ئێمە لە تۆرە کۆمەڵایەتیەکان

راپۆرت

لەدوای دەستگرتنی داعش بەسەر شارەكەدا
ڕۆژنامەیەك ژمارەی بێوەژنەكانی موسڵ ئاشكرا دەكات

خەڵك- بەشی هەواڵ
رۆژنامەی (شەرقولئەوسەت) ژمارەی ئەو ژنانە ئاشكرا دەكات كە لە پاش دەستگرتنی داعش بەسەر شاری موسڵ و لەماوەی 38 مانگدا بێوەژن كەوتن، هەندێكیشیان بە بۆمبێكی تەوقیتكراو لەقەڵەم دەدات كە بە پێی رۆژنامەكە لە هەر ساتێكدا بێت دەتەقنەوە.

رۆژنامەی (شەرقولئەوسەت) لە ڕاپۆرتێكیدا، كە پشت بە زانیاریی نیمچە فەرمی و سەرچاوە موسڵییەكان دەبەستێت، نوسیویەتی، “كۆی گشتی ئەو ژنانەی بێوەژنكەوتن لەپاش كۆنتڕۆڵكردنی شاری موسڵ لەلایەن داعشەوە لە مانگی حوزەیرانی 2014 تا مانگی تەمموزی 2017 كە ڕێكخراوە لە شارەكە دەركرا، زیاترە لە 20 هەزار ژن و نزیكەی 4 هەزار ژن لەوانە پەیوەندی دیاریكراویان بە داعشەوە هەیە، جا لەڕێی كاریی ڕاستەوخۆوە بێت، یان لەڕێی خزمایەتی لەگەڵ ئەندامانی داعش”.

وەك ڕۆژنامەكە باسی دەكات، “4 هەزار بێوەژن، وەك بۆمبێكی تەوقیتكراون و شیاوی تەقینەوەن لە هەر ساتێكدا، ئەگەر لەلایەن دەسەڵاتدارانەوە چارەسەر نەكرێن”.

(شەرقولئەوسەت) لە زاری سەكینە محەمەد عەلی، بەرپرسی ژنان و منداڵان لە دیوانی پارێزگای موسڵ بڵاویكردۆتەوە، “یەكەم وۆرك شۆپی بۆ گفتوگۆكردن لەگەڵ ئەو ژنانە ڕێكخستووە، كە پەیوەندییان بە داعشەوە هەیە، تا یارمەتییان بدات قوتارببن لە بیری توندڕەوی”.

سەكینە مەترسییەكانی خۆی ناشارێتەوە سەبارەت بە مامەڵەكردن لەگەڵ ئەو بابەتانە لەگەڵ ژنانی سەر بە داعش، بە تایبەتیش دوای تەوژمێكی تیرۆر، كە ژنە چالاكوانانی بەغدا و بەسرەی لەم چەند هەفتەیەی دواییدا گرتەوە، بەڵام پێیوایە، ئەو لەم كاتەدا كارێكی گرنگ و ڕاستەقینە دەكات بۆ چارەسەركردنی ڕەوشەكە و بۆ ڕێگرتن لە گەڕانەوەی تیرۆر بۆ موسڵ، چونكە بە وتەی ئەو”زۆربەی ئەو ژنانەی مامەڵەی لەگەڵ كردوون، توڕەن لە حكومەت و تائێستاش سەردەمی دەسەڵاتی داعشیان بەلاوە باشترە وەك لەئێستا”.

سەكینە دەڵێت: “قسەكردن لەسەر داعش و سەرسامبوون بە ڕێكخراوەكە، لە ئەڵقەیەكی بەرتەسكدایە لە موسڵ، ئەمەش بەهۆی نەبوونی هۆشیاریی و بێ‌ متمانەیی نێوان موسڵییەكان و حكومەتەوە دروستبووە”.

سەبارەت بەو ژنانەی سودییان لە وۆرك شۆپەكەی بینیوە، سەكینە محەمەد عەلی ڕایگەیاندووە، “ئەو ژنانە بەشێوەیەك لە شێوەكان پەیوەندییان لەگەڵ داعش هەبووە، هاوسەر بوون یان خزم یان تەنانەت هەماهەنگی ڕێكخراوەكەیان كردووە، بەڵام ئەوە ڕەتدەكەنەوە و تەمەنیشیان لەنێوان 2 بەرەو سەرن و زۆربەیان بێوەژنن”.

ئەندامەكەی پارێزگای موسڵ دەڵێت” ئەو پەیوەندی بەو ژنانەوە كردووە لەڕێی تۆڕەكانی پەیوەندی و سەرچاوەكانی كە بەشێوەیەكی قورس دەستبەری كردووە، چونكە ئەوان ترسییان هەیە دەستگیربكرێن، بەڵام بە متمانەوە مامەڵەیان لەگەڵ دەكەن و هەوڵ دەدەن بەپێی توانا یارمەتییان بدەن، ئەو ژنانە نەناسراون، چونكە لە بنەڕەتدا روخساریی خۆیان بە پەچە داپۆشیوە”.

سەبارەت بە سروشتی پەیوەندی نێوان ئەو ژنە داعشیانە، سەكینە محەمەد عەلی دەڵێت”تێیاندایە بە تەواوەتی پەیوەندی بە داعشەوە هەبووە، بەڵام رەتیدەكاتەوە، هەیانە هاوسەرگیری لەگەڵ ئەندامانی داعش كردووە و مێردەكەی كوژراوە، هەندێكیشیان لە بواری حسبە یان بۆ ماوەیەكی كەم لە چوارچێوەی مەفرە شەرعییەكان كاریی كردووە كە رێكخراوە لە دژی ئەو ژنانەی جلوبەرگەكانیان لەگەڵ تیۆری رێكخراوە تیرۆریستەكەدا یەكانگیر نەبووە، بەكاریی هێناون”.

راپۆرت

كوشتنی خاشقچی، خەونی بن سەلمان بۆ بوون پادشا لەبار دەبات

خەڵك-سەعد مەلا عەبدوڵڵا گوڵپی

كەیسی كوشتنی گوماناوی جەمال خاشقچی جگە لە دروستبوونی ئاڵۆزی و گومانەكان لە جیهاندا، خاڵێكی تری بەدوای خۆیدا هێناوە ئەویش هێزی بن سەلمان چیتر بێ سنوور نییە، هەرچەندە ناوبراو تەواوی هێز و توانای خۆی خستەگەڕ بۆ ئەوەی لە وونبونی ئەو رۆژنامەنوسەدا ناوی نەهێنرێت، بەڵام بەپێی زانیارییەكان ناوبراو لەم هەوڵەیدا سەركەوتوو نەبووە.
ئاژانسی رۆیتەرز بڵاویكردەوە، محەمەد بن سەلمان رۆژی پێنج شەممەی رابردوو شازادە خالید فەیسەڵ پارێزگاری مەككە دەنێریت بۆ توركیا تاكو پێَشگیری لە هەر رووداوێك بكات كە لە دوای مەرگی خاشقچی لە توركیا روودەدات، خالد فەیسەڵ لەكاتی گەشتەكەی و كۆبونەوەكانی لەگەڵ بەپرسانی توركیا بە رێكەوتنە هاوبەشەكان دەستی پێكرد، لەناویشیاندا دروستكردنی گروپێكی تایبەتی سیخوڕ، یاخود دروستكردنی گروپێكی تایبەتی سعودیە بۆ بەدواداچوون بۆ ئەو كەیسە.


بەڵام یەكێك لە خانەدانەكانی پادشای سعودیە كە نەیویستووە ناوی ئاشكرا بكرێت، بە ئاژانسی رۆیتەرزی راگەیاندووە، محەمەد بن سەلمان لەگەڵ دیارنەمانی جەمال خاشقچی ویستی ئەوە نیشانی خانەوادەی ئال سعود بدات كە خۆی سەرپەرشتی ئەم كارە دەكات، بەڵام گۆڕانكارییەكان بەشێوەیەك هاتنە پێشەوە كە ئەم خانەوادەیە كەوتونەتە نێو گێژاو و كێشەیەكەوە كە لە مێژوویاندا تووشی نەبوون.
یەكێك لە نیشانەكانی ئەو بابەتە یەك نەگرتنەوەو رارایی ئەندامانی خێزانی ئال سعودیەیە لەسەر دیارنەمانی خاشقچی.
لەلایەكیترەوە هەرچەندە محەمەد بن سەلمان هەوڵ ئەوەیدا كە لە دیار نەمانی خاشقچی خۆی دوورەپەرێز بگرێت، بەڵام هەڵماڵینی میدیاكانی عەرەب لە سەرتاسەری جیهان و بەتایبەت كەناڵی قەتەری (الجزیرە) روخسەتی ئەوەی نەدا لە نێو ئەم كێشانەدا ناوی بن سەلمان بە داپۆشراوی بهێڵێتەوە، بەو بۆنەوە پادشای سعودیە داوای لە محەمەد بن سەلمان كردووە وەڵامی مەرگی خاشقچی بە جیهان بداتەوە.


كەیسی مەرگی خاشقچی بەشێوەیەك بووە كە هەوڵەكانی چاكسازی شازادە 33 ساڵەكەی سعودیە لە وڵاتەكەی بەوە لەباربردن و لاوازی هەنگاو بنێت، زۆر كاریگەری خراپی لەسەر دەسەڵاتەكانیكردووە، لەلایەكیتریشەوە ونكردنی خاشقچی لە توركیا مەشروعیەتی بوون بە پاشایەتی بن سەلمانی كەمتر كردوەتەوە.
یەكێكیتر لە كێشەكانی بن سەلمان ئەوەیە ئەمریكا راستەوخۆ قسە لەسەر دیارنەمانی خاشقچی دەكات.
حكومەتی ترامپ هەرچەندە لە سەرەتاوە هەوڵی دا دەسەڵات و پێگەی دەسەڵاتدارانی سعودیە لەم روداوەدا كەم نەكاتەوە، بەڵام فشارەكانی سیناتۆرە كۆمارییەكان و میدیاكانی ئەمریكا و هاوكاری نەكردنی حكومەتی ئەردۆغان وایكرد محەمەد سەلمان لەژێر كاریگەری و فشارەكانی ئەمریكا رۆیشتە نێو رووداوی كوشتنی خاشقچییەوە.
سیناتۆر لیندسی گراهام رۆژی پێنجشەمەی رابردوو مەرگی خاشقچی خستە ئۆباڵی دەسەڵاتدارانی سعودییەوە.
بەهۆی ئەو رووداوەوە زۆرێك لە بازرگانەكان و وەزیرەكانی ئەوروپا و ئەمریكا گەشتەكەی خۆیان بۆ كۆبوونەوەی بەناوبانگی (داووس لە بیایان) لە سعودیە هەڵوەشاندەوە.
ئیمانوئێل ماكرون سەرۆك كۆماری فەڕەنسا سەبارەت بە هەڵوشاندەوەی گەشتەكانی بۆ سعودیە رایگەیاند، دەبێت بەزووترین كات رووداوەكانی كوشتنی خاشقچی روون ببێتەوە، لای خۆشیانەوە رێكخراوەكانی مافی مرۆڤ لەنێویشیاندا رێكخراوی لێبورنی نێودەوڵەتی داوایكرد هەرچی زووە لێكۆڵینەوەیەكی سەربەخۆیانە لە كوشتنی خاشقچی بكرێت.
دیارنەمانی جەمال خاشقچی رۆژنامەنووسی دیاری سعودیە لە كونسوڵخانەی سعودیە لە توركیا یەكێكە لەو رووداوانەی لە پێشینەی خانەوادەی پادشای سعودییە بوونی نەبووە كە ئێستا شازادەی ئەو وڵاتە رووبەرووی بووەتەوە، لە رۆژەكانی ئایندەدا ئەوە دەردەكەوێت كە تا چ ئاستێك ئەم رووداوە هێز و دەسەڵاتەكانی بن سەلمان و تەنانەت خانەوادەكەشی بەرەو لاوازی و ئاڵۆزی دەبات.

ئەمەش لەكاتێكدایە سعود بن عەبدوڵڵا موعجب داواكاریی گشتی سعودیە رایگەیاند، لێكۆڵینەوە سەرەتاییەكان لە دۆسێی دیارنەمانی جەمال خاشەقچی، مردنی ئەو پیاوە دەردەخەن و تاكو ئێستاش 18 كەس بەو هۆیەوە دەستگیركراوە.

داواكاریی گشتی سعودیە لە بەیاننامەیەكدا كە لەلایەن ئاژانسی فەرمی (واس)ی سعودیەوە بڵاوكرایەوە ئاماژە بۆ ئەوە دەكات، ئەو لێكۆڵینەوە سەرەتاییانەی لەلایەن داواكاریی گشتییەوە ئەنجامدران لەبارەی دیارنەمانی هاوڵاتی جەمال بن ئەحمەد خاشەقچی، دەریدەخەن ناوبراو لەگەڵ ژمارەیەك كەسدا لەنێو كونسوڵخانەی سعودیە لە ئیستەنبوڵ شەڕ و دەمەقاڵەی بووەو بەو هۆیەشەوە كوژراوە.

لای خۆشییەوە دۆناڵد ترەمپ سەرۆكی ئەمریكا لە یەكەم هەڵوێستیدا رایگەیاند، رونكردنەوەكەی سعودیە لەبارەی گیانلەدەستدانی جەمال خاشەقچی رۆژنامەنوسەوە “شیاوی متمانەیە”.

هەر لەو بارەیەوە ترەمپ ئاماژەی بە كاركرردنی مەبدەئی كرد لەسەر ئەو كەیسە لەگەڵ كۆنگرێس و هیوای خواست هیچ سزایەك نەبێتە مایەی گرێبەستەكانی چەك لەگەڵ شانشینی عەرەبی سعودیە.

سەرۆكی ئەمریكا، ئەو راگەیاندنەی سعودیە بە “هەنگاوێكی سەرەتایی باش” سەبارەت بە كێشەكە لەقەڵەمدا.

سەبارەت بە نەهێشتنی دەسەڵاتەكانی بن سەلمان و دوورخستنەوەی لە پۆستەكەی، میدیایەكی ڕۆژئاوا باس لە ناكۆكی نێوان سەرۆك كۆمار و وەزیری دەرەوەی ئەمریكا دەكەن‌و بەپێی زانیارییەكانیش ڕەوشی ناوخۆی دیوانی پاشایەتی ئاڵۆزە.
ماڵپەڕی “میدل ئیست ئای” لە زاری سەرچاوەیەكەوە ئاشكرایكردووە، دوناڵد ترەمپ هەوڵی مانەوەی بن سەلمان لە پۆستی جێنشینی سعودیە دەدات لە كاتێكدا، مایك پۆمپیۆ وەزیری دەرەوەی ئەمریكا بەوی ڕاگەیاندووە، بن سەلمان لە دۆخێكی دژواردایەو داوای گۆڕینی بن سەلمانی كردووە.
بە وتەی میدل ئیست ئای، حكومەتی ئەمریكا بەم هۆیەوە پۆمپیۆی ناردە سعودیە لە هەر ئاڵوگۆڕێكی دەسەڵاتی ئەم وڵاتە ڕۆڵی واشنتن پارێزراو بێت.

خاشەقچی، سەرنوسەری رۆژنامەی (وەتەن)ی سعودیە بووە و وەك راوێژكاری میر توركی بن فەیسەڵ باڵێوزی پێشووی سعودیە لە واشنتۆن كاری كردووە، بەڵام لەپاش دیاریكردنی میر محەمەد بن سەلمان بە جێنشینی شاهانە، سعودیەی جێهێشت.

بەردەوام بە لە خوێندنەوە

ئابوری

دابەزینی بەهای تمەن بازاڕی فەرشی ئێرانی گەرمكردۆتەوە

 

خەڵك-یەحیا حەبیب

دابەزینی بەهای تمەن بە بەرامبەر بە دۆلار بازاڕی فەرشی ئێرانی لە كوردستان و عێڕاقدا بوژاندووەتەوە و هاوڵاتیانیش خواستیان لەسەر ئەو فەرشانە دروست بووە كە ئێران بۆ پێشانگا نێودەوڵەتییەكان دەیبات و نمایشی دەكات.

ئێران خاوەنی دەیان كۆمپانیای دروستكەری فەرشە و ئەمەش وایكردووە كە خواستێكی زۆر لە سەر فەرشەكانی دروست ببێت لە دەرەوەی وڵات، چونكە كاری جیاواز لە فەرشەكاندا ئەنجام دەدەن و كوالێتیەكی باشیان هەیە، بەڵام دابەزینی بەهای تمەنی وڵاتەكە وای كرد ئەو فەرشانەی كە نرخەكانیان بەرز‌ بوو بۆ دوو هێندە و سێ هێندە دابەزێت و ئێستاش بەو هۆیەوە بازاڕی فەرشی ئێرانی لە شار و شارۆچكەكانی هەرێم و عێراقیش گەرمببێت.

محەمەد عەزیز، خاوەنی یەكێكە لە پێشانگاكانی فەرش بە (خەڵك)ی ڕاگەیاند، “فەرشی ئێرانی لە جیهاندا بە ناوبانگە و بە تایبەت جۆرەكانی وەك فەرشی (كاشان و هەزار و دوسەد شانە) و چەندین جۆریتری هەیە ئەمەش وای كردوە هاوڵاتیانی خۆمان لە ناوچەكانی عێڕاق و هەرێمی كوردستان بە تایبەتی خواستێكی زۆریان لەسەر جۆرەكانی فەرشی ئێرانی هەیە “.

وتیشی”بەڵام بەهۆی بەرزی نرخی تمەن نەیان دەتوانی بیكڕن بە جۆرێك پێش دابەزینی تمەن فەرشی (700 شانە) جوتەكەی زیاتر لە ملیۆنێك دیناری عێڕاقی بووە بەجۆرێك دوو فەرشی 3 مەتر بە درێژی چوار مەتر (800 دۆلار بۆ 900 دۆلار)ی ئەمریكی دەكەوت “.

ئاماژەی بەوەشكرد، “لە ئێستادا دابەزینی نرخی تمەن بەرامبەر بە دۆلار و دیناری عێڕاقیش بە هەمان شێوە ئەمەش كاریگەری زۆری كردە سەر بازاڕی فەرشی ئێرانی و هاوڵاتیانیش ئێستا بە بەردەوامی فەرشی نێو ماڵەكانیان نوێ دەكەنەوە، چونكە ئەو فەرشانە نرخەكانیان دابەزیوە و پشتر بە هۆی ئەوەی كە نرخیان بەرز بوو بە ئاسانی هاوڵاتیان نەیان دەتوانی بیكڕن، بەڵام دابەزینی بەهای تمەن وای كردووە هاوڵاتیەكی باش سەردانی ئەو شوێنانە بكەن كە فەرشی ئێرانی دەهێنن و ڕۆژانە چەندین خێزان دێن سەیری جۆرەكانی فەرش دەكەن و دەیكڕن بۆ ماڵەكانیان و دابەزینیشی بە هەل دەزانن، چونكە پێشتر نە دەتوانرا بیكڕن “.

خاوەنی ئەو پێشانگایەی فەرش ئاشكراشی كرد”لە ڕابردوودا پێش ئەوەی بەهای تمەن زۆر دابەزێت ئامێرە كارەباییەكانی وەك (سەلاجە و موبەریدە ئامێرەكانی تر )ی كارەبایی دەنێردرایە ئێران و ساغ دەبویەوە، بەڵام ئێستا بازرگانانی ئێران لە هاوردەكردنی ئامێرە كارەبایەكان خۆیان دوردەخەنەوە، چونكە ئەگەر لە ڕابردوودا سەلاجەیەك بە 300$ دۆلار بكڕایە ئەوا ئێستا بە 1200$ هەزار و دوو سەد دۆلارە و هاوڵاتیانی ئێرانیش ئەمەیان پێ ناكڕێت و هەر بۆیە بازرگانان نایبەن بۆ ئەو وڵاتە “.

وتیشی”ساڵی 2015 ئەو قەیرانەی كە ڕوی لە هەرێمی كوردستان كرد تارادەیەكی زۆر هاوڵاتیان وازیان لە كڕینی فەرش و نوێكردنەوەی ناو ماڵ هێناوە، لە ماوەی قەیرانەكەشدا خواست لەسەر ئەو فەرشانە هەبوون كە بە مەتر دەفرۆشران و نرخەكەیان زۆر بەرز نەبوو وەك لە نرخی فەرشی ئێرانی “.

ئاماژەی بەوەشكرد، “ئێران لە ڕوی جۆرەكانی فەرشەوە بەناوبانگە و چەندین جۆری فەرشی هەیە كە بەشێكی پێش دابەزینی نرخی تمەن هاوڵاتی هەرێم باسی جۆرە بەرز نرخەكانی نەدەكرد، بەڵام دابەزینی بەهای تمەن خواستیشی لەسەر فەرشە گران بەهاكانی ئێرانی دروست كردووە بە تایبەت ئەوانەی كە لە پێشانگا نێودەوڵەتیەكان نمایش دەكرێت “.

بەردەوام بە لە خوێندنەوە

جیهان

بەوێنە‌و ڤیدیۆ..ئەو خواردنەی زیاد لە سەدەیەكە، رۆژانە لە ئەنجومەنی پیرانی ئەمریكا لێدەنرێت

خەڵك-سەعد مەلا عەبدوڵڵا گوڵپی

زیاتر لە سەدەیەكە، رۆژانە جۆرێك لە سوپ لە ریستۆرانتی ئەنجومەنی پیرانی ئەمریكا دروست دەكرێت و بەناوی سوپی پیرانی ئەمریكی ناوبانگی دەركردووە.
تۆڕی (BBC) بڵاویكردەوە، پێشینەی ئەم سوپە دەگەڕێتەوە بۆ سەرەتاكانی سەدەی بیستەم، ماڵپەڕی ئەنجومەنی پیرانی ئەمریكی بۆچونی جیاواز لەو بارەوە ئاشكرا دەكات و دەڵێت، ناتوانرێت دڵنیایی لەبارەی كام لەو بۆچوونانەوە یەكلایی بكرێتەوە.


یەكێك لەو بۆچونانەی باس لەو سوپە دەكات دەڵێت، ئەو سوپە لە ساڵی 1900 لەسەر خواستی كەسێك بەناوی (دوبوا سیناتۆری ویلایەتی ئایداهو) دەستی پێكردووە، بۆچونێكیتر هەیە دەڵێت، نیوت نلسون سیناتۆری ویلایەتی مینیسۆتا بووە كە ئەم جۆرە سوپەی لە ناوچەكە گونجاندووە و دەگەڕێتەوە بۆ ساڵی 1903.
بۆچونێكیتر ئەوەیە دەڵێت، لە ساڵی 1904 جو كانن سەرۆكی ئەنجومەنی پیرانی ئەمریكا دوای تێگەشتنی لەوەی هیچ جۆرە خواردنێك لە ریستورانتی ئەنجومەنەكە بە دڵی ئەو نییە، فەرمانی كرد بەوەی بەبێ رەچاوكردنی كەش و هەوا ئەم جۆرە سوپە لێبنرێت، لەكاتێكدا ئەم جۆرە خواردنە زیاتر لە وەرزی زستاندا دەخورێت، بەڵام ئەوە بەدیار نەكەوتووە ئایا ئەم فەرمانە بۆ خراپی خواردنی چێشتلێنەرەكان بووە، یاخود بۆ دڵنیایی لەوەی ئەو خۆراكە دەبێت بە بەردەامی بوونی هەبێت.

ئەو سوپەی تا ئێستا دروست دەكرێت لە فاسۆلیا و گۆشتی بەراز و پیاز و كەرە و خوێ و بیبەر.

بۆ چۆنێتی دروستكردنی سوپەكە كلیك بكە بۆ بینینی ڤیدیۆكە.

ئەو سوپە ئەگەر بەشێوەیەكی سوننەتیتر دروست بكرێت پێویستی بە فاسۆلیا، گۆشتی بەراز بە ئێسقانەوە، پەتاتە، پیاز، كەرەوز و سیر.
لە تۆمارێكی ڤیدیۆییدا و لە دروستكردنی سوپەكەدا گۆشتی بەرازەكەی تێدا سڕدراوەتەوە، بەڵام لە دەیەی هەشتاكانی سەدەی رابردوو بۆ جارێكیتر گۆشتی بەرازەكە گێڕدراوەتەوە بۆ نێو سوپەكە.

فەرمانی لێنانی سوپ

فەرمانی لێنانی سوپ

بەشێك پێیان وایە سوپەكە فكرەی ویلایەتەكانی باشووری ئەمریكایە، چونكە بە هەرشێوەیەك بێت چێشتلێنەرە رەشتپێستەكانی باشووری ئەمریكا دروستیان كردووە و ئەوان سوپەكەیان بە سەلیقەیەكی زۆر جوان دروست كردووە.
دەوترێت، تەنها یەك جار لەكاتی جەنگی جیهانی دووەم و بەهۆی نەبوونی و كەمی خۆراك، یەك رۆژ ریستورانتی سەنای ئەمریكا فاسۆلیای لێنەبووە و بەو هۆیەوە لەو رۆژەدا ئەم جۆرە چێشتە لێنەنراوە، بەڵام لەو رۆژە بەدواوە رۆژانە ئەم سوپە لێنراوە بڕیاریش نییە هیچ رۆژێك بەبێ لێنانی ئەم سوپە لە ئەنجومەنی سەنا تێپەڕ ببێت.


لە ساڵی 2010ەوە، هاووڵاتیانیش دەتوانن لە كاتژمێرێكی دیاریكراو لە ریستورانتی سەنا ئەو سوپە تاقیبكەنەوە، هەڵبەتە بۆ ئەو مەبەستە دەبێت بانگهێشتی یەكێك لە سیناتۆرەكانت پێبێت و هاوشێوەی سیناتۆرەكان جل و بەرگ بپۆشیت، هەروەها ئەم سوپەش لە كۆنگرەی ئەمریكا بۆ تەواوی ئامادەبوان ساز دەكرێت.


مادەی سەرەكی ئەم سوپە فاسۆلیایەكە كە بە فاسۆڵیای دەریایی ناسراوە، چونكە پێكهاتەیەكی باشی تێدایە و نرخەكەشی هەرزانە و بۆ كاتێكی دوورو درێژیش دەتوانرێت هەڵگیرێت، ئەمەش وایكردووە لە سەدەی نۆزدەدا لەلایەن هێزە دەریاییەكانی ئەمریكا هەڵبگیرێت.
هێزە دەریاییەكانی ئەمریكاش فاسۆلیایەكی سپی تایبەتیان هەیە كە هاوشێوەی سوپەكەی ئەنجومەنی پیرانی ئەمریكایە، بەڵام لەبری كەرەوز، گێزەر و ئاردی گەنم یان خودی گەنمەكە تێدا بەكاردەهێنرێت.

بەردەوام بە لە خوێندنەوە
حکومەتی داهاتووی هەرێمی کوردستان دەتوانێت خزمەتی هاوڵاتیان بکات؟

کوردستان

دوایین