ئێمە لە تۆرە کۆمەڵایەتیەکان

راپۆرت

پینەكردنی شەقامەكانی سلێمانی نیگەرانی شۆفێرانی لێكەوتۆتەوە

سلێمانی- نزار جەزا

شارەوانی سلێمانی لەئێستادا دەستی بەپینەكردن و قیرتاوكردنەوەی بەشێك لەشەقامەكانی شاری سلێمانی كردووە، بەڵام ئەوەی جێگەی نیگەرانی شۆفێرانە، كاتی نۆژەنكردنەوەی شەقامەكانە، چونكە بەوتەی شۆفێران لەو كاتەی شەقامەكان هاتوچۆی زۆر لەسەرە كاری نۆژەنكردنەوەی بۆ دەكرێت.

بەشێك لەشەقامەكانی سلێمانی پێویستییان بەنۆژەنكردنەوە هەیە، بۆیە لەئێستادا شارەوانی سلێمانی هەڵمەتێكی نۆژەنكردنەوەی ئەو شەقامانەی دەستپێكردووە.

شۆفێران نیگەرانن لەكاتی نۆژەنكردنەوەی شەقامەكان، چونكە پێیانوایە، ئاستەنگی هاتوچۆی بۆ دروستكردوون.

لەوبارەیەوە هێمن لەتیف ڕۆژنامەنوس بە(خەڵك)ی ڕاگەیاند، ماوەیەكە پینەكردن و چاككردنەوەی شەقامەكان دەستیپێكردۆتەوە، بەڵام ئەوەی جێگەی نیگەرانییە لەكاتی دەوامی ئاساییدا ئەم كارە دەكەن، ئەمەش بۆتە هۆی دروستكردنی ئاستەنگی بۆ هاتوچۆی هاوڵاتیان.

ئەوەشی خستەڕوو، زۆر نەگونجاوە لەكاتژمێر هەشتی بەیانیدا، كە كاتی دەستپێكردنی دەوامە و هەموو هاوڵاتیان لەو كاتەدا لەماڵ دەچنە دەرەوە بۆ شوێنی كارەكەیان، ئەمەش وای كردووە نیگەرانی دروستبكات.

ناوبراو داواشیكرد، لەكاتژمێر 12ی شەو بەدواوە یاخود ڕۆژانی پشوو، خەریكی چاككردنەوەی ڕێگاوبانەكان بن، بۆئەوەی ئاستەنگی هاتوچۆ دروست نەبێت.

بەڕێوەبەرایەتی هاتوچۆی سلێمانی لەو شوێنانەی كاری نۆژەنكردنەوەی لێ دەكرێت، مەفرەزەیان داناوە بۆئەوەی هاتوچۆی شۆفێران ڕێكبخەن.

كاروان محەمەد، وتەبێژی بەڕێوەبەرایەتی هاتوچۆی سلێمانی بە(خەڵك)ی ڕاگەیاند، كاتێك شارەوانی سلێمانی دەستدەكات بە چاككردنەوەی ڕێگایەك، بەڕێوەبەرایەتی هاتوچۆ ئاگاداردەكاتەوە، بۆئەوەی مەفرەزەی هاتوچۆ لەو شوێنانە دابنێن و ڕێكخستنی هاتوچۆ بكەن، بەڵام كاتی چاككردنەوەكەی لەدەستی شارەوانیدایە.

ئەوەشی خستەڕوو، ئەگەر بگونجێت وا باشترە لەو كاتانەی كە پشووی هاوڵاتیانە و هاتوچۆ لەسەر شەقامەكان كەمترە، شەقامەكان چاكبكرێنەوە، بۆئەوەی گرفتی هاتوچۆ بۆ هاوڵاتیان دروست نەبێت.

لەبەرامبەردا شارەوانی سلێمانی لەسەر داهاتی خۆی شەقامەكان چاكدەكاتەوە، بەڵام بەهۆی قەیرانی داراییەوە ناتوانن لەكاتی پشوودا كارەكانیان بكەن.

سەردەشت ڕەفیق وتەبێژی شارەوانی سلێمانی بە(خەڵك)ی ڕاگەیاند، هەندێك شەقام چاڵی تێكەوتووە و خراپ بووە، بۆیە پێش ئەوەی وەرزی زستان دەستپێبكات، لەئێستاوە دەستیان بە چاككردنەوەیان كردووە.

ئاماژەی بەوەشدا، لەبەرئەوەی ئێستا قەیرانی داراییە، كارێكارەكانیان ناتوانن شەوانە كاربكەن، بۆیە لەكاتی ڕۆژدا كاردەكەن، بەڵام لەگەڵ بەڕێوەبەرایەتی هاتوچۆی سلێمانی هەماهەنگییان هەیە، ئەوان هاوڵاتیان ئاگاداردەكەنەوە، كە چی شەقامێك كاری تێدا دەكرێت.

باسی لەوەشكرد، پرۆسەی قیرتاوكردن قورسە، بەجۆرێك كۆمەڵێك كەس كاری تێدا دەكەن، بەنمونە كرێكار و ئەندازیار و كارگەی قیر و شۆفێرەكان و كۆمەڵێك خەڵكی دیكە، بۆیە ناتوانن شەوان یان ڕۆژانی پشوو كاربكەن.

شەقامەكانی بەردەوام پێویستییان بەنۆژەنكردنەوە هەیە، بەڵام لە چوار ساڵی ڕابردوودا بەهۆی قەیرانی داراییەوە نەتوانراوە وەك پێویست كاری نۆژەنكردنەوە بكرێت، یان شەقامی تازە قیرتاوبكرێت، بەڵام ئەمساڵ هەڵمەتێكی نۆژەنكردنەوەی شەقامەكان دەستیپێكردووە.

راپۆرت

هاوڵاتیان ڕوو لەخواردنی گۆشتی ماسی دەكەن

بەردەوام بە لە خوێندنەوە

راپۆرت

(خەڵك) چارەنووسی كورسییە بەتاڵەكانی پەرلەمانی كوردستان ئاشكرا دەكات

خەڵك-سەعد مەلا عەبدوڵلا گوڵپی

هەڵبژاردنەكانی هەرێمی كوردستان ئەنجام درا و تا ئێستاش بەهۆی لێكۆڵینەوە لە ساختەكارییە گەورەكان ئەنجامی كۆتایی رانەگەیەندراوە و هەر یەك لە جوڵانەوەی نەوەی نوێ و یەكگرتووی ئیسلامی و بزووتنەوەی ئیسلامی و بزووتنەوەی گۆڕان ئەنجامەكان رەتدەكەنەوە و ئاماژە بۆ ئەوە دەكەن، ساختەكاری گەورە لە هەڵبژاردنەكاندا كراوەو لە ئێستادا چاوەڕێی ئەنجامەكانی كۆتایین.

یەكگرتووی ئیسلامی كوردستان لە راگەیەنراوی ئەنجومەنی سەركردایەتی حزبەكەیدا، وێڕای رەتكردنەوەی ئەنجامە بەراییەكان ئاماژە بۆ ئەوە دەكات، ئەگەرێكی كراوەیە كە لە پڕۆسەی سیاسی هەرێم بكشێنەوە.

سەرچاوەیەك لە یەكگرتووی ئیسلامی كوردستان بە (خەڵك)ی راگەیاند، یەكگرتووی ئیسلامی كوردستان بەشداری حكومەت ناكات و ئەگەریش هەیە لە پڕۆسەی سیاسی بكشێتەوە بۆ ئەو مەبەستەش راوێژ بە ئەندامەكانی دەكات و دواتر بڕیاری كۆتایی لەو بارەوە ئاشكرا دەكات.

لای خۆشییەوە ئەنجومەنی سەركردایەتی بزووتنەوەی ئیسلامی و بزووتنەوەی گۆڕان لە دوو راگەیەنراوی جیاوازدا، پڕۆسەی هەڵبژاردنەكانیان رەتكردوتەوەو چاوەڕێی ئەنجامی كۆتایی هەڵبژاردنەكانن و هەرچی جوڵانەوەی نەوەی نوێشە لەزاری شاسوار عەبدولواحید سەرۆكی جوڵانەوەكە لە كۆنگرەیەكی رۆژنامەوانیدا بایكۆتی پەرلەمانی كوردستانی راگەیاند و ئاشكرایكرد، ئەوان ناچنە پەرلەمانێكی كارتۆنییەوەو كاندیدە دەرچوەكانیشیان نانێرنە ئەو پەرلەمانەوە، چونكە ساختەكاری بەرفراوان ئەنجام دراوە.

هەڵوێستە كۆنكرێتییەكەی جوڵانەوەی نوێ بەشێوەیەكە كە 8 كورسی پەرلەمانی بە چۆڵی دەمێننەوە، ئەگەر لایەنەكانیتریش هاوشێوەی ئەم هەڵوێستەیان هەبێت، ئەوكات رێژەی كورسییە بەتاڵەكانی پەرلەمانی كوردستان زیاتر دەبن و بەشێك لە چاودێرانی سیاسی ئاماژە بۆ ئەوە دەكەن، نەناردنی پەرلەمانتاران بۆ هۆڵی پەرلەمان لە قازانجی هێزی یەكەمی كوردستان كە پارتییە دەبێت و پەرلەمانتارێكی كوردستانیش لە (خەڵك)ەوە روونكردنەوە لەسەر چارەنوسی كورسییە بەتاڵەكان دەدات.

شیروان زرار وتەبێژی كۆمسیۆنی هەڵبژاردن و راپرسی هەرێمی كوردستان بە (خەڵك)ی راگەیاند، كۆمەڵێك بابەت هەیە یەكەمجارە لە هەرێم سەرهەڵدەدات بەوەی قەوارەیەك یان لیستێك نەچێتە پەرلەمان، ئەمە پێشینەی نەبووە.

وتیشی” ئەو بابەتانە بەلای ئێمەوە گرنگ نییە، ئەوەی بەلای ئێمەوە گرنگە ئەوەیە بزانین قەبارەی بەشداریكردنەكە چەندە و بە وردی و راستگۆیی و ئەمانەتەوە كاری خۆمان بكەین و خاتری كەس نەگرین و ئەنجامەكان یەكلایی بكەینەوە، ئەوكات حزبەكان خۆیان چارنووسی بڕیاری كۆتایی خۆیان بدەن، گرنگ ئەوەیە دەنگەكانیان لای ئێمە پارێزراوە”.

ئاماژەی بۆ ئەوەش كرد، دوای راگەیاندنی ئەنجامەكان، حزبەكان دەچن بۆ نێو پەرلەمان یان ناچن ئەوە پەیوەندی بە خۆیانەوە و داهاتووی پەرلەمانەوە هەیەو پەرلەمان ئیجرائات دەكات.

سەبارەت بە كورسییە بەتاڵەكان ناوبراو ئاشكراشیكرد، كورسی بەتاڵ پەیوەندی بە كۆمسیۆنەوە نییەو دواتر دەچێتە پەرلەمان و پەرلەمانتار سوێندی یاسایی دەخوات و دواتر ناچێت تاكو فەسڵ دەكرێن، یاخود هەر ناڕوات ئەوەش ئەنجومەنی شورا یەكلایی دەكاتەوە.

ئاری عەبدوللەتیف ئەندامی پەرلەمانی كوردستان بە (خەڵك)ی راگەیاند، بەپێی یاسای هەڵبژاردن، ئەوەی نەیەتە نێو پەرلەمان، كورسییەكانی دەچێت بۆ گەورەترین كوتلە واتە دەڕوات بۆ پارتی.
وتیشی”دواتر بەشێك لە دەنگەكان دەچێت بۆ ئەو لیستانەی پێویستیان بە كەمترین دەنگ هەیە بۆ وەرگرتنی كورسییەك”.

ئاشكراشیكرد، ئەو كەسانەی باس لەوە دەكەن كورسییەكان بە بەتاڵی دەمێننەوە لەنێو پەرلەمان “سیناریۆیە”و یاسا رێگە بەبابەتێكی لەو شێوەیە نادات‌و ئەو كورسیانە نابێت بە بەتاڵی بمێننەوە بەپێی یاسا و پەیڕەوی پەرلەمان.

ئاماژەی بۆ ئەوەش كرد، لەوانەیە پارتی وەك كوتلەی گەورە بەشی لایەنەكانیتریش لەو كورسییە بەتاڵانە بدات.

سەبارەت بە چۆنێتی پڕكردنەوەی ئەو كورسییانە ناوبراو رایگەیاند، لەدوای سوێندخواردنی پەرلەمانتاران دوای سێ مانگ ئەگەر پەرلەمانتار نەڕواتە هۆڵی پەرلەمان لەلایەن كوتلەی گەورەوە پڕ دەكرێتەوە.

هەندێك لە لایەنە سیاسییەكان داوای هەڵوەشاندنەوەی پڕۆسەی هەڵبژاردنەكان دەكەن و ئیسماعیل خوڕماڵی بڕیاردەری كۆمسیۆنی هەرێمیش لەو بارەوە رایدەگەیەنێت، ئێمە دەبێت دەنگە حەڵاڵ و حەرامەكان لە یەكتر جیابكەینەوەو پێویست بە سوتاندنی هەڵبژاردن یان سندوقی هەڵبژاردن ناكات.

وتیشی” نابێت دەنگی حەڵاڵی هاووڵاتیان لەناو بەرین”.
لای خۆشییەوە وتەبێژی كۆمسیۆنی هەڵبژاردنەكانی هەرێم رایگەیاند، ئەو لایەنانەی بەشداری هەڵبژاردنەكانیان كردووە ناكرێت ئەوەی ئەنجامەكانی بەدڵ نەبوو بڵێن هەڵیدەوەشێنینەوە، چونكە شتەكان كۆتایی پێهاتووە و ئەوەی لەسەر شانی ئێمەیە ئەنجام رادەگەیەنین، دواتر حزبەكان دەتوانن تانە لە ئەنجامەكان بگرن لە دادگای پێداچوونەوەی كوردستان، لەوێ بڕیاری كۆتایی لەسەر بابەتی سكاڵاكان بدرێت، دواتر حزبێكی سیاسی بەشداری دەكات یان نا ئەوە خۆی ئازادە.

لەلایەكیتریشەوە بەختیار سەعید چاودێری سیاسی بە (خەڵك)ی راگەیاند، وڵاتە زلهێزەكان دانیان بە هەڵبژاردنەكانی هەرێمدا ناوەو دوای راگەیاندنی ئەنجامەكانی كۆتاییش هەر حزبێك رەتی بكاتەوە یان تانە بگرێت لە دادگای پێداچوونەوەی هەرێم بە نیو كاتژمێر وەڵامی دەدرێتەوە و هیچ لە بابەتەكان ناگۆڕێت.

بەردەوام بە لە خوێندنەوە

ئابوری

گرانی تەماتە هاووڵاتیان ناچار دەكات ڕوو لە دۆشاوی تەماتە بكەن

سلێمانی ـ نزار جەزا

ئەمساڵ سەوزە و میوە بەتایبەت تەماتە نرخەكانیان فڕیوە، بەجۆرێك هاوڵاتیان لەجیاتی تەماتە، دۆشاوی تەماتە لەخواردنەكانیاندا بەكاردەهێنن.

لەبازاڕەكانی شاری سلێمانیدا نرخی سەوزە و میوە بەتایبەتیش تەماتە، كە خواردنێكی سەرەكی هاوڵاتییانە بەگشتی لەبەرزبونەوەدان.

نرخی تەماتە بەراورد بە ساڵی رابردوو زۆر بەرزبووەتەوە

شوكری محەمەد، ژنێكی تەمەن 45 ساڵە، كە بەهۆی بەرزی نرخی تەماتەوە ناتوانێت وەك پێشتر تەماتە بكڕێت، بۆیە ناچارە دۆشاوی تەماتە بەكاربهێنێت.

ناوبراو بۆ (خەڵك) دەڵێت ” نرخی سەوزە و میوە بەرزە و پێویستە حكومەت كارێك بكات نرخەكان داببەزێنێت، لەبەرئەوەی خەڵك لەم قەیرانەدا ناتوانێت بەنمونە كیلۆیەك تەماتە بە دوو هەزار دینار بكڕێت”.

هاوڵاتیان لە بەرزی نرخی تەماتە نیگەرانن

لەسەردانێكی مەیدانیدا پەیامنێری (خەڵك) سەردانی بەشێك لە تەماتە فرۆشەكانی ناو بازاڕی شاری سلێمانی كرد، هەموویان جەختیان لەوەدەكردەوە، لەوەتەی نرخی تەماتە بەرزبۆتەوە فرۆشیان دابەزیوە.

یەكێك لەبەقاڵەكانی بازاڕی بەلەدێكەی شاری سلێمانی بە(خەڵك)ی وت “نرخی تەماتە و سەوزە و میوەكانی دیكە بەنزیكەیی سەدا 50 بۆ 60 بەرزبۆتەوە “.

نزار جەزا پەیامنێری (خەڵك) لەسەر نرخی سەوزە و میوە لەگەڵ فرۆشیاران گفتووگۆ دەكات

سەروەر عومەر، كە 22 ساڵە، كاری بەقاڵی دەكات، باسی لەوەكرد، فرۆشیان كەمی كردووە و هاوڵاتی زۆر ناچار نەبێت، تەماتە ناكڕێت، بەجۆرێك پێشتر نزیكی 500 كیلۆ تەماتەیان دەفرۆشت، بەڵام ئێستا 250 بۆ 300 كیلۆ تەماتە دەفرۆشن”.

بەهۆی ئەوەی دۆشاوی تەماتە لەجێگەی تەماتە لەئامادەكردنی خواردندا بەكاردەهێندرێت، لەئێستادا فرۆشی ئەمیش زیادیكردووە.

ئارام محەمەد، فرۆشیارێكی ماركێتی ئامەدە لە گەڕەكی ئیبراهیم ئەحمەدی شاری سلێمانی بە (خەڵك)ی ڕاگەیاند، لەماوەی پێشتردا كە نرخی تەماتە بەرزبۆوە، فرۆشی دۆشاوی تەماتەش زیادیكردووە.

ئاماژەی بەئەوەشدا، كاتێك شتێك نرخی گران بێت، خەڵك بیردەكاتەوە لەجیاتی ئەوە شتێكی دیكە بەكاربهێنێت، بۆ نمونە كیلۆیەك تەماتە بۆ یەك ژەم خواردن بەكاردێت، بەڵام قتویەكی دۆشاوی تەماتە، كە هەمان نرخی كیلۆ تەماتەكەی هەیە، بەشی زۆر زیاتر دەكات.

دۆشاوی تەماتە دەبێتە جێگرەوەی تەماتە

ئەمساڵ بەهۆی كەمی بەرهەمی نێوخۆی تەماتە و رێگری ئێران لە هەناردەكردنی بۆ هەرێمی كوردستان لە بازاڕەكاندا نرخی بۆ چەند هێندەی ساڵی ڕابردوو بەرز بووەتەوە.

ساڵی رابردوو لەم مانگەدا نرخی كیلۆیەك تەماتە لەدەوروبەری 500 دیناردابوو، بەڵام نرخەكەی 1500 بۆ 2000 دینارە.

بەردەوام بە لە خوێندنەوە
حکومەتی داهاتووی هەرێمی کوردستان دەتوانێت خزمەتی هاوڵاتیان بکات؟

کوردستان

دوایین