ئێمە لە تۆرە کۆمەڵایەتیەکان

راپۆرت

ئەمرۆ، ساڵێك بەسەر كۆچی دوایی سەرۆك تاڵەبانی دا، تێپەڕ دەبێت

 

ئەمرۆ، ساڵێك بەسەر كۆچی دوایی سەرۆك تاڵەبانی، سەرۆك كۆماری پێشووی عیراق و سكرتێری گشتی یەكێتی نیشتمانی كوردستان تێپەڕ دەبێت.
جەلال تاڵەبانی، كە لە گۆرەپانی سیاسیدا بە “مام جەلال” ناودێر دەكرا، یەكەم سەرۆك كۆماری عیراق و سكرتێری گشتی یەكێتیی نیشتمایی كوردستان بوو، رۆژی 17-12-2012 لە بەغدا، باری تەندروستی تێك دەچێت و لەوێوە بەمەبەستی وەرگرتنی چارەسەری پزیشیكی رەوانەی ئەڵمانیا كرا، پاش مانەوەیەكی زۆر و كۆششی بێ‌ وێنەی پزیشكان بۆ چارەسەری، بەڵام رۆژی 3-10-2017 ژیان ئاوایی یەكجارەكی كرد .

مام جەلال…كێ‌ بوو
“مام جەلال” كوڕ‌ی شێخ حیسامەدین كوڕ‌ی شێخ نوری كوڕ‌ی شێخ غەفوورە، ساڵی 1933 لە گوندی (كەلكان)ی قەتپاڵی چیای كۆسرەت لەدایك بووە، كە دەڕ‌وانێتە دەریاچەی دوكان، چەند ساڵێك تەمەنی منداڵی لەو گوندە بەسەر بردووە و دواتر باوكی بووە بەرێبەری تەكیەی تاڵەبانی لە كۆیە.
لەكۆیە، چۆتە قوتابخانەی سەرەتایی و بە سەركەوتوویی خوێندنی تەواو كردووە، خوێندكارێكی زیرەك لێهاتوو بووە، هەر لە تەمەنی منداڵییەوە نیشانەكانی سەركردایەتی بە جۆرێ‌ لێدەركەوتووە كە پێش هاوڕ‌ێكانی دەكەوت بۆ كۆڕ‌ی پرسەو ئەو بۆنانەی لەو سەردەمەدا بەڕ‌ێوە دەچوون، بەیانیان لە كاتی ریزبوونی قوتابیاندا، مامۆستاكان پێش هەمووان ئەویان هەڵدەبژارد بۆ خوێندنەوەی شیعری نیشتمانیی و نەتەوەیی.

ساڵی 1945: ئاهەنگێكی میللـی لە كۆیە بۆ نەورۆز سازكرا، سەرۆك تاڵەبانی كە لە تەمەنی سیانزە ساڵیدا بوو بەشداری تێدا كردو وتەی حەماس ئامێزی خوێندەوەو بووە مایەی سەرسوڕ‌مانی مامۆستاو بەشداربووان.
ساڵی 1946 لەگە‌ڵ چەند هاوڕ‌ێیەكی خوێندكارو بە ئامۆژگاری یەكێك لە مامۆستاكانی كۆمەڵەیەكی فێركاری نهێنی دامەزراند، بە ناوی كۆمەڵەی پێشخستنی خوێندنەوە، مام جەلال بە سكرتێری ئەو كۆمەڵەیە هەڵبژاردرا، كە ئامانجێكی كۆمەڵەكە هاندانی خوێندكاران بوو بۆ خوێندنەوەی دەرەكی.
لەهەمان ساڵداو دوای دامەزراندنی پارتی دیموكراتی كورد لە 16/ی ئابی 1946 كەوتە ژێر كاریگەری بەرنامەی پارتی و لە چوارچێوەی رێكخستنەكانیدا كەوتە چالاكی خوێندكارانە.

دوای چوونە ناو كاری سیاسییەوە، رۆژنامەی (رزگاری) كە پارتی دیموكراتی كورد بەنهێنی دەریدەكرد، كورتە وتاری لەژێر نازناوی (ئاگر)دا بۆ بڵاو دەكردەوە.

ساڵی 1947 بوو بە ئەندام لە پارتی دیموكراتی كورد.

ساڵی 1948 خوێندنی سەرەتایی تەواو كردو لە ناوەندیی كۆیە بوو بە خوێندكار، ئەو ساڵە بە ساڵی (راپەڕ‌ین) ناسرابوو، كە گەلی عیراق توانی پەیماننامەی (پۆرتسماوس) هەڵبووەشێنێتەوە و حكومەتی ساڵح جەبر بڕ‌وخێنێ و حكومەتی محەمەد سەدر دابمەزرێنێت، لەو كەشوهەوا ئازادیەدا كە لە سایەی ئەم (راپەڕ‌ینە) هاتەكایەوە، هەڵبژاردنێكی گشتی خوێندكاران ئەنجامدرا بۆ هەڵبژادنی نوێنەرانی كۆنگرەی گشتی.
ئەوە بوو مام جەلال بە نوێنەری خوێندكارانی كۆیە هەڵبژێردراو بەشداری لە یەكەمین كۆنگرەی خوێندكارانی عیراقدا كرد كە لە نیسانی 1948 لە گۆڕ‌ەپانی (السباع) ی شاری بەغدا بەسترا.
لەم كۆنگرەیەدا بۆ یەكەمینجار گوێی لە شاعیری مەزن (محەمەد مەهدی جەواهیری) بوو، كە شیعرە بەناوبانگەكەی (رۆژی شەهید)ی خوێندەوە، كە بۆ جەعفەری برای و بۆ شەهیدانی وەسبە وتبووی.
ئەو ساتانە لە ژیانی سەرۆك تاڵەبانیدا مێژوویی بوون و وایكرد ببێتە یەكێك لە مریدەكانی شیعری ئەو و دواتریش بوو بە ئازیزترین دۆستی و ئەو دۆستایەتیە تا دواساتەكانی ژیانی شاعیر بەردەوام بوو.

ساڵی 1949 و لە سایەی حوكمی عور فی و تۆقاندن كە كوردستان و عیراقی گرتەوە، سەرۆك تاڵەبانی لە حزبدا سەركەوت و بووە ئەندامی لیژنەی ناوچەی كۆیە.

لە شوباتی 1951 دا و لە كۆنگرەی دووەمی پارتی دیموكراتی كورد، بە ئەندامی لیژنەی ناوەندی هەڵبژێردرا، بەڵام لەبەر پاراستنی ریزەكانی پارتی پلەكەی خۆی بە هەڤاڵێكی خۆی بەخشی كە دوای دەرچوونی لە زیندان بەشداری لە كۆنگرەدا كردبوو.

لە ساڵی 1951 دا لەگە‌ڵ چەند هەڤاڵێكدا گیراو بۆ شاری موسڵ دوورخرایەوە، لەوێش لە خەباتی سیاسیدا بەردەوامبوو و دواتر چووە كەركوك بۆ تەواوكردنی خوێندن و سەرلەنوێ دامەزراندنەوەی رێكخستنەكانی حزب و بووە بەرپرسی رێكخستنەكانی كەركوك.
لەهەمان ساڵیشدا ئەركی چاپ و بڵاوكردنەوەی بڵاوكراوەكانی بە شێوەیەكی نهێنی گرتە ئەستۆ تا ئەو رۆژەی گیرایەوە.

ساڵی 1952 چووە كۆلیژی ماف (حقوق) لە بەغدا كە ئەو دەمە رێكخستنەكانی پارتی دیموكراتی كورد پەرتەوازە بوو، بەڵام مام جەلال توانیی رێكخستنەكانی حزب تۆكمە بكاتەوە.
لە كانوونی دووەمی 1953 دا بەشداریی كۆنگرەی سێیەمی پارتی دیموكراتی كوردستانی كردو بە ئەندامی كۆمیتەی ناوەندی هەڵبژێردراو لە مانگی شوباتدا سەرپەرشتی یەكەمین كۆنگرەی یەكێتی قوتابیانی كوردستانی كرد و لە كۆنگرەیەدا بە سكرتێری گشتی قوتابیانی كوردستان هەڵبژێردرا، لەهەمان ساڵیشدا یەكێكبوو لە دامەزرێنەرانی (یەكێتی لاوانی دیموكراتی كوردستان)، هەر لەو كاتانەدا نوێنەری پارتی بوو لای زۆربەی حزبە نهێنی و ئاشكراكانی عیراقی.

ساڵی 1954 بە ئەندامی مەكتەبی سیاسی هەڵبژێردرا.

ساڵی 1955 سە فەری دەرەوەی عیراقی كردو لە فێستیڤاڵی لاوان و قوتابیانی جیهانی لە وارشۆ بەشداری كردو لەوێوە سەردانی یەكێتی شوورەوی ئەوساو چینی كرد.

ساڵی 1956 لەبەرچاوان ونبوو، كەوتە خەباتی ژێرزەمینی و ناچاربوو لە قۆناغی چوارەمی مافدا خوێندن بەجێبهێڵێت.

ساڵی 1957 سەفەری سوریاو مۆسكۆی كردو لە فێستیڤاڵی لاوان و قوتابیانی مۆسكۆ بەشداری كردو هاتنی بۆ سوریا بە فرسەت زانی بۆ پەیوەندی بە كوردەكانی ئەوێوە و پەیوەندیەكی سیاسی دروستبوو. لەهەمان ساڵیشدا گەڕ‌ایەوە عیراق و بەشداری لە كارەكانی مەكتەبی سیاسی پارتی دیموكراتی كوردستانی یەكگرتوو كردو بوو بە بەرپرسی رۆژنامەی (خەباتی كوردستان) كە لە سلێمانی بەنهێنی دەریان دەكرد.

لە یەكەمین رۆژی سەركەوتنی شۆڕ‌شی 14/ی گەلاوێژی ساڵی 1958، سەرپەرشتی رێكخستنی خۆپێشاندانی جەماوەری سلێمانی كرد بە هاوكاری هەڤاڵانی حزب لەنێو شاردا، پاشان چووە بەغداو بەشداری لە كاروباری مەكتەبی سیاسی و دەركردنی گۆڤاری (رزگاری) (التحریر)دا كرد، هەروەها ئەركی ئەو خەباتەی لەئەستۆ گرت كە لەنێو ریزەكانی حزبدا فراوان دەبوو، وەك پێویستییەكی بوونی حزبێكی پێشڕ‌ەوی كوردستانی و رێكخراوە پێشەییەكان بەرهەڵستكاری كردنی ئەو هەوڵانەی كە دەیانویست پارتی دیموكراتی كوردستان بكەنە پاشكۆی حزبێكی عیراقی.

ساڵی 1959 جارێكیتر بە ئەندامی كۆمیتەی ناوەندی پارتی دیموكراتی كوردستان و مەكتەبی سیاسی هەڵبژێردرا و لەهەمانكاتدا ئەفسەری یەدەكی كەتیبەی چوارەمی تانك بوو، هەروەها بەشداری لە دەركردنی رۆژنامەی (خەبات)دا دەكرد كە بە زمانی عەرەبی دەردەچوو و بە ناوی (پیرۆت)ەوە وتاری تێدا بڵاودەكردەوە.

ساڵی 1960 بەرپرسی لقی سلێمانی و ئەندامی مەكتەبی سیاسی بوو كە خولێكی هۆشیاری بۆ كادێرەكان كردەوە.

ساڵی 1961 بووە سەرنووسەری رۆژنامەی (كوردستان) و دوای داخستنی رۆژنامەی خەبات دووچاری راونان بوو لە بەغدا، بەڵام لە شەوی نەورۆزی هەمان ساڵدا وتارێكی دژی دیكتاتۆریەت خوێندەوەو بەرگری لە بارزانی خوالێخۆشبوو كرد كە ئەو سەردەمە قاسم كۆمەڵێك تاوانی دابۆوە پاڵ لە ئەنجامی ئەوەدا فەرمانی گرتنی دەرچوو و بەنهێنی گەڕ‌ایەوە سلێمانی و خۆی شاردەوەو بەشداری لە رێكخستنی مانگرتنی گشتیدا كرد كە لە شەشی ئەیلولدا كرا.

لە ئەیلولی 1961 دا كە شۆڕ‌ش هەڵگیرسا، بەرپرسی ناوچەی سلێمانی بوو، یەكەمین بنكەی شۆڕ‌شی لە چەمی رێزان كردەوەو سەرپەرشتی كردو فەرماندەیی هێزی پێشمەرگەی لیوای سلێمانی كرد تا وای لێهات زۆر فراوان بوو و بووە هێزێكی گەورە، ئەوە بوو كرا بە لێپرسراوی هێزی پێشمەرگەی كوردستان.

لە نەورۆزی 1962 دا، سەركردایەتی ئەو هێڕ‌شە بەرفراوانەی كرد بۆسەر ناوچەی شارباژێڕ‌و لە ماوەی چەند رۆژێكدا دەست بەسەر هەموو بنكەی پۆلیسی ناحیەی بناوەسووتەو چوارتادا گیراو هێزەكانی بەرەو‌ قەزای پێنجوێن بردو تەواو ناوچەكەیان ئازاد كرد.

بەمشێوەیە هەردوو ناوچەی شارباژێڕ‌و پێنجوێن بوونە دوو ناوەندی شۆڕ‌ش و سەركردایەتی.
لە 1962 ـ 1963 زۆربەی ناوچەكانی قەرەداغ و قەڵاسێوكەو گەرمیان و سەنگاو ئازادكران. ئەو دەمە مام جەلال فەرماندەی هێزی رزگاری بوو، لەهەمانكاتیشدا سەرپەرشتی دامەزراندنی ناوەندەكانی بەمۆ و هەڵەبجەو تەوێڵەو بیارەی دەكرد.

ساڵی 1963 و دوای كودەتا رەشەكەی شوبات، مام جەلال بە سەرۆكی وە فدی كوردی دەستنیشان كرا بۆ گفتوگۆ لەگە‌ڵ حكومەتی تازەدا كە لە سەرتادا رەزامەندیان لەسەر گفتوگۆو چارەسەری ئاشتیانەی كێشەی رەوای كورد نیشاندا، هەروەها سەردانی كۆماری میسری و جەزائیری كردو چاوی بە عەبدولناسرو بن بێلا كەوت و لەهەمان ساڵیشدا سەردانی ئەوروپای كردو نوێنەرایەتی شۆڕ‌شی كوردستانی كردو سەركەوتوو بوو بۆ ناساندنی كێشەی كوردو ئاشكراكردنی بارودۆخی كوردستان و كۆكردنەوەی یارمەتی و هاوكاری بۆ شۆڕ‌ش لە وڵاتانی فەرەنسا، ئەڵمانیا، روسیا، چیكسلۆ فاكیا و نەمسا.

ساڵی 1964 گەڕ‌ایەوە كوردستان و ئەركی خۆی لە فەرماندەیی كردنی هێزی رزگاری گرتەوە ئەستۆ.

ساڵی 1967 بەشداری لە كۆڕ‌ی (ئیشتراكیەكانی عەرەب) كرد لە جەزائیرو لێكۆڵینەوەیەكی زۆر بەپێزی دەربارەی كێشەی كوردو شەرعیەتی بزووتنەوەی رزگاریخوازی گەلی كوردو دۆستایەتی نێوان كورد و عەرەب پێشكەشكرد.

ساڵی 1970 رۆڵی كاریگەری خۆی بینی لە یەكگرتنەوەی هەردوو باڵی پارتی دیموكراتی كوردستان كە پێشتر ببوونە دوو باڵ و ناكۆكیەكی تاڵ و خوێناوی لە نێوانیاندا هەبوو.

ساڵی 1972 سەفەری دەرەوەی عیراقی كردو ماوەیەك لە لوبنان و میسرو سوریا مایەوەو دوای رووخاندنی شۆڕ‌شی كورد كە لە ئەنجامی رێكەوتننامەی نێوان سەدام و شای ئێران لە ئاداری 1975 لە جەزائیر ئیمزاكرا، سەرۆك تاڵەبانی هەر لەو ناوچانەدا مایەوە.

لە 1-6-1975 لە دیمەشق لەگە‌ڵ دەستەیەك لە هەڤاڵانیدا یەكێتیی نیشتمانیی كوردستانیی دامەزراندو نەخشەی بۆ هەڵگیرسانەوەی شۆڕ‌شی نوێ دانا كە لە 01/ی حوزەیرانی 1976 راگەیەنراو بووە سكرتێری گشتی یەكێتی.

لە ساڵانی دوای دامەزراندنی یەكێتی لەسەر چالاكی سیاسی و سەركردایەتی حزب و شۆڕ‌ش بەردەوام بوو لەگە‌ڵ هەڤاڵەكانی لە چیاو ئەشكەوتەكانی كوردستاندا دەژیا.

بە گەواهی زۆر لە چاودێرە سیاسیەكان یەكێك بووە لە بزوێنەری سەرەكی بۆ لێك نزیككردنەوەی بۆچوونەكان لەنێو ریزی ئۆپۆزسیۆنی عیراقی لە كۆنگرەكانی نیویۆرك و لەندەن و سەڵاحەدین و هەموو دانیشتنەكانی دوای ئەوانەش كە پەیوەندی بە رێكخستن و نزیكبوونەوەی ماڵی عیراقییەوە هەبوو، میوانداری زۆربەی زۆری هێزە عیراقیەكانی كردەوە لە كوردستان و پشتگیری هەمە جۆرەی كردوون.

لەسەر گۆڕ‌ەپانی نێودەوڵەتیش، سەرۆك تاڵەبانی بەشداری چەندین كۆنگرەو كۆبوونەوەی ئیشتراكی نێودەوڵەتی كردەوەو چاوی بە سەركردە سیاسییە نێودەوڵە‌تیەكانی زۆر وڵاتانی جیهانی كەوتووە.

جگەلەوەی كە كەسایەتیەكی سیاسییە خەباتگێرێكی هۆشمەندو نووسەرو یاساناسە، وەك رۆژنامەنووسێكیش لە رۆژنامەی نهێنی و ئاشكرادا نووسیویەتی و لە ساڵی 1959 بە ئەندامی ئەنجومەنی سەندیكای رۆژنامەنووسانی عیراقی هەڵبژێردرا كە شاعیری مەزن محەمەد مەهدی جەواهیری نەقیبی بوو.

تاڵەبانی جگەلەوەی یەكێكە لە سیاسی و دیپلۆماسی و رۆژنامەنووسە دیارەكان، نووسەرێكی ناوداریش بوو، بە شێوەیەكی كاریگەر بەشداری لە تیشك خستەسەر تێكڕ‌ای بزووتنەوەی سیاسی عیراق و ناوچەكەو بزووتنەوەی سیاسی كوردی كردەوە، لەم بوارەشدا چەندین كتێبی لە سەردەمی جیاجیادا نووسیوە كە كتێبخانەی عەرەبی و كوردی دەوڵەمەند كردەوەو بوونەتە سەرچاوەیەكی گرنگ بۆ لێكۆڵینەوە لە بواری مێژووی جوڵانەوەی سیاسی كوردی و عیراقیدا.

دوای ئازادكردنی عیراق بە ئەندامی ئەنجوومەنی حوكم هەڵبژێردراو لە مانگی نۆڤەمبەری 2003 دا سەرۆكایەتی ئەنجوومەنی كردو لەم ماوەیەدا كارامەیی خۆی لە هەڵسوڕ‌اندنی كاروباری حوكم نیشاندا.

لە 06/ نیسانی 2005 مام جەلال 227 دەنگی لە كۆی 248 دەنگی ئەندامانی كۆمەڵەی نیشتمانی عیراقی بەدەستهێناو بە هەڵبژاردنێكی راستەوخۆ بە یەكەمین سەرۆكی هەڵبژێراوی عیراق هەڵبژێردرا، بەمجۆرە سەرۆك تاڵەبانی لە فراوانترین دەروازەكانەوە چووە ناو مێژووی كوردو هەروەها لە جوانترین دەروازەشەوە چووە ناو مێژووی عیراق و لە ناودارترین دەروازەشەوە چووە نێو مێژووی سیاسی و دیموكراسی جیهانەوە.

لەساڵی 2005 تا ساڵی 2014 بۆ دوو خول وەك سەرۆك كۆماری عیراق هەڵبژێردراوە.

لە 17-12-2012 لە بەغدا توشی جەڵدەی مێشك بوو، پاشان بۆ چارەسەر گەیەنرایە نەخۆشخانەیەك لە وڵاتی ئەڵمانیا و پاش ماوەیەك بە تەندروستیەكی باشەوە گەڕایەوە شاری سلێمانی.

لەو كاتەشەوە تا كۆچی دوایی كرد، چەند جارێك بۆ مەبەستی چارەسەر سەردانی وڵاتی ئەڵمانیای كردو لە رۆژی 3-10-2017 دڵە گەروەكەی لە لێدان و كەوتوو و كۆچی دوایی كرد، لە مەراسیمێكی شكۆداردا، تەرمی تاڵەبانی گەیەنرایە گردی دەباشان و بە ئامادەبوونی سەدان بەرپرس و كەسایەتی نێوخۆیی و بییانی لەدوامەنزڵی خۆی و لە بەرزترین شوێنی شاردا بەخاك سپێردرا.

جیهان

بەوێنە‌و ڤیدیۆ..ئەو خواردنەی زیاد لە سەدەیەكە، رۆژانە لە ئەنجومەنی پیرانی ئەمریكا لێدەنرێت

خەڵك-سەعد مەلا عەبدوڵڵا گوڵپی

زیاتر لە سەدەیەكە، رۆژانە جۆرێك لە سوپ لە ریستۆرانتی ئەنجومەنی پیرانی ئەمریكا دروست دەكرێت و بەناوی سوپی پیرانی ئەمریكی ناوبانگی دەركردووە.
تۆڕی (BBC) بڵاویكردەوە، پێشینەی ئەم سوپە دەگەڕێتەوە بۆ سەرەتاكانی سەدەی بیستەم، ماڵپەڕی ئەنجومەنی پیرانی ئەمریكی بۆچونی جیاواز لەو بارەوە ئاشكرا دەكات و دەڵێت، ناتوانرێت دڵنیایی لەبارەی كام لەو بۆچوونانەوە یەكلایی بكرێتەوە.


یەكێك لەو بۆچونانەی باس لەو سوپە دەكات دەڵێت، ئەو سوپە لە ساڵی 1900 لەسەر خواستی كەسێك بەناوی (دوبوا سیناتۆری ویلایەتی ئایداهو) دەستی پێكردووە، بۆچونێكیتر هەیە دەڵێت، نیوت نلسون سیناتۆری ویلایەتی مینیسۆتا بووە كە ئەم جۆرە سوپەی لە ناوچەكە گونجاندووە و دەگەڕێتەوە بۆ ساڵی 1903.
بۆچونێكیتر ئەوەیە دەڵێت، لە ساڵی 1904 جو كانن سەرۆكی ئەنجومەنی پیرانی ئەمریكا دوای تێگەشتنی لەوەی هیچ جۆرە خواردنێك لە ریستورانتی ئەنجومەنەكە بە دڵی ئەو نییە، فەرمانی كرد بەوەی بەبێ رەچاوكردنی كەش و هەوا ئەم جۆرە سوپە لێبنرێت، لەكاتێكدا ئەم جۆرە خواردنە زیاتر لە وەرزی زستاندا دەخورێت، بەڵام ئەوە بەدیار نەكەوتووە ئایا ئەم فەرمانە بۆ خراپی خواردنی چێشتلێنەرەكان بووە، یاخود بۆ دڵنیایی لەوەی ئەو خۆراكە دەبێت بە بەردەامی بوونی هەبێت.

ئەو سوپەی تا ئێستا دروست دەكرێت لە فاسۆلیا و گۆشتی بەراز و پیاز و كەرە و خوێ و بیبەر.

بۆ چۆنێتی دروستكردنی سوپەكە كلیك بكە بۆ بینینی ڤیدیۆكە.

ئەو سوپە ئەگەر بەشێوەیەكی سوننەتیتر دروست بكرێت پێویستی بە فاسۆلیا، گۆشتی بەراز بە ئێسقانەوە، پەتاتە، پیاز، كەرەوز و سیر.
لە تۆمارێكی ڤیدیۆییدا و لە دروستكردنی سوپەكەدا گۆشتی بەرازەكەی تێدا سڕدراوەتەوە، بەڵام لە دەیەی هەشتاكانی سەدەی رابردوو بۆ جارێكیتر گۆشتی بەرازەكە گێڕدراوەتەوە بۆ نێو سوپەكە.

فەرمانی لێنانی سوپ

فەرمانی لێنانی سوپ

بەشێك پێیان وایە سوپەكە فكرەی ویلایەتەكانی باشووری ئەمریكایە، چونكە بە هەرشێوەیەك بێت چێشتلێنەرە رەشتپێستەكانی باشووری ئەمریكا دروستیان كردووە و ئەوان سوپەكەیان بە سەلیقەیەكی زۆر جوان دروست كردووە.
دەوترێت، تەنها یەك جار لەكاتی جەنگی جیهانی دووەم و بەهۆی نەبوونی و كەمی خۆراك، یەك رۆژ ریستورانتی سەنای ئەمریكا فاسۆلیای لێنەبووە و بەو هۆیەوە لەو رۆژەدا ئەم جۆرە چێشتە لێنەنراوە، بەڵام لەو رۆژە بەدواوە رۆژانە ئەم سوپە لێنراوە بڕیاریش نییە هیچ رۆژێك بەبێ لێنانی ئەم سوپە لە ئەنجومەنی سەنا تێپەڕ ببێت.


لە ساڵی 2010ەوە، هاووڵاتیانیش دەتوانن لە كاتژمێرێكی دیاریكراو لە ریستورانتی سەنا ئەو سوپە تاقیبكەنەوە، هەڵبەتە بۆ ئەو مەبەستە دەبێت بانگهێشتی یەكێك لە سیناتۆرەكانت پێبێت و هاوشێوەی سیناتۆرەكان جل و بەرگ بپۆشیت، هەروەها ئەم سوپەش لە كۆنگرەی ئەمریكا بۆ تەواوی ئامادەبوان ساز دەكرێت.


مادەی سەرەكی ئەم سوپە فاسۆلیایەكە كە بە فاسۆڵیای دەریایی ناسراوە، چونكە پێكهاتەیەكی باشی تێدایە و نرخەكەشی هەرزانە و بۆ كاتێكی دوورو درێژیش دەتوانرێت هەڵگیرێت، ئەمەش وایكردووە لە سەدەی نۆزدەدا لەلایەن هێزە دەریاییەكانی ئەمریكا هەڵبگیرێت.
هێزە دەریاییەكانی ئەمریكاش فاسۆلیایەكی سپی تایبەتیان هەیە كە هاوشێوەی سوپەكەی ئەنجومەنی پیرانی ئەمریكایە، بەڵام لەبری كەرەوز، گێزەر و ئاردی گەنم یان خودی گەنمەكە تێدا بەكاردەهێنرێت.

بەردەوام بە لە خوێندنەوە

راپۆرت

نۆڕینگەكانی لاكۆڵان بەپێی بەرنامەی چاكسازی دەرمان نامێنن

 

خەڵك-ئارام سەردار

حكومەتی هەرێمی كوردستان بەمەبەستی رێگری كردن لە بەبازاڕكردنی دەرمانی خراپ و كوالێتی نزم، هەروەها رێگری لەبازرگانیكردنی نابەجێ بەسەر ژیانی هاوڵاتیان، ژمارەیەك بڕیاری بۆ چاكسازی و ریفۆرم لەكەرتی دەرمان دەركرد، جێگری نەقیبی سەندیكای دەرمانسازانیش رایدەگەیەنێت، ئەگەر بڕیارەكان وەك خۆیان جێبەجێ بكرێن ئەوا لەشەش مانگ بۆ ساڵێك كاریگەریەیكانی دەردەكەون.

نۆرینگەی لاكۆڵان نامێنێت
هێژا ئەنوەر سەرۆكی بەشی چاودێری و بازاڕ لەكوالێتی كۆنتڕۆڵ لەبارەی بڕیارەكانی حكومەت سەبارەت بەریفۆرمی هاوردەكردن و فرۆشتنی دەرمان لەبازاڕەكانی كوردستان بە(خەڵك)ی راگەیاند، گرینگترین خاڵ لەم بڕیارە نۆرینگەی لاكۆڵان نامێنێت، چونكە پێشتر زۆركات گوێبیست دەبوین كە فلان یاریدەدەری پزیشك كەسێكی كوشتوە، ئەمەش بەهۆی بەكارهێنانی دەرمان بەهەڵە كە نازانن ئەوە كاری ئەوان نییە، هەروەها یەكێكی تر لەخاڵە گرینگەكان پێویستە پزیشكانی دەرمانساز دەوامی خۆیان بكەن و ناكرێت كەسێك بڕوانامەی دەرمانسازی هەبێت و دەرمانخانەیەك بكاتەوە مانگی جارێك بچێت تەنها بۆ پارە وەرگرتن، ئێستا دەبێت دەرمانساز خۆی لەوێ بێت.

هاوكات عەدنان بورهان جێگری نەقیبی سەندیكای دەرمانسازانی كوردستان بە(خەڵك)ی راگەیاند، ئەو بڕیارانەی حكومەت وەكو ئەنجومەنی سەندیكای دەرمانسازان پاڵپشتی تەواوی دەكەین، چونكە یاساكەی ئێمەش سەرچاوەكەی لەم بڕیارانەوەیە كە یاسای دەستدانە پیشەی دەرمانسازییە، بەشێكی تریش بڕیارەكان بۆ پزیشك و كارمەندانی تەندروستییە، بۆیە ئەگەر ئەو بڕیارانەی دەرچووە بۆ چاكسازی لەدەرمان وەك خۆی جێبەجێ بكرێت بەگوێرەی كات كاریگەری باشی دەبێت بۆ دابین كردنی دەرمانێكی باش و تەندروست بۆ نەخۆش.

جێگری نەقیبی سەندیكای دەرمانسازانی كوردستان بە(خەڵك)ی راگەیاند، كۆمەڵێك خەڵك هەیە، ئەگەر یاسا جێبەجێ بكەی زەرەرمەند دەبن، بەڵام ناكرێت بەرژەوەندی گشتی بۆ بەرژەوەندی چەند كەسێك بەلاوەبنرێت، ئەگەر خەڵكێكی هەڵپەرستیش بیەوێت دەرمانی خراپ بێنێتە بازاڕەوە دەبێت بەتوندترین شێوە سزا بدرێن، چونكە ئەگەر ئەو كەسانە پۆستێكیشیان هەبێت، ئەوا بۆ بەرژەوەندی خۆیان بەكاری دێنن.

لای خۆشیەوە هێژا ئەنوەر سەرۆكی بەشی چاودێری و بازاڕ لەكوالێتی كۆنتڕۆڵ سەبارەت بەجۆری سزاكانیش بۆ ئەو كەسانەی مامەڵەی خراپ دەكەن دەڵێت “پێشتر بەپێی یاسایەكی تر كە ئەویش عێراقی بوو مامەڵە لەگەڵ ئەو كەسانە دەكرا كە یاسای دەستدانە پیشەی دەرمانسازیان هەبوو، بەڵام ئێستا بەپێی یاسای ١١١ی سزادانی عێراقی ساڵی ١٩٦٩ كاردەكرێت، كە بەپێی یاسای پێشتر بابەتەكە دەچوە چوارچێوەی كەتن، بەڵام ئێستا بەپێی یاسای سزادانی عێراقی دەچێتە چوارچێوەی تاوان و سزادانەكان قورس بوون”.

وتیشی “ئێمە لەهەرسێ پارێزگاكەی هەرێم دەستمان كرد بەكاركردن، بەڵام لەسلێمانی كێشەی كەمی ستافمان هەبوو، بەڵام لەهەولێر و دهۆك كاری زیاتر كراوە و سەردانی سەرجەم شوێنەكان دەكرێ لەناوشار و دەرەوەی شار، تاوەكو ئێستاش ٢٢ كەس دراونەتە دادگا كە سێ كەسیان دەرمانسازن”.

هاوڵاتیان لەرێگای مۆبایلەوە دەتوانن زانیاری لەسەر جۆری دەرمانەكان وەرگرن
هێژا ئەنوەر سەبارەت بەزانین و كاتی هاتنی دەرمانەكە بۆ (خەڵك) وتی “ئیستا لە هەوڵی دروست كردنی ئەپڵیكەیشنێكین كە هاوڵاتیان دەتوانن لەرێگای مۆبایلەوە بزانن ئەو دەرمانە كەی دەرچوە و كەی هاتۆتە بازاڕ و سیستەمێكیش دادەنرێت بۆ سەرجەم دەرمانخانەكان بەیەكەوە دەبەسترێنەوە تاوەكو حكومەت بزانێ چ دەرمانێك فرۆشراوە و كۆنترۆڵیش دادەنرێت بۆ دەرمانەكانی كە تەنها دەبێ بەرەچەتەی پزیشك بدرێت وەك ترامادۆڵ و جۆرەكانی تر بۆ ئەمەش رەچەتەی پزیشك بۆ یەكجار بەكاردێت”.

دەبێ ریفۆرم لەتەواوی سێكتەری تەندروستی بكرێت
عەدنان بورهان جێگری نەقیبی سەندیكای دەرمانسازانی كوردستان وتی “ئێمە كێشەی زۆرمان لەبواری تەندروستی هەیە و ئەو بڕیارانەش هەرچەندە لەبواری دەرمانە بەڵام ئەمەش بەشێكە لەكێشەكان و پیویستیشە ریفۆرم و چاكسازی لەسیستەمی تەندروستی و دەزگاكانی بكرێ بەكۆی گشتی، ئینجا دەتوانین خزمەتگوزاریەكی سەردەمیانە بۆ هاوڵاتیان دابین بكەین، چونكە چاكسازی تەنها لەرێگەی دەرمانەوە ناكرێ، هەرچەندە ئەمە دەرگایەكی زۆرباشە بۆ كاركردن و چاكسازی لەسەرجەم كەرتی تەندروستی، بۆیە پشتیوانی دەكەین”.

ئەوەشی خستەڕوو، بەپێی ئەم بڕیارە بڕیارێكی پێشووی ئەنجومەنی وەزیران هەڵوەشایەوە كە مافی دابوو بەغەیری دەرمانساز كە ئەو كارە بكەن، ئێستا دەبێ تەنها كەسی پسپۆڕی دەرمانساز كار لەسەردەرمان بكات، لەماوەی داهاتووش كە شەش مانگ بۆ ساڵێك كاریگەریەكانی دەردەكەوێت.

بۆ پاككردنەوەی بازاڕیش لەدەرمانی قاچاغ و كوالێتی خراپ، عەدنان بوڕهان جێگری نەقیبی سەندیكای دەرمانسازانی كوردستان بە(خەڵك)ی راگەیاند، پەیامی ئێمە بۆ لایەنی پەیوەندیدار ئەوەبوە كە یاسای دەستدانە پیشەی دەرمانسازی و یاسای كۆمپانیاكان و سەندیكا هەیە ئەگەر كار بەیاساكان بكرێت كێشەكان چارەسەر دەبێت، بەتایبەت كە ئێستا دەرمانی تەزویر و قاچاغ چین، دەرمانی تەزویر هیچ سێكتەرێكی تەندروستی جیهانی لەگەڵی نییە و وڵاتانیش بەرنامەیان هەیە بۆ بەرەنگاربونەوەی، بەڵام مەسەلەی دەرمانی قاچاغ شتێكە بەفەرمی نایەتە وڵات بەڵام مانای ئەوە نییە ئەو دەرمانە قاچاغ بێت بەڵكو پێویستی هاوڵاتیانە، تەنها بەهۆكارێكی كوالێتی كۆنتڕۆڵ یان رێوشوێنی وەزارەتی تەندروستی نایەتە هەرێم كە رەنگە لە ١٥ پارێزگاكەی تری عێراق هەبێت و دەبێت چارەسەر بدۆزرێتەوە ئەو دەرمانانەی پێویستن بۆ هاوڵاتیان و بەقاچاغ دەهێنرێت دەبێ بەفەرمی بێتە ئەو وڵاتە، چونكە بەكارهێنانی دەرمانەكە یاساغ نییە، ئەگەر رێنماییەكان پێداچونەوەی پێدا بكرێ دەرمانەكان بەشێوەی فەرمی دێت.

وەزیری تەندروستی، هێنانی دەرمان كۆنتڕۆڵ دەكرێ
ئەمەش لەكاتێكدایە رێكەوت حەمەرەشید وەزیری تەندروستی رایگەیاند، دامەزراوەیەكی نیشیتمانی دادەمەزرێت بۆ هاوردەكردنی دەرمان كە لە٥١%ی پشكەكانی هی حكومەت دەبێت و لە ٤٩%ی بۆ كەرتی تایبەت دەبێت و كۆنترۆڵیی هێنانی دەرمان دەكرێ، مانگانەش كوالێتی كۆنترۆل پشكنین هەزار دەرمان دەكات.

بەردەوام بە لە خوێندنەوە

راپۆرت

سەركردە گەنجەكانی یەكێتی گەڕێكی دیكەی ململانێی پارتییان دەستپێكرد

قوباد تاڵەبانی كوڕی جەلال تاڵەبانی و جێگری سەرۆك وەزیرانی هەرێم، بافڵ تاڵەبانی كوڕی جەلال تاڵەبانی، لاهوری شێخ جەنگی بەرپرسی ئاژانسی پاراستن و زانیاری/ زانیاری

خەڵك- بەشی هەواڵ

بافڵ تاڵەبانی كوڕە گەورەی جەلال تاڵەبانی سكرتێری كۆچكردووی یەكێتی نیشتمانی كوردستان، كە بە ڕای چاودێران بە داڕێژەر و بڕیاردەری سەرەكی سیاسەتەكانی ئێستای یەكێتی نیشتمانی كوردستان بە هاوكاری قوباد تاڵەبانی برای و لاهوری شێخ جەنگی ئامۆزای دادەندرێت، خەریكە یەكێتی بەرەو هێزەكەی سەردەمی زێڕێنی خۆی دەگێڕێتەوە و قۆناغێكی نوێی ململانێی پارتییان دەستپێكرد، ئەمەش خواستێكی زۆرینەی جەماوەری یەكێتی و بگرە جەماوەری بزوتنەوەی گۆڕان و زۆری خەڵكی ناوچەی سەوزیشە، كە پێیانوایە بەهۆی لاوازی حزبەكانی دەڤەری سەوزەوە و ملكەچبوونیان بۆ پارتی ناوچەكە پشتگوێخراوە، بەڵام ئەمە وا بەئاسانی بە لای پارتییەوە قەبوڵ ناكرێت، بۆیە پارتیش خۆی بۆ قۆناغێكی نوێی ململانێ لەگەڵ یەكێتی سازدەكات و ساڵوەگەڕی شازدەی ئۆكتۆبەریش دەكاتە خاڵی دەستپێك.

  یەكێتی دوای هیچ لایەنێك ناكەوێت 
بافڵ تاڵەبانی لە چەند لێدوانێكدا ڕایگەیاندووە، یەكێتی چی دیكە دوای هیچ حزبێكی دیكە ناكەوێت، بەڵكو دەبێت حزبی دیكە دوای یەكێتی بكەون.
ناوبراو ئاماژەی بەوەشكردووە، یەكێتی هەڵساوەتەوە و ئێستا لە هەموو كاتێك بەهێزترە.
بەڕای چاودێران ئەم لێدوانانەی بافڵ تاڵەبانی وەڵامە بۆ ئەو ڕەخنانەی پێشتر لە یەكێتی گیران بەهۆی سازشكردنی زۆر بۆ پارتی و ملدان بۆ سیاسەت و بڕیارەكانی پارتی.

لاهوری شێخ جەنگی بەرپرسی ئاژانسی پاراستن و زانیاری/ زانیاری، بافڵ تاڵەبانی كوڕی جەلال تاڵەبانی

پێش بافڵ تاڵەبانیش لە زاری لاهوری شێخ جەنگی و ئاڕاس شێخ جەنگی برایەوە بەتایبەت لە دوای ڕووداوەكانی شازدەی ئۆكتۆبەری 2017وە لێدوانی هاوشێوە دراون، كە یەكێتی چی دیكە بە دوای كەس و لایەنی دیكە ناكەوێت و خۆی خاوەن بڕیار دەبێت.

 قۆناغێكی نوێ لە سیاسەتی یەكێتی 
ئەم پەیام و گوتارانە سیاسەتێكی نوێ و قۆناغێكی نوێی یەكێتی لێ دەخوێندرێتەوە هاوكات لەگەڵ هاتنەپێشی قوباد تاڵەبانی وەك كەسی یەكەم و نوێنەری یەكێتی لە بانگەشەی هەڵبژاردنەكانی پەرلەمانی كوردستان لە 30ی ئەیلولدا، كە لە گوتارەكانیدا جەختی لە سیاسەتی نوێی یەكێتی و بەرنامەی حزبەكەی بۆ خزمەتكردنی خەڵك دەكردەوە و بەهۆی ئەو لێدوانانەوەش چەند جارێك لەگەڵ بەرپرسانی پارتی بەریەككەوتن و بەرپرسانی پارتی نیگەران كرد.

ئەم سیاسەتە نوێیەی یەكێتی كە لە دوای شازدەی ئۆكتۆبەری 2017 دەستیپێكردووە و بە چونە نێو ململانێیەكی سەخت لەگەڵ پارتی بۆ بردنەوەی پۆستی سەرۆك كۆمار و دواجار بردنەوەی یارییەكە لە پارتی گەیشتە لوتكە و ئێستاش بەرەو بردنەوەی پارێزگاری كەركوك و هەنگاوێكی دیكە بۆ چڕبوونەوەی ململانێكان دەڕوات و ڕەنگە لە پێكهێنانی حكومەتی عێراق و هەرێمدا بۆ حاڵەتی نەخوازراویش پەل بهاوێژێت.

هاوكات بەپێی هەندێك زانیاری ڕۆژنامەنووسی یەكێتی ئەو پرۆژەهاوبەشەی پێشتر لەگەڵ پارتی ئامادەیانكردبوو بۆ بەغدا بەلاوە ناوە و پرۆژەی تایبەتی خۆی هەیە بۆ بەشداریكردن لە حكومەتی نوێی عێراقدا.

 كاردانەوەكانی سیاسەتی نوێی یەكێتی 
كاردانەوەی ئەم سیاسەتە نوێیەی یەكێتی بە ئاشكرا لە سەر گۆڕەپانی سیاسی هەرێمی كوردستان بەدەر كەوتووە، لە نێوخۆی حزبەكە و لە دەرەوەی حزبەكەش.

بەپێی زانیارییەكان ئەندازیاری سەرەكی گێڕانەوە و كاندیدكردنی بەرهەم ساڵح بۆ پۆستی سەرۆك كۆمار بافڵ تاڵەبانی و هاوكارەكانی بوون سەرباری ناڕەزایەتییەكانی هەندێك سەركردەی یەكێتی لەوانە مەلا بەختیار، هێرۆ ئیبراهیم ئەحمەد و شاناز ئیبراهیم ئەحمەد.

تاكو ئێستا دەزگای مێدیایی “كوردسات” كە دەگوترێت لە هێرۆ ئیبراهیم ئەحمەدەوە نزیكە رووماڵی هەواڵەكانی تایبەت بە گەڕانەوەی بەرهەم ساڵح بۆ نێو یەكێتی و بوون بە سەرۆك كۆماری نەكردووە، تەنانەت بێلایەنی هەڵبژارد لەو شەڕە مێدیاییەی پارتی و یەكێتی لەسەر پۆستی سەرۆك كۆمار كردیان و ئێستا رووماڵی هەواڵەكانی سەرۆكایەتی كۆماری عێراق ناكات، ئەمەش نیگەرانی بەشێك لە یەكێتییەكانی لێكەوتەوە و لە تۆڕە كۆمەڵایەتییەكانەوە لەوبارەیەوە بابەتیان نووسی.

بەرهەم ساڵح سەرۆك كۆماری عێراق و بافڵ تاڵەبانی كوڕی جەلال تاڵەبانی

بەپێی زانیارییەكان لەوكاتەشەوە هێرۆ ئیبراهیم ئەحمەد بەشداری كۆبونەوەی مەكتەبی سیاسی یەكێتی نەكردووە و مەلا بەختیاریش ئەو كۆبونەوەیەی بە نیگەرانییەوە بەجێهێشت كە بۆ كاندیدكردنی بەرهەم ساڵح دیاریكرابوو.
لە چەند نوسینێكیشدا شاناز ئیبراهیم ئەحمەد بەرپرسی رێكخستنەكانی دەرەوەی یەكێتی نیگەرانی خۆی لە گەڕانەوەی بەرهەم ساڵح نیشان داوە.
لای خۆشیەوە ماڵپەڕی “چاودێر”ی یەكێتی كە خاوەن ئیمتیاز و سەرنووسەرەكەی مەلا بەختیارە لە ڕاپۆرتێكدا نووسیبووی “بڕیاربەدەستەكانی یەكێتی ئەگەر شەرعیەتی كۆنگرە وەرنەگرن، ئەوا یەكێتی لە حزبێكی سۆشیالدیموكراتەوە دەبێتە حزبێكی بنەماڵەیی و تاكڕۆیی”.
بەپێی چاودێران سەركردە گەنجەكانی یەكێتی بڕیاریان لەدەستی سەركردە كۆنەكانی یەكێتی وەرگرتووەتەوە، هەندێك لە سەركردە كۆنەكانیش پابەندن و قەبوڵیان كردووە، هەندێكیشیان نیگەرانن و پێیان قەبوڵ ناكرێت.

مەلا بەختیار بەرپرسی دەستەی كارگێڕی مەكتەبی سیاسی یەكێتی 

هاوكات مەلا بەختیار لە ساڵوەگەڕی شازدەی ئۆكتۆبەریشدا ڕەخنەی گرتووە و ڕایگەیاندووە كە سەركردایەتی و مەكتەبی سیاسی و كۆسرەت رەسوڵ بەرپرسیارێتی شازدەی ئۆكتۆبەر لە ئەستۆ ناگرن.
مەلا بەختیار بەرپرسی دەستەی كارگێڕی مەكتەبی سیاسی یەكێتی دوێنێ لە چەند لێدوانێكدا جەختی لە قسەكانی ساڵی رابردووی كردەوە كە دوو رۆژ دوای رووداوەكان كردبوونی.
مەلا بەختیار دەڵێت “ئێستاش هەمان ئەو بۆچوونانەی هەیە كە ئەوكات نوسیویەتی لە ساڵی رابردوودا، بەڵام بەرژەوەندپەرست و هەلپەرستەكان بۆچونی خۆیان گۆڕی” وەك ئاماژەكردن بەو كەسانەی لەگەڵ ریفراندۆم بوون و دواتر كشانەوە.
دەشڵێت “بێگومان، ئەم رووداوانە لەخۆڕا رویاننەداوە. هەرلایەك بەپێی سەنگی خۆی ‌و هەموو كاربەدەستێكیش، بەپێی پێگەكەی، پشكی كارەسات‌ و رووداوەكانی بەردەكەوێت‌، ‌و هەرزە ئەقڵەكانی ناو یەكێتی ‌و فەیسبووكبازەكانیش كە هەر خەریكی شێواندنی زهنیەتی خەڵكن، وەكو پێشینان گوتویانە: (دز بازاڕی شێواوی هەیە).ئەمانەش، لەناو هەموو رەوت‌ و جەمسەرەكاندا، زۆر نابەرپرسیارانە، لە رابردوودا بەگشتی ‌و لە دوو مانگی رابردوودا بەتایبەتی، دەستیان هەیە لەم دۆخەی یەكێتی تێیكەوتووە. كە بەداخەوە بەشێك لەئامانجە گڵاوەكانیان هێناوەتەدی”.

 كاردانەوەكانی پارتی 
لە دەرەوەی یەكێتیش پارتی دیموكراتی كوردستان هێرشی توندی لە مێدیا فەڕمی و نافەڕمی و تۆڕە كۆمەڵایەتییەكانەوە بۆ سەر بڕیاربەدەستەكانی ئێستای یەكێتی دەستپێكردووە، بەتایبەت لە ساڵوەگەڕی شازدەی ئۆكتۆبەردا هێرشە مێدیاییەكانی پارتی گەیشتنە لوتكە ئەوان بە “گرووپی خیانەت” ناو دەبەن و تەنانەت داوای دادگاییكردنیشیان دەكەن.
رێبوار كەریم وەلی ڕۆژنامەنووسی پارتی چەند رۆژی ڕابردوو لە لێدوانێكدا نیگەرانییەكانی مەسعود بارزانی سەرۆكی حزبەكەی لەرەوشی ئێستای هەرێم و پەیوەندییەكانی لەگەڵ یەكێتی ئاشكراكرد.

مەسعود بارزانی سەرۆكی پارتی

رێبوار كەریم وەلی ئاشكرایكرد بارزانی گوتویەتی كە ڕێگا نادات بەرهەم ساڵح پێ بنێتە هەوڵێرەوە و لاریشی لە دووئیدارەیی نەبووە.
پێشتریش ئاری هەرسین ئەندامی پەرلەمانی كوردستان لە فراكسیۆنی پارتی لە لێدوانێكدا ئەوەی ڕاگەیاند، لە دروستبوونی دووئیدارەییدا پارتی سودمەند و یەكێتی زیانمەندە.

لەبارەی ڕووداوەكانی شازدەی ئۆكتۆبەرەوە سیروان بارزانی فەرماندەیی سەربازی پارتی دیموكراتی كوردستان بۆ دەنگی ئەمریكا دەڵێت “لەبەردەم دادگا ئامادەم قسەكانی خۆیان بكەمە بەڵگە ئەگەر ئەوان لەسەر ئەم قسانە سكاڵام لەسەر تۆمار بكەن لەو بەڵگە زیاتر چی كە خۆیان بەدەمی خۆیان ددانیان بەخیانەتدا نا لەسەر تەلەفزیۆن، با ئەوان بێن پێچەوانەكەی بسەلمێنن، ئەوانە بەڵگەی خۆیانن، بەڵام دەبێت كەسوكاری شەهیدەكان بچن سكاڵا لەسەر ئەو سەركردانە تۆماربكەن، دەبێت دادگای خەڵك ئەو “خیانەتكارانە” دادگایی بكات، بەبۆچونی من ئەگەر دادپەروەری هەبێت دەبێت دادگای كورد و پێشمەرگە دادگایی ئەوانە بكات، ئیشی من وەك پێشمەرگەیەك بەرگریكردنە لەكوردستان.”
دەشڵێت “هۆكاری (16)ی ئۆكتۆبەر لەپێناو بزنس و چەند تەنكەرە نەوتێك بوو، لەكاتێكدا كەركوك دڵ و قودسی كوردستانە بەڵام ئەوان فرۆشتیان بە چەند تەنكەرە نەوتێك”.
لای خۆیەوە مەسعود بارزانی سەرۆكی پارتی دیموكراتی كوردستان، كە ئەو كات سەرۆكی هەرێم و فەرماندەی گشتی هێزە چەكدارەكان بوو، لە بەیاننامەیەكاندا ڕایگەیاند “ئێمە پێشبینیی هەموو ئەگەرێكمان كردبوو، بەڵام هەرگیز چاوەڕوانی ئەوە نەبووین دەستێكی ناوخۆیی بەمشێوەیە خەنجەر لە پشتی گەلی كوردستان بدات”.

 یەكێتی لەسەر شازدەی ئۆكتۆبەر وەڵامی هەیە 
لەبەرامبەردا یەكێتی نیشتمانی كوردستانیش لە ڕێگای مێدیا فەڕمی و نافەڕمییەكانیەوە وەڵامی تۆمەتەكانی پارتی دیموكراتی كوردستان دەداتەوە و پێیوایە كە رووداوەكانی شازدەی ئۆكتۆبەر دەرئەنجامی ریفراندۆمی سەربەخۆیی 25ەی ئەیلولی 2017 بووە.
بەرپرسان و مێدیاكانی یەكێتی نیشتمانی كوردستان ئاماژە بەوە دەكەن، لە پێناو پاراستنی خەڵكی كەركوك و شارەكە و دورخستنەوەی لە وێران بوونی پاشەكشەیان كردووە، چونكە هێزەكانیان لەگەڵ هێزەكانی عێراق نابەرابەر بوون، نەیانویستووە كەركوك وەك موسڵی لێ بێت.
مەڵبەندی دووی كەركوكی یەكێتی نیشتمانی كوردستان لە بەیاننامەیەكدا ڕایگەیاند “هەموو خەڵكی كوردستان ئەو راستییە باش دەزانن كە ڕووداوی ١٦ی ئۆكتۆبەر لە دەرەنجامی سیاسەتی هەڵە و غروری سەركردایەتی پارتییەوە بوو، بەهۆی گوێنەدانیان بەهەڕەشە و ئامۆژگارییەكانی كۆمەڵگای نێودەوڵەتی ‌و حیساب نەكردن بۆ دۆستانی گەلەكەمان، سەرەنجام مافی چارەنوسی گەلی كوردیان كردە قوربانی.”
مەڵبەندی دووی یەكێتی لە ڕاگەیەنراوەكەدا بەرامبەر بە بارزانی دەڵێت: “لێرەوە بە پارتی ‌و بارزانی دەڵێین، ئێوە دواین كەسن دەبێت‌ باسی خیانەت بكەن. چونكە خیانەت سەرتاپای مێژووی ئێوەی داپۆشیوە.”

بەردەوام بە لە خوێندنەوە
حکومەتی داهاتووی هەرێمی کوردستان دەتوانێت خزمەتی هاوڵاتیان بکات؟

کوردستان

دوایین