیان لێ ئاگاداركردەوە و خۆراكەكانیش زۆربەیان پێكهاتوون لە شیرینی و ئەوبابەتانەی مناڵان ڕۆژانە لە دوكانەكان دەیكڕن.

لیژنە هاوبەشەكانی قائیمقامییەتی كەلار ئاماژەی بەوەشكردووە، دەستگیركراوەكان هەردووكیان كوردن و دانیشتووی ڕۆژهەڵاتی كوردستانن و لە كاتی لێكۆڵینەوەدا دانیان بەوەداناوە ئەو خۆراك و بابەتە شیرینیانە لە كۆگایەكدا لە سنوری شاری كەلار دەیهێنن و دەیفرۆشنەوە و لە ئێستادا فەرمانی گرتن بۆ خاوەنی ئەو كۆگایەش دەرچووە.

بەردەوام بە لە خوێندنەوە

کوردستان

قوباد تاڵەبانی بۆ ئەمریكا: بۆ ئەنجامدانی چاكسازی پێویستمان بە یارمەتی ئێوەیە

خەڵك – بەشی هەواڵ

جێگری سەرۆك وەزیرانی ھەرێمی كوردستان بۆ ئەنجامدانی چاكسازی لە وەزارەتی پێشمەرگە داوای یارمەتی لە ئەمریكا دەكات.

قوباد تاڵەبانی جێگری سەرۆك وەزیرانی ھەرێمی كوردستان لەگەڵ وەفدێكی سەربازیی ئەمریكا بەسەرپەرشتی ژەنەراڵ گریگۆری كرودەر كۆبووەوە و تاووتوێی چۆنییەتی ئەنجامدانی چاكسازیی لەوەزارەتی پێشمەرگە و ھەماھەنگی زیاتریان كرد.

لە كۆبوونەوەكەدا باس لە شەڕی تیرۆر و ھەماھەنگی زیاتری نێوان پێشمەرگە و ھاوپەیمانان كرا، ھەردوولا ھاوڕابوون لەسەر ئەوەی پێشمەرگەو ھێزی ھاوپەیمانان بە ھەمان شێوەی كە لەشەڕی داعشدا ھەماھەنگ بوون، لە داھاتووشدا بە ھەماھەنگی زیاترەوە پێكەوە ڕووبەڕووی تیرۆر ببنەوە.

لە بەشێكی تری كۆبوونەوەكەدا، باس لە چۆنیەتی چاكسازیكردن لە وەزارەت و هێزەكانی پێشمەرگە كرا و جێگری سەرۆك وەزیران جەختی لەسەر پێویستی بەردەوامبوونی یارمەتییەكانی ئەمریكا بۆ ئەنجامدانی چاكسازی لە وەزارەتی پێشمەرگە كردەوە.

بەردەوام بە لە خوێندنەوە

کوردستان