سەرۆكوەزیرانی عێراق، محەمەد شیاع سوودانی و نوێنەری باڵای یەكێتیی ئەورووپا لە سیاسەتی دەرەكی و كاروباری ئاسایش، جۆزێپ بۆڕێل تاوتوێی پەیوەندییەكانی نێوان عێراق و وڵاتانی یەكێتیی ئەورووپایان كرد.
بەگوێرەی ئەو راگەیەندراوەی كە لە نووسینگەی راگەیاندنی سەرۆكوەزیرانی عێراقەوە بڵاوكراوەتەوە، محەمەد شیاع سوودانی لە پەراوێزی كارەكانی دووەمین كۆنگرەی بەغدا بۆ هاریكاری و هاوبەشیی كە لە ئوردن بەڕێوەچوو، لەگەڵ جۆزێپ بۆڕێل كۆبووەتەوە.
لە راگەیەندراوەكەدا ئاماژە بەوە دراوە كە لە دیدارەكە پەیوەندییە دوو قۆڵییەكانی نێوان عێراق و وڵاتانی یەكێتیی ئەورووپا بەگشتی و چۆنییەتی بەهێزكردنی هاوبەشی و ئالوگۆڕكردن لەسەر ئاستی ئابووری و ئەمنی و بوارەكانی دیكە كە جێی بایەخ و بەرژەوەندیی هاوبەشە، تاوتوێ كران.
هەر لە دیدارەكەدا سەرۆكوەزیرانی عێراق، ئاماژەی بەوە كرد كە عێراق گرنگی بە هاوسەنگیی لە پەیوەندییە دەرەكییەكانی و ئاراستەی بەرەو كاركردنی نێودەوڵەتیی بۆ پشتگیریكردنی ئاسایش و سەقامگیریی ناوچەكە دەدات، هەروەها بایەخ بە هەوڵە هاوبەشەكان لەبواری بەرەنگاربوونەوەی تیرۆر و توندوتیژی و رووبەرووبوونەوەی ئاڵنگارییە ئابوورییەكان دەدات.
لە بەرامبەردا نوێنەری باڵای یەكێتیی ئەورووپا لە سیاسەتی دەرەكی و كاروباری ئاسایش، پشتگیری یەكێتیی ئەورووپای بۆ سەقامگیریی عێراق و هاوكاریكردنی كردەوە، هەروەها بانگهێشتنامەیەكی ئاراستەی محەمەد شیاع سوودانی كرد بۆ ئەوەی سەردانی بارەگای یەكێتیی ئەورووپا لە برۆكسێل بكات، بە ئامانجی زیاتر تاوتوێكردنی پرسە هاوبەشەكان و پتەوكردنی پەیوەندیی هاوبەش لەنێوان عێراق و وڵاتانی یەكێتیی ئەورووپا.
سەرۆكوەزیرانی عێراق، بانگهێشتنامەكەی قبوڵكردووە و رایگەیاندووە كە لە نزیكترین دەرفەتدا سەردانی بارەگای یەكێتیی ئەورووپا دەكات.
