ئێمە لە تۆرە کۆمەڵایەتیەکان

ژینگە

بەهۆی دابەشنەكردن و گرانی نەوت دیاردەی دار بڕین دەستی پێكردەوە

خەڵك- نزار مستەفا
بەهۆی دەستپێكردنی وەرزی سەرما و سۆڵه بەشێكی زۆری سنوری سۆران و دەڤەری برادۆست بەهۆی پێنەدانی سوتەمەنیەوە بەشێكی زۆری هاوڵاتیان پەنایان بردۆتە بەر بڕینی دار و ژینگەپارێزانی ناوچەكەش داوای پێدانی سوتەمەنی دەكەن.

عومەر عەبدوڵا برادۆستی، وەك ژینگەپارێزی دەڤەری سیدەكان بۆ (خەڵك) وتی، “هەموو ساڵێك لە سەرەتای وەرزی پایز دەبینین هاوڵاتیان دەست دەكەن بەبڕینی داری دێمەكار و زۆر بێویژدانانە دەیبڕنەوە، هەرچەندە هاوڵاتی ناحەقی نیە لەم قەیرانەدا بەناچاری پەنا بۆ داربڕین دەبات بۆ پەیداكردنی سەرچاوەی گەرمی بۆ ساردی زستان”.

وتیشی، “ڕۆڵی سەرەكی پاراستنی دارستانەكان بەر حكومەت دەكەوێ ئەویش بەدابین كردن و هەرزان كردنی نرخی سوتەمەنی، كە بەداخەوە تاكو ئێستا ڕۆڵی حكومەت زۆر لاوازە، بۆ ئەم پرسەش هیچ هەنگاوێكی كردەیی نابینرێ و هیوادارین حكومەت ئەم پرسە بەهەند وەربگرێ و بەزوترین كات نەوت و سوتەمەنی دابەش بكرێ و لەبازاڕیش نرخەكەی هەرزان بكرێ” .

لای خۆشیەوە، هەژار ماهیر، بەرپرسی ڕێكخراوی وار بۆ پاراستنی ژینگە بە (خە ڵك)ی ڕاگەیاند، بەهۆی درێژەكێشانی قەیرانی دارایی، كە باڵی بە سەر هەرێمی كوردستاندا كێشاوە و گرانی نرخی نەوت و دابەش نەكردنی سوتەمەنی وەك پیویست لە دەڤەری سۆران و بارزان و باڵەكایەتی و دەڤەری برادۆست و لە ئەنجامی زۆربوونی ژمارەی دانیشتوان، بەهۆی دواكەوتنی نەوتی ماڵان خەڵكێكی زۆر ڕوویان كردۆتە بڕینی دار و درەخت و لەباربردنی سروشتی كوردستان.

ناوبراو وتیشی، “ئێمە لەپەیوەندیداین وەك ڕێكخراوێكی ژینگەیی لەگەڵ لایەنە پەیوەندارەكان و لە ڕۆژانی ئایندەشدا بە گردبوونەوە و ئاڕاستەكردنی بانگەواز و ڕاگەیاندن و مامۆستایانی ئایینی فشارەكانمان دەست پێ‌ دەكەین بە تایبەت، كە پێویستە هەرچی زووە حكومەتی هەرێمی كوردستان چ لە ڕێگای وەزارەتی سامانە سرۆشتییەكان چ لە ڕێگای كومپانیاكانی نەوتی كەرتی تایبەت بیر لە ڕێگا چارەی خێرا پەیڕەو بكات بۆ دابین كردنی نەوت و بە نرخێكی هەرزان بیفرۆشێتەوە بە هاوڵاتیان.”

جەختیشی كردەوە، پێویستە وەزارەتی سامانە سرۆشتییەكان و لایەنە پەیوەندارەكان هەنگاوەكان خێراتر بكەن لە دابینكردنی سوتەمەنی بۆ هاوڵاتیان بە تایبەت ناوچەكانی سەر سنوور و سەختەكان، كە كەمتر نەبی لە 2 برمیل بە نرخیكی گونجاو.

ماوەی چەند ساڵێكە و لە سەرەتای سەرهەڵدانی قەیرانی داراییەوە حكومەتی هەرێم پاڵپشتی سەر نرخی سووتەمەنی هەڵگرتووە و نەوت-یش دابەش ناكات و ئەوەش بۆتە هۆی گرانی نرخەكەی و بارگرانی بۆ هاوڵاتیان بە تایبەت لە وەرزی زستاندا، هەرچەندە حكومەتی عیراق بڕێكی نەوت بۆ پارێزگاكانی هەرێم دەنێرێت، كە ئەوەش بڕێكی هێندە كەمە لە كۆی ساڵەكەدا هەر ماڵێك بەرمیلێك نەوتی بەرناكەوێت.

ژینگە

هەواڵێكی (خەڵك) دەنگدانەوەی بەدوای خۆیدا هێنا
شارەوانی سلێمانی لەسەر پیسكردنی مێز و كورسیەكانی شاخی گۆیژە و ئەزمەڕ هاتەدەنگ

خەڵك – بەشی هەواڵ
لێپرسراوی بەشی خزمەتگوزاری لە شارەوانی سلێمانی ڕایدەگەیەنێت، گەشتوگوزاری سلێمانی ژمارەی كورسی و مێزەكانی شاخی ئەزمەر دەگاتە زیاتر لە 150 دانە و داواش لە هاوڵاتیان دەكات پاكوخاوێنی ئەو شوێنە گەشتیارییە بپارێزن، دەشڵێت: “ڕۆژانە 25 كارمەند و دوو ئامێری پاكردنەوە سەرقاڵی پاك ڕاگرتنی شاخی ئەزمەڕن”.

ڕزگار ئەحمەد، لێپرسراوی بەشی خزمەتگوزاری لە شارەوانی سلێمانی بە (خەڵك)ی ڕاگەیاند، لە شاخی ئەزمەڕ و گۆیژە لە ڕێگەی تیمێكی 25 كارمەندی و دوو ئامێری كەپسی خۆڵ كۆكردنەوە ڕۆژانە سەرقاڵی پاكوخاوێن ڕاگرتنی ناوچەكەین.

وتیشی، “بەداخەوە لەدوای دانانی ئەو مێز و كورسیانە لەلایەن گەشتوگوزاری سلێمانی-یەوە، هاوڵاتیان و گەشتیاران پاكوخاوێنی ناوچەكە ڕاناگرن، بۆیە بەهیواین لەمەودوا هاوڵاتیان دوای گەشت و سەیرانەكانیان خۆڵ و خاشاكەكانیان بخەنە سەتڵی خۆڵەكانەوە”.

ڕاشیگەیاند، ئەوەی گەشتوگوزاری سلێمانی لە دانانی ئەو مێز و كورسیانەی بۆ شاخی گۆیژە و ئەزمەڕ كردویەتی خزمەتێكی باشە بە گەشتیاران و هاوڵاتیانی سلێمانی، بڕیارە ژمارەی مێز و كورسیەكانیش زیاتر بكات بۆ نزیكەی 150 دانە.

ئەمە لەكاتێكدایە، لەماوەی ڕابردوودا (تۆڕی میدیایی خەڵك) وەك ئەركی پیشەیی و ڕۆژنامەوانی وێنەی ئەو میز و كورسیانەی شاخی گۆیژەی بڵاوكردەوە، كە لەدوای گەشت و سەیرانەكان، بەشێك لە هاوڵاتیان پاشماوەكانیان بەجێهێشتووە ئەوەش لە تۆڕە كۆمەڵایەتییەكان كاردانەوەی لێ كەوتەوە.

بەردەوام بە لە خوێندنەوە

ژینگە

كەشناسی هەرێم ڕاگەیەنراوێكی لەسەر بوومەلەرزەكە بڵاوكردەوە

خەڵك – بەشی هەواڵ
بەڕێوەبەرایەتی گشتی كەشناسی و بوومەلەرزەزانی هەرێمی كوردستان ڕایدەگەیەنێت، ئێوارەی ئەمڕۆ لە كاتژمێر 6.08 خولەك بوومەلەرزەیەك تۆماركرا بەقوڵایی 10 كم لە دووری 25 كم لە قەزای ڕەواندوز، دەشڵێت: “گوڕەكەی 3.9 پلە بووە بە پێوەری ڕێختەر”.

بەڕێوەبەرایەتی گشتی كەشناسی و بوومەلەرزەزانی هەرێمی كوردستان لە ڕاگەیەنراوێكدا، كە وێنەیەكی دەست (خەڵك) كەوتووە ڕاگەیاندووە، ئێوارەی ئەمڕۆ لەكاتژمێر 6.08 خولەك بوومەلەرزەیەك تۆماركرا بەقوڵایی 10 كم لە دووری 25 كم لە قەزای ڕەواندوز و گوڕەكەی 3.9 پلە بووە بە پێوەری ڕێختەر.

ئاماژەی بۆ ئەوەشكردووە، هیچ زیانێكی نەبووە و لە لایەن هاوڵاتیانەوە هەستی پێكراوە.

ئەمە لەكاتێكدایە، ئەمڕۆ 14/10/2018 كاتژمێر 12:4خوولەك بوومەلەرزەیەك بەگوڕی 3.2 پلەی ڕێختەر بە قوڵایی 10كم لە قەزای سۆران ڕوویدا و هاوڵاتیان هەستیان پێ كردوە بێ ئەوەی زیانی هەبێت.

بەردەوام بە لە خوێندنەوە

ژینگە

بوومەلەرزە لە چەند ناوچەیەكی هەرێم ڕوویدا

خەڵك- بەشی هەواڵ
ئێوارەی ئەمڕۆ بۆ جاری دووەم بوومەلەرزە لە ناوچەی سۆران و ڕەواندزی دا و تا ئێستا كەشناسی هەرێم هیچ زانیارییەكی بڵاونەكردۆتەوە.

ناوەندی بوومەلەرزەزانی ئەوروپای ناوەڕاست لە خشتەیەكدا زانیاری سەبارەت بە بوومەلەرزەكە بڵاوكردۆتەوە و ڕایگەیاندووە، بوومەلەرزەكە بە گوڕی 3.9 پلە بووە بە پێوەری ڕێختەر و 74 كیلۆمەتر لە هەولێر دوور بووە.

لای خۆشیەوە، محەمەد كەلاری، شارەزای كەشناسی و بوومەلەرزەزانی بۆ (خەڵك) ئاماژەی بەوەكردووە، كە بوومەلەرزەكە لە ناوچەی سۆران و ڕەواندز-ی داوە بە پلەی 4 پلە بە پێوەری ڕێختەر و بە قوڵایی 10 كیلۆمەتر بووە.

ئەمە لەكاتێكدایە، بەیانی ئەمرۆ بوومەلەرزەیەك لە قەزای سۆران ڕوویدا و لە لایەن هاوڵاتیانەوە هەستی پێكرا، كە گوڕەكەی 3.8 پلە بووە بە پێوەری ڕێختەر.

بەردەوام بە لە خوێندنەوە
حکومەتی داهاتووی هەرێمی کوردستان دەتوانێت خزمەتی هاوڵاتیان بکات؟

کوردستان

دوایین