سەردێر

بەرازیل سەركەوت و سعودیە كرایە دەرەوە

ئۆڵۆمپیادی تۆكیۆ 2020 بەردەوامە

خەڵك-
لە كێبڕكێی گروپی چواری یارییە ئۆڵۆمپییەكانی تۆكیۆ 2020 بۆ تۆپی پێ‌ و لە یاریگای سایتاما، هەڵبژاردەی بەرازیل بە سێ‌ گۆڵ بەرانبەر بە گۆڵێك لە هەڵبژاردەی سعودیەی بردەوە.

سێ‌ گۆڵەكەی بەرازیل، هەریەك لە ماتیۆس كونها و ریچارلیسۆن (دوو گۆڵ) لە خولەكەكانی 3 و 76 و 90 تۆماركران، تاكە گۆڵەكەی سعودیەش لەلایەن یاریزان عەبدولئیلا عمیری لە خولەكی 27دا تۆماركرا.

بەمشێوەیە هەڵبژاردەی بەرازیل، بە دوو بردنەوە و بەرانبەرێك، بووە یەكەمی گروپی چوار و بە جیاوازیی دوو خاڵ لە پێش هەڵبژاردەی ئیڤوارییە كە پێكەوە بۆ خولی داهاتوو سەركەوتن، لەكاتێكدا هەڵبژاردەی سعودیە هەر سێ‌ یارییەكەی دۆڕاند و بەبێ‌ دەستەبەركردنی هیچ خاڵێك ماڵئاوایی لە ئۆڵۆمپیاد كرد.

هەر لەو پاڵەوانێتییە، هەڵبژاردەی میسر توانی بە دوو گۆڵی بێ‌ بەرانبەر لە هەڵبژاردەی ئوسترالیا بباتەوە و بۆ خولی داهاتوو سەربكەوێت، بەو بردنەوەیەش هەڵبژاردەی فیرعەونەكان لە قۆناغی چارەكی كۆتایی لەگەڵ هەڵبژاردەی بەرازیل یاریی دەكات.