بەپێی ڕاپۆرتە كەشناسییەكان، تا 10 ڕۆژی ئایندە كەشوهەوای هەرێم سەقامگیر دەبێت و هیچ ئەگەرێك بۆ باران و بەفر بارین نییە، شارەزایەكی بواری كەشناسی دەڵێت: “هەرچەندە ئەم بەرزە پەستانە كۆتایی دێت و باران بارینن دەستپێدەكاتەوە، بەڵام گرنگە نوێژە بارانەش ئەنجام بدرێت”.
محەمەد كەمال، شارزای كەشناسی بۆ (خەڵك) ڕایگەیاند، داواکارم لەمامۆستایانی ئاینی و هاووڵاتیان ڕۆژی هەینی هەستن بە ئەنجامدانی نوێژە بارانە، چونكە بەتایبەت لە هەولێر و دهۆك و سۆران بڕی پێویست باران نەباریوە، كە ئەوەش هەم دیاردەیەكی گەردوونییە و هەم ویستی خودای گەورەیە.
ڕاشیگەیاند، پێشبینیمان وایە لەماوەکانی داهاتوو بەرزەپەستان کۆتایی بێت و بارانی گشتی باش ناوچەکان بگرێتەوه، بەڵام لەهەمووی گرنگتر ئەوەیە نوێژ ئەنجام بدرێت بۆئەوەی خودای گەورە بارانی بەرەحمەت ببارێنێ.
لە وەرزی پاییزی ئەمساڵ و هاوكات مانگی یەكەمی زستاندا جگە لە چەند شەپۆلێكی كەمی باران بارین، تەنها لە ناوچە شاخاوییەكانیش بەفر باریوە و تا ئێستا ناو شارەكانی نەگرتۆتەوە و بەوەش هێشتا مەترسی وشكەساڵی هەر ماوە.
نوێژە بارانە، نوێژێكی سوننەتە، چەندین جار خودی پێغەمبەری خوا (ﷺ) و هاوەڵانیش ئەنجامیان داوە و موسڵمانانیش لەكاتی كەمی باران و وشكەساڵی پەنای بۆ دەبەن و لە دەشت و ناوچە جیاجیاكان ئەنجامی دەدەن و لەخوای گەورە دەپاڕێنەوە بارانی بەڕەحمەت ببارێنێت.
نوێژە بارانە، هاوشێوەی نوێژی جەژنە و دوو ڕكاتە و (الله اكبر)ی تێدا دەخوێنرێت و دواتر پێشەوا (ئیمام) وتارێك پێشكەش دەكات و دوعای بارینی باران دەكات.
