ئێمە لە تۆرە کۆمەڵایەتیەکان
ریکلام

راپۆرت

یەكێتی هەڵمەتێكی راگەیاندن لە دژی گۆڕان و بەرهەم ساڵح دەستپێدەكات

خەڵك – بەشی هەواڵ

میدیای فەڕمی یەكێتی نیشتمانی كوردستان هەڵمەتێكی چڕوپڕی راگەیاندن بۆ سەر بزوتنەوەی گۆڕان و هاوپەیمانی بۆ دیموكراسی و دادپەروەری بەتایبەت سەرۆكەكەی دەستپێدەكات.

شەوی رابردوو كەناڵی گەلی كوردستان زمانحاڵی فەڕمی یەكێتی لە چەندین هەواڵ و راپۆرت و بەرنامەدا هێرشی توندی كردە سەر گۆڕان و بەرهەم ساڵح و بە “خیانەتكار” و “جاش” و دەستتێكەڵكردن لەگەڵ نەیارانی كورد” تۆمەتباری كردن.

كەناڵەكە لێدوانێكی ئیبراهیم سومەیدەعی سەركردەی دیاری سونەكانی عێراقی لەبارەی بەرهەم ساڵح بڵاوكردەوە كە رایگەیاندووە “لەو باوەڕەدا نەبووم رۆژێك بێتە پێش جێگرەكەی مام جەلال لە دەرگامان بدات و بڵێت لە كەركوك فێڵتان لێكراوە و یەكێتی تەزویری كردووە. من بۆ خۆم گومانم هەبوو تا ئەو كاتەی بەرهەم ساڵح-م بینی كە ئەو قسەی لەسەر زۆری كورسییەكانی كورد كرد لە كەركوك، لەكاتێكدا كورد بەم ئەنجامەش (٢) كورسی كەمكردووە بەراورد بە هەڵبژاردنی پێشووتر”.

بەپێی كەناڵەكەی یەكێتی، ئەو سەركردەی سوننە گوتوشیەتی “كورد لە پارێزگای كەركوك (٨) كورسی هەبوو بەڵام لەم هەڵبژاردنەدا (٦) كورسی بەدەست هێناوە، كاتێك كە دەبینم بەرهەم ساڵح لە توركمان و عەرەب زیاتر پەرۆشە بۆ كەمكردنەوەی كورسییەكانی یەكێتی ئەمە مێژوویەكی نوێیە و دەبێت بنوسرێتەوە. گومان لەوەدا نییە كە كورسییەكان كەمبكرێتەوە لەبەرژەوەندی عەرەب و توركماندایە، بەڵام سەركردەیەكی كورد بەو شێوە پەرۆشبێت ئەمە مایەی خەڵات و رێزگرتنێكی گەورەیە”.

كەناڵی گەلی كوردستان بە پشت بەستن بە چەند كۆمێنێتی فەیسبووك وەڵامی بەرهەم ساڵحی داوەتەوە “لەتۆڕەكۆمەڵایەتییەكان بڵاوبوونەوەی هەواڵەكە نیگەرانی زۆری لێكەوتەوە بە جۆرێك لەكاردانەوەكاندا نوسراوە ، كە بەرهەم ساڵح لەسەر ئەنجامەكانی پارێزگای سلێمانی هەرچی بكردایە جگە لە نیگەرانی یەكێتیی نیشتمانیی كوردستان هیچ كوردێك رووبەڕوی رەخنەی نەدەكردەوە . لە بەشیێكی تری نیگەرانییەكانیشدا نوسراوە، لەدەرگای عەرەب و توركمانەكان بدات و بڵێت كورد كەمینەیە لە پارێزگای كەركوك و پشتیوانتان دەبین بۆ كەمكردنەوەی دەنگەكانی یەكێتی ، ئەم رەفتارە لە قوتابی مام جەلال ناوەشێتەوە”.

كەناڵە ئاماژەی بەوەشكردووە “ژمارەیەكی زۆری لایەنگری یەكێتی و پارتیش نوسیویانە ئەگەر بەرهەم ساڵح لەسەر ئەم بابەتەی رونكردنەوە نەدات و خۆشحاڵبێت بەوەرگرتنی خەڵات لەسەر كەمكردنەوەی دەنگی كورد لە پارێزگای كەركوك، ئەوە پێویستە لە كوردستان بەرد باران بكرێت. لە نوسینێكی توندیشدا، نوسراوە بەردەم فرۆكەخانەكانی لێبگرن و رێگەنەدەن قاچی گڵاوی خاكی پیرۆزمان پیس بكات”.

لەبەرامبەردا كەناڵی خەندان-ی زمانحاڵی فەڕمی هاوپەیمانی بۆ دیموكراسی و دادپەوەری پەیامێكی ئەو سەركردە سونەی بڵاوكردووەتەوە كە تێیدا ئەو لێدوانە رەتدەكاتەوە كە لە میدیاكانی یەكێتییەوە بڵاوكراوەتەوە.

بەپێی كەناڵی خەندان، ئیبراهیم سومەیدەعی سەركردەی دیاری سونەكانی عێراق گوتویەتی “ئەو دەنگۆ و پروپاگەندانە رەتدەكەمەوە، كە بە ناوی منەوە لە ئاژانسە هەواڵییەكان و تۆرەكۆمەڵایەتییەكان بەشێوەیەكی بەربڵاو بڵاوكراونەتەوە، جەخت لەوە دەكەمەوە كە من بە هیچ جۆرێك بەرامبەر هیچ لایەنێك بەو جۆرە لێدوان نادەم، بەڵام هەندێك لایەنی سیاسی كە خوویان بە ساختەكارییەوە گرتووە، لە كاتی وەرگێڕانی هەواڵەكەدا، بەشێكی قسەكانی منیان بڕیوە لە دیدارەكەم لەگەل كەناڵی شەرقییە لە بەرنامەی (بالحرف الواحد) لە ئێوارەی ٦/٦/٢٠١٨، بۆ بەرژەوەندی تەسكی خۆیان لە سەر حسابی راستییەكان”.

راشیگەیاندووە “هەموو ئەو قسانەی كە دەربارەی د. بەرهەم كردوومە، سەبارەت بە ئەو داوایانە بووە كە هاوپەیمانی دیموكراسی و دادپەروەری كە بەرهەم ساڵح سەرۆكایەتی دەكات پێشكەشی كردووە، كە بەڵگەی بەرجەستە دەخاتەڕوو كە یاری بە دەنگی ٢٥٠ هەزار دەنگدەر كراوە لە سنووری پارێزگای سلێمانی، ئەم پەیامەشم لە چوارچێوەی باسكردنی ئەو ساختەكاریانە بووە كە لە شارەكانی رۆژئاوای عێراق( سونییەكان) و پارێزگاكانی هەرێم كراوە. بێجگە لەوەی ئاماژەم پێكردووە هەر شتێك لەسەر زاری منەوە بڵاوكرابێتەوە چەواشەكارییەكە كە هیچ بنەمایەكی راستی نییە”.

لەلایەكی دیكەوە بەهێز حوسێن یەك لە پێشكەشكارە دیارەكانی كەناڵی گەلی كوردستان لە بەرنامەی گەرماوگەرم-ی كەناڵەكەوە هۆشداری دایە حزبەكانى ئۆپۆزسیۆن كە ئەگەر بەردەوامبن لە هێرشەكانیان ئەوا بە توندی وەڵامیان دەدەنەوە و بێدەنگیان دەكەن، ئەمەشی وەك هوشیاریدانێك بەو لایەن و حزبانە راگەیاند.

لای خۆشیەوە بەكر سدیق كادری هاوپەیمانی بۆ دیموكراسی و دادپەروەری لە گوتارێكدا داوایەك لە كۆسرەت رەسوڵ عەلی جێگری سكرتێری گشتی یەكێـتی نیشتمانی كوردستان دەكات و نوسیوێتی “بەرێز كاك كۆسرەت ، ئەم دۆخەی كوردستانی تێكەوتوە ، ئەگەر رێرەوی ژیانی یەكێتی ، نەخرێتەوە سەر شارێی مێژووی خۆی ، لە جیاتی راستكردنەوەی ، بەرەو پروكانمان دەبا . بونی ئێوە ، لە ناو یەكێتیدا ، ئەو بەرپرسیارێتیە دەخاتە سەرشانتان ، كە رێبگرن لەو ڕۆڵە سلبیەی، ئەم حیزبە لە گۆرەپانی سیاسیدا دەیگێرێ”.

هەروەها دەڵێت “بەرێز كاك كۆسرەت ئەو ساختەكاریانەی كە لەهەڵبژاردنەكانی 12/5ی ئەمساڵدا ، ئەنجام دران ، دەرەتانێكی نەهێشتۆتەوە ، بۆ هیچ لێكتیگەیشتنێكی سیاسی لە نێوان یەكێتی و ئەو لایەنانەی كە بەر شاڵاوی دەنگ دزین كەوتون .خۆشتان دەزانن ، كە هەرێمەكەمان لە ئێستادا ، لە هەموو كاتێك زیاتر پێویستی بە رێكخستنەوەی ناو ماڵی خۆیەتی . چونكە ئەو ئەجیندا ئیقلیمی و نێودەوڵەتیانەی تەمایانە هەلومەرجی ناوچەكە لە قاڵبی بەرژەوەندی خۆیان بدەنەوە ، پێناچێت پێگەی دەستوری هەریمەكەمان لە عیراق و قورساییە سیاسیەكەی لە ناوچەكەدا پارێزراو بێت ، ئەگەر سیاسەت و ستراتیژی كوردستان ، دانەرێژرێتەوە . خۆشتان دەزانن ، ئەگەر یەكێتی بە ئاقارێكی عەقلانیدا ، ئاراستە نەكرێتەوە، ترسی ئەوە هەیە ، كوردستان بەگشتی و ناوچەی سلیمانی بەتایبەتی ، بەرەو دۆخێكی ئالۆز و ترسناك بڕوات ، بەتایبەت كە ساختەكاریەكانی ئەمجارەی هەڵبژاردنەكانی 12/5 هەرەشەی ساختەكاری و بێبایەخكردنی لە سەر هەڵبژاردنەكانی 30/9ی ئەمساڵی هەریمی كوردستان دروستكردوە و پێشبینی ناكرێ لە هەڵبژاردنەكانی داهاتودا ، لای هێزە دەنگدزراوەكان ، ساختەكاری و دەنگدزینی تریان بەسەردا رابورێ! هەموو خەڵكی كوردستان و لایەنە دەنگ دزراوەكانیش ، دەزانن ، كە جەنابتان ، نەك ئاگەداری ئەو ساختەكاریانە نەبون كە ئەنجامدراوە ، بەڵكو پێش ئەوەی ئەم تاوانە ، دژی ئیرادەی ئەو لایەنانە ئەنجام درابێ ، لە راستیدا ، دژی پێگەو قورسایی سیاسی جەنابتان ، ئەنجام دراوە “.
ناوبراو داواش لە كۆسرەت رەسوڵ دەكات:
1-چیتر رێگە مەدە ، بریارەكانی یەكێتی و سیاسەتی بەرێوەبردنی ئەوحیزبە ، لەژێر سێبەری ئێوەدا ،بخرێنە خزمەتی گروپێكی لادەر لە رێبازی تالەبانی .

2-ئەو دەستپێشخەریە رابگەیەنە ، كە ئەو یەكێتیەی ، سەودا لەگەل مێژوە راستەقینەكەی خۆی دەكات ، بچێتەوە ناو سەنگەری ئەو بەرەیەی خەڵك كە كار بۆ گۆرینی سیستمی حوكمرانی كوردستان دەكات .و یەكێتی دا ببڕە لە و كەسانەی مامەڵە بە مێژووی یەكێتی دەكەن و یەكێتیان، یەكسان كردوە بە بنەمالەیەكی دروستكراو .

3-ئەو ساختەكاریانەو ئەنجامە بەدەستهاتوەكانی ساختەكاریەكانی رەتبكەوەو ، پشگیری بۆ ئەو هێزانە رابگەیەنە كە دەنگەكانیان لە هەڵبژاردنەكاندا دزراوە . نەفرەت لە ساختەكاران و ئەنجامدەرانی بكە .

4- كاربكە بۆ پێكهێنانی بەرەیەك ، لەگەل حیزبە دەنگدزراوەكاندا ، بۆ ئەوەی هەم رێبگرێ لە ساختەكاری هەڵبژاردنەكانی داهاتوو ، هەم بوار بۆ مناڵ و تواڵی سیاسی نەمێنێتەوە كە یاری بە موقەدەراتی دەستكەوتەكانی ئەو شۆرشە نوێیەوە بكات كە ئێوە لە پاڵ كاك نەوشیروان و جەنابی مام جلال دا ، سەر مەشقی بوون .

دەستپێكردنی هەڵمەتی راگەیاندنی یەكێتی لە دژی گۆڕان و هاوپەیمانی لەحاڵێكدایە لە دوای هەڵبژاردنەكانی دوازدەی ئایارەوە گۆڕان و هاوپەیمانی و حزبەكانی دیكەی ئۆپۆزسیۆن هەڵمەتێكی چڕیان لە دژی یەكێتی دەستپێكرد، بەڵام تاكو پەسەندكردنی هەمواری یاسای هەڵبژاردنەكان بۆ دووبارە ژماردنەوەی دەنگەكان لە شەشی ئەم مانگە یەكێتی بێ دەنگ بوو.

راپۆرت

ڕووداوەكەی ئەهواز، تاران تووشی شۆك دەكات
ئێران؛ سعودیە و ئیسڕائیل و هێزە كوردیەكان تۆمەتبار دەكات

خەڵك- بەشی هەواڵ
لە سەروبەندی یادكردنەوەی جەنگی 8 ساڵەی ئێران- عیراق لە هەشتاكانی سەدەی ڕابردوو، لە پارێزگای ئەهواز لە باشووری ڕۆژئاوای ئێران، هێرشێكی چاوەڕوان نەكراو كرایە سەر نمایشێكی سەربازی ئەو وڵاتە و ژمارەیەكی زۆر كوژراو و برینداری لێكەوتەوە، هەرچەندە گروێكی چەكداری ئۆپۆزسیۆن كردەكەیان خستە ئەستۆی خۆیان، بەڵام كۆماری ئیسلامی ئێران هەریەكە لە سعودیە و ئیسڕائیل و هێزە كوردیەكانی ئۆپۆزسیۆنی ناو هەرێمی كوردستان تۆمەتبار دەكات.

  پەرلەمانتارێكی ئێرانی: لە هەرێمی كوردستانەوە هاتوون
ئەبو فەزڵ بیغی، جێگری سەرۆكی لیژنەی ئاسایشی نیشتمانی لە پەرلەمانی ئێران دەڵێت: “ئەو گروپە تیرۆرستیەی كردەكەی ئەهوازیان ئەنجامداوە لە كوردستانی عیراقەوە هاتوون و پاڵپشتی سعودیە و موساد-ی ئیسڕائیل-یان هەیە.

ئەو پەرلەمانتارە بە ئاژانسی (سپۆتنیك)ی ڕوسی ڕاگەیاندووە، ئەو گروپە تیرۆرستیە لە هەرێمی كوردستانەوە هاتوون و بەپێی زانیارییەكانیش، كە پێیان گەیشتووە پشتیوانی سعودیە و ئیسڕائیلیان هەیە و لەو گروپانەن، كە پێش ماوەیەك لەلایەن ئێرانەوە لەناو هەرێمی كوردستان بارەگاكانیان كرایە ئامانج.

بەیانی ئەمڕۆ شەممە 22ی ئەیلولی 2018 لە شاری ئەهواز بەهۆی ئەنجامدانی هێرشێكی سەربازی بۆ سەر نمایشی پاسدارانی ئێران 28 كەس كوژران و 60 كەس-یش بریندار بوون و وەك ئەو پەرلەمانتارەش دەڵێت: “سەرجەم هێرشبەرەكان كوژراون”.

  سەرۆكی ئێران هەڕەشە دەكات
لە كاردانەوەی ئەو هێرشەی سەر پاسداران، حەسەن ڕۆحانی، سەرۆك كۆماری ئێران ڕایگەیاند، كە وەزارەتی هەواڵگری و دەزگا ئەمنیەكان ڕاسپێردراون تا سەرجەم هەوڵیان بخەنەگەڕ بۆ دۆزینەوەی ئەندامدەرانی هێرشەكە، كە بەهۆیەوە دەیان كوژراو و بریندار هەبوون.

دەشڵێت: “وەڵامی كۆماری ئیسلامی ئێران زۆر توند دەبێت سەبارەت بە بچوكترین هەڕەشە لەسەر ئاسایشی ئێران”.

وەك ئاژانسی (فارس)ی ئێرانی بڵاویكردەوە، دوابەدوای هێرشەكەی سەر نمایشە سەربازیەكەی پاسداران، شەڕ و ڕووبەڕووبوونەوە لەنێوان هێزە نیزامیەكان و “چەكدارە توندڕەوەكان” دروست بووە و سەرجەم چەكدارەكان كوژراون.

  هێزێكی ئۆپۆزسیۆن بەرپرسیارێتی خۆی ڕاگەیاند
(بزوتنەوەی ڕزگاریخوازی عەرەبی بۆ ڕزگاركردنی ئەهواز)، كە هێزێكی ئۆپۆزسیۆنی ئێرانیە بەرپرسیارێتی ئەو هێرشەی گرتە ئەستۆی خۆی و ڕایگەیاند، “ئێمە بەرپرسیارین لەو هێرشە”.

یەعقوب حر تەستری، وتەبێژی بزوتنەوەكە ڕایگەیاندووە، “ڕێكخراوی بەرگری نیشتمانیی ئەهواز” كە ژمارەیەك هێزی چەكداری لەخۆگرتووە بەرپرسیارە لە هێرشەكەی سەر نمایشە سەربازیەكەی سوپای ئێران.

  پاسداران: سعودیە لەپشت هێرشەكەیە
پاسەوانی شۆڕشی ئیسلامی ئێران لە بەیاننامەیەكدا ئاماژەی بەوەكردووە، كە گروپی ئەهواز لە پشت ئەنجامدانی هێرشەكەوەن بۆ سەر نمایشە سەربازیەكە و جەختیشی كردۆتەوە، “سعودیە لە پشت پاڵپشتی كردنی ئەو بزوتنەوە تیرۆرستیەوەیە”.

عەمید ئەبو فەزڵ سكارجی، وتەبێژی هێزە سەربازیەكانی ئێران بە ئاژانسی (ڕۆیتەرز)ی ڕاگەیاندووە، ئەنجامدەرانی هێرشەكە ئەندامی ڕێكخراوی داعش نیین، بەڵام پەیوەندییان بە ئەمریكا و ئیسڕائیل-ەوە هەیە.

وتوشیەتی، “ئەنجامدەرانی هێرشەكەی ئەهواز پشتیان بە هەواڵگری ئەمریكا و موساد بەستووە و لەلایەن دوو دەوڵەتی كەنداو-ەوە پشتیوانی دەكرێن و مەشقیان پێ‌ دەكرێت”.

  حزبە كوردیەكان تۆمەتەكان ڕەتدەكەنەوە
دوابەدوای تۆمەتباركردنیان لەلایەن چەند بەرپرس و پەرلەمانتارێكی ئێرانیەوە بە ئەنجامدانی ئەو هێرشەی ئەهواز، حزبە كوردیەكانی هەرێمی كوردستان ڕایدەگەیەنن، ئەو تۆمەتانە نابەرپرسانەن.

ڕێبین سەلام، سەركردە لە حزبی دیموكراتی كوردستان بە ماڵپەڕی (بغداد الیوم)ی ڕایگەیاندووە، ئەو تۆمەتانە نابەرپرسانەن و لە بەرژەوەندی هەرێمی كوردستان نییە پشتی ئەو كردانە بگرێت، چونكە پەیوەندیەكانمان لەگەڵ تاران مێژووین و ئەوە لەبیر ناكرێت، كە پاڵپشتی گەلی كورد بوون بەتایبەتی لە ڕۆژانی شۆڕشی كوردی لەو كاتەی لەلایەن سەدام حسێن-ەوە سەركوت دەكران.

وتیشی، “ئەو تۆمەتانە هەوڵێكە بۆ بیانوو هێنانەوە بۆ هەڵوێستی ئێران، كە دەیانەوێت لەو ڕێگەیەوە قەیران دروست بكەن لە ناوچەی هەناردەی نەوت”.

ئاماژەی بەوەشكردووە، كە یەكەم هەنگاو ئەوەبوو ویستیان گەرووی هورموز دابخەن و ئێستاش دەیانەوێت ململانێكە بگوازنەوە بۆ هەرێمی كوردستان تاوەكو نەوت هەناردە نەكات، بەلام سەركەوتوونابن.

جەختیشی كردۆتەوە، لە ئێستادا چاوەڕێی هەڵوێستی فەرمی حكومەتی ئێران دەكەن لەسەر زاری وتەبێژی فەرمی، چونكە هەرێمی كوردستان لەڕووی جوگرافیەوە دوورە لە ئەهواز و لە بەرژەوەندی هەرێم نییە پشتی ئەو جۆرە هێرشانە بگرێت و هیچ كێشەیەكیشمان لەگەڵ ئێران نییە.

بەردەوام بە لە خوێندنەوە

راپۆرت

چەند كۆمپانیایەك دەڵێن ئاوی سلێمانی پیسە و بەڕێوەبەرایەتی ئاو رەتیدەكاتەوە

سلێمانی – نزار جەزا

چەند كۆمپانیایەك لەشاری سلێمانی پشكنین بۆ ئاوی ماڵان دەكەن و بەئاوێكی نەشیاوی دادەنێن بۆ خواردنەوە، ئەمەش دڵەڕاوكێی لای هاووڵاتیان دروستكردووە، لەبەرامبەریشدا فەرمانگەی ئاوی سلێمانی جەختلەوەدەكاتەوە، ئاوی سلێمانی كێشەی نییە ‌و بۆ خواردنەوە شیاوە.

بەمەبەستی بەدواداچون بۆ پاكی ئاوی سلێمانی سەردانی چەند ماڵێكمان كرد، كە كۆمپانیایەك پشكنینی بۆ ئاوی خواردنەوەی ماڵەكەیان كردبوو، لەو سەردانەدا دەركەوت، ئەو كۆمپانیایەی سەردانی كردوون، وتویەتی: “ئەو ئاوەی دەیخۆنەوە بۆ خواردنەوە شیاو نییە، بۆیە پێویستە فلتەرێك بكڕن بۆ پاككردنەوەی ئاوەكەتان”.

بەپێی زانیارییەكانی (خەڵك)، ئەو فلتەرانەی بە ماڵان دەفرۆشرێن جۆرەكانیان جیاوازە و نرخەكانیشیان جیاوازە، بەجۆرێك نرخەكانیان لە 600 دۆلار تاكو هەزار و 500 دۆلار دەبێت.

عەبدوڵڵا ئەحمەد، یەكێكە لەو هاوڵاتییانەی سەردانمان كرد، لەئێستادا گومانی لا دروستبووە كە ئەو ئاوەی بەكاری دەهێنێت، پاك نییە، چونكە ئەو كەسانەی لەكۆمپانیاكەوە هاتبوون دڵنیابوون لەوەی، ئاوەكەیان بۆ خواردنەوە شیاو نییە و داوایانكرد فلتەرێكیان لێ بكڕێت.

عەبدوڵڵا وتی “ئەو پارەیەی داوادەكەن بۆ فلتەرێك زۆر گرانە و ناتوانین ئەو فلتەرانە بكڕین، بۆیە ناچارین ئەو ئاوە بخۆینەوە، هەرچەندە گومانمان لەخاوێنی ئاوەكە هەیە، بەڵام ناچارین بەكاریبێنین”.

یەكێك لەكارمەندەكانی ئەو كۆمپانیایەی كاری فرۆشتنی فلتەری ئاوە و بەماڵەكاندا دەگەڕێت بۆئەوەی پشكنین بۆ ئاوی ماڵان بكات، بە(خەڵك)ی وت:”ئاوی سلێمانی پاكە و هیچ گرفتێكی نییە و بۆ خواردنەوە شیاوە”.

ئەو كارمەندە كە پێی باشنەبوو ناوی خۆی و كۆمپانیاكەی بهێندرێت، ئەوەشی خستەڕوو، ڕاستە ئاوی بەشێك لەماڵەكانی سلێمانی پاك نییە، ئەویش بەهۆی ئەوەی ئەو بۆریەی ئاوی ماڵەكەی پێدا دەڕوات، باش نییە و قەوزەی دروستكردووە یاخود ئاسنە و ژەنگی كردووە، یان تەنكی سەربانیان پاك نەكراوەتەوە و ژەنگی كردووە، بۆیە ئەو ئاوە بۆ خواردنەوە شیاو نییە.

هاوڵاتییەکی دیکە بەناوی محەمەد جەزا، گومانی لەپاکی ئاوەکە هەیە و لەو کاتەوەی بۆتە هاوین لە دوکانەکان ئاو دەکڕێت یاخود هەفتانە دەچێتە گوندەکەی خۆیان لەکانی چەند دەبەیەک ئاو دەهێنێتەوە ماڵەکەی خۆی لەناو شار و بۆ خواردنەوە بەکاریدەهێنێت.

ئەو هاوڵاتییە وتی:”لەوەتەی بۆتە هاوین ئەو ئاوەی دێتە ناو مەڵەکەیانەوە ڕەنگی بۆ زەرد گۆڕاوە و بەتەواوی هەستی پێدەکرێت کەپیسە، بۆیە بۆ خواردنەوە بەکاریناهێنین”.

بۆ دڵنیابوونەوە لە پاكی ئاوی ماڵان پەیوەندیمان بە بەڕێوەبەری فەرمانگەی ئاوی سلێمانییەوە كرد و دڵنیاییدا لەوەی ئاوی سلێمانی پاكە و بۆ خواردنەوە شیاوە، بەجۆرێك لەژێر پشكنینی هەر سێ تاقیگەكەی بەڕێوەبەرایەتی تەندروستی سلێمانی و فەرمانگەی ژینگەی سلێمانی و فەرمانگەی ئاوی سلێمانی دەرچووە.

سەربەست عوسمان، بەڕێوەبەری فەرمانگەی ئاوی سلێمانی بۆ (خەڵك) وتی:”ئەم كۆمپانیایانە هەوڵدەدەن خەڵك بڕوتێننەوە، ئەگەرنا سەرەتا كە دەستیانپێكرد وتیان لەو شوێنانەی تۆڕی ئاویان نییە و ئاوی بیر دەخۆنەوە، دەچن پشكنین بۆ ئاوی ئەو بیرانە دەكەن و فلتەریان پێدەفرۆشن، بەڵام ئێستا بۆ هەڵخەڵەتاندنی خەڵك بەماڵەكاندا دەگەڕێن، بۆیە سكاڵایان لەسەر ئەو كۆمپانیایانە تۆماركردووە”.

ئەوەشی خستەڕوو، لەهەموو عێراقدا كەمترین حاڵەتی سكچوون و ڕشانەوە و هەندێكجار كۆلێرا، كەمترین ڕێژە تۆمار دەكات، هاوكات لەهەر تاقیگەكاندا دەركەوتووە ئەم ئاوە شیاوە بۆ خواردنەوە، كەواتە ئەمە سەلمێنەری پاكوخاوێنی ئەم ئاوەیە.

وتیشی:”ئاوی خواردنەوە پێویستە هەندێك مادەی تواوەی وەك كالیسیۆم و مەگنیسیۆم و چەند مادەیەكی دیكەی تێدابێت، بەڵام ئەم كۆمپانیایانە بە كردارێكی كارەبایی ئەو مادانەی ناو ئاوەكە دەنیشێنن و ئاوەكە دەكەنە ئاوی موقەتەر، ئەمەش هەڵخەڵەتاندنی خەڵكە”.

لەفەرمانگەی ئاوی سلێمانی لەكاتی پێویستدا لیژنەیەك دروستدەكەن، بۆ ئەو ماڵانەی گومانیان لەپاك‌و خاوێنی ئاوی ماڵەكەیاندا هەیە، بۆیە هەر هاووڵاتییەك دەتوانێت فەرمانگەی ئاوی سلێمانی ئاگاداربكاتەوە، بۆ ئەوەی سەردانی بكەن و چارەسەری گرفتەكەی بكەن.

بەڕێوەبەری فەرمانگەی ئاوی سلێمانی ئاماژەی بەوەشدا، نایشارنەوە و شەرم لەخەڵك ناكەن هەر كاتێك هەریەك لەتاقیگەكانی فەرمانگەی ئاوی سلێمانی و فەرمانگەی ژینگەی سلێمانی و بەڕێوەبەرایەتی تەندروستی سلێمانی وتیان ئاوی سلێمانی پاك نییە، ئەو كاتە بەئاشكرا بەخەڵك دەڵێن:”ئەم ئاوە بەكارمەهێنن”، بەڵام تاكو ئێستا ئەو ئاوە خاوێنە و شیاوی خواردنەوەیە.

ساڵانە لەگەڵ هاتنی وەرزی هاویندا ئاوی سلێمانی ڕەنگی تێكدەچێت و دەگۆڕێت بۆ زەرد، هەندێك كۆمپانیاش ئەمە بەهەل دەزانن و هەوڵدەدەن فلتەری ئاوەكانیان بەسەر هاوڵاتیانیاندا ساغ بكەنەوە و حکومەتیش تائێستا نەیتوانیوە بڕوا بەهاوڵاتیان بهێنێت ئەو ئاوەی دابەشیدەکات پاکە و ڕێگری لەکاری ئەو کۆمپانیایانەش بکات.

بەردەوام بە لە خوێندنەوە

راپۆرت

یەكێتی و پارتی نزیكەی دوو ملیۆن دۆلاریان بۆ كاندیدەكانیان خەرج كردووە

خەڵك- بەشی هەواڵ

هەریەك لە پارتی دیموكراتی كوردستان و یەكێتی نیشتیمانی كوردستان بە 100 كاندید بەشداری هەڵبژاردنەكانی خولی پێنجەمی پەرلەمانی كوردستان دەكەن و هەر كاندیدێكی پارتی بڕی 1000 دۆلاری وەرگرتووە و تێكڕای یەك ملیۆن دۆلار دەكات”دە دەفتەر دۆلار” و كاندیدەكانی یەكێتیش هەریەكێكیان 10 ملیۆن دیناری وەرگرتووە، كە تێكڕا یەك ملیار دینار دەكات، لەكاتێكدا چارەسەری شێرپەنجە لە نەخۆشخانەكانی هیوای سلێمانی و نانەكەلی هەولێردا نەماون.

جگە لە یەكێتی و پارتی هەریەك لە گۆڕان و حزبە ئیسلامییەكان بەبڕی جیاواز پارەیان بۆ بانگەشە خەرج كردووە و زۆربەی خەڵكیش لەگەڵ ئەوەن ئەو پارەیە لە ریكلام و بانگەشەدا خەرج نەكرایە و بدرایە بەو نەخۆشخانانە.

خەرجكردنی ئەو بڕە پارە زۆرە كۆتایی خەرجییەكان نەبووە، بەڵكو زۆر لەوە زیاتر لە ریكلامی گۆرانی و سپۆنسەری فەیسبوك و تۆڕە كۆمەڵایەتییەكان و وێنە و پۆستەر و رێكلامی مێدیاییدا خەرجكراوە، كە تائێستا هیچ ئامارێكی رەسمی لەبەردەستدا نییە كە چەند بوون، بەڵام پێشبینی دەكرێت تێكڕای حزبەكان 10 ملیۆن دۆلار تێپەڕبكات و ئەوەیش ئەگەر بخرایەتە خزمەتی كەرتی تەندروستییەوە، زۆربەی كێشەكانی دەرمانی چارەسەر دەركرد.
ململانێی حزبەكان بۆ بەدەستهێنانی زۆرترین كورسی پەرلەمان لەكاتێكدایە كە پەرلەمان مەرجەعی بڕیارەكان نییە لە هەرێمی كوردستان و بەبڕوای چاودێرانی ئابوری تەنها ناوەندێكە بۆ دەوڵەمەندبوونی كاندید و دوای چوارساڵ خانەنشین كردنیان، بەشێوەیەك لە سێ‌ خولی پێشووی پەرلەمانی كوردستاندا 500 پەرلەمانتار خانەنشینكراون و لە مانگی 11ی ئەمساڵیشدا 111 پەرلەمانتاری دیكە خانەنشین دەبن، كە موچەی هەر یەكێكیان 6 ملیۆن و 400 هەزار دینارە.

بانگەشە و بەڵێنی حزبەكانی هەرێمی كوردستان بەبڕوای چاودێرانی سیاسی هەمان ئەو بەڵێنانەی لانیكەم 15 ساڵی رابردوون و تائێستا هیچیان جێبەجێ‌ نەكراون و یەكێتی و پارتی بەڵێنی چاكسازی و موچەی و هەلی كار دەكەن و زۆرترین پارەیش بۆ ریكلام و بانگەشەكانیان خەرج دەكەن، لەكاتێكدا ئەوان خۆیان لە ماوەی 15 ساڵی رابردوودا ئەو دۆخەیان دروستكردووە.

ئەمە لەحاڵێكدایە كە لە ماوەی رابردوودا هەندێك بۆچوون هەبوون رەخنەیان لە هاووڵاتیانی ئاسایی دەگرت كە هاوكاری نەخۆشانی شێرپەنجە ناكەن و داوایان لەو هاووڵاتیانە دەكرد كە چوونە حەج پارەكەیان بۆ نەخۆشانی شێرپەنجە خەرجبكردایە، لەكاتێكدا هاووڵاتی مافی خۆیەتی ئەو داهاتەی هەیەتی چۆن و لە چیدا خەرجی دەكات.

بەڵام ئەوەی نائاساییە لە بودجەی گشتی وڵات پارە بۆ بابەتی شەخسی و حزبی خەرجدەكرێت و بۆ نەخۆشخانەكان خەرجناكرێت، رەخنە لەو كەس و لایەنانەش دەگیرێت كە لەبەرامبەر چوونی هاووڵاتیان بۆ حەج بە بڕەیەكی كەم دەنگ هەڵدەبڕن، بەڵام لەبەرامبەر بە هەدەردان و خەرجكردنی ملیۆیان دیناری بودجەی گشتی لەلایەن حزبەكانەوە بێدەنگن.

بەردەوام بە لە خوێندنەوە
ریکلام

کوردستان

دوایین