ئێمە لە تۆرە کۆمەڵایەتیەکان

چاوپێکەوتن

مونیرە عەلی عەبدولعزیز: شتێك نییە بەناوی حكومەتی هەرێم ‌و جگە لە یەكێتی و پارتی، لایەنەكانی دیكە دیكۆرن

خەڵك-سەعد مەلا عەبدوڵلا گوڵپی

 

لە دیمانەیەكیدا لەگەڵ (خەڵك) مونیرە عەلی عەبدولعەزیز ئەندامی مەكتەبی سیاسی بزووتنەوەی ئیسلامی ڕایدەگەیەنێت، چەندین ساڵە بزووتنەوە كراوەتە ئامانج و هاوكات باس لەوەش دەكات بە مەرج بەشداری حكومەتی هەرێمی كوردستان دەكەین.

خەڵك: پەیوەندی نێوان لایەن ئیسلامییەكان چۆنە دەبینن بەتایبەت دوای ئەنجامدانی هەڵبژاردنەكانی كوردستان كە ساردییەك لە پەیوەندییەكاندا بەدی دەكرێت؟
مونیرە عەلی: سوپاس بۆ تۆڕی میدیایی خەڵك كە بەردەوام لەبەرەی خەڵكدان و هەوڵ دەدەن ڕاستییەكان بڵاوبكەنەوە، پەیوەندی ئیسلامییەكان پەیوەندی مەبدەئیمان پێكەوە هەیە و خاڵی هاوبەشمان زۆرە پێكەوە، پێشتر زۆر هەوڵماندا كار لەسەر خاڵە هاوبەشەكانی نێوان هەرسێ لامان بكەین و لەگەڵ گروپ و ڕیكخراوەكانی دیكە، بەڵام جیاوازی سیاسیمان هەیە تاكو ئێستا نەمانتوانیوە یەكگوتاری سیاسیمان هەبێت، هەرچەندە ئێمە وەكو بزووتنەوە زۆر هەوڵمانداوە هەرسێ لایەنەكە بگەنە ڕێككەوتن و یەك گوتارمان هەبێت بەهێز و ڕێزلێگیراو بێت، ئەوەی لایەنانە لەناوو ساحەی كوردستان دەنگیان زاڵە كە دەسەڵاتیان هەیە و گەورەن، بۆیە پێویستە لایەن ئیسلامییەكان و حزبە بچوكەكان یەك بگرن بۆ ئەوەی لەبەرانبەر ئەم دەسەڵاتە قسەیەكیان هەبێت و گوێیان لێبگیرێت، بەڵام بەداخەوە ئەو هەوڵانەی ئێمە دامان ئەنجامی ئەوتۆی نەبوو.

” بزووتنەوەی ئیسلامی چەندین ساڵە كراوینەتە ئامانج و لەو بەرە ئیسلامیەشدا دووجار كراینە ئامانج”

خەڵك: هۆكاری شكستی لیستی ئیسلامی چ بوو، دەبوو لەسەرەتا لیستەكە نەكرایە، یان هۆكاری دیكەی لە پشتەوە بوو؟
مونیرە عەلی: لیستە ئیسلامییەكە دەبوایە بكرایە و هەنگاوێكی زۆر باش بوو خەڵكێكی زۆری دڵخۆش كرد، بەڵام لەوەدەچێت بەبەرنامەیەكی داڕێژراو نەبووبێ، گلەییەكیش لەو برایانەی وەكو چاودێر و ڕێكخراوە ئیسلامییەكان كە چاودێر بوون بەسەر پڕۆسەكەوە هەڵوێستیان نەبوو لەو یەكگرتنەی نێوان بزووتنەوە و یەكگرتوو، پشتگیریان لە لیستەكە نەكرد و خۆیان لە پڕۆسەكە دزییەوە، تەنها بە دێڕێك هەڵوێستی خۆیان وت، ئەویش ئەوەیە كە “كۆمەڵی ئیسلامی ئامادە نەبوو لیستی ئیسلامی دروست بكرێت” و دواتر هیچ پشتگیرییەكی لیستەكەشیان نەكرد.
هۆكاری دەرەكیش هەبوون، بەڵنیاییەوە ئەو لایەنانەی دیكە بەهیچ شێوەیەك نایانەوێت دوو حزبی ئیسلامی ڕێكبكەون، ئیسلام ناحەزی زۆرە و ناحەزان كاریان لەسەر ئەوە كردووە و بەردەوام نەخشەیان داڕشتووە بۆ پەرتەوازەكردنی ئیسلامییەكان و سەركەوتووش بوون لەو هەنگاوەیاندا، بەڵام وەكو ئەوەی بڵێین لیستی ئیسلامی شكستی هێناوە، شكست لە پڕۆسەیەكی تەندروستدا دیاری دەكرێت، ئەو هەڵبژاردنانەی لە هەرێم و بەغدا بەڕێوەدەچێت، پڕۆسەیەكی ناتەندروست و شەفاف نییە و پڕە لە ساختەكاری و بەهەموو شێوەیەك دەسەڵات دەستی هەیە لە ناوەندەكانی دەنگدان، كۆمسیۆنی باڵای هەڵبژاردنەكان سەربەخۆ نییە، لەبەرئەوە ناتوانین پێی بڵێین شكست، كەس نازانێت دەنگەكان بەرەو كوێ دەڕوات؟ پێشمانوایە دەنگێكی زۆرمان هێناوە بەتایبەت بزووتنەوە لە هەردوو هەڵبژاردنەكان دەنگی خۆمانمان هێناوە، بەڵام ئەو ساختەكارییەی كراوە لەبەرانبەرمان بەو شێوەیە دەرچوو، جگە لەوەش بزووتنەوەی ئیسلامی چەندین ساڵە كراوینەتە ئامانج و لەو بەرە ئیسلامیەشدا دووجار كراینە ئامانج.

“لەناو بزووتنەوەی ئیسلامی، كەسانێك هەن بڕوایان بە هەڵبژاردن نییە، لەوانەیە بزووتنەوە بچێتە شاخ چەند هەزار كەسێك لەگەڵی بڕوات، بەڵام بۆ حكومەت لەگەڵی نییە، پێیوایە حەرام و گوناحە”

خەڵك: لە ساڵانی ڕابردوودا زۆرێك لە هاووڵاتی كە باوەڕدارن، بەڵام دەنگ بە ئیسلامییەكان نادەن و لەبەرانبەردا دەنگ بە عەلمانیەكان دەدەن، ئایا ئەمە كەمتەرخەمی ئیسلامییەكانە لە هەڵە نیشاندانی ڕووی جوانی ئیسلام یاخود هەڵەتێگەیشتنی ئەو كەسانەیە؟
مونیرە عەلی: هەردوو هۆكارەكە هەیە، بەتایبەت لەناو بزووتنەوەی ئیسلامی، كەسانێك هەن بڕوایان بە هەڵبژاردن نییە، لەوانەیە بزووتنەوە بچێتە شاخ چەند هەزار كەسێك لەگەڵی بڕوات، بەڵام بۆ حكومەت لەگەڵی نییە، پێیوایە حەرام و گوناحە، بزووتنەوە بەداخەوە هەر لە سەرەتاوە نەیتوانیوە فیكرێكی یەكگرتوو لەناو حزبەكەی دروست بكات و بەردەوام جیاوازی فیكری لەنێو حزبەكەیدا هەیە، ئەو ئازادییە فیكرییەشی كە هەیە، لە هیچ حزبێكی دیكەدا نییە، ئەمە وایكردووە زۆربەی ئەندامەكانی بزووتنەوە دەنگ نادەن، یاخود كە دەیبینن پڕۆسەكە پڕ لە ساختەكارییە بۆ جاری دوووەم ناڕوات بۆ دەنگدان، چونكە متمانەی بە دەنگدانەكە نییە، لەبەرئەوە خەڵك سارد بوەتەوە، جگە لەوەش بەداخەوە، ئاڕاستە سەلەفییەكان زۆر كاریگەرییان هەیە لەسەر ئیسلامییەكان و نەیانتوانیوە تاكو ئێستا پشتگیری لەو لایەنە ئیسلامییە بكەن یان لەو بەرنامە ئیسلامییەی هەیانە بۆ ئەوەی ببێتە حاكم، هەمیشە بە ئاڕاستەی پێچەوانەوە دەڕۆن و بەپێچەوانەی هێزە ئیسلامییەكان هەنگاو دەنێن.

“شتێك نییە بەناوی حكومەتی هەرێم، ئەوەی هەیە دەسەڵاتی ئەو دوو حزبەیە، دەبینیت لە دەرەوەش مامەڵە لەگەڵ ئەو حزبانە دەكرێت، كاك مەسعود سەرۆكی هەرێمیش نییە، بەڵام لە وڵاتان وەكو سەرۆكێك پێشوازی لێدەكرێت”

خەڵك: حكومەتی هەرێم بەهۆی ڕێككەوتنی لایەنەكانەوە زۆر دواكەوت، لەكاتێكدا هەرێم و ناوچەكە لەژێر مەترسیدایە، بۆچوونی ئێوە وەكو بزوووتنەوە چۆنە؟
مونیرە عەلی: وای بۆدەچم شتێك نییە بەناوی حكومەتی هەرێم، ئەوەی هەیە دەسەڵاتی ئەو دوو حزبەیە، دەبینیت لە دەرەوەش مامەڵە لەگەڵ ئەو حزبانە دەكرێت كە دەسەڵاتیان هەیە، كاك مەسعود سەرۆكی هەرێمیش نییە، بەڵام لە وڵاتان وەكو سەرۆكێك پێشوازی لێدەكرێت، ئەمەش ئەوە دەردەخات كە هەرێمی كوردستان هەرێمێكی دامەزراوەیی نییە، تاكو لەڕێگای دەزگاكان پەیوەندی نێوخۆیی و دەرەكی دروست بكات.
هەرێم دەسەڵاتی ئەو دوو حزبەیە، پێشتر ئەو لایەن و كەسانەش چۆن مامەڵەیان لەگەڵ كردوون ئێستاش بەو شێوەیە مامەڵەیان لەگەڵ دەكەن، ئێستاش ئەو حكومەتە كە دروست نەكراوە كاریگەری لەسەر خەڵك هەیە، دەبوو زۆر زووتر ئەو كابینەیە ڕابگەیەنرایە، بەداخەوە لە هەرێم پڕۆسەیەكی هەڵبژاردن دوای چەند مانگێك لە نیوەشەودا ئەنجامەكەی ڕادەگەیەنرێت و دوای چەندین مانگی دیكەش ئەوكات حكومەت پێكدەهێنرێت كە تا ئێستا لایەنەكان ڕێكنەكەوتوون، داوایان لێدەكەین پەلە بكەن لە دروستكردنی.
لایەن و وڵاتانی دەرەوەش مامەڵە لەگەڵ یەكێتی و پارتی دەكەن وەكو حكومەتی هەرێم هیچ پەیوەندییەك لەگەڵ وڵاتان نییە، ئەوەی هەیە ئەو دوو دەسەڵاتەیە و وڵاتانی دەرەوەش ئیعترافیان كردووە وەكو دوو هێز لە هەرێم دەڕوانن و سەردانەكانیان زیاتر لەگەڵ ئەو دوو هێزەیە.

خەڵك: بۆچی لایەنەكانی دیكە دەچنە نێو حكومەتەوە؟
مونیرە عەلی: هەر وەكو دیكۆر ڕۆیشتوون، چەند ساڵە كە پێشتر و ئێستاش دەڕۆن زیاتر دەوری دیكۆریان بینیوە، خۆیان پێیان وایە بۆ خزمەتكردنی خەڵك دەڕۆن، حكومەتی هەرێم كاریگەری لەسەر خەڵك هەیە، بەڵام وەكو پەیوەنییەكانی لەگەڵ دەرەوە هیچ كاریگەرییەكی ئەوتۆی نییە، چونكە حكومەت دامەزراوەیی نییە، بەڵكو ئەو دوو حزبەیە قسە دەكەن، پەیوەندی دروست دەكەن، دەیپچڕێنن، نەوت دەفرۆشن، ئەوانە هیچ پەیوەندییەكی بە پەڕلەمان و حكومەتەوە نییە و تەنها تەعبیرە لەو دوو دەسەڵاتەی كە هەیە.

“بەرژەوەندی خەڵك بەردەوام دروشمێكی درۆینەی بریقەدارە كە هەموو لایەنەكان بەكاریدەهێنن، لەكاتی گفتوگۆكانیشیاندا ئەوەی بە خەیاڵایاندا نایەت و ئەوەی لەسەر مێزی گفتوگۆكان باسی لێوە ناكرێت بەرژەوەندی خەڵكە”

خەڵك: لایەنەكان باس لەوە دەكەن لەبەر بەرژەوەندی خەڵك پێكهێنانی حكومەت دواخراوە، پێتوایە ئەمە بەرژەوەندی خەڵكە یان حزب؟
مونیرە عەلی: بەرژەوەندی خەڵك بەردەوام دروشمێكی درۆینەی بریقەدارە كە هەموو لایەنەكان بەكاریدەهێنن، لەكاتی گفتوگۆكانیشیاندا ئەوەی بە خەیاڵایاندا نایەت ئەوەی لەسەر مێزی گفتوگۆكان باسی لێوە ناكرێت بەرژەوەندی خەڵكە، ئەوەی ئێستا هەیە بەرژەوەندی حزبەكانە و پچڕینی ئیمتیازاتە، ئێمە پێشتریش بینیمان ئەو حزبانەی ئۆپۆزسیۆن بوون زۆر خۆیان بە دۆستی خەڵك دەزانی لەكاتی گفتوگۆكانیشدا بۆ كابینەی پێشوو هەر ئەوان بوون پۆست و ئیمتیازاتیان زیاد كرد، ئەمانە هەموو زیاد كرا لەپێناو بەرژەوەندی حزبەكانیاندا بووە و هیچ پەیوەندییەكی بە بەرژەوەندی خەڵكەوە نەبوەو نییە.

خەڵك: پێتوایە حكومەتی داهاتوو بێتە حكومەتی هاووڵاتی؟
مونیرە عەلی: ئەوە جارێ قورسە، تاكو ئەو دوو حزبە ئەو دەسەڵاتە ڕەهایەیان هەبێت، ناتوانیت بڵێیت حكومەتی هاووڵاتی، بەڵام جیاوازییەكیش دەبێت، گۆڕینی سەرۆكی كابینەكە پێموایە جیاوازییەكی دەبێت و ئەمجارەش ئەو قەیرانانەی پێشتر هەبووە چارەسەر بكرێت و لەمەودوا ئەو دیوارە ناشرینەی لەنێوان خەڵك و حكومەتدا هەبوو، بڕوخێنرێت و خەڵك حكومەت بە هیچ خۆی بزانێت نەك ئەو دوو حزبە.

خەڵك: پارتی چەند جارێك داوای كردووە بزووتنەوە بەشداری حكومەت بكات؟
مونیرە عەلی: تاكو ئێستا پارتی بە ڕەسمی داوایان لێنەكردووین بەشداری حكومەت بكەین، ئەوەی هەیە لە یەكەم سەردانیاندا ئەو پەیوەندیانەی هەمانبووە نەپچڕاوە و لە پێشتریش چەندین دیدارمان لەسەر ئاستی باڵا هەبووە، لە هەموو پەیوەندیەكاندا تەئكید لەوە كراوەتەوە بە حسابی كورسی مامەڵە لەگەڵ بزووتنەوە ناكەن، چونكە قورسایی و خەباتی خۆی هەیە و ئەوەیان لەبەرچاو گرتووە.

“پێشتر لە كابینەیەكدا وەزیری ئەوقافمان بەدەست بووە دەسەڵاتی دانانی مجێورێكی نەبووە، لەبەرئەوە ئەو حزبەی بەشداری لە حكومەت دەكات تەنها كەسێك سوودی لێ دەكات”

خەڵك: هەڵوێستی ئێوە چی بوو؟
مونیرە عەلی: داوامان لێكردوون بە زووترین كات كابینەكە پێكبهێنن ئەگەر ئێمەشی تێدا نەبین، بەڵام هەوڵ بدەن ئەو قەیرانانەی هەیە چارەسەر بكرێن و داواكارییەكانی خەڵك جێبەجێ بكرێن گرنگ نییە بەشداری بكەین یان نا، چونكە پێشتر لە كابینەیەكدا ئەزمونمان هەیە و بەشداریمان كردووە و ڕەمزی بووە، تەنانەت وەزیری ئەوقافمان بەدەست بووە دەسەڵاتی دانانی مجێورێكی نەبووە، لەبەرئەوە ئەو حزبەی بەشداری لە حكومەت دەكات تەنها كەسێك سوودی لێ دەكات و حزبەكەی سوودی لێنابینێت، لەبەرئەوەی دەسەڵاتی نەبووە، ئەگەر بشچینە حكومەت وەكو ئەو دەنگۆیەی هەیە وەزارەتی ئەوقافمان پێبدرێت پێویستە وەكو پێشتر نەبێت و كۆمەڵێك داواكاریمان هەیە، بۆمان جێبەجێ بكرێت لەوانە دەسەڵات بدرێت بە وەزیریەكە، یان چەند پۆستێكی تریش بێت و تەنها وەزیرێكی ڕەسمی نەبێت.

خەڵك: ئەگەر پارتی مەرجەكانتان جێبەجێ نەكات بەشداری حكومەت دەكات؟
مونیرە عەلی: تا ئێستا باس لە بەشداریكردن و بەشدارینەكردن نەكراوە، نە ئەوان بە ڕەسمی بە ئێمەیان وتووە و نە ئێمەش وەڵامان داونەتەوە، بەڵام ئەگەر بكرێت واباشترە.

“ئەوەی تا ئێستا خۆمانمان پێڕاگرتووە ئەو “قەرزولحەسەنە”و ئابوونەیە كە لە ئەندامانی وەردەگرین و هیچ سەرچاوەیەكی دارایمان نییە”

خەڵك: لەماوەی ڕابردوودا بزووتنەوە كۆمەڵێك جموجوڵی سیاسی دەست پێكرد، هۆكارەكەی چی بوو دەتانەوێ چی بكەن؟
مونیرە عەلی: بزووتنەوە لە ئاستی ناوخۆیی لاواز بووە، بەڵام لە ئاستی دەرەوە بەهێزە و لە پەیوەندییە دەرەكییەكاندا بزووتنەوە قورسایی خۆی هەیە و ئەو سەردانانەی ئێمەش لەسەر بانگهێشتێكی فەڕمی سەرۆك كۆماری عیراق بوو بۆ بەغدا و لەگەڵ سەرجەم لایەنە سیاسییەكانیش كۆبوونەتەوە و پەیوەندییەكانی بزووتنەوە لەگەڵ ئەو لایەنانە نوێ كراونەتەوە، هەروەها لەنێوخۆشدا لەگەڵ لایەنە سیاسییەكان كۆبووینەتەوە و پەیوەندییەكانمان باشە.
قەیرانێك بەرۆكی خەڵك و حزبەكانی گرتووە، بەتایبەت ئەو قەیرانە لەسەر بزووتنەوە زۆر قورسە كە حزبێكە 6 ساڵە دینارێكی لە هیچ حكومەت و وڵاتێك بەدەست نەگەیشتووە ئەوەی تا ئێستا خۆمانمان پێڕاگرتووە ئەو “قەرزولحەسەنە”و ئابوونەیە كە لە ئەندامانی وەردەگرین و هیچ سەرچاوەیەكی دارایمان نییە.

خەڵك: لە عیراق هەوڵتان نەداوە پۆستێك لە حكومەتی عیراق بەدەستبهێن؟
مونیرە عەلی: ئێستا دۆخەكە گۆڕاوە و ئەمریكا پشتگیری لەوە دەكات هێزە سونییەكان خۆیان دەرخەن و بەشداری لە حكومەت بكەن، بۆ ئەمەش هەوڵێك هەیە كە بزووتنەوە بەشداری بكات، بەڵام ئەم سەردانانەی ئەمجارە زیاتر بۆ ئەوە بووە پەیوەندییە سیاسییەكانی بەهێز بكات.

“لە ئێستادا هەوڵێك هەیە بۆ “یارییەك” ئەمریكا هێزە سونیییەكان بەكاربهێنێت بۆ ئەوەی لە كابینەی داهاتوودا بەشداری بكەن لە حكومەت”

خەڵك: پشتگیری ئەمریكا لەلایەنە سونییەكان، مەترسییەكەو ڕوو لە ناوچەكە دەكات یان شتێكی باشە؟
مونیرە عەلی: بەداخەوە ئەمریكا یارییەكی زۆر قێزەون دەكات لە ڕۆژهەڵاتی ناوەڕاست و بەتایبەتی لە عیراق، پۆلبریمەر لە یاداشتەكەیدا دەڵێَت ئێمە عیراقمان داگیركرد و بە ویستی خۆمان تەسلیمی ئێرانمان كرد، ئەمەش وایكرد دەرگای بەشداریكردن بۆ هێزە سونییەكان دابخرێت و پەرتەوازەش بوون، تەنانەت ڕابەری گشتی لە گەشتەكەیدا بۆ بەغدا وتی، یەك سەركردەی سونی لە بەغدا نەبوون تاكو لەگەڵیان دابنیشین و هەموویان عیراقیان جێهێشتووە، ئەمەش وایكردووە هێزە سونییەكان لە عیراق هەست بە ئاسایش ناكەن و لە پڕۆسەی سیاسی كشاونەتەوە، بەڵام لە ئێستادا هەوڵێك هەیە بۆ “یارییەك” ئەمریكا ئەو هێزە سونیانە بەكاربهێنێت بۆ ئەوەی لە كابینەی داهاتوودا بەشداری بكەن لە حكومەت، تائێستا گفتوگۆی لەسەر دەكرێت و ئێستاش بە ڕەسمی سعودیە باڵیۆزی خۆی لە بەغدا كردوەتەوە، ئەمەش لەوانەیە كاریگەری باش و خراپی خۆی هەبێت.

“هیچ ئیعترافێك بە هێڵی گۆڕانكاری ناكەین”

خەڵك: ماوەیەك لەمەوپێش شەش ئەندامی سەركردایەتی دەستیانلەكاركێشایەوە، چارەنووسی ئەو كەسانە لە بزووتنەوە بەكوێ گەیشتووە؟
مونیرە عەلی: ئەوانە برا و هاوكاری ئێمە بوون، بزووتنەوە ئەو قەیرانە داراییەی هەیەتی كەم كەس هەیە تەحەمولی ئەو دۆخە بكات، بەبێ پارە و بودجە بجوڵێت و كار بكات، بەتایبەتی كەسانێك كە بەرپرسیارێتیشان هەبێت، لەبەرئەوە هەندێك كەس تەحەمولی ئەو دۆخە ناكەن، بەڵام ئەو كەسانەی دەستیان لەكاركێشاوەتەوە وەك خۆیان ئاماژەی بۆدەكەن لە پۆستەكانیان دەستیان لەكاركێشاوەتەوە نەك لە حزب، ئێمەش بە نێوەندگیری و چاودێری لیژنەی باڵای فەتوای بزووتنەوە لەگەڵیان دانیشتووین و قسەمان لەگەڵ كردوون، بڕیاریانداوە بزووتنەوەن، بەڵام ئەندامی سەركردایەتی نین و گفتوگۆش لەگەڵیان بەردەوامە.

خەڵك: ئەوان هیڵی گۆڕانكارییان دروست كردووە؟
مونیرە عەلی: ئێمە هیچ ئیعترافێك بەو هیڵە ناكەین، بەداخەوە ئەوان خۆشیان نازانن چییان دەوێت، لەلایەك دەڵێن با كار بە پەیڕەوو پڕۆگرام بكرێت كە لەو پەیڕەوەدا بەهیچ شێوەیەك ڕێگا بە كوتلە و كوتلەكاری نادات، وەكو هێڵ مامەڵەیان لەگەڵ ناكەین، بەڵكو ئێمە بەپێی پەیڕەو و وەكو تاك قسەیان لەگەڵ دەكەین.

چاوپێکەوتن

عادل عوسمان: وڵاتانی داگیرکەر سنوورەکانیان بۆ لێدان لەتێکۆشانی گەلی کورد سڕیوەتەوە

خەڵک – نزار جەزا

ئەندامێکی دەستەى بەڕێوەبەریی بەرەی دیموکراسیی گەل لەگفتوگۆیەکیدا لەگەڵ (خەڵک) باسی لەیەکگرتوویی گەل و یەکێتیی هێزە سیاسییە کوردییەکانی کرد، کە چەندێک گرنگە بۆ ڕووبەڕووبوونەوەی داگیرکەران، چونکە داگیرکەران سنوورەکانیان بۆ لێدان لەتێکۆشانی گەلی کورد سڕیوەتەوە، هاوکات بەگرنگیزانی هێزە سیاسییەکانی باشووری کوردستانیش بەرگری لەیەکێتیی نەتەوەیی کورد بکەن و نەبنە مۆرەى شاراوەی دەستی داگیرکەران.

 

عادل عوسمان ئەندامی دەستەى بەڕێوەبەریی بەرەی دیموکراسیی گەل بە(خەڵک)ی ڕاگەیاند، دۆخی باشووری کوردستان دۆخێکی تایبەتە و دابڕاو نییە لەپەیوەندییە گشتییەکەی گەلی کورد، کە لە هەر چوار پارچەدا دابەشکراوە بەسەر چوار دەوڵەتدا، کە شیکردنەوەى لەسەر ناکرێت، لەبەرئەوەی تێکۆشانی گەلی کورد سنوورەکانی تێپەڕاندووە و داگیرکەرانیش سنوورەکانیان سڕیوەتەوە.

   داگیرکەرانی کورد یەکێتییەکیان لەنێوان خۆیاندا دروستکردووە و سنوورەکانیان بۆ لێدان لە تێکۆشانی گەلی کورد سڕیوەتەوە

زیاتر ڕوونیکردەوە، دەبینرێت تورکیا بەئاسانی دێتە سنووری باشووری کوردستان و ڕۆژئاوای کوردستان، سەبارەت بە ڕۆژهەڵاتی کوردستانیش بەهۆی کۆماری ئیسلامی ئێرانەوە تورکیا ناتوانێت ئەگەرنا بۆ ئەوێش دەچوو، بەڵام لەڕێگەی کۆماری ئیسلامی ئیرانەوە کوشتن و سەرکوتکردنی کورد لەڕۆژهەڵاتی کوردستان بەڕێوەدەچێت، بۆیە داگیرکەرانی کورد یەکێتییەکیان لەنێوان خۆیاندا دروستکردووە و سنوورەکانیان بۆ لێدان لە تێکۆشانی گەلی کورد سڕیوەتەوە.

 

وتیشی: گەلی کوردیش دابەشبووە بەسەر دوو هێڵدا، هێڵێکیان دەستەمۆی داگیرکەرانە، کە بەپێی سنوورە تەقلیدییەکانی کۆن کە داگیرکەران لەکوێ ویستیان بەکاریدەهێنن و پارچەبوون لەناو ماڵی کورددا دروستدەکەن. هێڵەکەی دیکەش مەیلە بەلای تێکۆشانی دیموکراتیک و ئازاد، کە پەکەکە ڕابەرایەتی دەکات و سنوورەکانی سڕیوەتەوە و لەهەرکوێیەکدا پێویست بکات، بۆ هاوکاری و تێکۆشان و شەڕ لەدژی داگیرکەری و بەرگری لەگەل بەشداری دەکات.

   بونی هێزە شۆڕشگێڕییەکان بە هۆکاری دەستدرێژییەکانی داگیرکەران دەزانرێت، لەکاتێکدا داگیرکەران جیاوازی لەنێوان حزبەکان و هەر شوێنێکی کوردستاندا ناکەن.

زیاتر ڕوونیکردەوە، هێزەکانی باشووری کوردستان ستاتۆیەکیان بەناوی حکومەتى هەرێمەوە دروستکردووە، بەپێی ئەو پێوانانە دەڕۆنە پێشەوە، کە “لە هەرکوێدا لەبەرژوەندیدابوو ئاوا بکات و لەکوێ لەبەرژەوەندی نەبوو لێبدات”، بۆیە سنوورەکانیان وا لێکردووە، بەبەهانەى ئەوەی پەکەکە لەباشووری کوردستان هەیە بۆیە تورکیا وا دەستی واڵا بووە، و بەهۆی ئەوەی پژاک و حزبەکی دیموکرات و کۆمەڵە هەیە ئێران دەستی واڵا بووە، واتە بونی هێزە شۆڕشگێڕییەکانی گەلی کورد بە هۆکاری ئەم دەسترێژییانە دەزانن، لەکاتێکدا ئەو دەوڵەتە داگیرکەرانە بۆ نەمانی گەلی کورد هەوڵدەدەن و جیاوازی لەنێوان حزبەکان و هەر شوێنێکی کوردستاندا ناکەن.

 

ئەوەشی ڕوونکردەوە، وڵاتانی داگیرکەر هاوکاری ئەو هێزانەش دەکەن، کە بەشداردەبن لەقڕکردن و لەناوبردنی ئەو هێزانەى نەخشەکانی دوژمن تێکدەشکێنن و خەبات دەکەن، بەڵام لەئەزموونەکانی ساڵانی پێشوودا ئەوە سەلماوە کە سیخوڕ و خائینەکان چییان بەسەرهاتووە و داگیرکەران هەموو کوردی بەیەکچاو سەیرکردووە و سزادراون.

   ئەوەی لەکوردستان دەگوزەرێت شەڕێکی ئاشکرا و شەڕێکی شاراوەیە

ناوبراو ئاماژەى بەئەوەشدا، یەکگرتویی گەل یەکێتیی هێزە سیاسییەکانە، واتە ئەگەر یەکگرتویی گەل توانی ئەوە بسەپێنێ بەسەر هێزە هێزە سیاسییەکاندا، ئەوا دەتوانرێت ئالوگۆڕ لەڕەوشی هێرشکانی داگیرکەر ڕووبدات، بۆیە ئەوەی داگیرکەر بەشوێنیەوەیەتی پارچەکردنی ناو گەلە و پارچەکردنی هێزە سیاسییەکانی ناویەتی، بۆئەوەی نەتوانن ئەو یەکێتییە دروستبکەن، کە دڵخوازی تێکۆشانی گەلی کوردە بۆ ئازادی، بۆیە ئەوەی لەکوردستان دەگوزەرێت شەڕێکی ئاشکرا و شەڕێکی شاراوەیە.

   پێویستە هێزە سیاسییەکانی باشووری کوردستان نەبنە مۆرەى شاراوەی دەستی داگیرکەران

لەبارەى ئەو دوو جۆرە شەڕەوە زیاتر دووا و وتی: شەڕە ئاشکراکە دیارە داگیرکەر بەچەک و تەقەمەنی و تەکنەلۆژیا و سەربازەکانیەوە هێرش دەکات، بەڵام  شەڕە شاراوەکە کارەساتە، چونکە لەڕێگەی سیخوڕییەوە ئەنجامدەدرێت و هیچ هێزێکیش خۆی ناکات بەبەرپرسیار، بۆ لێپرسینەوە لەو کارە سیخوڕییانە، ئەمە خەتەرییەکەی دروستکردووە و یەکێتی نەتەوەیی کورد پەکدەخات، بۆیە گرنگە ئەو شەڕە بەشارەوەیی نەکرێت و هێزە سیاسییەکانی باشووری کوردستانیش بەرگری لەیەکێتی نەتەوەیی کورد بکەن و نەبنە مۆرەى شاراوەی دەستی داگیرکەران.

 

ئەوەشی خستەڕوو، گەلی کورد خۆی یەکگرتویی گەلی پێکهێناوە بۆنمونە کوردانی هەر پارچەیەکی کوردستان دەبینرێت لەپارچەیەکی دیکە شەهید دەبێت، بۆیە پێویستە یەکێتیی هێزە سیاسییەکانیش لەسەر ئەم بنچینەیە پێکبێت و بگاتە ئاستێکی باڵا.

بەردەوام بە لە خوێندنەوە

چاوپێکەوتن

عەبدولستار مەجید: دۆخی كشتوكاڵ لە قۆناغێكی خراپدایە

خەڵك – بەشی هەواڵ
عەبدولستار مەجیدر سەرۆكی لیژنەی كشتوكاڵ لە پەرلەمانی كوردستان پێیوایە كە كشتوكاڵ لە دۆخێكی خراپدایە و رەخنەش لە حكومەت دەگرێت كە وەزیرەكانی دەستكراوە نەكردووە، عەبدولستار مەجید باس لەوەش دەكات كە ئەو كاتەی وەزیری كشتوكاڵ بوو، بە هۆی قەدەغەكردنی چەند بەرهەمێكی توركیا، سەرۆك و سەرۆك وەزیرانی توركیای ناچاركرد كە پەیوەندی بە نێچیرڤان بارزانی سەرۆكی ئەوكاتی حكومەتەوە بكەن.

عەبدولستار مەجید سه‌رۆكی لیژنه‌ی كشتوكاڵ و وەزیری پێشووی كشتوكاڵ سه‌باره‌ت به‌ دۆخی كشتوكاڵ له‌هه‌رێمی كوردستان وتی” بێگومان دۆخی كشتوكاڵ به‌ قۆناغێكی خراپدا تێده‌په‌ڕێت پێشم وایه‌ زیاتر بۆ تێڕوانیین و عه‌قڵیه‌تی حكومڕانی هه‌رێمی كوردستان ده‌گه‌ڕێته‌وه‌ كه‌ له‌ناخه‌وه‌ قه‌ناعه‌تیان به‌وه‌ نییه‌ سێكته‌ری كشتوكاڵ سێكته‌ری یه‌كه‌م بێت بۆ دروستكردنی ئابورییه‌كی به‌هێز و ژێرخانی ئابورییه‌كی به‌هێز چونكه‌ ئێمه‌ وڵاتێكی كشتوكاڵیین ، هه‌ر وڵاتێكیش كه‌ كشتوكاڵی بێت به‌ پله‌ یه‌ك گرنگی به‌ كشتوكاڵ ده‌دات ، واته‌ سێكته‌ری یه‌كه‌می ده‌بێت بۆیه‌ دۆخی كشتوكاڵ و بارودۆخی كشتوكاڵ و به‌رهه‌می ناوخۆی خۆمان هه‌میشه‌ به‌ڕاستی خراپ بووه‌.”

ئەوەش دەخاتەڕوو كە ئەو كاتەی ئەو وەزیری بوو دۆخی كشتوكاڵ بەم شێوەیە خراپ نەبوو، “چونكه‌ به‌پێی خوێندنه‌وه‌ی خۆم و ته‌ماشاكردنی بارودۆخ و به‌رهه‌می ناوخۆی خۆمان و لێدوانه‌كانی جوتیاران و به‌رپرسانی شاره‌زا له‌م بواره‌دا ئێستا به‌خراپترین حاڵه‌تدا تێده‌په‌ڕێت”.

وه‌زیری پێشووی كشتوكاڵی حكومه‌تی هه‌رێمی كوردستان ئه‌وه‌شی وت “ئێمه‌ له‌سه‌رده‌می خۆماندا، واته‌ له‌م چوارساڵه‌ی 2014 بۆ 2018 له‌ كۆتا ساڵ به‌تایبه‌تی 2017 ، یانزه‌ به‌رهه‌می خۆمان نارده‌ وڵاتانی ده‌ره‌وه‌ بۆ نموونه‌ی په‌تاته‌ی ئێمه‌ 500 ته‌نی په‌تاته‌ی هه‌رێمی كوردستان بردرا بۆ وڵاتی سعودیه، زۆر به‌رهه‌ممان له‌ پێداویستی وڵاتی خۆمان زیاتربوو بۆیه‌ هه‌وڵماندا له‌ده‌ره‌وه‌ بازاڕی بۆ بكه‌ینه‌وه‌، وه‌ هه‌نگوینی ئێمه‌ بردرا بۆ وڵاتی ئیمارات، برنجی ئێمه‌ بردراوه‌ بۆ وڵاتی سودان ئێمه‌ به‌رهه‌می زۆر نایابمان هه‌بووه‌ به‌ڵام پێویسته‌ ئه‌و به‌رهه‌مه‌ی كه‌ هه‌یه‌ چۆن ساغ بكرێته‌وه‌، یه‌كه‌میان پێویسته‌ له‌ناوخۆماندا وشیارییه‌كی هاوڵاتیان هه‌بێت كه‌ به‌رهه‌می خۆماڵی خۆمانیان له‌ به‌رهه‌می دیكه‌ پێ باشتر بێت، واته‌ تا به‌رهه‌می خۆمان وه‌ستا بێت ، ده‌ست بۆ به‌رهه‌می بێگانه‌ نه‌به‌ن، ئه‌م پاره‌یه‌ بۆ گیرفانی جوتیاری وڵاتی خۆمان بێت باشتره‌. دووه‌م پێویسته‌ ده‌سه‌ڵات، وه‌زاره‌تی بازرگانی به‌تایبه‌ت و وه‌زاره‌تی كشتوكاڵیش به‌ پله‌ی دوو ، هه‌وڵ بده‌ن بازاڕ بۆ به‌رهه‌می هه‌رێمی كوردستان ببیننه‌وه‌، جا عێراق باشترین بازاڕه‌ بۆ ئێمه‌ یان وڵاتانی دیكه‌ بۆ ئه‌وه‌ی به‌رهه‌مه‌كان ساغ ببنه‌وه‌، سێیه‌م ئه‌گه‌ر خه‌ڵك به‌رهه‌مه‌كانی ئێمه‌ی نه‌كڕییه‌وه‌ بۆ نموونه‌ ساغ نه‌بویه‌وه‌، وه‌ نه‌شمان توانی له‌ده‌ره‌وه‌ بازاڕی بۆ بدۆزینه‌وه‌ پێویسته‌ ئێمه‌ كارگه‌ی له‌ قوتونان له‌ هه‌رێمی كوردستان دروست بكه‌ین بۆ ئه‌وه‌ی ئه‌و به‌رهه‌مانه‌ی كه‌ ساغ نه‌بوونه‌وه‌ له‌وێ ساغی بكه‌ینه‌وه‌”.

“من پێم وایه‌ ئه‌و حكومڕانییه‌ی ڕابردوو، كابینه‌ی هه‌شته‌م كراوه‌تر بوو، وه‌زیره‌كان ده‌ستكراوه‌تر بوون وه‌ ده‌سه‌ڵاتیان زیاتر بووه‌، بۆ نموونه‌ له‌سه‌ر جوتیاری خۆمان ناچاربووم شه‌ڕم له‌گه‌ڵ وڵاتی ئێران و توركیا كردووه‌، وه‌ شه‌ڕم له‌گه‌ڵ عێراق كردووه‌، زۆرجار سنورم گرتووه‌ له‌به‌رئه‌وه‌ی كه‌ به‌رهه‌می ناوخۆی خۆمان بفرۆشێت و بازاڕی هه‌بێت.”

عه‌بدولستار مه‌جید ئاماژه‌ی به‌ ڕووداوێك كرد كه ‌له‌ سه‌رده‌می وه‌زاره‌ته‌كه‌ی ئه‌و ڕوویداوه‌ كاتێك كارێكی كردووه‌ به‌مه‌به‌ستی بره‌ودان به‌به‌رهه‌می ناوخۆ، له‌و ڕووه‌وه‌ وتی” بۆ زانیاری باجمان كه‌ له‌سه‌ر سه‌ر به‌رهه‌می ده‌ره‌وه‌ دانابوو، وڵاتی توركیا به‌رهه‌مه‌كانی مریشكیان هه‌نارده‌ی هه‌رێمی كوردستان ده‌كرد و ده‌شیان وت باج ناده‌ین ئێمه‌ش باجمان دانا بۆ ئه‌وه‌ی به‌رهه‌می خۆماڵی خۆمان پاره‌ بكات جوتیاری خۆمان زیان نه‌كه‌ن، به‌بڕیار قه‌ده‌غه‌مان كرد كه‌ به‌رهه‌می توركی بێت بۆ هه‌رێمی كوردستان. ئه‌و كاته‌ ڕه‌جه‌ب ته‌یب ئه‌ردۆغان و داودئۆغلو سێ جار په‌یوه‌ندیان به‌ به‌ڕێز نێچیرڤان بارزانییه‌وه‌ كردبوو كه‌ له‌ ئیتاڵیا بوو له‌گه‌ڵ به‌ڕێز كاك قوباد وتوبییان ئێمه‌ خه‌ریكه‌ په‌یوه‌ندی بازرگانی و ئابوریمان له‌گه‌ڵ هه‌رێمی كوردستان تێكده‌چێت، ئه‌م قه‌ده‌غه‌ و ڕێگرتنه‌ چییه‌؟ ئه‌ویش پرسیاری له‌ من كرد، ئه‌و كاته‌ ئه‌ردۆغان وتبووی پێده‌چێت ئه‌م وه‌زیره‌ پاشخانی په‌كه‌كه‌ و ئه‌و شتانه‌ی هه‌بێت ئه‌ویش وتبووی نه‌وه‌ڵا ئه‌و پاشخانی خۆتانی هه‌یه‌، ئیسلامییه‌، به‌ڕێز كاك نێچرڤان وتبووی با قسه‌ له‌گه‌ڵ وه‌زیری خۆمان بكه‌م وه‌ دواتر وه‌ڵامتان ده‌ده‌مه‌وه‌، له‌ هه‌رێمی كوردستان له‌گه‌ڵ كاك نێچیرڤان یه‌كترمان بینی و بۆم باسكرد كه‌ بابه‌ته‌كه‌ چۆنه‌، مه‌به‌ستم ئه‌وه‌یه‌ پشتگیریشی كردین به‌ڕاستی وه‌زیر ده‌بێت ده‌ستكراوه‌ بێت له‌ سێكته‌ره‌كه‌ی خۆی بۆ ئه‌وه‌ی بتوانێت گرنگی به‌ سێكته‌ر و وه‌زاره‌ته‌كه‌ی خۆی بدات”.

عه‌بدولستار مه‌جید ڕونیكرده‌وه‌” له‌و چه‌ند ساڵه‌ی كه‌ من وه‌زیری كشتوكاڵ بووم وه‌ ئه‌م دوو ساڵه‌ش كه‌ له‌ په‌رله‌مانیین له‌و ڕووه‌وه‌ باس ده‌كه‌م كه‌ به‌ڕاستی كشتوكاڵ له‌دۆخێكی خراپدایه‌، له‌وانه‌یه‌ من ساڵانی زووم .دیراسه‌ نه‌كردبێت و هه‌ڵسه‌نگاندنم بۆ نه‌كردبێت كه‌ چۆنه‌، ئێمه‌ وه‌كو لیژنه‌ی كشتوكاڵ و ئاودێری له‌په‌رله‌مانی كوردستان كۆبونه‌وه‌یه‌كمان ئه‌نجامدا، وه‌ كۆمه‌ڵێك بڕیارماندا یه‌كێك له‌بڕیاره‌كان ئه‌وه‌یه‌ كه‌ بانگهێشتی .به‌ڕێز وه‌زیری كشتوكاڵ و سه‌رچاوه‌كانی ئاو بكه‌ین له‌گه‌ڵ وه‌زیری بازرگانی و پیشه‌سازی كه‌ په‌یوه‌ندییان به‌ به‌رهه‌م و ساغ كردنه‌وه‌ی به‌رهه‌مه‌كانه‌وه‌ هه‌یه‌ ئه‌مڕۆ كاتژمێر یانزه‌ دیاریكراوه‌ ، ئێمه‌ له‌ لیژنه‌ی كشتوكاڵ له‌گه‌ڵیان كۆده‌بینه‌وه‌ بۆ تاوتوێكردن و گفتوگۆكردن و‌ چاره‌سه‌ركردنی ئه‌م قه‌یران و زیانه‌ی كه‌ توشی به‌رهه‌می جوتیارانی خۆمان بۆته‌وه‌ له‌ هه‌رێمی كوردستان”.

له‌ماوه‌ی ڕابردوودا لێدوانێك له‌ میدیا و تۆڕه‌ كۆمه‌ڵایه‌تییه‌ كوردییه‌كان به‌ناوی وه‌زیری ئێستای كشتوكاڵ و ئاودێری حكومه‌تی هه‌رێم بڵاوكرایه‌وه‌ كه‌ ڕایگه‌یاندبوو “ته‌ماته‌ی خۆماڵی به‌كه‌ڵكی دۆشاو نایه‌ت” به‌وهۆیه‌وه‌ كاردانه‌وه‌ی زۆری لێكه‌وته‌وه‌.

به‌ڵام وه‌زیری پێشووی كشتوكاڵی حكومه‌تی هه‌رێمی كوردستان ده‌ڵێت “به‌ ئه‌زموونی باپیران و نه‌نك و دایك و ئه‌وانه‌بێت ئه‌م ته‌ماته‌یه‌ی خۆمان زۆر چاكه‌ بۆ دۆشاوی ئاوی ته‌ماته‌ چونكه‌ به‌ڕاستی كورده‌واری خۆمان كاتی خۆی وه‌ ئێستاش له‌ هه‌ندێك شوێن هه‌ر ئه‌م ته‌ماته‌یه‌ی خۆمان ده‌كرێت به‌ ئاوی ته‌ماته‌ و بۆ چێشت به‌كاردێت له‌بنه‌ڕه‌تدا بۆ زانیاری ئه‌و دۆشاوی ئاوی ته‌ماته‌یه‌ی كه‌ له‌ده‌ره‌وه‌ دێت به‌شێكی مه‌وادی دیكه‌ی له‌گه‌ڵ تێكه‌ڵ كراوه‌ به‌پێی زانیاری وردی من، وه‌كو باینجان یاخود وه‌كو هه‌ندێكی مه‌وادی دیكه‌ی كیمیایی. ئه‌و ئاوی ته‌ماته‌یه‌ی كه‌ له‌ قتودایه‌ بخورێت ئه‌وه‌ی كه‌ تۆزێك گه‌ده‌ و ئه‌وانه‌ی ته‌واو نه‌بێت توشی دڵه‌كزێ و ناڕه‌حتی ده‌كات ، به‌ڵام ئاوی ته‌ماته‌ی خۆمان بخورێت هیچی لێنایه‌ت و زۆر سروشتی یه‌.”

هه‌روه‌ها ئاماژه‌ی به‌وه‌شكرد ” لایه‌نه‌ زانستیه‌كه‌ی ته‌نها ئه‌وه‌یه‌ ده‌ڵێن ته‌ماته‌ی خۆماڵی ده‌نكی زۆره‌ كه‌ ئه‌م ده‌نكه‌ ڕێژه‌یه‌كی كه‌م ئاوی ته‌ماته‌ی لێدروست ده‌بێت، ئه‌وه‌ كێشه‌ نییه‌ هه‌موو ته‌ماته‌كانیش به‌م شێوه‌یه‌ نییه‌.”

عه‌بدولستار مه‌جید ئه‌وه‌شی وت “گوێم له‌به‌ڕێوه‌به‌ری گشتی كشتوكاڵی هه‌ولێر بوو له‌گه‌ڵ ئه‌وه‌ی كه‌ به‌ڕێوه‌به‌ری كارگه‌ی له‌ قتونانه‌ ئه‌وه‌ی هه‌ریر بڕیاریانداوه‌ به‌ وه‌رگرتنی ته‌ماته‌ی جوتیارانی خۆمان بۆ ئه‌و كارگه‌یه‌، ئه‌ی باشه‌ ئه‌گه‌ر به‌كه‌ڵك نایه‌ت چۆن وه‌ری ده‌گرن؟ خۆ ئه‌وان شاره‌زان دیاره‌ به‌كه‌ڵك دێت بۆیه‌ وه‌ریده‌گرن نازانم وه‌زیری كشتوكاڵ ئه‌م قسه‌یه‌ی كردووه‌ به‌ڕاستی خۆم گوێم لێ نه‌بووه‌.”

لە وەڵامی پرسیاری ئەوەی كە كێ له‌بوژاندنه‌وه‌ی كه‌رتی كشتوكاڵ له‌هه‌رێم زیانمه‌ند ده‌بێت؟، عه‌بدولستار مه‌جید وتی” من پێم وایه‌ هه‌ندێك له‌ بازرگانه‌ چاوچنۆكه‌كان كه‌ ته‌نها خه‌ریكی گیرفان پڕكردن و خۆ ده‌وڵمه‌ندكردنن له‌سه‌ر حسابی گیرفانی خه‌ڵكی هه‌ژاری ئه‌م وڵاته‌ زیانمه‌ندده‌بن ده‌نا هیچ كه‌س زیانمه‌ند نابێت به‌ڵكو هه‌موو لایه‌ك قازانج ده‌كه‌ن، هاوڵاتیانی هه‌رێمی كوردستان ئه‌و خه‌ریكه‌ به‌ كشتوكاڵه‌وه‌ قازانج ده‌كات، وه‌ ئه‌وه‌شی كه‌ كشتوكاڵ ناكات به‌رهه‌مێكی نایاب و ته‌ندروست و به‌تام و به‌رهه‌می خۆماڵی خۆی ده‌ست ده‌كه‌وێت، ئه‌ویش قازانج ده‌كات، به‌گشتی حكومه‌ت و ده‌سه‌ڵات قازانج ده‌كه‌ن چونكه‌ ئه‌و پاره‌یه‌یه‌ی ئێمه‌ ناچێته‌ ده‌ره‌وه‌ ده‌چێته‌ گیرفانی هاوڵاتیان و له‌و كۆتاییدا بۆ خه‌زێنه‌ی حكومه‌تی هه‌رێمی كوردستانه‌، ته‌نها خه‌ڵكێكی چاوچنۆك كه‌ ده‌یانه‌وێت هه‌ر قازانجی زیاتر بكه‌ن.”

هه‌روه‌ها زیاتر ڕوونیكرده‌وه‌” خه‌ڵكی بازرگانی ڕێكوپێمان هه‌یه‌، خه‌ڵكی خه‌مخۆرمان هه‌یه‌ به‌ڵام به‌شێكی چ ئه‌وه‌ی سیاسیه‌كه‌ بێت و چ له‌په‌نای سیاسیه‌كان پێی ناڕه‌حه‌تن به‌بوژاندنه‌وه‌ی كه‌رتی كشتوكاڵ، من كاتی خۆی بۆ زانیاریتان یه‌كێك له‌و چین و توێژانه‌ی كه‌ به‌زه‌قی هه‌ستم پێكردووه‌ و به‌ خۆشمیان ڕاگه‌یاندووه‌ كه‌ لێم نیگه‌ران بوون بازرگانه‌كان بوون.”

ده‌رباره‌ی ئه‌وه‌ی ئه‌گه‌ر دۆخی كشتوكاڵ له‌هه‌رێم به‌مجۆره‌ به‌رده‌وام بێت پێشبینی چی ده‌كات؟ له‌وه‌ڵامدا عه‌بدولستار مه‌جید وتی” پێم وایه‌ حكومه‌تی هه‌رێمی كوردستان باری زیاتر قورس ده‌بێت وه‌ خه‌ڵك زیاتر دێته‌ سه‌ر شه‌قام و ناڕه‌زایی زۆر زۆر زیاتر ده‌بێت له‌م كابینه‌یه‌ی حكومه‌تی هه‌رێمی كوردستان چونكه‌ ئه‌وانه‌ی ئێستا خه‌ریكی كشتوكاڵن ئه‌گه‌ر ئه‌وان قازانج بكه‌ن دیاره‌ بارسوكی ده‌بێت بۆ حكومه‌تی هه‌رێمی كوردستان ئه‌گه‌رنا ئه‌وه‌شی دێته‌سه‌ر كه‌حكومه‌ت بیانژیه‌نێت و خه‌م له‌ ژیانیان بخوات، واته‌ بارودۆخه‌كه‌ خراپترو ئاڵۆزتر ده‌بێت.”

VOA

بەردەوام بە لە خوێندنەوە

چاوپێکەوتن

وتەبێژی تەندروستی سلێمانی: دۆخی كۆرۆنا مەترسیدارە، بەڵام لە كۆنترۆڵ دەرنەچووە

خەڵك – بەشی هەواڵ
وتەبێژی تەندروستی سلێمانی ئاماژە دەدات بەوەی دۆخی كۆرۆنا لە پارێزگاكە مەترسیدارە، بەڵام لەگەڵ ئەوەشدا جەختدەكاتەوە كە دۆخەكە لە كۆنترۆڵ دەرنەچووە.

د. یاد نەقشبەندی وته‌بێژی فه‌رمی به‌ڕێوه‌به‌رایه‌تی گشتی ته‌ندروستی سلێمانی له‌باره‌ی دۆخی ته‌ندروستی سلێمانیه‌وه‌ وتی “له‌ئێستادا ژماره‌ی توشبووان له‌ شاری سلێمانی و بگره‌ هه‌رێمی كوردستان و هه‌روه‌ها وڵاتی عێراقیش له‌ هه‌ڵكشاندایه‌، بۆیه‌ ده‌توانم بڵێم ئێمه‌ له‌ شاری سلێمانی له‌ دۆخێكی مه‌ترسیدارداین به‌ڵام به‌مانای له‌ده‌ستده‌رچوونی دۆخه‌كه‌ نایه‌ت یاخود با بڵێن له‌ كۆنتڕۆڵ ده‌رچووه‌ به‌ڵكو هێشتا ئێمه‌ توانیومانه‌ هه‌موو توشبوویه‌كی كۆرۆنا ئه‌وه‌ی كه‌ پێویسته‌ له‌ڕووی زانستییه‌وه‌ پێشكه‌شی بكه‌ین، ڕاسته‌ نه‌خۆشخانه‌كانمان فشارێكی زۆری له‌سه‌ره‌ به‌ڵام هێشتا توانای وه‌رگرتنی نه‌خۆشمان هه‌یه‌، وه‌ دڵنیایی ده‌ده‌م ئه‌گه‌ر بێتو هاوڵاتیان پابه‌ندی ڕێنماییه‌كان بن وه‌ هه‌موو ئه‌و ڕێكارانه‌ی پێویسته‌ بیگرینه‌به‌ر به‌رامبه‌ر به‌ كۆرۆنا ، ده‌توانین له‌ داهاتوودا ئه‌م شه‌پۆله‌ خێرایه‌ خاو بكه‌ینه‌وه‌ بۆ ئه‌وه‌ی بتوانین ته‌واو دۆخه‌كه‌ بخه‌ینه‌ ژێر ئه‌وه‌ی كه‌ هه‌موو تووشبوویه‌ک كه‌ بێته‌ نه‌خۆشخانه‌ وه‌ربگیرێت چونكه‌ ئێمه‌ ترسمان ته‌نها ئه‌وه‌یه‌ ئه‌گه‌ر بێتو به‌م شێوازه‌ هه‌ڵكشان هه‌بێت ڕه‌نگه‌ وای لێبێت نه‌خۆشخانه‌كان ته‌واو پڕبن و نه‌توانرێت هه‌موو توشبوویه‌ک له‌ نه‌خۆشخانه‌ داخڵ بكرێت.”

د. یاد نه‌قشبه‌ندی ئه‌وه‌شی وت” به‌داخه‌وه‌ هه‌ندێک له‌ كه‌ناڵه‌كانی ڕاگه‌یاندن به‌شێوازێكی زۆر نابه‌رپرسانه‌، نامرۆڤانه‌، ناته‌ندروستانه‌، مامه‌ڵه‌ له‌گه‌ڵ بابه‌ته‌كه‌ ده‌كه‌ن كه‌ له‌كۆتایـیدا ئه‌وه‌ی زه‌ره‌رمه‌نده‌ هاوڵاتییه‌ من دڵنیایی ده‌ده‌م تا ئه‌م ساته‌ نه‌خۆشخانه‌كانمان ئه‌وه‌نیه‌ بڵێین پڕنه‌بوون به‌ڵی قه‌ڕه‌باڵغیه‌كی زۆری له‌سه‌ر نه‌خۆشخانه‌كانه‌ ڕاسته‌ ژماره‌یه‌كی زۆری تووشبوومان هه‌یه‌ كه‌ له‌ناو نه‌خۆشخانه‌كاندان به‌ڵام ده‌مه‌وێت ئاماژه‌ به‌ خاڵێک بده‌م ، ئه‌و ژماره‌یه‌ی كه‌ ڕۆژانه‌ له‌ شاری سلێمانی ڕاده‌گه‌یه‌نرێت به‌شێكی كه‌میان پێویستیان به‌ نه‌خۆشخانه‌ هه‌یه‌، زۆرینه‌ی حاڵه‌ته‌كان ده‌توانم بڵێم نیشانه‌یان نییه‌ یاخود نیشانه‌ی مام ناوه‌ندی یان هه‌یه‌ كه‌ ئێستا خۆم توشبوویه‌كم هه‌ڵگری ڤایڕه‌سه‌كه‌م نیشانه‌یه‌كی مام ناوه‌ندم هه‌بووه‌ له‌ماڵه‌وه‌م خۆم جیاكردۆته‌وه‌، ئه‌و چاره‌سه‌رانه‌ی كه‌ ڕێنمایی پزیشكین جێبه‌جێم كردووه‌، ده‌توانم بڵێم قۆناغێكی زۆر باشیشم له‌ نه‌خۆشیه‌كه‌ بڕیووه‌، له‌به‌ر ئه‌وه‌ ده‌بێت زۆر به‌رپرسانه‌ مامه‌ڵه‌ له‌گه‌ڵ بابه‌ته‌كه‌ بكرێت.”

نه‌قشبه‌ندی له‌باره‌ی دۆخی نه‌خۆشخانه‌كانه‌وه‌ ده‌ڵێت” تا ئه‌م ساته‌ نه‌خۆشخانه‌كان ئه‌وه‌ نییه‌ بڵێن پڕبوون، دڵنیابن ئه‌گه‌ر ئه‌و نه‌خۆشخانانه‌ی له‌ ئێستادا له‌ شاری سلێمانی تایبه‌تكراوه‌ ته‌واو پڕبێت، بێگومان ئێمه‌ پلانی دیكه‌مان هه‌یه‌ كه‌ شوێنی تریش ته‌رخان بكه‌ین سه‌ره‌ڕای ئه‌و باره‌ قورسه‌ داراییه‌ی كه‌ له‌سه‌ر شانی كارمه‌ندان و پزیشكانه‌ كه‌ ئیداری و كارگێڕی و كارگوزاریه‌كانیشه‌ چونكه‌ گرنگترین كۆڵه‌كه‌ له‌ ته‌ندروستی دا سه‌رچاوه‌ی مرۆیی یه‌ پاشان بیناو ده‌زگای پزیشكی یه‌ به‌ڵام بێگومان پلانمان هه‌یه‌ ئه‌گه‌ر پێویستمان به‌ نه‌خۆشخانه‌ی تریش بێت له‌ئه‌گه‌ر پڕبوونی شوێنه‌كاندا ، بێگومان ئێمه‌ شوێنی تر ته‌رخان ده‌كه‌ین به‌ڵام تا ئێستا نه‌خێر پڕ نه‌بووه‌، ڕاسته‌ قه‌ڕه‌باڵغی هه‌یه‌ به‌ڵام ئێمه‌ ڕۆژانه‌ ژماره‌یه‌ک چاكبووه‌مان هه‌یه‌ كه‌ له‌ نه‌خۆشخانه‌كانه‌وه‌ ده‌نێردرێنه‌وه‌ ماڵه‌وه‌ پاش ئه‌وه‌ی كه‌ دڵنیاده‌بین كه‌ ڤایڕه‌سه‌كه‌ له‌له‌شیاندا نه‌ماوه‌.”

ده‌رباره‌ی ده‌نگۆی وه‌ستانی پشكنینی كۆرۆنا له‌ سلێمانی وته‌بێژی فه‌رمی به‌ڕێوه‌به‌رایه‌تی ته‌ندروستی سلێمانی ڕه‌تیكرده‌وه‌ و وتی” نه‌خێر ئه‌مه‌ دووره‌ له‌ ڕاستیه‌وه‌، ئێمه‌ ته‌نها له‌ماوه‌ی 48 كاتژمێری ڕابردوودا ، له‌به‌ر ئه‌وه‌ی ئێمه‌ چه‌ند شوێنێكمان هه‌یه‌ كه‌ پشكنین تیایاندا ئه‌نجام ده‌ده‌رێن، یه‌كێک له‌وانه‌ سه‌نته‌ری سه‌رچناره‌ كه‌ زۆرترین پشكنینه‌كان له‌وێ ده‌كرێن، وه‌ ئه‌و شوێنه‌ ته‌عقیم كراوه‌ پاشان له‌به‌ر ئه‌وه‌ی تێستی تازه‌مان بۆ هاتبوو، جیهازه‌كان پێویستی به‌ جۆره‌ شتێک ده‌كرد بۆ داتا كردنه‌وه‌یان، له‌به‌ر ئه‌وه‌ ته‌نها ئه‌وه‌ بوو له‌م 48 كاتژمێره‌دا ده‌توانم بڵێم ژماره‌ی پشكنینه‌كان به‌راورد به‌ چه‌ند ڕۆژی ڕابردوو كه‌مێک كه‌م بوون ئه‌مه‌ش هۆكاره‌كه‌ی بوو، له‌ دوێنێ شه‌ویشه‌وه‌ به‌ چڕی ده‌ستكراوه‌ته‌وه‌ به‌ پشكنین ، وه‌ هیچ كێشه‌یه‌كمان نییه‌ له‌ڕووی پشكنینه‌وه‌.”

“من ده‌توانم بڵێم له‌ ئێستادا ئه‌وه‌ی ده‌بینرێت له‌ شاری سلێمانی، ئاستێكی باشه‌ به‌وه‌ی ده‌بینرێت بازاڕ و دوكانه‌كان چۆڵن وه‌ خه‌ڵک به‌ شێوازێكی ته‌ندروستانه‌ مامه‌ڵه‌ ده‌كەن به‌ڵام هێشتا له‌ ئاستی پێویستدا نییه‌، واته‌ دۆخه‌ پێویستی به‌ زیاتر خۆپارێزییه‌ وه‌ گرنگیشه‌ هاوڵاتیان ته‌نها ئه‌وه‌ نه‌بێت كه‌ نه‌یه‌نه‌ بازاڕ ، گرنگه‌ شه‌وانیش كۆبوونه‌وه‌ نه‌كرێت، واته‌ ئه‌گه‌ر چه‌ند خێزانێک له‌ شوێنێک كۆ ببنه‌وه‌ ئه‌مه‌ش هه‌ر به‌ركه‌وته‌یه‌. به‌ ڕاستی ئێستا خۆم كه‌ هه‌ڵگری ڤایڕه‌سه‌كه‌م به‌ نموونه‌ بهێنمه‌وه‌ من نازانم سه‌رچاوه‌ی توشبوونه‌كه‌م چی بووه‌، نازانم له‌ كوێووه‌ توش بووم ڕه‌نگه‌ براده‌رێكی خۆمم بینی بێت له‌ شوێنێكدا و قسه‌م له‌گه‌ڵ كردبێت و له‌ شوێنێكدا بوو بێت كه‌ پێشبینیم نه‌كردبێت ئه‌و ڤایڕه‌سه‌ به‌هۆی ئه‌وه‌وه‌ بێت، بۆیه‌ هاوڵاتیان پێویسته‌ به‌ ته‌واوه‌تی پابه‌ندی ڕێنماییه‌كان بن و به‌هه‌موو شێوازێک وا مامه‌ڵه‌ بكه‌ن له‌گه‌ڵ هه‌ركه‌سێكدا كه‌ هه‌ڵگری ڤایڕه‌سه‌كه‌یه‌ بۆ ئه‌وه‌ی به‌ هه‌موو لایه‌ک بتوانیین دۆخه‌كه‌ كۆنتڕۆڵ بكه‌ین.”دکتۆر یاد نه‌قشبه‌ندی وای وت.

د.یاد نه‌قشبه‌ندی له‌باره‌ی ڕێژه‌ی به‌رزی توشبووانی كۆرۆنا وه‌ ژماره‌ی مردووه‌كان له‌ سلێمانی ده‌ڵێت” یه‌ک واقیع هه‌یه‌ ده‌توانم بڵێم ئه‌و ژمارانه‌ی كه‌ له‌ شاری سلێمانی ڕاده‌گه‌یه‌نرێن ، ژماره‌یه‌كی واقیع و شه‌فافن . ئێمه‌ ئه‌وه‌ی كه‌ واقیعی بوونی دۆخه‌كه‌یه‌ له‌ شاری سلێمانی داومانه‌ به‌ هه‌موو كه‌ناڵه‌كانی ڕاگه‌یاندن بۆ ئه‌وه‌ی هاوڵاتیان ته‌واو ئاگاداری دۆخه‌كه‌بن، ڕاسته‌ ژماره‌كان جێی نیگه‌رانییه‌ به‌ڵام ده‌توانم بڵێم ئه‌گه‌ر باسی ڕێژه‌ی مردن بكه‌ین به‌راورد به‌ ژماره‌ی تووشبووان هێشتا ڕه‌نگه‌ له‌ زۆر وڵاتی چوارده‌وری ئێمه‌دا یاخود له‌ جیهاندا هێشتا كه‌متربێت به‌ڵام ئه‌مه‌ ئه‌وه‌ ناگه‌یه‌نێت دۆخه‌كه‌ مه‌ترسیدار نییه‌، به‌ڕاستی دۆخه‌كه‌ مه‌ترسیداره‌وه‌ ژماره‌كان جێی نیگه‌رانیین ، وه‌ به‌ ڕاشكاویش ده‌یڵێم ئه‌و ژمارانه‌ی كه‌ ڕاده‌گه‌یه‌نرێن، ئه‌وه‌ ئه‌وانه‌ن كه‌ نیشانه‌یان هه‌یه‌ و دێن پشكنین ده‌كه‌ن، به‌ ڕاستی حاڵه‌ت هه‌یه‌ و ڕه‌نگه‌ هه‌ڵگریش بێت و هیچ پشكنینێک نه‌كات له‌به‌ر ئه‌وه‌ ئێمه‌ پێشبینی ده‌كه‌ین ژماره‌كه‌ زیاتر بێت له‌وه‌ به‌ڵام گرنگه‌ خه‌ڵک دوو شت جیا بكاته‌وه‌ ترس له‌گه‌ڵ واقیع جیایه‌، ئێمه‌ نامانه‌وێت به‌ هیچ شێوازێک بترسن ، ناشمانه‌وێت هاوڵاتیان بابه‌ته‌كه‌ به‌هه‌ند وه‌رنه‌گرن وه‌ له‌گه‌ڵ دۆخه‌ واقیعیه‌كه‌دا مامه‌ڵه‌ نه‌كه‌ن، بۆیه‌ ئێمه‌ ته‌نیا شت ده‌ڵێم ژماره‌كان هه‌رچه‌ندێک بێت، دۆخه‌كه‌ هه‌رچیه‌ک بێت دڵنیابن ئه‌گه‌ر خۆپارێزی بكه‌ن و هاوكاری كه‌رتی ته‌ندروستی و لایه‌نی په‌یوه‌ندیدار بن ئه‌م دۆخه‌ تێده‌په‌ڕێنین.”

ده‌رباره‌ی ئه‌وه‌ی بۆچی قه‌ده‌غه‌ی هاتوچۆ له‌ سلێمانی ڕاناگه‌یه‌نرێت؟ دکتۆر یاد نه‌قشبه‌ندی وتی” له‌ ڕاستیدا ئێمه‌ پێشنیاری قه‌ده‌غه‌ی هاتوچۆمان كردووه‌ ، پێش چه‌ند هه‌فته‌یه‌ک له‌مه‌و پێش ، به‌ڵام له‌به‌ر هه‌ندێک دۆخ، له‌وانه‌ خراپی باری ئابوری هاوڵاتیان كه‌ ده‌توانم بڵێم ڕێگریه‌كی زۆر بووه‌ له‌به‌رده‌م ڕێو شوێنه‌كان و ئه‌و ڕێكارانه‌ی كه‌ پێویسته، كه‌واته‌ ئه‌و ڕێكارانه‌ی كه‌ زانستییه‌ له‌گه‌ڵ ئه‌و قۆناغه‌ی كه‌ ئێمه‌ تیاین ، ڕِه‌نگه‌ خراپی باری ئابوری هۆكارێک بێت نه‌مان توانیبێت وه‌كو خۆی جێبه‌جێی بكه‌ین له‌گه‌ڵ ئه‌وه‌ی كه‌ پێشنیاریش كراوه‌ له‌ناو لیژنه‌ی باڵای ئۆپەراسیۆنی ڕووبه‌ڕووبونه‌وه‌ به‌ڵام لای ئه‌وانیش هه‌مان قسه‌ هه‌بوو كه‌ دۆخی خراپی ئابوری هاوڵاتیان و ئه‌و لایه‌نانه‌ی كه‌ پێویسته‌ فرمانه‌كه‌ جێبه‌جێ بكه‌ن له‌سه‌ر ئه‌ركی ئه‌وانه‌ كه‌ ئه‌وانیش كه‌سانێكی هیلاكن له‌ سه‌ره‌تای بڵاوبوونه‌وه‌ی په‌تاكه‌ شانبه‌شانی كه‌رتی ته‌ندروستی له‌ ڕووبه‌ڕوبوونه‌وه‌ی كۆرۆنادا بوون له‌به‌ر نه‌بوونی موچه‌ و خراپی باری ئابوری بتوانن به‌و شێوازه‌ ڕێوشوێنه‌كان جێبه‌جێ بكه‌ن ، به‌ڵام ئه‌و ڕێكارانه‌ی كه‌ له‌ چه‌ند ڕۆژی ڕابردوو له‌لایه‌ن لیژنه‌ی باڵای ئۆپراسیۆنی ڕووبه‌ڕووبونه‌وه‌ی كۆرۆنا له‌ شاری سلێمانی ده‌ركرا، له‌ ئێستادا ده‌بینرێت له‌ شاری سلێمانیدا ته‌واو جێبه‌جێ ده‌كرێت و هاوڵاتیانیش ته‌واو باشدا پابه‌ندن پێوه‌ی كه‌ هیوادارم باشتریش بێت”

وته‌بێژی فه‌رمی به‌ڕێوه‌به‌رایه‌تی ته‌ندروستی سلێمانی ئاماژه‌ی به‌وه‌شكرد” هه‌واڵه‌ خۆشه‌كه‌ یه‌كه‌م ئه‌و ژمارانه‌ی كه‌ ڕاده‌گه‌یه‌نرێت به‌شێكی كه‌میان پێویستیان به‌ نه‌خۆشخانه‌یه‌ و باری ته‌ندستیان ناجێگیره‌ هێشتا ده‌توانم بڵێم ئه‌و ڕێژه‌ مردنه‌ی كه‌ هه‌یه‌ ڕاسته‌ مه‌ترسیداره‌ به‌ڵام ئه‌وه‌ نیه‌ بڵێین ئێمه‌ له‌ هه‌موو وڵاتانی تر زیاترین بگره‌ ڕه‌نگه‌ كه‌متربین به‌ شێوه‌یه‌كی گشتی، خاڵێكی تر گرنگه‌ دڵنیا بن له‌ ئاینده‌یه‌كی زۆر نزیكدا ده‌توانم بڵێم ژماره‌یه‌كی چاکبوونه‌وه‌ی زۆر له‌ شاری سلێمانی ڕاده‌گه‌یه‌نرێت كه‌ له‌ دوو هه‌فته‌ له‌مه‌و پێش نزیكه‌ی430 حاڵه‌تمان ڕاگه‌یاندووه‌ “ئینشاالله” له‌ داهاتوویه‌كی زۆر نزیكدا ژماره‌یه‌كی تری چاكبوونه‌وه‌ ڕاده‌گه‌یه‌نرێت و ڕاسته‌ نه‌خۆشخانه‌كان ڕۆژانه‌ نه‌خۆشی تێده‌چێت به‌ڵام نه‌خۆشیش چاک ده‌بێته‌وه‌ و ده‌نێردرێته‌وه‌ ماڵه‌وه‌.”

سه‌باره‌ت به‌هۆكاری ڕێژه‌ی به‌رزی توشبووانی كۆرۆنا له‌ سلێمانی جیاواز له‌ شوێنه‌كانی تر دکتۆر یاد نه‌قشبه‌ندی ڕایگه‌یاند” ده‌توانم بڵێم واقعێكه‌ كه‌ ئێمه‌ به‌ تایبه‌ت له‌ جه‌ژن و له‌ ڕه‌مه‌زاندا به‌ركه‌وته‌یه‌كی زۆر هه‌بوو به‌ركه‌وته‌یه‌كی زۆر هه‌بوو له‌ شاری سلێمانی ئه‌مه‌ یه‌كێک بووه‌ له‌ هۆكاره‌كان له‌به‌ر ئه‌وه‌ ئێمه‌ هه‌رگیز نه‌مان وتووه‌ ڤایڕه‌سی كۆرۆنا كۆتایی هاتووه‌، ڤایڕه‌سی كۆرۆنا شتێكی جیهانییه‌ شتێكی لۆكاڵی نییه‌ ته‌نها له‌ شاری سلێمانی بوونی هه‌بێت ،له‌به‌ر ئه‌وه‌ هه‌میشه‌ مه‌ترسیه‌كان هه‌یه‌ تا له‌ جیهاندا حاڵه‌تێک بمێنێت له‌به‌ر ئه‌وه‌ی له‌ شاری سلێمانی و بگره‌ هه‌رێمی كوردستان و وڵاتی عێراقیش حاڵه‌ته‌كان هه‌ر مابوون، ئه‌وه‌ بوو به‌هۆی ئه‌و به‌ركه‌وتنه‌ زۆره‌. بێگومان ئه‌و ژماره‌ له‌ هه‌ڵكشاندا ده‌بێت به‌ڵام گرنگه‌ ئێمه‌ كار له‌سه‌ر ئه‌وه‌ بكه‌ین چون بتوانیین ئه‌م شه‌پۆله‌ خاو بكه‌ینه‌وه‌. ئێمه‌ له‌گه‌ڵ ئه‌وه‌ نین بڵێین ڤایڕه‌سی كۆرۆنا سه‌د له‌سه‌د بنبڕ ده‌كه‌ین به‌ڵام ته‌نها كار له‌سه‌ر ئه‌وه‌ ده‌كه‌ین ئه‌م هه‌ڵكشانه‌ به‌ره‌و خاوی بڕواته‌وه‌ و به‌ شێوه‌یه‌كی ئاسۆیی بڕوات وه‌ بتوانیین هه‌موو ڕێ و شوێنانه‌ی كه‌ پێویستن جێبه‌جێی بكه‌ین.”

سه‌باره‌ت به‌وه‌ی ده‌وترێت هه‌ندێک نه‌خۆشی تر له‌ ئێستادا له‌ ئارادایه‌ وه‌ك گرانه‌تا؟ دکتۆر یاد نه‌قشبه‌ندی وتی” نه‌خێر به‌ڕاستی ئێستا ئه‌وه‌ی ئێمه‌ ده‌یبینین له‌ پشكنینه‌كانه‌وه‌ كه‌ هاوڵاتیان سه‌ردانی نه‌خۆشخانه‌كان ده‌كه‌ن نه‌خێر ئه‌و حاڵه‌تانه‌ ده‌توانم بڵێم زۆرینه‌یان كۆرۆناین به‌ڵام گرنگه‌ ئێمه‌ چۆن مامه‌ڵه‌ی ڕاست له‌گه‌ڵ ئه‌مه‌دا بكه‌ین، واته‌ گرنگه‌ هاوڵاتیان بزانن كه‌ توشی كۆرۆنا بوویت مه‌رج نییه‌ یه‌كسه‌ر پێویستت به‌ پلازما بێت، یا به‌ چاره‌سه‌ری دژه‌ ڤایڕه‌س بێت پێویستت به‌ چاره‌سه‌رێک بێت بایی 100 هه‌زار بێت كه‌ به‌ڕاستی به‌داخه‌وه‌ هه‌ندێک كه‌س نابه‌رپرسانه‌ و نه‌فس نزمانه‌ مامه‌ڵه‌ی كردووه‌ له‌گه‌ڵ بابه‌ته‌كه‌دا ڕه‌نگه‌ بۆ ئه‌وه‌ی ئه‌زمه‌یه‌ک دروست بكرێت و بۆ هه‌ندێک ده‌ستكه‌وتی ماددی یاخود كه‌سی خۆیان هیوادارم خه‌ڵک له‌ ئاست ئه‌و هۆشیاریه‌دا بن، من باسی خۆم ده‌كه‌م به‌ نموونه‌ من تووش بوو بووم نه‌ ئۆكسجینیشم لابوو نه‌ پلازماشم به‌كارهێناوه‌ نه‌ دژه‌ ڤایڕه‌شم به‌كارهێناوه‌ ته‌نها چه‌ند چاره‌سه‌رێک له‌ چه‌ند ڤیتامینێک پێکهاتووه‌ ڕه‌نگه‌ له‌ خواردنی ڕۆژانه‌شدا هه‌بێت ئه‌و كاته‌ی كه‌ تووش ده‌بیت ڕه‌نگه‌ جورعه‌یه‌كی زیاتر بێت كه‌ ڕه‌نگه‌ له‌ خواردنی ڕۆژانه‌شدا هه‌بێت، وه‌ باری ته‌ندروستیم به‌ به‌راورد به‌ هه‌فته‌ی ڕابردوو زۆر زیاتر بێت ده‌توانم بڵێم به‌ره‌و قۆناغی كۆتایی نه‌خۆشیه‌كه‌ ده‌ڕۆم، بۆیه‌ ڕاسته‌ حاڵه‌ته‌كان زۆرن ، ئه‌و نیشانه‌ زۆرانه‌یان له‌م وه‌رزه‌دا ده‌ڕوات ئه‌و حاڵه‌تانه‌ ده‌توانم بڵێم زۆربه‌یان كۆرۆنان به‌ڵام گرنگ ئه‌وه‌یه‌ نه‌بێته‌ هۆی شڵه‌ژان یان ترس چونكه‌ زۆر خراپه‌ بۆ ئه‌و كه‌سانه‌ی كه‌ هه‌ڵگری ڤایڕه‌سه‌كه‌ن، بۆیه‌ دڵنیابه‌ ئه‌گه‌ر نیشانه‌كانیش هه‌بێت،ته‌نها به‌ پشوودان و مانه‌وه‌ له‌ ماڵه‌وه‌ ، خۆ جیاكردنه‌وه‌ بۆ ئه‌وه‌ی كه‌سانی دیكه‌ تووش نه‌كه‌یت، ئاو زۆرخواردنه‌وه‌ ، میوه‌ خواردن ، ڕۆژانه‌ كه‌مێک بچیته‌ به‌ر خۆری به‌یانی ، جێبه‌جێكردنی چه‌ند وه‌رزشێكی ساده‌ كه‌ خۆ هیلاکكردنی تێدانه‌بێت ، وه‌ به‌كارهێنانی هه‌ندێک له‌و ڤیتامینانه‌ به‌ ئاسانترین شێوه‌ نه‌خۆشیه‌كه‌ تێپه‌ڕ ده‌كات.”

دکتۆر یاد نه‌قشبه‌ندی كه‌ له‌ماوه‌ی ڕابردوو ڕایگه‌یاند تووشی كۆرۆنا ڤایره‌س بووه‌، به‌ڵام له‌ ئێستادا به‌وته‌ی خۆی دۆخی ته‌ندروستی زۆرباشه‌ له‌و ڕوه‌وه‌ وتی” من له‌ ئێستا بۆ ماوه‌ی نزیكه‌ی 8-9 ڕۆژه‌ هه‌ڵگری ڤایڕه‌سه‌كه‌ بووم ، وه‌ چاره‌سه‌ره‌كان به‌كار دێنم ته‌نها چاره‌سه‌رێكی “سه‌پۆرتزه‌” ، هیچ چاره‌سه‌رێكی ئه‌وتۆ نییه‌ ئه‌و شێوازانه‌ی كه‌ دكتۆره‌كان هه‌ر هه‌مان ئه‌و دكتۆرانه‌ی كه‌ سه‌رپه‌رشتیاری كۆرۆنان له‌ شاری سلێمانی ، ڕێنماییه‌كانم وه‌رگرتوون و “ئینشاالله” له‌ داهاتوویه‌كی نزیكدا ده‌توانم بڵێم له‌ كۆتایی ئه‌م هه‌فته‌یه‌دا یان هه‌فته‌ی داهاتوودا ده‌گه‌ڕێمه‌وه‌ سه‌ر كاری خۆم پاش ئه‌وه‌ی ده‌بێت بێگومان پشكنینه‌كانم نێگه‌تیف ده‌ربچێته‌وه‌.”

سه‌باره‌ت به‌ده‌نگۆی مانگرتنی كارمه‌ندانی ته‌ندروستی له‌ سلێمانی، دکتۆر یاد نه‌قشبه‌ندی وتی” من دڵنیایی ده‌ده‌م كه‌رتی ته‌ندروستی له‌ شاری سلێمانی له‌ ئێستادا ئه‌وه‌ی پێویسته‌ ئه‌وه‌ی خزمه‌تگوزاری ته‌ندروستی یه‌ به‌رده‌وامه‌ و به‌رده‌وامیش ده‌بێت به‌هه‌وڵ و كۆششی هه‌موو لایه‌ك له‌سه‌رو هه‌موویانه‌وه‌ به‌ڕێز به‌ڕێوه‌به‌ری گشتی ته‌ندروستی سلێمانی، وه‌ ئێمه‌ تا ئێستا نه‌ له‌ هیچ سه‌نته‌رێكی كۆرونا نه‌ له‌ هیچ ئیمه‌رجێنسیه‌ک ده‌وام ڕانه‌گیراوه‌ ، ڕاسته‌ هه‌ندێک شوێن ده‌وامی تیادا ڕاگیراوه‌ به‌ڵام نه‌هێڵدراوه‌ كاربكاته‌ سه‌ر ته‌ندروستی هاوڵاتیان و ژیانی هاوڵاتیان ، ئه‌وه‌ش واقیعێكه‌ كه‌ كارمه‌ند و پزیشک و كارگوزار و یه‌كه‌ ئیداری و كارگێڕیش وه‌كو هه‌موو مرۆڤێكی دیكه‌ پێویستی به‌ بژێوی ژیانه‌ بۆ ئه‌وه‌ی بتوانێت به‌رده‌وامی به‌ ژیانی بدات، ئێستا كه‌رتی ته‌ندروستی توانیویه‌تی ئه‌وه‌ی خزمه‌تگوزاری پێویسته‌ پێشكه‌ش به‌ هاوڵاتیانی بكات به‌ تایبه‌تی له‌ سه‌نته‌ره‌كانی كۆرۆنادا كه‌ ده‌توانم بڵێم باشترین خزمه‌تگوزاری ته‌ندروستی له‌ڕووی كوالێتی و له‌ڕووی “كوانتیتی- شه‌وه‌” پێشكه‌ش به‌ توشبووانی كۆرۆنا كراوه‌ له‌ شاری سلێمانی.”

VOA

بەردەوام بە لە خوێندنەوە

کوردستان