ئێمە لە تۆرە کۆمەڵایەتیەکان

ئابوری

نزیكەی 9 ترلیۆن دینار بۆ هەرێم دیاری كرا
جارێكی دیكە عیراق پشكی هەرێمی كوردستانی لە بودجە كەم كردەوە

خەڵك- بەشی هەواڵ
هەرچەندە لەدوای پڕۆسەی “ئازادی عیراق” لە ساڵی 2003-وە پشكی هەرێمی كوردستان لە بودجەی فیدڕاڵی بە 17% دیاری كرد، بەڵام ساڵی ڕابردوو ئەو پشكەی بۆ 12.67% كەم كردەوە و ئەمساڵ-یش جارێكی دیكە هەمان پشكی كەمكراوەی بۆ هەرێم لە بودجەی ساڵی 2019 دیاری كردووە.

مەسعود حەیدەر، ئەندامی خولی پێشووی پەرلەمانی عیراق لە پشكی گۆڕان لە هەژماری خۆی لە فەیسبووك ڕایگەیاندووە، پڕۆژە یاسای بودجەی عێراق بۆ ساڵی ٢٠١٩ پڕۆژە یاسایەكی سیاسیە و پێشێلكردنی دەستوری عێراقی تێدایە و پێشێلكاری یاسایی تێدایە و حكومەتی بەكاربەر چەند بەربەستێكی سیاسی تێدا داناوە بۆ دروستكردنی كێشەی سیاسی نێوان ھەرێم و بەغداد.

ئاشكراشی كردووە، پشكی ھەرێمی كوردستان دانراوە بە ١٢.٦٧٪‏. خەرجێ سیادیەكان زیاترە بەراورد بە ساڵی ٢٠١٨.

دەشڵێت: “پێویستە پەرلەمان پڕۆژە یاساكە بگەڕێنێتەوە بۆ حكومەت و حكومەتی عادل عەبدولمەھدی لەسەر بنەمای بەرنامەی حكومەتی نوێ پڕۆژە یاساكە ئامادە بكات”.

لای خۆشیەوە، ئەحمەد حاجی ڕەشید، ئەندامی پەرلەمانی عیراق لە فراكسیۆنی كۆمەڵ ئاماژەی بەوەكردووە، داهاتی خەمڵێنراو لە پڕۆژە یاسای بودجەی ساڵی 2019ی فیدڕاڵی بە ۱٠٥ ترلیۆن و ٥٦۹ ملیار و ٦۸٦ و ملیۆن و ۸۷٠ هەزار دینارە، كە لەو بڕە خەرجی خەمڵێنراو بە ۱۲۸ ترلیۆن و ٤٤۳ ملیار و ٥۲ ملیۆن و ٤۲۷ هەزار دینار دانراوە و بەو پێیەش كورتهینان خەمڵێنراوە بە ۲۲ ترلیۆن و ۸۷۳ ملیار و ۳٦٥ ملیۆن و ٥٥۷ هەزار دینار.

سەبارەت بە پشكی هەرێم ئەو پەرلەمانتارەی كورد لە بەغدا دەڵێت: “پشكی هەرسێ پارێزگاكەی هەرێم (هەولێر و دهۆك و سلێمانی) كە ۱۲.٦۷٪ خەمڵینراوە بە 8 ترلیۆن و ۷٤۱ ملیار و ٤٠٦ ملیۆن و ۲٦ هەزار دینار دانراوە”.

دەشڵێت: “بوجەی پەرەپیدانی سێ پارێزگاكەی هەرێم ۱۲٦ ملیار و ۷٠٠ ملیۆن دینارە و بودجەی وەبەرهێنان لەڕیگەی قەرزەوە بۆ پشكی هەرێم ۱٠۲ ملیار و ۳٦۱ ملیۆن و ۲٠٠ هەزار دینارە و بەو پێیەش تێكڕای پشكی هەرێم لە بودجە دەكاتە ۸ ترلیۆن و ۹۷٠ ملیار و ٤٦۷ ملیۆن و ۲۲٦ هەزار دینار.

ئابوری

بانگەواز بۆ بەشداری هاوڵاتیان دەكرێت
ڕێپێوان دژی نەبوونی نەوت و بڕینەوەی دارستانەكان دەستپێدەكات

خەڵك- بەشی هەواڵ
بەهۆی دابەشنەكردنی نەوت لەلایەن حكومەتی هەرێمەوە و بڕینەوەی دارستانەكان، ڕێپێوان لە پێنجوێنەوە تا بەردەم پارێزگای سلێمانی دەستپێدەكات و ڕێكخراوێكی ژینگەپارێز-یش بانگەواز بۆ بەشداری هاوڵاتیان دەكات.

ڕێكخراوی ملەكەوە بۆ پاراستنی ژینگە لە هەژماری خۆی لە فەیسبووك لە ڕاگەیەنراوێكدا ئاماژەی بەوەكردووە، “سبەی كاتژمێر (٤:۳٠ بۆ ۵:٠٠)ی ئێوارە بەڕێدەكەوین بەپێ لە پێنجوێنەوە بۆ بەردەم بینای پارێزگاری سلێمانی بەمەبەستی دابینكردنی نەوت، چونكە دارستانەكان بوونەتە قوربانی ئەم كەمتەرخەمییەی حكومەت”.

دەشڵێت: “هاوڵاتیانی ئازیز ئێمە لە خۆشی سەری خۆمان نییە ئەم خەمە لەكۆڵ دەنێین و ملی ڕێ دەگرین، بەڵكو خەمی بەرژەوەندی گشتییە ئەویش پاراستن و مانەوەی درەخستانەكانە”.

ڕێكخراوی ملەكەوە بۆ پاراستنی ژینگە بانگەوازیشی كردووە، “ئەگەر دڵسۆز و خەمخۆرن ئەوا سبەی هاوسەفەرمانبن، تا هەمووان پێكەوە سكاڵا و ناڕەزایی خۆمان بگەیەنینە شوێنی خۆی”.

ئاشكراشی كردووە، هەر كەسێك ویستی هاوسەفەرمان بێت بۆ زانیاری پەیوەندی بكات بەم ژمارە مۆبایلانەوە (٠۷۵٠۱۱۲٦٠٦۲ یان
٠۷۵٠۱۸٤۷٠۵۷) و دەشڵێت: “شوێنی كۆبوونەوەمان: بازاڕی خوارەوە-ترافیكەكە!”.

سبەی کاتژمێر(٤:۳٠بۆ۵:٠٠)ی ئێوارە بەڕێدەکەوین بەپێ لە پێنجوێنەوە بۆ بەردەم بینای پارێزگاری سلێمانی،بەمەبەستی دابینکردنی…

Posted by ‎رێكخراوی ملەكەوە بۆ پاراستنی ژینگە‎ on Saturday, October 20, 2018

بەردەوام بە لە خوێندنەوە

ئابوری

سبەینێ‌ مووچەی چەند وەزارەتێك دابەشدەكرێت

خەڵك- بەشی هەواڵ
ماوەی 16 ڕۆژە دابەشكردنی مووچەی مانگی تەمموزی فەرمانبەران و هێزە سەربازی و ئەمنییەكان دەستی پێ كردووە و بڕیارە لەم هەفتەیەدا بە پێدانی مووچەی سێ‌ سەرۆكایەتییەكە و خانەنشینان كۆتایی بە دابەشكردنی مووچە بهێنرێت.

سەرچاوەیەك لە وەزارەتی دارایی و ئابووری حكومەتی هەرێم بۆ (خەڵك) ڕایگەیاند، ڕۆژی یەك شەممە 21ی تشرینی یەكەمی 2018 مووچەی مانگی تەمموزی هەریەكە لە وەزارەتەكانی (پیشەسازی و بازرگانی و ڕۆشنبیری و لاوان و ئاوەدانكردنەوە و ڕێگەوبان) دابەش دەكرێت.

ئاشكراشی كرد، ڕۆژی دوو شەممە مووچەی سەرجەم دامەزراوەكانی دیكە و سێ‌ سەرۆكایەتییەكەی هەرێم دابەش دەكرێت.

بە وتەی ئەو سەرچاوەیە، لە كۆتایی ئەم هەفتەیە مووچەی خانەنشینانی سەربازی و شارستانی دابەش دەكرێت.

بەردەوام بە لە خوێندنەوە

ئابوری

دابەشكردنی نەوت دەستپێدەكاتەوە

خەڵك – بەشی هەواڵ
لیژنەی سەرپەرشتی دابەشكردنی نەوت لە پارێزگای هەڵەبجە ڕایدەگەیەنێت، بەهۆی دابەشكردنی نەوت لە ناوچەی هەورامان بۆ ماوەی دوو ڕۆژ لەناو پارێزگاكە دابەشكردنی نەوت ڕادەگیرێت، دەشڵێت: “كۆتایی هەفتە دابەشــكردنی نەوت لە ناو هەڵەبجە دەستپێدەكاتەوە”.

لیژنەی سەرپەرشتی دابەشكردنی نەوت لە هەڵەبجە لە ڕاگەیەنراوێكدا، كە وێنەیەكی دەست (خەڵك) كەوتووە ڕایگەیاندووە، پێشتر بڵاوكرایەوە ڕۆژی یەك شەممە 21ی تشرینی یەكەم دەست بە دابەشكردنی نەوت لە ناو شاری هەڵەبجە دەكرێتەوە، بەڵام بۆ كۆتایی هەفتە دوادەكەوێت.

دەشڵێت: “دواكەوتنی دابەشكردنی نەوت لە ناو سەنتەری شارەكە بەهۆی دابەشكردنی بەشە نەوتە لەناوچەی هەورامان و ڕۆژی چوار شەممە لە هەڵەبجە دەستپێدەكاتەوە”.

جەختیشی كردۆتەوە، دانیشتوانی ناوچەی هەورامان بە پێی ئەم خشتەیە نەوت وەردەگرن، “ڕۆژانی دوو شەممە و سێ شەممە نەوت لە تەوێڵە و بیارە دابەشدەكرێت”.

بە پێی زانیاریەكان، لە پارێزگای هەڵەبجە زیاتر لە 6 هەزار خێزان بەشە نەوتیان وەرگرتووە و بەشێكی دیكەی ماوە نەوت وەربگرێت.

بەردەوام بە لە خوێندنەوە
حکومەتی داهاتووی هەرێمی کوردستان دەتوانێت خزمەتی هاوڵاتیان بکات؟

کوردستان

دوایین