نان 8ی كرایەوە بە هەزار دینار
قائیمقامیەتی قەزای رانیە بڕیاریدا بە پابەند كردنی لە سەرجەم نانەواخانەکان، كە 8 نان بدەن بە هەزار دینار و دەشڵێت: “هەر نانەواخانەیەك پابەندی بڕیارەکە نەبێت سزادەدرێ”.
قائیمقامیەتی قەزای رانیە لە ڕاگەیەندراوێکدا ئاماژەی بەوەکردووە، ” سەرجەم نانەواخانەکان پابەند کران 8 نان بکرێت بە هەزار دینار و بە کێشی 100 غرام بۆ هەر نانێک.”
ڕاشیگەیاندووە، بەهۆی پابەندنەبوونیان بە بڕیارەکە، نانەواخانەیەک داخراوە و پێنج نانەواخانە غەرامەکراون، بەهۆی کەمی وەزنی گونكەكانیان”.
لە ساڵی ڕابردوودا و دوای سەرهەڵدانی شەڕی نێوان ڕوسیا و ئۆكراینا نرخی ئارد و گەنم و غاز گران بوو، هاوكات نرخی كارەباش لەسەر شوێننە بازرگانییەكان گران كرا بەو هۆیەوە نان و سەمون گران بوو، كە 6 دانەی كرا بە هەزار دینار، بەڵام دواتر حكومەتی هەرێم نرخی كارەبا و غازی بۆ نانەواخانە و سەموونخانەكان كەم كردەوە و هاوكات نرخی ئارد و گەنمیش ڕووی لە دابەزینەوە كرد.
پێشتر، سۆران عەبدولغەفور، بەڕێوەبەری چاودێری بازرگانی سلێمانی بۆ (خەڵك) ڕایگەیاند، كە یاداشتیان داوە بە قائیمقامیەتی سلێمانی تاوەكو نرخی 8 نان بكرێتەوە بە هەزار دینار.
