لە چاوەڕوانی مەترسیدارترین قۆناغی جەنگی ڕووسیا و ئۆكرایندا
لە چەند ڕۆژی ڕابردوو سووپای ڕووسیا هێرشەكانی بۆ سەر چەند ناوچەیەك لەوانە زاپۆریژژیا و هۆلیاپۆل و باشوور و ناوەڕاستی ئۆكراین بەتایبەت لە نزیك ڕووباری دەنیپرۆ چڕكردووەتەوە.
ئەمڕۆ یەك شەممە سووپای ڕووسیا ڕایگەیاند، هێرشێكی نوێیان لە ناوچەی زاپۆریژژیا دەستپێكردووە، زاپۆریژژیا ناوچەیەكی هەستیاری جێی شەڕی سەختی نێوان هەردوولایە، بەتایبەت كە گەورەترین دامەزراوەی ئەتۆمی ئەوروپای تێدایە.
ڕۆژنامەی گاردیان بڵاویكردەوە، پێدەچێت سەربازانی ئۆكراین بێزار نەبووبن لە شەڕكردن لە زاپۆریژژیا، چونكە لە ماوەی ١٠ مانگدا هێڵی پێشەوەی یەكەمی ئەم ناوچەیە نەجووڵاوە و ڕووسەكانیش تا ئێستاش بێ توانا ماونەتەوە بۆ پێشڕەویكردن لە خەندەقەكانیان.
ئەفسەری یەكەمی پۆلیس لە لیوای 56ی ماریوپۆل لە ئۆكراین دەڵێت، لە دوو هەفتەی ڕابردوودا هێرشەكانی ڕووسیا لە ڕێگەی تۆپ و تانكەوە زیادبوون، بەڵام بەبێ ئەوەی هێزەكانی پیادە هیچ پێشڕەوییەك بكەن.
سووپای ئۆكراین دان بەوەدا دەنێت، ڕەنگە هێڵی پێشەوەی جێگیر لەگەڵ تێپەڕبوونی ڕۆژەكاندا گۆڕانكاری بەسەردا بێت.
ئەوەش ئاشكرادەكات، ژمارەی ئەو تۆپ و مووشەكانەی ئەو هێڵەیان گرتووەتەوە، لەم مانگەدا دوو هێندە زیادیانكردووە و گەیشتوونەتە چوار هەزار لە ڕۆژێكدا.
شارەزایانی سەربازی پێشبینیدەكەن، لە ماوەی چەند مانگی داهاتوودا یەكێك لە لایەنەكان هەوڵی شكاندنی ئەو چەقبەستووییە بدات، بەڵام پرسیارەكە ئەوەیە: ئایا كێ یەكەمجار لێیدەدات و لە كوێ دەبێت؟
ئەو ئەفسەرەی پۆلیس دەڵێت: شەڕە گەورەكە لە بەهاری ئەمساڵدا دەبێت، ڕەنگە پێشتریش بێت، بەدرێژایی هێڵی پێشەوەی 1200 كیلۆمەتر شەڕ دەبێت، پێشبینی دەكرێت توندترین قۆناغی شەڕی ڕووسیاو ئۆكراین بێت.
ئێستا هەردوولا سوود لە كات وەردەگرن بۆ كۆكردنەوەی هێز و بەهێزكردنی بەرەكانی جەنگ، وەك ئامادەكارییەك بۆ ئەگەری هێرش بۆ سەر یەكدی.
ڕوسیا كار بۆ بەهێزكردنی سووپاكەی دەكات لەڕێگای هەوڵەكانی سەرۆكی ڕووسیا، ڤلادیمێر پوتین، بۆ جوڵاندن و ئاراستەكردنی ئابووری وڵاتەكەی بەرەو پیشەسازی سەربازیی، بەمەبەستی بەرهەمهێنانی تانك و مووشەكی نوێ.
ڕۆژنامەی گاردیانی بەریتانی لەزاری شرۆڤەكارانەوە بڵاویكردەوە، ڕاسپاردنی ڤالێری جیراسیمۆڤ بە سەرۆكی ئەركانی گشتی هێزە چەكدارەكانی ڕووسیا بۆ ئەوەی ڕاستەوخۆ سەرپەرشتی ئۆپەراسیۆنەكان لە ئۆكراین بكات، ئاماژەیە بۆ ئامادەیی مۆسكۆ بۆ دەستپێكردنی هێرشێكی گەورە، دوای ئەوەی قۆناغی یەكەمی لەشكركێشییەكە بە كارەسات بۆ هێزەكانی پوتین كۆتایی هات، لەگەڵ زیانە قورسەكانی لە باكوور و لە خاركێڤ و خێرسۆن.
قۆناغێكی نوێی شەڕەكە، خەریكە دەستپێدەكات، كە جەنگێكی گەورەی تەواو بۆ گەیشتن بە ئامانجی یەكلاكەرەوە دەبینین لە پێگە جێگیرەكان، كە هێرشكردنەسەریان مەترسییەكی زۆری هەیە بۆ لەناوچوونی ڕۆحی مرۆڤەكان یان كەرەستە سەربازییەكان.
شارەزایانی سەربازی دەڵێن “ئەو هێزەی دەستپێشخەری هێرش بۆ سەر شوێنە جێگیرەكان دەكات، سێ هێندە بەهێزتر دەبێت بۆ ئەوەی سەركەوتن بەدەستبهێنێت”.
سەختی ئەنجامدانی ئەو هێرشانە لەگەڵ پەرەسەندنی تەكنەلۆژیای سەربازی بەتایبەت فڕۆكەی بێفڕۆكەوان و مانگی دەستكرد زیاتر دەبێت، كە ڕێگە بە هێزە بەرگریكارەكان دەدات پێشبینی هێرشەكە بكەن بە شێوەیەكی پێشوەختە.
ئێستا پرسیاری جددی ئەوەیە، ئایا هێزەكانی ڕووسیا لە ماوەی یەك ساڵی ڕابردوودا وانەی تاكتیكییان لە شكستی تەواوی ئۆپەراسیۆنەكانیان وەرگرتووە؟، ئەی ئەگەر ئێستا لە دۆخێكی باشتردان، بۆ دەستپێكردنی هێرشێكی نوێ ئامادەن؟.
شرۆڤەكاری باڵای پێشووی پێنتاگۆن لە بواری توانا سەربازییەكانی ڕووسیا، دارا ماسیكۆت، پێیوایە، “توانای ڕووسیا بۆ مانۆڕكردنی هێرشبەرانە لە ئاستێكی گەورەدا لە ئێستادا ڕووبەڕووی ئاستەنگی ڕاستەقینە دەبێتەوە”.
