وەزارەتی تەندروستی سوریا ڕایدەگەیەنێت، ژمارەی کوژراوانی بوومەلەرزەکە بۆ 430 کەس بەرزبووەتەوە، هەروەها 1284 کەسیش لە لازقیە و حەلەب و حەما و تارتووس برینداربوون و ژمارەیەك هاووڵاتیش نادیارن.
د.ئەحمەد دەمیریە بۆ ئاژانسی فەرمی سوریا (سانا) ڕایگەیاند، 4 بارهەڵگر پڕ لە دەرمان و پێداویستی نەشتەرگەری و فریاگوزاری ڕەوانەی حەلەب، لازقیە و حەما کراون، جگە لە ناردنی کاروانی پزیشکی لە بەڕێوەبەرایەتییە تەندروستییەکانی دیمەشق، ڕیف دیمەشق، قونەیترە، حومس و تەرتووس بۆ پارێزگاکانی حەلەب و لازقیە.
ئاماژەی بەوەشكرد، ٢٨ ئەمبولانس و ٧ کلینیکی گەڕۆک لە دیمەشق و ڕیف دیمەشق و قونەیترە و حومس و تەرتووسەوە، وەک پاڵپشتییەک بۆ حەلەب و لازقیە نێردراون.
ئاماژەی بەوەشكرد، کە ژووری بەڕێوەبردنی فریاکەوتن لە وەزارەتی تەندروستی بەشێوەیەکی کاتی و پێشوەختە هەڵسەنگاندن بۆ دۆخەکە دەکات.
ڕوونیشی کردەوە، کە سەرجەم دامەزراوە تەندروستییە حکومی و ئەهلییەکان لە دۆخی ئاگاداری بەردەوام لە هەموو پارێزگاکان.
وتیشی، ” کاروانە پزیشکییەکان لە پارێزگاکان چركە بە چركە بەڕێ دەكرێن، (ئەمبولانسی پڕ لە دەرمان بە کارمەندەکانەوە و کلینیکە گەڕۆکەكان و کارمەندەکانیان، دابینکردنی ئۆتۆمبێل کە پێداویستی و دەرمانی فریاگوزاری و نەشتەرگەری لەخۆدەگرێت) و ناردنی ئەوان بۆ ناوچە زیانلێکەوتووەکان.
