ئێمە لە تۆرە کۆمەڵایەتیەکان

کوردستان

حكومەتی هەرێم وەڵامی وەزارەتی دەرەوەی ئەمریكای دایەوە

هەولێر- ئارام سەردار
سەرۆكی لیژنەی وەڵامدانەوەی ڕاپۆرتە نێودەوڵەتییەكانی حكومەتی هەرێمی كوردستان سەبارەت بەراپۆرتی وەزارەتی دەرەوەی ئەمەریكا وەڵامی راپۆرتێكی وەزارەتی دەرەوەی وڵاتە یەكگرتووەكانی ئەمریكا دەداتەوە لەبارەی هەرێمی كوردستانەوە.

دیندار زێباری لە كۆنگرەیەكی ڕۆژنامەنووسیدا وتی “لەڕاپۆرتەكەی وەزارەتی دەرەوەی ئەمەریكا بابەتی گەندەڵی باس كراوە لەكاتێكدا ئێمە بە پێی یاسای ساڵی 2011ی ژمارە 3، تاوەكو ئێستا 118 كەس بە تۆمەتی گەندەڵی بڕیاری دەستگیركردنیان بۆ دەرچووە و هەنگاو بەهەنگاو رووبەڕووی گەندەڵی بوینەتەوە، سەبارەت بەزەوی مەسیحییەكانیش بەتایبەت كریستیانەكان لە پارێزگای دهۆك لیژنەیەكی تایبەت پێكهێنراوە، ئێستاش تەنها بڕیاری دادگای ماوە و پێویستیشی بە بودجەی پێویست هەیە بۆ جێیەجێكردنی كێشەی ئەو زەوی و زارانە”.

ئەوەشی خستەڕوو، 2 ملیۆن و 100 هەزار ئاوارە و پەنابەر هەن لەهەرێمی كوردستان بەمەش لە %30ی دانیشتوانی كوردستان هێشتا ئاوارەن لەكۆی ئەمانەش لە 11 كەمپ وەك شار لە كوردستان هەن و 240 هەزار پەنابەریان تێدایە.

دیندار زێباری وتیشی “بۆ پاراستنی ماف و كلتوری پێكهاتە و نەتەوە جیاوازەكان، تاوەكو ئێستا 56 قوتابخانە بۆ ئەو پێكهاتانە كراونەوە، بەئازادانەش پەیڕەوی ئاینی خۆیان دەكەن”.

سەرۆكی لیژنەی وەڵامدانەوەی راپۆرتە نێودەوڵەتییەكان راشیگەیاند، بۆ پاراستنی مافی ژنان جگە لەوەی یاسای تایبەتیان بۆ دەركراوە، لەئێستاشدا 49 داواكاری گشتی و 30 دادوەر و 94 لێكۆڵەری دادی ژن هەن و ژمارەی ژنانیش لەدامەزراوەكان هەن بەشێوەی بەرچاو، هەروەها 3 هەزار و 75 ڕفێنراوی ئێزدی هێشتا ماون ئازاد نەكراون، لەبەرامبەریشدا هەزار ژنی ڕفێنراوی ئێزدی و زیاتر لە 174 ژن و پیاوی مەسیحیش لە دەستی تیرۆرستانی داعش ئازادكراون”.

سەبارەت بە گیراوانی داعش لەلای حكومەتی هەرێم و مامەڵەكردن لەگەڵیان وتی “لەماوەی هەشت مانگی ڕابردوودا 2704 بەندكراوی داعش لە كوردستان هەبوون، تا 31/3/2018، دژە تیرۆریش 691 بەندكراوی هەیە، ئەو داعشانەی كە خەڵكی دەرەوەی كوردستانن ‌و، ڕادەستی هێزەكانی عیراقی كراونەتەوە، ژمارەیان 853كەس بووە. 277 كەسیان بە دادگای لێكۆڵینەوەی نەینەوا دراون، 576 كەسی تریش بەپێی بڕیاری دادگای ئاسایشی هەولێر ڕەوانەی دادگای لێكۆڵینەوەی ڕەسافە كراون و بڕیارە ژمارەیەكی تریش رادەستیان بكرێتەوە”.

لەبارەی ئازادكراوەكانیش وتی “602 كەس ئازاد كراون، ئەوەی ئێستا ماون لەبەندیخانەكان، 598 بەندكراون لە بەندیخانەی دژە تیرۆر، بەشێكیان لە چاكسازی گەوران و بەشێكیشیان لە چاكسازی ژنانن”.

ئاماژەی بۆ ئەوەشكرد، هەزار و 814 شەهید و 10 هەزار و 725 بریندار لەریزەكانی پێشمەرگە هەن و 44 دیلی پێشمەرگەش ئازاد نەكراون.

لەبارەی گۆڕی بە كۆمەڵیش وتی “122 گۆڕی بە كۆمەڵ هەن كە جۆرەها هاوڵاتیان تێدایە، بەڵام هێزەكانی كوردستان ئەنجامیان نەداوە”.

کوردستان

سەركردەیەكی یەكێتی: توندوتیژی ناو خۆپیشاندانەكان نیشانەی بێزاری خەڵكە

خەڵك – بەشی هەواڵ
ئەندامێكی سەركردایەتی یەكێتی نیشتمانی كوردستان ڕایدەگەیەنێت، ئایندەی حكومەتی نوێی عیراق دیارنیە، خۆپیشاندانەكانی خوارووش زادەی نەبوونی خزمەتگوزاریە لە وەرزی هاویندا، دەشڵێت: “ئەم خۆپیشاندانە هیچ داواكاریەكی سیاسیان نیە، توندوتیژ-یش نیشانەی بێزاری خەڵكە”.

فەرید ئەسەسەرد، ئەندامی سەركردایەتی یەكێتی نیشتمانی كوردستان بە (خەڵك)ی ڕاگەیاند، نەبوونی خزمەتگوزاری هاوڵاتیانی لە باشووری عیراق هێنایە سەر جادە و دروست بوونی توندوتیژیش لە خۆپیشاندانەكان نیشانەی تەواو بێزاری خەڵكە بەدەست نەبوونی خزمەتگوزاری لەم وەرزی هاوینەدا.

وتیشی، “لەگەڵ ئەوەی حكومەتی ئێستای عیراق بەڵێنی هەنوكەیی بۆ چارەسەر و داواكاریەكانی خەڵك داوە، بەڵام خەڵكی ئەو ناوچانە زۆر بێزارن لە نەبوونی خزمەتگوزاری لێكەوتنی توندوتیژیش نیشانەی بێزاری لە ڕادەبەدەری خەڵكە، ڕەنگە ئەمە چارەسەر نەكرێت و زۆرێك لە ناوچەكانی دیكەی عیراق بگرێتەوە “.

ڕاشیگەیاند، لە ئێستادا ئایندەی حكومەتی نوێی عیراق نادیارە، ئەگەر بەهۆی تانەكان نەبوایە لە ئەنجامی هەڵبژاردنەكانی 12ی ئایار، ڕەنگە ئێستا گفتوگۆكان لەسەر پێكهێنانی حكومەت بوایە.

ئەو سەركردایەتییەی یەكێتی ئاماژەی بۆ ئەوەشكرد، ئەم خۆپیشاندانەی لەخوارووی عیراق بەڕێوەدەچێت هیچ ئەجێندایەكی دەرەكی پێوە دیار نیە و دەستی ناوخۆیی سیاسیشی لەپشتەوە نیە، خۆپیشاندەران خۆیان لە سیاسی و مەرامی سیاسی بەدوورگرتووە.

بەردەوام بە لە خوێندنەوە

کوردستان

پەیمانگایەك دابەشكردنی فۆڕمی وەرگرتنی خوێندكارانی ڕاگەیاند

خەڵك- بەشی هەواڵ
پەیمانگای پەروەردەی وەرزشی چەمچەماڵ دابەشكردنی فۆڕمی وەرگرتنی خوێندكارانی دەرچووی پۆلی 9ی بنەڕەتی ڕاگەیاند و مەرجەكانی وەرگرتنیشی بڵاوكردەوە.

پەیمانگای پەروەردەی وەرزشی چەمچەماڵ لە ڕاگەیەنراوێكدا، كە وێنەی بۆ (خەڵك) هاتووە، ئاماژەی بەوەكردووە، پەیمانگاكە هەڵدەستێت بە دابەشكردنی فۆڕمی وەرگرتنی خوێندكارانی دەرچووی 9ی بنەڕەتی بۆ ساڵی خوێندنی 2018- 2019.

ڕاشیگەیاندووە، دابەشكردنی فۆڕمەكە لە 16-7 دەستپێدەكات تا 5-8 و ڕۆژانە لە 8:30ی بەیانی تا 12:30ی نیوەڕۆ بەردەوام دەبێت.

سەبارەت بە مەرجەكانیش ئاشكرای كردووە، دەبێت خوێندكارەكە دەرچووی ئەمساڵ یان ساڵی ڕابردووبێت و لەدایكبووی 2000 و بەرەو سەرەوەبێت و دەبێت ناسنامەی باری شارستانی پێ‌ بێت و ئەو خوێندكارەی بۆ خولی دووەم ماوەتەوە دەتوانێت فۆڕمەكە وەربگرێت.

بەردەوام بە لە خوێندنەوە

کوردستان

بوومەلەرزەیەك لە پارێزگای سلێمانی دا

خەڵك- بەشی هەواڵ
دوانیوەڕۆی ئەمڕۆ یەك شەممە بوومەلەرزەیەك ناوچەكانی دەربەندیخان-ی سەر بە پارێزگای سلێمانی هەژاندووە.

كەشناسی گەرمیان لە ڕاگەیەنراوێكدا ئاماژەی بەوەكردووە، دوانیوەڕۆی ئەمڕۆ 15-7-2018 لە كاتژمێر 4:40 خولەك بوومەلەرزەیەك لەنێوان شاخی خۆشك- دەربەندیخان-ی داوە.

ئاماژەی بەوەشكردووە، بوومەلەرزەكە بە گوڕی 3.7 پلە بووە بە پێوەری ڕێختەر و بە قوڵایی 11 كیلۆمەتر و دووری 57 كیلۆمەتر لە ناوەندی شارۆچكەی كەلار-ەوە.

ئەمە لەكاتێكدایە، كە بەیانی ئەمڕۆ بوومەلەرزەیەكی دیكە لە ناوچە سنوریەكانی نێوان ڕۆژهەڵاتی كوردستان و هەرێمی كوردستانی لە سنوری پارێزگای هەڵەبجە دا.

بەردەوام بە لە خوێندنەوە
ریکلام

کوردستان

دوایین