ئێمە لە تۆرە کۆمەڵایەتیەکان

کوردستان

ئەندازیارێكی خۆراك مەترسیەكانی بەكارهێنانی كاغەزی ئەلەمنیۆم ئاشكرادەكات

خەڵك – بەشی هەواڵ

ئەندازیارێكی خۆراك لە سلێمانی ڕایدەگەیەنێت، زۆربوونی ئەلەمنیۆم لە جەستەدا‌ دەبێتە هۆی تووشبوون بە نەخۆشی زەهایمەر و داخورانی ئێسك و بەخێرایی لەناوبردنی جەستەی مرۆڤ ، هۆشداریش دەدات، لە كەمكردنەوەی بەكارهێنانی كاغەزی ئەلەمنیۆم لە ئامادە كردنی خۆراكدا.

لەشكر حەمید، ئەندازیاری خۆراك لە سلێمانی بۆ (خەڵك) ڕایگەیاند، كاغەزی ئەلەمنیۆم بەشێوەیەكی گشتی لەلایەن هاوڵاتیانەوە بۆ ئامادەكردنی خۆراك زۆر بەكاردێت، بەجۆرێك دەبینین كاغەزی ئەلەمنیۆم زۆر بەكاردێت بۆ برژاندنی خۆراك بە تایبەتی ماسی و گۆشت و مریشك و تەماتە و پەتاتە، كە زیان بە تەندروستی دەگەیەنێت، چونكە ئەو ئەلەمنیۆمەی بەكاردێت كوالێتی نییە و ماددەی نایلۆنی تێكەڵ دەكرێت.

دەشڵێت: “شارەزایان هۆشداری دەدەن و داوا دەكەن بەخێرایی ئەم دیاردەیە، واتە بەكارهێنانی كاغەزی ئەلەمنیۆم كەمبكرێتەوە، چونكە‌ زیانی زۆر گەورەی بۆ تەندروستی مرۆڤ هەیە، بەجۆرێك كاغەزی ئەلەمنیۆم كاتێك خواردنەكانی پێ دەپێچرێت و دەخرێتە ناو فڕنەوە، لەگەڵ گەیشتنی بە پلەی گەرمی بەرز دەتوێتەوە و لەگەڵ خۆراكەكە تێكەڵ دەبێت”.

ڕاشیگەیاند، زۆربوونی ئەلەمنیۆم لە جەستەدا‌ دەبێتە هۆی تووشبوون بە نەخۆشی زەهایمەر و داخورانی ئێسك و بە خێرایی جەستەی مرۆڤ لەناودەبات، گرفتی گەورە بۆ گورچیلە و مێشك و ڕژێنی دەرەقی و جگەر دروست دەكات و كۆئەندامی دەمار تێك دەدات.

ئەو ئەندازیارەی خۆراك ئاشكراشی كرد، بەكارهێنانی كاغەزی ئەلەمنیۆم بۆ برژاندنی تەماتە و لیمۆ و پەتاتە و ڕووەكەكان زیانەكانی دوو هێندەیە، هەربۆیە بەهەموو شێوەیەك پێویستە ڕێگە لە بەكارهێنانی كاغەزی ئەلەمنیۆم بۆ دروستكردنی خواردن بگیرێت.

کوردستان

سێ ئەندامی ئەنجومەنی پارێزگای سلێمانی داوای خەرجکردنی پارەی پرۆژەیەکی شارەکە دەکەن لە حکومەت

خەڵک-

سێ ئەندامی ئەنجومەنی پارێزگای سلێمانی لە یاداشتێکدا داوا لە حکومەت و وەزارەتی دارایی و لایەنە پەیوەندیدارەکان دەکەن، بودجەی تەرخانکراو بۆ پرۆژەی چارەسەری خاشاکی سلێمانی خەرج بکرێت، کە پێشتر بڕیاری لەسەر دراوە، ئەگەر نا پرۆژەکە لە کۆمپانیای جێبەجێار بسەنرێتەوە و دووبارە بخرێتەوە تەندەرینەوە.

لە یاداشتەکەدا ڕێبوار ئەحمەد سەرۆکی لیژنەی تەندروستی و ژینگە و غالب محەممەد سەرۆکی لیژنەی پیشەسازیی و وزە و سێوە حمە خدر ئەندامی ئەنجومەن، لە ئەنجومەنی پارێزگای سلێمانی، دەڵێن: “بۆ جاری سێیەم بەدواداچونمان کردووە بۆ چارەسەری خاشاکی شاری سلێمانی و سەردانی مەیدانیی سەرۆکایەتیی شارەوانیی سلێمانی و شوێنی فڕێدانی خاشاکمان کرد کە شوێنێکی زۆر ناتەندروست و ناشارستانییە و هۆکارێکی سەرەکی تێکدانی پێکهاتەی ئاوی چەمی تانجەرۆ و ئاوی بەنداوی دەربەندیخانە.”

ئاماژە بەوە دەکەن: “لە میانی سەردانمان بۆ لای لێپرسراوی پلانی شارەوانیی سلێمانی بۆمان دەرکەوت دوو ھۆکار لەپشت ڕاگرتنی کارەکەوەن:

یەکەم: هۆکاری دەستبەکارنەبوونی کۆمپانیای لاڤارج کە لایەنی جێبەجێکاری پڕۆژەی ناوبراوە، پەسەند نەکردنی ئەو نوسراوانەیە کە تایبەتە بە پێدانی گوژمەی گرێبەستەکە بەبڕی ٧ ملیۆن و ٥٢٠ ھەزار دۆلار بەپێی یاساو ڕێنماییەکان لە لایەن حکومەتی ھەرێمەوە.

دووەم: گەیاندنی کارەبای نیشتیمانی بە سنوری پڕۆژەکە کەلەلایەن کۆمپانیای (ئیکۆسیم) بە شێوەی قەرز جێبەجێ دەکرێت بەبڕی ٨٣٠ ھەزار دۆلار، بەمەرجێک لەکاتی نەمانی قەیرانی دارایی حکومەتی هەرێم، ئەوا دەبێت وەزارەتی دارایی و ئابوری لەسەر گوژمەی پڕۆژەکە بۆیان خەرج بکاتەوە.”

ئەو سێ ئەندامەی ئەنجومەنی پارێزگای سلێمانی ئەوەشیان ڕاگەیاندووە: “ئەو ھۆکارانە بونەتە هۆی دەستبەکارنەبوونی کۆمپانیای جێبەجێکار لە پڕۆژەی چارەسەری خاشاکی سلێمانی، ئێمە داوکارین کە نوسراو ئاڕاستەی وەزارەتی دارایی و ئابوری بکرێت بۆ ڕەزامەندی دەربڕین و چارەسەرکردنی ئەو گرفتانەی کە ئاماژەمان پێدا، لە ئەگەری ڕەزامەندی دەرنەبڕینی وەزارەتی دارایی و ئابوری و دەستبەکارنەبوونی کۆمپانیای ناوبراو لە پڕۆژەی چارەسەری خاشاکی سلێمانی، ئەوا زۆر پێویستە کە ئەنجومەنی پارێزگا بڕیار بدات یاخود داوا بکات لەماوەی مانگێکدا گرێبەستی پڕۆژەکە هەڵوەشێنرێتەوە و دووبارە بەپێی یاساو ڕێنماییەکان پڕۆسەی تەندەرین بۆ پڕۆژەکە بکرێت و گرێبەست لەگەڵ کومپانیایەکی نیشتیمانی بکرێت.”

 

بەردەوام بە لە خوێندنەوە

کوردستان

كۆمەڵە داوا دەكات حكومەتی هەرێم بێدەنگ نەبێت

خەڵك- بەشی هەواڵ

سكرتاریەتی كۆمەڵەی زەحمەتكێشانی كوردستان لە راگەیەندراوێكدا داوا لە حكومەتی هەرێمی كوردستان دەكات كە بێ دەنگ نەبێت لەبەرامبەر تیرۆركردنی چالاكانی رۆژهەڵاتی كوردستان لە هەرێم.

كۆمەڵەی زەحمەتكێشانی كوردستان بەبۆنەی كوژرانی ئیقبال مورادی چالاكی سیاسی رۆژهەڵاتی كوردستان لە پێنجوێن راگەیەندراوێكی بڵاوكردەوە، تێیدا وێڕای سەرەخۆشی لە بنەماڵەی مورادی رایدەگەیەنێت “داوا لە دامودەزگانی حكومەتی هەرێمی كوردستان دەكەین بەرامبەر بە كوشتن‌و رفاندنی هەڵسوڕاوانی سیاسی كوردی رۆژهەڵات بە دەستی تاوانكارانی كۆماری ئیسلامی بێدەنگ نەبن‌”.

راشیگەیاندووە “خوازیاری ئەوەین دامودەزگا ئەمنییەكان لە زووترین كاتدا ئەنجامدەرانی ئەم تاوانە قیزەونە دەستگیر‌و رادەستی یاسای بكەن”.

لە ماوەی رابردوودا چەندین چالاكی سیاسی و بەرپرسی حزبەكانی رۆژهەڵاتی كوردستان لە باشوری كوردستان كوژراون و حزبەكانی رۆژهەڵاتیش كۆماری ئیسلامی ئێران تۆمەتبار دەكەن، بەڵام تاكو ئێستا دەزگا فەڕمییەكانی هەرێمی كوردستان كەسیان بە ئەنجامدانی ئەو تاوانانە تۆمەتبار نەكردووە.

بەردەوام بە لە خوێندنەوە

کوردستان

لە شارباژێڕ و دوكان سێ هاوڵاتی خنكان

یەكێك لە روبارەكانی ناوچەی شارباژێڕِ

خەڵك- بەشی هەواڵ
ئەمڕۆ 20 ی 7 ی 2018 ، لەهەریەكە لە بەشی سەرەوەی دەریاچەی دوكان و لە چەمێكی نزیك گوندی ساڵانان سێ‌ هاوڵاتی لەكاتی مەلەكردندا خنكان.

پۆلیسی سلێمانی لە راگەیەندراوێكدا كە وێنەیەكی بۆ (خەڵك) نێردراوە، رایگەیاند
“پاشنیوەڕۆی ئەمڕۆ لەبەشی سەرەوەی دەریاچەی دوكان و لەكاتی مەلەكرندا دایك و كچێك بەناوەكانی ( ش ، م ، ع لەدایكبووی 1970 و ك ، أ ، س ) لەدایكبووی 1992 ) كە دانیشتوی قەزای دوكانن و بەخێزانی بۆ مەلەكردن ڕویان لەناوچەیەكردبوو، گیانیان لەدەستدا و دوای گەیشتنی هێزەكانی پۆلیس و تیمەفریاگوزارییەكان تەرمەكانیان دەرهێنرانەوەو ڕەوانەی پزیشكی دادوەری لەشاری سلێمانی كران”.

راشیگەیاندووە “هەرئەمڕۆ و لەچەمێكی نزیك گوندی ساڵانانی سەر بە قەزای چوارتا هاوڵاتی ( ش ، م ، س ) لەدایكبوی 1992 لەكاتی مەلەكرندا خنكا، دوای گەیشتنی هێزەكانی پۆلیس و تیمەفریاگوزارییەكان تەرمەكەی دەرهێنرایەوەو ڕەوانەی پزیشكی دادوەری لەشاری سلێمانی كرا”.

رونیشیكردەوە “لەئێستاشدا لەلایەن هەردوو بنكەی پۆلیسی دوكان و بنكەی پۆلیسی چوارتا پەڕاوی لێكۆڵینەوە بۆ هەردوو ڕوداوەكە كراوەتەوە و لێكۆڵینەوەكان دەستیانپێكردووە” .

بەردەوام بە لە خوێندنەوە
ریکلام

کوردستان

دوایین