ئێمە لە تۆرە کۆمەڵایەتیەکان

جیهان

ئێران، سعودیە بە بۆردوومانكردنی باڵیۆزخانەی ئەمریكا لە بەغدا تۆمەتباردەكات

خەڵك– بەشی هەواڵ

سەرۆكی لیژنەی ئاسایشی نیشتمانی لە پەرلەمانی ئێران ئاماژەبەوەدەكات، حكومەتی ڕیاز لەپشت بۆردوومانكردنی باڵیۆزخانەی ئەمریكایە لە بەغدا.

حیشمەتوڵا فەلاحەت پیشە سەرۆكی لیژنەی ئاسایشی نیشتمانی لە پەرلەمانی ئێران لە جریوەیەكدا لە هەژماری تایبەتی خۆی لە تۆڕی كۆمەڵایەتی تویتەر نووسیویەتی، ئەو مووشەكەی ڕۆژی 19ی ئایار ئاڕاستەی باڵیۆزخانەی ئەمریكا كرا لە بەغدا، پەیوەندی بە وڵاتی سعودیەوە هەیە و وتیشی، ئاڕاستەكردنی ئەو مووشەكە و دواتر كۆكردنەوەی لێپرسراوانی دەوڵەتانی عەرەبی بەشێكە لە سیاسەتی گێرەشێوێنی لێپرسراوانی ڕیاز.

حیشمەتوڵا فەلاحەت پیشە ئاماژەی بەوەشكرد، ئیدارەی واشنتۆن خیانەت لە گەلی ئەمریكا دەكات و سیاسەتەكانی دۆناڵد ترەمپ بە پشتیوانیكردنی سعودیە هاووڵاتیانی ئەمریكا دووچاری مەترسی دەكاتەوە.

جێی ئاماژەیە، دوابەدوای ئەو هێرشە مووشەكییەكەی كرایە سەر باڵیۆزخانەی ئەمریكا لە بەغدا، شا سەلمان بن عەبدولعەزیز پادشای سعودیە لە بانگهێشتنامەیەكیدا بۆ سەرۆكی سەرجەم وڵاتانی عەرەبی داوایكرد بەمەبەستی تاووتوێكردنی بارودۆخ و ئاڵۆزییەكانی ناوچەكە، ڕۆژی پێنج شەممە، 30ی ئایار لە شاری مەككە كۆببنەوە.

جیهان

ڕوحانی مەرجی دانوستان لەگەڵ ئەمریكا ئاشكرا دەكات

خەڵك – بەشی هەواڵ

سەرۆك كۆماری ئێران ڕایدەگەیەنێت، ئەگەر ئەمریكا خوازیاری دانوستانە، پێویستە سزاكان ڕابگرێت و دان بەدەسەڵاتی ئێراندا بنێت.

حەسەن ڕوحانی سەرۆك كۆماری ئێران لەدوای كۆبوونەوەی ئەنجومەنی وەزیران لە تاران، بە ئاماژەدان بە “دۆناڵد ترەمپ سەرۆكی ئەمریكا”، ڕایگەیاند، دانیشتن لەسەر مێزی دانوستان لەگەڵ كەسێك كە گوشاری خستووەتە سەر ئێران، جگە لە خۆڕادەستكردن هیچی تر نییە و وتی: “ئەگەر ئەمریكا دانوستانی دەوێت و لەوبارەیەوە سەرڕاستە، پێویستە كەشی دانوستان بسازێنێت. بۆ ئەمەش دەبێت سەرجەم سزاكان ڕابگرێت و دان بە دەسەڵاتی ئێراندا بنێت كە بە دەنگی گەلانی ئێران هاتووەتە بوون”.

سەرۆك كۆماری ئێران وتیشی، كرۆك و بناغەی ڕێككەوتننامەی ئەتۆمیی بەندە لەسەر پەیوەندییە بازرگانیی و ئابوورییەكانی ئێران لەگەڵ وڵاتانی جیهان، بەڵام ئەمریكا و هاوپەیمانە دژبەرەكانی تاران، زیانیان بەمە گەیاندووە.

حەسەن ڕوحانی ئەوەشیخستەڕوو، ئاژانسی نێودەوڵەتی وزەی ئەتۆم، پشكنینەكانی خۆی پەیوەست بە ڕێككەوتننامەی ئەتۆمیی ئەنجامداوە و دامەزراوەكە ئەوەشی ڕاگەیاندووە كە چالاكییە ئەتۆمییەكانی ئێران ئاشتییانەن.

بەردەوام بە لە خوێندنەوە

جیهان

ترەمپ لە ڕێی تویتەرەوە وەزیر دادەمەزرێنێت

خەڵك – بەشی هەواڵ

سەرۆكی ئەمریكا كەسێكی تری بۆ پۆستی وەزیری بەرگریی وڵاتەكەی لە جێگەی پاتریك شاناھان دامەزراند.

دۆنالد ترەمپ سەرۆكی ئەمریكا لە جریوەیەكدا لە تۆڕی كۆمەڵایەتی تویتەر بڵاویكردەوە، “مارك ئێسپەر وەك وەزیری نوێی بەرگری بەوەكالەت دادەمەزرێت”.

ھاوكات ترەمپ سوپاسیشی دەكات كە ئامادەبووە ئەو پۆستە نوێیە وەربگرێت، ئاماژەی بۆئەوەشكردووە، گومانی نییە بەرامبەر بەوەی كە ئێسپەر بەسەركەوتوویی كارەكانی جێبەجێ دەكات.

جێی ئاماژەیە، دوای دەستلەكاركێشانەوەی جەیمس ماتیس لە پۆستی وەزیری بەرگریی بەھۆی ناكۆكییەكانیەوە لەگەڵ ترەمپ لەبارەی كشانەوەی ھێزەكانی ئەمریكا لە سوریا، پاتریك شاناھان لەو پۆستەدا بە وەكالەت دەستبەكاربوو.

بەردەوام بە لە خوێندنەوە

جیهان

ساركۆزی دادگایی دەكرێت

خەڵك – بەشی هەواڵ

بەتۆمەتی ئەنجامدانی گەندەڵی سەرۆكی پێشووتری فەڕەنسا دادگایی دەكرێت.

میدياكانی فەڕەنسا بڵاویانكردەوە، دادگای فەڕەنسا بڕیاریدا نیكۆلا ساركۆزی سەرۆكی پێشووتری وڵاتەكەی بەتۆمەتی گەندەڵی و خراپ بەكارهێنانی دەسەڵاتەكانی بداتە دادگا و بڕیارەكەش یەكلابووەتەوە و دەرفەتی تێهەڵچوونەوە لە بڕیارەكەدا نەماوە.

بڕیاریشە لەچەند مانگی داهاتوودا لە پاریس پڕۆسەی دادگایی نیكۆلا ساركۆزی بەڕێوەبچێت ئەوەش یەكەمین جارە لەمێژووی سەردەمی كۆماریدا سەرۆكێكی فەڕەنسا بەتۆمەتی گەندەڵی بدرێتە دادگا.

وەك میدیاكان ئاماژەیان پێكردووە، گومان دەكرێت لە سەرەتای ساڵی 2014دا و لەڕێگەی پارێزەرەكانییەوە، نیكۆلا ساركۆزی سەرۆكی پێشووتری فەڕەنسا داوای لەدادوەرێكی باڵای وڵاتەكەی كردبێت زانیاری نهێنی پێبدات لەسەر كەیسی ژنێكی ملیاردێر كە كۆمەكی دارایی پێشكەش بەپارتەكەی ساركۆزی كردووە.

بەردەوام بە لە خوێندنەوە

کوردستان