ئێمە لە تۆرە کۆمەڵایەتیەکان

عێراق

“تەپڵی شەڕ لێدەدرێت”
(خەڵك) هەڵوێستی سەدر بۆ شەڕی نێوان ئەمریكا و ئێران ئاشكرادەكات

 

خەڵك- بەشی هەواڵ
هاوپەیمانی سائیرون، كە لەلایەن موقتەدا سەدر، ڕابەری ڕەوتی سەدرەوە سەركردایەتی دەكرێت پێیوایە لەمڕۆدا تەپڵی شەڕ لێدەدرێت لە ناوچەكەدا و هەردوو لایەنی ئێران و ئەمریكاییش خۆیان بۆ ئەو جەنگە تاودەدەن، ئاماژە بەو هەڕەشە و مەترسیانەش، دەكات كە ڕوو لە عیراق دەكەن گەر ئەو جەنەگ ڕووبدات.

عەلی سەعدون، پەڕلەمانتاری هاوپەیمانی سائیرون، لە لێدوانێكی تایبەت بە (خەڵك) ڕایگەیاند، “هاوپەیمانی سائیرون كار لەسەر ئەو خاڵە دەكات، كە عیراق نەبێتە لایەنێك لەو ململانێیەی لە ناوچەكەدا ڕوودەدات و دەبێت ڕێگە بگیرێت لەو هەموو ئەو هەوڵانەی بۆ تەڕەفگیری دەخرێنەگەڕ”، چونكە بە وتەی ئەو، عیراق زۆری بەدەست جەنگ و تەنگژە و قەیران و پێشێلكاری سەروەریی وڵاتەكەیەوە چەشتووە.

پەرلەمانتارەكەی هاوپەیمانی سائیرون دەڵێت: “نابێت ڕێگە بدەین عیراق ببێتە گۆڕەپانی جەنگ و ململانێ‌ بۆ وڵاتان و بۆ یەكلایی كردنەوەی حیساباتی ئەوانی تر، لەگەڵ ئەوەشدا نابێت حكومەتی عیراقی پشتیوانی لە هیچ لایەنێكی ململانێكان بكات، بەپێچەوانەوە گەر لایەنگری لایەنێكی كرد، ئەوا بەرەنجامەكان خوازراو نابن”. بەپێویستیشی زانی حكومەتی عیراق بەو پەڕی تواناوە كار بۆ دوورخستنەوەی مەترسییەكانی ململانێكە بكات لە وڵات.

بە وتەی عەلی سەعدون، ” ئەمریكاییەكان عیراق بەرەو لای خۆیان ڕادەكێشن تا پشتیوانی لە وڵاتەكەیان بكات و بە هەمان شێوە ئێرانییەكان، بەڵام ئێمە قبوڵمان نییە عیراق پشتیوانی لە هیچ كام لەو دوو لایەنە بكات، كە هەریەكەیان بەرژەوەندی و خواستی تایبەت بە خۆی هەیە لەو كێشمەكێشم و ململانێیەی ئەنجامی دەدات”.

سەبارەت بە هەڵوێستی موقتەدا سەدر، ڕابەری ڕەوتی سەدر، ئەو پەڕلەمانتارەی هاوپەیمانی سائیرون، ڕەتینەكردەوە سیاسەتەكانی هاوپەیمانییەكەی بەدووربێت لە دید و بۆچوون و ڕێنماییەكانی سەدر، بەتایبەت ئەوەی پەیوەندی بە بێلایەنبوونی عیراقەوە لە ململانێكانی ئێستای ناوچەكە.

 

ئابوری

“بودجەی تەواوكاری دابەش دەكرێت”

خەڵك – بەشی هەواڵ

 

لیژنەی دارایی ئەنجومەنی نوێنەرانی عیراق ڕایدەگەیەنێت، بەهۆی بەرزبوونەوەی نرخی نەوت و دانانی نرخی كەمی خەمڵێنراوی نەوت لە پڕۆژە یاسای بودجەی گشتی ساڵی 2019دا، پارەی زیادە چووەتە سەر بودجەی وڵات و لەچەند ڕۆژی داهاتوودا دەست بەدابەشكردنی بودجەی تەواوكاری دەكرێت.

ئەحمەد سەفاڕ بڕیاردەی لیژنەی دارایی لە ئەنجومەنی نوێنەرانی عیراق ڕایگەیاند، نرخی نەوت لە پڕۆژە یاساكانی بودجەدا لەلایەن پسپۆڕان بەخەمڵێندراوی دادەنرێت تا هاوسەنگ دەبێتەوە ئەگەر بەرزبوونەوە یاخود نزمبوونەوەی نرخ لەبازاڕەكانی جیهان ڕووبدات، لەئێستاشدا پارەی زیادە هەیە بەهۆی ئەوەی نرخی یەك بەرمیل نەوت لەبودجە بە 56 دۆلار دانراوە و ئێستا نرخی نەوت زۆر زیاترە لەو نرخە و ئەو پارانەش دەچێتە چوارچێوەی بودجەی تەواوكاری.

بڕیاردەی لیژنەی دارایی لە ئەنجومەنی نوێنەرانی عیراق ئاماژەی بەوەشدا، دابەشكردنی بودجە تەواوكاری لەپسپۆڕیی وەزارەتی دارایی و پلاندانانە و ئەنجومەنی نوێنەرانیش ڕۆڵی دەبێت لەو دابەشكردنە و شێوازی دابەشكردنەكە بەپێی ئەو ناوچە و پارێزگایانە دەبێت كە لە بودجەدا پشكیان كەمبووە و هەروەها بەشێك لەو پارانە بۆ پڕۆژە گرنگەكان تەرخان دەكرێت.

بەردەوام بە لە خوێندنەوە

عێراق

ژمارەیەكی زۆری حاجیان بەڕێگەی وشكانی گەیشتنە سعودیە

خەڵك- بەشی هەواڵ
دەستەی حەج و عومرەی عیراق ڕایدەگەیەنێت، 1880 حاجی عیراقی لەڕێی مەرزی عەرعەری سنورییەوە چوونەتە سعودیە.

حەسەن فەهد كینانی، وتەبێژی دەستەی حەج و عومرەی عیراق لە بەیاننامەیەكدا ڕایگەیاندووە، “یەكەم كاروانی حاجیا بۆ مەككە و مەدینەی پیرۆز، لە پارێزگاكانی دیالە و واست و دیوانیە و موسەننا و ئەنبارەوە، لەڕێی مەرزی عەرعەرەوە بووە”.

بە وتەی كینانی، “بەشی یەكەمی حاجیان لە 20 كاروان پێكهات، كە بەسەر 80 نەفەرهەڵگردا دابەشكران، لە هەر كاروانێكدا دوو بەڵێندەر و یاریدەدرێكی بەڵێندەر و دوو ڕێبەری ئاینیان لەگەڵ بووە”.

ئەو بەرپرسەی دەستەی حەج و عومرەی عیراق دەڵێت: “مەرزی عەرعەر لە ساڵی داهاتوودا بەڕووی عومرەكاراندا دەكرێتەوە و یاریدەر دەبێت بۆ ئەوەی ژمارەیەكی زۆر لە عومرەكارە عیراقییەكان لەڕێی وشكانییەوە سەردانی مەككە و مەدینەی پیرۆز بكەن”، وێڕای ئەوەش ئاماژەی بە كرانەوەی مەرزەكە كرد بەڕووی ئاڵوگۆڕی بازرگانی لەنێوان عیراق و سعودیە، كە پاڵپشتییەكی تر دەبێت بۆ ئابوری نیشتمانی.

پێشتر خالید عەتیە، سەرۆكی دەستەی حەج و عومرەی عیراق ڕایگەیاندبوو، مەرزی عەرعەر لە وەرزی داهاتووی عومرەدا بەتەواوەتی كراوە دەبێت.

بەردەوام بە لە خوێندنەوە

عێراق

عەبدولمەهدی ئەنجامی كۆبوونەوەكەی لەگەڵ بارزانی ئاشكرا كرد

خەڵك- بەشی هەواڵ
سەرۆك وەزیرانی هەرێمی كوردستان، ئامادەیی حكومەتی هەرێم بۆ چارەسەركردنی هەموو كێشە هەڵپەسێردراوەكان لەگەڵ حكومەتی فیدڕاڵدا دەخاتەڕوو.

نووسینگەی عادل عەبدولمەهدی، سەرۆك وەزیرانی عیراق لە بەیاننامەیەكدا ئاماژەی بەوەكردووە، “سەرۆكی ئەنجوومەنی وەزیران لە نووسینگەی خۆی پێشوازی لە سەرۆك وەزیرانی هەرێمی كوردستان و شاندی یاوەری كرد”.

بەپێی بەیاننامەكە، “مەسرور بارزانی، سەرۆك وەزیرانی هەرێمی كوردستان، پێداگری لەسەر سەردانی بەغدا كردۆتەوە، وەك یەكەم وێستگەی سەردانەكانی لە دوای وەرگرتنی پۆستی سەرۆكایەتی حكومەت و جەختیشی لەسەر ئامادەیی حكومەتی هەرێم كردۆتەوە بۆ كاریی هاوبەش و هەماهەنگی و پتەوكردنی پەیوەندییە ئەرێنییەكان لەگەڵ حكومەتی فیدڕاڵ لەپێناو چارەسەكردنی هەموو كێشە هەڵپەسێردراوەكان بەپێی دەستور”.

هەر لە بەیاننامەكەدا هاتووە، “عەبدولمەهدی لای خۆیەوە خۆشحاڵی دەربڕیوە بە دروستبوونی كەشی هەماهەنگی و لێكگەیشتن لەگەڵ حكومەتی هەرێم و حكومەتە خۆجێییەكان، لەپێناو پتەوكردنی یەكترتەواوكردن و چارەسەكردنی كێشە و گیروگرفتەكان، كە دەبێت لە بەرژەوەندی هەموو عیراقییەكان بێت و لەژێر چەتری دەستور و یەكێتی و یەكڕیزی گەل و یەركپارچەیی خاكی عیراقدا بێت”.

ئەمڕۆ مەسرور بارزانی، سەرۆك وەزیرانی هەرێمی كوردستان بەسەرۆكایەتی شاندێكی باڵا گەیشتە بەغدای پایتەخت و لەگەڵ بەرپرسانی حكومەتی فیدڕاڵ كۆبووەوە و لەگەڵ بەرپرسانی بەغدا كێشە هەڵپەسێردراوەكانی نێوان هەرێم و حكومەتی فیدڕاڵی تاوتوێ‌ كرد و لە دوای كۆبوونەوەكەی لەگەڵ محەمەد حەلبوسی، سەرۆكی پەڕلەمان، كە دواین وێستگەی گەشتەكەی بوو ڕایگەیاند، كە “پەیامی هەرێمی كوردستانمان بە بەغدا گەیاندووە”.

بەردەوام بە لە خوێندنەوە

کوردستان