ئێمە لە تۆرە کۆمەڵایەتیەکان

ئابوری

“تائێستا یەك بەرمیلی نەوتی ڕادەست نەكردووە”
داوا لە هەرێم دەكرێت پێنج ملیار دۆلار ڕادەستی بەغدا بكات

خەڵك- بەشی هەواڵ
پەڕلەمانتارێكی فراكسیۆنی نەهجی نیشتمانی لە پەڕلەمانی عیراق، داوا لە حكومەتی هەرێمی كوردستان دەكات، پێنج ملیار دۆلار وەك داهاتی نەوت و خاڵە سنورییەكان ڕادەستی بەغدا بكات، جەختیش لەسەر پێویستی جێبەجێكردنی دەقەكانی دەستور دەكاتەوە.

ئەمڕۆ چوار شەممە، حازم خالیدی، پەڕلەمانتاری فراكسیۆنی نەهج لە پەڕلەمانی عیراق، لە كۆنفرانسێكی ڕۆژنامەوانیدا ڕایگەیاند، “داوا لە سەرۆك وەزیران و وەزیری دارایی حكومەتی فیدڕاڵ و حكومەتی هەرێم دەكەین، پابەندی دەقەكانی دەستور و پێوەرەكانی دادپەروەریی كۆمەڵایەتی بن، كە شێوازی دابەشكردنی داهاتە داراییەكان لە سامانی سروشتی بەسەر عیراقییەكان بە یەكسانی و بەپێی ڕێژەی دانیشتوان دیاری دەكەن”.

بە وتەی حازم خالیدی، “لە بودجەی 2019، حكومەتی هەرێم پابەندكراوە ڕۆژانە 250 هەزار بەرمیل نەوت ڕادەستی كۆمپانیای سۆمۆ بكات، وێڕای ئەوەی بەرهەمی ڕۆژانەی هەرێم لانی كەم 600 هەزار بەرمیل نەوت دەبێت، ئەمەش بەشەرعیكردنی بەهەدەردانی سامانی گشتی هاوبەشە، كە مافی هەموو عیراقییەكانە”.

ئەو پەڕلەمانتارە دەڵێت: “لەگەڵ ئەوەی هەرێمی كوردستان داهاتەكان ڕادەستی حكومەتی فیدڕاڵ ناكات، ڕێگە لە لایەنە چاودێرەكانی حكومەتی فیدڕاڵ دەگرێت تا لەبارەی بڕ و چۆنیەتی خەرجكردنی ئەو داهاتانە ئاگاداربن و بزانن ئەو پارانە چۆن خەرج دەكرێن، ئایا بەشێوەیەكی دروست خەرج دەكرێن یان بە تاڵان دەبرێن لەلایەن گەندەڵكارانەوە”.

خالیدی بەپێویستی دەزانێت، “هەرێم بە ماددەی دەیەمی بودجەوە پابەند بكرێت، چونكە موجامەلە سیاسییەكان گەیشتوونەتە ئاستێكی نەخوازراو، بۆیە پێویستە هەرێم بڕی (پێنج ملیار دۆلار) ڕادەستی حكومەتی فیدڕاڵ بكات”.

ئەو ئەندامەی پەڕلەمانی عیراق، داوای جێبەجێكردنی دەقەكانی دەستور و پێوەرەكانی دادپەروەری و پابەندكردنی حكومەتی هەرێمی كرد بە ڕادەستكردنی داهاتەكانی نەوت و خاڵە سنورییەكان، جەختیشی لەسەر پێویستی گرتنەبەری ڕێوشوێنی گونجاو كردبوو لەلایەن پەڕلەمانەوە بۆ زامنكردنی ئەو كارە.

ئابوری

كاتی دابەشكردنی مووچەی خانەنشینان ڕاگەیەنرا

خەڵك- بەشی هەواڵ
دوابەدوای گەیشتنی پارە لە بەغداوە بۆ مووچەی مووچەخۆرانی هەرێم، بڕیارە لەم هەفتەیەدا مووچەی خانەنشینان-یش دابەش بكرێت.

سەرچاوەیەك لە گەنجینەی سلێمانی بۆ (خەڵك) ئاماژەی بەوەكرد، بەهۆی ئەوەی پارەی مووچە لە بەغداوە گەیشتۆتە هەرێم، وەزارەتی دارایی بڕیاریدا بە دوو ڕۆژ مووچەی مانگی 6ی سەرجەم وەزارەتەكان بە هەر سێ‌ سەرۆكایەتییەكەوە دابەش بكات.

ڕاشیگەیاند، هەر لە هەفتەی داهاتوودا دوای وەزارەتەكان، مووچەی خانەنشینان دابەش دەكرێت و كۆتایی بە دابەشكردنی مووچە دێت.

ئاشكراشی كرد، ڕۆژی سێ‌ شەممە مووچەی خانەنشینانی سەربازی و ڕۆژی چوار شەممە مووچەی خانەنشینانی شارستانی دابەش دەكرێت.

بەردەوام بە لە خوێندنەوە

ئابوری

بەوێنە؛ چەند شەقام و گەڕەكێكی سلێمانی قیر دەكرێنەوە

خەڵك- بەشی هەواڵ
شارەوانی سلێمانی ڕایدەگەیەنێت، كە هەڵمەتی چاككردن و نۆژەنكردنەوەكەی شەقام و گەڕەكەكانی شاری سلێمانی بەردەوامە.

سەرۆكایەتی شارەوانی سلێمانی لە ڕأگەیەنراوێكدا ئاماژەی بەوەكردووە، كە هەڵمەتی چاككردن و نۆژەنكردنەوەكەی شەقام و گەڕەكەكانی شاری سلێمانی بەردەوامە و بۆ ئەو مەبەستەش شەقامی نێوان گەڕەکی فەرمانبەران و گەڕەکی زەرگەتەی کۆن قیر كرایەوە.

ڕاشیگەیاندووە، سەرۆكایەتی شارەوانی سلێمانی بە هەماهەنگی بەشی ئامێرەكان كاری چاككردنی شەقامی سەرەكی گەڕەكی (كارێزەوشك)ی ئەنجامدا.

پێشتر زەردەشت ڕەفیق، وتەبێژی شارەوانی سلێمانی بۆ (خەڵك) ئاماژەی بەوەكرد، كە لە مانگی نیسانەوە و دوای كۆتایی هاتنی وەرزی باران بارین هەڵمەتی قیكردنەوە دەستی پێ‌ كردووە و تا مانگی كانوونی یەكەم و دەستپێكردنی باران بەردەوام دەبێت.

بەپێی زانیارییەكانی (خەڵك) شارەوانی لە هەوڵی دۆزینەوەی ڕێگاچارەیەكە بۆ هێنانی جۆرێكی قیر، كە لە وەرزی باران و سەرماشدا پڕۆسەكە ڕانەگیرێت و نۆژەنكردنەوەی شەقام و كۆڵانەكان بەردەوام بێت.

بەردەوام بە لە خوێندنەوە

ئابوری

حكومەتی هەرێم چەند بڕیارێك بۆ فەرمانبەران دەردەكات

خەڵك- بەیش هەواڵ
حكومەتی هەرێم چەند بڕیارێك سەبارەت بە دامەزراندن و گواستنەوە و تەنسیب-ی فەرمانبەران و پلەبەرزكردنەوە و درێژكردنەوەی تەمەنی خانەنشینی و كڕینی ئۆتۆمبێل دەردەكات و جەختیشدەكاتەوە، كە ئەو نووسراوانەی تایبەتن بەو بابەتانە ئارٍاستەی سەرۆكایەتی حكومەت نەكرێن.

بەپێی نووسراوێكی سەرۆكایەتی دیوانی ئەنجوومەنی وەزیرانی هەرێم، كە واژۆی ئومێد سەباح-ی لەسەرە و وێنەیەكی دەست (خەڵك) كەوتووە، ئاماژە بەوەكراوە، بەڕەچاوكردنی بارودۆخی دارایی هەرێم و ڕێكخستنەوەی میلاكات و خەرجیەكان، پێویستە سەرجەم وەزارەت و فەرمانگەكان پابەندی ئەوەبن، ئەو جۆرە نووسراوانەی ناوەڕۆكەكەیان ئەو بابەتانەی خوارەوە لەخۆدەگرێت ئارٍاستەی ئەم سەرۆكایەتییە نەكرێت، بەپێچەوانەوە نووسراوەكان وەرناگیرێن و دەنێردرێنەوە بۆتان.

بەپێی نووسراوەكە، نابێت داواكاری دامەزراندن بنێردرێت بۆ سەرۆكایەتی ئەنجوومەنی وەزیران تا ئەو كاتەی لە چوارچێوەی یاسای بودجەی ساڵانەدا لەلایەن ئەنجوومەنی باڵای ڕاژەوە ڕێكدەخرێت، هەروەها نابێت داواكاری گەڕانەوە بۆ ڕاژەی سەربازی و شارستانی بكرێت، تەنها ئەو فەرمانبەرانە نەبێت، كە بەهۆی حوكمی دادگا لە ڕاژە دابڕاون.

هەر بەپێی ئەو نووسراوە، نابێت داواكاری بەرزبكرێتەوە بۆ درێژكردنەوەی خزمەتی ئەو فەرمانبەرانەی ماوەی یاساییان تەواو بووە.

جەختیشكراوەتەوە، كە نابێت بەدەر لە ڕێنماییەكان پلەبەرزكردنەوە بۆ فەرمانبەران بكرێت و نابێت گواستنەوە و تەنسیبی فەرمانبەران لە دەرەوە بۆ ناوەوەی هەرێم بكرێت و ناشبێت گواستنەوەی ڕاژە لە یاسای خزمەتی سەربازی بۆ یاسای خزمەتی شارستانی و بە پێچەوانەشەوە بكرێت.

بەردەوام بە لە خوێندنەوە

کوردستان