ئێمە لە تۆرە کۆمەڵایەتیەکان

چاوپێکەوتن

ڤاڵڤێردی: ڤیدال جه‌نگاوه‌رێکی جیاوازه‌ و سودێکی گه‌وره‌ به‌ پێکهاته‌که‌مان ده‌گه‌یه‌نێت

خه‌ڵک سپۆرت

ئێرنیستۆ ڤاڵڤێردی ئیسپانی ڕاهێنه‌ری یانه‌ی به‌رشلۆنه‌ چاوپێکه‌وتنێک له‌گه‌ڵ که‌ناڵی بارسا” ئه‌نجام ده‌دات، تیایدا باسی چه‌ندین بابه‌تی په‌یوه‌ندیدار به‌ گواستنه‌وه‌کانی هاوینه‌ و ناوخۆی یانه‌که‌ی ده‌کات.

ئه‌مه‌ش کورته‌یه‌که‌ له‌چاوپێکه‌وتنه‌که‌:

ڕات چییه‌ ده‌رباره‌ی گواستنه‌وه‌ی ئارتورۆ ڤیدال له‌ بایرنه‌وه‌ بۆ به‌رشلۆنه‌؟

وه‌رزی داهاتو ڤیدال به‌هۆی توانا جه‌سته‌ییه‌ به‌هێزه‌که‌ی و ئه‌و ئه‌زمونه‌ی به‌ده‌ستی هێناوه پاڵپشتیه‌کی گه‌وره‌ ده‌بێت بۆ به‌رشلۆنه‌‌، یاریزانێکی جه‌نگاوه‌ره‌ له‌نێو یاریگادا و له‌سه‌رجه‌م یاریزانان جیاوازتره‌، پێشتر بۆ چه‌ندین یانه‌ی گه‌وره‌ یاریی کردووه‌ و پێموایه‌ به‌خێرایی له‌ به‌رشلۆنه‌ خۆی ده‌گونجێنێت.

شێوازی یاریی کردنی ڤیدال له‌گه‌ڵ‌ شێوازی یارییکردنی به‌رشلۆنه‌ جیاوازه‌، پێتوانیه‌ دوو جه‌مسه‌ره‌که‌ جیاوازن؟

به‌ڵێ، شێوازی ڤیدال و شێوازی یارییکردنی بارسا جیاوازیان هه‌یه‌، پێشتریش پاولینیۆ به‌هه‌مان شێوه‌ بوو بۆیه‌ گواستنه‌وه‌ی دووچاری ڕه‌خنه‌یه‌کی زۆری کردین‌، به‌ڵام بینیتان چی کرد و چی تۆمار کرد، پێموایه‌ پاولینیۆ ڕێزی هه‌مووانی به‌ده‌ست هێنا.

به‌رپرسی یه‌که‌می گواستنه‌وه‌کانی یانه‌ی به‌رشلۆنه‌ بویت؟

من ڕاهێنه‌رم و ته‌نها به‌رپرس نیم له‌گواستنه‌وه‌کان، ئێمه‌ له‌ به‌رشلۆنه‌ ده‌ست کراوه‌ین به‌رامبه‌ر هه‌ر گواستنه‌وه‌یه‌ک که‌ سود به‌ پێکهاته‌که‌مان بگه‌یه‌نێت.

ڕازی بویت له‌سه‌ر ئه‌و گواستنه‌وانه‌ی ئه‌نجامدراون؟

من هیچ لیستێکم نه‌بووه‌‌ تایبه‌ت بێت به‌یاریزانه‌ داواکراوه‌کان، یاخود ئه‌و یاریزانانه‌ی ئێمه‌ حه‌زمان به‌گواستنه‌وه‌یه‌تی، به‌ڵام له‌گه‌ڵ ئیداره‌ی یانه‌ هاوڕابوین له‌سه‌ر هه‌ر گواستنه‌وه‌یه‌ک که‌ ئه‌نجامدرابێت.

داهاتوی ڕافینیا-ت یه‌کلایی کردۆته‌وه‌؟

ڕافینیا نایابه‌ و ئاستێکی نایابیشی له‌یارییه‌ دۆستانه‌ و ئاماده‌کاریه‌کان پێشکه‌ش کردووه‌، وه‌رزی ڕابردو له‌پێکان گه‌ڕایه‌وه‌ و ڕوویکرده‌ ئینته‌رمیلان، به‌هه‌رحاڵ، با بزانین چی ڕووده‌دات… له‌گه‌ڵ به‌رپرسانی به‌رشلۆنه‌ تاوتوێی داهاتوی ده‌که‌ین.

سیلیسینی گۆڵپارێزی دووه‌م ئاستی زۆر باش بووه‌، ده‌توانیت مانه‌وه‌ی له‌ به‌رشلۆنه‌ دووپات بکه‌یته‌وه‌؟

سیلیسین گۆڵپارێزکی ناوازه‌یه‌ و خۆشحاڵین به‌وه‌ی له‌ به‌رشلۆنه‌ به‌رده‌وامه‌ و کارمان له‌گه‌ڵ ده‌کات، پێموابێت سه‌رچاوه‌ی ئه‌مانی پێکهاته‌که‌مانه‌.

بۆچونت چۆنه‌ ده‌رباره‌ی ئه‌و هه‌واڵانه‌ی باس له‌ گواستنه‌وه‌ی پۆگبا ده‌که‌ن له‌ مانچسته‌ر یونایتده‌وه‌ بۆ به‌رشلۆنه‌؟

پۆگبا یاریزانێکی گه‌وره‌یه‌ و تواناکانی بێوێنه‌ن، به‌ڵام له‌ئێستادا درێسی یانه‌ی مانچسته‌ر یونایتدی پۆشیوه‌، ئێمه‌ ڕێزی هه‌موو یانه‌یه‌ک ده‌گرین و باسی هیچ یاریزانێک ناکه‌ین له‌ یانه‌که‌ی خۆمان نه‌بێت.

چاوپێکەوتن

سامپاولی: مێسی پابه‌ند بوو و ئاشکرابونی کۆبونه‌وه‌کان هه‌ڵه‌بوو، فه‌ره‌نساش به‌ هێرشی هه‌ڵگه‌ڕاوه‌ جامه‌که‌ی برد

خه‌ڵک سپۆرت – مارکا

خۆرخی سامپاولی ڕاهێنه‌ری پێشوی هه‌ڵبژارده‌ی ئه‌رجه‌نتین، له‌دوای شکستی مۆندیاله‌وه‌ به‌هیچ شێوه‌یه‌ک له‌به‌رده‌م میدیاکاندا ده‌رنه‌که‌وتووه‌ و له‌چاوپێکه‌وتنێکدا له‌گه‌ڵ ڕۆژنامه‌ی مارکا جه‌خت ده‌کاته‌وه‌، حه‌وانه‌وه‌ی به‌خۆی داوه‌ و ته‌نها به‌ تاماشاکردنی رووبه‌ڕوبونه‌وه‌کان قایل بووه‌ تا بزانێت له‌ ڕابردودا چ هه‌ڵه‌یه‌کی کردووه‌.

بێده‌نگی خۆت بشکێنه‌، له‌دوای مۆندیاله‌وه‌ به‌هیچ شێوه‌یه‌ک ده‌رنه‌که‌وتویت، هۆکار چی بوو؟

کاتێکی باشم وه‌رگرت تا له‌ هه‌ڵبژارده‌ و بڕیاره‌کانی مۆندیال بکۆڵمه‌وه‌، پێویسته‌ هه‌موو شته‌کان لێکبده‌مه‌وه‌ بۆ ئه‌وه‌ی بزانم له‌داهاتودا چی ده‌که‌م.

که‌واته‌ ده‌توانین وای لێکبده‌ینه‌وه‌ که‌ خۆت شاردۆته‌وه‌؟

نه‌خێر هه‌رگیز، به‌ڵکو ویستم که‌مێک کات به‌خۆم بده‌م تا له‌ تاقیکاری و ژیانی خۆم قاڵ ببمه‌وه‌، ویستم خۆم داببڕم و به‌وشێوه‌یه‌ “ئه‌پده‌یت”ێك بکه‌م، من که‌سێکم ڕاهێنه‌ری تۆپی پێم، ته‌نها له‌ ڕاگه‌یاندنه‌کان دوورکه‌وتومه‌ته‌وه‌، به‌ڵکو به‌رده‌وامبووم له‌ گفتوگۆی وه‌رزشی و لێکدانه‌وه‌ی ڕووبه‌ڕوبونه‌وه‌کان، ژیانی کۆمه‌ڵایه‌تیم پشتگوێ نه‌خستووه‌، نه‌وه‌ستاوم له‌ چون بۆ سینه‌ما، قاوه‌ی خۆم له‌ کافتریا خواردۆته‌وه‌ و به‌پێچه‌وانه‌وه‌ که‌س ڕووبه‌ڕو وته‌یه‌کی ناشترینی ئاڕاسته‌ نه‌کردوم.

له‌ مۆندیاله‌وه‌ چ وانه‌یه‌ک فێربویت؟

ساڵێکم به‌ڕێکرد له‌هه‌مان ئه‌و پێگه‌یه‌ی ده‌ستمان پێکرد، دووچاری زریانی ڕه‌خنه‌کان بومه‌وه‌، گیرۆده‌ی چه‌ندین داواکاری بوین‌، یاریزانه‌کانم به‌توانا بون و ناچاری بردنه‌وه‌ بوین، ئه‌وه‌ش ئه‌رکی ئێمه‌ی زۆر قورس کرد.

زریان و پابه‌ندبوون… هه‌مووتان ده‌تانناڵاند؟

بێگومان، به‌نسبه‌ت ئێمه‌ و یاریزانانه‌وه‌ ده‌بوو پابه‌ندبونێکی بێوێنه‌مان هه‌بێت، پێشوه‌خت  چاومان به‌ یاریزانان که‌وت، ئه‌رکێکی زۆر قورس بوو و کۆتاییه‌که‌ی به‌ره‌وپێشچوون نه‌بوو، له‌به‌رئه‌وه‌ی ته‌نها یه‌ک ڕێگه‌مان له‌به‌رده‌مدا بوو: ده‌بێت ببینه ‌پاڵه‌وانی جیهان، ئه‌و پابه‌ندبونه‌ش نه‌هامه‌تی بوو، دۆخه‌که‌ی ئاڵۆز کرد، نه‌مانده‌توانی تاموچێژ له‌ تۆپی پێ وه‌ربگرین و هه‌میشه‌ داواکاریه‌کان به‌رزتر بوو له‌ئاستی ئێمه‌.

به‌هۆی بارودۆخه‌که‌وه‌ ئه‌و هه‌سته‌ت هه‌بوو که‌ ئه‌مه‌ کۆتاجاره‌ وه‌ک ڕاهێنه‌ر کارده‌که‌یت، نه‌ک یه‌که‌مجارت بێت له‌گه‌ڵ هه‌ڵبژارده‌که‌؟

کاری ئێمه‌ وه‌ک راهێنان چه‌ندین بوار و کێشه‌ی به‌دوایه‌وه‌ که‌ پێش چونه‌ نێو یاریگا پێویسته‌ چاره‌سه‌ریان بکه‌ین، له‌هه‌موو ئه‌وانه‌ گرنگتر هه‌ڵبژاردنی یاریزانان و بڕیاره‌کانه‌، هه‌ڵبژاردنه‌کان زۆر له‌وه‌ ئاڵۆزتره‌ که‌ باس ده‌کرێت، هه‌نگاوه‌کان هه‌میشه‌ به‌و ئاڕاسته‌یه‌ن تاکتیک و ستراتیجی نێو یاریگا گونجاو بێت، ئه‌وه‌ش ده‌بێت به‌کۆمه‌ڵ بکرێت و مه‌سه‌له‌که‌ به‌گشتی ئاڵۆزه‌.

هه‌ست به‌ شکست و بێزاری ده‌که‌یت؟

من باس له‌ ڕوخانی وره‌ و بێزاری ناکه‌م، به‌ڵکو باس له‌هه‌سته‌ تایبه‌تیه‌کانی خۆم ده‌که‌م و به‌رپرسیارێتی ئه‌نجامه‌کان ده‌خه‌مه‌ سه‌رشانم، چونکه‌ نه‌متوانی شێوازه‌که‌م به‌سه‌ر یاریزاناندا بچه‌سپێنم، ئه‌وه‌ی هه‌ستی پێده‌که‌م و تیایدا ده‌ژیم تۆپی پێیه‌ و ئه‌و شێوازه‌ش له‌داهاتودا یاریده‌ده‌رم ده‌بێت، ده‌مه‌وێت تاموچێز وه‌ربگرم، به‌ڵام ته‌ماشاکه‌ له‌مۆندیال چی ڕوویدا! پاڵه‌وانی خوله‌که‌ ته‌نها به‌ هێرشی هه‌ڵگه‌ڕاوه و گێڕانه‌وه‌ی تۆپه‌کان و خێرایی ڕاکردنی ماوه‌ درێژی یاریزانه‌کانی‌ بردنه‌وه‌ی به‌ده‌ست ده‌هێنا، یه‌کێک له‌ پاڵێوراوه‌کانم هه‌ڵبژارده‌ی ئیسپانیا بوو که‌ یاریی ده‌کرد و به‌خێرایی کرایه‌ ده‌ره‌وه‌، پاڵه‌وان به‌شێوه‌ی سود وه‌رگرتن له‌ ڕکابه‌ران نازناوه‌که‌ی به‌ده‌ست هێنا و ئه‌وانه‌ی ترسیان له‌یارییکردن هه‌یه‌ به‌وشێوه‌یه‌ ململانێ ده‌که‌ن، له‌ئێستادا زۆر ئاسانه‌ یاریی نه‌که‌یت و سود له‌ جوڵه‌ و هه‌ڵه‌ی ڕکابه‌ران وه‌ربگریت.

هه‌ست ناکه‌یت له‌ قۆناغێکی مۆندیالدا کاری ڕاهێنانت له‌ده‌ستدا و چیتر راهێنه‌ر نه‌مابویت؟

زۆرجار له‌ یاریزانان نزیک ده‌بومه‌وه‌ و ده‌مزانی ماندون، پێموابوو بۆ مۆندیال زۆر به‌باشی ئاماده‌سازیمان کردوووه‌، به‌ڵام دواتر له‌مۆندیال بارودۆخه‌که‌ پێچه‌وانه‌ بۆوه‌، ده‌بوو هه‌وڵی هاوسه‌نگی بده‌ین له‌به‌رئه‌وه‌ی یاریزانانی ئه‌رجه‌نتین نه‌یانده‌توانی به‌ دڵه‌ڕاوکێوه‌ یاریی بکه‌ن، هه‌موو یارییه‌کان نه‌هامه‌تی بوون بۆمان، به‌ڵام دووپاتیده‌که‌مه‌وه‌، له‌ کاری راهێنان نه‌وه‌ستام و به‌باشی خۆم بۆ ڕووبه‌روبونه‌وه‌کان ئاماده‌ ده‌کرد.

توڕه‌ نه‌بویت له‌و کۆبونه‌وانه‌ی یاریزانان ئه‌نجامیان ده‌دا؟

هه‌موو کۆبونه‌وه‌کان بۆ هه‌ماهه‌نگی بوون، ساتێکی ناهه‌موار بوو و هه‌موو بابه‌ته‌ ده‌ره‌کیه‌کان وایده‌کرد ته‌رکیز له‌ده‌ست بده‌ین، ئه‌وه‌ی یاریزانانیش کردیان بۆ یارمه‌تیدان و چاکسازی بوو، هه‌وڵدانێک بوو بۆ ئه‌وه‌ی ببین، نه‌ک ته‌نها بونمان هه‌بێت، کێشه‌ له‌ کۆبونه‌وه‌کاندا نه‌بوو، به‌ڵکو کێشه‌که‌ ئه‌وه‌بوو کۆبونه‌وه‌کان ئاشکرا ده‌کران، ئه‌وه‌ له‌ساڵی ١٩٨٦یش ڕوویدا و دوای ٢٠ ساڵ به‌هه‌مان شێوه‌ ئه‌نجامماندایه‌وه‌ به‌هیوای سه‌رکه‌وتن، من پێموایه‌ فه‌لسه‌فه‌ی به‌شداریکردن و دۆزینه‌وه‌ی چاره‌سه‌ره‌کان شتێکی گونجاوه‌، به‌ڵام کاتێک بابه‌ته‌که‌ ده‌بێته‌ باس و خواسی میدیایی و تۆڕه‌ کۆمه‌ڵایه‌تیه‌کان خراپترین شت ده‌بێته‌ کۆبونه‌وه‌ و وا ده‌کات گومانمان له‌یه‌کتری هه‌بێت.

که‌واته‌ هه‌ڵه ‌بویت به‌شداریت به‌ ماسیکیرانۆ کرد له‌ بڕیاره‌کانتدا؟

نه‌خێر، هه‌ستم کرد ئه‌وه‌ بڕیارێکی گونجاوه‌ بۆ به‌ره‌وپێشبردنی ئه‌رجه‌نتین به‌گشتی و هه‌وڵمدا سه‌رجه‌م یاریزانان به‌شداری پێبکه‌م، ده‌مویست هه‌موو ئه‌وانه‌ی له‌ دڵیاندایه‌ ده‌ریبخه‌ن له‌دوای هه‌ر ئه‌نجامێکه‌وه‌، دڵه‌ڕاوکێی یاریزانان ڕێگه‌ له‌ به‌ره‌وپێشچونی به‌کۆمه‌ڵ و تاکه‌ که‌سی یاریزانان ده‌گرێت، ته‌نها شت مه‌شقه‌کان بوو که‌ له‌ئاستێکی باڵادا بوو، ماسکیرانۆش نه‌یتوانی پارێزگاری له‌ ئاسته‌ باڵاکه‌ی بکات و جگه‌ له‌وه‌ هه‌موو شتێک که‌ پێشکه‌شی کرد بۆ ئێمه‌ مه‌زن بوو.

له‌هیچ شتێک په‌شیمان نیت؟

پێموابێت هه‌مووان له‌به‌شداریکردنماندا ڕاستگۆ بوین، به‌ش به‌حاڵی خۆم دڵ و هه‌سته‌کانم تێکه‌ڵ به‌ هه‌ڵبژارده‌که‌م کرد، ناشمه‌وێت سه‌رزه‌نشتی که‌س و هیچ شتێک بکه‌م، له‌ قورسایی بارودۆخه‌که‌‌ بۆ داهاتو زۆرشت فێربوم.

دڵ و هه‌ستت تێکه‌ڵ به‌ هه‌ڵبژارده‌که‌ کرد، به‌ڵام له‌ وڵاته‌که‌ی خۆته‌وه‌ ڕه‌خنه‌ی زۆرت ئاڕاسته‌ کرا، ئازاریان دایت؟

نه‌خێر، ئه‌وه‌ به‌شێك بوو له‌ دۆخه‌که‌، ڕه‌خنه‌کانیش چاوه‌ڕوان کراوبوو ده‌مانزانی توند ده‌بن، من به‌ڕێژه‌ی له‌سه‌دا ٩٥ی پاڵپشتی هانده‌ران ئه‌وکاره‌م هه‌ڵبژارد، پێیان وابوو خۆرخی سامپاولی ده‌توانێت جامی جیهانیان پێشکه‌ش بکات، کاتێک نه‌متوانی ئه‌وکاره‌ بکه‌م ڕه‌خنه‌باران کرام، دڵنیاتان ده‌که‌مه‌وه‌ هیچ ڕق و کینه‌یه‌ک له‌دڵمدا نییه‌ به‌رامبه‌ر به‌ هیچ که‌سێک.

راهێنان به‌ مێسی چ کاریگه‌ریه‌کی هه‌بوو؟

زۆر نایاب بوو، به‌تایبه‌ت که‌ ده‌مبینی زیاد له‌پێویست پابه‌نده‌ به‌ مه‌شقه‌کانه‌وه‌، ته‌نانه‌ت کاتێکیش سه‌رکه‌وتو نه‌ده‌بوین له‌هه‌مووان زیاتر پابه‌ند ده‌بوو، به‌هۆی مه‌حاڵی بارودۆخه‌که‌وه‌ ئه‌ویش وه‌ک یاریزانه‌کانی تر ده‌یناڵاند و قورسبوو بۆمان که‌ نه‌مانده‌توانی قۆناغی کۆمه‌ڵه‌کان تێپه‌ڕ بکه‌ین.

مه‌شقکردن به‌ مێسی قورس نییه‌؟ به‌وپێیه‌ی ئه‌و بۆخۆی چاره‌سه‌ره‌، باشترینه‌، ئه‌گه‌ر شکست بهێنێت واتا چاره‌سه‌ر نه‌ماوه‌…

کاتێک خاوه‌نی باشترین پێکهاته‌ی جیهان ده‌بیت بێگومان به‌رپرسیارێتی قورستر ده‌بێت و پێویسته هه‌موو شتێک‌ له‌ ترۆپکدا بێت، به‌ڵام ڕاستی ئه‌وه‌یه‌ که‌ هه‌ندێجار ده‌توانیت و هه‌ندێجاری دیکه‌ش ناتوانیت براوه‌ بیت، ئێمه‌ هه‌موو ڕۆژێک له‌نێو جه‌نگدا بوین، بونی مێسی وات لێده‌کات که‌ هیچ تێبینیه‌کت نه‌بێت و ته‌نها بۆ بردنه‌وه‌ هه‌وڵ بده‌یت.

ڕات چییه‌ ده‌رباره‌ی پێکهاته‌ی بانگهێشتکراوی ئێستای ئه‌رجه‌نتین؟

ئه‌وه‌ بڕیارێکی تایبه‌تیه‌، ڕاهێنه‌ر بۆخۆی ده‌زانێت پێویستی به‌چییه‌ و پێویسته‌ ڕێزی بگرین.

پێتوایه‌ ئه‌رجه‌نتین ده‌توانێت له‌گه‌ڵ مێسی نازناوی ‌مۆندیالی قه‌ته‌ری ٢٠٢٢ به‌ده‌ست بهێنێت، له‌کاتێکدا ته‌مه‌نی ده‌گاته‌ ٣٥ ساڵ؟

به‌ڵێ بێگومان، به‌ڵام ئه‌وه‌ پێویستی به‌ پڕۆسه‌یه‌کی نوێ هه‌یه‌، هه‌موو ئه‌وه‌ی ڕوویدا و شکا پێویستی به‌ چاکردنه‌وه‌یه‌، بۆمۆندیال و کۆپا ئه‌مریکای داهاتو پێویستمان به‌ ڕێکخستنه‌وه‌ و متمانه‌ی له‌ڕاده‌به‌ده‌ر هه‌یه‌ له‌گه‌ڵ کارو هه‌وڵدانی زیاتر، پێویسته‌ جامی کۆپا به‌ده‌ست بهێنین نه‌ک له‌ده‌ستدان و شکاندنی وره‌، له‌کاتێکدا ناتوانیت نازناوێک ببه‌یته‌وه پێویست به‌ شێتبون ناکات‌، باشتره‌ هه‌ست به‌وه‌ بکه‌ین که‌ له‌داهاتودا براوه‌ ده‌بین ئه‌گه‌رچی هه‌لێکیشمان له‌ده‌ستدابێت، به‌ڵام له‌ ئه‌رجه‌نتین سه‌رشێتی بونی هه‌یه‌، ئه‌گه‌ر تۆ براوه‌ نه‌بیت که‌واته‌ شکستخواردویت.

به‌ڵام ئه‌م قیه‌م و بیرکردنه‌وه‌ له‌ناخی ئه‌رجه‌نتینیه‌کاندا چه‌سپاوه‌…

پێویسته‌ ئه‌و قیه‌مه‌ بگۆڕن، به‌وشێوه‌یه‌ به‌یه‌که‌وه‌ ناتوانین کار بکه‌ین، ئه‌و دۆخه‌ هیستیریه‌ له‌بواری تۆپی پێدا وا ده‌کات نه‌توانیت سود له‌ پڕۆژه‌ و کات و هه‌ڵه‌کانی ڕابردو وه‌ربگریت، هیوادارم له‌داهاتودا گۆڕانکاری رووبدات، له‌کاتی مندا زیاتر ڕه‌خنه‌ له‌ شێوازه‌که‌م ده‌گیرا له‌بری ئه‌وه‌ ده‌بوو ئاماژه‌ به‌ ئاره‌زوی بردنه‌وه‌مان بکرێت، ئه‌وه‌ش شتێکی سه‌یره‌.

که‌واته‌ سه‌رکه‌وتنی تۆپی پێی ئه‌رجه‌نتین ده‌بێت به‌کۆمه‌ڵ بێت و گۆڕانکاری ڕووبدات؟

کاتێک ئاڵوگۆڕ به‌راهێنه‌ران ده‌که‌یت له‌چه‌ند ڕۆژێکدا هه‌موو شتێک ده‌شێوێت، به‌هه‌مان شێوه‌ له‌ کۆمه‌ڵگای وه‌رزشیدا پێویستت به‌ ڕێزگرتنه‌ له‌ پڕۆژه‌ و کار، ئه‌گه‌ر دۆخه‌که‌ به‌وشێوه‌یه‌ نه‌بێت هه‌موو شتێک ئاڵۆز ده‌بێت، بیرله‌ مێسی بکه‌ره‌وه‌، له‌ به‌رشلۆنه‌ جێگیره‌ و به‌ هاوسه‌نگی کات و کاره‌کانی به‌ڕێده‌کات، کاتێک ده‌گاته‌ ئه‌رجه‌نتین دووچاری هیستیریای بردنه‌وه‌ ده‌کرێت، ئه‌وه‌ش مه‌حاڵه‌، کاتێک ده‌دۆڕێت دووچاری ڕه‌خنه‌ی کوشنده‌ ده‌کرێت و به‌وشێوه‌یه‌ ناتوانێت یاریی بکات و تاموچێژی لێوه‌ربگرێت.

ڕه‌خنه‌کانی مارادۆنا له‌ سکالۆنی زۆر قورسن و ده‌ڵێت: سکالۆنی ناتوانێت ڕۆڵی پۆلیسێکی هاتوچۆش ببینێت له‌سه‌رشه‌قامه‌کان؟

من هه‌میشه‌ ده‌ڵێم، باس له‌بۆچونی خۆم ده‌که‌م، نه‌ک که‌سانی تر.

نادادپه‌روه‌ر بویت به‌رامبه‌ر ئارمانی گۆڵپارێز؟

ئارمانی له‌ دۆخێکی باشدا بوو، به‌ڵام به‌هه‌مان شێوه‌ کاپایرۆ به‌رامبه‌ر ئیتاڵیا له‌ ئاستێکی ناوازه‌ی پێشکه‌ش کرد، هه‌روه‌ک چۆن له‌ ئه‌وروپا یاریی ده‌کات سودی به‌ پێکهاته‌که‌مان ده‌گه‌یاند، ئه‌وه‌ش له‌ ئارمانی-دا بونی نه‌بوو، ئارمانی هه‌رگیز ڕووبه‌ڕوی یاریزانه‌ ئه‌وروپیه‌کان نه‌بۆته‌وه‌، مۆندیال به‌نسبه‌ت ئه‌و گۆڵپارێزه‌وه‌ کاتی تێپه‌ڕی بوو، گه‌یشتینه‌ قۆناغی کۆمه‌ڵه‌کانی مۆندیالی ڕوسیا و به‌خێرایی چوینه‌ نێو ململانێکانه‌وه‌، کاتی زۆرمان له‌به‌رده‌ستدا نه‌بوو، به‌تایبه‌ت بۆ هه‌ڵبژاردنی یاریزانی نوێ.

مه‌به‌ستیشت له‌ دیبالا و ئیکاردیه‌؟ باسی ئه‌و دوو یاریزانه‌ ده‌که‌یت؟

ئێمه‌ پێویستمان به‌ بردنه‌وه‌ی یه‌کلاکه‌ره‌وه‌ هه‌بوو، هه‌ندێک یاریزانیش له‌دوای حه‌وانه‌کانه‌وه‌ ڕاسته‌وخۆ بانگهێشتکرابون، فاینه‌ڵی کۆپا ئه‌مریکایان خسته‌ پشت خۆیان، ماوه‌ی ئاماده‌کاریه‌کان به‌نسبه‌ت ئه‌وانه‌وه‌ زۆر کورت بوو، خاوه‌نی لیستێکی ١٠٠ یاریزانی بوین به‌هه‌موو ئاسته‌کانه‌وه‌، نه‌مانده‌توانی جێگه‌ی هه‌مووان بکه‌ینه‌وه‌ له‌ یه‌ک پاڵه‌وانێتیدا، پڕۆژه‌کانی ئێمه‌ سه‌ره‌تا ماوه‌ کورت بوو دواتر ده‌چوین بۆ قۆناغی پڕۆسه‌ی مامناوه‌ند و پاشان درێژخایه‌ن، له‌دوای روسیا ئێمه‌یان له‌یه‌کتری دابڕی و نه‌مانتوانی بره‌و به‌توانا نوێیه‌کان بده‌ین.

بێزار نیت له‌ به‌رپرسانی یه‌کێتی تۆپی پێی ئه‌رجه‌نتین؟

به‌پێچه‌وانه‌وه‌، سوپاسیان ده‌که‌م که‌ هه‌لیان پێدام، سه‌رۆکی یه‌کێتی تۆپی پێ پابه‌ندبوو به‌ به‌ڵێنه‌کانیه‌وه‌، له‌کاتی پیوێسیتدا ئاماده‌ بوو، چی به‌ تاپیا و هاوڕێیانی بڵێم که‌ ئه‌وانیش قوربانی شکسته‌کانی یه‌کێتی تۆپی پێی پێشوی وڵاته‌که‌ بوون.

بەردەوام بە لە خوێندنەوە

چاوپێکەوتن

ئیتۆ: هه‌ڵبژاردنی مۆدریچ هیچ له‌ڕاستیه‌که‌ ناگۆڕێت و وه‌رزی داهاتو مباپێ تۆپی ئاڵتونی به‌ده‌ست ده‌هێنێت

خه‌ڵک سپۆرت – لایت فوتباڵ کله‌پ

ساموێل ئیتۆی کامیرۆنی ئه‌ستێره‌ی پێشوی یانه‌ی به‌رشلۆنه‌ به‌شداری به‌رنامه‌ی “لایت فوتباڵ کله‌پ”ی تایبه‌ت به‌ که‌ناڵ پله‌سی فه‌ره‌نسی ده‌کات، له‌وه‌ڵامه‌کانیدا ئاماژه‌ به‌چه‌ندین بابه‌تی په‌یوه‌ندیدار ده‌کات به‌ ژیانی تایبه‌تی و وه‌رزشی خۆی، هه‌روه‌ها په‌یام ئاراسته‌ی یانه‌ی پاریس سانت جێرمان و به‌تایبه‌ت نایماری به‌رازیلی ده‌کات.

ئه‌مه‌ش کورته‌یه‌که‌ له‌چاوپێکه‌وتنه‌که‌:

ساموێل ئیتۆ ژیانێکی له‌بواری تۆپی پێ به‌ڕێکرد و چه‌ندین یانه‌ و خولی کرد، بۆچی هه‌رگیز په‌یوه‌ندیت به‌‌ یانه‌یه‌کی فه‌ره‌نسیه‌وه‌ نه‌کرد؟

کاتێک به‌رشلۆنه‌م به‌جێهێشت، ڕۆژێکیان براکه‌م هاته‌لام و پێی وتم که‌ سه‌رۆکی یانه‌یه‌کی فه‌ره‌نسی ده‌یه‌وێت قسه‌ت له‌گه‌ڵدا بکات، منیش داواکه‌م قبوڵکرد و قسه‌م له‌گه‌ڵ کرد، به‌ڵێ سه‌رۆکی یانه‌ی لیۆنی فه‌ره‌نسی بوو و پاره‌یه‌کی زۆری خسته‌ به‌رده‌ستم، ته‌نانه‌ت خۆشم سه‌رم سوڕما.

ئه‌ی بۆچی په‌یوه‌ندیت پێوه‌ نه‌کردن؟

زۆرینه‌ی بڕیاره‌کان دوای بیرکردنه‌وه‌ی یاریزانان خۆیان ده‌بێت، له‌و کاته‌دا له‌گه‌ڵ فه‌لسه‌فه‌ی به‌رشلۆنه‌ خۆم گونجاندبوو، بۆیه‌ ده‌مویست په‌یوه‌ندی به‌ یانه‌یه‌که‌وه‌ بکه‌م نازناوی خولی یانه‌ پاڵه‌وانه‌کانم بۆ مسۆگه‌ر بکات، پێش پاره‌ بیرم له‌وه‌ ده‌کرده‌وه‌ بۆیه‌ په‌یوه‌ندی به‌ ئیته‌رمیلانه‌وه‌ کرد نه‌ک لیۆن.

یانه‌ی نیم به‌هه‌مان شێوه‌ پڕۆسه‌یه‌کیان ده‌ستپێکرد بۆ کۆکردنه‌وه‌ی پاره‌ بۆ ئه‌وه‌ی تۆ بکڕن…

به‌ڵێ، منیش ئاماده‌بووم به‌شداری پڕۆسه‌که‌ بکه‌م (به‌پێکه‌نینه‌وه‌).

چۆن به‌شداریت ده‌کرد؟

له‌ڕاستیدا بیرۆکه‌ی پڕۆسه‌که‌ زۆر جوان بوو به‌لامه‌وه‌، بۆیه‌ ویستم خۆشم به‌شداری بکه‌م.

دوای یانه‌ی کۆنیا سپۆری تورکی په‌یوه‌ندیت به‌ یانه‌ی قه‌ته‌ره‌وه‌ کرد له‌ خولی قه‌ته‌ری، چۆن ئه‌م بڕیاره‌ت دا؟

زۆرێک له‌ وڵاتان گه‌ڕاوم و ئه‌زمونم به‌ده‌ست هێناوه‌، وه‌ک ده‌زانن وڵاتی قه‌ته‌ر ڕێکخه‌ری مۆندیالی ٢٠٢٢وه‌ و بیرم له‌وه‌کرده‌وه‌ که‌ سود له‌و ئه‌زمونه‌ش وه‌رده‌گرم، بۆیه‌ کاتێک زانیم منیان ده‌وێت به‌بێ بیرکردنه‌وه‌ قایل بووم.

ته‌مه‌نت هه‌ڵکشاوه‌، که‌ی بڕیاری وازهێنان ده‌ده‌یت؟

لێره‌وه‌ بڕیاری خۆمتان پێ ڕاده‌گه‌یه‌نم، تا وه‌رزی داهاتو به‌رده‌وام ده‌بم و له‌ ته‌مه‌نی ٣٩ ساڵیدا وازهێنان ڕاده‌گه‌یه‌نم، پێموانیه‌ هاوشێوه‌ی جۆرج ویا بچمه‌ بواری سیاسه‌ته‌وه‌، به‌ڵکو هه‌وڵ ده‌ده‌م له‌بواری ڕاهێناندا جێگه‌ی خۆم بکه‌مه‌وه‌، به‌تایبه‌ت ڕاهێنانی یانه‌یه‌کی کیشوه‌ری ئه‌وروپا.

بۆچی ئه‌وروپا؟

له‌به‌رئه‌وه‌ی له‌ ئه‌وروپا هیچ راهێنه‌رێکی ئه‌فریقیتان نییه‌.

له‌ئاهه‌نگی (فیفا) لیۆ مێسی هاوڕێت به‌شداری نه‌کرد له‌به‌رئه‌وه‌ی پاڵێوراو نه‌بوو، ڕات چییه‌؟

که‌سه‌کان مافی خۆیانه‌ کێ هه‌ڵده‌بژێرن، مۆدریچ یان کریستیانۆ یان سه‌ڵاح وه‌رزی رابردوو ئاستیان باش بوو، به‌ڵام به‌نسبه‌ت من و هاوبیره‌کانمه‌وه‌ که‌س له‌ مێسی به‌تواناتر نییه‌ و له‌جیهاندا یاریزانێکی هاوشێوه‌ بونی نییه‌، دڵنیاین لیۆ باشترینی مێژووه‌ و هه‌ڵبژاردنی مۆدریچ هیچ له‌و ڕاستیه‌ ناگۆڕێت.

چ ئامۆژگاریه‌کت بۆ پاریس سانت جێرمان هه‌یه‌ بۆ ئه‌وه‌ی نازناوی چامپیۆنز لیگ بچنێته‌وه‌؟

له‌ناخی دڵمه‌وه‌ حه‌ز ده‌که‌م له‌م وه‌رزه‌دا پاریس سانت جێرمان نازناوی خولی یانه‌ پاڵه‌وانه‌کان به‌ده‌ست بهێنێت، ئاشکرایه‌ پێکهاته‌ی ئێستایان زۆر به‌توانایه‌ و هه‌موو خه‌سڵه‌تێکی پاڵه‌وانبونی تێدایه‌، پێویسته‌ له‌سه‌ریان یه‌کگرتو بن و به‌ڕوحیه‌تی به‌ کۆمه‌ڵ یاریی بکه‌ن، هه‌موان بینیمان فه‌ره‌نسا چۆن به‌و ئه‌قڵیه‌ته‌ نازناوی مۆندیالی چنییه‌وه‌.

ئه‌ی چ ئامۆژگارییه‌کی نایمار دا سیلڤای به‌رازیلی و ڕابه‌ری پێکهاته‌که‌ ده‌که‌یت؟

هه‌مومان ده‌زانین نایمار له‌توانایدایه‌ لێسه‌ندن به‌هه‌موو یاریگا بکات، به‌ڵام ده‌شمانه‌وێت ببینین له‌گه‌ڵ هاوڕێکانی به‌رگری بکات، چونکه‌ به‌رگریکاران پێویستیان به‌ یارمه‌تی هێرشبه‌رانه‌، ئێمه‌ تائێستا ته‌نها کاڤانی-مان بینیوه‌ ئه‌و ڕۆڵه‌ ده‌بینێت، ڕه‌نگه‌ له‌داهاتوشدا کیلیان مباپێ هه‌مان ئه‌رک بگرێته‌ ئه‌ستۆ، به‌ڵام بێگومان سومبولی یه‌که‌می پاریس نایماره‌، ئه‌گه‌ر بۆ ١٠ جار یاریده‌ی هاوڕێکانی بدات ئه‌وانه‌ی تریش لاسایی ده‌که‌نه‌وه‌ و دوای ده‌که‌ون، به‌وشێوه‌یه‌ کاتێک یاریزانان ده‌بینن نایمار ده‌گه‌ڕێته‌وه‌ و به‌رگری ده‌کات، یاریزانه‌کانی تر ده‌ڵێن ئه‌وه‌ نایماره‌ ئه‌و ئه‌رکه‌ جێبه‌جێ ده‌کات ئێمه‌ چین تا هه‌مان هه‌نگاو نه‌نێین؟!

باسی کیلیان مباپێ-ت کرد، ڕات چییه‌ ده‌رباره‌ی ئه‌و یاریزانه‌؟

پێموایه‌ وه‌رزی داهاتو خه‌ڵاتی تۆپی ئاڵتونی به‌ده‌ست ده‌هێنێت، به‌ڕای من مباپی له‌ماوه‌ی ١٥ ساڵی داهاتودا ده‌بێته‌ جێنشینی لیۆ مێسی، به‌و مه‌رجه‌ی داهاتوی به‌شێوه‌ی گونجاو به‌ڕێبکات، له‌وه‌ تێبگات چ ئه‌رکێکی له‌سه‌ره‌، چونکه‌ دڵنیام چه‌ندین بابه‌ت هه‌یه‌ په‌یوه‌ندی به‌ ئاست و هونه‌ری یاریزانانه‌وه‌ نییه‌، به‌ڵکو ژیانیان کاریگه‌ری دروست ده‌کات، هیوادارم له‌داهاتودا بتوانم قسه‌ی له‌گه‌ڵ بکه‌م.

بەردەوام بە لە خوێندنەوە

چاوپێکەوتن

ڕۆناڵدۆ: دوو ڕوو نیم، کێشی خۆم که‌مده‌که‌مه‌وه‌ و له‌گه‌ڵ یاریزانانی ڤه‌له‌د وه‌لید ده‌ست به‌ ڕاهێنان ده‌که‌م

خه‌ڵک سپۆرت – ئیل نۆرتی دی کاستێلا

ڕۆناڵدۆ نازاریۆ دالیمای به‌رازیلی ئه‌فسانه‌ی ناسراو به‌ “دیارده‌” چاوپێکه‌وتنێک له‌گه‌ڵ ڕۆژنامه‌ی “ئیل نۆرتی دی کاستێلا”ی ئیسپانی ئه‌نجام ده‌دات و تیایدا به‌شێوه‌یه‌کی ورد باسی مه‌سه‌له‌ی کڕینی یانه‌ی ڤه‌له‌د وه‌لید و ئامانجه‌کانی له‌م هه‌نگاوه‌ بازرگانیه‌ ده‌کات.

ئه‌مه‌ش کورته‌یه‌که‌ له‌چاوپێکه‌وتنه‌که‌:

گرنگیدان به‌یانه‌ی تر

“له‌چه‌ندین یانه‌ی تره‌وه‌ ئۆفه‌رم به‌ده‌ست ده‌گه‌یشت، به‌ڵام من سه‌رده‌مێک بوو له‌گه‌ڵ کارلۆسی هاورێم بۆ کڕینی یانه‌ی ڤه‌له‌د وه‌لید له‌ گفتوگۆدا بووم، سه‌ره‌ڕای ئه‌وه‌ش بابه‌ته‌که‌ سه‌رسامی نه‌کردبوم و زۆر له‌ قه‌رزه‌ که‌ڵه‌که‌بووه‌کانی سه‌ر ئه‌م یانه‌یه‌ ده‌ترسام، به‌ڵام جارێکی تر قسه‌مان کرده‌وه‌ و گه‌یشتینه‌ ئه‌نجام، بابه‌ته‌که‌‌ بزنسه به‌شێوه‌یه‌کی تر‌، له‌به‌رئه‌وه‌ی تۆپی پێ بریتیه‌ له‌ کۆمپانیایه‌کی گه‌وره‌، پێموایه‌ ده‌توانم به‌شداری سه‌رخستنی یانه‌که‌ بکه‌م و یاریده‌ده‌ربم بۆ بوژاندنه‌وه‌ی شاره‌که‌ به‌گشتی، بۆ ئه‌م بابه‌ته‌ پشتم به‌ خه‌ڵکی ناوچه‌که‌ به‌ستووه‌”.

 

“ئه‌و پاره‌یه‌ی داومه‌ به‌کڕینی یانه‌ی ڤه‌له‌د وه‌لید، پاره‌ی تایبه‌تی خۆم بووه‌ و من هیچ کۆمپانیایه‌کی وه‌به‌رهێنانم نییه‌”

 

وه‌به‌رهێنان و پاڵپشتی وه‌به‌رهێنه‌ران

ئه‌وه‌ی ده‌وترێت ڕاست نییه‌، دڵنیاتان ده‌که‌مه‌وه‌ که‌ هیچ گروپێکی وه‌به‌رهێنانم نییه‌، خاوه‌نی هیچ کۆمپانیایه‌کی وه‌به‌رهێنان نیم له‌ئێستادا که‌ تایبه‌تبێت به‌ کڕینی یانه‌کان و فرۆشتنه‌وه‌یان به‌ نرخی گونجاو، به‌ڵکو ئه‌وه‌ی دراوه‌ به‌م یانه‌یه‌ پاره‌ی تایبه‌تی خۆم بووه‌، ئه‌وه‌ خه‌ونی من بووه‌ و به‌ پڕۆژه‌ی داهاتوی ده‌زانم له‌ژیانمدا”.

کارکردن له‌گه‌ڵ ده‌سته‌یه‌کی نوێ

بێگومان له‌گه‌ڵ چه‌ند که‌سێک به‌یه‌که‌وه‌ هاوکاری یه‌کتر ده‌بین و کارده‌که‌ین بۆ سه‌رخستنی یانه‌که‌، پێموایه‌ دوو ڕوو نابم ئه‌گه‌ر بڵێم من گرنگی به‌ بزنس و وه‌به‌رهێنان ناده‌م و ئه‌و بابه‌ته‌ به‌لامه‌وه‌ گرنگ نه‌بووه‌، به‌ڵکو ده‌مه‌وێت به‌وپه‌ڕی توانامه‌وه زۆرترین پاره‌ بۆ یانه‌که‌ کۆبکه‌مه‌وه‌، ده‌مانه‌وێت یانه‌که‌ له‌هه‌موو ڕووه‌کانه‌وه‌ باشتر و به‌هێزتر بکه‌ین، چونکه‌ پاره‌ هه‌موو شتێک نییه‌ و به‌ پاره‌ یاریی ناکرێت، به‌ڵکو پێشکه‌وتن به‌ هه‌زاران کارمه‌ند ده‌کرێت که‌ ڕۆژانه‌ لێره‌ کارده‌که‌ن”.

 

“له‌گه‌ڵ یاریزانانی ڤه‌له‌د وه‌لید به‌شداری مه‌شقه‌کان ده‌که‌م‌، بێگومان ئه‌وه‌ش به‌ڕێکه‌وتن له‌گه‌ڵ ڕاهێنه‌ر ده‌بێت تا بتوانم له‌ڕووه‌ تاکتیکی و وه‌رزشیه‌کانه‌وه‌ که‌مێک یاریده‌ده‌ریان بم”

 

بونیادی نوێی ڤه‌له‌د وه‌لید

ئێستا سه‌رقاڵی بونیادنانه‌وه‌ی یانه‌که‌ین و کاتێکی زۆرمان ده‌وێت تا ده‌که‌وینه‌ سه‌رپێ، مانگی ڕابردو چاودێری بازاڕی گواستنه‌وه‌کانمان ده‌کرد و پاره‌یه‌کی که‌می مافه‌کانی په‌خشی ته‌له‌ڤیزیۆنیمان به‌ده‌سته‌وه‌ بوو، به‌شێکی زۆری بۆ قه‌رزه‌ که‌ڵه‌که‌بووه‌کان و وه‌زاره‌تی دارایی وڵاته‌که‌ ڕۆیشت، هه‌ندێک پاره‌شمان بۆ نۆژه‌نکردنه‌وه‌ی یاریگای یانه‌که‌ ته‌رخان کرد، به‌ڵام نه‌مانتوانی هه‌موو کاره‌کان به‌یه‌ک گوژمه‌ ئه‌نجام بده‌ین”.

بۆچونه‌کان بۆ وه‌رزی یه‌که‌م

من نه‌هاتوم بۆ ئێره‌ تا یاریی بکه‌م و له‌ڕووی جه‌سته‌ییه‌وه‌ ئه‌و توانایه‌م نییه‌، به‌ڵام ده‌ست به‌ مه‌شق و ڕاهێنان ده‌که‌م تا له‌ڕووی جه‌سته‌ییه‌وه‌ گونجاو و ئاماده‌بم، ‌دوای ئه‌وه‌ له‌گه‌ڵ لاوانی پێکهاته‌ی یه‌که‌م به‌شداری یه‌که‌ی مه‌شق و ڕاهێنانه‌کان ده‌که‌م‌، بێگومان ئه‌وه‌ش به‌ڕێکه‌وتن له‌گه‌ڵ ڕاهێنه‌ر ده‌بێت تا بتوانم له‌ڕووه‌ تاکتیکی و وه‌رزشیه‌کانه‌وه‌ که‌مێک یاریده‌ده‌ریان بم، ئه‌وه‌ش یه‌کێکه‌ له‌ پڕۆژه‌کانی داهاتومان که‌ به‌گرنگی ده‌زانین.

نوێکردنه‌وه‌ی یاریگا

یاریگاکه‌مان یه‌کێک نییه‌ له‌باشترینه‌کانی جیهان و خاوه‌نی ژووری خۆگۆڕینی ناوازه‌ نین، به‌ڵام ده‌مانه‌وێت له‌داهاتودا کارێک بکه‌ین ئاسانکاری بۆ یاریزانان و هه‌مووان بکه‌ین.

بەردەوام بە لە خوێندنەوە
حکومەتی داهاتووی هەرێمی کوردستان دەتوانێت خزمەتی هاوڵاتیان بکات؟

کوردستان

دوایین