دوو کەس لە قەڵادزی دەستگیرکران کە سەرباری ئەوەی دوو ماتۆڕسواریان شێلاوە، لێشیانداون و پاشان هەڵهاتوون.
ئەمڕۆ سێشەممە پۆلیسی ڕاپەڕین ڕایگەیاند، پاش ئەوەی لە ڕووداوێکی هاتووچۆدا ئۆتۆمبێلێکی جۆری (تویوتا/ هایلۆکس) دوو ماتۆڕسکیل دەشێلێت، بەوەشەوە نەوەستاوە شۆفێر و سەرنشینەکەی لە هەردوو شۆفێری ماتۆڕسکیلەکەیان داوە و دواتر هەڵاتوون.
لە راگەیەندراوەکەدا هاتووە، پاش ئەوەی لەلایەن هەردوو شۆفێری ماتۆڕسکیلەکە سکاڵا تۆمار کرا دەستبەجێ دوای بەدەستهێنانی زانیاری و دیاریکردنی شوێنەکانیان لەلایەن هێزەکانی نووسینگەی نەهێشتنی تاوانی پشدەر شۆفێری ئۆتۆمبێلەکە و سەرنشینەکەی دەستگیر کران.
ئەوەشیخستەڕوو کە هەردوو تۆمەتبارەکە دانیان ناوە بەتاوانەکەیاندا، بەبڕیاری دادوەر و بە ماددەکانی 413 لە یاسایی سزادانی عێراقی و 23ی هاتووچۆ هەردووکیان ڕاگیر کراون و دەستیشگیراوە بەسەر ئۆتۆمبێلی بەکارهاتوو و هەردوو ماتۆڕسکیلەکەدا.
