ئێمە لە تۆرە کۆمەڵایەتیەکان

عێراق

مالكی بۆ پۆستی جێگری سەرۆك كۆمار كاندید دەكرێت

خەڵك-بەشی هەواڵ

هاوپەیمانی دەوڵەتی یاسا ڕایدەگەیەنێت، نوری مالكی، سەرۆكی هاوپەیمانییەكە لەلایەن هاوپەیمانی بنیاتنانەوە بۆ پۆستی جێگری سەرۆك كۆمار كاندید دەكرێت، ئاماژە بە وادەی یەكلاكردنەوەی ئەو بابەتەش دەكات.

هیشام ڕەكابی، بەڕێوەبەری نووسینگەی ڕۆژنامەوانی، سەرۆكی هاوپەیمانی دەوڵەتی یاسا لە لێدوانێكی ڕۆژنامەوانیدا ڕایگەیاندووە، “هاوپەیمانی بونیادنان بابەتی كاندیدكردنی مالكی بۆ پۆستی جێگری سەرۆك كۆمار تاووتوێ‌ كردووە و وەك كاندیدی هاوپەیمانییەكە بۆ ئەو پۆستە پێشنیاری كردووە، هەر ئەمەشە وایكردووە نوری مالیكی پەلە نەكات لە سوێندخواردن وەك ئەندامی پەڕلەمان، هەرچەندە هەڵوێستەكانی لەگەڵ ئەو پۆست و پێگانەدا نییە”.

بە وتەی ڕەكابی، “پۆستەكانی جێگری فوئاد مەعسوم-ی سەرۆكی پێشوو، مالكی یەكێك بوو لە جێگرەكانی، كاتێك هەڵوەشێنرانەوە، هەڵوێستی ئەو لەگەڵ جەماوەردایە و لە نێو جەماوەرە و دەڵێت (هاوبەش دەبین لە پێشكەشكردنی خزمەت بە گەل و داوای خزمەتگوزاری دەكەین و لەگەڵ هەموو ئەو ئاڕاستانەداین، كە لە بەرژەوەندی عیراقییەكانە، بابەتەكەش لەسەر ناونیشان و پۆستەكان بەند نییە) ئەمە بیروبۆچوونی ئەوە”.

سەرۆكی نووسینگەی مالكی ڕاشیگەیاندووە، “هێزە سیاسییەكان لەئێستادا سەرقاڵی تەواوكردنی كابینە وەزارییەكەی عادل عەبدولمەهدی، سەرۆك وەزیرانن، كاتێكیش كابینەكە تەواو دەكرێت، پرسی جێگرانی سەرۆك كۆمار و پۆستەكانی تر لە چوارچێوەی سێ‌ سەرۆكایەتییەكە پێشنیار دەكرێت، لەو كاتەشدا مالكی هەڵوێستی خۆی دەبێت”.

أ.ج

عێراق

مەبەست ڤایرۆسی كۆرۆنایە
لەسەر داخستنی سنور لەگەڵ ئیران ڕاگەیەندراوێك بڵاودەكرێتەوە

خەڵك- بەشی هەواڵ
وەزارەتی تەندروستی حكومەتی فیدراڵ، ڕەتیدەكاتەوە داوای داخستنی مەرزە سنورییەكانی كردبێت لەگەڵ ئێران.

بەپێی بەیاننامەیەك كە لەلایەن وەزارەتی تەندروستی حكومەتی عیراقەوە بڵاوكرایەوە”ئەو هەواڵانەی باسیان لە داواكاریی وەزارەتی تەندروستی كردووە سەبارەت بە داخستنی مەرزە سنورییەكان لەگەڵ ئێران بەهۆی دەركەوتنی حاڵەتەكانی توشبوون بە ڤایرۆسی كۆرۆنا، دوورن لە ڕاستییەوە”.

وەزارەتی تەندروستی حكومەتی فیدراڵ داوای كردووە، میدیاكان لەكاتی گواستنەوەی هەواڵەكاندا بەدیقەت بن و زانیارییەكان لە سەرچاوە فەرمییەكانەوە وەربگرن.

هەر لەو چوارچێوەیەدا، غەیدا كبمش، پەرلەمانتاری عیراقی، داوای لە حكومەت كردبوو، دەستبەجێ‌ سنورەكان لەگەڵ ئێراندا دابخرێن، بەهۆی بڵاوبوونەوەی ڤایرۆسی كۆرۆنا لە ئێران.

پێشتر وەزارەتی تەندروستی ئێران حاڵەتەكانی توشبوونی بە ڤایرۆسی كۆرۆنا لە وڵاتەكەدا ڕاگەیاندبوو كە بەو هۆیەوە، تائێستا دوو كەس گیانیان لەدەستداوە، دەسەڵاتدارانی ئێران لەئێستادا ڕێوشوێنی خێرایان بۆ ڕێگرتن لە بڵاوبوونەوەی ڤایرۆسەكە گرتۆتەبەر.

بەردەوام بە لە خوێندنەوە

عێراق

وەزیری كشتوكاڵی عیراق بەڵێنی چارەسەركردنی كێشەكانی گەنمی جوتیارانی هەرێمیدا

سلێمانی – نزار جەزا
لیژنەیەكی حكومەتی هەرێم لەبارەی پارەی گەنمی جوتیارانی هەرێم لەبەغدادە و وەزیری پلاندانانی هەرێمیش ئاشكرای دەكات، وەزیری كشتوكاڵی عیراق بەڵێنی چارەسەركردنی كێشەكانی داوە.

دارا ڕەشید وەزیری پلاندانانی حكومەتی هەرێم لەوەڵامی پرسیارێكی (خەڵك)دا ڕایگەیاند، پێشتر وەفدێكی حكومەتی هەرێمی كوردستان بەبەشداری وەزیری كشتوكاڵ و وەزیری هەرێم بۆ كاروباری بەغداد سەردانی بەغدادیان كرد، و بڕیاریاندا لیژنەیەك بەبەشداری نوێنەری سەرجەم وەزارەتە پەیوەندیدارەكان دروستبكرێت.

زیاتر ڕوونیكردەوە، ئەو لیژنەیە ئێستا لەبەغدادن و وەزیری كشتوكاڵی عیراق بەڵێنی چارەسەركردنی كێشەكانی داوە، بەڵام تاكو ئێستا لیژنەكە لەبەغداد نەگەڕاونەتەوە، تاكو وردەكاری بەڵێن و دەستكەوتەكانی ئەو لیژنەیە بزانن و باسی بكەن.

جوتیارانی هەرێمی كوردستان لەساڵانی 2014 و 2015 و 2016 گەنمیان بە حكومەتی عیراق داوە، بەڵام حكومەتی عیراق بەشێك لەو پارەیەی پێ نەداون، پێشتریش لەڕێگەی دادگاوە ئەو مافە بۆ جوتیارانی هەرێم گەڕێنرایەوە، بەڵام حكومەتی عیراق ئامادەنەبوو پارەكە دابین بكات.

بەردەوام بە لە خوێندنەوە

عێراق

دەرمانخانەیەك لە بەغدا ماددەی هۆشبەری فرۆشتووە

خەڵك- بەشی هەواڵ

دادگای باڵای عیراق ئاشكرای كرد، كە یاریدەدەرێكی پزیشك دەستگیركراوە كە ماددەی هۆشبەری فرۆشتووە بە گەنجان.

میدیاكانی عیراق ئەمڕۆ ئاماژەیان بە ڕاگەیەندراوێكی دادگای باڵای عیراق كرد، كە ئەو دەرمانخانەیە بەناوی فرۆشتنی دەرمانەوە كراوەتەوە، بەڵام بەنهێنی ماددەی هۆشبەری فرۆشتووە بە گەنجان.

هەر بەپێی ڕاگەیەندراوەكە بەپێی یاسا مامەڵە لەگەڵ ئەو یاریدەدەری پزیشكە كراوە و سزادراوە.

دوای داگیركردنی عیراق لە ساڵی 2003دا، فرۆشتن و بەكارهێنانی ماددەی هۆشبەر زۆر زیادی كردووە، بەتایبەتی لە پارێزگاكانی باشوری عیراق.

بەردەوام بە لە خوێندنەوە

کوردستان