ئێمە لە تۆرە کۆمەڵایەتیەکان

چاوپێکەوتن

سه‌ڵاح: وه‌ڵامه‌که‌ی ڕامۆس پێکه‌نیناویه‌، که‌واته‌ پێی بڵێ بزانه‌ بۆ مۆندیال ئاماده‌ ده‌بم یان نا؟

خه‌ڵک سپۆرت – مارکا

موحه‌مه‌د سه‌ڵاحی میسڕی ئه‌ستێره‌ی یانه‌ی لیڤه‌رپوڵ چاوپێکه‌وتنێک له‌گه‌ڵ ڕۆژنامه‌ی “مارکا” ئه‌نجام ده‌دات، وه‌ڵامی چه‌ندین بابه‌تی تایبه‌تی و گرنگ ده‌رباره‌ی پێکانه‌که‌ی و یانه‌ی لیڤه‌رپوڵ هه‌ڵبژارده‌ی میسڕ له‌ مۆندیالی ٢٠١٨ی ڕوسیا ده‌داته‌وه‌.

پێکانه‌که‌ت چۆنه‌؟ فریای یه‌که‌م یاریی مۆندیال ده‌که‌ویت؟

ئێستا باشم، هیوادارم فریای یه‌که‌م رووبه‌ڕوبونه‌وه‌ بکه‌وم به‌رامبه‌ر هه‌ڵبژارده‌ی ئورۆگوای، به‌ڵام ئه‌وه‌ش له‌سه‌ر بارودۆخی پێکانه‌که‌ و هه‌ستی من وه‌ستاوه‌ پێش له‌رووبه‌ڕوبونه‌وه‌که‌.

پێکانه‌که‌ی کیێڤ ناخۆشترین ساتی ژیانت بوو؟

به‌ڵێ وابوو.

له‌ مۆندیالی ڕوسیا ده‌تبینین، به‌ڵام کاتی پێکانه‌که‌ له‌وه‌ نه‌ده‌ترسایت مۆندیالیش له‌ده‌ست بده‌یت؟

کاتێک که‌وتم به‌زه‌ویدا ئازاری جه‌سته‌یی و دڵه‌ڕاوکێم به‌یه‌که‌وه‌ توشبوو، توڕه‌ و دوودڵ بووم که‌ نه‌مده‌توانی یاریی کۆتایی خولی یانه‌ پاڵه‌وانه‌کان ته‌واو بکه‌م، له‌هه‌مان کاتدا بیرم له‌ ئه‌گه‌ره‌کانی له‌ده‌ستدانی مۆندیال ده‌کرده‌وه‌، بیرکردنه‌وه‌یه‌کی تێکشکێنه‌ر بوو.

له‌باره‌ی که‌وتنه‌که‌ی تۆ و ڕامۆسه‌وه‌ زۆر وترا، پێتوایه‌ که‌وتنێکی ئاسایی بوبێت؟

نازانم، ڕه‌نگه‌ وابێت…

له‌چه‌ند ڕۆژی ڕابردودا ڕامۆس ڕایگه‌یه‌ند، که‌ تۆ سه‌ره‌تا قۆڵی ئه‌وت ڕاکێشاوه‌ و له‌گه‌ڵ ئه‌وه‌شدا قۆڵه‌که‌ی ترت ئازاری پێگه‌یشتووه‌، ڕات چییه‌؟

ئه‌وه‌ پێکه‌نیناوییه‌…

هه‌روه‌ها باسی له‌وه‌ش کردووه‌ که‌ ئه‌گه‌ر دانت به‌خۆتدا بگرتایه‌ ده‌تتوانی تایمی دووه‌م بگه‌ڕێیته‌وه‌ و به‌شداری بکه‌یت، له‌گه‌ڵ بۆچونه‌کانی ڕامۆس-دایت؟

(به‌پێکه‌نینه‌وه‌) وه‌ڵامی من ئه‌وه‌یه‌: ئاساییه‌ که‌سێک له‌سه‌ره‌تاوه‌ بتخاته‌ گریان و دواتر بتهێنێته‌‌ پێکه‌ین، ڕه‌نگه‌ بتوانیت پرسیاری ئه‌وه‌شی لێبکه‌یت که‌ ئایا من پێش مۆندیال ئاماده‌ ده‌بم یان نا؟

ڕامۆس هیچ نامایه‌کی بۆ ناردیت؟

نامه‌یه‌کی بۆ ناردم، به‌ڵام من هه‌رگیز پێم نه‌وت شته‌که‌ ئاساییه‌ و “ئۆکه‌ی” (واتا لێی خۆش نه‌بووه‌)

با باسی مۆندیال بکه‌ینه‌وه‌، چۆن گرنگی سه‌رکه‌وتنی هه‌ڵبژارده‌ی میسڕ به‌ره‌و مۆندیال بۆ ئه‌وروپیه‌کان ڕوون ده‌که‌یته‌وه‌؟

دوای ٢٨ ساڵ توانیمان خۆمان بگه‌یه‌نینه‌ مۆندیال، ئه‌وه‌ش شتێکی ئاسایی نییه‌، چونکه‌ ئێمه‌ حه‌وتجار نازناوی پاڵه‌وانیتی نه‌ته‌وه‌کانی ئه‌فریقامان به‌ده‌ست هێناوه‌، پاڵه‌وانی ساڵانی ٢٠٠٦ و ٢٠٠٨ و ٢٠١٠ بووین و شتێکی ئاسایی نییه‌ نه‌گه‌یته‌ مۆندیال! بۆیه‌ ئه‌مجاره‌ هه‌موو ده‌مانوت “پێویسته‌ بگه‌ینه‌ مۆندیال، پێویسته‌ ئه‌وکاره‌ بکه‌ین”، هێنده‌ی نه‌خایاند توانیمان خه‌ونه‌که‌مان بهێنینه‌ دی، ئه‌وه‌ش خه‌ونی گه‌وره‌ی گه‌لی میسڕه‌ وه‌ک چۆن مۆندیالی ٢٠١٠ خه‌ونی هه‌موو ئیسپانیه‌کان بوو.

ئامانجی میسڕ له‌ مۆندیالدا چییه‌؟

پێموایه‌ خاوه‌نی پێکهاته‌یه‌کی مه‌زن و ڕاهێنه‌رێکی مه‌زنین، هاتوین تا به‌ره‌و قۆناغه‌ پێشکه‌وتووه‌کان سه‌ربکه‌وین، ده‌مانه‌وێت کارێکی باش بکه‌ین له‌ مۆندیالی ٢٠١٨ی ڕوسیا.

ئامانجی تایبه‌تی خۆت چییه‌؟

ته‌نها یارمه‌تیدانی هه‌ڵبژارده‌ی وڵاته‌که‌مه‌ بۆ گه‌یشتن به‌قۆناغه‌ پێشکه‌وتووه‌کان و تۆمارکردنی گۆڵ، به‌ڵام به‌شێوه‌یه‌کی گشتی یاریده‌ی پێکهاته‌که‌ ده‌ده‌م ئاستێکی باشتر پێشکه‌ش بکات.

ڕاسته‌ ده‌ڵێن هیکتۆر کوپه‌ری ڕاهێنه‌ری میسڕ که‌سێکی تونده‌؟

(به‌پێکه‌ینه‌وه‌) خاوه‌نی ئه‌زمونێکی زۆره‌ و ڕاهێنه‌رێکی باشه‌، یاریده‌مان ده‌دات تواناکانمان به‌ره‌وپێش ببه‌ین و ئاستمان به‌رزتر بکه‌ینه‌وه‌، ئه‌و که‌سێکی توندوتیژ نییه‌، به‌ڵکو پێموابێت ڕاهێنه‌رێکی باش و پیاوێکی باشه‌‌، ئێمه‌ هه‌موو یاریده‌ی یه‌کتر ده‌ده‌ین.

له‌ چ بوارێکی تۆپی پێدا کوپه‌ر یارمه‌تی داویت؟

له‌ڕووی تاکتیکیه‌وه‌ یاریده‌ده‌رم بووه‌ باشتر به‌رگری بکه‌م، به‌ڵام هه‌میشه‌ ڕێگه‌یه‌کی گونجاوم بۆ ده‌دۆزێته‌وه‌ تا باشتر بتوانم هێرش بکه‌مه‌ سه‌ر ڕکابه‌ران، پێموابێت سودێکی گه‌وره‌م لێوه‌رگرتووه‌.

ئایا هیچ فشارێکت له‌سه‌ر ماوه‌ بۆ ئه‌وه‌ی له‌مۆندیالی ٢٠١٨ ئاستێکی به‌رز پێشکه‌ش بکه‌یت؟

فشاره‌کان بۆ ئه‌وه‌بوو پاڵاوتنه‌کان تێپه‌ڕێنین و بگه‌ینه‌ مۆندیال، بێگومان که‌سانێک هه‌ن ده‌ڵێن (ئۆکه‌ی) گه‌یشتینه‌ مۆندیال و هه‌موو شتێک کۆتایی هات، به‌ڵام به‌نسبه‌ت منه‌وه‌ هه‌رگیز به‌وشێوه‌یه‌ نییه‌ و به‌پێویستی ده‌زانم مێژوو تۆمار بکه‌ین، ده‌بێت شتێکی جیاواز بکه‌ین، له‌مێشکی مندا فشاره‌کان بۆ ئه‌وه‌ن که‌ شتێکی باشتر و جیاوازتر ئه‌نجام بده‌ین، نه‌ک به‌ته‌نها بگه‌ینه‌ ڕوسیا و سێ یارییه‌که‌ بکه‌ین و خودا حافیزی بکه‌ین، ئه‌وه‌ به‌ مێشکی مندا ناچێت.

ده‌زانیت ئه‌گه‌ر قۆناغی کۆمه‌ڵه‌کان ببڕن له‌قۆناغه‌ پێشکه‌وتووه‌کان ڕووبه‌ڕوی ئیسپانیا ده‌بنه‌وه‌ (کۆمه‌ڵه‌کانیان به‌رامبه‌ره‌)؟

ڕه‌نگه‌ وابێت، ئیسپانیا یان پورتوگال. هیوادارم بگه‌ینه‌ ئه‌و قۆناغه‌، بێگومان ئه‌و دوو هه‌ڵبژارده‌یه‌ زۆر به‌هێزن و یارییکردن به‌رامبه‌ریان زۆر قورسه‌، به‌ڵام هه‌رگیز نازانیت له‌نێو یاریگای تۆپی پێدا چی ڕووده‌دات.

چ شتێکی هه‌ڵبژارده‌ی ئیسپانیات به‌لاوه‌ په‌سه‌نده‌؟ یاریزانێک هه‌یه‌ به‌تایبه‌ت سه‌رسامی بیت؟

له ‌چێڵسی له‌گه‌ڵ دیێگۆ کۆستا و ئازپیلیکوێتا یارییم کردووه‌، له‌گه‌ڵ ئالبێرتۆ مۆرینۆ له‌ لیڤه‌رپوڵ، ئیسپانیا خاوه‌نی چه‌ندین یاریزانی پله‌ باڵایه‌ و ناتوانم ته‌نها ناوی یاریزانێک دیاری بکه‌م، به‌ڵام زۆر حه‌زم به‌تواناکانی کۆستایه‌، کاتێک به‌یه‌که‌وه‌ یارییمان ده‌کرد زۆر نایاب بوو، ئه‌و پیاوه‌ له‌ لوتکه‌ی لوتکه‌ی لوتکه‌دایه‌، وه‌ک یاریزانیش زۆر باشه‌.

یه‌که‌م یادگاری له‌گه‌ڵ مۆندیال چی بوو؟

به‌بیرم دێت له‌ماڵه‌وه‌ له‌گونده‌که‌ی خۆمان فاینه‌ڵی مۆندیالی ٢٠٠٢م ته‌ماشا کرد، ناتوانم له‌وه‌ زیاتر بڵێم، به‌ڵام یارییه‌که‌م ته‌ماشا کرد به‌رازیل ٢ -١، نه‌خێر ٢ – ٠ بردنه‌وه‌ی به‌ده‌ست هێنا و هه‌ردوو گۆڵه‌که‌ش له‌لایه‌ن ڕۆناڵدۆوه‌ تۆمارکران.

چاوپێکەوتن

سه‌ڵاح: ئه‌رجه‌نتینم زۆر خۆشده‌وێت و باجی ناوداربوون نه‌هاتنه‌ ده‌ره‌وه‌مه‌ له‌ماڵه‌وه‌ !

خه‌ڵک سپۆرت – گۆڤاری کلارین

موحه‌مه‌د سه‌ڵاحی میسڕی ئه‌ستێره‌ی یانه‌ی لیڤه‌رپوڵ چاوپێکه‌وتنێک له‌گه‌ڵ گۆڤاری “کلارین”ی ئه‌رجه‌نتینی ئه‌نجام ده‌دات، تیایدا ده‌رباره‌ی چه‌ندین بابه‌تی په‌یوه‌ندیدار به‌ژیانی و یانه‌ی لیڤه‌رپوڵ و هه‌ڵبژارده‌ی میسڕ ده‌دوێت.

ئه‌مه‌ش کورته‌یه‌که‌ له‌چاوپێکه‌وتنه‌که‌:

کامیان به‌لای تۆوه‌ باشه‌، بردنه‌وه‌ (١ – ٠) به‌ ئاستێکی خراپ، یاخود یه‌کسانبون (٣ – ٣) به‌ئاستێکی باش؟

ئه‌وه‌ به‌پێی بارودۆخ و ئه‌و پاڵه‌وانێتیه‌ی یاریی تێدا ده‌که‌یت ده‌گۆڕێت، هه‌ندێجار ته‌نها چانسێکت له‌به‌رده‌مدایه‌ و پێویستت به‌ بردنه‌وه‌یه‌ ، هه‌ندێجاریش شێواز و ئاست هاوشێوه‌ی ئه‌نجام گرنگی ده‌بێت، له‌به‌رئه‌وه‌ بڕیار ناده‌م.

وه‌ک به‌رگریکارێک ده‌ستت پێکرد و ئێستا له‌باشترین هێرشبه‌رانی جیهانیت، کلۆپ ده‌ڵێت ئه‌وه‌ باشترین ئاستی سه‌لاح نییه‌ پێشکه‌شی ده‌کات، خۆت بۆچونت چۆنه‌؟

کۆتا جار له‌ته‌مه‌نی ١٨ ساڵیدا و له‌گه‌ڵ یانه‌که‌م له‌میسر وه‌ک به‌رگریکار یارییم کرد که‌ به‌رواره‌که‌ی زۆر دووره‌، به‌ڵام هێشتا چه‌ند ورده‌کاریه‌ک ماوه‌ پێویسته‌ کاری له‌سه‌ر بکه‌م، زۆریش هه‌وڵ ده‌ده‌م.

وه‌ک مێسی پێتخۆشه‌ له‌باڵی ڕاسته‌وه‌ یاریی بکه‌یت، که‌چی خۆت به‌پێی چه‌پ یاریی ده‌که‌یت؟

هه‌ندێجار له‌باڵی ڕاسته‌وه‌ یاریی ده‌که‌م، هه‌ندێجاریش ده‌چمه‌ قوڵایی یاریگا ئه‌وه‌ش له‌سه‌ر بینین و خویندنه‌وه‌ی بارودۆخه‌که‌ و یاریزان وه‌ستاوه‌ له‌نێو یاریگادا.

هه‌ست به‌ شانازی ده‌که‌یت که‌ له‌گه‌ڵ مێسی و ڕۆناڵدۆ وه‌ک باشترینه‌کانی ئه‌وروپا ده‌ستنیشان کرایت؟ له‌کاتێکدا تۆ له‌وان منداڵتریت…

ڕۆناڵدۆ و مێسی ئه‌ستێره‌ی ناوازه‌ن، زۆر خۆشحاڵم به‌ ڕکابه‌ریکردنیان، بێگومان هه‌موو وه‌رزێک حه‌ز ده‌که‌م له‌ لیستی کۆتاییدا بم و ململانێی یاریزانه‌ گه‌وره‌کان بکه‌م.

به‌هۆی به‌ریه‌ککه‌وتنه‌که‌ت له‌گه‌ڵ ڕامۆس له‌مۆندیال نه‌تتوانی به‌پێی پێویست ده‌ربکه‌ویت، ئایا ئه‌وه‌ به‌ئازار بوو بۆت؟

له‌ دوو یارییدا توانیم به‌شداری بکه‌م و دووه‌م یاریی زۆر به‌ئازار بوو، چه‌ندین وه‌همی که‌ڵه‌که‌بو له‌مێشکمدا گوزه‌ری ده‌کرد، له‌کۆتاییدا من له‌وباره‌یه‌وه‌ زۆر قسه‌ ناکه‌م.

شێوازی یارییکردنت له‌ یاریزانه‌ لاتینیه‌کان ده‌چێت، ئایا هیچ یاریزانێکی ئه‌مریکای باشور سه‌رنجی ڕاکێشاویت؟

به‌ڵێ، شێوازی یارییکردنم له‌ ئه‌مریکیه‌ لاتینیه‌کان ده‌چێت، مارادۆنا و مێسی و باتستۆتام خۆشده‌وێت، مارادۆنام نه‌بینیوه‌ و منداڵبووم که‌ ئه‌و یارییکردووه‌، به‌ڵام توانیومه‌ باتیستۆتا ببینم وه‌ک من بۆ ڕۆما یاریی کرد، ئه‌و سیانه‌یه‌ی ناوم بردن شتێکیان پێشکه‌شی تۆپی پێ کرد، له‌ دوبه‌ی چاوم به‌ مارادۆنا که‌وت و به‌یه‌که‌وه‌ گفتوگۆمان کرد.

ئه‌رجه‌نتین به‌نسبه‌ت تۆوه‌ چی ده‌گه‌یه‌نێت؟

هه‌ر له‌منداڵیه‌وه‌ ئه‌م وڵاته‌م خۆشده‌وێت، خۆشحاڵم له‌گه‌ڵ میدیایه‌کی ئه‌رجه‌نتینی چاوپێکه‌وتن ئه‌نجام ده‌ده‌م، به‌گشتی ئه‌مریکای لاتینم خۆشده‌وێت به‌تایبه‌ت ئه‌رجه‌نتین، هه‌روه‌ها چه‌ندین یاریی هه‌ڵبژارده‌ی ئه‌رجه‌نتینم ته‌ماشا کردووه‌.

به‌ده‌ر له‌وه‌ی یاریزانێکی ناوداریت، له‌کاتی‌ پشووه‌کاندا تاموچێژ له‌ تۆپی پێ وه‌رده‌گریت؟

ئه‌گه‌ر کاتم هه‌بێت ته‌ماشای یاریی تۆپی پێ ده‌که‌م، یاریی پله‌ی سته‌یشن ده‌که‌م، له‌گه‌ڵ خێزانه‌که‌م حه‌زم به‌ نان خواردن و کۆبونه‌وه‌یه‌، حه‌زیش ده‌که‌م هه‌ندێجار به‌ته‌نها بحه‌وێمه‌وه‌ و له‌ ماڵه‌که‌ی خۆمدا ژیان ده‌گوزه‌رێنم.

چۆن مامه‌ڵه‌ له‌گه‌ڵ ناو وناوبانگتدا ده‌که‌یت؟

هه‌ر جێگه‌یه‌ک که‌ ده‌ڕۆم هه‌ست به‌خۆشه‌ویستی خه‌ڵکی لیڤه‌رپوڵ ده‌که‌م، به‌هه‌مان شێوه‌ له‌وڵاته‌که‌ی خۆم، باجی به‌ناوبانگ بوون ئه‌وه‌یه‌ که‌ زۆر ناچمه‌ ده‌ره‌وه‌.

دوو گۆڵی خۆتمان پێبڵێ که‌ هه‌رگیز له‌بیری ناکه‌یت؟

گۆڵه‌که‌م به‌رامبه‌ر مانچسته‌ر سیتی له‌قۆناغی چاره‌کی کۆتایی خولی یانه‌ پاڵه‌وانه‌کان، دووه‌م گۆڵیش به‌رامبه‌ر ڕۆما.

له‌دوای تۆپی پێ چۆن خۆت ده‌بینیته‌وه‌؟

خۆم وه‌ک ڕاهێنه‌رێک ده‌بینمه‌وه‌.

ده‌ته‌وێت خه‌ڵک چۆن باست بکه‌ن؟

وه‌ک که‌سێکی باش یاریزانێکی باش، به‌ڵام نازانم من تا چ ڕاده‌یه‌ک باشم (به‌پێکه‌نینه‌وه‌)، با خه‌ڵک خۆیان بڕیار بده‌ن چۆن باسم ده‌که‌ن.

له‌م وه‌رزه‌دا لیڤه‌رپوڵ چۆن ده‌بینیت؟

هیوادارم ئاستێکی نایاب پێشکه‌ش بکه‌ین، خاوه‌نی چه‌ندین یاریزانی به‌تواناین له‌به‌رئه‌وه‌یه‌ ده‌مانه‌وێت بگه‌ینه‌ قۆناغێکی به‌رزتر.

هانده‌رانی لیڤه‌رپوڵ زۆر ناوازه‌ن و هه‌میشه‌ ده‌ڵێن: به‌ته‌نها به‌ڕێناکه‌یت…

بێگومان، له‌ لیڤه‌رپوڵ هه‌رگیز به‌ته‌نها به‌ڕێناکه‌یت، ئه‌وه‌ دووه‌م ساڵمه‌ لێره‌ زۆر هه‌ست به‌خۆشحاڵی ده‌که‌م.

له‌کۆتاییدا، ئه‌گه‌ر یاریزانی تۆپی پێ نه‌بویتایه‌ چی ده‌بویت؟

له‌ته‌مه‌نی ١٤ ساڵیدا چوار کاتژمێر و نیو گه‌شتم ده‌کرد و چوار کاتژمێر و نیو گه‌شتی گه‌ڕانه‌وه‌ ته‌نها بۆ ئه‌وه‌ی یارییه‌کی تۆپی پێ ئه‌نجام بده‌م، هه‌میشه‌ له‌مێشکمدا بووه‌ ببمه‌ یاریزانی تۆپی پێ، ئه‌گه‌ر تۆپی پێ نه‌بوایه‌ ژیانم زۆر قورس ده‌بوو و نه‌مده‌زانی چی بکه‌م، به‌ڕاستی نازانم، من له‌ته‌مه‌نی هه‌شت ساڵیه‌وه‌ هه‌موو کارێکم تۆپی پێ بووه‌.

بەردەوام بە لە خوێندنەوە

چاوپێکەوتن

ڕزگار ڕه‌ئوف: یه‌که‌م کوردم ده‌بمه‌ ڕاهێنه‌ری دوو هه‌ڵبژارده‌ی عیراق و ژیما ده‌گه‌یه‌نینه‌ ئاسیا

خه‌ڵک سپۆرت – تایبه‌ت

ڕزگار ڕه‌ئوف، مامۆستای پێشوی زانکۆی و ڕاهێنه‌ری نێوده‌وڵه‌تی بواری باسکه‌ چاوپێکه‌وتنێکی تایبه‌ت له‌گه‌ڵ “تۆڕی میدیایی خه‌ڵک – خه‌ڵک سپۆرت” ئه‌نجام ده‌دات، له‌وه‌ڵامه‌کانیدا ئاما‌ژه‌ به‌ چه‌ندین بابه‌تی په‌یوه‌ندیدار به‌ ڕێکخراوی ژیما و تایبه‌ت به‌ژیانی خۆی ده‌کات، له‌نمونه‌ی ئه‌و به‌ڵێنانه‌ی یه‌کێتی تۆپی پێی عیراق به‌ کچانی باسکه‌ی ژیما و سلێمانی-یان داوه‌.

له‌م چاوپێکه‌وتنه‌دا گوزه‌رێک به‌نێو کاره‌کانی ئه‌م ڕاهێنه‌ره‌ خۆبه‌خشه‌دا ده‌که‌ین، که‌ ئه‌زمونی خۆی له‌ کوردستان و ئه‌مریکا کۆکردۆته‌وه‌ له‌ ڕێکخراوێکی تایبه‌ت به‌ خانمان به‌کاریخستووه‌، ئه‌م کاره‌ش بۆته‌ جێی تێڕامانی که‌سانی بیانی و له‌ناوخۆی کوردستانیش جێده‌ستیان به‌ڕونی دیاره‌، به‌شێوه‌یه‌ک که‌ چاوه‌ڕوان ده‌کرێت داهاتوی باسکه‌ی کچانی عیراق بکه‌وێته‌ نێو مشتی ڕاهێنه‌ری ناوبراو و هاوکارانیه‌وه‌.

سڵاو مامۆستا، ده‌توانیت پێمان بڵێیت ڕزگار ڕه‌ئوف کێیه‌؟

ڕزگار موحه‌مه‌د ڕه‌ئوف کوڕی مه‌لا ڕه‌ئوفی ده‌روێش تۆفیقی هه‌ڵه‌بجه‌ییم، له‌ساڵه‌کانی شه‌سته‌وه‌ دانیشتوی شاری سلێمانین، باوکم شه‌هیدی یه‌کێتیه‌ و باپیرم عومه‌ری حاجی سه‌عید شه‌هیدی حامیه‌یه‌، شه‌هیدی زینده‌به‌چاڵی حامیه‌یه‌، له‌ خانه‌واده‌یه‌کی هه‌ژاره‌وه‌ په‌روه‌رده‌ بووم، له‌ زانکۆی سه‌ڵاحه‌دین کۆلێجی په‌روه‌رده‌ی وه‌رزشیم ته‌واو کردووه‌، ماسته‌رم هێناوه‌ له‌زانکۆی سلێمانی، ئێستاش خوێندکاری دکتۆرام له‌کۆتایی تێزی دکتۆراکه‌مدام و خۆم بۆ گفتوگۆی کۆتایی‌ ئاماده‌ ده‌که‌م، خاوه‌نی خێزانێکی خنجیلانه‌م و دوو منداڵم هه‌یه‌ به‌ناوی هه‌رمێ و هه‌ستی و خاوه‌نی ڕێکخراوی ژیمام.

له‌بواری باسکه‌دا وه‌ک یاریزان و ڕاهێنه‌ر که‌سێکی ناسراویت، ده‌توانیت به‌ خوێنه‌رانی (خه‌ڵک سپۆرت) بڵێیت چیت کردووه‌‌؟

له‌بواری وه‌رزشدا ڕه‌نگه‌ زیاده‌ڕه‌وی نه‌بێت ئه‌گه‌ر بڵێم هه‌موو شتێکم کردووه‌ و هیچ نه‌ماوه‌ بیکه‌م، ته‌نها ئه‌وه‌ی ماوه‌ به‌ده‌ستهێنانی نازناوێکه‌ له‌سه‌ر ئاستی نێوده‌وڵه‌تی‌، کتێنێکم به‌زمانی ئینگلیزی له‌ ئه‌مریکا نزیکی بڵاوکردنه‌وه‌یه‌، پێشتر فیلمێکی دوکۆمێنتاری له‌سه‌ر یه‌کێک له‌ فێرخوازه‌کانم له‌ ئه‌مریکا بڵاوکرایه‌وه و له‌لایه‌ن تۆڕی “ئی ئێس پی ئێن”وه‌ جارێک چاوپێکه‌وتنم له‌گه‌ڵدا ئه‌نجامدراوه‌‌ به‌وپێیه‌ی تێزی دکتۆراکه‌م له‌ ئه‌مریکا بوو، له‌هه‌شت وانه‌ی جیاوازدا له‌زانکۆی تینێسی که‌ یه‌کیکه‌ له‌ باشترین زانکۆکانی ئه‌مریکا وانه‌م وتۆته‌وه‌.

ئێستا له‌بواری ڕاهێناندا کارت چییه‌؟

ڕاهێنه‌ری نێوده‌وڵه‌تیم، ڕاهێنه‌ری هه‌ڵبژارده‌ی عیراقی ٣ * ٣ و ڕاهێنه‌ری هه‌ڵبژارده‌ی عیراقی یه‌که‌می کچانم، خاوه‌نی ڕێکخراوی ژیمام که‌ وه‌ک چرا له‌شاری سلێمانی ڕۆشنایی داوه‌ به‌بواری وه‌رزش، پاسێکمان هه‌یه‌ و فه‌ندێکی مانگانه‌ی ئاساییمان وه‌رگرتووه‌.

بڕوانامه‌ی چیت هه‌یه‌؟ له‌کوێ هێناوته‌ و چ پسپۆریه‌کت هه‌یه‌؟

وه‌ک وتم بڕوانامه‌که‌م بریتیه‌ له‌ دکتۆرا و به‌شێکی تاقیکارییه‌کانم له‌ سلێمانی و به‌شێکی له‌ ئه‌مریکا بووه‌، زانکۆی تینیسی ئه‌مریکی متمانه‌یان پێکردم تا له‌و وڵاته‌ هه‌شت وانه‌ی جیاواز بڵێمه‌وه‌ له‌پۆله‌کانی ئه‌و زانکۆیه‌، به‌تایبه‌ت یه‌کێک له‌ پۆله‌کانم که‌ ته‌واوی خوێندکاری دکتۆرا و ماسته‌ر بوون.

بیرۆکه‌ی ژیما هی کێیه‌؟ چۆن دامه‌زرێنرا؟

بیرۆکه‌ی ژیما بیرۆکه‌ی به‌نده‌ بوو، پاش ئه‌وه‌ی له‌ یه‌کێک له‌ یانه‌کانی سلێمانی موچه‌یه‌کی زۆرمان زه‌وت کرا و ناهه‌قییه‌کی زۆرمان به‌رامبه‌ر کرا، خۆم و ٤٥ کچه‌ یاریزان به‌ پاڵ کراینه‌ ده‌ره‌وه‌، خه‌ڵکی شاری سلێمانی ئاگاداری ئه‌و بابه‌ته‌ن‌، دوای ئه‌وه‌ی ڕوویدا بیرۆکه‌ی ژیما هاته‌ ئاراوه‌.

بۆچی ناوی ژیما-تان هه‌ڵبژارد، ژیما واتای چییه‌؟

ژیما واتا ڕێگه‌ی ژیان، ناوێکی زۆر جوانی مێینه‌یه‌ و له‌ڕێکخراوێکدا بۆ کچانی کوردستان خۆی ده‌بینێته‌وه‌، ئه‌م ڕێکخراوه‌ په‌ره‌ ده‌دات به‌ کچانی شاره‌که‌م و کوردستان به‌گشتی بۆ ئه‌وه‌ی ببنه‌ کادر و کاریزما بۆ داهاتو، کار بۆ ئه‌وه‌ ده‌که‌ین جێگه‌ی کچان بکه‌ینه‌وه‌ له‌بواری باسکه‌دا‌، به‌شێوه‌یه‌کی ئه‌کادیمی له‌پاڵ یاریی کردندا کۆمه‌ڵێک کارامه‌یی ژیانیان فێرده‌که‌ین تا له‌داهاتودا جگه‌ له‌ یاریزان ببن به‌ دایکێکی سه‌رکه‌وتو، له‌ساڵی ٢٠١٦ پاش ئه‌وه‌ی له‌ ئه‌مریکا گه‌ڕامه‌وه‌ توشی نا ئومێدیه‌کی زۆریان کردم و دژایه‌تی توندیان کردم، دواتر هاتین و به‌ هاوکاری حکومه‌ت ئه‌م هه‌نگاوه‌مان نا.

له‌ ئه‌مریکا ژیاویت، چ کاریگه‌ریه‌کی له‌سه‌ر ژیانت هه‌بووه‌ وه‌ک ڕاهێنه‌ر و خوێندکار و ڕاهێنه‌ر؟

له‌ته‌مه‌ندا سێ جار گه‌شتم بۆ ئه‌مریکا کردووه‌ له‌ساڵانی ٢٠٠٩، ٢٠١١، ٢٠١٦، گه‌شته‌کانم نه‌ک به‌ته‌نها کاریگه‌ری له‌سه‌ر ژیانم هه‌بوو، به‌ڵکو هه‌موو ژیانی گۆڕیم، منی له‌که‌سێکی خۆپه‌رسته‌وه‌ کرده‌ خۆبه‌خش، منی له‌ که‌سێکی تاڕاده‌یه‌ک خۆبه‌زلزانه‌وه‌ کرده‌ که‌سێکی ساده‌ و ساکار، گه‌یاندمیه‌ ئاستێک که‌ تێگه‌یشتم ژیان ئه‌وه‌نییه‌ ئێمه‌ لێی تێگه‌یشتوین، بگره‌ زۆر جیاوازتره‌ له‌وه‌ی ڕۆژانه‌ تیایدا ده‌ژین، بۆیه‌ ده‌توانم ئه‌مریکا ناوبنێم باوکی دووه‌مم.

چه‌ند فێرخوازتان هه‌یه‌؟ ده‌توانیت ناوی ڕاهێنه‌ره‌ هاوکاره‌کانت بڵێیت و بڕوانامه‌یان چییه‌؟

ئێمه‌ نزیکه‌ی ١٥٠ کچه‌ یاریزانمان هه‌یه‌، کچی تێدایه‌ چوار ساڵه‌ و تیایاندایه‌ ٢٥ بۆ ٢٦ ساڵه‌، ئه‌م کچانه‌ به‌درێژایی ڕۆژه‌کانی هه‌فته‌ له‌ ژیما مه‌شق و ڕاهێنان ده‌که‌ن، هاوکاره‌کانم کۆمه‌ڵێک خوێندکاری خۆم و هاوڕێی دێرین و دۆستی نزیکن، له‌نمونه‌ی مامۆستا چنار فه‌تاح که‌ خوێندکاری خۆم بووه‌ له‌ کۆلێجی په‌روه‌رده‌ی وه‌رزش، مامۆستا سۆران عوسمان که‌ مامۆستا بوو له‌ قوتابخانه‌ی ئاینده‌ و مامۆستای وه‌رزشییه‌، هه‌روه‌ها کاک سانا له‌گه‌ڵماندا کارده‌کات که‌سێکی خۆبه‌خش و دڵسۆزه‌ بۆ ژیما، مامۆستا کارزان له‌گه‌ڵماندایه‌ و‌ بڕوانامه‌ی نێوده‌وڵه‌تی هه‌یه‌ له‌ بواری داوه‌ری تۆمار و کاتدا و ناوبژیوانی پله‌ یه‌کی یاریی باسکه‌یه‌، جگه‌ له‌وانه‌ی ناوم هێنان مامۆستا هێرش و مامۆستا هه‌رێم له‌گه‌ڵماندان له‌گه‌ڵ کۆمه‌ڵێک خانمی تر که‌ سه‌رجه‌میان خۆبه‌خش له‌گه‌ڵماندا کارده‌که‌ن، به‌ڵام ئێستا ناوه‌کانیان له‌ هزرمدا نییه‌.

فێرگه‌یه‌ک به‌و گه‌وره‌ییه‌ پێویستی به‌ پێداویستییه‌، ئایا یاریگای تایبه‌ت به‌خۆتان هه‌یه‌؟

نه‌خێر، به‌داخه‌وه‌ یاریگای تایبه‌ت به‌خۆمان نییه،‌ له‌به‌رئه‌وه‌ی پێشتر له‌ سلێمانی گرنگی ئه‌وتۆ به‌ باسکه‌ی کچان نه‌دراوه‌، له‌ئێستادا توانیومانه‌ ئه‌و مۆدێله‌ بگۆڕین و وا بکه‌ین خه‌ڵکانێکی زیاتر گرنگی به‌ باسکه‌ی کچان بده‌ن.

که‌واته‌ له‌کوێ مه‌شق و ڕاهێنان ده‌که‌ن؟

به‌ سوپاسه‌وه‌، یانه‌ی ڕۆژ و کاک شێخ نوری و کاک شێخ محمد و هه‌موو کارگێڕی یانه‌ی ڕۆژ هاوکارمان بوون، نه‌ک به‌ته‌نها ده‌رگای یانه‌که‌یان بۆ کردوینه‌ته‌وه‌، به‌ڵکو هۆڵه‌که‌شیان خستۆته‌ خزمه‌تمانه‌وه‌ بۆئه‌وه‌ی مه‌شقی تێدا بکه‌ین، به‌یه‌که‌وه‌ به‌شێوه‌یه‌کی ناوازه‌ خۆمان گونجاندووه‌، ئێمه‌ له‌به‌رامبه‌ر چاکه‌ی ئه‌واندا هه‌رچی که‌موکوڕی یاریگاکه‌ بێت چاره‌سه‌ری ده‌که‌ین و به‌رده‌وام خاوێنی ده‌که‌ینه‌وه‌، توانیومانه‌ به‌یه‌که‌وه‌ ڕوویه‌کی کۆمه‌ڵایه‌تی به‌ یاریگاکه‌ بده‌ین  و وه‌ک خوشک و برا هه‌مووان تیایدا کار ده‌که‌ین، خه‌ڵکانی ته‌ندروست و که‌م ئه‌نداممان به‌یه‌که‌وه‌ له‌یه‌ک یاریگادا کۆکردۆته‌وه‌.

که‌سی حیزبی و حکومی پاڵپشتی کردون؟

نه‌خێر، له‌سه‌ره‌تای دامه‌زراندنی ژیما کاک فاروقی مه‌لا مسته‌فا بڕێک پاره‌ی پێداین، هه‌روه‌ها دوو هاوڕێی خۆم یاریده‌یان داین، له‌دوای ئه‌وه‌ش دکتۆر هه‌ڤاڵ ئه‌بوبه‌کر پارێزگاری سلێمانی بڕی ده‌ هه‌زار دۆلاری پێبه‌خشین و توانیمان له‌گه‌ڵ هاوکاریه‌کانی که‌سانی تردا پاسێکی بۆ یاریزانان بکڕین، ئه‌وه‌ی له‌ڕاستیدا یاریده‌ی داوین که‌سانی حیزبی و حکومی نه‌بوون و ته‌نها که‌سانی هاوڕێ و دۆستی که‌سیی خۆمان بون، بۆنمونه‌ دکتۆر هه‌ڤاڵ ئه‌بوبه‌کر له‌خۆشه‌ویستی خۆی بۆ من وه‌ک هاوڕێ که‌ له‌سه‌ر ئاستی خێزان ناسیاویمان هه‌یه‌ ئه‌م کاره‌ی بۆکردوین.

دکتۆر هه‌ڤاڵ چۆن بیر له‌ ژیما ده‌کاته‌وه‌؟

ئه‌و پێی وایه‌ ژیما پێداویستیه‌کی گه‌وره‌ی کۆمه‌ڵگای ئێستای کو‌رده‌وارییه،‌ به‌وپێیه‌ی ئێمه‌ هه‌موو هه‌وڵێکمان ئه‌وه‌یه‌ له‌پاڵ وه‌رزشدا کچه‌کانمان بکه‌ینه‌ دایکێکی باش،‌ ئه‌وه‌ش هه‌ندێجار له‌ چاره‌سه‌رکردنی نه‌خۆش باشتره‌، دکتۆر هه‌ڤاڵ پێی گرنگه‌ یاریده‌ی ڕێکخراوێکی وه‌ک ژیمان بکرێت که‌ پێویستیان به‌ هاوکاری زیاتره‌ له‌یانه‌کان، یانه‌کان پێشتر فه‌ندی باشتریان به‌ده‌ستهێناوه‌ و کاری ئه‌وتۆشیان پێنه‌کردووه‌، جگه‌ له‌وه‌ خه‌ڵکانێکی تریش هاوکاریان کردوین وه‌ک دایکان و باوکان که‌ زۆر په‌رۆشن بۆ ئه‌م پرۆگرامه‌،‌ ده‌بینن دوای په‌یوه‌ندیکردنی کچه‌کانیان به‌ ژیماوه‌ گۆڕانکاری له‌ڕووی سایکۆلۆجی و جه‌سته‌یی و کۆمه‌ڵایه‌تیان به‌سه‌ردا دێت، ئه‌م کچانه‌ زۆر ڕێکخراو ده‌بن و که‌سایه‌تیان به‌هێز ده‌بێت، جیاوازییه‌که‌ به‌ڕونی دیاره‌ پێیانه‌وه‌، تائێستا پێویستمان به‌وان نه‌بووه‌، به‌ڵام له‌داهاتودا بۆ ئه‌وه‌ی ببینه‌ خاوه‌نی یاریگایه‌که‌ی تایبه‌ت ڕه‌نگه‌ کارمان پێیان بێت و سودیان لێوه‌ربگرین.

پلانی داهاتوتان چییه‌؟

پلانی داهاتومان ئه‌وه‌یه‌ له‌گه‌ڵ هه‌ڵبژارده‌ی عیراق بچینه‌ پاڵه‌وانێتیه‌کانی ئاسیاوه‌، به‌پشتیوانی خودا ئه‌گه‌ر بکرێت ساڵی ٢٠١٩ ساڵی ترۆپکی تواناکانی ژیما ده‌بێت، چونکه‌ یه‌کێتی تۆپی باسکه‌ی عیراق ده‌یه‌وێت ژیما بنێرێته‌ پاڵه‌وانێتی ئاسیا بۆ ته‌مه‌نی خوار ١٦ ساڵ، مه‌به‌ست له‌م هه‌نگاوه‌ش پێکهێنانی پێکهاته‌یه‌کی نمونه‌یی ئه‌زمونداری بۆ عیراق به‌گشتی.

مه‌به‌ست له‌ دامه‌زراندنی ژیما چییه‌؟ ئایا پڕۆسه‌یه‌کی هاوشێوه‌ی به‌ره‌وپێشجونی باسکه‌ی لوبنانه‌؟

مه‌به‌ست له‌ دامه‌زرادنی ژیما جگه‌ له‌وه‌رزش و پێگه‌یاندنی لاوان، چاککردنی کۆمه‌ڵه‌گه‌یه‌ له‌ڕووه‌ کۆمه‌ڵایه‌تیه‌کانه‌و به‌تایبه‌ت ئه‌و ڕووه‌ی کارمان پێده‌کرێت له‌سه‌ری، ده‌مانه‌وێت فێرخوازان له‌ڕووی سایکۆلۆجی و کۆمه‌ڵایه‌تیه‌وه‌ به‌ره‌وپێش ببه‌ین.

دایکان و باوکان کاردانه‌وه‌یان پرسیار له‌مێشکیاندا دروست نه‌بووه‌، کاتێک ده‌بینن منداڵه‌کانیان به‌وشێوه‌یه‌ گۆڕانکاریان به‌سه‌ردا دێت؟

به‌نیازین له‌ داهاتودا تیپی دایکان دروست بکه‌ین، دایکی فێرخوازه‌کانمان له‌پێکهاته‌یه‌کدا کۆده‌که‌ینه‌وه‌ بۆ ئه‌وه‌ی نیشانی بده‌ین که‌ ئه‌وانیش له‌ته‌مه‌نێکی گه‌وره‌دا ده‌توانن یاریی “باسکێت بۆڵ” بکه‌ن، ئه‌وه‌ش ئامانجێکی له‌پشته‌، ده‌مانه‌وێت ئه‌و پڕۆسه‌یه‌ی فێرخوازه‌کانی پێدا ده‌ڕۆن دایکان و باوکانیشی به‌هه‌مان شێوه‌ تێستی بکه‌ن و خۆیان بزانن چ سودێکیان پێده‌گه‌یه‌نرێت، ده‌توانم بڵێم دامه‌زرادنی ژیما مۆدێلێکی خۆبه‌شی نوێ بوو سوپاس بۆ خودا سه‌رکه‌وتو بوین له‌و کاره‌دا.

دژایه‌تی ده‌کرێن؟

به‌ڵێ، به‌داخه‌وه‌ له‌لایه‌ن که‌سانی ناحه‌زه‌وه‌ دژایه‌تی ده‌کرێین، ڕه‌نگه‌ هۆکاره‌که‌ی ئیره‌یی هه‌ر بابه‌تێکی دیکه‌ بێت.

ناخۆشترین ساته‌کانی ژیانت له‌بواری وه‌رزشدا چی بووه‌؟

ناخۆشترین ساتی ژیانم به‌داخه‌وه‌ ئه‌و ساتانه‌ بوو له‌گه‌ڵ یانه‌ی سیروانی نوێ به‌سه‌رم برد.

خۆشترین ساتی ژیانت له‌بواری وه‌رزشدا چییه‌؟

خۆشترین ساته‌کانی ژیانم ئه‌م دوو ساڵه‌ بووه‌ که‌ له‌گه‌ڵ ژیما به‌سه‌رم بردووه‌، پێوایه‌ خودای گه‌وره‌ تاڵی نیشاندام تا دواتر به‌شیرینی ژیما قه‌ره‌بووم بکاته‌وه‌، لێره‌وه‌ من سوپاسی هه‌موو ئه‌و که‌س و یانانه‌ ده‌که‌م که‌ دژایه‌تیان کردم، ئه‌گه‌ر ئه‌وان دژایه‌تیان نه‌کردمایه‌ من نه‌ده‌بومه‌ خاوه‌نی ژیما.

ده‌ڵێن پێداگری له‌ ئه‌رکێکی وه‌رزشی بکه‌یت ده‌بێت بیگه‌یه‌نیته‌ ئه‌نجام؟ ئه‌وه‌ ڕاسته‌‌؟

به‌ڵێ، به‌ پشتیوانی خودا شتێکم بوێت یاخود ئامانجێک دیاریم کردبێت هه‌ر ده‌یگه‌نمه‌ ئه‌نجام، دامه‌زراندنی ژیما خۆی له‌خۆیدا وه‌ڵامێک بوو بۆ هه‌موو ئه‌وانه‌ی دژایه‌تیان ده‌کردم، چونکه‌ نه‌ک به‌ته‌نها له‌کاتێکی ناخۆشدا دامانمه‌زراند، به‌ڵکو خه‌ڵک برسی بوو به‌هۆی قه‌یرانه‌وه‌ ئێمه‌ توانیمان ئامانجی خۆمان بپێکین، ئێستا تاڕاده‌یه‌ک ژیان بوژاوه‌ته‌وه‌ ژیماش له‌گه‌ڵ بارودۆخه‌که‌ و خه‌ڵکیدا زیاتر و زیاتر گه‌شه‌ی کردووه‌.

جگه‌ له‌ وه‌رزشی باسکه‌، چی فێری یاریزانه‌کانت ده‌که‌یت؟

جگه‌ له‌یاریی کردنی باسکه زۆر شت فێری کچه‌کانمان ده‌که‌ین، پاکوخاوێنی و ژینکه‌ یه‌کێکه‌ له‌ خاله‌ گرنگه‌کان به‌لامانه‌وه‌، زۆرجار به‌یه‌که‌وه‌ ده‌چینه‌ ده‌ره‌وه‌ بۆ ناوچه‌یه‌ک و له‌خۆڵ و خاشاک خاوێنی ده‌که‌ینه‌وه‌، جاری وا هه‌یه‌ به‌کۆمه‌ڵ دار و نه‌مام ده‌نێژین، زۆرجار بیرۆکه‌یه‌کی وه‌رزشی تێکه‌ڵ به‌ژینگه‌ ده‌که‌ین دێین تۆپێک ده‌بڕین و گوڵی تێدا ده‌ڕوێنین، بۆردێک یاخود حه‌له‌قه‌یه‌ک بشکێت ده‌چین تۆپێکی تێدا ده‌چه‌سپێنین و گوڵێکی تێدا ده‌ڕوێنین، وه‌ک پێشتر وتم چه‌ندین کارامه‌یی ژیانیان فێرده‌که‌ین تا بتوانن سه‌ره‌تا له‌ خێزانه‌که‌ی خۆیانه‌وه‌ گۆڕانکاری بکه‌ن پاشان به‌ره‌و کۆمه‌ڵگا به‌گشتی.

یه‌کێک له‌ گۆڕانکارییه‌کان له‌بواری وه‌رزش و ژیاندا که‌ ئێوه‌ ده‌یکه‌ن چییه‌؟

به‌شێوه‌ی ئه‌کادیمی و ته‌ندروست پلان بۆ ژه‌مه‌ خۆراکی یاریزانان و کات و واده‌ی خه‌وتنیان بۆ دیاری ده‌که‌ین، توانیومانه‌ پرۆگرامیان له‌به‌کارهێنانی ته‌کنه‌لۆجیا و مۆبایل و ئایپاد بگۆڕین تا له‌ماڵه‌وه‌ وا هه‌ست بکه‌ن له‌گه‌ڵ دایک و باوکیان ژیان ده‌گوزه‌رێنن، ئه‌وه‌ش سودی کۆمه‌ڵایه‌تی و بێگومان وه‌رزشیشی هه‌یه‌.

ده‌زگاکانی ڕاگه‌یاندن به‌پێی پێویست هاوکارتان بوون؟

جگه‌ له‌ که‌ناڵی (که‌ی ئێن ئێن) ده‌زگاکانی ڕاگه‌یاندن به‌گشتی هاوکاری به‌هێزی ئێمه‌ نه‌بوون، به‌شێوه‌یه‌کی گشتگیر ده‌زگاکان به‌شێوه‌ی پچڕ به‌هه‌موو ده‌نگ و ڕه‌نگیانه‌وه‌ خۆبه‌خش کاریان له‌سه‌ر کردوین، چونکه‌ که‌سانی ڕاگه‌یاندنکار زیره‌کن پێشتر درکیان به‌وه‌کردووه‌ ژیما له‌داهاتودا ده‌بێته‌ چرایه‌ک به‌سه‌ر کوردستان و به‌تایبه‌ت شاری سلێمانیه‌وه‌.

بون به‌ ڕاهێنه‌ری هه‌ڵبژارده‌ی عیراق چ هه‌ستێکی پێدایت؟

هه‌ستێکی ناوازه‌ی پێدام، وه‌ڵام بوو بۆ هه‌موو ئه‌و ناحه‌زانه‌ی پێیان وابوو که‌س ناتوانێت بگاته‌ پله‌یه‌کی باڵا، له‌ڕووی سایکۆلۆجییه‌وه‌ زۆر کاریگه‌ری هه‌بوو، وه‌ک یه‌که‌م کورد له‌مێژووی باسکه‌ی عیراقدا توانیم ببمه‌ ڕاهێنه‌ری دوو هه‌ڵبژارده‌ی عیراق، نه‌ک یه‌ک هه‌ڵبژارده‌، به‌ڵکو دووان.

ده‌توانیت سود له‌ ژیما وه‌ربگیریت بۆ هه‌ڵبژارده‌ی عیراق؟

به‌ڵێ ده‌توانین سود له‌ژیما وه‌ربگرین بۆ هه‌ڵبژارده‌ی عیراق، له‌به‌رئه‌وه‌ی ئێمه‌ پلانێکی درێژخایه‌نی چوار بۆ شه‌ش ساڵه‌مان داڕشتووه‌ تا ساڵی ٢٠٢٢ ده‌بینه‌ خاوه‌نی هه‌ڵبژارده‌یه‌کی به‌توانا، پلانه‌که‌ به‌شێوه‌یه‌که‌ که‌ له‌ ئه‌قڵیه‌تی شکسته‌وه‌ پێکهاته‌یه‌ک به‌ فه‌لسه‌فه‌ی بردنه‌وه‌ و پاڵه‌وانبونه‌وه‌ بونیاد بنێین بتوانێت کێبڕکێی هه‌ڵبژارده‌ گه‌وره‌ و ناوداره‌کان بکات.

له‌ده‌ره‌وه‌ی کوردستان شاره‌زایان ده‌رباره‌ی ژیما چیت پێده‌ڵێن ؟ ئه‌مریکیه‌کان ده‌رباره‌ی ئه‌م ڕێکخراوه‌ بۆچونیان چۆنه‌؟ له‌ڕووی ماددی و مه‌عنه‌وی هاوکاریان کردویت ؟

زۆرجار که‌سانی بیانی له‌تۆڕه‌ کۆمه‌ڵایه‌تیه‌کانه‌وه‌ ده‌ستخۆشیمان لێده‌که‌ن، ئه‌مریکیه‌کانیش ئه‌وانه‌ی هاوڕێمن و له‌ ئه‌مریکا له‌م بواره‌دا کارده‌که‌ن سه‌رسام بوون، پێیان وایه‌ شتێکی گه‌وره‌ و سه‌رسامکه‌ره‌ به‌و ئاست و تێگه‌یشتنه‌وه‌ له‌وڵاتێکی خۆرهه‌ڵاتیدا کچان و ژنان بتوانن یاریی باسکه‌ بکه‌ن، چه‌ندین جار سه‌رسامبونی خۆیان پێڕاگه‌یاندوم و ئاماده‌یشیان نیشانداوه‌ له‌ڕووه‌ وه‌رزشیه‌کانه‌وه‌ یاریده‌مان بده‌ن.

ئایا ئه‌م هه‌موو کاره‌ پێویستی به‌ سپۆنسه‌ر و پاڵپشتی ماددی گه‌وره‌تر نییه‌؟

به‌دڵنیاییه‌وه‌ ژیما پێویستی به‌ سپۆنسه‌رێکی گه‌وره‌ هه‌یه‌، به‌داخه‌وه‌ تائێستا له‌وڵاتی ئێمه‌دا درک به‌وه‌ نه‌کراوه‌ و تێگه‌یشتن نه‌بووه‌ بۆ ئه‌وه‌ی که‌ ژیما  ده‌یکات، ژیما پێویستی به‌ بوژاندنه‌وه‌ و سپۆنسه‌ری گه‌وره‌یه‌‌.

کۆمپانیا گه‌وره‌کان هیچ کاردانه‌وه‌یان نه‌بووه‌؟ به‌ڵێنیان پێنه‌داون؟

نه‌خێر به‌داخه‌وه‌… کۆمپانیا گه‌وره‌کان له‌نمونه‌ی “ئاسیا سێڵ” هه‌ر نه‌بوایه‌ ده‌یانتوانی یاریده‌ده‌ربن له‌ هاوکاریکردنی دارایی ژیما و بیناکردنی یاریگایه‌کی داخراو بۆمان، باشتر ده‌بوو ئه‌گه‌ر هۆکاره‌کانی گواستنه‌وه‌یان بۆ دابین بکردینایه‌، چه‌ندین پێداویستیمان هه‌یه‌ که‌ به‌خۆمان و ئه‌و فه‌نده‌ ناکرێت پێمان دراوه‌، به‌ڵکو ئه‌وه‌ کاری سپۆنسه‌ری گه‌وره‌یه‌، به‌ڵکو حه‌زمان ده‌کرد لۆگۆی کۆمپانیایه‌کی سپۆنسه‌ری گه‌وره‌ له‌سه‌ر درێسه‌کانمان بوایه‌، کێشه‌که‌ له‌وه‌دایه‌ به‌درێژایی مێژووی سلێمانی یانه‌کان سپۆنسه‌ریان وه‌رگرتووه‌ و له‌کۆتاییدا ئه‌نجامه‌که‌ی دیار نه‌بووه‌، بۆیه‌ ئێمه‌ش له‌م نێوه‌نده‌دا خوێندنه‌وه‌مان بۆ کراوه‌.

چ زه‌مانه‌تێک ده‌ده‌یت به‌ فێرخوازه‌کانت؟ داهاتویان به‌ چی ده‌گه‌یه‌نیت؟

(به‌پێکه‌نینه‌وه‌) به‌دڵنیاییه‌وه‌ پێتان ده‌ڵێم تیپه‌کانی ئێمه‌ ده‌بنه‌ نوێنه‌ری هه‌ڵبژارده‌ی عیراق له‌سه‌رجه‌م بۆنه‌ نێوده‌ولته‌یه‌کاندا، که‌ ئه‌مه‌ش به‌بڕوای من گرنگ نییه‌ له‌م قۆناغه‌دا، به‌ڵکو گرنگترین شت ئه‌وه‌یه‌ له‌دوو تا سێ ساڵی داهاتودا بتوانین پێکهاته‌یه‌ک بونیاد بنێین له‌پاڵه‌وانێتیه‌کانی ده‌ره‌وه‌ی عیراق ململانێی گه‌وره‌کان بکات و بردنه‌وه‌ به‌ده‌ست بهێنێت.

مه‌به‌ستت چ ئه‌نجام وپێکهاته‌یه‌که‌؟

به‌واتای ئه‌وه‌ی پێکهاته‌ی داهاتومان هاوشێوه‌ی هه‌ڵبژارده‌کانی تری عیراق نه‌بێت که‌ ده‌چنه‌ ده‌ره‌وه‌ و ده‌ستبه‌تاڵ ده‌گه‌ڕێنه‌وه‌، ده‌مانه‌وێت خاونی پێکهاته‌یه‌کی ململانێکار بین بۆ وڵاته‌ عه‌ره‌بیه‌ به‌هێزه‌کانی وه‌ک لوبنان و میسڕ و سوریا ئه‌گه‌ر بکرێت له‌گه‌ڵ چین و ژاپۆن، ئه‌وه‌ش به‌نسبه‌ت کچانی سلێمانیه‌وه‌ قورس نییه‌ و له‌توانایاندایه‌، ئێمه‌ جورئه‌ت و حه‌ماسه‌تی ئه‌وه‌مان هه‌یه‌ و دڵنیاین پێمان ده‌کرێت، به‌ڵام ده‌بێت ئاماژه‌ به‌وه‌ش بکه‌م که‌ ئه‌م‌ کاره‌ ماندوبون وپلانی ده‌وێت، هیوادارم له‌داهاتودا بتوانین هه‌موو ئه‌وکارانه‌ بکه‌ین.

بەردەوام بە لە خوێندنەوە

چاوپێکەوتن

سادیۆ مانی: من له‌ سه‌ڵاح خێراترم و کلۆپ منی گه‌یانده‌ قۆناغێکیتر

خه‌ڵک سپۆرت

سادیۆ مانی سه‌نیگالی ئه‌ستێره‌ی یانه‌ی لیڤه‌رپوڵ چاوپێکه‌وتنێک له‌گه‌ڵ ڕۆژنامه‌ی “مارکا” ئه‌نجام ده‌دات و تیایدا چه‌ندین بابه‌تی په‌یوه‌ندیدار به‌ خۆیی و یانه‌که‌ و هاوڕێیانی باس ده‌کات.

ئه‌مه‌ش کورته‌یه‌که‌ له‌چاوپێکه‌وتنه‌که‌:

که‌ ته‌مه‌نت ١٥ ساڵان بوو له‌ داکاری پایته‌ختی سه‌نیگاله‌وه‌ ده‌ستت پێکرد، ئه‌وکات ڕاهێنه‌ره‌که‌ت وای نیشانده‌دا پێیه‌کانت کارناکات، به‌ڵام ئێستا یه‌کێکیت له‌ باشتیرینی بازاڕی گواستنه‌وه‌کان، چی له‌ سانی-دا گۆڕا؟

له‌سه‌رو هه‌موو شتێکه‌وه‌ باوه‌ڕم به‌وه‌یه‌ خه‌ونه‌کانم به‌دیهێناوه‌، ئه‌وه‌ش ئه‌و ئامانجه‌یه‌ که‌ هه‌موو یاریزانێکی لاو پێویسته‌ هه‌وڵی بۆ بدات.

ئێستا یه‌کێکیت له‌باشترینه‌کان و ئیلهامبه‌خشی بۆ یاریزانه‌ ئه‌فریقیه‌کان، چ ئامۆژگارییه‌کیان ده‌که‌یت؟

ئامۆژگاری من ته‌نها له‌باره‌ی ئه‌و یاریزانانه‌وه‌ نییه‌ که‌ له‌داهاتودا دێنه‌ کیشوه‌ری ئه‌وروپا و زۆر ئاسانه‌: هه‌وڵبده‌ ئه‌و کاره‌ بکه‌یت که‌ خۆت ده‌ته‌وێت ئه‌نجامی بده‌یت، کاتێک تۆ ته‌مه‌نت لاو بێت بێگومان خه‌ونت هه‌یه‌، پێویسته‌ به‌قورسی کاربکه‌یت و هه‌رچی له‌تواناتدا بێت جێبه‌جێی بکه‌یت، گه‌شبین به‌ و مه‌شقی قورس بکه‌، ئه‌وه‌ تاکه‌ کاره‌ من کردومه‌، باوه‌ڕت به‌خۆت هه‌بێت و هه‌رچی له‌ده‌ستی تۆدا بێت ئه‌نجامی بده‌.

لیڤه‌رپوڵ له‌ ساڵی ١٩٩٠وه‌ نازناوی خولی ئینگلیزی به‌ده‌ست نه‌هێناوه‌، له‌چیتان که‌مه‌ بۆ به‌دیهێنانی خه‌ونه‌کانتان؟

ململانێیه‌کی گه‌وره‌یه‌ بۆ ئێمه‌، لیڤه‌رپوڵ چه‌ندین نازناوی گه‌وره‌ی به‌ده‌ستهێناوه‌ و له‌نێوانیاندا نازناوی ناوخۆی ئینگلته‌رای تێدا نییه‌، له‌به‌رئه‌وه‌یه‌ یانه‌که‌مان چه‌ندین یاریزانی گه‌وره‌ و ئه‌زمونداری دابین کردووه‌ تا ئه‌نجامی چاوه‌ڕوانکراو به‌ده‌ست بهێنین، ده‌مانه‌وێت کارێکی ناوازه‌ بکه‌ین به‌بێ ئه‌وه‌ی فشاری قورس بخرێته‌ سه‌رمان، له‌ئێستادا هه‌مووان له‌باره‌ی ئێمه‌وه‌ قسه‌ ده‌که‌ن، له‌به‌رامبه‌ردا ئێمه ‌پیویستمان به‌ که‌شێکی ئارام و ‌له‌سه‌رخۆیی و که‌مکردنه‌وه‌ی فشاره‌کانه‌، یاریی دوای یاریی بۆ ئامانجه‌ گه‌وره‌کان‌ هه‌وڵ ده‌ده‌ین، له‌به‌رئه‌وه‌ واز له‌ نازناوه‌کان بهێنه‌، هێشتا زووه‌ و وه‌رز هێنده‌ نابێت ده‌ستی پێکردووه‌.

تۆ خۆت کام نازناو پێش ئه‌ویتر ده‌خه‌یت، خولی یانه‌ پاڵه‌وانه‌کان یان خولی ئینگلیزی؟

هه‌ردووکیان، یانه‌یه‌کی گه‌وره‌ی وه‌ک لیڤه‌رپوڵ پێویسته‌ هه‌نگاو بۆ هه‌ردووکیان بنێت.

چ شتێکی یۆرگن کلۆپی ڕاهێنه‌ر سه‌رنجی ڕاکێشاویت؟

هه‌مووان ده‌یناسن و له‌باره‌ی که‌سایه‌تیه‌ ناوازه‌که‌یه‌وه‌ ده‌دوێن، ئه‌و له‌و جۆره‌ ڕاهێنه‌رانه‌یه‌ که‌ کاره‌که‌ی خۆشده‌وێت، پالپێوه‌نه‌رێکی نایابه‌ و تواناکانت به‌رزتر ده‌کاته‌وه‌، هه‌ر یاریزانێک ده‌زانێت که‌ کلۆپ ئاستی یاریزان له‌ قۆناغێکه‌وه‌ بۆ قۆناغێکی تر به‌رز ده‌کاته‌وه‌، په‌یوه‌ندیه‌کی ناوازه‌ی له‌گه‌ڵ یاریزاناندا هه‌یه‌ و ئه‌وه‌ش حه‌ماسه‌تی زیاترمان پێده‌دات.

چۆن توانیویه‌تی وه‌ک یاریزانێک ئاستی تۆ به‌ره‌وسه‌ر ببات؟

بێگومان ئاستی من به‌چاودێری ئه‌و ڕاهێنه‌ره‌ باشتر بووه‌، زۆر شت فێربووم لێیه‌وه‌، به‌ڕاستی شانسم هه‌بوو له‌ژێر ده‌ستیدا کارم کرد.

لیڤه‌رپوڵی ئه‌م وه‌رزه‌ له‌ وه‌رزی ڕابردوو به‌هێزتره‌؟

ڕه‌نگه‌ له‌ داهاتودا باشتر بین، هه‌موو ڕۆژێک ده‌مانه‌وێت باشتر و باشتر ده‌ربکه‌وین، ئه‌وه‌ی بڕیار ده‌دات که‌ باشترین له ‌وه‌رزی رابردوو یان نا ئێوه‌ن نه‌ک من، مه‌سه‌له‌که‌ به‌گشتی ئاسان نییه‌.

له‌ خولی یانه‌ پاڵه‌وانه‌کان ١٠ گۆڵ و له‌ خولی ئینگلته‌را ١٠ گۆڵت تۆمار کردووه‌، ده‌توانێت ئه‌و ڕێژه‌یه‌ به‌رز بکه‌یته‌وه‌؟

به‌ڵێ، هه‌وڵده‌ده‌م، هێشتا ته‌مه‌نم گه‌نجه‌ بۆ فێربون و به‌ره‌وپێشچون، به‌ڵام ئه‌وه‌ گرنگ نییه‌، گرنگ ئه‌وه‌یه‌ یاریده‌ده‌ربم له‌ به‌رزکردنه‌وه‌ی ئاستی یانه‌که‌م و ده‌مه‌وێت به‌شداری زیاتری ده‌ستکه‌وته‌کان بکه‌م.

ڕۆناڵدینیۆ به‌ نمونه‌ی ژیانت ده‌زانیت، ئایا به‌ته‌نها ئه‌و یاریزانه‌ له‌لای تۆ باشترینه‌؟

ڕۆناڵدینیۆ ئه‌و یاریزانه‌یه‌ که‌ ئیلهامی پێبه‌خشیم، ڕاسته‌ له‌ئێستادا هیچ ئه‌ستێره‌یه‌کی سپێشه‌ڵ له‌بیرکردنه‌وه‌مدا نییه‌، به‌ڵام گروپێک یاریزانی به‌توانا له‌گه‌ڵمدا بونیان هه‌یه‌ ده‌توانم لێیانه‌وه‌ فێربم، چه‌ندین ئه‌ستێره‌ی ناوداری تریش له‌بواری تۆپی پێدا هه‌ن.

کۆتا پرسیار: تۆ زۆرخێرایت و به‌هه‌مان شێوه‌ موحه‌مه‌د سه‌لاحی هاوڕێت، ئایا له‌ پێشبڕکێکاندا لێی ده‌به‌یته‌وه‌؟

(به‌پێکه‌نینه‌وه‌) بێگومان لێی ده‌به‌مه‌وه‌، من خێراترم، به‌تایبه‌ت له‌ ڕاکردنی ماوه‌ کورته‌کانی وه‌ک ١٠٠ مه‌تر و ٢٠٠مه‌تر، ده‌توانم پێشی بده‌مه‌وه‌.

بەردەوام بە لە خوێندنەوە
ریکلام

کوردستان

دوایین