ئێمە لە تۆرە کۆمەڵایەتیەکان

کوردستان

پارتی: لە هەژماركردنەوەی دەنگەكان بەدەست دەنگەكانمان كەم دەكەن

خەڵك-بەشی هەواڵ

بەرپرسی مەكتەبی هەڵبژاردنی پارتی دیموكراتی كوردستان رایدەگەیەنێت، لە دووبارە جیاكردنەوەو هەژماركردنەوەی دەنگەكان بەدەست ناترسین، بەڵام لەڕەتكردنەوەی دەیان هەزار سندوقی دەنگدانی تایبەت دەترسین بێگومان ئەوە كاریگەری لەسەر دەنگ و ژمارەی كورسیەكانمان دەبێت.

خەسرۆ گۆران بەرپرسی مەكتەبی هەڵبژاردنی پارتی دیموكراتی كوردستان بە دەنگی ئەمریكای راگەیاند، ئەو ئاگرەی لەكۆگاكانی كۆمسیۆن بەربووە من نازانم هۆكارەكەی ئەنقەستە یا چ هۆكارێكیتر، بەڵام هەرچی بێت بڕواناكەم كاریگەری یەكلایی كەرەوەی سەبارەت بەبڕیارو ئەنجامەكان هەبێت، بەڵام بەهیچ شێوەیەك لەكوردستان ئەوە ڕوونادات.

ئاشكراشیكرد، ئێمە وەك پارتی هیچ كاتێك لە دووبارە هەژماركردنەوەی دەنگەكان نەترساوین، ئێمە هەر لەڕۆژی یەكەم كەلایەنە ناڕازییەكان هاتنە سەرخەت لەسلێمانی ئێمەش لەپرێس كۆنفرانسێكدا پشتیوانی خۆمان بۆ داواكارییەكانیان دوپاتكردەوە، چونكە ئێمە پشت ڕاستین لە دەنگدەرو دەنگ‌و پاكی كارەكانمان ئێمە دەزانین لەو ناوچانەی پارتی زۆرینەیە هەڵبژاردنێكی پاك‌و بێگەردمان ئەنجامداوە بەبێ هیچ موزایەدەكردنێك ئێمە پشت ئەستورین بە خۆمان‌و دەنگەكانمان، بۆیە ئەگەر دەنگەكان بەدەست بژمێردرێنەوە ئێمە هیچ لاریمان نیەو هیچ مەترسیمان نییە هەر لایەك لەكوێ گومانی هەبوو با لەكۆمسیۆن داوابكات ئێمە بەتەواوی ئازادی دەدەین بە كۆمسیۆن لەكوێی ناوچەكانی زۆرینەی ژێر دەستی پارتی ویستی دەنگەكان هەژماربكاتەوە.

خەسرۆ گۆران راشیگەیاند، بڕواناكەم هەژماركردنەوەی دەنگەكان كاریگەری لەسەر كەمبوونەوەی ژمارەی كورسییەكانی پارتی هەبێت، بەڵام هەندێك بڕیاری سەقەت‌و نادەستوری لەپەرلەمانی عێراق دراوە كەدژ بەبنەماكانی دیموكراسییە، وەك ڕەتكردنەوەی دەنگەكانی دەرەوە، خەڵكێك بەسەدان كیلۆمەتر ڕێگای بڕیوە لە ئەوروپا یا ئەمریكا تابچێت ئەو مافەی خۆی بەكاربهێنێت، بەڵام بەبڕیارێكی مەزاجی بێن ئەو مافەی لێ بستێننەوە، یاخود ڕەتكردنەوەی دەنگدانی ئاوارەكان بەڵێ ئەگەر ئەو دەنگانە ڕەتبكرێنەوە بێگومان كاریگەری لەسەر ئەنجامەكان دەبێت.

وتیشی، ئێمە لەجیاكردنەوەی دەنگەكان ناترسین، بەڵكو لەوە دەترسین بێ هەژماركردن‌و جیاكردنەوە دەیان هەزار سندوقی دەنگدان پوچەڵ بكرێنەوە ئەوە چۆن كاریگەری نابێت؟ بێگومان كاریگەری لەسەر دەنگەكان دەبێت، بۆیە ئێمە سكاڵامان تۆماركردووە دژی ئەو بڕیارە چەوت‌و نادەستوریەی پەرلەمانی عێراق، جگە لەوەش پوچەڵكردنەوەی دەنگدانی تایبەت، بەچ مافێك پێشمەرگە كەچەندین ساڵە شەهیدی داوە پارێزگاری لەخاكی كوردستان كردووە شەڕی داعشی كردووە، بەڵام بێن مافی دەنگدانی لێبسێننەوە لەكاتێكدا لە پازدە پارێزگاكەی تری عێراق دەنگی سوپای عێراق حساب دەكرێت ئەمە جێگای قبوڵ نییە، خەڵكێك ماندوو بووە تا كارتی دەنگدانی وەرگرتووە پەیدای كردووە، بەڵام بەمەزاجی ئەندام پەرلەمانێك یان بڕیارێكی سیاسی ئەو مافەی لێ بسەنرێتەوە ئەمە دووبارە جێگای قبوڵ نییە، هەروەها بە ڕەتكردنەوەی دەنگدانی ئاوارەكان بێگومان ژمارەی كورسییەكانی پارتی لەموسڵ‌و یەكێتی لەكەركوك كەم دەكات، چونكە سەدان هەزار كەس بێ بەش دەكرێت لەمافی دەنگدان.

کوردستان

سێ ئەندامی ئەنجومەنی پارێزگای سلێمانی داوای خەرجکردنی پارەی پرۆژەیەکی شارەکە دەکەن لە حکومەت

خەڵک-

سێ ئەندامی ئەنجومەنی پارێزگای سلێمانی لە یاداشتێکدا داوا لە حکومەت و وەزارەتی دارایی و لایەنە پەیوەندیدارەکان دەکەن، بودجەی تەرخانکراو بۆ پرۆژەی چارەسەری خاشاکی سلێمانی خەرج بکرێت، کە پێشتر بڕیاری لەسەر دراوە، ئەگەر نا پرۆژەکە لە کۆمپانیای جێبەجێار بسەنرێتەوە و دووبارە بخرێتەوە تەندەرینەوە.

لە یاداشتەکەدا ڕێبوار ئەحمەد سەرۆکی لیژنەی تەندروستی و ژینگە و غالب محەممەد سەرۆکی لیژنەی پیشەسازیی و وزە و سێوە حمە خدر ئەندامی ئەنجومەن، لە ئەنجومەنی پارێزگای سلێمانی، دەڵێن: “بۆ جاری سێیەم بەدواداچونمان کردووە بۆ چارەسەری خاشاکی شاری سلێمانی و سەردانی مەیدانیی سەرۆکایەتیی شارەوانیی سلێمانی و شوێنی فڕێدانی خاشاکمان کرد کە شوێنێکی زۆر ناتەندروست و ناشارستانییە و هۆکارێکی سەرەکی تێکدانی پێکهاتەی ئاوی چەمی تانجەرۆ و ئاوی بەنداوی دەربەندیخانە.”

ئاماژە بەوە دەکەن: “لە میانی سەردانمان بۆ لای لێپرسراوی پلانی شارەوانیی سلێمانی بۆمان دەرکەوت دوو ھۆکار لەپشت ڕاگرتنی کارەکەوەن:

یەکەم: هۆکاری دەستبەکارنەبوونی کۆمپانیای لاڤارج کە لایەنی جێبەجێکاری پڕۆژەی ناوبراوە، پەسەند نەکردنی ئەو نوسراوانەیە کە تایبەتە بە پێدانی گوژمەی گرێبەستەکە بەبڕی ٧ ملیۆن و ٥٢٠ ھەزار دۆلار بەپێی یاساو ڕێنماییەکان لە لایەن حکومەتی ھەرێمەوە.

دووەم: گەیاندنی کارەبای نیشتیمانی بە سنوری پڕۆژەکە کەلەلایەن کۆمپانیای (ئیکۆسیم) بە شێوەی قەرز جێبەجێ دەکرێت بەبڕی ٨٣٠ ھەزار دۆلار، بەمەرجێک لەکاتی نەمانی قەیرانی دارایی حکومەتی هەرێم، ئەوا دەبێت وەزارەتی دارایی و ئابوری لەسەر گوژمەی پڕۆژەکە بۆیان خەرج بکاتەوە.”

ئەو سێ ئەندامەی ئەنجومەنی پارێزگای سلێمانی ئەوەشیان ڕاگەیاندووە: “ئەو ھۆکارانە بونەتە هۆی دەستبەکارنەبوونی کۆمپانیای جێبەجێکار لە پڕۆژەی چارەسەری خاشاکی سلێمانی، ئێمە داوکارین کە نوسراو ئاڕاستەی وەزارەتی دارایی و ئابوری بکرێت بۆ ڕەزامەندی دەربڕین و چارەسەرکردنی ئەو گرفتانەی کە ئاماژەمان پێدا، لە ئەگەری ڕەزامەندی دەرنەبڕینی وەزارەتی دارایی و ئابوری و دەستبەکارنەبوونی کۆمپانیای ناوبراو لە پڕۆژەی چارەسەری خاشاکی سلێمانی، ئەوا زۆر پێویستە کە ئەنجومەنی پارێزگا بڕیار بدات یاخود داوا بکات لەماوەی مانگێکدا گرێبەستی پڕۆژەکە هەڵوەشێنرێتەوە و دووبارە بەپێی یاساو ڕێنماییەکان پڕۆسەی تەندەرین بۆ پڕۆژەکە بکرێت و گرێبەست لەگەڵ کومپانیایەکی نیشتیمانی بکرێت.”

 

بەردەوام بە لە خوێندنەوە

کوردستان

كۆمەڵە داوا دەكات حكومەتی هەرێم بێدەنگ نەبێت

خەڵك- بەشی هەواڵ

سكرتاریەتی كۆمەڵەی زەحمەتكێشانی كوردستان لە راگەیەندراوێكدا داوا لە حكومەتی هەرێمی كوردستان دەكات كە بێ دەنگ نەبێت لەبەرامبەر تیرۆركردنی چالاكانی رۆژهەڵاتی كوردستان لە هەرێم.

كۆمەڵەی زەحمەتكێشانی كوردستان بەبۆنەی كوژرانی ئیقبال مورادی چالاكی سیاسی رۆژهەڵاتی كوردستان لە پێنجوێن راگەیەندراوێكی بڵاوكردەوە، تێیدا وێڕای سەرەخۆشی لە بنەماڵەی مورادی رایدەگەیەنێت “داوا لە دامودەزگانی حكومەتی هەرێمی كوردستان دەكەین بەرامبەر بە كوشتن‌و رفاندنی هەڵسوڕاوانی سیاسی كوردی رۆژهەڵات بە دەستی تاوانكارانی كۆماری ئیسلامی بێدەنگ نەبن‌”.

راشیگەیاندووە “خوازیاری ئەوەین دامودەزگا ئەمنییەكان لە زووترین كاتدا ئەنجامدەرانی ئەم تاوانە قیزەونە دەستگیر‌و رادەستی یاسای بكەن”.

لە ماوەی رابردوودا چەندین چالاكی سیاسی و بەرپرسی حزبەكانی رۆژهەڵاتی كوردستان لە باشوری كوردستان كوژراون و حزبەكانی رۆژهەڵاتیش كۆماری ئیسلامی ئێران تۆمەتبار دەكەن، بەڵام تاكو ئێستا دەزگا فەڕمییەكانی هەرێمی كوردستان كەسیان بە ئەنجامدانی ئەو تاوانانە تۆمەتبار نەكردووە.

بەردەوام بە لە خوێندنەوە

کوردستان

لە شارباژێڕ و دوكان سێ هاوڵاتی خنكان

یەكێك لە روبارەكانی ناوچەی شارباژێڕِ

خەڵك- بەشی هەواڵ
ئەمڕۆ 20 ی 7 ی 2018 ، لەهەریەكە لە بەشی سەرەوەی دەریاچەی دوكان و لە چەمێكی نزیك گوندی ساڵانان سێ‌ هاوڵاتی لەكاتی مەلەكردندا خنكان.

پۆلیسی سلێمانی لە راگەیەندراوێكدا كە وێنەیەكی بۆ (خەڵك) نێردراوە، رایگەیاند
“پاشنیوەڕۆی ئەمڕۆ لەبەشی سەرەوەی دەریاچەی دوكان و لەكاتی مەلەكرندا دایك و كچێك بەناوەكانی ( ش ، م ، ع لەدایكبووی 1970 و ك ، أ ، س ) لەدایكبووی 1992 ) كە دانیشتوی قەزای دوكانن و بەخێزانی بۆ مەلەكردن ڕویان لەناوچەیەكردبوو، گیانیان لەدەستدا و دوای گەیشتنی هێزەكانی پۆلیس و تیمەفریاگوزارییەكان تەرمەكانیان دەرهێنرانەوەو ڕەوانەی پزیشكی دادوەری لەشاری سلێمانی كران”.

راشیگەیاندووە “هەرئەمڕۆ و لەچەمێكی نزیك گوندی ساڵانانی سەر بە قەزای چوارتا هاوڵاتی ( ش ، م ، س ) لەدایكبوی 1992 لەكاتی مەلەكرندا خنكا، دوای گەیشتنی هێزەكانی پۆلیس و تیمەفریاگوزارییەكان تەرمەكەی دەرهێنرایەوەو ڕەوانەی پزیشكی دادوەری لەشاری سلێمانی كرا”.

رونیشیكردەوە “لەئێستاشدا لەلایەن هەردوو بنكەی پۆلیسی دوكان و بنكەی پۆلیسی چوارتا پەڕاوی لێكۆڵینەوە بۆ هەردوو ڕوداوەكە كراوەتەوە و لێكۆڵینەوەكان دەستیانپێكردووە” .

بەردەوام بە لە خوێندنەوە
ریکلام

کوردستان

دوایین