ئێمە لە تۆرە کۆمەڵایەتیەکان

عێراق

پاسداران هەڕەشە لە هەرێمی كوردستان دەكات
دەوڵەتی یاسا بۆ (خەڵك): پێویستە هەڵوێستی سیاسی و ئەمنیمان یەكگرتوو بێت

خەڵك- بەشی هەواڵ
هاوپەیمانی دەوڵەتی یاسا، كە لەلایەن نوری مالكییەوە سەركردایەتی دەكرێت، بەپێویستی دەزانێت هەڵوێستی حكومەت و پەڕلەمان و لایەنە سیاسییەكان، یەك بێت بەرانبەر ئەو تەنگژەیەی لە ناوچەكەدا دروستبووە و پێیوایە لە بەرژەوەندی نیشتمانی عیراقە لەم ململانێیەدا بێلایەن بێت.

سەعد موتەڵیبی، سەركردە لە هاوپەیمانی دەوڵەتی یاسا، لە لێدوانێكی تایبەت بە (خەڵك) ڕایگەیاند، “لە بەرژوەندی عیراقە لەم ململانێیەی لە ناوچەكەدا دروستبووە بێلایەن بێت و هەڵوێستی بێلایەنی و ناوابەستەبوون بەو ڕووداوانەوە بگرێتەبەر، چونكە هیچ سوودێكمان لەو كێشەیەدا نییە”.

سەبارەت بە نەبوونی هەڵوێستێكی یەكگرتووش لەئێستادا لە عیراق، موتەڵیبی وتی، “كێشەكە لە بوونی جیاوازی دید و بۆچوونەكاندایە، حكومەت لەلایەك و پەڕلەمان لەلایەكی تر، ئەم جیاوازییەش دەرگا لەبەردەم دەستوەردان و لێكدانەوەكاندا ئاواڵا دەكات”، ئەمەشی بە كێشەیەكی سەرەكی لە سیاسەتی ئەمڕۆی عیراقیدا لەقەڵەمدا.

بە وتەی سەركردەكەی هاوپەیمانی دەوڵەتی یاسا، “ناتوانین ڕووبەڕووی جیهان ببینەوە، گەر هەڵوێستێكی سیاسی و ئەمنی یەكگرتوومان نەبێت و دەوڵەت و هەموو كوتلە سیاسییەكان بگرێتەوە، جا عەرەبی بێت، یان كوردستانی”.

لەبارەی قبوڵنەكردنی دوو لایەنە سەرەكییەكەی ململانێكەش، بەرانبەر بە هەڵوێستی بێلایەنبوونی عیراق لە كێشەكاندا، سەعد موتەڵیبی پێیوایە، “لەئێستادا هەڵوێستی قبوڵنەكردنی بێلایەنبوونی عیراق لەلایەن ئەمریكاش و ئێرانیشەوە بۆتە واقیع، بەو پێیەی لەبنەڕەتدا كێشەكە لەنێو خۆمانەوە سەرچاوەی گرتووە، كە پشتیوانی لەو دوو هەڵوێستە دەكرێت، ئەمەش بەو هۆیەی هەندێك لایەن و كوتلەی سیاسی لەنێو عیراقدا یان پشتیوانی لە هەڵوێستی ئەمریكا دەكەن یان پشتیوانی لە هەڵوێستی ئێران”، ئەمەش بە بۆچوونی سەركردەكەی دەوڵەتی یاسا “مەترسییە گەورەكەیە”.

موتەڵیبی دەڵێت: “لەم ڕەوشەدا، نابێت گلەیی لە وڵاتانی تر بكەین، پێویستە گلەیی لەخۆمان بكەین، كە ڕێگە بە هەندێك لە كوتلە سیاسییەكان دەدەین بەو شێوەیە هەڵوێستی خۆیان دەرببڕن، هەڕەشەی ئەم دواییەی سوپای پاسدارانیش بۆ هەرێمی كوردستان هەر تەنیا هەرێمی كوردستان ناگرێتەوە، بەڵكو هەڕەشەكە بۆ هەموو عیراقە، چونكە ئەوەی لە كوردستان ڕوودەدات كاریگەری لەسەر بەغدا و باشووریش دروست دەكات”.

سەعد موتەڵیبی بە ناوی هاوپەیمانییەكەیەوە، بەپێویستی زانی هەموو لایەنە سیاسییەكان هەڵوێستییان یەكگرتوو بێت، بۆ ڕەتكردنەوەی هەموو دەستوەردانێكی ئیقلیمی لە كاروباری ناوخۆیی وڵات و دروستكردنی بەرەیەكی سیاسی و ئەمنی و سەربازی و حكومی بۆ بەرگرتن بە هەموو دەستوەردانە بیانییەكان.

عێراق

سەرۆك كۆمار لەگەڵ وەزیری گواستنەوە كۆدەبێتەوە

خەڵك- بەشی هەواڵ
سەرۆك كۆماری عیراق پێشوازی لە وەزیری گواستنەوەی حكومەتی فیدڕاڵی دەكات و دەڵێت: “دەبێت پشت بە پێوەرە نێودەوڵەتییەكان ببەسترێت بۆ دابینكردنی باشترین خزمەتگوزاری بۆ هاووڵاتیان”.

بەپێی ڕاگەیەنراوێكی نووسینگەی سەرۆكایەتی كۆماری عیراق، ئەمڕۆ شەممە ٢٠٢٠/٨/٨ لە بەغدا، بەرهەم ساڵح پێشوازیكرد لە ناسر حسێن شەبەلی، وەزیری گواستنەوە.

سەرۆك كۆمار جەختی لەپێویستی خستنەگەڕی هەوڵەكان كردەوە بۆ پشتیوانیكردنی ئەو هەنگاوانەی، كە عیراق دەینێت بۆ كرانەوەی بە ڕووی جیهان، لە چوارچێوەی پێشخستنی كەرتە جیاوازەكانی گواستنەوە بەو پێیەی ڕایەڵەیەكی بەیەكگەیاندنی گرنگە لە نێوان كیشوەر و وڵاتان.

بەرهەم ساڵح وتیشی، “دەبێت پشت بە پێوەرە نێودەوڵەتییەكان ببەسترێت بۆ دابینكردنی باشترین خزمەتگوزاری بۆ هاووڵاتیان”.

لەلای خۆیەوە وەزیر گواستنەوە ڕوونكردنەوەیەكی تەواوی خستە بەردەم سەرۆك كۆمار، سەبارەت بە كاروانی كارەكانی وەزارەت و پلانەكانی بە ئومێدی جێبەجێكردنیان بۆ چالاككردنی ئاستی كارەكان و باشتركردنی خزمەتگوزارییەكان بۆ ئەوەی وێنەی عیراق لە بەردەم جیهاندا پرشنگدار بێت.

بەردەوام بە لە خوێندنەوە

عێراق

دانوستانەکانی هەرێم و بەغداد دەستپێدەکەنەوە

خەڵک – بەشی هەواڵ

 سەرۆكی فراكسیۆنی پارتی لە پەرلەمانی عیراق رایگەیاند، بڕیارە ئەم ھەفتەیە شاندی ھەرێمی كوردستان بۆ گفتوگۆكردن سەبارەت بە شایستە داراییەكانی ھەرێمی كوردستان سەردانی بەغدا بكەن و، لێكنزیكبوونەوەی باشیش ھەیە. سەركردەیەكی سوننەكانیش دەڵێت، چاوەڕێ دەكرێت ھەردوولا بگەنە رێككەوتن، چونكە رێككەوتنی ھەردوو حكوومەت، دەبێتە ھۆی سەقامگیری لە عیراقدا بە شێوەیەكی گشتی.

د. ڤیان سەبری، سەرۆكی فراكسیۆنی پارتی لە پەرلەمانی عێراق، بۆ ماڵپەڕی فەرمی حزبەکەی وتی: “بڕیارە ئەم ھەفتەیە شاندی حكومەتی ھەرێمی كوردستان سەردانی بەغدا بكات، چونكە بەردەوامبوونی دانوستان پێویستە و رێككەوتننامەش پێویستە بەپێی دەستوور بكرێت و بۆ سەقامگیریی ھەردوو حكومەت بێت، بۆیە گەر بگەنە رێككەوتن، دۆخەكەش سەقامگیر دەبێت”.

سەبری وتیشی: “لێكنزیكبوونەوەی باش ھەیە و تەنھا ھەندێك وردەكاری ماون، كە رەنگە ئەوانیش لەم چەند رۆژەدا یەكلا بكرێنەوە و بگەنە رێككەوتن”.

لای خۆشیەوە، د. عەلا مەكی، سەركردەی سوننەكان، رایگەیاند: “عێراق پێویستی بە سەقامگیری ھەیە بۆ ئەوەی بچێتە قۆناغێكی دیكە، تا گۆڕانكارییەكانی ناوچەكە كاریگەرییان لەسەر نەبێت و بتوانێت سەقامگیری دروست بكات، بۆیە پێویستە دانوستانەكانی نێوان ھەرێم و بەغدا بەردەوام بێت و بگەنە رێككەوتن، ئەمەش لە بەرژەوەندیی ھەموو لایەكە و ھەرێمی كوردستان ناوچەیەكە بۆتە ھۆی سەقامگیری بۆ ھەموو عیراق، هەروەها سەقامگیریی ھەرێم، واتا سەقامگیریی ھەموو عیراق، بۆیە پێویستە حكومەتی عیراق لەگەڵ ھەرێمی كوردستان بگاتە رێككەوتن”.

مەكی، وتیشی: “پێویستە دانوستانەكان دوانەكەون و پەلەیان لێ بكرێت، چونكە رێككەوتنی ھەرێم و بەغدا دەبێتە ھۆی سەقامگیریی عیراق بە گشتی، بۆیە پێشبینی دەكەم ئەمجارە ھەردوولا بگەنە رێككەوتن، چونكە بوونی كێشە لە نێوان ھەردوولا، دەبێتە ھۆی ناسەقامگیریی دۆخی عیراق”.

بەردەوام بە لە خوێندنەوە

عێراق

20ی ئەم مانگە كازمی سەردانی ئەمریكا دەكات

خەڵك-بەشی هەواڵ

 

كۆشكی سپی ئاشكرایدەكات، 20 ئەم مانگە دیاری كراوە بۆ سەردانەكەی موستەفا كازمی بۆ ئەمریكا.

كۆشكی سپی لە ڕاگەیەنراوێكدا ئاماژە بۆ ئەوە دەكات، مستەفا كازمی سەرۆك وەزیرانی عیراق لە 20ی ئەم مانگە سەردانی ئەمریكا دەكات و هەریەك لە پرسەكانی ئاسایش و وزە و ئابووری و ڤایرۆسی كۆرۆنا لەگەڵ بەرپرسانی ئەمریكا تاوتوێ دەكات.

ئەمەش لەكاتێكدایە، لە ڕاگەیەنراوەكەی كۆشكی سپیدا باسی كشانەوەی هێزەكانی ئەمریكا لە عیراق نەكراوە، لەكاتێكدا گفتوگۆكان بۆ ئەو مەبەستە ڕێكخراوە و پێش دوو مانگ گەڕی یەكەمی گفگۆكان لە عیراق ئەنجام دران.

بەردەوام بە لە خوێندنەوە

کوردستان