سەرۆکی کۆمەڵی دادگەری کوردستان ڕایدەگەیەنێت، هەرێمی کوردستان بەهۆی حوکمڕانیی سەقەت و خراپ و حیزبییانەوە، پڕکراوە لە ستەم و گەندەڵیی و تاوان و لادان و دەشڵێت: زوتر فریای نەکەوین، لەوەی ئێستاش بەرەو خراپتر دەچێ.
عەلی باپیر، سەرۆكی كۆمەڵی دادگەری بەبۆنەی 1ی موحەڕەم و سەری ساڵی كۆچییەوە پەیامێكی بڵاوكردەوە و ڕایگەیاند “با هەموو لایەکمان وەک شوێنکەوتووانی پێغەمبەری کۆتایی (ﷺ) بەردەوام لە کۆچ و هیجرەتدابین لە خراپە و هەڵە و پەڵە و ناشەرعییەکانەوە، بەرەو بەندایەتیی ڕاستەقینە بۆ خوا و پەیڕەویی کردن لە پێغەمبەرەکەی و جێبەجێکردنی کتێبەکەی، بە تایبەت لەم هەل و مەرجەدا کە هەرێمی کوردستان بەهۆی حوکمڕانیی سەقەت و خراپ و حیزبییانەوە، پڕکراوە لە ستەم و گەندەڵیی و تاوان و لادان”.
ڕاشیگەیاندووە، “بە دڵنیایی ستەم و خراپەکاریی هەرێمەکەمانی زۆر بێهێز کردوە و ئەگەر هەرچی زووتر فریای نەکەوین، لەوەی ئێستاش بەرەو خراپتر دەچێ و هەموو لایەکیش بیستویەتی، کە لەوبارەوە هۆشداریی زۆر لەلایەن کەسانێک و لایەنانێکەوە کە خۆیان بە دڵسۆز دەزانن، بە هەرێم و بەرپرسانی دراوە و وتویانە: دەست و برد بکەن لە چارەسەری کێشە و گرفتەکانتان ئەگەر دەتانەوێت بەردەوام بن و بمێنن”.
ئاماژەی بەوەشكردووە، “با سەرەتا لە ناخی دڵمانەوە لەگەڵ خوا و پێغەمبەرەکەیدا ئاشت بینەوە و خۆمان لە هەرچی خراپە و ناشەرعییە پاک بکەینەوە”.
دەقی پەیامەكەی مامۆستا عەلی باپیر:
بِسْمِ اللَّـهِ الرَّحْمَـٰنِ الرَّحِيمِ
(إِلَّا تَنْصُرُوهُ فَقَدْ نَصَرَهُ اللَّهُ إِذْ أَخْرَجَهُ الَّذِينَ كَفَرُوا ثَانِيَ اثْنَيْنِ إِذْ هُمَا فِي الْغَارِ إِذْ يَقُولُ لِصَاحِبِهِ لَا تَحْزَنْ إِنَّ اللَّهَ مَعَنَا …)، التوبة -٤٠-
ئەمڕۆ: (١/١/١٤٤٥)ی کۆچییە بەرانبەر: (١٩/٧/٢٠٢٣ زايينى) یادی ١٤٤٥ ساڵەی کۆچکردنی پێغەمبەری کۆتایی موحەممەد ﷺ و هاوەڵانی بەڕێز و دڵسۆزیەتی، لە شاری مەککەوە بۆ شاری مەدینە، کە دواتر بنیاتنانی کۆمەڵگاو قەوارەیەکی سیاسیی لێکەوتەوە.
بەو بۆنەیەشەوە دەڵێم:
یەکەم: ئەو کۆچکردنەی پێغەمبەری خوا ﷺ و هاوەڵانی خوا لێیان ڕازی بێ، دوای هەردووک پەیمانی یەکەم و دووەمی عەقەبه بوو لە ساڵانی دوازدە و سێزدەی پێغەمبەرایەتییدا، واتە: دوای ئەوەبوو خەڵکی (یثرب) بەڵێن و پەیمانیان دابوو کە هاوکار و پشتگیری پێغەمبەر و ئیسلام بن، کەواتە: دەبێ بزانرێ قەوارەی سیاسیی لە ئیسلامدا چۆن بنیاتدەنرێ!
دووەم: بێگومان کۆچ (هجرة) وێڕای واتا و چەمکە تایبەتییەکەی، چەمک و واتایەکی گشتییشی هەیە، وەک پێغەمبەری خوا ﷺ فەرموویەتی: (… والمهاجرُ مَن هاجَر ما نهى اللهُ عنه)، أخرجه البخاري: (10)، ومسلم: (40) عن عبد الله بن عمرو، واته: (… کۆچکەریش کەسێکە هەر شتێک خوا قەدەغەی کردوە و ڕێگریی لێکردوە، وازی لێ بهێنێ).
کەواتە: با هەموو لایەکمان وەک شوێنکەوتووانی پێغەمبەری کۆتایی ﷺ بەردەوام لە کۆچ و هیجرەت دابین لە خراپە و هەڵە و پەڵە و ناشەرعییەکانەوە، بەرەو بەندایەتیی ڕاستەقینە بۆ خوا و پەیڕەویی کردن لە پێغەمبەرەکەی و جێبەجێ کردنی کتێبەکەی، بە تایبەت لەم هەل و مەرجەدا کە هەرێمی کوردستان بەهۆی حوکمڕانیی سەقەت و خراپ و حیزبییانەوە، پڕکراوە لە ستەم و گەندەڵیی و تاوان و لادان و، بە دڵنیایی ستەم و خراپەكاریی هەرێمەکەمانی زۆر بێ هێز کردوە و، ئەگەر هەرچی زووتر فریای نەکەوین، لەوەی ئێستاش بەرەو خراپتر دەچێ و، هەموو لایەکیش بیستوویەتی، کە لەوبارەوە هۆشداریی زۆر لەلایەن کەسانێک و لایەنانێکەوە کە خۆیان بە دڵسۆز دەزانن، بە هەرێم و بەرپرسانی دراوە و گوتوویانە: دەست و برد بکەن لە چارەسەری کێشە و گرفتەکانتان ئەگەر دەتانەوێ بەردەوام بن و بمێنن!
کەواتە: با سەرەتا لە ناخی دڵمانەوە لەگەڵ خواو پێغەمبەرەکەیدا ئاشت بینەوەو، خۆمان لە هەرچی خراپەو ناشەرعییە پاک بکەینەوەو، بە ڕەوشت و ئاکارە بەرز و پەسندەکان بڕازێنینەوە و ئاوڕێکی جیددیی لە خۆمان و ژیان و گوزەران و کۆمەڵگایەکەمان بدەینەوە، داخۆ لە ڕووی فیکریی و ئیمانیی و ڕەوشتیی و خێزانیی و کۆمەڵایەتیی و سیاسییەوە، لە کوێی قوڕئان و ڕێبازەکەی پێغەمبەری خواین؟!
برای دڵسۆزتان عەلی باپـیر
١/١/١٤٤٥ ك
١٩/٧/٢٠٢٣ ز
