ئێمە لە تۆرە کۆمەڵایەتیەکان

کوردستان

لەناو گۆڕانەوە، دەنگی ناڕەزایی دژ بە عەلی حەمە ساڵح بەرز دەبنەوە

خەڵك – بەشی هەواڵ

هەڵسوڕاوێكی گۆڕان ڕایدەگەیەنێت، “عەلی حەمە ساڵح” هەر كاتێك دەمدەكاتەوە بۆ پینەیەكی سیاسی، دەبێت بەدوایدا دووسەد پینەچی خەریكی دورینەوەی ئەو دڕاوییانە بێت كە دروستی دەكات.

ئارام مەحمود هەڵسوڕاوی گۆڕان و ڕاوێژكاری جێگری دووەمی سەرۆكی ئەنجومەنی نوێنەرانی پێشووی عیراق لە هەژماری تایبەتی خۆی لە تۆڕی كۆمەڵایەتی فەیسبوك ڕایگەیاند، “علی حەمە ساڵح” لەوەڵامی گرتە ڤیدیۆییەكەی كاك “نەوشیروان”دا جارێك ئیهانە بەعەقڵی خەڵك و، جارێكیش ئیهانە بە خودی كاك نەوشیروان دەكات.

ئارام مەحمود ڕوونیكردووتەوە، عەلی حەمە ساڵح بەخەڵك دەڵێت، نمەك بەحەرامێك چووەتە ماڵی كاك نەوشیروان لە لەندەن و سیخوڕی بەسەر پەیوەندییە تەلەفۆنییەكانییەوە كردووە، بەڵام پێمانناڵێت ئەو سیخوڕە كێیە و چۆن چووە و ئەم زانیارییەی لەكوێوە دەستكەوتووە؟. لەكاتێكدا ڕاستی ئەو بابەتە ئەوەیە كاك “نما”ی كوڕی كاك “نەوشیروان” ئەو قسانەی باوكی تۆماركردووە و “عەلی حەمە ساڵح”و زۆرێك لەبرادەرەكانی گۆڕانیش ئەو ڕاستییە دەزانن و پێش بڵاوبوونەوەشی لە ماڵی كاك “نەوشیروان” بینویانە.

ئارام مەحمود ڕاشیدەگەیەتنێت، لێدوانەكانی “عەلی حەمە ساڵح” ئەوە دەگەیەنێت كە كاك “نەوشیروان” لەو كاتەدا ئاگای لەخۆی و دەوروبەری نەبووە، ئەگینا چۆن كەسێك دەتوانێت لەدووری كەمتر لە دوو مەترەوە لەبەردەمیدا ڕاوەستێت و وێنەی بگرێت و كاك “نەوشیروان” ئاگای لێنەبێت یان ڕێگەی بدات، لەكاتێكدا كاك “نەوشیروان” لە كامڵ هێزی ئەقڵی خۆیدایە و موناقەشەی سیاسی لەگەڵ كەسێكی تردا دەكات، دوای ئەوەش كوڕەكانی كاك “نەوشیروان”بەبست باوكیان بەجێنەهێشتووە و بەردەوام لەگەڵی بوون بەوپێیەی تەندروستی جێگیرنەبووە، بۆیە شتێكی لەوشێوەیە وەك ئەگەرێكی دووریش بەعەقڵی هیچ ئینسانێكی هۆشمەندا ناچێت.

ئەو هەڵسوڕاوی گۆڕان ئەوەش دەخاتەڕوو، بەڕای من “عەلی حەمە ساڵح”پرسەكەی تێكدا و هێندەی تر ئاڵۆزی كرد، دەنا دەكرا كاك “نما” لەڕوونكردنەوەیەكی كورتدا بیوتایە ڤیدیۆكە من گرتومە و باوكم لەگەڵ سەركردەكانی یەكێتییەتی نەك گۆڕان، ئەوسا شەڕەكە كورت دەبووەوە بۆ ئەوەی كاك “نەوشیروان” مەبەستی كێ بووە نەك ئەو شەڕ و هەرایەی ئێستا كە بابەتە ئەسڵییەكەی ونكردووە.

دەشڵێت، كارەساتەكە ئەوەیە ئەم كاك “عەلی حەمە ساڵح”ە هەر كاتێك دەمدەكاتەوە بۆ پینەیەكی سیاسی، دەبێت بەدوایدا دووسەد پینەچی خەریكی دورینەوەی ئەو دڕاوییانە بێت كە دروستی ئەكات. لەوەش ناخۆشتر ئەوەیە ئەم برادەرە ماف بەخۆی دەدات لەهەموو شتێكدا قسەبكات و وەڵامەكانیشی هەنسكەبڕكێ و پەلەپڕوزێی زۆری پێوەدیارە.

کوردستان

حەسەن عەلەوی باسی ئەردۆغان و مەلا مستەفا و مام جەلال دەكات

خەڵك-ئیدریس جەبار
حەسەن عەلەوی، بیرمەندی و سیاسەتمەداری دەركەوتووی عیراقی، باسی سەرۆكی ئێستای توركیا و مەلا مستەفای بارزانی و مام جەلال دەكات و پێیوایە مەلا مستەفا “ئایین و نەتەوەی تێكەڵ بە یەك كردووە لە شۆڕشەكەی”.

حەسەن عەلەوی، بیرمەند و سیاسەتمەداری دەركەوتووی عیراقی، لە لێدوانێكی تایبەت بە (خەڵك) ڕایگەیاند، “ئەوەی لە باكووری خۆرهەڵاتی سوریا ڕوویدا، ڕێككەوتنی سیاسی بوو، ئەمریكا ڕێككەوتنی لەگەڵ توركەكان كردبوو تا جێگەی خۆی بۆ ئەوان چۆڵ بكات”، ئاماژەی بە هەڵوێستی ئێستای سەرۆكی توركیا دەكات و بە خراپ باسی دەكات.

بە وتەی عەلەوی، “وێڕای هەڵوێستی ئێستای ڕەجەب تەیب ئەردۆغان، بەڵام ئەو  نەتەوەیی و ئایینی پێكەوە گرێدا، ئەو نەتەوەییە و دینداریشە”.

ئەو بیرمەندە عیراقیە دەڵێت: “مەلا مستەفای بارزانیش پیاوێكی ئاینی و نەتەوەیی بوو لە هەمان كاتدا بەپێچەوانەی مام جەلال بوو”.

حەسەن عەلەوی لە درێژەی قسەكانیدا لەو بارەیەوە ڕایگەیاند، “مام جەلال، پیاوێكی عەلمانی و بە تەواوەتی خۆی بۆ عەلمانی یەكلایی كردبووەوە، بەڵام مەلا مستەفا نەتەوە و ئاینی بەیەكەوە بەستبووەوە و ناسناوەكەشی كە مەلایە، بەڵگەیە لەسەر ئەوەی پیاوێكی ئاینی بووە”.

بەردەوام بە لە خوێندنەوە

کوردستان

هەسەدە: 103 سەربازی تورك و چەكدار كوژراون
شەڕی هاوبەشی هەسەدە و سوریا لەگەڵ توركیا دەستی پێكرد

خەڵك- بەشی هەواڵ
شەڕی هاوبەشی هەسەدە و سوپای سوریا لەگەڵ سوپای توركیا و چەكدارە ئۆپۆزسیۆنەكان لە تەل تەمر دەستی پێكرد.

هێزەكانی سوریای دیموكرات (هەسەدە) ئاماری شەڕەكانی ۲٤ كاتژمێری ڕابردوو لە بەرەكانی شەڕ لە (سەرێكانی، گرێ سپی، درباسییە و دێرك) بڵاودەكاتەوە و ئاشكرای دەكات، ژمارەیەك تانك و زرێپۆشی هێزی دوژمن تێكشكێنراون.

ڕاشیگەیاندووە، لەو شەڕانەدا ۱٠۳ سەربازی توركی و چەكداری ئۆپۆزسیۆنی سوریا كوژراون و لە بەرامبەریشدا ۲۳ شەرەڤانی هێزەكانی سوریای دیموكرات شەهید بوون.

هەسەدە ئاماژەی بەوەشكردووە، كە شەڕی هێزەكانیان و سوپای سوریا لە تەل تەمر لەگەڵ سوپای توركیا و چەكدارە ئۆپۆزسیۆنەكان دەستی پێ‌ كردووە و توانراوە هێزەكانی توركیا تێكبشكێنرێن.

بەردەوام بە لە خوێندنەوە

کوردستان

لە چیای ئەزمەڕ تەقینەوەیەك ڕوویدا و قوربانی لێ‌ كەوتەوە

خەڵك- بەشی هەواڵ
ئێوارەی ئەمڕۆ لەسەر چیای ئەزمەڕ لە سلێمانی تەقینەوەیەك ڕوویدا و بەهۆیەوە دوو كەس گیانیان لەدەستداوە.

سەرچاوەیەك لە (جی سی سی) سلێمانی بۆ (خەڵك) ڕایگەیاند، كە ئێوارەی ئەمڕۆ دەنگی تەقینەوەیەك لەسەر چیای ئەزمەڕ بیستراوە و ڕاستەوخۆ هێزەكانمان چوونەتە شوێنی ڕووداوەكە.

ڕاشیگەیاند، بەهۆی ئەو ڕووداوەوە دوو كەس گیانیان لەدەستداوە و لێكۆڵینەوەش لەسەر ڕووداوەكە دەستی پێ‌ كردووە.

جەختیشی كردەوە، كە تا ئێستا بەتەواوی یەكلایی نەبۆتەوە تەقینەوە بووە یان شتی دیكە، بەڵام دەنگی تەقینەوە بیستراوە و لێكۆڵینەوەش دەستی پێ‌ كردووە.

بۆ بەدواداچوونی زیاتر (خەڵك) پەیوەندی كرد بە سەركەوت ئەحمەد، وتەبێژی پۆلیسی سلێمانییەوە، بەڵام وەڵامی پەیوەندییەكەی نەدایەوە.

بەردەوام بە لە خوێندنەوە

کوردستان