ئێمە لە تۆرە کۆمەڵایەتیەکان

کوردستان

خێزانێکی نەخۆش پێویستییان بەهاوکارییە

سلێمانی ـ نزار جەزا

پیاوێکی ڕیش سپی خۆی و عەرەبانەیەک لەگەڵ دوو منداڵی بیرکۆڵ لەبەیانییەکی زووەوە بۆ کارکردن دێنەدەرەوە، دەرگای ماڵەکەشی بەقفڵێک دادەخرێت بۆئەوەی ژن و منداڵە نەخۆشەکانی دیکەی لەماڵ نەیەنە دەرەوە.


ماڵێکی بچوک کە سێ ژووری بچکۆلەی هەیە، لەبەرامبەر مزگەوتی خانەقای شاری سلێمانی لەنزیک بازاڕی دۆلارەکە، پیاوێکی ڕیش سپی بەناوی حسێن عەلی و ژنێکی نەخۆشی شیزۆفرینیا و دوو منداڵی بیرکۆڵ و دوو منداڵی دیکە دەژین.

حسێن عەلی بۆ (خەڵک) وتی:” دوو کوڕم نەخۆشی بیرکۆڵیان هەیە و دوو کچەکەشم جارێ مناڵن، بۆیە جارێ دەرناکەوێت ئەیا ئەم دوانەش نەخۆشی بیرکۆڵیان هەیە یاخود نا”.

ئەوەی جێگەی سەرنجە، هەرکاتێک ئەم پیاوە لەماڵ نەبێت، قفڵێکی ڕەنگ ڕەساسی بەدەرگای ماڵەکەوە دەبینرێت، کەلەبەر هاوسەری پیاوەکە ئەم قفڵەی لێ دەدرێت، چونکە ژنەکە توشی نەخۆشی شیزۆفرینیا بووە.


لەبارەی هاوسەرەکەشیەوە حسێن وتی:” هاوسەرەکەم بەهۆی فەقیری و نەبونییەوە نەخۆشی دەروونی توش بووە و لەماڵەوە کەوتووە و ناتوانێت ئیش وکاری ناو ماڵیش بکات، ئەگەر ڕۆژانە دەرمان نەخوات ناتوانین مامەڵەی لەگەڵ بکەین، چونکە زۆر زوو توڕەدەبێت، بۆیە دکتۆریش وتویەتی دەبێت لەگەڵ توڕەبونەکان ئارامبگرین، چونکە ترسمان هەیە کارەساتێک بەسەر خۆی و ئێمەش بهێنێت”.

لەبەردەم ئەم ماڵە بچوکەدا، کە کرێچین، عەرەبانەیەک ڕاگیراوە و پیاوە ڕیش سپییەکە بەیانیانێکی زوو خۆی و دوو منداڵی عەرەبانەکە بۆ ناو بازاڕ دێننە دەرەوە و هەوڵدەدەن بژێوی ژیانیان بەم عەرەبانەیە دابین بکەن.

ئەم پیاوە ڕیش سپییە دەڵێت:” ئەگەر خەڵک هاوکاریمان نەکات ناتوانین بژێوی ژیانمان دابین بکەین، چونکە مانگانە 200 هەزار دینار بە کرێ خانوو دەدەم و دەرمان بۆ هاوسەرەکەشم دەکڕم، هاوکات ئەرکی بەخێوکردن و خواردن حازرکردنی مناڵەکان لەدەرەوە و لەماڵەوەش لەسەر خۆمە، هەموو ئەمانە تەنها بە عەرەبانەیەک دەکەم”.

ئەو پیاوە ڕیش سپییە لەگەڵ ئەوەی دڵپڕبوو لە خراپی دۆخی خۆی و خێزانە شەش کەسییەکەی بەڵام بێئومێد نەبوو لە خێرخوازان و داوای کرد، کە خێرخوازان دەستی هاوکاری بۆ درێژبکەن و کەمێک لەئازاری فەقیری کەمبکەنەوە.

تێبینی: شیزۆفرینیا نەخۆشییەکی دەرونییە و بەشێرپەنجەی ژیری ناسراوە، چونکە کەسەکە توشی لێکترازانی ژیری دەبێت و وای لێدەکات کە بیرکردنەوەی ئاڵۆز ببێت و هەر دەمە و بیرکردنەوەیەکی دەبێت، بەجۆرێک زوو زوو توڕەدەبێت و مامەڵەکردن لەگەڵیدا قورس دەبێت، هاوکات توشی گۆشەگیری و خەمۆکیش دەبێت.

*بۆ ڕاستەوخۆ هاوکاریکردنی ئەم خێزانە دەتوانن پەیوەند بە ژمارە مۆبایلی حسێن عەلی بکەن:

07707636645

* تۆڕی میدیایی خەڵك لەپێناو پاراستنی ئیتیكی ڕاگەیاندن و لەسەر داوای ئەم خێزانە دەموچاوی كەسەكانی شاردۆتەوە.

کوردستان

سێ ئەندامی ئەنجومەنی پارێزگای سلێمانی داوای خەرجکردنی پارەی پرۆژەیەکی شارەکە دەکەن لە حکومەت

خەڵک-

سێ ئەندامی ئەنجومەنی پارێزگای سلێمانی لە یاداشتێکدا داوا لە حکومەت و وەزارەتی دارایی و لایەنە پەیوەندیدارەکان دەکەن، بودجەی تەرخانکراو بۆ پرۆژەی چارەسەری خاشاکی سلێمانی خەرج بکرێت، کە پێشتر بڕیاری لەسەر دراوە، ئەگەر نا پرۆژەکە لە کۆمپانیای جێبەجێار بسەنرێتەوە و دووبارە بخرێتەوە تەندەرینەوە.

لە یاداشتەکەدا ڕێبوار ئەحمەد سەرۆکی لیژنەی تەندروستی و ژینگە و غالب محەممەد سەرۆکی لیژنەی پیشەسازیی و وزە و سێوە حمە خدر ئەندامی ئەنجومەن، لە ئەنجومەنی پارێزگای سلێمانی، دەڵێن: “بۆ جاری سێیەم بەدواداچونمان کردووە بۆ چارەسەری خاشاکی شاری سلێمانی و سەردانی مەیدانیی سەرۆکایەتیی شارەوانیی سلێمانی و شوێنی فڕێدانی خاشاکمان کرد کە شوێنێکی زۆر ناتەندروست و ناشارستانییە و هۆکارێکی سەرەکی تێکدانی پێکهاتەی ئاوی چەمی تانجەرۆ و ئاوی بەنداوی دەربەندیخانە.”

ئاماژە بەوە دەکەن: “لە میانی سەردانمان بۆ لای لێپرسراوی پلانی شارەوانیی سلێمانی بۆمان دەرکەوت دوو ھۆکار لەپشت ڕاگرتنی کارەکەوەن:

یەکەم: هۆکاری دەستبەکارنەبوونی کۆمپانیای لاڤارج کە لایەنی جێبەجێکاری پڕۆژەی ناوبراوە، پەسەند نەکردنی ئەو نوسراوانەیە کە تایبەتە بە پێدانی گوژمەی گرێبەستەکە بەبڕی ٧ ملیۆن و ٥٢٠ ھەزار دۆلار بەپێی یاساو ڕێنماییەکان لە لایەن حکومەتی ھەرێمەوە.

دووەم: گەیاندنی کارەبای نیشتیمانی بە سنوری پڕۆژەکە کەلەلایەن کۆمپانیای (ئیکۆسیم) بە شێوەی قەرز جێبەجێ دەکرێت بەبڕی ٨٣٠ ھەزار دۆلار، بەمەرجێک لەکاتی نەمانی قەیرانی دارایی حکومەتی هەرێم، ئەوا دەبێت وەزارەتی دارایی و ئابوری لەسەر گوژمەی پڕۆژەکە بۆیان خەرج بکاتەوە.”

ئەو سێ ئەندامەی ئەنجومەنی پارێزگای سلێمانی ئەوەشیان ڕاگەیاندووە: “ئەو ھۆکارانە بونەتە هۆی دەستبەکارنەبوونی کۆمپانیای جێبەجێکار لە پڕۆژەی چارەسەری خاشاکی سلێمانی، ئێمە داوکارین کە نوسراو ئاڕاستەی وەزارەتی دارایی و ئابوری بکرێت بۆ ڕەزامەندی دەربڕین و چارەسەرکردنی ئەو گرفتانەی کە ئاماژەمان پێدا، لە ئەگەری ڕەزامەندی دەرنەبڕینی وەزارەتی دارایی و ئابوری و دەستبەکارنەبوونی کۆمپانیای ناوبراو لە پڕۆژەی چارەسەری خاشاکی سلێمانی، ئەوا زۆر پێویستە کە ئەنجومەنی پارێزگا بڕیار بدات یاخود داوا بکات لەماوەی مانگێکدا گرێبەستی پڕۆژەکە هەڵوەشێنرێتەوە و دووبارە بەپێی یاساو ڕێنماییەکان پڕۆسەی تەندەرین بۆ پڕۆژەکە بکرێت و گرێبەست لەگەڵ کومپانیایەکی نیشتیمانی بکرێت.”

 

بەردەوام بە لە خوێندنەوە

کوردستان

كۆمەڵە داوا دەكات حكومەتی هەرێم بێدەنگ نەبێت

خەڵك- بەشی هەواڵ

سكرتاریەتی كۆمەڵەی زەحمەتكێشانی كوردستان لە راگەیەندراوێكدا داوا لە حكومەتی هەرێمی كوردستان دەكات كە بێ دەنگ نەبێت لەبەرامبەر تیرۆركردنی چالاكانی رۆژهەڵاتی كوردستان لە هەرێم.

كۆمەڵەی زەحمەتكێشانی كوردستان بەبۆنەی كوژرانی ئیقبال مورادی چالاكی سیاسی رۆژهەڵاتی كوردستان لە پێنجوێن راگەیەندراوێكی بڵاوكردەوە، تێیدا وێڕای سەرەخۆشی لە بنەماڵەی مورادی رایدەگەیەنێت “داوا لە دامودەزگانی حكومەتی هەرێمی كوردستان دەكەین بەرامبەر بە كوشتن‌و رفاندنی هەڵسوڕاوانی سیاسی كوردی رۆژهەڵات بە دەستی تاوانكارانی كۆماری ئیسلامی بێدەنگ نەبن‌”.

راشیگەیاندووە “خوازیاری ئەوەین دامودەزگا ئەمنییەكان لە زووترین كاتدا ئەنجامدەرانی ئەم تاوانە قیزەونە دەستگیر‌و رادەستی یاسای بكەن”.

لە ماوەی رابردوودا چەندین چالاكی سیاسی و بەرپرسی حزبەكانی رۆژهەڵاتی كوردستان لە باشوری كوردستان كوژراون و حزبەكانی رۆژهەڵاتیش كۆماری ئیسلامی ئێران تۆمەتبار دەكەن، بەڵام تاكو ئێستا دەزگا فەڕمییەكانی هەرێمی كوردستان كەسیان بە ئەنجامدانی ئەو تاوانانە تۆمەتبار نەكردووە.

بەردەوام بە لە خوێندنەوە

کوردستان

لە شارباژێڕ و دوكان سێ هاوڵاتی خنكان

یەكێك لە روبارەكانی ناوچەی شارباژێڕِ

خەڵك- بەشی هەواڵ
ئەمڕۆ 20 ی 7 ی 2018 ، لەهەریەكە لە بەشی سەرەوەی دەریاچەی دوكان و لە چەمێكی نزیك گوندی ساڵانان سێ‌ هاوڵاتی لەكاتی مەلەكردندا خنكان.

پۆلیسی سلێمانی لە راگەیەندراوێكدا كە وێنەیەكی بۆ (خەڵك) نێردراوە، رایگەیاند
“پاشنیوەڕۆی ئەمڕۆ لەبەشی سەرەوەی دەریاچەی دوكان و لەكاتی مەلەكرندا دایك و كچێك بەناوەكانی ( ش ، م ، ع لەدایكبووی 1970 و ك ، أ ، س ) لەدایكبووی 1992 ) كە دانیشتوی قەزای دوكانن و بەخێزانی بۆ مەلەكردن ڕویان لەناوچەیەكردبوو، گیانیان لەدەستدا و دوای گەیشتنی هێزەكانی پۆلیس و تیمەفریاگوزارییەكان تەرمەكانیان دەرهێنرانەوەو ڕەوانەی پزیشكی دادوەری لەشاری سلێمانی كران”.

راشیگەیاندووە “هەرئەمڕۆ و لەچەمێكی نزیك گوندی ساڵانانی سەر بە قەزای چوارتا هاوڵاتی ( ش ، م ، س ) لەدایكبوی 1992 لەكاتی مەلەكرندا خنكا، دوای گەیشتنی هێزەكانی پۆلیس و تیمەفریاگوزارییەكان تەرمەكەی دەرهێنرایەوەو ڕەوانەی پزیشكی دادوەری لەشاری سلێمانی كرا”.

رونیشیكردەوە “لەئێستاشدا لەلایەن هەردوو بنكەی پۆلیسی دوكان و بنكەی پۆلیسی چوارتا پەڕاوی لێكۆڵینەوە بۆ هەردوو ڕوداوەكە كراوەتەوە و لێكۆڵینەوەكان دەستیانپێكردووە” .

بەردەوام بە لە خوێندنەوە
ریکلام

کوردستان

دوایین