سەردێر

عیراق بەرەو مۆندیال هەنگاو دەنێت

خەڵك
هەڵبژاردەی عیراق بە سەركردایەتی ستریچكۆ كاتانیچی ڕاهێنەری سلۆڤینی، توانی سەركەوتنێكی گەورە بەسەر هەڵبژاردەی كەمبۆدیادا تۆماربكات و بە ئاراستەیەكی گەشبینانە هەنگاو بەرەو مۆندیالی قەتەر 2022 هەڵبنێت.

سەرلەئێوارەی ئەمڕۆ دوو شەممە، هەڵبژاردەی تۆپی پێی عیراق، لە یەكەم یاریی خولی كۆتایی گروپەكانی پاڵاوتنی مۆندیال، توانی بە ئەنجامی 4-1 لە هەڵبژاردەی كەمبۆدیا بباتە و ببێتەوە بە یەكەمی گروپەكەی خۆی، ئەمەش بە هەنگاوێكی باشی هەڵبژاردەكە دادەنرێت كە خەون دەبینێت جارێكی تر لە دوای مۆندیالی مەكسیك 1986، بۆ مۆندیال سەربكەوێت.

گۆڵەكانی هەڵبژاردەی عیراق، لەلایەن موهەنەد عەلی لە خولەكی 1 و بەشار رسن لە خولەكی 23 و عەلی عەدنان بە لێدانی سزا لە خولەكی 27ی گێمی یەكەم و سەفا هادی لە خولەكی 93ی گێمی دووم تۆماركران، تاكە گۆڵەكەی هەڵبژاردەی كەمبۆدیاش لەلایەن سویی فیسال لە خولەكی 54ی گێمی دووەم تۆماركرا.

عیراق لە دوای ئەم بردنەوەیە، دوو یاریی تری لەگەڵ هەڵبژاردەكانی ئێران و هۆنگ كۆنگ ماوە، لەگەڵ دەستەبەركردنی ئەنجامێكی باش لەو دوو یارییەدا، هەڵبژاردەكە بۆ خولی كۆتایی پاڵاتنەكە سەردەكەوێت و یەكەم هەنگاو بەشێوەیەكی سەركەوتوانە بەرەو جامی جیهانی قەتەر 2022 هەڵدەنێت.