ئێمە لە تۆرە کۆمەڵایەتیەکان

راپۆرت

(خەڵك) وردەكاری دەستلەكاركێشانەوەی سەركردە و كادیرانی كۆمەڵی ئیسلامی ئاشكرا دەكات

خەڵك-بەشی هەواڵ

دوێنێ سێ ئەندامی سەركردایەتی كۆمەڵی ئیسلامی و ئەمڕۆش چەند كادیرێكی مەڵبەندەكانی ئەو حزبە دەستیان لەكاركێشایەوە، ئەمەش لەكاتێكدایە، تۆڕی میدیایی (خەڵك) پێشتر ئەوەی ئاشكرا كردبوو، كە زیاتر لە 100 ئەندام و كادیری ڕێكخستنەكانی كۆمەڵی ئیسلامی لە شارەكانی هەولێر و كۆیە و دەورووبەری دەست لەكاردەكێشنەوە.

سەرچاوەیەك، كە نەیویست ناوی ئاشكرا بكرێت بە (خەڵك)ی ڕاگەیاند، ئەمشەو یەكێك لە ئەنجوومەنەكانی شاری هەولێری سەر بە كۆمەڵی ئیسلامی سەرجەم كادیرەكانی دەست لەكاردەكێشنەوە.

وتیشی، “جگە لەو ئەنجوومەنە ژمارەیەكی دیكە لە ئەندامانی كۆمەڵ لە شاری هەولێر دەست لەكار دەكێشنەوە لەنێویشیاندا ژمارەیەك لە هەڵسوڕاوانی ڕێكخراوی قوتابیانی ئەو حزبەش بوونیان هەیە”.

هەر یەك لە ئیسماعیل ڕەسوڵ و سەعید هەركی و سەلیم كۆیی، ئەندامانی سەركردایەتی كۆمەڵی ئیسلامی لە ڕاگەیەندراوێكدا كە وێنەیەكی دەست (خەڵك) كەوتووە، ئاماژە بۆ ئەوە دەكەن، لە‌سۆنگە‌ی بڕوابوونمان بە‌وە‌ی حزب دە‌بێ ئامرازێك بێت بۆ بە‌دیهێنانی ئامانجگە‌لێك، كە‌ لە‌سایە‌یدا دادپە‌روە‌ری و ئارامی و خۆشگوزە‌رانی بۆ خە‌ڵك دە‌ستە‌بە‌ربكات و هە‌لی یە‌كسان بڕە‌خسێنێ بۆ دە‌رخستنی توانا و كارامە‌یی و لێهاتووییە‌كانی كادیران و ئە‌ندامە‌كانی لە‌پێناو خزمە‌تكردنی باشتر و هە‌ڵگرتنی بە‌رپرسیارێتی گە‌ورە‌تر بۆ گە‌ل و وڵاتە‌كە‌ی، بە‌ڵام ئە‌و كاتە‌ی حزب خۆی ببێت بە‌ئامانج و سە‌رچاوە‌ی بژێوی بۆ كە‌سانێكی دیاری كراو و نە‌توانێت لە‌خودی خۆیدا دادپە‌روە‌ری بە‌رقە‌رار بكات پێویستە‌ سە‌ركردایە‌تی و كادیران و ئە‌ندامە‌كانی هە‌موو هە‌وڵ و تە‌قە‌لاكانیان بخە‌نە‌گە‌ڕ بۆ چاكسازی و ڕاستە‌ڕێكردنی، ئە‌گە‌رنا لانی كە‌م هە‌ڵوێست وە‌ربگرن.

ئەو سەركردانەی كۆمەڵ ئاشكراشی دەكەن، بەرواری 19/4/2019 ڕامانگەیاند، واز لە گشت پۆستەكانمان دەهێنین و دەست لەكاردەكێشینەوە لە ئەندامێتی كۆمەڵ و ئەم بڕیارەشەمان بەهۆی نەبوونی پڕۆژەیەكی سیاسی گشتگیر بەجۆرێك خزمەتی گشت چین و توێژەكانی كۆمەڵگەی كوردی بكات بێ جیاكاری لە نێوان تاكەكانی، هەروەها جێبەجێنەكردنی ئەو بنەما پیرۆزانەی ئیسلام، كە بانگەشەی بۆ دەكرێت لەناو حزب، بنەماكانی دادگەری و یەكسانی و شورا و ڕاوێژ تەنها بونەتە دروشم و لە هەڵسوكەوتی ناو حزب بەدیناكرێن و پێچەوانەكەشی جێبەجێ دەكرێن لە قۆرغكاری دەسەڵات لەناو گروپ و باڵێكی ناو كۆمەڵی ئیسلامی و دەركردنی چەندین بڕیاری نادادوەرانە بەسەر كادیر و ئەندامانی ناو حزب.

ئەو سەركردانەی كۆمەڵ ڕوونیشدەكەنەوە، پشتگوێخستنی پێگەی سیاسی و ئابوری و دیپلۆماسی و جەماوەریی شاری هەولێری پایتەخت لەلایەن باڵی دەستڕۆیشتوانی ئەنجوومەنی بانگەواز و بەڕێوەبردن، تەنانەت زۆرجار كێشە و گرفتی گەورە دروستكراوە بۆ مەڵبەند و ئەنجوومەنەكانی سنوری پارێزگای هەولێر لەلایەن ئەو گروپە، هەروەها نەبوونی ستراتیژ و پلانی سیاسی تۆكمە لەلایەن حزبەوە، ئەم نەبوونی پلانەش بۆتە هۆكاری ناروونی لە سیاسەتی حزبدا، هەر بۆیە تا ئێستاش خەڵكی كوردستان بەرچاوی ڕۆشن نییە ئایا كۆمەڵ حزبێكی ئۆپۆزسیۆنە یاخود بەشدارە لە حكومەت؟!

ئەمڕۆش هەریەك لە كەمال ئەسكەندەر، حاجی محەمەد سماقوڵی، سەعدی موستەفا و كاروان خەلیل كارگێڕانی مەڵبەندەكانی هەولێری كۆمەڵی ئیسلامی لە ڕاگەیەندراوكیاندا دەستیان لە حزبەكەیان كێشایەوە.

ئەو كارگێرانە لە وازنامەكەیاندا ئاماژە بۆ ئەوە دەكەن، ئێمەی كارگێڕانی مەڵبەندی (۳)ی هەولێر لەبەرواری ۲۰۱۹/٤/۲۱ ەوە هیچ پەیوەندییەكی سیاسی و یاساییمان بەكۆمەڵی ئیسلامی نەماوە و لێرەوە پاڵپشتیمان بۆ هەرسێ سەركردایەتییە دەست لەكاركێشاوەكەی حزب دووپات دەكەینەوە بۆ خزمەتكردنی هەر پڕۆژەیەكی ئیسلامی سەربەخۆ.

(خەڵك) لە یەكێك لە سەرچاوەكانییەوە ئەوەی زانیوە، چەند پەلەمانتارێکی ئەو حزبە لە پەڕلەمانی كوردستان و هەر یەك لە عەباس موحەمەد و چنار عەبدوڵڵا، ئەندامانی ئەنجوومەنی پارێزگای هەولێری سەر بە كۆمەڵی ئیسلامی لە داهاتوییەكی نزیكدا دەستیان لە حزبەكانیان دەكێشنەوە.

لای خۆشییەوە ڕوپاك ئەحمەد، ئەندامی پەڕلەمانی كوردستان هەواڵەكەی ڕەتكردەوە و بە (خەڵك)ی ڕاگەیاند، هیچ بابەتێكی لەو جۆرە لە ئارادا نییە.

(خەڵك) پەیوەندی بە ئەندامانی كۆمەڵ لە ئەنجوومەنی پارێزگای هەولێرەوە كرد، بەڵام پەیوەندییەكەیان بەردەست نەبوو.

بەپێی ئەو زانیارییانەی (خەڵك) لە چەند سەرچاوەیەكەوە دەستی كەوتووە، ئەو سەركردە دەستلەكاركێشاوانەی كۆمەڵی ئیسلامی بەهیچ شێوەیەك ناچنەوە نێو كۆمەڵی ئیسلامی و كۆتاییان بە جموجوڵی سیاسی لەنێو ئەو حزبە هێناوە و هیچ حزبێكی نوێش دروست ناكەن.

ئەو سەرچاوانە ئەوەشیان ئاشكرا كرد، بژاردەی بەهێزی ئەو سەركردانەی كۆمەڵی ئیسلامی بۆ داهاتووی كاری سیاسیییان ئەوەیە بچنە نێو بزووتنەوەی ئیسلامی، هەرچەندە لە ئێستادا لە خۆڕێكخستنی خۆیاندان و بڕیاری كۆتاییان لەو بارەوە نەداوە.

ئەمەش لەكاتێكدایە موئمین زەڵمی، ئەندامی ئەنجوومەنی سیاسی هاوپەیمانی نیشتمانی بە (خەڵك)ی ڕاگەیاند، سەركردەكانی كۆمەڵ بە گرنگ دەزانین لەنێو ساحەی سیاسی كوردستان و بەشێوەیەكی ڕاستەوخۆی هیچ گفتوگۆیەك لەنێوان هاوپەیمانی نیشتمانی و ئەو بەرپرسانەدا ئەنجام نەدراوە.

سێ سەركردەكەی كۆمەڵ ئەوەیان ئاشكرا كردووە، لەگەڵ ئەوەی دووپاتی دەكەینەوە هیچ پەیوەندیەكمان نەماوە بە كۆمەڵی ئیسلامی، داوا لە بەڕێز ئەمیری كۆمەڵی ئیسلامی دەكەین هەوڵی ڕاستەقینە بدات بۆ چارەسەركردنی كێشەكانی ناو حزبەكەی و ئێمەش بەڵێن دەدەین لەدەرەوەی ئەو حزبە هاوكاری دڵسۆزیان بین بۆ پڕۆسەی چاكسازی ڕیشەیی لە كۆمەڵی ئیسلامی و هەر پڕۆژەیەكی ئیسلامی دیكە.

جەختیش لەوە دەكەنەوە، دەست لەكاركێشانەوەمان لەو حزبە مانای دەستبەرداربوونمان ناگەیەنێ لە پڕۆژە ئیسلامی و چاكسازییەكان، بەڵكو دەبێتە سەرەتای دەستپێكی قۆناغێكی نوێی بانگەوازی ئیسلامی و پڕۆسەی چاكسازی سیاسی ڕیشەیی لەهەرێمی كوردستان.

بۆ وەرگرتنی ڕای فەرمی كۆمەڵی ئیسلامی (خەڵك) پەیوەندی كرد بە ڕێبوار حەمەد، وتەبێژی كۆمەڵی ئیسلامی،

راپۆرت

بە ڤیدیۆ؛ مەلاكە پەشیمان دەبێتەوە
قسە وتنی مەلایەك بە ماریا هەورامی كاردانەوەی لێدەكەوێتەوە

خەڵك- بەشی هەواڵ
دوابەدوای بڵاوبوونەوەی تۆمارێكی دەنگی مەلایەك، كە هێرشی كردبووە سەر هونەرمەند ماریا هەورامی لەسەر تۆماركردنی گۆرانیەك لە شەقامی سەهۆڵەكەی سلێمانی، كاردانەوەیەكی بەرفراوانی لە تۆڕە كۆمەڵایەتییەكان لێكەوتەوە و بەرپرسێكی ئەوقاف دەلێت: “لە میمبەری مزگەوتەوە سوكایەتی بەو خاتوونە نەكردووە” و هاوكات مەلاكەش داوای لێبوردن دەكات و دەڵێت: “لەگەڵ بڵاوبوونەوەی ئەو تۆمارە دەنگیە نەبووە”.

چەند ڕۆژێكە تۆماێكی دەنگی مامۆستا هەڵۆ حەمەڕەشید لە تۆڕە كۆمەڵایەتیییەكان بڵاوبۆتەوە و تێیدا هێرشی تووند دەكاتە سەر ماریا هەورامی لەسەر تۆماركردنی گۆرانیەكەی لە شەقامی سەهۆڵەكەی سلێمانی و تێیدا بە لادەر ناوی دەبات.

عەزیز ڕەئووف، نووسەر لە هەژماری خۆی لە نووسینێكدا لەسەر ئەو پرسە دەڵێت: “ئەو گۆرانیەی ماریا هەورامی لە سەهۆڵەكەی سلێمانی، هەم مۆركێكی كوردی پێوە دیاربوو، هەم جلو بەرگی ئەم خانمە ڕەسەنایەتی خۆی پاراستبوو. ئەوەی تایپێك لە پیاوی ئاینی نیگەران كرد ئەو ترسەیە لە كرانەوەی كۆمەڵگە و ترسە لەوەی چیتر خەڵك دوای حیكایەتە تونڕەوی و ژەهراویەكانیان نەكەوێت”.

ئاماژەی بەوەشكردووە، لە ئێستادا ئایین كورتكراوەتەوە بۆ خیتابی توند و قیڕەقیڕ و ڕژانی ژەهری توندڕەوی. ئەگەر سەردەمانێك مزگەوت شوێنی زانایان و پیاوانی نورانی و شاعیران بووبێت، ئەوا لە ئێستادا بەشێك لە مزگەوتەكان پڕ بوون لە پیاوی ئاینی لە فۆڕمی موجاهید. كوا پیاوە نورانیە ڕیشسپیەكانی وەك مەلای گەورەی كۆیە و نالی و سالم و حاجی قادر و سەدانی تر؟ هیچ كاتێ بارتەقای ئێستامان ئایین كورتنەكراوەتەوە بۆ خیتابی توندی دژە ژن و دژە مرۆڤ و دژە پێكەوەژیان.

لای خۆشیەوە، فەرهەنك گۆمەشینی، وتەبێژی وەزارەتی ڕۆشنبیری حكومەتی هەرێم ڕایگەیاندووە، “ویستم ھیچ نەنووسم و نەڵێم، وەلی كە گوێم لەو مامۆستا ئاینیە گرت، كە لە وەڵامدانەوەی مامۆستایەكی تری ئاینی ھاتە سەر باسكردنی سەھۆڵەكە و (ماریا ھەورامی) ئینجا دووبارە دەست خۆشیت لێ دەكەم. مەلا گیان كاری خۆت بكە خۆ پۆلیسی ھاتووچۆ نیت دڵگران بوویت بە گرتنی شەقامی سەھۆلەكە، ئەگەر نا ئەو وشانەشی كە وتت! نامەوێ لێرە بیان نووسمەوە، چونكە جێگەیان نابێتەوە لە ڕیزە وشە و نووسینی ئەقڵانی و دروست”.

لە هەمان كاتدا مەریوان نەقشبەندی، بەڕێوەبەری پەیوەندییەكان لە وەزارەتی ئەوقاف ڕوونیكردۆتەوە، ئەو مەلایە لەمینبەری مزگەوتەوە سوكایەتی بەخاتونە ھەورامیەكە نەكردوە.

ئاشكراشی كردووە، بەدەنگی خۆی داوای لێبوردنی كردوە و دەڵێ ھەڵەم كردوە و پەشیمانم و نەدەبو بەو شێوەیە بەرامبەر ئەو خاتونە ھەورامیە قسە بكەم و حەزیشی نەكردوە ئەو بابەتە بڵاو بكرێتەوە.

نەقشبەندی دەڵێت: “ئەوانەی كوێرانە كەوتبونە بەرگریكردن لەم پیاوە ئەوانیش ھەڵەیان كردوە و دەبێ یان داوای لێبوردن بكەن یان عارەقی شەرمەزاری بسڕنەوە و ئەوانەش بەرگریان لەئازادی و خاتونە ھەورامیەكە كرد باشترە لێرەوە كۆتایی پێبێنن و لاپەڕەیەكی نوێ ھەڵدەنەوە”.

دوابەدوای ئەو هەڵایەی لە تۆڕە كۆمەڵایەتییەكان دروست بوو، مامۆستا هەڵۆ حەمەڕەشید لە هەژماری فەرمی خۆی لە تۆڕی كۆمەڵایەتی فەیسبووك بە پەیامێكی دەنگی ڕوونكردنەوەیەكی بڵاوكردەوە و دەڵێت: ” ئەو پەیامە دەنگییە تایبەت بوو بۆ كەسێكم نارد و بۆ ڕای گشتی نەبوو، هەروەها لەگەڵ بڵاوكردنەوەی نەبووم”.

دەشڵێت: “ئەو شێوەیەش، كە باسی ئەو خاتوونەم پێكرد شێوەیەكی نەشیاو بوو، بۆخۆم دەربڕینەكەی خۆمم پێ جوان نییە هەم لە ڕووی شەرع و هەم لە ڕووی عورفیشەوە، ئەگەر ئێستا بیڵێم وا نایڵێم، پەشیمانم لێی ئەوە بەینی خۆم و خوای خۆمە و ئەو خاتوونەش هەر شتێكی هەیە با بڕوات لە دادگا داوای بكات و ئامادەم بچمە دادگا”.

جەختیشی كردۆتەوە، بەڵام ئەو كارەی ئەوم هەمیشە هەر پێ خراپە و بە ناشەرعی دەزانم و تا بمێنم هەوڵدەدەم ڕێ لەو كارە ناشەرعییانە بگرم.

مامۆستا هه‌ڵۆ

وه‌ڵامی مامۆستا هه‌ڵۆ بۆ چه‌واشه‌كاران له‌سه‌ر ماریا هه‌ورامی

Posted by ‎مامۆستا هەڵۆ حمە ڕەشید‎ on Tuesday, August 13, 2019

بەردەوام بە لە خوێندنەوە

راپۆرت

نوێژی جەژن چۆن و كەی دەكرێت و چەند ڕكاتە؟

خەڵك- بەشی هەواڵ
سبەینێ‌ یەك شەممە 11ی ئاب هاوكاتە لەگەڵ 10ی زیلحیجە و یەكەم ڕۆژی جەژنی قوربانی پیرۆز و مامۆستایەكی ئایینی شێوازی ئەنجامدانی نوێژی سوننەتی جەژنی قوربان ڕووندەكاتەوە و دەڵێت: “دوو ڕكاتە و 12 جار زیكرەكە دەخوێندرێت”.

مامۆستا موسلیم مەلا صالح فریزی، مامۆستای ئایینی لە هەولێر بۆ (خەڵك) ئاماژەی بەوەكرد، نوێژی جەژن دوو ڕكاتە و وەك نوێژی بەیانیه، بەڵام جیاوازە لە وتنی زیكركردنی (الله أكبر) لە نوێژەكەدا، بۆیە نیەت دەهێنیت و دڵ ئامادە دەكەیت، كە نیازت وایە نوێژی جەژن بكەیت.

چۆنیەتی وتنی تەكبیرە و زیكرەكانی نوێژی جەژن
مامۆستا موسلیم ڕوونی كردەوە، دوای ئەوەی دەستت بە نوێژەكەت كرد، لە ڕكاتی یەكەمدا حەوت جار دەڵێی (الله أكبر) و لە نێوان (الله أكبر)ەكان دەڵێیت: (سبحان الله والحمد لله و لا اله الا الله و الله أكبر) پاشان سورەتی (الفاتحە) دەخوێنیت و پاشان سورەتێكی تری بەدوادا دەخوێنی و پاشان ڕكوع و سوجدە دەبەیت وەك نوێژی ئاسایی و پاشان هەڵدەسیتەوە بۆ ڕكاتی دووەم.

مەلا موسلیم دەشڵێت: “لە ڕكاتی دووەمیش وەك ڕكاتی یەكەمە تەنها جیاوازە لە ژماری وتنی (الله أكبر)ەكان و زیكرەكانی نێوانی، چونكە لە ڕكاتی دووەم پێنج جار دەیخوێنی”.

ئایا دەست بەرزكردنەوە هەیە لەنوێژدا؟
سەبارەت بە دەست بەرزكردنەوە لەكاتی (الله أكبر)ەكان، ئاماژەی بەوەكرد، زانایان فەرمویانە، كە پێغەمبەری خوا (د.خ) لەنێوان تەكبیرەكان زیكری نەخوێندووە و دەستی بەرزنەكردۆتەوە، بەڵام عەبدوڵڵای كوڕی عومەر (ڕ. خ) دەستی بەرزكردۆتە و زیكر خوێندنیش لەوەوە هاتووە.

مەلا موسلیم وتیشی، “وتن و نەوتنی زیكر و دەست بەرزكردنە و نەكردنەوەی كێشە نیە و هەمووی دروستە”.

كەی نوێژی جەژن دەكرێت؟ ئەی ئەگەر فریای جەماعەت نەكەوتیت؟
سەبارەت بەوانەی فریای نوێژی جەژن ناكەون، ئەو مامۆستا ئایینیە دەڵێت: “هەر كەسێك فریای نوێژی جەژن نەكەوت بە جەماعەت ئەوا بە تەنیا دەتوانێت بیكات”.

سەبارەت بە كاتی ئەنجامدانی نوێژی جەژن ئاشكرای كرد، كاتی ئەنجامدانی نوێژی جەژن نزیكەی 10 خولەك دوای خۆرهەڵاتن دەكرێت بەئەندازەی ڕمێك خۆر دیاربێت.

بەردەوام بە لە خوێندنەوە

راپۆرت

بەرزبوونەوەی بەهای تمەن، گەشتیارانی هەرێم بۆ ئێران ڕاناگرێت

خەڵك – بەشی هەواڵ

بەهای تمەن لەمانگی پێنجی ئەمساڵەوە ڕووی لەبەرزبوونەوە كردووە، بەڵام گەشتیاران بەردەوامن لەگەشتەكانیان بۆ وڵاتی ئێران بەجۆرێك لەماوەی سێ مانگی ڕابردوودا زیاتر لە سێ ملیۆن گەشتیار ڕوویان لەو وڵاتە كردووە.

محەمەد سابیر گەنجێكی تەمەن 27 ساڵە و دانیشتووی شاری سلێمانییە، ئەو لەگەڵ هاوڕێكانیدا لەهەفتەی ڕابردووەوە لەگەڵ دوو هاوڕێیدا بەمەبەستی گەشتیاری ڕوویان لەوڵاتی ئێران كردووە.

ئەو گەنجە لەبارەی گەشتەكەیەوە بۆ (خەڵك)ی ڕوونكردەوە، ئێستا لەباكووری ئێرانن و هەوڵدەدەن تاكو كۆتایی جەژن لەوێ بمێننەوە، چونكە دەیانەوێت كەمێك لەجەنجاڵییەكانی كوردستان و ئیش و كار و كێشەكان دووربكەونەوە و كەمێك ئارامی بەمێشكیان بدەن.

ئەوەشی خستەڕوو، ڕاستە كەمێك بەهای تمەن بەرزبۆتەوە، بەڵام هێشتا جیاوازییەكی وەهای نییە، كە زۆر پێیانەوە دیاربێت، بۆیە وەك پێشتر گەشتیار لەناو خاكی ئێران دەبینن.

بەپێی بەدواداچوونەكانی (خەڵك)، كە بەراوردكاری بۆ بەهای تمەن بەرامبەر دیناری عیراقی كردووە لەماوەی ساڵی 2019دا بۆی دەركەوت، لەسەرەتای ساڵەوە بەهای تمەن بەرامبەر دیناری عیراقی لە 12 هەزار دینارەوە ڕووی لەدابەزین كرد تاكو مانگی پێنج كە گەیشتە 8 هەزار دینار، بەڵام ئەم دابەزینە بەردەوام نەبوو، بەڵكو دواتر وردە وردە ڕووی لەبەرزبوونەوە كرد تا ئەمڕۆ بەهای تمەن بەرامبەر دینار گەیشتە 10 هەزار و500 دینار.

پەیوەند عومەر گەشتیارێكی دیكەی باشووری كوردستانە لەخاكی ئێرانەوە بە(خەڵك)ی وت:”چەند ڕۆژێكە بەخێزانی هاتووین بۆ ئێران و دەمانەوێت پشووی جەژنی قوربان لێرە بەڕێبكەین، چونكە فرسەتی لەو جۆرە نایەتە پێشەوە نزیكی هەفتەیەك پشووبین، بەهۆی ئەوەی بەهای تمەنیش بەرامبەر دیناری عیراقی نزمە تێچووی گەشتەكەیان كەمە”.

بەپێی ئامارێكی ڕێكخراوی گەشتیاری ئێران، لە ماوەی سێ مانگی ڕابردوودا زیاتر لە 3 ملیۆن گەشتیاری بیانی چونەتە خاكی ئێران و تەنها لە عیراقەوە ملیۆنێك و 263 هەزار گەشتیار چونەتە خاكی ئێران.

لەلایەكی دیكەوە بەپێی ئەو ئامارەی لەخاڵی سنووری باشماخ دەست (خەڵك) كەوتووە، تەنها دوێنی حەوت هەزار كەس لەمەرزەكەیانەوە لەباشووری كوردستانەوە چوونەتە خاكی ئێران.

ڕۆشتنی هاوڵاتیانی هەرێم وەك گەشتیار بۆ دەرەوەی هەرێم بەردەوام ڕووی لەزیادبوون دەكات، بە ئەمەش داهاتێكی زۆری ناوخۆی هەرێم دەچیتە وڵاتانی دەوربەر، كە لەبەرامبەردا پێویستبوو زیاتر گرنگی بە هاموشۆی گەشتیار لەناوخۆی هەرێم بدرێت.

لەو بارەیەوە نادر ڕۆستی وتەبێژی دەستەی گەشتوگوزاری هەرێم بە(خەڵك)ی ڕاگەیاند، یەكێك لەپلانەكانیان گرنگیدانە بەگەشتیاری ناوخۆیی، بۆئەمەش كاری زۆریان كردووە و چەندین پێشانگایان كردۆتەوە، بەمەبەستی برەودان بەگەشتی ناوخۆیی، لەئێستاشدا كۆمەڵێك پەڕە لەتۆڕە كۆمەڵایەتییەكان ئاگاداری بۆ گەشتی ناوخۆیی بڵاودەكەنەوە.

ئەوەشی خستەڕوو، تێبینی ئەوەیان كردووە كە گەشتیاری ناوخۆیی لەشوێنە گەشتیارییەكانی ناو هەرێم دەبینرێن، هاوكات گەشتیارانی دیكەش لەدەرەوەی هەرێمەوە دێن و لە شوێنە گەشتیارییەكان لەگەڵ گەشتیارانی ناوخۆیی تێكەڵدەبن، بەڵام ئەوەی وەك ئامار بڵاویدەكەنەوە زیاتر گەشتیارانی دەرەوەن كە دێنە ناو هەرێمەوە.

باسی لەئەوەشكرد، بەشێكی زۆری گەشتیاران لەشوێنە گەشتیارییەكان لە ژێر كەپرەكان دەمێننەوە و ناچنە هۆتێلەكان، یاخود سەردانی شوێنە گەشتیارییەكان دەكەن و دەگەڕێنەوە، بۆیە تاكو ئێستا ئاماری ئەم گەشتیارانە وەرنەگیراوە.

بەپێی بنەما ئابوورییەكان زۆربوونی ڕێژەی گەشتكردن لە هەر وڵاتێكدا نیشانەی بەرزبوونەوەی ئاستی داهاتی هاوڵاتیانی ئەو وڵاتەیە، بەڵام ئەم بنەمایە بۆ هەرێمی كوردستان و گەشتكردن بۆ وڵاتی ئێران ڕاست نییە، چونكە بەهای تمەنی ئێرانی بەرامبەر دیناری عیراقی زۆر دابەزیوە، بۆیە پێویستە حكومەتی هەرێم زیاتر گرنگی بەڕاكێشانی گەشتیار بۆ ناوخۆی هەرێم بدات و ناوچە گەشتیارییەكان زیاتر ئاوەدان بكاتەوە.

بەردەوام بە لە خوێندنەوە

کوردستان